 |
|
|
“Kiyev may-oktyabr aylarında Rusiyaya hücumu intensivləşdirəcək. Lakin bu, bizi qorxuda və Ukraynanın şərtləri ilə Rusiya üçün əlverişsiz sülhə məcbur edə bilməz".
Teref.az "Qafqazinfo"ya istinadən xəbər verir ki, bunu Rusiya Federasiya Şurasının müdafiə və təhlükəsizlik komitəsinin rəhbəri Viktor Bondarev deyib.
O bildirib ki, Ukrayna Silahlı Qüvvələrinin hazırkı gözləmə mövqeyi onunla bağlıdır ki, Qərb hərbi texnikası su və hava şəraitində döyüşməyə uyğunlaşdırılmayıb. Bu, gələn aydan ukraynalıların hücumu intensivləşdirməyə çalışacaqlarını göstərir.
Ukrayna Rusiyaya müqəddəs Ramazan ayı şərəfinə əsir götürülən bütün müsəlmanları dəyişdirməyi təklif edib. Moskva belə bir təşəbbüsdən imtina edib.
Bu barədə Ukrayna Prezident Aparatının rəhbərinin müşaviri Darya Zarivnaya danışıb.
“Biz İslam mədəniyyətinə və adət-ənənələrinə hörmət əlaməti olaraq hər iki tərəfdən əsir müsəlmanların hamısının mübadiləsi təklifi ilə çıxış etdik. Təəssüf ki, Rusiya tərəfi bu ideyanı çox həvəssiz qarşıladı”, - Zarivnaya bildirib.
Onun sözlərinə görə, belə bir təşəbbüs Ukraynanın əsirlərin mübadiləsi ilə bağlı çoxsaylı qərarlarından biridir.
Mənbə: rbc.ua
“Biz Aprel hadisələrinin 7-ci ilini qeyd edirik. Hesab edirəm ki, düşmən təxribatlarının qarşısını almaq məqsədilə ordumuzun həyata keçirdiyi 4 günlük cavab tədbirləri Azərbaycan ordusunun 1994-cü il mayın 12-də atəşkəs haqqında razılaşma imzalanandan sonra hansı gücdə olduğunu bütün bölgəyə və dünyaya nümayiş etdirdi”.
TEREF.AZ bildirir ki, bu sözləri Musavat.com-a hərbi ekspert, ehtiyatda olan polkovnik Üzeyir Cəfərov deyib.
Polkovnik xatırladıb ki, Azərbaycan ordusu 1994-cü il mayın 12-nə qədər Horadiz əməliyyatı aparmışdı və Füzuli istiqamətində 22 yaşayış məntəqəsini, o cümlədən Cəbrayılın bir yaşayış məntəqəsini düşməndən geri almışdı:
“Amma təəssüflər olsun ki, o vaxt bəzi qüvvələr erməniləri xilas etdi. 2016-cı ildə düşmənin bizim yaşayış məntəqələrimizə, o cümlədən ön xətdə olan mövqelərimizə açdığı atəşi cavablandırdıq. Bu, qürurverici bir tarixdir. Ona görə ki, Azərbaycan ordusu bu döyüşlərdə nəyə qadir olduğunu göstərdi. Qısa bir müddətdə Tərtər rayonunun Talış kəndi ətrafındakı strateji yüksəkliklərin, o cümlədən başqa bir istiqamətdə Lələtəpə və Cəbrayılın Cocuq Mərcanlı yaşayış məntəqəsinin geri alınması kimi hadisələrlə yaddaşımıza yazıldı. Tərtərin keçmiş Madagiz kəndində (Suqovuşan) düşmən qərargahının məhv edilməsi yaxın tariximizdə olub.
Hesab edirəm ki, Aprel döyüşləri bizim üçün qürurvericidir. Həmin döyüşlərdə biz xalq, ordu olaraq torpaqlarımızı heç bir halda düşmənə və ona havadarlıq edənlərə güzəştə getməyəcəyimizi bütün dünyaya nümayiş etdirdik. Aprel döyüşləri bizə inam verdi, atəşkəsdən sonra xalqımızın öz ordusuna inamını, güvənini daha da artırdı. Biz Aprel döyüşlərində Raquf Orucov kimi qəhrəmanımızı itirdik, digər şəhidlərimiz oldu. Bizim əfsanəvi generalımız Polad Həşimov da o istiqamətdə döyüşlərdə iştirak edirdi. Sonradan onun xidmət yeri başqa bir yerə dəyişdirildi. Bir sözlə, Aprel döyüşləri düşmənə bir siqnal idi. Amma onlar vaxtında o siqnaldan nəticə çıxarmadılar. Tovuz döyüşləri və Vətən müharibəsi düşmənin ağır məğlubiyyəti ilə yadda qaldı.
Hesab edirəm ki, 2016-cı il Aprel döyüşlərinin iştirakçılarına layiq olduqları qiymət hələ verilməyib. Ən azından o döyüşlərdə iştirak edən şəxsi heyətin əksəriyyəti hələ də döyüşlərin iştirakçısı kimi müharibə veteranı adı almayıb. Biz bu məsələni dəfələrlə gündəmə gətirsək də, nədənsə müvafiq qurumlar bunu qulaqardına vurur”.
General-polkovnik Rüstəm Muradov Ukraynada hərbi əməliyyatlara rəhbərlikdən kənarlaşdırılıb və Rusiya Federasiyası Şərq Hərbi Dairəsi komandanı vəzifəsindən azad edilib.
TEREF.AZ Moderator.az-a istinadla xəbər verir ki, bu barədə "The Moscow Times" qəzeti yazıb.
Məlumatlara görə, general Uqledar ətrafında uğursuzluqlar və ciddi itkilər səbəbindən vəzifəsini itirib.
Uqledarın alınması Rusiya ordusuna Avdeyevka ətrafında Ukrayanın istehkamlarından yan keçməyə və Donbasa geniş hücum üçün yol açmağa imkan verə bilərdi.
Nəşrin həmsöhbətlərindən birinin sözlərinə görə, Muradovdan çox adam şikayət edib, çünki "əsgərlərə aşkar ölümə getməyi əmr edən ağıldankəm və sarsaq olub".
50 yaşlı Muradov keçmişdə Rusiyanın Suriyadakı qoşunlarının komandanı olub, Dağlıq Qarabağda "sülhməramlılara" rəhbərlik edib.
Üç gün ərzində Uqledar ərafında dəniz piyadalarının iki elit briqadasını, 103 vahid hərbi texnika, o cümlədən 36 tank itirib.
"Muradov bir-birinin ardınca qüvvələri kiçik mexanikləşdirilmiş hissələrlə minalanmış ərazilərə və açıq yerlərə göndərib və heç nəyə nail olmayıb", - hərbi analitik Maykl Kofman deyib.
Lakin, onun fikrincə, cəbhənin mühüm sahəsində komandanın dəyişilməsi, çətin ki, Rusiya ordusuna hər hansı irəliləyişə nail olmağa kömək etsin.
Kofman hesab edir ki, rusiyalıların "başlıca problemləri qüvvələrinin keyfiyyəti ilə bağlıdır və onları həll etmək asan məsələ deyil".
Muradovun istefası barədə məlumat onun təyinatından (5 oktyabr 2022-ci il) cəmi 7 ay sonra, martın sonunda üzə çıxıb.
Bu barədə ilk olaraq bu yaxınlarda Piter kafesində partlayış nəticəsində həlak olan Z-bloger Vladlen Tatarski məlumat verib.
Bu məlumat digər KİV-lərə də yayılıb, o zaman bir sıra hərbi ekspertlər iddia edib ki, general, sadəcə, məzuniyyətə çıxıb.
İsrailin baş naziri Benyamin Netanyahu hesab edir ki, İran nüvə silahına çıxış əldə edərsə, bütün dünya bu dövlətin girovluğunda olacaq.
Redaktor.az xəbər verir ki, bu barədə o, "Twitter" səhifəsində bildirib.
"İranın nüvə silahı əldə etməsinə mane olmasaq, özümüzü başqa bir reallıqda tapacağıq ki, bütün dünya bizi məhv etmək istəyən bir tərəfin girovluğunda olacaq", - İsrailin baş naziriyazıb.
Netanyahu əlavə edib ki, bu səbəbdən İranın nüvə silahı əldə etməsinin qarşısını almaq İsrail üçün əsas vəzifədir.
1990-cı illərdə Ukraynanın nüvəsizləşdirilməsi ilə bağlı roluma görə çox peşmanam.
Axar.az xəbər verir ki, bu barədə ABŞ-ın eks-prezidenti Bill Klinton deyib.
O bildirib ki, Rusiya nüvə silahı olan Ukraynaya hücum edə bilməzdi:
“Şəxsən iştirakımı hiss edirəm, çünki mən onları (Ukrayna) nüvə silahından imtinaya razı salmağa məcbur etdim. Ukrayna öz silahına sahib olsaydı, Rusiya hücuma keçə bilməzdi”.
Rusiya Federasiyasının silahlı qüvvələri Qara dənizdəki gəmi qruplaşmasını 15 vahidə çatdırıb.
Lent.az-ın məlumatına görə, bu barədə “Cənub” Əməliyyat Komandanlığının “Facebook” sosial şəbəkəsindəki səhifəsində məlumat verilib.
“Cənub-şərq istiqamətində düşmən aviasiyasının fəaliyyəti fonunda Qara dənizdə gəmi qruplaşmasının 15 vahidə, o cümlədən 2-si su altında olan 6 raketdaşıyıcıya çatdırılması son dərəcə yüksək raket təhlükəsindən xəbər verir”, məlumatda deyilir.
“Türkiyə beşinci nəsil döyüş təyyarəsi istehsal edən beşinci ölkə olacaq”.
Bu barədə Türkiyə Müdafiə Sənayesi Nazirliyinin rəhbəri İsmail Demir məlumat verib.
“Milli döyüş təyyarəmiz tanınmış beşinci nəsil döyüş təyyarəsidir. Dünyada beşinci nəsil döyüş təyyarəsi istehsal edən cəmi dörd ölkə var. Biz də beşinci olacağıq”, – deyə o bildirib.
“Təyyarəmiz hələ çox mərhələlərdən keçməlidir. Hazırda bütün sistemlər quraşdırılıb və artıq yoxlamalar aparılmalıdır. Siz təyyarənin gövdəsini və mühərrikini görə bilərsiniz, lakin içərisində çoxlu sistemlər var”, – deyə İsmail Demir qeyd edib.
Nazir təyyarənin uçuş tarixi ilə bağlı dəqiq rəqəm bildirməyib. “Təyyarənin uçuş tarixi ilə bağlı məsələlərə ehtiyatla yanaşırıq. Çünki mühəndislər hazırlayıblar, amma uçuşa yararlılıq mərhələsində hər şey bir-bir yoxlanılmalıdır. Məqsədimiz ən qısa zamanda uçuşa nail olmaqdır. Lakin 3-5 aylıq bir tarix vermirik, rahat şəkildə bir il çəkəcək bir prosesdən danışırıq”, – deyə o əlavə edib.
“Milli döyüş təyyarəsi dedikdə məqsədimiz beşinci nəsil təyyarə istehsal etməkdir. Çox müasir elektron sistemlərlə təchiz edilmiş, çox erqonomik kabinəyə və tam rəqəmsal kokpitə, radara görünməzlik kimi xüsusiyyətlərə malik olan beşinci nəsil dediyimiz təyyarələrdə olan bütün texnologiyalara sahib bir təyyarə planlaşdırırıq. Hətta bəzi cəhətlərdən daha yaxşı funksiyalara malik olacaq”, – deyə nazir vurğulayıb.
Gununsesi.info
İsrail Hərbi Hava Qüvvələri Suriyadan ölkənin hava məkanına daxil olmağa cəhd göstərən pilotsuz uçuş aparatını (PUA) məhv edib.
Modern.az "Ynet"ə istinadən xəbər verir ki, İran istehsalı PUA-nın Hizbullaha məxsus olduğu iddia edilir.
İsrail müdafiə qüvvələri ərazini mühasirəyə alaraq PUA-nı məhv edib. Hazırda PUA-nın hissələri axtarılır.
Pilotsuz uçan aparatın kəşfiyyat və ya zərbə tipli olması hələlik məlum deyil.
ABŞ Silahlı Qüvvələrinə məxsus ER-3E kəşfiyyat təyyarəsi bazar günü İranın hava sərhədləri yaxınlığında görünüb.
Məlumata görə, hadisə Oman körfəzi üzərində baş verib. Təyyarə qeydə alındıqdan sonra İran Hərbi Dəniz Qüvvələri tam hazırlıq vəziyyətinə gətirilib. Təyyarənin ekipajına isə xəbərdarlıq göndərilib.
Qeyd edək ki, kəşfiyyat təyyarəsi “Lockheed Martin” şirkəti tərəfindən istehsal edilib və ABŞ Hərbi Dəniz Qüvvələri tərəfindən idarə olunur.
“Flightradar24” xidmətinin məlumatına görə, təyyarə Oman körfəzi üzərində səmada İran sərhədi boyunca uçuşunu davam etdirir. (Oxu.az)