 |
|
|
Martın 5-də Xankəndi-Xəlfəli-Turşsu torpaq yolunda baş vermiş insidentdən sonra Rusiya sülhməramlı kontingentinin müşayiəti ilə Ermənistan silahlı qüvvələri və qeyri-qanuni erməni silahlı dəstələrinin bu yoldan hərbi təyinatlı daşımaları həyata keçirmək məqsədilə növbəti dəfə istifadə etməsi Azərbaycan Ordusunun bu istiqamətdə yerləşən bölmələrinin texniki müşahidə vasitələri ilə qeydə alınıb.
Bu barədə Azərbaycan Müdafiə Nazirliyindən bildirilib.
Martın 7-də gün ərzində Ermənistan silahlı qüvvələri və qeyri-qanuni erməni silahlı dəstələrinin hərbi nəqliyyat vasitələrinin qeyd olunan yoldan kolon şəklində hərəkəti Rusiya sülhməramlı kontingentinin müşayiəti altında təmin edilib. Ermənistanın təkzibinə və riyakarlığına baxmayaraq, texniki müşahidə vasitələri ilə yolun hərbi daşımalar üçün istifadə edildiyi bir daha təsbit olunub.
Rusiya sülhməramlı kontingentinin müşayiəti ilə hərbi daşımaların həyata keçirilməsi üçtərəfli Bəyanatın müddəalarının kobud şəkildə pozulması olaraq qəbuledilməz haldır və dərhal dayandırılmalıdır.
Bir daha bəyan edirik ki, Ermənistan tərəfindən Azərbaycanın Qarabağ iqtisadi rayonunda yerləşən qeyri-qanuni erməni silahlı dəstələrinə silah, sursat, mina, təminat və digər hərbi vasitələrin çatdırılması, eləcə də bu yolla döyüş mövqelərinə şəxsi heyətin daşınması və rotasiyası Azərbaycanın suverenliyinin, üçtərəfli Bəyanatın müddəalarının kobud şəkildə pozulması və Azərbaycana qarşı hərbi təcavüz siyasətinin davam etdirilməsidir. Bu kimi əməllərə dərhal və birdəfəlik son qoyulmasa, Ermənistanın və qanunsuz erməni hərbi ünsürlərinin Azərbaycanın suveren ərazilərində törətdikləri hərəkətlərin qarşısını almaq məqsədilə Azərbaycan tərəfi zəruri tədbirlər görmək məcburiyyətində qalacaqdır.
Baş verən hadisələr Laçın yolu üzərində Azərbaycanın nəzarət rejiminin yaradılmasının zəruriliyini və labüdlüyünü bir daha təsdiq edir.
“Təəssüf hissi ilə qeyd edirik ki, martın 6-da Rusiya Federasiyası Müdafiə Nazirliyi dünən Xankəndi-Xəlfəli-Turşsu torpaq yolunda baş vermiş silahlı insidentlə bağlı yaydığı bülletendə faktları təhrif etmiş və həqiqəti əks etdirməyən məlumat yayıb”.
Bu barədə Azərbaycan Müdafiə Nazirliyinin açıqlamasında bildirilir.
Açıqlamada qeyd olunur:
“Bildiririk ki, martın 5-də operativ məlumatlar əsasında Ermənistandan qanunsuz hərbi daşınmalar həyata keçirən erməni hərbi birləşmələrinin nəqliyyat vasitəsinin Azərbaycan Ordusunun bölmələri tərəfindən saxlanılaraq yoxlanılmasına cəhd göstərilib. Nəqliyyat vasitəsinə yaxınlaşarkən avtomobilin içərisində olan erməni silahlı dəstəsinin üzvləri tərəfindən hərbi qulluqçularımız avtomat silahlardan atəşə tutulmuş və nəticədə iki hərbçimiz şəhid olmuş, biri isə yaralanmışdır. Cavab atəşi ilə qeyri-qanuni erməni dəstəsinin üç üzvü məhv edilmiş və biri yaralanmışdır.
Silah-sursatla tam təchiz olunmuş bu hərbi qulluqçuların “pasport və viza” xidməti həyata keçirən polis əməkdaşları kimi təqdim edilməsi riyakarlıqdan başqa bir şey deyildir.
İnsident nəticəsində yaralanan hərbi qulluqçularımıza Rusiya sülhməramlı kontingentinin nümayəndələri tərəfindən ilkin tibbi yardımın göstərilməsi və təxliyə edilməsi barədə yayılan məlumat da həqiqəti əks etdirmir. Şəhidlərimizin və yaralı hərbçimizin ərazidən təxliyəsi hərbi qulluqçularımız tərəfindən həyata keçirilmişdir.
Üçtərəfli bəyanatın müddəalarına zidd olaraq Ermənistan tərəfindən Azərbaycanın Qarabağ iqtisadi rayonundakı qeyri-qanuni erməni silahlı dəstələrinə silah, sursat, təminat və digər hərbi vasitələrin daşınması davam etdirilir, eləcə də şəxsi heyətin rotasiyası həyata keçirilir. Bu kimi qəbuledilməz halların qarşısının dərhal alınması məqsədilə Rusiya sülhməramlı kontingenti üzərinə düşən vəzifələri yerinə yetirməlidir.
Xüsusilə qeyd edirik ki, Ermənistan tərəfindən Azərbaycana qarşı aparılan mina terroru siyasəti hələ də davam etdirilir. Dəfələrlə tərəfimizdən xəbərdarlıq edilməsinə baxmayaraq qanunsuz yollarla Azərbaycana daşınan və ərazimizdə basdırılan minaların qurbanı mülki vətəndaşlarımız və hərbi qulluqçularımız olur. Belə ki, martın 4-də Qarabağ iqtisadi rayonunda baş vermiş mina partlayışı nəticəsində daha bir hərbi qulluqçumuz şəhid olmuşdur. 2021-ci ildə Ermənistanda istehsal olunan minaların Laçın yolundan istifadə edilərək kütləvi şəkildə Azərbaycan ərazilərinə gətirilməsi və basdırılması faktları müəyyən olunmuş, Türkiyə-Rusiya birgə monitorinq mərkəzinin nümayəndələrinin və hərbi attaşelərin həmin əraziyə faktaraşdırıcı səfəri təşkil olunmuşdu.
Ermənistanın və qanunsuz erməni hərbi birləşmələrinin bu kimi əməllərinə və hərbi qulluqçumuzun şəhid olmasına cavab olaraq 2022-ci ilin avqust ayında Azərbaycan Ordusu tərəfindən “Qisas” əməliyyatı həyata keçirilmişdir.
Bir daha xəbərdarlıq edirik ki, Ermənistan tərəfindən Azərbaycan ərazisinə hərbi təyinatlı yüklərin daşınmasına, Ermənistan silahlı qüvvələrinin şəxsi heyətinin göndərilməsinə və rotasiyasına dərhal və birdəfəlik son qoyulmalı, Ermənistan qoşunları ölkəmizin ərazisindən tam çıxarılmalıdır. Əks təqdirdə Azərbaycan tərəfi bütün imkanlardan istifadə etməklə qeyri-qanuni silahlıların tərksilah edilməsi və zərərsizləşdirilməsi istiqamətində qəti zəruri tədbirlər görmək məcburiyyətində qalacaqdır.
Ermənistanın bu kimi əməlləri hərbi təcavüzün davam etdirilməsi kimi qiymətləndirilir.
Baş vermiş hadisələr və Ermənistanın ölkəmizin suveren ərazilərinə qanunsuz hərbi daşımaları davam etdirməsi Azərbaycan ərazisində olan Laçın yolunda nəzarət rejiminin təmin edilməsinin zəruriliyini bir daha təsbit edir”.
Yaponiya yeni H3 raketinin ilk buraxılışını həyata keçirdi.
Lent.az xəbər verir ki, bu barədə Yaponiya Aerokosmik Agentliyi (JAXA) məlumat yayıb.
Buraxılış Kaqosima prefekturasındakı Taneqaşima kosmodromundan uğurla həyata keçirilib.
Qeyd olunur ki, raketin buraxılışı müxtəlif səbəblərdən üç dəfə təxirə salınıb.
30 oktyabr 2022-ci ildə Yaponiya Müdafiə Nazirliyinin məlumat toplamaq üçün orbitə inteqrasiya olunmuş 50 peykin orbitə buraxılmasını nəzərdən keçirdiyi bildirildi.
Rusiya nüvə silahı yaratmaq üçün İrana zənginləşdirilmiş uran verməyə razılaşıb.
Editor.az bildirir ki, bu barədə “Fox News”a Amerika kəşfiyyatındakı mənbələr məlumat verib. İddia olunur ki, ölkələr arasında bağlanan gizli razılaşma nüvə materiallarının dərhal daşınmasını nəzərdə tutmur. Moskva 2015-ci ilin qondarma “nüvə sazişi”ndə İrandan aldığı zənginləşdirilmiş uranı Tehrana qaytaracağına söz verib.
Çatdırılma ABŞ-ın keçmiş prezidenti Donald Trampın dayandırdığı “nüvə sazişini” bərpa etməkdən nəhayət imtina ediləcəyi təqdirdə baş tutacaq. Keçmiş Müdafiə Kəşfiyyat Agentliyinin analitiki Rebekka Kofflerin fikrincə, məxfi razılaşmanın bu formatı Kremlin İrandan istədiyini almaq arzusu ilə izah olunur.
Bunun müqabilində əhəmiyyətli bir şey vermədən və onu gələcək əməkdaşlıqda maraqlı buraxır: “Bir tərəfdən İranın nüvə silahına malik olmasını istəmirlər, digər tərəfdən isə Ukraynaya qarşı müharibədə İrandan kömək tələb edirlər. Bu, həm Putinə hər iki tərəfə təsir rıçaqları verir, həm də ABŞ-ın ondan asılı olduğuna işarə edir”, – Koffler deyib.
Çeçenistanın rəhbəri Ramzan Kadırov qondarma “DXR ordusu”ndan yaraqlıları öz qoşunlarına cəlb etməyə başlayıb.
Editor.az Milli Müqavimət Mərkəzinə istinadən qeyd edir ki, bu proses Rusiya Federasiyasında gələcək hakimiyyətin bölgüsü ilə bağlıdır. Kadırovun Donetsk vilayətinin işğal olunmuş ərazilərində təsiri artır və onun yaraqlıları orada özlərini ağa kimi hiss edirlər. “Kadırovçular” “asayişin təmin edilməsi” arxasında gizlənərək vilayətlərdə qarətlə məşğuldurlar.
Qondarma “DXR” lideri Denis Puşilin isə Çeçenistanda yerləşən Xüsusi Təyinatlı Qüvvələr Universitetində “DXR” yaraqlılarının “təlim”inə razılıq verib: “Bu, Kadırovun TTO-ya təsirini daha da gücləndirir, çünki indi faktiki olaraq o, Qaleiterlərin şəxsi mühafizəsinə cavabdeh olacaq şəxsləri öyrədəcək.
Bundan əlavə, Kadırovun şəxsi mühafizəsi yeni simalar ilə tamamlanır ki, bu da güclərin yenidən bölüşdürülməsində balansı dəyişir” – bəyanatda qeyd olunur. Mərkəz onu da qeyd edib ki, “Kadırovçularlar” demək olar ki, birbaşa döyüş əməliyyatlarında iştirak etmirlər ki, bu da döyüş meydanında itki və məğlubiyyətlər fonunda işğalçılarda əsəbilik yaradır.
Rusiya sülhməramlıları Azərbaycan tərəfi atəşkəsi pozmaqda ittiham edib.
KONKRET.az xəbər verir ki, Rusiya Müdafiə Nazirliyinin Azərbaycanın Qarabağ bölgəsində RHK-nın fəaliyyəti ilə bağlı 6 mart tarixli məlumat bülletenində Azərbaycanın atəşkəs rejimini pozduğu bildirilir.
Bəyanatda separatizmə və Azərbaycanın ərazi bütövlüyünə hörmətsizliyə açıq dəstək verilir.
Rusiya MN-nin məlumatında “Dağlıq Qarabağın Hüquq Mühafizə Orqanının əməkdaşları” kimi ifadələr yer alıb.
Bundan əlavə, Azərbaycan ərazilərinin adı düzgün yazılmayıb.
Qeyd edək ki, Azərbaycan MN daha əvvəl bir neçə dəfə Rusiya MN-ə bu cür səhvlərə görə irad tutub.
Rusiya indiyədək İrandan müxtəlif sayda və növdə pilotsuz uçuş aparatları (PUA) alsa da, hələlik ballistik raketlərini almaqdan çəkinib.
Modern.az xəbər verir ki, bu barədə "Financial Times" qəzeti məlumat yayıb.
Bildirilir ki, Ukraynanın Qərb müttəfiqlərinin cavab olaraq Kiyevə 300 km-ə qədər mənzilli ATACMS raketləri verəcəyindən narahat olduğu üçün Rusiya indiyədək İran ballistik raketlərini almayıb.
Qərb rəsmiləri qeyd edirlər ki, Moskva öz döyüş sursatı çatışmazlığı səbəbindən İran raketləri ilə bağlı mövqeyini dəyişə bilər.
Xatırladaq ki, idiyədək ABŞ Ukraynanın Rusiya ərazisinə zərbələr endirmək üçün istifadə edə biləcəyi əsas gətirərək, Kiyevin 300 km-dən çox mənzilli ATACMS raketləri ilə bağlı müraciətlərini rədd edib.
Baş nazir Nikol Paşinyan Almaniyada erməni icmasının nümayəndələri ilə görüşdə deyib ki, Ermənistanın dərin iqtisadi, o cümlədən daxili təhlükəsizlik, demokratik inkişaf baxımından heç bir problemi yoxdur. Yəni demək istəyib ki, iqtisadi və sosial məsələləri həll edir, zəif müxalifət də ona problem yaratmır, əsas problemi Azərbaycanla qarşıdurmayla bağlıdır. Halbuki Paşinyan Azərbaycanın ərazi bütövlüyünü tanıyan sülh sazişini imzalamağı qəbul etsə, məsələ bitəcək.
DİA.AZ xəbər verir ki, bu sözləri politoloq Elxan Şahinoğlu qeyd edib.
Politoloq Paşinyan Almaniyada ermənilər qarşısında daha bir diqqət çəkən açıqlama verdiyini vurğulayıb:
“Paşinyan deyir: “Təhlükəsizlik sistemlərindən danışırıq, amma nədənsə təhlükəsizlik sistemlərimizin bizə xəyanət etdiyini demirik. Belə çıxır ki, biz əslində sabun köpüyünə çevrilən təhlükəsizlik faktorlarına etibar etmişik? Belə çıxa bilərmi ki, bizi aldadırlar, yoxsa biz özümüzü aldadırıq?”
Paşinyan üstüörtülü dediyi sözlərin mənası budur:
1. Rusiya və Kollektiv Təhlükəsizlik Müqaviləsi Təşkilatı Ermənistana xəyanət etdi;
2. Ermənistanın təhlükəsizliyinə cavabdeh olan bunların hər ikisi sabun köpüyü idi.
Başqa bir nəticə isə budur ki, Nikol Paşinyan ordusunun gücünü də itirdiyini etiraf edib”.
E.Şahinoğlunun fikrincə, Paşinyan Qarabağ yükünü daşıya bilmir, ancaq bu o demək deyil ki, həmin yükdən Kreml və Ermənistandakı “Qarabağ klanı” imtina edib:
“Azərbaycan hərbçilərinə qarşı təxribatları planlaşdıran məhz bu iki gücün birliyidir. Separatçıların dinməz olmaları gərəkirkən Azərbaycan hərbçilərinə atəş açırlarsa, onları kənardan dəstəkləyənlər var”.
Qeyd edək ki, Xankəndi-Xəlfəli-Turşsu torpaq yolundan istifadə edilməklə Ermənistan Respublikasından hərbi ləvazimatların, silah-sursatın və şəxsi heyətin Rusiya sülhməramlı kontingentinin müvəqqəti yerləşdiyi Azərbaycan ərazilərinə daşınması barədə məlumatlar daxil olub. Martın 5-də səhər saatlarında daxil olmuş məlumatın yoxlanması məqsədilə qanunsuz hərbi daşınmalar həyata keçirən nəqliyyat vasitələri Azərbaycan Ordusunun bölmələri tərəfindən saxlanılaraq yoxlanılmasına cəhd göstərilib.
Qarşı tərəfdən atəş açılıb. Nəticədə Ordumuz şəhid verib, erməni separatçıların 3 zabiti məhv edilib, bir nəfər isə yaralanıb.
“Ukraynadakı münaqişə yalnız atəşkəs yolu ilə başa çatdırıla bilər”.
“Report” xəbər verir ki, bunu Macarıstanın xarici işlər və ticarət naziri Peter Siyarto “SVT” kanalına müsahibəsində deyib.
“İlk məqsəd insanları öldürməyi dayandırmaqdır. Və bu atəşkəs razılığı deməkdir”-deyə, nazir bildirib.
Onun sözlərinə görə, Avropanın Rusiyaya qarşı tətbiq etdiyi sanksiyalar münaqişəni dayandıra bilməyib: “Artıq 10 sanksiya paketi qəbul etmişik, bu, münaqişənin həllinə gətirib çıxarıb? Yox. Bu, Rusiyanı diz üstə çökdürüb? Yox. Sanksiyalar, yalnız Avropaya zərər verdi. Silah göndərmirik, sülh üçün oynamağa davam edirik”.
Azərbaycan Ordusunun hərbi qulluqçusu Hüseynov Kamran Namiz oğlunun martın 4-də xidməti vəzifələrini yerinə yetirərkən ermənilər tərəfindən basdırılmış minaya düşərək həlak olub.
Bu barədə Azərbaycanın Müdafiə Nazirliyindən bildirilib.
“Müdafiə Nazirliyinin rəhbərliyi şəhid hərbi qulluqçumuzun ailəsinə və yaxınlarına dərin hüznlə başsağlığı verir, səbir diləyir.
Allah rəhmət eləsin”, – Azərbaycanın Müdafiə Nazirliyindən əlavə olunub.