Xoy şəhərində zəlzələ fəsadlarından əziyyət çəkən uşaqlar minnətdarlıqlarını bildirdikləri videonu lentə alıblar.

Bu barədə görüntülər sosial şəbəkələrdə yayımlanıb.

Həmin görüntüləri təqdim edirik:

Rusiyaya qarşı yeni sanksiyalar 10 milyard avro məbləğində məhdudiyyətlər nəzərdə tutur.

Bu barədə Avropa Komissiyasının Prezidenti Ursula von der Layen Kiyevdə Aİ-Ukrayna sammitinin yekunlarına dair mətbuat konfransında deyib.

Xatırladaq ki, Aİ-nin Rusiyaya qarşı 10-cu sanksiya paketi fevralın 24-nə qədər qəbul olunmalıdır.
TASS

"Rumıniya Azərbaycanın səmimi və əsl dostudur. Rumıniyanın mövqeyi hər zaman bəlli olub. Biz ölkələrin ərazi bütövlüyünü və suverenliyini hər zaman dəstəkləmişik".

"Report" xəbər verir ki, bu barədə Rumıniya Prezidenti Klaus Yohannis Azərbaycan Prezidenti İlham Əliyev ilə birgə mətbuata bəyanatında
Rusiyanın Ukraynaya qarşı təcavüzünü və Qara dəniz hövzəsi regionundakı vəziyyəti Prezident İlham Əliyevlə müzakirə etdiklərini diqqətə çatdıran Klaus Yohannis deyib: “Belə bir mürəkkəb vəziyyətdə həmrəyliyin vacibliyini vurğuladıq və bu məsələlərdə Azərbaycanın da mövqeyini yüksək qiymətləndirdik”.

Rumıniya Prezidenti bildirib ki, regional əməkdaşlıq, mənbə və marşrutların şaxələndirilməsi Cənub Qaz Dəhlizi kimi layihələrin təməl prinsipinə əsaslanır.

“Həm Cənub Qaz Dəhlizi və həm də gələcək yaşıl enerji ilə bağlı Qara dənizin altı ilə inşa ediləcək layihə Azərbaycanın bərpaolunan enerji mənbələrini Avropaya gətirəcək".

Bunu Rumıniya Prezidenti Klaus Yohannis Azərbaycan Prezidenti İlham Əliyev ilə birgə mətbuata bəyanatında deyib.

"Hər iki layihə Avropa İttifaqının rəhbərliyi tərəfindən ciddi şəkildə dəstəklənir. Bu məsələləri biz cənab Prezident Əliyevlə müzakirə etdik”, - deyə Rumıniya Prezidenti bildirib.

"Tiflis Saakaşvili məsələsindən Qərb və Rusiya ilə bəzi məsələlərdə hansısa əlavə alver predmeti kimi istifadə edir”.

TEREF.AZ yazır ki, bunu Qaynarinfo-ya açıqlamasında jurnalist, ictimai əlaqələr sahəsi üzrə mütəxəssis Arif Əliyev Gürcüstan hökumətinin keçmiş Prezident Mixail Saakaşvilini hələ də həbsdə saxlamasına və ona işgəncələr verildiyi barədə məlumatlara münasibət bildirərkən deyib:

"Zelenskinin Saakaşvilinin taleyilə bağlı dediklərinin onun azad edilməsinə nə dərəcədə təsirinin olub-olmayacağını demək çətindir.Amma Zelenskinin davranışı iki səbəbdən təqdirəlayiqdir. Çünki Saakaşvili həm Ukrayna vətəndaşıdır. Eyni zamanda, Saakaşvilinin müraciəti olmuşdu. Sabiq Gürcüstan Prezidentilə bağlı gürcü hökumətinin davranışı bir çox ölkələrdə təəccüb doğuran davranışdır. Onun gürcü xalqının taleyi, Gürcüstanın hazırkı vəziyyətində böyük rolu olub. Bilyimizə görə, Gürcüstan cəmiyyətinin özündə də hökumətin Saakaşviliyə bu cür davranışından narazılıq kifayət qədər güclüdür”.

Həmsöhbətimiz bildirir ki, Qərbdə Saakaşviliyə münasibətdə indiki vəziyyətdə ehtiyatla davranır:

"İndi Qərbin diqqəti digər münaqişə və problemlərin həllinə yönəlib. Digər tərəfdən, Qərb Tiflislə arasında son zamanlar soyuqlaşan münasibətlərdə bu faktoru birbaşa səsləndirməsə də, ayrı-ayrı görüşlərdə bu məsələyə toxunub. Amma Tiflislə Qərb arasında başqa problemlər də mövcuddur. Onun nəticəsidir ki, Gürcüstanın Qərbə inteqrasiya məsələsi Ukrayna və Moldova ilə müqayisədə bir qədər arxaya atılıb. Bu fonda ola bilsin ki, Tiflis Saakaşvili məsələsindən Qərb və Rusiya ilə bəzi məsələlərdə hansısa əlavə alver predmeti kimi istifadə edir. Hazırda Tiflisin həm Rusiya, həm də Qərblə münasibətlərində yaranmış vəziyyət olduqca qarışıqdır”.

Saakaşvili ətrafında yaranan vəziyyət digər tərəfdən, Gürcüstan hökumətinə kənardan rəhbərlik edən İvanişvilinin düşmənçilik münasibətinin göstəricisidir:

"Baxmayaraq ki, Saakaşvili dinc və sivil yolla seçkilə hakimiyyəti təhvil verdi. Buna baxmayaraq, sonrakı mərhələdə onun hökumətlə mübarizəsi İvanişvili ilə çox kəskin münasibətlərə səbbə oldu. Yəqin ki, bu məsələdə qisasçılıq faktorunun da rolu vardır”.

Qeyd edək ki, Ukrayna Prezidenti Volodimir Zelenski Avstriya Prezidenti Aleksandr van der Bellenlə keçirdiyi mətbuat konfransında Gürcüstan hakimiyyətinin Mixail Saakaşviliyə açıq şəkildə işgəncələr verdiyi və onu öldürməyə cəhd etdiyini bildirib. Zelenski Ukrayna vətəndaşına ictimai şəkildə işgəncə verildiyini deyib:

"Mən Gürcüstanın keçmiş prezidentinin niyə həbs edildiyini, bunun Gürcüstan siyasəti üçün hansı nəticələrə gətirib çıxara biləcəyi sualını müzakirə etmirəm. Bu, onların daxili işidir. Mən bir nəfərin həbsindən danışıram. Hər gün ictimai işgəncələrə məruz qalan Ukrayna vətəndaşı Mixail Saakaşvilinin həbsindən danışıram. Düşünürəm ki, hökumət nümayəndələrinin məqsədi onu öldürməkdir”.

Türkiyə Prezidenti Rəcəb Tayyib Ərdoğan ölkəsinin yerli istehsalı olan ikinci "Togg” elektromobilinin Azərbaycanın dövlət başçısı İlham Əliyevə veriləcəyini açıqlayıb.

"Report” xəbər verir ki, Türkiyə lideri bu barədə TRT-nin efirində bildirib.

Ərdoğan bildirib ki, istehsal olunacaq ikinci elektromobili Azərbaycan Prezidenti İlham Əliyev istəyib: "Dərhal növbəyə İlham bəy (Prezident İlham Əliyev-red) keçdi. Əliyev ikincini mənə verin dedi".

Qeyd edək ki, kütləvi istehsaldan sonra ilk elektromobilin sahibinin Ərdoğan olduğu vurğulanır. Dövlət başçısı qeyd edib ki, həyat yoldaşı Əminə Ərdoğanla məsləhətləşdikdən sonra öz avtomobilinin rəngi ilə bağlı seçim qərarını Türkiyənin birinci xanımının öhdəsinə buraxıb.

Xatırladaq ki, Türkiyənin yerli avtomobili "Togg”un Gəmlikdəki zavodu ötən ilin 29 oktyabrında açılıb. Zavodun açılışı ilə yerli avtomobilin kütləvi istehsalı prosesi başlanıb.

Türkiyə Prezidenti Rəcəb Tayyib Ərdoğan xanımı Əminə Ərdoğanla birlikdə "Togg" elektromobilini sınaqdan keçirib. Dövlət başçısı "Gemlik" zavodunun işçiləri qarşısında çıxışı zamanı bildirib ki, il ərzində 175 min avtomobil istehsal olunacaq, 2030-cu ilə qədər istehsal 1 milyonu ötəcək.

Qazaxıstanın Sənaye və Ticarət Nazirliyi ölkənin Rusiyadakı ticarət nümayəndəliyinin ləğvi ilə bağlı sənəd layihəsi hazırlayıb.

Sənəd ictimai müzakirəyə təqdim edilib. Onun müzakirəsi iki həftə davam edəcək.

Rusiya və Qazaxıstan 1992-ci ilin oktyabrında nümayəndəliklərin yaradılması haqqında saziş imzalayıblar. Sənəd 2012-ci ildə ratifikasiya olunub. Rusiyada Qazaxıstanın ticarət nümayəndəliyi 2009-cu ildə açılıb, Moskvada yerləşir, Kazanda da bölməsi var.

Mənbə: Kommersant

İran hakimiyyəti Azərbaycanın Tehrandakı səfirliyinə edilən silahlı hücumu terror aktı kimi tanımaqdan imtina edərək ailə-məişət zəminində baş vermiş münaqişə kimi təqdim etməyə çalışır.

Hətta hadisənin baş verdiyi ilk dəqiqələrdən İranın həm rəsmiləri, həm də kütləvi informasiya vasitələri Yasin Hüseynzadənin guya həyat yoldaşını avtomat silahla xilas etməyə gəldiyinə dair açıqlama verməsi terror faktını gizlətmək məqsədi daşıyırdı.

İranın polis orqanları, Xarici İşlər Nazirliyi, parlamentin spikeri Məhəmməd Bağır Qalibaf istintaqın nəticələrini gözləmədən səfirliyə silahlı hücumu terror fəaliyyəti kimi qiymətləndirməyin əleyhinə çıxıb. Hətta Azərbaycan XİN-in yaydığı açıqlamada qeyd edilir ki, İran baş vermiş terror aktının beynəlxalq təşkilatlarda geniş işıqlandırılmasının qarşısını almağa çalışıb.

Ancaq çox keçmədən aşkara çıxan məlumatlar hadisənin nəinki terror əməli olduğunu sübut etdi, üstəlik bu cinayətin arxasında İran hakimiyyətinin, daha dəqiq desək İslam İnqilabı Keşikçiləri Korpusunun (SEPAH) dayandığı məlum oldu.

Qeyd edilir ki, Mərənd şəhərinin Yuxarı Yekan kəndində anadan olan 54 yaşlı Yasin (Səfər) Hüseynzadə İran-İraq müharibəsi zamanı SEPAH sıralarına qatılıb.

O, qısa müddət ərzində müharibədə 31-ci Aşura diviziyasında da iştirak edib. 1999-cu ilə qədər Təbrizdə SEPAH qərargahında yük maşını sürücüsü işləyib və SEPAH-dan könüllü olaraq təqaüdə çıxıb. Yasin 1999-2006-ci illərdə Mərənddəki Yaldur məscidinə bağlı “Bəsic” qüvvələrinin komandanı olub. O, indi də həmin "Bəsic" bazası ilə əlaqəsini davam etdirir. Hətta onun Təbrizdə “Bəsic” və SEPAH qüvvələri ilə birlikdə son aylar Bükan və Marağada baş verən anti-hökumət etirazlarının dağıdılmasında iştirak etdiyi barədə məlumatlar var.

Hücum edənin keçmiş və indiki əlaqələrini və SEPAH-la əməkdaşlığını nəzərə alsaq, terror aktının dəqiq və planlaşdırılmış əməliyyat olduğunu söyləmək mümkündür.

Onun silahı necə əldə etməsi ilə bağlı yayılan məlumatlar da terror aktının arxasında İran rejiminin dayandığını təsdiqləyir.

Yasin Hüseynzadə “Kalaşnikov" AK-47 silahı səfirliyə hücum edib. Azərbaycan səfirliyinin təhlükəsizlik əməkdaşının dediyinə görə, həmin silahın seriya nömrəsi saxtalaşdırılıb. Avtomatın qundağının yeganə aydın seriya nömrəsi N-12067-dir ki, bu da İran daxilində nömrələnib. Silahın İran Silahlı Qüvvələrinə məxsus olmadığı qeyd olunsa da, aşkar edildikdən sonra 25 iyun 2019-ci ildə Lorestan əyalətinin polis idarəsinin İctimai Təhlükəsizlik Komandanlığı tərəfindən qəbul edilib və ən azı 2021-ci ilin mart ayına qədər Zəncan əyalətinin polis qüvvələri tərəfindən aşkar edilən silah-sursat anbarında saxlanılıb.

Bütün bu faktlar İran hakimiyyəti tərəfindən Azərbaycana qarşı terror təxribatlarının davam edəcəyi ehtimalını yaradır. Çünki rəsmi Tehran diplomatik korpusun immunitetini və təhlükəsizliyini nəinki təmin etməyib, üstəlik bu terrorun arxasında İran hakimiyyətinin dayandığı aşkara çıxıb. Yəni söhbət bir dövlətin öz ərazisində yerləşən digər dövlətin diplomatik heyətinə qarşı rəsmi səviyyədə təşkil olunmuş qəsdən adam öldürmə cinayətindən gedir. İstintaq bu məlumatları təsdiq edərsə, İrana qarşı beynəlxalq sanksiyalar gündəmə gələ bilər.

Güney Azərbaycan Milli Oyanış Hərəkatının İdarə Heyətinin üzvü Ağrı Qaradağlı Cebhe.info-ya açıqlamasında bildirib ki, İran hakimiyyətinin Yasin Hüseynzadənin əlindəki silahdan başqa terror aktlarının törədilməsində istifadə edildiyi də istisna edilmir:

“Terror hadisəsi baş verdiyi ilk saatlardan biz bu cinayətin arxasında İslam İnaqilabı Keşikçiləri Korpusunun dayandığını bilirdik. Sadəcə bu faktı sübut etməyə ehtiyac var idi. İran Xarici İşlər Nazirliyinin nümayəndələri və başqa rəsmiləri Azərbaycan dövlətinin adını çəkə bilmir, deyirlər ki, Bakı səfirliyinə edilən silahlı hücum şəxsi məsələdir. Bunlar hamısı Azərbaycana qarşı kin və düşmənçilik münasibətindən irəli gəlir.

İkincisi, Yasin Hüseynzadənin SEPAH-ın və ya “Bəsic” qüvvələrinin üzvü olması bəlli idi. Biz hadisənin baş verdiyi ilk dəqiqələrdən onun ya “Hüseyniyyun”, ya da “Fatimiyyun” terror təşkilatlarından biri tərəfindən törədildiyini demişdik. Hətta dünən Yasin Hüseynzadənin keçmiş həyat yoldaşı da onun “Hüseyniyyun” terror qruplaşmasının üzvü olduğunu deyib. Bu təşkilat da SEPAH-a bağlı terror qruplaşmasıdır.

İran xüsusilə də Azərbaycanda, İraqda, Suriyada bu terror qruplarından istifadə edir və insanları öz təsirini altına salmağa çalışır. Yasin Hüseynzadə ilə bağlı üzə çıxan başqa faktlar da terrorun həyata keçirilməsində istifadə olunan “Kalaşnikov” silahının ona İran hüquq-mühafizə orqanları tərəfindən verildiyini təsdiq edir. Belə ki, 2019-cu ildə bir terrorçunun əlində yaxalanmış həmin silah Zənganın İctimai Asayişi Mühafizə qüvvələrinin deposunda saxlanırmış. Bir il öncə bu silah anbardan çıxarılıb.

O zaman sual olunur: Necə olunur ki, intizam qüvvələrinin, yəni rejimin əlində olan silah bu terrorçunun əlinə keçib? Deməli, bu silah İnqilab Keşikçiləri Korpusu tərəfindən alınıb və Yasin Hüseynzadəyə verilib. Hətta başqa terror aktlarında da həmin silahldan istifadə olunduğu istisna olunmur. Bu göstərir ki, İranın terror faktını gizlətməyə çalışsa da, bu cinayət rəsmi Tehranın, yaxud SEPAH-ın tapşırığı ilə həyata keçirilib. Yasin Hüseynzadəni də bu işə cəlb etməklə terroru ailə münaqişəsi kimi göstərmək istəyiblər”.

Ağrı Qaradağlının sözlərinə görə, İran dünya ölkələri üçün təhlükə mənbəyinə çevrilib:

"Bu baxımdan, beynəlxalq ictimaiyyət İran rejiminə qarşı ciddi tədbirlər görməlidir. İran artıq zəhərli ilana çevrilib. Ona görə də İranın qarşısını almasalar qarşısına çıxanı sancacaq.

Yalnız Azərbaycan deyil, dünya ictimaiyyəti də bundan xəbərdar olmalıdır. İrana tətbiq edilən sanksiyaların sayı artırılmalıdır. Azərbaycan dövləti başqa ölkələrdə yaşayan diaspora vasitəsilə beynəlxalq səviyyədə bu məsələni gündəmə gətirməli və bildirməlidir ki, İran rejimindən başqa dövlətlər də zərər çəkə bilər. Ona görə də biz bu məsələni ciddiyə alıb ayıq olmalıyıq.
Bu baxımdan, Daxili İşlər Nazirliyi tərəfindən İranın Azərbaycandakı bir qrup casus şəbəkəsinin ifşa edilməsi də müsbət haldır.

Hesab edirəm ki, Azərbaycanın Təbriz şəhərindəki konsulluğunun təhlükəsizliyinin təminatı Tehrandakı səfirlikdə olduğu kimi deyil.Konsulluğa kimsə basqın edə bilməz. Diplomatik təmsilçiliyimizi mühafizə etmək Azərbaycan xalqının vəzifəsidir. Tehranda səfirliyin mühafizəsinə cavabdeh olan İran polisi terrorçunu görən kimi qaçıb. Halbuki, orada iki nəfər polis nəfəri dayanmalıdır. Onların biri binanın girişinin sağ tərəfində, digəri sol tərəfində mühafizə işini yerinə yetirməlidir. Məndə olan məlumata görə, digər səfirliklərin də mühafizəsinə iki nəfər polis ayrılıb. Amma Azərbaycan səfirliyinə bir nəfə polis ayrılmışdı ki, o da terrorçunu görən kimi ərazini tərk edərək qaçıb”.

Qeyd edək ki, İran rejiminin terror əməlini məhz Mərnddən olan Güney azərbaycanlının əli ilə törətməsi təsadüf hesab olunmur. Bu, İran rejiminin Şimali və Cənubi Azərbaycan türkləri arasında qarşıdurma yaratmaq, beləliklə bütövləşmə ideyasına zərbə vurmaq planının tərkib hissəsi sayılır.

Ağrı Qaradağlının fikrincə, İran rejimi terror və təxribat əməllərini hətta Azərbaycan vətəndaşları, yaxud başqa millətə mənsub olan şəxslər vasitəsilə də həyata keçirə bilər:

“Səfirliyə silahlı hücumu Qumda təhsil almış və İranın xüsusi xidmət orqanları ilə əməkdaşlığa cəlb olunmuş, “Hüseyniyyun” terror təşkilatına qoşulmuş Tohid Eminbəyli, Rza Ağalı kimi adamların da əli ilə həyata keçirə bilərdilər.

İran rejiminin milli düşüncədən məhrum olmuş, tarixini bilməyən, manqurt adamlardan istifadə etməsi mümkündür. Ona görə də bir nəfərin cinayətini bütünlüklə Güney Azərbaycan məsələsinə aid etmək olmaz. Əlbəttə, İran rejimi Güney və Quzey Azərbaycanı qarşı-qarşıya gətirmək istəyir. Lakin İran hakimiyyəti nə qədər belə palnlar hazırlasa da, bizi bir-birimizdən ayıra bilməz”.