Zəlzələ bölgəsində maraqlı anlar yaşanır. Hazırda bölgədə 7000 xilasedici çalışır.
- Onların arasında 160 nəfərlik ispan xilasedicilər də var. Dünən isə ispanlar qəribə vəziyyətlə üzləşiblər. Belə ki, nahar vaxtı öz vəsaitləri hesabına pide almaq istəsələr də, onlardan pul götürməyiblər. “Bu yeyəcəkləri çatdırmağımız üçün bizi yolda saxladılar. Səhər yeməyi və şirniyyat üçün pul ödəməmizə icazə vermilər. Bütün insanlar təcili yardım qrupuna çevriliblər. Unutma, bu hadisənin əsas qəhrəmanları onlardır. Biz sadəcə, ümid qaynağıyıq”.
- Bir alman xilasedici isə dağıntılar altında Zeynəb adlı qızın səsini eşidib, dərhal onu oradan çıxarmağa çalışıb. Zeynəbi sakitləşdirmək istəyən alman xilasedici öyrəndiyi bir neçə türkcə sözlə uşağı sakitləşdirməyə çalışıb. “Zeynəb, qorxma. Burdayıq. Səni oradan çıxaracağıq. Sakit ol. Ok?”
- Fransanın “Charlie Hebdo” jurnalında Türkiyədəki zəlzələ ilə bağlı əxlaqsız karikaturaya ən maraqlı və tutarlı cavabı yunan nəşri verib. Fransızlar zəlzələni göstərərək “Türkiyə dağıntılar altında. Daha tanklara gərək yoxdur” yazmışdılar.
Yunanıstanda nəşr olunan “Kathimerini” qəzeti fransızlara cavab olaraq, ağlayan Ay karikaturasını dərc ediblər.Həmin karikatuirada dağılmış binaların üzərində, hilal şəkilli Ayın ağlaması təsvir olunub. Karikaturanın adı isə “Ay belə ağlayır”dır.
Fikrət Fəraməzoğlu
Teref.az

“Rusiyada iğtişaşlar başlayacaq”.

“RBK Ukraina” xəbər verir ki, bunu Ukrayna Müdafiə Nazirliyinin Baş Kəşfiyyat İdarəsinin nümayəndəsi Andrey Yusov deyib.

O bildirib ki, bu, Ukrayndakı Maydan hadisələri kimi mənalı etiraz yox, iğtişaş olacaq: “Çünki Rusiyada vətəndaş cəmiyyəti yoxdur”.

A.Yusovun sözlərinə görə, iğtişaşların başlanması zaman məsələsidir: “İğtişaşlar rejimin dəyişməsi və yenidən formalaşmaə ilə başa çatacaq”.

Qeyd edək ki, Ukrayna Müdafiə Nazirliyinin Baş Kəşfiyyat İdarəsinin rəisi Kirill Budanov bir müddət əvvəl bildirmişdi ki, müharibədən sonra Rusiya parçalana bilər.

ABŞ İrana qarşı sanksiyaları növbəti dəfə genişləndirib.

Xarici KİV xəbər verir ki, bu barədə ABŞ Maliyyə Nazirliyinin məlumatında deyilir.

Bildirilib ki, yeni sanksiyalar İranın neft-kimya sahəsi ilə məşğul olan şirkətlər daxil olmaqla, 9 şirkətə qarşı tətbiq olunub.

Qeyd edilib ki, ABŞ Maliyyə Nazirliyinin Xarici Aktivlərə Nəzarət İdarəsi (OFAC) İranın neft-kimya sahəsi, neft istehsalı, satışı və Asiyada alıcılara daşınmasında mühüm rol oynayan, yüz milyonlarla dollar dəyərində əməliyyatlar həyata keçirən 9 şirkətə qarşı sanksiyalar tətbiq edib.

Sanksiya tətbiq edilən şirkətlər arasında İranın ən böyük polietilen istehsalçısı olan “Amir Kabir Petrochemical Company” də var.

Türkiyədə baş verən zəlzələlərdən sonra Düşənbə meriyası bütün çoxmərtəbəli binaların möhkəmliyini yoxlamaq barədə göstəriş verib.

Tacikistan paytaxtının Memarlıq və Tikinti Komitəsinin rəhbəri Nizom Mirzozodanın sözlərinə görə, Düşənbədə tikilən və tikilməkdə olan çoxmərtəbəli binalar 8,5-9 bal gücündə zəlzələyə tab gətirmək üçün nəzərdə tutulub.

Onun sözlərinə görə, respublika ərazisində obyektlərin tikintisinə icazə regiondan asılı olaraq, yerli seysmik aktivlik nəzərə alınmaqla verilir.

O, həmçinin qeyd edib ki, Türkiyədə baş verən zəlzələdən sonra binaların, o cümlədən, yaşayış binalarının möhkəmliyi məsələsinə xüsusi diqqət yetiriləcək.

Komitə tikilməkdə olan obyektlərin bünövrə və svaylarının möhkəmliyini yoxlamaq üçün ayrıca laboratoriya yaratmağı planlaşdırır. Yoxlamalar məcburi olacaq.

Mənbə: eadaily.com

Türkiyədə bazar ertəsi səhərə yaxın baş vermiş zəlzələdə indiyədək minlərlə insan olüb, yaralanıb, eləcə də minlərlə bina dağılıb.

Türkiyə hökuməti zəlzələdən dərhal sonra dördüncü səviyyəli həyəcan siqnalı verib ki, bu da beynəlxalq yardım tələbi deməkdir.

Bir çox ölkələr hazırda Türkiyəyə yardım resursları göndərməkdə davam edir. Təhlilçilər hesab edir ki, hava şəraiti axtarış-xilasetmə işlərini çətinləşdirir.

Türkiyə və Suriyada baş vermiş zəlzələ barəsində ən son xəbərləri burada oxuyun
Suriyanın müharibədən zərər çəkmiş Hələb şəhəri Türkiyənin cənubunda da dağıntılara səbəb olan ölümcül zəlzələnin ağır yükünü daşıyan bölgələr arasındadır. Suriya ərazisində axtarış-xilasetmə işlərini "Ağ Dəbilqəlilər" adlandırılan xilasedicilər həyata keçirir.
"Xilasedicilər daha çox cəsəd torbası tələb edirlər"
Böyük Britaniyadan olan "İslami Yardım" xeyriyyə cəmiyyətinin işçisi Salah Aboulgasem humanitar məsələlərdə insanlara kömək etmək üçün Türkiyənin cənub-şərqində yerləşən Gaziantepə gəlib.

"Bir çox müharibə zonalarında və fəlakət bölgələrində olsam da, burada gördüklərim sözün əsl mənasında ən sarsıdıcı məqamlardır", - o bildirib.

Salah Aboulgasem ilk 72 saat ərzində "bacardıqca daha çox insanı xilas etməyə çalışdığını" deyib.

"Bu, həqiqətən də zamana qarşı yarışmaq idi", - o söyləyib.

"Xilasedicilər daha çox cəsəd torbası tələb edirlər, çünki onların dağıntılar altından çıxardıqları cansız bədənlərin sayı çoxdur", - xeyriyyə işçisi əlavə edib.

BBC Radio 5 Live-a danışan Salah Aboulgasem Suriyadakı həmkarlarından da tük ürpədici xəbərlər aldığını deyir. O bildirib ki, Suriyada zəlzələ nəticəsində vəfat etmiş şəxslərin hamısını çatdırıb basdırmaq üçün artıq kütləvi məzarlıqlar qazılır.
"Zəlzələ vergisi"nin istifadəsi ilə bağlı qəzəb artır
Zəlzələnin yaratdığı böyük dağıntılardan sonra 20 ildən çoxdur Türkiyə hökumətinin əhalidən yığdığı "zəlzələ vergisi" ətrafında yaranan şübhələr əhali arasında qəzəbi artırır.

Bu müddət ərzində həmin vergidən yığılan təxminən 88 milyard lirə (4.6 milyard dollar) fəlakətlərin qarşısının alınması və fövqəladə xidmətin keyfiyyətinin yüksəldilməsinə xərclənməli idi.

"Zəlzələ vergisi" 1999-cu ildə Türkiyənin şimal-qərbində 17 min insanın ölümünə səbəb olan zəlzələdən sonra yığılmağa başlanılıb.

Hökumətin "xüsusi kommunikasiya vergisi", sadə vətəndaşların isə "zəlzələ vergisi" adlandırdığı ödəniş ətrafında yaranan suallar ölkədə zəlzələ baş verən bütün tarixlərdə gündəmə gəlib. BBC Türkcənin yazdığına görə, hökumət "zəlzələ vergisi"nin necə xərclənməsi ilə bağlı heç vaxt ictimaiyyətə açıqlama verməyib.

"1999-cu ildən bəri bizdən yığılan vergilər hara gedib?", - 61 yaşlı Celal Deniz AFP agentliyinə müsahibəsində deyib. Onun qardaşı və qardaşı uşaqları hələ də dağıntılar altındadır.
"Bu, xilasetmə cəhdi deyil, çünki burada heç kimin sağ olmadığını bilirlər"
Anna Foster

BBC News

Burada - Maraşdakı mənzərə, episentrə çatana qədər səyahət zamanı müşahidə olunan hər hansı digər ərazidən daha viranədir.

Gecəni bir yaşayış binasının yanında keçirtdim. Bu, əvvəllər hər mərtəbəsində dörd mənzil olan doqquz mərtəbəli bir blok idi. İndi isə sadəcə bir yığıntı, bükülmüş metal və şüşə qırıqlarından ibarət dağıntıdır.

Bu, artıq xilasetmə cəhdi deyil, bu, bərpa cəhdidir, çünki burada heç kimin sağ olmadığını bilirlər.

Onların bu dağıntının böyük hissələrini çıxartmaq üçün istifadə etdikləri böyük bir buldozer var.

Xilasedicilər cəsədləri diqqətlə örtüyə sarıyır və səkidə gözləyən yaxınlarına verirlər.

Meyitlər metal tabutlara qoyulub aparılmazdan əvvəl ölənlərin yaxınlarına vidalaşmaq şansı verirlər.

Yerli vaxtla saat 02:30 radələrində, xilasetmə işləri dayandıqdan sonra üç qohum gəlib onları dağıntıların altından özləri çıxartmağa çalışıblar - nəticəsiz cəhd.

Bu hadisə bir çox ailəni, bir çox adamı şəxsən "vurub".
"Onlar kömək istəyir və əzab içində qışqırırlar"
Quentin Sommerville

BBC News

Adanada gecə boyu işləyən ağır texnikaların, eləcə də dağılmış binaları və böyük beton plitələri işıqlandıran fanarların yaratdığı səhnələr Türkiyənin cənub regionu boyu müşahidə edilir.

Arabir iş dayanır və dağıntılar arasından sağ qalan kimsə tapılan zaman Allahu Əkbər səsləri yüksəlir. Ölən şəxslərin cansız bədəni çıxarıldıqda da eyni səslər eşidilir.

Burada yerli və beynəlxalq dəstəklə həyata keçirilən xilasetmə tədbirləri davam etdirilir. Livandan gələn və içərisində yanğınsöndürən və tibb işçiləri olan təyyarəm Adana hava limanına çatanda artıq aeroport minlərlə rumıniyalı və isveçli xilasedicilərlə dolu idi.

Şəhər evsizlərlə doludur. Onlar evlərini itirənlər və afterşoklardan sonra mənzillərinə qayıtmağa ehtiyat edənlərdir. İlk zəlzələ gecəyarısı yerli vaxtla 03:20-də baş verib. Titrəmə oldu və 90 saniyə davam etdi, sanki heç bitməyəcəkdi. Lakin bu, həm də zəruri əşyaları götürüb təhlükəsiz şəkildə evi tərk etmək üçün yaranan yeganə an idi. Bəziləri ayaqqabısız, palto və telefon adapteri olmadan çölə çıxmışdılar. Həftəsonuna kimi havanın şaxtalı keçəcəyi gözlənilir.

Türkiyə üçün bu fəlakətli olsa da, Suriyanın şimalında vəziyyət daha dəhşətlidir. Sərhədlər ciddi şəkildə nəzarət altında qalmaqdadır və hər hansı beynəlxalq yardım, hətta kiçik yüngül texnika belə yoxdur.

Sərhəd ərazilərdə yaşayan 1.7 milyon məcburi köçkün deyir ki, yaşayışları onsuz da pis idi və indi də zəlzələ baş verdi. Suriya Prezidenti Bashar Al-Assad-in terror hakimiyyətindən canlarını qurtaran və öz ölkələrində qaçqın olan insanlar illərdir ki, müvəqqəti çadırlarda və yarımtikili binalarda yaşayırlar.

Jindires, Hələb, Bania və İdlibdə bütün şəhər dağılıb. Orada insanlar yardım istəyir və əzab içində qışqırırlar.

Lakin onların səslərinə cavab verən demək olar ki, heç kəs yoxdur. Ökənin şimalında 10 ildən çoxdur davam edən müharibə nəticəsində insanlar hər şeylərini itiriblər. Bu dəhşətli zəlzələ isə onların itkilərini ən pik həddə çatdırdı.
Şaxtalı hava şəraiti xilasetmə işlərinə mane ola bilər
Simon King

BBC-nin hava xəbərlərinin aparıcısı və meteorologist

Türkiyənin cənubunda və Suriyanın şimalında müşahidə edilən güclü yağış və qardan sonra həftəboyu hava ümumiyyətlə quraq və günəşli olacaq.

Ölkənin bəzi yerlərində çərşənbə axşamı qar yağması mümkündür, lakin şaxtalı hava şəraiti narahatlığı daha da artırır.

Zəlzələnin ilk baş verdiyi Gaziantep-də gün ərzində 4-6 dərəcə isti olacaq, lakin axşam isə temperatur -7 dərəcəyə düşəcək. Dağlara yaxın kənd və qəsəbələrdə isə temperatur gecə saatlarında -15 dərəcədən də aşağı ola bilər.

Suriyada temperatur bu qədər aşağı olmasa da, gün ərzində temperaturun 10-11 dərəcə isti, gecə isə -3 dərəcəyədək düşəcəyi bildirilir.

Xəbər verdiyimiz kimi növbəti təkanlardan qorxaraq evlərinə getməyən insanlar küçələrdə yandırdıqları ocaqların ətrafında toplanmağa məcbur olub.
Maraş şəhərinə gedən yolda hərəkət dayanıb
Anna Foster

BBC News

Türkiyənin zəlzələ episentrinə yaxın Maraş şəhərinə gedən yolda çərşənbə axşamı səhər saatlarından etibarən hərəkət dayanıb.

Maşınlar arabir irəliyə gedir, onların qırmızı əyləc işıqları isə yaş yolu işıqlandırırdı. Türkiyənin bu cənub ərazisinə çox az sayda xilasedici gəlib.

İçərisi mütəxəssislər və təchizatlarla dolu maşınla şəhərə gedən bir axtarış-xilasetmə qrupu BBC-yə bildirib ki, onlar dağıntılar altında qalan şəxsləri axtarmağa hazır olsalar da, hadisə yerinə çatanadək vəziyyətin necə dəyişəcəyini bilmirlər.

Türkiyənin Dağıntı və Fövqəladə Hallar Agentliyinin sonuncu bəyanatında qeyd olunub ki, dağılmış 4700-dən çox binanın altından 8 min nəfər xilas olunub.

Afterşokların davam etməsi ilə paralel, bəzi ərazilərdə xilasedicilər yalın əlləri ilə dağıntıların arasını qazırlar. Lakin şaxtalı hava axtarış işlərinə mane olur.

line
Zəlzələ Suriyaya yeni böhran gətirir
Lyse Doucet

Baş beynəlxalq müxbir

Suriya ölkənin artıq parçalandığı, on ildən çox davam edən müharibənin yıxdığı, hökumətin və üsyançıların nəzarətində olan ərazilərə parçalandığı bir vaxtda təbiətin qüdrətli gücü ilə də sarsıldı.Ən çox təsirlənən bölgələrdən biri Türkiyə sərhədi boyunca şimalda müxalifətin nəzarətində olan son anklav olan İdlibdir.

Hətta bu fəlakətdən əvvəl də yardımların çatması üçün dünyanın ən çətin yerlərindən biri idi: Türkiyə sərhədində Bab əl-Havadan keçən yalnız bir kiçik keçid var.

Bu, ölkənin əksər ərazilərinə nəzarət edən Suriya hökuməti və onun Rusiya adlı müttəfiqi tərəfindən icazə verilən yeganə həyat xəttidir.

İndi Suriyanın bu bölgəsində onsuz da səfalət içində yaşayan, şaxtalı qış havasında, köhnəlmiş müvəqqəti sığınacaqlarda daldalanan təxminən dörd milyon insanın daha çox yardıma, özü də təcili ehtiyacı var. Beynəlxalq Xilasetmə Komitəsindən Mark Kaye siyasətin yardımdan kənarda saxlanması üçün müraciət etdi:

"Beynəlxalq ictimaiyyət burada həmrəylik nümayiş etdirməlidir və bu, vacib bir xatırlatmadır, bilirsiniz ki, bu, böhran içərisində bir böhrandır.Məhz bu həftə biz dondurucu temperaturun bölgəyə yaxınlaşacağı barədə xəbərdarlıq edirdik".

Suriya hökuməti də kömək üçün müraciət edir - Suriyanın hər tərəfi müharibə nəticəsində yoxsul və tükənmiş vəziyyətdədir.

İndi Prezident Bəşər Əsəd heç bir siyasətdən xəbəri olmayan güclü təbiət qüvvəsinə qarşı ona kömək etmək üçün düşmənlərini dəstəklədiyinə görə tez-tez qınadığı Qərb ölkələrinə və qonşularına müraciət etməli ola bilər.

Nə baş verib?
Türkiyənin Kahramanmaraş şəhərində bazar ertəsi səhərə yaxın 7.4 bal gücündə birinci (AFAD daha sonra bu rəqəmin 7.7 olduğunu açıqlayıb) zəlzələ baş verib.

Zəlzələ, həmçinin Hatay, Qaziantep, Osmaniye, Adıyaman, Adana, Malatya, Şanlıurfa, Diyarbəkir və Kilis şəhərlərində də ölüm və dağıntılara səbəb olub.

Hökumət zəlzələdən dərhal sonra dördüncü səviyyəli həyəcan siqnalı verib ki, bu da beynəlxalq yardım tələbi deməkdir.

Türkiyədə baş vermiş ölümcül zəlzələyə görə Prezident Recep Tayyip Erdoğan ölkədə 7 günlük matəm elan edib.

Bazar ertəsi minlərlə insanın ölümünə səbəb olan iki böyük zəlzələdən sonra insanların fəlakətə hazır olmadığı üçün Türkiyə hökumətinə qəzəbi artır.

Hazırda Türkiyədə zəlzələdən ölənlərin sayı 8 min 500-dən çoxdur və bu rəqəmin daha da artacağı gözlənilir.


Türkiyə Prezidenti Recep Tayyip Erdoğan ölkənin ən çox zərər görmüş regionuna səfəri çərçivəsində vəfat etmiş şəxslərin sayını açıqlayıb.

Lakin hökumətin zəlzələyə cavabı və hazırlıq səviyyəsi ölkədə siyasi hiddəti daha da artırır.

Zəlzələdən ən çox zərər görmüş ərazilərdə yaşayan insanlar bildirirlər ki, Fəlakət və Fövqəladə Halların İdarəedilməsi Agentliyi (AFAD) tərəfindən həmin bölgələrdə çox ləng addımlar atılıb.

Arzu Dedeoğlu çərşənbə axşamı BBC müxbirlərinə deyib ki, bacısının iki qızı Türkiyənin cənubunda yerləşən İskenderun limanında dağıntılar altında qalıb. Onun dediyinə görə, ailəsi əllərində olan alətlərlə dağıntıları təmizləmək istəsələr də, rəsmilər onlara icazə verməyiblər.

“Axşama kimi gözlədik, lakin heç kəs gəlmədi. Biz öz hesabımıza ekskavator gətizdirdik, lakin onlar bizə ondan istifadə etməyə razılıq vermədilər. Bacımın iki qızı – Ayşegül və İlayda dağıntılar altındadır”, - Dedeoğlu deyib.

Fövqəladə Halların əməkdaşları gəldikdə isə Dedeoğlu onların üstünə qışqıraraq “çox gecdir” deyib. Xilasedicilər müəyyən vaxtda axtarışlara ara versələr də, qızların ailəsi onlara yalvararaq dayanmamağı xahiş ediblər.

“Xahiş edirəm, getməyin. Bəlkə də mənim uşaqlarım hələ sağdır”, - qızların anası deyib.

Bəziləri hökuməti zəlzələyə çevik reaksiya verməməkdə günahlandırır, digərləri isə hökumətin qabaqcadan bu cür hadisələrə hazır olmadığını deyir.

“Baş verənlərə görə məsuliyyət daşıyan yeganə şəxs varsa, o da Erdoğandır”, Türkiyənin əsas müxalifət partiyasının lideri Kemal Kılıçdaroğlu qeyd edib.

Prezident Erdoğan zəlzələdən daha çox zərər görmüş 10 vilayətdə üç aylıq fövqəladə vəziyyət elan edib. Bu müddət 14 may tarixində keçirilməsi gözlənilən seçkilərdən əvvəl başa çatacaq. Bu seçkilərdə 20 ildir hakimiyyətdə olan 68 yaşlı prezident yenidən öz postunda qalmağa cəhd edəcək.

Onun bu seçkilərdə əsas rəqibi "Altılı Masa" adlandırılan, mərkəz-solçu və sağçı partiyalardan ibarət olan Millət İttifaqıdır. Kılıçdaroğlunun da adı həmin ittifaqdan prezidentliyə namizədlər arasında hallanır.

Twitter hesabında paylaşdığı videoda müxalifət lideri Prezident Erdoğanla “heç bir platformada” görüşməyəcəyini açıqlayıb və hökuməti zəlzələdən sonra “özünü təbliğ etməkdə” günahlandırıb.

Zəlzələnin yaratdığı böyük dağıntılardan sonra 20 ildən çoxdur Türkiyə hökumətinin əhalidən yığdığı “zəlzələ vergisi” ətrafında yaranan şübhələr də əhali arasında qəzəbi artırır.

Bu müddət ərzində həmin vergidən yığılan təxminən 88 milyard lirə (4.6 milyard dollar) fəlakətlərin qarşısının alınması və fövqəladə xidmətin keyfiyyətinin yüksəldilməsinə xərclənməli idi. “Zəlzələ vergisi” 1999-cu ildə Türkiyənin şimal-qərbində 17 min insanın ölümünə səbəb olan zəlzələdən sonra yığılmağa başlanılıb.

Hökumətin “xüsusi kommunikasiya vergisi”, sadə vətəndaşların isə “zəlzələ vergisi” adlandırdığı ödəniş ətrafında yaranan suallar ölkədə zəlzələ baş verən bütün tarixlərdə gündəmə gəlib.

Lakin hökumət “zəlzələ vergisi”nin necə xərclənməsi ilə bağlı heç vaxt ictimaiyyətə açıqlama verməyib.

Kılıçdaroğlunun sözlərinə görə, Erdoğan hökuməti “20 il ərzində zəlzələyə hazırlıq görməyib”.

Lakin hökumətin hazır olmadığını deyən, sadəcə prezidentin əsas siyasi rəqibi deyil.

“1999-cu ildən bəri bizdən yığılan vergilər hara gedib?”, - 61 yaşlı Celal Deniz AFP agentliyinə müsahibəsində deyib. Onun qardaşı və qardaşı uşaqları hələ də dağıntılar altındadır.

Sosial media istifadəçiləri də zəlzələdən zərər görmüş insanların tənqidlərini efirə vermədikləri üçün Türkiyənin bəzi yayım kanallarını və hökumətyönlü televiziyaları tənqid ediblər.

Paylaşılan videolardan görünür ki, Kahramanmaraşda olan NTV müxbiri deyir ki, yerli sakinlər “yardımların adekvat olmadığından” narazıdırlar və müxbirin arxasında sakinlərin “haradadır dövlət?” dediyi eşidilir.

Həmin kadrlardan görünür ki, televiziya kanalında müxbir sözünü bitirməmiş yayım kəsilir və xəbər studiyasının görüntüsü ekrana gəlir.

Yayılan digər videoda isə zəlzələdən sağ çıxmış şəxsin Haberturk yayım kanalının müxbirinə onları xilas etmək üçün “heç kəsin gəlmədiyini” deyir. Müxbir isə həmin şəxsdən uzaqlaşaraq xilasedicilərin “hər yerdə axtarış apardığını” bildirib.

Kahramanmaraşda açıqlama verən Erdoğan fəlakət bölgələrinə ilkin yardım zamanı çətinliklərin olduğunu etiraf edib və baş verən gecikmələri yolların və hava limanlarının zərər görməsi ilə əlaqələndirib.

O vurğulayıb ki, insanlar rəsmi mənbələrin dediklərinə qulaq asmalı və “təxribatçıların” dediklərini ciddi qəbul etməməlidirlər.

Erdoğanın zəlzələnin mərkəzi hesab edilən Pazarcikə də səfəri planlaşdırılır.

“Dövlət öz işini görür”, - Erdoğan bildirib.

"Bu qədər böyük bir fəlakətə hazır olmaq mümkün deyil", - o, Hataya səfəri zamanı deyib.

Erdoğan bəzi ərazilərdə təhlükəsizlik qüvvələrini ümumiyyətlə görmədiklərini söyləyən insanları "təxribatçı" adlandırıb.

"Bu, birlik, həmrəylik vaxtıdır. Belə bir dövrdə siyasi maraqlar naminə neqativ kampaniyalar aparan insanları həzm edə bilmirəm", - o əlavə edib.

Lakin İskenderunda olan bir çoxları üçün hökumətin reaksiyası gecikib.

“Nə üçün dünən gəlmədiniz, dağıntıların arasından səslər eşidirdik!”, - bir qadın çərşənbə axşamı xilasedicilərin üstünə qışqıraraq deyir.

Digər qadın isə göz yaşlarına qərq olub.

“Dünən gəlsəydiniz, onları xilas edə bilərdik”, - o deyib.

Avropa İttifaqı (Aİ) güclü zəlzələdən zərər görən Türkiyə və Suriya üçün donorlar konfransı keçirəcək.

Türkiyədə və Suriyada baş verən zəlzələnin ardından Avropa Komissiyasının Prezidenti Ursula von der Leyen və İsveçin Baş naziri Ulf Kristersson beynəlxalq ictimaiyyətdən maliyyə vəsaitlərini səfərbər etmək üçün donorlar konfransına ev sahibliyi etmək niyyətini bu gün açıqlayıblar.

Avropa Komissiyasının verdiyi məlumata görə, tədbir mart ayında Brüsseldə keçiriləcək.

Avropa Komissiyası bildirib ki, donorlar konfransı bu həftə baş verən dağıdıcı zəlzələlərin nəticələrini aradan qaldırmaq üçün beynəlxalq ictimaiyyəti səfərbər etməyə kömək edəcək.

“Aİ-yə üzv dövlətləri, qonşu ölkələr, BMT üzvləri, beynəlxalq maliyyə institutları və digər müvafiq maraqlı tərəflər üçün açıq olacaq yüksək səviyyəli konfransın məqsədi donorların dəstəyini əlaqələndirmək və erkən bərpa və yardıma dəstək üçün resursları artırmaqdır. Konfransa Aİ-nin Qonşuluq və Genişlənmə üzrə komissar Oliver Varhelyi və İsveçin beynəlxalq inkişaf, əməkdaşlıq və xarici ticarət naziri Yohan Forssel birgə sədrlik edəcəklər”, – deyə Avropa Komissiyası bildirib.

“Bu həftə Türkiyə və Suriyada baş verən zəlzələlərin dağıdıcı təsirləri hamımızı sarsıtdı. İndi prioritet, mümkün qədər çox insanın həyatını xilas etmək üçün gecə-gündüz işləməkdir, çünki bir çox insan hələ də dağıntılar altında, binalarda qalıb.

Bunun üçün Aİ-nin Mülki Müdafiə Mexanizmi dərhal işə salınıb və indiyədək 23 ölkədən 31 axtarış-xilasetmə qrupu və 5 tibbi qrup göndərilib. Amma biz artıq Türkiyə və Suriya xalqına mesaj göndəririk: Aİ sizin xalqınızı dəstəkləyəcək. Çünki belə bir faciə ilə insanlar üzləşdikdə onlar tək qalmamalıdır”, – deyə Prezident von der Leyen İsveçin baş naziri Kristerssonla telefon danışığından sonra bildirib.

“Türkiyə və Suriyanın şimalında baş verən zəlzələ yaxın vaxtlarda misli görünməmiş bir fəlakətdir. İnsan tələfatının və fiziki zərərin miqyası gün keçdikcə aydınlaşır. Nəticələri həqiqətən dəhşətlidir. İsveç Avropa İttifaqı Şurasının sədri kimi Aİ-nin köməyinin bu dəhşətli zamanda Türkiyə və Suriya xalqının ehtiyacını qarşılamaq üçün adekvat olmasını təmin etmək istəyir”, – İsveç Baş naziri Kristersson deyib. (APA)

Gürcüstan Prezidenti Salome Zurabişvili sabiq prezident Mixeil Saakaşvilinin həbsdə saxlanılması ilə bağlı məhkəmə qərarına münasibət bildirib.

APA-nın Gürcüstan bürosu xəbər verir ki, Salome Zurabişvilinin yayadığı bəyanatda gürcü xalqının bu məsələnin girovuna çevrildiyi, ölkənin imicinin misli görünməmiş şəkildə zədələndiyi və Gürcüstanın öz tərəfdaşları ilə əlaqələrinin düzgün istiqamətdə inkişafına mane olduğu qeyd edilib.

Salome Zurabişvili problemin eyni zamanda Gürcüstanın Avropa İttifaqı (Aİ) üzvlüyünə namizəd statusu alması üçün Avropa Komissiyasının 12 tövsiyəsi üzərində işləməsinə mane olduğunu da qeyd edib: “Ölkə bu məsələnin girovuna çevrilib. Bu gün bizim üçün heç bir digər vacib məsələ ictimai səviyyədə müzairə edilmir. Nə əksəriyyəti gənclər olmaqla iş gücünün ölkədən axını, nə də Rusiyadan (Gürcüstana) kütləvi axın və bunun mümkün təhdidlərinin qarşısının alınması ilə bağlı hökumət tərəfindən zəruri strategiya hazırlanmır”.

Zurabişvili əlavə edib ki, hazırda ölkə əhalisinin böyük əksəriyyətinin Gürcüstanın Rusiyanın orbitinə qayıtması ilə bağlı sualları var.

“Ölkənin reputasiyası zədələnib, inam sarsılıb, bizim yeni geosiasi kontekstdə yerimiz qeyri-müəyyən olub. Əgər Rusiya bizim ənənəvi tərəfdaşlarımızın dəstəyini itirdiyimizə inanarsa, bu bizim üçün daha təhlükəli ola bilər”, - deyə bəyanatda qeyd olunub.

Salome Zurabişvili bu vəziyyətin hakim “Gürcü Arzusu” partiyası və müxalifətin birgə səyləri nəticəsində yarandığını vurğulayıb. O, hökumətin ritorikasının, inadçı qərarlarının və Rusiyaya qarşı anlaşılmaz yumşaq mövqeyinin - Rusiyanı qeyd edərkən son dərəcə ehtiyyatlı olması, Rusiyaya qarşı sanksiyaların tətbiq edilməyəcəyi ilə bağlı ritorikası və birbaşa uçuşların bərpa edilməsi ilə bağlı müsbət dəyərləndirmələrinin Gürcüstanın ukraynalılara və öz tərəfdaşlarına qarşı davranışları ilə ziddiyyət təşkil etdiyini vurğulayıb.

Prezident əlavə edib ki, ölkə rəsmiləri Gürcüstanın Avropa yolu və 12 tövsiyənin yerinə yetirilməsi məsələlərini praktiki olaraq siyasi gündəlikdən çıxarmağı bacarıb.

Zurabişvili Saakaşvilinin azadlığa çıxması üçün əfv sərəncamının kifayət etmədiyini, ona qarşı daha 3 iş üzrə ittiham irəli sürüldüyünü xatırladıb.

Zurabişvili hökumət tərəfindən məsələyə hüquqi və insani həll tapılmalı olduğunu, müxalifət tərəfindən isə Saakaşvilinin öz cinayətlərini etiraf etməli olduğunu, siyasəti tərk edərək ölkəni və müxalifəti girovluqdan azad etməli olduğunu vurğuayıb.

“Bu məsələ gürcü siyasi məkanından çıxarılmalıdır və ölkəyə nəfəs alması, yaşaması, inkişaf etməsi və Aİ namizədi statusunu qəbul etməsi üçün imkan verilməlidir. ”

Türkiyədə zəlzələ nəticəsində minlərlə şəxsin ölümünə baxmayaraq, belə bir şəraitdə də vəziyyətdən sui-istifadə edənlər tapılır. Artıq belələrinin həbsinə başlanılıb.

Onlardan biri bu gün həbs olunub.
Onun “Dağıntılar altındayam, kömək edin” kimi yalan mesajlar paylaşdığı bildirilir.

Qeyd edək ki, belələrinin məqsədi Türkiyədə xaos yaratmaqdı. Onlar ya xarici kəşfiyyatın, ya da terror təşkilatlarının göstərişi ilə hərəkət edirlər.