 |
|
|
Noyabrın 8-də Xankəndi Şəhər Stadionunda Zəfər Günü münasibətilə bayram konserti və atəşfəşanlıq təşkil edilib.
"Report" xəbər verir ki, əvvəlcə Azərbaycanın dövlət himni səsləndirilib, şəhidlərin xatirəsi bir dəqiqəlik sükutla yad edilib. Sonra Zəfər Gününə həsr olunmuş videoçarx nümayiş olunub.
Qarabağ Dövlət Universitetinin müəllim və tələbələri, şəhərdə yaşayanlar və qonaqlar konserti böyük maraqla izləyiblər. Mədəniyyət xadimlərinin və incəsənət nümayəndələrinin ifalarında rəngarəng musiqi nömrələri, o cümlədən vətənpərvər mahnılar səsləndirilib, rəqslər nümayiş olunub.
Bayram konsertindən sonra keçirilən atəşfəşanlıq coşqu ilə qarşılanıb.
Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında Azərbaycan Ordusu Ermənistanın ardıcıl təxribatlarının və yeni işğal planlarının qarşısını almaq, işğal altında olan torpaqlarımızı azad etmək məqsədilə 2020-ci il sentyabrın 27-dən etibarən başladığı zəfər yürüşündə inanılmaz uğurlar əldə etmişdir.
44 gün sürən hərbi əməliyyatlar nəticəsində rəşadətli Azərbaycan Ordusu tərəfindən Cəbrayıl, Füzuli, Zəngilan, Qubadlı şəhərləri, Zəngilan rayonunun Mincivan, Ağbənd, Bartaz qəsəbələri, Xocavənd rayonunun Hadrut qəsəbəsini və bir çox kəndləri, Tərtər rayonunun Suqovuşan kəndi, Xocalı və Laçın rayonlarının bir neçə kəndləri daxil olmaqla, ümumilikdə, 300-dən çox yaşayış məntəqəsi, o cümlədən Ağdərə, Murovdağ və Zəngilan istiqamətlərində mühüm strateji yüksəkliklər işğaldan azad edilmişdir.
Noyabrın 8-də 28 illik həsrətdən sonra Azərbaycan xalqı üçün böyük əhəmiyyət kəsb edən və rəmzi məna daşıyan Şuşa şəhəri işğaldan azad edilmişdir. Qarabağın tacı olan Şuşa şəhərinin azad edilməsi dünya hərb tarixinə düşəcək unikal hərbi əməliyyatlardan olmuşdur.
Azərbaycanın hərbi sahədə qazandığı qələbələr, xüsusilə Şuşanın düşmən işğalından qurtarılması müharibənin taleyində həlledici rol oynamışdır. Bütün bunlar Ermənistanın öz məğlubiyyətini etiraf etməsi və kapitulyasiyası ilə nəticələnmişdir.
Azərbaycan Respublikasının Prezidenti İlham Əliyevin 2020-ci il 3 dekabr tarixli Sərancamı ilə xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən bu misilsiz qələbənin əbədiləşdirilməsi məqsədilə hər il noyabrın 8-i Azərbaycan Respublikasında Zəfər Günü kimi təntənəli şəkildə qeyd edilməsi qərara alınmışdır.
Azərbaycan Respublikasının Prezidenti İlham Əliyevin 2020-ci il 3 dekabr tarixli digər Sərancamı ilə Azərbaycan xalqının Vətən müharibəsində göstərdiyi misilsiz qəhrəmanlığın və qazandığı möhtəşəm tarixi zəfərin nümayiş etdirilməsi, şəhidlərimizin əziz xatirəsinin əbədiləşdirilməsi məqsədilə Bakı şəhərində Vətən müharibəsi memorial kompleksi və Zəfər muzeyinin yaradılması qərara alınmışdır.
Yaşasın Ali Baş Komandan!
Eşq olsun Müzəffər Azərbaycan Ordusuna!
Qarabağ Azərbaycandır!
Azərbaycan işğaldan azad edilmiş ərazilərə qayıdışla bağlı böyük addımlar atır. Bu istiqamətdə görülən işlər nəticəsində 30 ilə yaxın yurd həsrəti çəkən insanlar öz doğma torpaqlarına, evlərinə qayıdır. Bu prosesin – Böyük Qayıdışın təməli hələ 2016-cı ildə qoyulub. Belə ki, həmin ilin aprelində baş vermiş dördgünlük döyüşlər nəticəsində Azərbaycan Ordusu qısa zamanda torpaqlarımızın bir hissəsini işğaldan azad edərək şanlı Zəfər səhifəsini yazdı. Aprel döyüşlərinin tarixi əhəmiyyəti sırasında, həmçinin həmin vaxtdan başlayaraq Böyük Qayıdış prosesinə start verilməsini xüsusi qeyd etmək olar. Prezident İlham Əliyevin Cocuq Mərcanlı kəndinin bərpası və əhalinin yerləşdirilməsi ilə bağlı 2017-ci ildə imzaladığı Sərəncama uyğun olaraq Böyük Qayıdış prosesinə start verildi. Beləliklə, Cocuq Mərcanlı Böyük Qayıdışın ilk ünvanı oldu.
2020-ci ildə Vətən müharibəsi nəticəsində torpaqlarımız işğaldan azad olundu, ölkəmizin ərazi bütövlüyü bərpa edildi. Prezident İlham Əliyevin rəhbərliyi ilə 44 günlük Vətən müharibəsindəki tarixi Qələbəmizdən dərhal sonra işğal dövründə Ermənistan tərəfindən vandallığa məruz qalan doğma ərazilərimizdə bərpa və yenidənqurma işlərinin həyata keçirilməsinə başlanıldı.
2022-ci il noyabrın 16-da Prezident İlham Əliyev “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın təsdiq edilməsi haqqında Sərəncam imzaladı.
Vətən müharibəsindən ötən müddətdə işğaldan azad olunmuş ərazilərin minalardan və partlamamış hərbi sursatdan təmizlənməsi, müasir yaşayış, istehsal və xidmət infrastrukturunun qurulması, iqtisadi fəaliyyətin, o cümlədən nəqliyyat-kommunikasiya xətlərinin bərpası istiqamətində mühüm işlər görülüb. Qarabağ iqtisadi rayonunun və Şərqi Zəngəzur iqtisadi rayonunun çox geniş inkişaf potensialı var və burada sürətli işlər həyata keçirilir. Təbii ki, bu işlərin vaxtında və yüksək keyfiyyətlə icra olunmasında insan amili mühüm rol oynayır.
Görülən işlərin ilkin nəticəsi olaraq 2022-ci ildə Zəngilan rayonunun Ağalı kəndinin sakinlərinin doğma yurdlarına qayıdışı baş tutdu. Məcburi köçkün həyatı yaşayan insanların bir hissəsi öz doğma dədə-baba yurdlarına qayıtdı və orada həyat yenidən başladı. Həmin vaxtdan etibarən keçmiş məcburi köçkünlərin doğma yurdlarına köçürülməsi prosesi davam edir.
Rəşadətli Ordumuzun 2023-cü il sentyabrın 19-da Qarabağda başlatdığı lokal xarakterli antiterror tədbirləri hərb tariximizə daha bir parlaq səhifə kimi yazıldı, qarşıya qoyulan hədəflərə 24 saatdan da az müddətdə nail olundu.
Prezident İlham Əliyev işğaldan azad edilmiş ərazilərə Böyük Qayıdışın reallaşması üçün yüksək qətiyyət və əzmkarlıq göstərir. Bu günədək işğaldan azad olunmuş ərazilərimizə 9 minə yaxın keçmiş məcburi köçkün köçürülüb. Prezident İlham Əliyev Azərbaycan aşıq sənətinin görkəmli nümayəndəsi Aşıq Ələsgərin abidəsinin açılış mərasimində çıxışı zamanı xalqımızın əyilməz ruhunu belə ifadə etmişdi: “Bu gün biz Azərbaycan xalqının əyilməz ruhunu Qarabağa və Şərqi Zəngəzura qayıdan soydaşlarımızın timsalında görürük. O torpaqları heç vaxt görməyən Qarabağdan, Şərqi Zəngəzurdan olan soydaşlarımız həvəslə, səbirsizliklə o qayıdış gününü gözləyirlər, Böyük Qayıdış proqramının icrasını səbirsizliklə gözləyirlər. Əslində, bu proqram artıq icra edilir. Heç vaxt o torpaqlarda yaşamamış, amma o torpaqlara qayıtmaq eşqi ilə yaşamış qarabağlılar bu gün Qarabağa qayıdırlar”.
Təbii ki, bu gün Qarabağ və Şərqi Zəngəzurda yaşayan insanların sayı oraya qayıdan məcburi köçkünlərin sayı ilə məhdudlaşmır. Belə ki, hazırda bu bölgədə aparılan bərpa-quruculuq işlərinin miqdarı bu sayın ondan qat-qat artıq olduğunu deməyə əsas verir. Çünki tunellərin, aeroportların, aqroparkların tikintisinə, müxtəlif infrastruktur layihələrinin həyata keçirilməsinə minlərlə işçi qüvvəsi cəlb olunub. Bu gün təkcə Xankəndi şəhərində 6 mindən çox insan yaşayır. Onlardan 1300-dən çoxu Qarabağ Universitetində çalışır və ya təhsil alır. Daha 500 nəfər isə Nizami Gəncəvi adına Xankəndi şəhər tam orta məktəbində işləyənlər və təhsil alanlardır. Ümumiyyətlə, azad edilmiş ərazilərdə həyata keçirilən işlərdə 20 min nəfərdən çox insan çalışır. Qeyd olunan rəqəmləri ümumiləşdirsək, belə bir nəticəyə gəlmək olar ki, hazırda azad olunmuş ərazilərdə təqribən 30 min insan məskunlaşıb.
Düşmənin darmadağın etdiyi şəhərlərin və kəndlərin bərpası hazırda sürətlə davam etdirilir, Böyük Qayıdış Proqramı çərçivəsində böyük addımlar atılır. Azad olunmuş şəhərlərə və kəndlərə yaxın üç ildə 140 min insanın köçürülməsi planlaşdırılır. Nəhəng vəsait və qüvvə tələb edən bu işləri Azərbaycan kənardan bir manat belə almadan özü görür. Bu isə, eyni zamanda, ölkəmizin ildən-ilə artan iqtisadi gücünün daha bir əyani göstəricisidir.
AZƏRTAC
Azərbaycan işğal dövründə ərazilərimizdə baş verən talançılıq və digər dağıdıcı fəaliyyətlərə görə Ermənistandan böyük pullar (təzminat) tələb edir.
Bu barədə Ermənistanın “Hraparak” qəzeti yazır.
Nəşr məsələ ilə əlaqədar İrəvandan verilən son üstüörtülü mesaja diqqət çəkir:
“Parlamentdə gələn ilin büdcəsinin müzakirəsi zamanı xarici işlər naziri Ararat Mirzoyan bu suala birbaşa cavab verməyib. Nazirə sual ünvanlanıb ki, sülh sazişində Ermənistanın Azərbaycana qarşı beynəlxalq məhkəmələrə təqdim etdiyi iddialardan imtina etməli olduğuna dair bənd varmı? Mirzoyan faktiki olaraq bunu inkar eləmədi, əksinə, dolayı yolla təsdiqlədi: “Mən ayrı-ayrı hissələri ictimailəşdirə bilmirəm. Danışıqlarda tərəflərin qaldırdıqları çoxlu məsələ var və bir tərəfin qaldırdığı məsələlərə qarşı tərəfin müsbət cavab verməsi vacib deyil”.
Həmin qeyri-müəyyən bəyanatdan aylar əvvəl artıq mətbuat yazırdı ki, bu, Azərbaycanın növbəti tələbidir. Hələ yanvarda spiker Alen Simonyan bəyan eləmişdi ki, Azərbaycan Ermənistana qarşı iddialardan əl çəksə, Ermənistan da ona qarşı iddialarından əl çəkə bilər. Bir ay sonra, martda Paşinyan məsələ ilə bağlı danışarkən belə bir bəyanat verdi ki, danışıqlar zamanı belə bir məsələ müzakirə olunur”.
Həmçinin mənbə bildirir ki, Azərbaycan Ermənistana qarşı Haaqa Arbitraj Məhkəməsində iddia qaldıraraq dəymiş ziyana görə görünməmiş maddi təzminat tələb edib.
“Yəni, Ermənistan uduzsa, Azərbaycana hansısa X məbləği ödəməli olacaq, böyük məbləğdən danışırıq”, – erməni hüquqşünas Sərkis Qriqoryan “Hraparak”a deyib./teleqraf.com
Vətən müharibəsində möhtəşəm qələbəmizin dördüncü ili tamam olur; Azərbaycan döyüş meydanında rəşadətli mübarizəsi ilə yanaşı, diplomatiya masasında da səviyyəli iş aparıb
Vətən müharibəsində möhtəşəm qələbəmizin dördüncü ili tamam olur. Ali Baş Komandan İlham Əliyevin rəhbərliyi ilə Ordumuz 2020-ci ilin bu günləri torpaqlarımızdan işğalçıları təmizləmək üçün əks-hücum əməliyyatlarını davam etdirirdi.
Artıq bu günlərdə qəhrəman Azərbaycan əsgərləri Şuşa şəhərini azad etməyə yaxınlaşırdılar. İndi bu hadisələrə daha soyuq ağılla qiymət verəndə məlum olur ki, Azərbaycan döyüş meydanında rəşadətli mübarizəsi ilə yanaşı, diplomatiya masasında da mükəmməl və səviyyəli iş aparıb. Əgər elə olmasaydı, kənar güclər Qarabağı poliqona çevirməyə çalışacaq, müxtəlif mərkəzlərin mübarizə meydanına çevriləcəkdi. Amma Azərbaycanın ağıllı strategiyası nəticəsində Qarabağda heç bir beynəxalq missiya yoxdur və rus sülhməramlı kontingenti də vaxtından tez bölgəni tərk edib. Əslində müqaviləyə görə hələ də rus hərbçilər regionda qalacaqdılar, amma şərait elə gətirdi ki, onlara ehtiyac olmadı.
Təbii, 4 il əvvəlki hadisələri xatırlayanda, çoxları rus hərbçilərinin Qarabağdan tezliklə getməsini gözləmirdi. Elə Rusiyanın da niyyəti Qarabağı tələm-tələsik tərk etmək olmamışdı. Lakin Azərbaycanın siyasi rəhbərliyinin uzaqgörən siyasəti bu məsələnin erkən həllinə səbəb oldu. Beləliklə, Vətən müharibəsini həm hərbi, həm diplomatiya cəbhəsində qələbə ilə başa vura bildik. Hər iki prosesdə Ordunun qüdrəti ilə diplomatiyanın praqmatizmi sinxronluq təşkil etdi. Erməni tərəfi isə təhlükəsizlik sahəsində və siyasi müstəvidə birtərəfli, əyilmiş, başıpozuq siyasəti ucbatından itirə-itirə gedir. Milli Cəbhə Partiyasının sədr müavini Ehtiram Mehdiyevin qəzetimizə dediyinə görə, ümumiyyətlə, Qarabağ müharibəsinin finalı, separatçıların həbsinə qədər nəticə əldə edilməsi, soyqırıma məruz qalan Xocalı şəhərinin azad edilməsi ən möhtəşəm sonluq idi: “Yəni həm siyasi-hüquqi, həm mənəvi qalibiyyət əldə olundu. Azərbaycan Ordusu erməni faşizminə qalib gəldi və onu darmadağın etdi. Doğrudur, postmünaqişə dövründə erməni faşizminin yeni elementləri meydana çıxıb: revanş ovqatı, silahlanma, qisasa çağırış, "artsax uğrunda mübarizə" kimi cəfəng səslər eşidilir. Fəqət Azərbaycanın gücü revanşizm həvəskarlarına əsl xəbərdarlıqdır, bunu xüsusən də erməni baş nazir Nikol Paşinyan qiymətləndirə bilir. O anlayır ki, yeni müharibə yeni fəlakətdir. Erməni xalqı yorulub və döyüşə hazır deyil".
Partiya rəsmisi hesab edir ki, ümumən, uduzmuş ordu 4-5 il sonra təkrar müharibə apara bilməz: “Erməni ordusunda isə əzm yoxdur. Deməli, sülhə aparan yol ermənilərin nicatıdır. Onlar 10 milyonluq Azərbaycan, 80 milyonluq Türkiyə ilə hansı potensial ortaya qoya bilərlər?! Rusiyadan da siyasi və hərbi cəhətdən üz çevirmiş bir ölkənin Fransa, Amerika hesabına nəyisə etməsi gülüncdür. Erməni xalqına sülh hamıdan çox lazımdır. Bir sözlə, 44 günlük müharibə və zəfərin nəticələri 4 il sonra nəticələr çıxarmağa, hadisələri dəyərləndirməyə imkan yaradır. Azərbaycan öz ərazi bütövlüyünü bərpa edib, sərhədin Tavuş istiqamətində delimitasiya aparılıb, Qazağın 4 işğal olunmuş kəndi danışıqlarla geri alınıb, hazırda ikitərəfli danışıqlar müxtəlif müstəvilərdə pis-yaxşı inkişafdadır”. E.Mehdiyevin fikrincə, bütün bu nəticələr Vətən müharibəsinin bizə qazandırdığı imkanlardır: “Ali Baş Komandanın və qalib Ordunun döyüş meydanındakı zəfəri bizim diplomatik masada əlimizi gücləndirməkdədir”.
Xatırladaq ki, Prezident İlham Əliyev Vll çağırış Milli Məclisin ilk iclasındakı nitqində deyib ki, Qarabağ və Şərqi Zəngəzurun bərpası hər birimizin önəmli vəzifəsidir. Ölkə başçısı İkinci Qarabağ müharibəsindən sonra görülmüş işlərin miqyasının çox geniş olduğunu qeyd edərək, bir neçə rəqəmi açıqlayıb. Bildirib ki, müharibədən sonra bu ilin sonuna qədər xərclənməsi nəzərdə tutulan vəsait 19 milyard manatdır. Vəsaitin çox hissəsi infrastruktur layihələrinə xərclənib. Zəngilanın Ağalı kəndindən başlayan Böyük Qayıdış planına uyğun olaraq artıq Laçın, Füzuli, Zəngilan, Şuşa, Xocalı sakinlərinin bir qismi öz doğma evlərində yaşayırlar. İşğaldan azad edilmiş bütün ərazilərimizdə böyük infrastruktur obyektləri inşa edilib, əhalinin məşğulluğu təmin edilir. Dünya standartlarına cavab verən müasir məktəblər, xəstəxanalar tikilib istifadəyə verilir.
Hazırladı: Emil Salamoğlu
8 Noyabr - Zəfər Günü kimi şanlı tariximizin ən parlaq səhifələrindən biridir. Keçən il noyabrın 8-də qeyd edilən Zəfər Gününü daha da əlamətdar edən hadisələrdən biri də Prezident, Müzəffər Ali Baş Komandan İlham Əliyevin Xankəndi şəhərində hərbi paradı qəbul etməsi oldu. Məhz Vətən müharibəsində qazanılmış tarixi zəfərimizə həsr olunmuş möhtəşəm hərbi paradın Xankəndi şəhərində keçirilməsi Azərbaycanın gücünün dünyaya nümayiş etdirilməsidir.
4 il bundan əvvəl, 44 gün davam edən Zəfər yürüşümüz möhtəşəm qələbəmizin əldə olunması ilə nəticələndi. Cəbhənin bütün istiqamətlərdə inamla irəliləyən qəhrəmanlarımız əlbəyaxa döyüşlərə girərək Şuşa şəhərini düşmən işğalından bir dəfəlik azad etdi. 8 Noyabr tarixində həmin gün Prezident İlham Əliyev ata vəsiyyətinə əməl etdiyini və Şuşa şəhərinin işğaldan azad edilməsi xəbərini bizlərə verdi. Müharibənin davam etdiyi 44 gün ərzində işğalda qalmış torpaqlarımızın düşməndən azad olunması müjdəsini dövlət başçısından eşidən xalqımız Şuşanın azad olunmasını xüsusi təntənə ilə qeyd etdi. Dövlət başçısının hələ müharibənin gedişi zamanı Şuşasız bizim işimiz yarımçıq qalar deməsi, əslində Şuşa şəhərinin timsalında bütün işğal olunmuş ərazilərimizin azad olunacağının anonsu idi. Məhz Qarabağın tacı sayılan, həm relyef həm də coğrafi cəhətdən alınmaz qala sayılan Şuşanın düşmən işğalından azad olunması xüsusi peşəkarlıq tələb edirdi.
Yüngül silahlarla döyüşən igidlərimiz Şuşada qazanılmış qələbə ilə növbəti dəfə düşmənə ən ağır zərbəni vurdu. Vətən müharibəsində ordumuz yalnız erməni hərbi qulluqçulara qalib gəlmədi, həm də Ermənistan və onun himayədarlarına dövlətimizin gücünü göstərdi. Ermənistan tərəfi Azərbaycanın qətiyyətli mövqeyini və qəhrəmanlarımızın döyüş meydanındakı şücaətini gördükdən, habelə Şuşa şəhərinin işğaldan azad olunmasından sonra təslim olmağa məcbur oldular. Qəhrəmanlarımızın göstərdiyi şücaət, diplomatik müstəvidə qazanılmış qələbə Ermənistanın məğlubiyyətini qaçınılmaz etdi, erməni ordusunun 12 mindən artıq hərbi qulluqçusu döyüş meydanında qoyub qaçması, düşmənin qorxaq mahiyyətini bir daha nümayiş etdirdi.
Şuşa zəfərimizdən sonra Ermənistan siyasi rəhbərliyi məğlubiyyəti dərk edərək kapitulyasiya aktını imzalamağa məcbur oldu və nəticədə Ağdam, Kəlbəcər və Laçın rayonları bir güllə atılmadan düşməndən azad olundu. Dövlət başçısı Xankəndi şəhərində paradda çıxış edərkən bildirdi ki, “onsuz da bu rayon və şəhərlərimizi işğaldan azad edəcəkdik, sadəcə Azərbaycan Ordusundan şəhid olmasını istəmədim.
Məhz 2003-cü ildə Azərbaycan Prezidenti seçilərkən, xalqımızın qarşısında and icərkən verdiyi sözü tutub, düşmən işğalına son qoydu, suverenliyimizi və ərazi bütövlüyümüzü bərpa etdi. 2020-ci ilə qədər münaqişənin dinc yolla nizama salınmasında yeganə məqsəd məhz Vətən övladlarımızın şəhid olmasının qarşısını almaq idi. Təəssüf ki, Ermənistan heç zaman sülh istəmədi, işğalçılığına son qoymadı, təcavüzü dayandırmadı, əksinə sistemli olaraq təxribatlar törətdi”.
Ermənistan 2020-ci ilin 10 noyabr tarixində üçtərəfli bəyanat imzalanarkən Qarabağdan çıxarılmasını üzərinə vəzifə olaraq götürdü, lakin, 3 ilə yaxın müddət ərzində yenə bu öhdəliyini icra etmədi, qoşunlarını Qarabağdan çıxartmadı. Nəticə etibarı ilə keçən ilin sentyabr ayının 19-da başlamış və 24 saatdan da az davam edən lokal xarakterli antiterror əməliyyatları zamanı düşmənə növbəti dəfə sarsıdıcı zərbə vuruldu. Azərbaycan Ordusu yüksək peşəkarlıq göstərək hərbi obyektləri sıradan çıxarıb, strateji yüksəklikləri ələ keçirdi və nəticədə düşməni təslim olmağa məcbur etdi. Bu təslimiyyət özü ilə birlikdə qondarma rejimin də birdəfəlik sonunu gətirdi.
2023-cü il noyabrın 8-də Xankəndi şəhərində Müzəffər Ali Baş Komandan tərəfindən verilən mesajlar aydın idi, Ermənistan rəhbərliyi dərk etməlidir ki, revanşist mövqeyindən birdəfəlik əl çəkməlidir. Sülh müqaviləsini imzalamalı və sülhün qarşısında əngəl olmamalıdır. Əks təqdirdə dövlət başçısının təbilincə desək “Dəmir Yumruq yerindədir!”
Vahid İsmayılov
Tarix üzrə fəlsəfə doktoru
Erməni lobbisinin təsiri altında Azərbaycan əleyhinə təbliğat aparan çoxlu sayda təşkilatlar mövcuddur. Varlıqlarını beş-on dollara satanlar lazım olan vaxt fəaliyyətə keçir, ermənilərdən aldıqları tezisləri mətbuata çıxarırlar. Azərbaycana qarşı böhtan kampaniyası aparmaq, ölkəmizin imicinə zərbə vurmaq üçün həmin tezislərdən məharətlə istifadə etməyə çalışırlar.
KONKRET.az xəbər verir ki, bunlardan biri də Beynəlxalq Cinayət Məhkəməsinin sabiq prokuroru Luis Moreno Okampodur. Əslən Argentinadan olan bu adam, ermənilərin əlində siyasi oyuncağa çevrilib. Onun COP29 ərəfəsi Azərbaycana qarşı böhtan kampaniyasının başında durması, tez-tez Ermənistana getməsi, erməni diasporu ilə işbirliyi Okamponun hansı yuvanın quşu olmasından xəbər verir. Görünür keçmiş prokurorun qonorarı azalan kimi, Okampo şantaj üsuluna keçir. Okamponun əlində yüzlərlə fakt var ki, bundan da məharətlə istifadə etmək onun üçün çətinlik yaratmır. Məsələ burasındadır ki, bu saxtakar adam uzun müddətdir Azərbaycanı etnik təmizləmədə ittiham edir. Hər dəfə də guya Qarabağdakı erməni əhalisinə qarşı “soyqırımı” həyata keçirilməsindən danışır. Üstəlik, COP29 ərəfəsi Azərbaycan əleyhinə xüsusi şəbəkənin başında dayanan Okamponun birdən-birə sifəti çönür və Ermənistanı işğalçı adlandırır. Bu, sadəcə onun erməni “dostlarına” kiçik bir mesajıdır. Ola bilsin siyasəti alverlə səhv salan keçmiş prokuror ona ödənilən qonorarın artırılmasını istəyir. Keçmiş prokuror almaniyalı jurnalist, Azərbaycan əleyhinə aparılan kampaniyada Okamponun silahdaşı Bianka Şmolzeyə müsahibəsində erməniləri şoka salacaq fikirlər səsləndirib. Təxribatçı jurnalist Okampoya qondarma “Artsax Respublikası”nın legitimliyi ilə bağlı sual verib.
Cavab isə ermənilərdə soyuq duş effekti yaradıb:
“Doğurdan da Ermənistan Azərbaycan ərazilərini işğal etmişdi və bu faktdır. 4 il əvvəl Azərbaycan işğal altındakı əraziləri geri qaytardı”,-deyə Okampo bildirib.
Azərbaycan ərazilərinin işğal olunmasını etiraf edən Beynəlxalq Cinayət Məhkəməsinin keçmiş prokuroru bununla qiymət qaldırmaq niyyətindədir. O, bu mesajla ermənilərə bildirir ki, sizin ödənişizə görə mən yalnız COP29-la bağlı kampaniya aparıram. Bu ödəniş Bakıda həbsdə olan erməni əsirlərin azad olunması çağrışına güclə çatır. “Artsax”ı müstəqil dövlət kimi təqdim etmək, Ermənistanın işğalçılığı barədə susmağın qiyməti isə başqa sövdələşməyə aiddir və bunun üçün əlavə ödəniş tələb olunur. Alman jurnalistlə söhbətində o bunu açıq-aydın etiraf edib: “Bizim mesajımız aydındır. Erməni girovlarını azad edin, soyqırımı dayandırın, Dağlıq Qarabağı və Ermənistanı qoruyun”.
Bu, Okamponun Azərbaycana mesajı deyil, erməni sponsorlarına göndərdiyi ismarıcdır. Dələduz yaranan imkanı qaçırmaq istəmir və daha bir neçə milyon qazanmaq fikrinə düşüb. Əks halda Okampo Ermənistanı işğalçı dövlət adlandırmaqda davam edəcək. Sadəcə istiqamətini Bakıda həbsdə saxlanılan cinayətkarların azad olunmasına qarşı yönəldən Okampo, sentyabrın 13-də İrəvanda keçirdiyi mətbuat konfransında bəyan etmişdi ki, həmin adamların azadlığa buraxılması məsələsi COP29 sammitinin gündəliyinə daxil edilməlidir.
Qarabağdan köçüb gedən erməniləri “etnik təmizləmə qurbanı” hesab edən Okampo həm də özü-özünü ifşa edib. Məsələ burasındadır ki, Ermənistanı Azərbaycan ərazilərini işğal etdiyini söyləyən argentinalı alverçi, bununla Qarabağdan köçənlərin də həmin işğalda iştirakını etiraf edir. Deməli, götürdüyü öhdəliyi 5-10 dollara görə dolaşığa salan Okampunu maraqlandıran erməni məsələsi deyil. Tələb etdiyi ödənişi tam ala bilməyən Okampo üçün pul ermənidən qiymətlidir.
Avropa İttifaqının Ermənistan ərazisində olan “missiyası"nın son günlər Azərbaycanla sərhəddə görünməsi, vizual müşahidələr aparması heç də sıradan bir hadisə deyil. Bu, öncədən düşünülmüş planın bir hissəsi kimi açıq təxribat elementlərini özündə ehtiva edən hərəkətdir.
Bunu Teleqraf.com-a Milli Məclisin Beynəlxalq Münasibətlər və Parlamentlərarası Əlaqələr Komitəsinin sədri Səməd Seyidov deyib.
“Avropa İttifaqının Azərbaycanla Ermənistan arasındakı şərti sərhəddə öz “missiyası"nı göndərib nə axtarması cəmiyyətimiz üçün tam aydındır. Onlar qeyri-sabitlik, xaos, bəhanələr, müharibə axtarırlar. Məqsədləri odur ki, bu region inkişafdan, inteqrasiyadan geri qalsın”, - deyə o əlavə edib.
Komitə sədrinə görə, bu cür təxribat xarakterli səfərlər heç də təsadüfən baş vermir:
“Onlara şərti sərhədə yaxınlaşmağa icazə verən Ermənistan hakimiyyətinin də mövqeyinin nə dərəcədə ziddiyyətli olduğu bir daha ortaya çıxır. Fransızların və onun ətrafında olan qüvvələrin hansı niyyətdə olması bizə məlumdur. Amma onlara dəstək vermək və sərhədə göndərmək təbii ki, hökumətin razılığı olmadan mümkün deyil. Bu o deməkdir ki, Ermənistan hakimiyyətinin verdiyi açıqlamlarda səmimiyyət yoxdur. Çünki erməni tərəfi xarici işlər naziri vasitəsi ilə “bir iki həll edilməmiş məsələ qalıb və biz sülh müqaviləsinin imzalanmasına hazırıq” deyir. Başqa tərəfdən isə təxribatlara əl atırlar”.
Səməd Seyidov bildirib ki, Ermənistanın bu kimi davranışları sülh prosesinə zərbə vurur: “Nəticədə yenə də uduzan tərəf Ermənistan olacaq. Azərbaycan ərazi bütövlüyünü və suverenliyini tam təmin edib. Ölkəmiz regionda və qlobal miqyasda böyük nüfuza malikdir. Ona görə də, Azərbaycana qarşı çıxmağa çalışan qüvvələr real mənzərəni doğru-düzgün qiymətləndirməlidir”.
“Qarabağ sensasiyası” davam edir: muzdlular, kimyəvi silahlar və ipəkqurdu tırtılları
Ermənistanın 44 günlük müharibədə məğlubiyyətindən sonra bu ölkə vətəndaşlarının əksəriyyətinin psixikasında dönməz metamorfozalar baş verib. Və bu fenomen olduqca başadüşüləndir.
Təsəvvür edin ki, ermənilər uzun illər onların məğlubedilməzliyi, bəşəriyyət tarixi boyu bir çox müharibələrdə qələbəyə tarixi töhfəsi və sair haqqında nağıllarla qidalandırıldılar və birdən belə bir zərbə - azərbaycanlı “alverçilər” tərəfindən məğlubiyyətlə üzləşirlər. Və cəmi bir neçə gün ərzində. Hayların incə ruhi qida mənbəyi darmadağın edildi və acınacaqlı vəziyyətdən çıxış yolu tapmaq lazım idi.
“Acı həbi şirinləşdirməyin” yolu, heç olmasa, bir az da qeyri-mümkün qədər primitiv oldu. Sözü uzatmadan erməni aqtipropu öz adi “təsir alətindən” - yalanlardan və ya indi dəbdə olduğu kimi, “feyk”lərdən istifadə etdi.
Müharibədən dərhal sonra erməni təbliğatı ilk dəfə bəyan etdi ki, Azərbaycan ancaq bizim tərəfdə “döyüşən” türklərin hesabına qalib gələ bilib. Amma bu, kifayət etmədi və qısa müddətdən sonra pakistanlıları da türklərə qoşdular.
Ancaq suriyalı terrorçuların timsalında “cəhənnəm qarışığı”na əlavə oluna biləcək “ədviyyat” əmələ gəldi. Yaxşı, bu mənzərəni tamamilə maraqlı və ürəkaçan etmək üçün azərbaycanlıların “dinc Artsax xalqına” “paçka-paçka” atdıqları fosfor bombalarını da əlavə etdilər.
Bu dəhşətli və eyni zamanda aldadıcı saxtakarlar iki məqsəd güdürdülər:
- Birincisi, ermənilərə Azərbaycana yox, iki dövlətin mifik qüvvələrinə və muzdlulara uduzlarını göstərmək;
- İkincisi, ölkəmizi dünya ictimaiyyətinə terrorçuların köməyinə üz tutan, hətta qadağan olunmuş kimyəvi silahlardan istifadə edən dövlət kimi təqdim etmək.
Belə ki, məğlub olan ölkə bir daşla iki quş vurmağa cəhd edib. Amma nə birinci, nə də ikinci halda apriori boş olduğundan atəş hədəfə çatmadı. Cəfəngiyatlara inanan yeganə insanlar Makronun Fransası, “Human Rights Watch” kimi bir neçə korrupsiyalaşmış insan haqları təşkilatı və erməni lobbisinə xidmət edən senatorlar və konqresmenlər idi.
Bu günlərdə özünü yazıçı kimi təqdim edən Aşot Beqlaryan yeni “sensasiya” ilə gündəmə gəldi. Belə çıxır ki, Azərbaycan müharibə zamanı nəinki kimyəvi silahdan, hətta bioloji silahlardan istifadə edib.
İnanmayacaqsınız, amma Beqlaryan ciddi şəkildə iddia edir ki, “2020-ci ilin yazından sentyabrın sonuna qədər olan müddətdə Azərbaycan “Artsax”a qarşı böyük bioloji və ekoloji təxribat həyata keçirib”.
“Azərbaycan silahlı qüvvələrinin hücumu zamanı bölgənin müdafiəçilərinin mövqelərini daha həssas vəziyyətə salmaq və mülki əhaliyə ziyan vurmaq üçün Azərbaycan yerli meşələrə böyük ziyan vurmaq üçün “Artsax” ərazisinə barama ipəkqurdlarının tırtıllarını səpib. Zərərvericilər dronlarla yayılıb. Ümumiyyətlə, tırtıllı qırğın silahları Dağlıq Qarabağ meşələrinə çox böyük ziyan vurub. Əslində, Bakı rejimi meşə təsərrüfatlarının zərərvericilərinin kütləvi çoxalmasının yanğınlarla müqayisə oluna biləcəyini nəzərə alaraq, ipəkqurdu tırtılından yeriyən “bioloji bomba” kimi istifadə etdi - ağac yarpaqlarının geniş miqyasda yeyilməsindən (defoliasiya) sonra meşələr tez-tez xəstəlikdən ölür”, - deyə Aşot iddia edib.
Ermənistan silahlı qüvvələrinin məğlubiyyətinin daha bir “səbəbi” budur: ipəkqurdu tırtılları. Yeri gəlmişkən, Beqlaryan düşmənin həşəratlardan “döyüş bölməsi” kimi istifadə etməsi ilə bağlı cəfəngiyyat danışan ilk şəxs deyil.
Hələ 2022-ci ilin oktyabrında, Rusiyanın Ukraynaya təcavüzündən 7 ay sonra Rusiyanın BMT-dəki daimi nümayəndəsi Vasili Nebenzya ABŞ-ın təhlükəli virusa yoluxmuş ağcaqanadları daşıya bilən patentləşdirilmiş pilotsuz uçan aparatlara malik olduğunu bildirmişdi: “Belə bir dron infeksiya daşıyıcısı olan çoxlu sayda ağcaqanadın olduğu konteyneri müəyyən əraziyə daşıyıb buraxır. Ağcaqanadlar dişlədikləri zaman hücum etdikləri insanlara xüsusilə təhlükəli xəstəliklərin patogenlərini yoluxdurur”.
Sonra o, izah etdi ki, ağcaqanadlarla müharibə aparmaq “ən müasir silah və hərbi texnikadan” daha effektiv ola bilər. Hələ bundan əvvəl Rusiya tərəfi Ukrayna ərazisində bioloji silahların Rusiya ərazisinə yayılması üçün müəyyən layihələrin hazırlandığını iddia etmişdi. Kamikadzelərin rolunu isə... yarasalar və quşlar oynayırdı.
Yəni, Aşot təsəlli ala bilər: o, axmaq qənaətlərində tək deyil. Onun Rusiyada xüsusi müəssisədəki “yumşaq divarlı ağ otaqları”ın gözlədiyi Aşot kimi “ruh qardaşları” var...
Ayna.az
İşğaldan azad edilmiş rayonlarımıza qayıdan keçmiş məcburi köçkünlərin məşğuliyyəti məsələsi dövlətin diqqət mərkəzində olan məsələlərdən biridir. Xüsusən onların heyvandarlıq və əkinlə məşğul olması nəzərdə tutulur. Ancaq hələlik bu proses başlamayıb. Bununla bağlı iki gün öncə Milli Məclisdə də danışılıb.
“Xocalıya köçən ailələrə 1 metr torpaq da icarəyə verilmir. Qarabağda torpaq icarəyə verilənlər arasında bir qarabağlı belə yoxdur. Adam var Xocalıda nar bağını icarəyə götürüb. Ora niyə Xocalıdan olana verilməyib? Belə problemlər var. Bununla ciddi məşğul olmaq lazımdır. Bu torpaqlar yerli camaata icarəyə verilmir”. Bunu Milli Məclisin 29 oktyabrda keçirilən iclasında deputat Aqil Abbas “Torpaq icarəsi haqqında” Qanuna dəyişiklik edilməsi barədə məsələnin müzakirəsi zamanı deyib.
Deputat bildirib ki, Qarabağa köçənlərə heyvan saxlamağa 1 metr də torpaq verilmir: “Torpaqlar kiminsə monopoliyası üçün işğaldan azad edilməyib. Ali Baş Komandan torpağı işğaldan azad etdi. Köçənlərə bu torpağı verin də! Camaat deyir ki, Füzulinin icra başçısı azad olunmuş ərazilərdəki torpaqları satır. Halbuki onu heç o torpağa buraxmırlar, nətər satır? Böyük tikinti quruculuq işləri gedir, adamın ürəyi açılır. Amma torpaqlar yerli camaata icarəyə verilmir”.
Milli Məclisin Hüquq siyasəti və dövlət quruculuğu komitəsinin sədri Əli Hüseynli isə bildirib ki, bu qanun layihəsi işğaldan azad edilmiş ərazilərə köçən insanlar üçün torpaq icarəsində yeni mütərəqqi şərait yaradır.
Qeyd edək ki, “Torpaq icarəsi haqqında” Qanuna təklif olunan dəyişiklikdə azad olunmuş ərazilərdə torpaqların güzəştli şərtlərlə icarəyə verilməsi əksini tapıb.
Bəs qanun nə zaman tətbiq ediləcək? Sakinlər nə zaman əkin və maldarlıq üçün torpaq sahələrinə sahiblənə biləcəklər? Yerli əhali içərisində torpaq sahələri götürüb böyük təsərrüfatlar qurmaq istəyənlər yetərincə varmı?
Ceyhun Məmmədov
120 saylı Cəbrayıl-Qubadlı seçki dairəsindən deputat Ceyhun Məmmədov “Yeni Müsavat”a bildirdi ki, Milli Məclisdə qəbul olunan qanun layihəsinin də əsas məramı və məqsədi sakinlərin torpaq icarəyə götürməsi prosesinin tənzimlənməsi və sürətləndirilməsi, prosedurların müəyyən edilməsidir: “Azərbaycan müstəqilliyini bərpa etdikdən qısa müddət sonra torpaqlarımız işğal olundu və işğal səbibi ilə həmin torpaqlarda özəlləşdirmənin həyata keçirilməsi, torpaqların icarəyə verilməsi ilə bağlı hüquqi normativ sənədlər qəbul edilməmişdi. Torpaqlarımz azad edildikdən sonra təbii ki, bu məsələ ilə bağlı hüquqi normativ aktların qəbulu zərurəti meydana gəlib. İndi hüquqi normativ sənədlər hazırlanır. Bu sənədlərə uyğun da prosedurlar həyata keçiriləcək. Yəni söhbət artıq bu torpaqların güzəştli şərtlərlə icarəyə verilməsindən gedir. Yaxın müddətdə bu tətbiq olunacaq. İnsanlara şərait yaradılacaq ki, onlar bu torpaqlara sahiblənsinlər. Eyni zamanda şübhəsiz ki, yerli əhaliyə də torpağın verilməsi və onların bu torpaqlardan istifadə etməsi üçün də lazımi qanuni şərait yaradılacaq. Təəssüf ki, bu gün müxtəlif müzakirələrin şahidi oluruq. Yəni burada həm evinin qarşısında, həm də kənar ərazilərdə torpaqların əhaliyə verilməsi nəzərdə tutulub.
Hazırda fəaliyyət göstərmək, iş qurmaq istəyən şəxslər müraciət edərək torpaqları icarəyə götürə biləcəklər".
Arzuxan Əlizadə
Milli Məclisin İnsan hüquqları komitəsinin sədr müavini, Regional məsələlər komitəsinin üzvü Arzuxan Əlizadə bildirdi ki, “Torpaq icarəsi haqqında” Qanuna dəyşikliklər mövzusu və bundan irəli gələn məsələlər cəmiyyətdə öz aktuallığını saxlamaqdadır, cəmiyyətdə bununla bağlı davamlı müzakirələr var: "Xüsusilə də işğaldan azad edilən ərazilərdən o dövrlərdə qovulmuş məcburi köçkünlük həyatı yaşayan insanların tezliklə öz torpaqlarına geri qayıdaraq məskunlaşdırılılmaları arzuları başadüşüləndir. Eyni zamanda məsələyə obyektiv olaraq yanaşsaq görürük ki, həmin ərazilər hələ də minalardan tam olaraq təmizlənməyib, onda məskunlaşmanın heç də qısa müddətdə həyata keçirilməsinin asan olmadığı qənaətinə gəlmək olar. İstənilən halda minalardan təmizlənmiş ərazilərə sakinlərin maksimum sürətli köçürülməsi, onlara torpaq paylarının verilməsi və qanunda da nəzərdə tutulduğu kimi torpaqların icarəyə verilməsi prosesi aparılmalıdır. Mən o fikirlə tamamilə razıyam ki, ilk növbədə torpaqların güzəştli şərtlərlə icarəyə verilməsi məsələsində həmin torpaqlardan zamanında qovulmuş vətəndaşlara ilkin olaraq təklif olunmalıdır. Güzəştli şərtlərlə torpaq icarəyə verilməsi məsələsi ilkin olaraq onlara təklif edilməlidir. Müəyyən addımlar atılmalıdır ki, tezliklə qanunun icra edilməsinə şahidlik eləyə bilək. Qanunvericiliyə lazım olan dəyişikliklər edilib. Ümid edirəm və əminəm ki, prosesi sürətləndirmək imkanı olacaq. Vətəndaşlarımızın haqlı narahatlıqları geridə qalacaq və istəkləri təmin olunacaq".
Etibar SEYİDAĞA,
“Yeni Müsavat”