Azərbaycanla əməkdaşlığa xitam vermək ABŞ-ın maraqlarına zidd olardı.

Bunu ABŞ Dövlət Departamentinin sözçüsü Metyu Miller bu gün keçirdiyi brifinq zamanı deyib.

“Biz heç vaxt deməmişik ki, Azərbaycanla əməkdaşlığı davam etdirmək fikrində deyilik. Bu, bizim maraqlarımıza, eləcə də regionda sülh və təhlükəsizlik maraqlarına ziddir”, – deyə o bildirib.

Miller qeyd edib ki, ABŞ həm Azərbaycan, həm də Ermənistanla birbaşa əlaqələri davam etdirir və onları davamlı sülhü təmin etməyə çağırır.

“Bu əlaqələr, diplomatik səylərimizin diqqət mərkəzində olmaqda davam edəcək”, – deyə o bildirib.

Qeyd edək ki, ABŞ Dövlət katibinin Avropa və Avrasiya məsələləri üzrə köməkçisi Ceyms Obrayen dekabrın 6-8-də Azərbaycanda səfərdə olacaq. O, ikitərəfli münasibətləri gücləndirmək və Azərbaycan və Ermənistan arasında sülhü dəstəkləmək üçün Bakıda Azərbaycan rəsmiləri ilə görüşəcək./trend.az

Rusiyanın xarici işlər naziri Sergey Lavrov iranlı həmkarı Hüseyn Əmir Abdullahyanla Qəzza zolağı ətrafındakı vəziyyəti və İranın nüvə sazişinə qayıtmaq perspektivlərini müzakirə edib.

Bu barədə Rusiya Xarici İşlər Nazirliyinin bəyanatında deyilir .

Nazirlər Xəzəryanı ölkələrin xarici işlər nazirlərinin görüşündə iştirak etmək üçün Abdollahyanın Moskvaya səfəri çərçivəsində görüşüblər.

“Nazirlər bir sıra aktual beynəlxalq mövzuları, o cümlədən Fələstin-İsrail münaqişəsi zonasındakı vəziyyət, İranın nüvə proqramı ətrafında vəziyyətin nizamlanması üzrə Birgə Hərtərəfli Fəaliyyət Planının icrasının bərpası perspektivlərini, həmçinin bəzi regional məsələləri müzakirə ediblər. qarşılıqlı maraq doğurur”, - deyə departamentdən bildirilib.

Moskvada Azərbaycan və Rusiya xarici işlər nazirləri Ceyhun Bayramov və Sergey Lavrov arasında ikitərəfli görüş keçiriləcək.

APA-nın Moskva müxbiri Rusiya XİN-dəki mənbəyə istinadən xəbər verir ki, görüş dekabrın 5-də səhər saatlarında keçiriləcək.

Qeyd edək ki, dekabrın 5-də Moskvada Xəzəryanı ölkələrin xarici işlər nazirlərinin görüşü keçiriləcək. Azərbaycan, Rusiya, İran, Qazaxıstan və Türkmənistan xarici siyasət idarələrinin rəhbərləri ilk olaraq məhdud tərkibdə, daha sonra isə nümayəndə heyətləri ilə birlikdə geniş tərkibdə görüşəcəklər.

Artıq Azərbaycan XİN başçısı Ceyhun Bayramov Rusiya paytaxtındadır.

ABŞ-nin dövlət katibinin Avropa və Avrasiya məsələləri üzrə köməkçisi Ceyms O'Brayn dekabrın 6-dan 8-dək Azərbaycan və Rumıniyaya səfər edəcək.

“Report” xəbər verir ki, bu barədə Dövlət Departamentinin mətbuat xidməti məlumat yayıb.

Bildirilib ki, O'Brayn Bakıda “Azərbaycan və Ermənistan arasında ikitərəfli münasibətləri möhkəmləndirmək və sülhü dəstəkləmək məqsədilə Azərbaycanın vəzifəli şəxsləri ilə görüşəcək”.

Rumıniyada dövlət katibinin köməkçisi Moldova və Ukrayna rəsmiləri, həmçinin Avropa Komissiyasının nümayəndələri ilə görüşlə yanaşı taxıl ixracı ilə bağlı iclasda iştirak edəcək. Orada o, “qarşılıqlı maraq doğuran məsələləri müzakirə etmək” niyyətindədir.

Rusiya prezidenti Vladimir Putin Türkiyə ilə çoxlu yeni maraqlı layihə gözləyir.

APA-nın Moskva müxbiri xəbər verir ki, o, bunu xarici ölkələrin Rusiyaya yeni təyin olunmuş səfirlərinin etimadnaməsinin qəbulu mərasimində bildirib.

“Bizim hələ çoxlu başqa maraqlı layihələrimiz, müştərək öhdəliklərimiz var. Bu layihələr həm də ticarət və yüksək texnologiyalar sahəsindədir. Artıq həyata keçirilən layihələrə misal olaraq iki ölkə arasında enerji sahəsində əməkdaşlığı göstərmək olar. Bu sahədə qarşılıqlı fəaliyyət həqiqətən də strateji xarakter daşıyır. “Rosatom” Türkiyədə ilk Akkuyu atom elektrik stansiyasının tikintisini davam etdirir, “Mavi axın” və “Türk axını” boru kəmərlərinin istismarı çərçivəsində qaz sektorunda sıx əməkdaşlıq qurulub və Türkiyədə qazpaylayıcı qovşağın yaradılması istiqamətində işlər aparılır", - deyə Rusiya lideri vurğulayıb.

Putinin sözlərinə görə, Rusiyanın Türkiyə Respublikası ilə tərəfdaşlığı yüksək səviyyədədir və müxtəlif sahələrdə səmərəli qarşılıqlı fəaliyyət sahəsində uzun illərin təcrübəsinə əsaslanır: "Bundan başqa, hər iki ölkə mehriban qonşuluq, tərəfdaşlıq və qarşılıqlı fayda prinsipləri əsasında əlaqələri daha da inkişaf etdirmək əzmindədir", - deyə Rusiya prezidenti yekunlaşdırıb.

Qeyd edək ki, bu gün Kremldə keçirilən mərasimda Putin Türkiyənin Rusiya Federasiyasına yeni təyin olunmuş səfiri Tanju Bilgiçin etimadnaməsini qəbul edib.

Türkiyə Prezidenti Rəcəb Tayyib Ərdoğan Qətərə iki günlük səfər edəcək.

Səfər çərçivəsində Türkiyə Prezidenti Dohada Qətər Dövlətinin Əmiri Şeyx Təmim bin Həməd Al Tani ilə görüşəcək.

Rəcəb Tayyib Ərdoğan Qəzzada humanitar sülhün bərpası və döyüşlərin dayandırılmasında vasitəçilik rolunu oynamış Qətər əmiri ilə daimi atəşkəsin əldə olunmasını müzakirə edəcək.
Səfər zamanı iki ölkə arasında mövcud əməkdaşlığın daha da inkişaf etdirilməsi məsələləri gündəmdə olacaq.

Mənbə: TRT Haber

ABŞ-ın Azərbaycana yeni təyin olunmuş səfiri Mark Libbi artıq Bakıdadır.

Bəllidir ki, 25 may 2022-ci ildə prezident Co Bayden Mark Libbinin ABŞ-ın Azərbaycandakı səfiri vəzifəsinə namizədliyini irəli sürüb. Onun namizədliyi ilin sonunda başa çatdı və 3 yanvar 2023-cü ildə Mark Libbinin namizədliyi ilə bağlı sənəd yenidən Co Baydenə qaytarıldı.

Prezident Bayden həmin gün Libbinin namizədliyini yenidən irəli sürdü. Onun namizədliyi ilə bağlı dinləmələr 13 iyun 2023-cü il tarixində Senatın Xarici Əlaqələr Komitəsində keçirilib. Komitə onun namizədliyi barədə 13 iyul 2023-cü ildə müsbət yanaşma sərgiləyib. Mark Libbinin namizədliyi 8 noyabr 2023-cü il tarixində səsvermə yolu ilə Birləşmiş Ştatlar Senatı tərəfindən tam təsdiq edilib. Beləliklə bir il ərzində vakant qalan ABŞ-ın Azərbaycandakı səfiri öz vəzifəsinin icrasına başlayıb.

Ümumiyyətlə, ABŞ-ın Azərbaycana səfir təyin etməsi ənənəvi olaraq son dərəcə ağır, yorucu prosesə çevrilir. Niyə? Çünki Amerikadakı erməni lobbisi Azərbaycana göndərilən səfirin ermənipərəst olmasına xüsusi önəm verirlər. Məsələn, 2011-ci ilin əvvəlində Azərbaycana yeni təyin olunmuş fövqəladə və səlahiyyətli səfir Mətyu Brayze Bakıya gəldi. Xatırladım ki, o, 2007-ci ildə əslən Türkiyədən olan Cənubi Qafqaz bölgəsi üzrə tanınmış ABŞ tədqiqatçısı Zeyno Baranla evli idi. Bu da erməni lobbisini hövsələdən çıxarırdı. Nəticədə o, cəmi 1 il səfir işləyə bildi. Erməni lobbisi Mətyu Brayzeyə Bakıda işləməyə imkan vermədi. Cənab Mark Libbini isə erməni lobbisindən həmişə uzaq olmuş birisidir. Ona görə də erməni lobbisi onun namizədliyinə o qədər də xoş baxmırdı.

Böyük ehtimalla demək olar ki, cənab səfirin namizədliyi irəli sürüldükdən sonra ona qarşı qarayaxma kampaniyası məhz erməni lobbisinin fəaliyyəti nətisində geniş vüsət aldı. Hətta o, seksual zorakılıqda ittiham olundu. Amy Dahm adlı qadın xeyli vaxtdır ki, cənab Mark Libbi ilə bağlı ABŞ-ın müxtəlif instansiyalılarına müraciət edir. Gördüyünüz kimi, bu müraciətlərin elə bir xeyri olmayıb. Demək ki, Amerikanın səlahiyyətli orqanları bu kimi ittihamları əsasız sayıb.

Amy Dahm Mark Libbi ilə bağlı belə yazır: "12 il keçməsinə baxmayaraq, keçən yay keçmiş şefim Mark Libbinin Ağ Ev tərəfindən səfirliyə namizəd kimi irəli sürməsi xəbərini eşidəndə bütün bədənim fiziki olaraq titrəməyə başladı, axı mən onun tərəfindən cinsi təcavüzə məruz qalmışam. Hər ikimiz Dövlət Departamentində o vaxtkı dövlət katib Hillari Klintonun yanında, onun heyətində işləmişik. Mən Mark Libbinin tabeliyində idim. Səfir söhbəti çıxanda kamera və səs yazan aparatların olmadığı xüsusi məxfi yerlərdə onun mənə toxunduğu zaman hiss etdiyim çarəsizliyi xatırladım"...

"Xüsusi məxfi yer" nə olan şeydir? İngilis dilində qısa adı SCIF-dir. Sensitive Compartmented Information Facility sözlərinin baş hərflərindən yaranıb. Dövlət rəsmiləri tərəfindən həssas məlumatlara baxıla biləcəyi təhlükəsiz yerdir. Kompakt kabinet formasında olur. Orada əsasən qayət məxfi sənədlər nəzərdən keçirilir. Məqsəd bu kimi məxfi sənədlərin casus nəzərindən uzaq tutmaqdır. Amy Dahm isə iddia edir ki, Mark Libbi belə kabinetlərdən işdə məhəbbət macaraları yaşamaq üçün istifadə edib.

Bu kimi ittihamların arxasında erməni lobbisi, xüsusi ilə Azərbaycana qarşı qəddarlığı ilə tanınan Amerika Erməniləri Milli Komitəsi dayanmır ki? Çox güman ki, bu işdə də erməni barmağı var. Cənab Mark Libbini Mətyu Brayzenin taleyi gözləmir ki? Yəni ermənilər Mark Libbiyə Bakıda işləməyə imkan verəcəkmi? Bu suala əlahəzrət Zaman cavab verəcək.

Elbəyi Həsənli.

SÜRİX

MİA.AZ

Hindistanın hakim Bharatiya Janata Partiyası (BJP) ölkənin dörd əsas ştatından üçündə davam edən regional seçkilərdə səslərin əksəriyyətini qazanıb.

Bunu seçki komissiyasının rəsmi saytında yerləşdirilmiş məlumatlar sübut edir.

Belə ki, BJP Çhattisqarh əyalət məclisində 90 yerdən 52-ni və mərkəzi Madhya Pradeş əyalət məclisində 230 yerdən 158-ni əldə edib. Hindistanın şimal-qərbindəki Racastan əyalətində isə BJP 199 qanunverici mandatdan 113-nü qazanıb.
Hakimiyyətdə olan partiya yalnız Telanqana ştatının cənubunda uğur qazana bilməyib. Orada BJP 119 yerdən cəmi 9 yerə sahib olub. Bölgədə müxalifət partiyası Hindistan Milli Konqresi (INC) qalib gəlib. Onun nümayəndələri yerli qanunvericilik məclisində 68 yeri tutacaqlar.

Müşahidəçilərin qeyd etdiyi kimi, hazırkı regional seçkilər altı aydan sonra Hindistanda keçiriləcək ümumi seçkilər öncəsi seçicilərin əhval-ruhiyyəsini əks etdirir.

İran Ekspertlər Məclisi Əli Xameneinin ölümündən sonrakı dövr üçün varis seçmək istiqamətində gizli fəaliyyət göstərir.
Bunu məclisin üzvü Möhsün Məhəmmədi Əraki deyib.
O, varislə bağlı seçimlərin gizli şəkildə aparılmasını onun həyatına qarşı sui-qəsd təhlükəsi ilə əlaqələndirib.
Qeyd edək ki, bundan əvvəl Ekspertlər Məclisinin digər üzvü Rəhim Təvəkkül də oxşar fikir səsləndirərək, rəhbərlik üçün nəzərdə tutulan şəxslər barədə yalnız Əli Xameneinin özü ilə məsləhətləşmələr aparıldığını söyləyib.
Axar.az