Azərbaycan xarici işlər naziri Ceyhun Bayramov ATƏT Xarici İşlər Nazirləri Şurasının Skopyedə keçirilən 30-cu iclası çərçivəsində NATO baş katibinin Qafqaz və Mərkəzi Asiya üzrə xüsusi nümayəndəsi Xavyer Kolomina ilə görüşüb.

Tərəflər Azərbaycanla NATO arasında mövcud əməkdaşlığı, həmçinin regional və beynəlxalq məsələləri, Azərbaycan-Ermənistan normallaşma prosesini və danışıqların perspektivlərini müzakirə ediblər.

Vurğulamaq lazımdır ki, Bakının NATO ilə strateji tərəfdaşlıq xətti qırılmayıb, hərçənd ki, Alyansın nəhənglərindən olan ABŞ-nin, Fransanın Azərbaycanla münasibətlərində ciddi bir siyasi gərginlik mövcuddur.

NATO məsələsi isə fərqlidir, çünki o, təhlükəsizlik və sülh məsələsinə kollektiv tərzdə yanaşaraq konkret bir ölkənin ambisiyalarını ifadə etmir.

Bildirək ki, Trans-Qafqaz və Mərkəzi Asiyanın enerji resursları, mövcud və planlaşdırılan strateji boru kəmərləri üzərində qızğın rəqabət aparılması səbəbindən NATO diqqətini Cənubi Qafqaza yönəldir.

NATO-ya bu mənada öz maraqları çərçivəsində təhlükəsizlik sferasının bərqərar olması üçün müxtəliflik önəmlidir, çünki Alyans müxtəlifliyi güc kimi qəbul edir.

Azərbaycan Cənubi Qafqazın münasibətlər sistemində siyasi müxtəlifliklər formalaşdırır və bu işdə ona NATO-nun əhəmiyyətli bir üzvü olan Türkiyə dəstək verir.

Ümumi bir fonda regionda yaranan müxtəliflik NATO-nun kursu ilə daban-dabana ziddiyyət təşkil etmədiyindən o, Azərbaycan və Türkiyənin bölgədəki bacarıqlarına, təcrübələrinə dəstək verməkdə maraqlıdır.

Deməli, Alyansı gələcəyə daşımaq üçün Cənubi Qafqaz oxu vacibdir. Bu, ümumilikdə NATO-nun regional səmərəliliyinə, geniş diapazonlu fəaliyyətindəki inkişafa təkan verir.

Ancaq Azərbaycanla NATO müxtəlif qarşılıqlı ehtiyaclar üçün tam uyğunlaşa bilən bir şərait qurmalıdırlar.

Burada təhlükəsizlik məsələlərindən dolayı bəzi aspektlər razılaşdırılmaya bilər, çünki Bakı üçün regionu geosiyasi poliqona çevirmək yox, uzlaşdırılmış maraqları təmin etmək prioritetdir.

Lakin Rusiya-Ukrayna müharibəsi ilə planetar səviyyəli oyunçular və regional aktorlar arasında şiddətlənən mübarizədən dolayı hər istəniləni etmək çətindir.

Hesab etmək mümkündür ki, Azərbaycan öz səylərinin dəstəklənməsi üçün hərbi-siyasi ittifaq olan NATO-dan mənalı bir iş istəyir. Bu rejim, təbii ki, regionu geosiyasi qarşıdurma məkanına çevirməməli və sadəcə olaraq, səmərəli əməkdaşlığın strateji tərəfdaşlıq prinsiplərini aliləşdirməlidir.

Ancaq Cənubi Qafqazda Rusiyanın, İranın, Çinin xarici siyasətlərinin fırlandığı müstəvidə NATO-nun necə manevrlər edəcəyi sualı gündəmə gəlir.

Güman etmək olar ki, Azərbaycanla NATO arasında bu mövzu ətrafında ciddi fikir mübadilələri aparılır və regionun strateji maraqlar sferasındakı rolu yenilənən qiymətləndirmələrlə təhlil olunur./oxu.az

Venesuela Prezidenti Nikolas Maduro Rusiyaya səfər edəcək.

Bu barədə Venesuelanın Rusiyadakı səfirliyi məlumat verib.

Səfərin bu ay ərzində baş tutacağı gözlənilir.
Mənbə: axar.az

Azərbaycan Respublikasının xarici işlər naziri Ceyhun Bayramov ATƏT Nazirlər Şurasının 30-cu iclası çərçivəsində Birləşmiş Krallığın Müdafiə Nazirliyində silahlı qüvvələr üzrə dövlət naziri Ceyms Hippi ilə görüşündə iki ölkə arasında siyasi, iqtisadi, enerji təhlükəsizliyi müzakirə edilib.
Azərbaycanın Xarici İşlər Nazirliyindən Bakupost.az-a verilən məlumata görə, görüş zamanı Azərbaycan və Birləşmiş Krallıq arasında ikitərəfli və çoxtərəfli çərçivədə əməkdaşlıq müzakirə edilib.
Ölkələr arasında siyasi, iqtisadi, enerji təhlükəsizliyi, qarşılıqlı investisiyalar və digər sahələrdə əməkdaşlığın inkişaf perspektivləri, habelə hazırki regional vəziyyət əsas müzakirə mövzusu olub.
Görüş zamanı nazir Ceyhun Bayramov Azərbaycan və Ermənistan arasında postmünaqişə dövründə normallaşma gündəliyi haqqında qarşı tərəfi məlumatlandırıb. Ermənistanın sülh sazişinin imzalanması prosesində yaratdığı maneələr və Azərbaycanın bu prosesin irəlilədilməsi üçün atdığı addımlardan söz açılıb.
Bundan əlavə nazir Ceyhun Bayramov Azərbaycan Respublikası tərəfindən 24 saatdan az müddətdə keçirilən anti-terror tədbirlərini səciyyələndirən amillər barədə həmsöhbətini məlumatlandırıb.
Görüş zamanı digər qarşılıqlı maraq doğuran məsələlər müzakirə edilib.

“Qərb güc mərkəzləri Azərbaycanla Ermənistan arasında birbaşa sülh danışıqlarının aparılmasına ciddi əngəl yaradacaqlar”.

Bu sözləri siyasi şərhçi Elçin Alıoğlu Cebhe.info-ya rəsmi Bakı ilə İrəvan arasında heç bir vasitəçi olmadan ikitərəfli sülh danışıqlarının aparılması və bunun müsbət nəticələrini şərh edərkən bildirib.

Onun sözlərinə görə, bu kimi danışıqların baş tutması arzu olunandır:

“Təbii ki, ideal olaraq Azərbaycan ilə Ermənistan arasında sülh müqaviləsi üzrə birbaşa danışıqların aparılması mümkündür. İstərdiq ki, bu danışıqlar heç bir vasitəçi olmadan həyata keçsin.

Hazırda reallıq onu göstərir ki, vasitəçi tərəflər – ABŞ, Fransa və Avropa İttifaqı Ermənistanın Azərbaycanla bir çox problemlərin həlli və sülh müqaviləsinin imzalanması ilə bağlı birbaşa danışıqlara cəlb olunmasına imkan verməzlər.

Yəni, Ermənistanı başdı-başına buraxa bilməzlər. Vasitəçi tərəflər Ermənistanın müstəqil ölkə olmasında maraqlı deyillər. Düzdür, Fransa, Avropa İttifaqı və ABŞ ermənipərəst deyillər, amma onlar Ermənistandan Azərbaycan və Türkiyəyə qarşı siyasi alət kimi istifadə edirlər.

Əlbəttə, ABŞ-ın bu məsələdə hədəfi Rusiyanı Cənubi Qafqazdan kənarlaşdırmaq və regionda geostrateji cəhətdən möhkəmlənməkdir. Ona görə də Azərbaycanla Ermənistan arasında sülh müqaviləsi ilə bağlı birbaşa danışıqların aparılması inandırıcı görünmür”.

"Bu açıqlama İrəvanın Vaşinqtonla razılaşdırılmış şəkildə fəaliyyət göstərdiyinin nəticəsidir. Onlar ABŞ-la razılaşdırılmış variantı Bakıya sırımaq istəyirlər”.

Bunu Qaynarinfo-ya açıqlamasında politoloq İlqar Vəlizadə Ermənistan parlamentinin sədri Alen Simonyanın yaxın 15 günə Bakı ilə sülh müqaviləsinin bağlana biləcəyi barədə səsləndirdiyi fikrini şərh edərkən deyib.

İlqar Vəlizadə vurğulayıb ki, iki gün öncə İrəvan sülhlə bağlı təkliflərini Bakıya yollayıb:

"İndi 15 günə sülh müqaviləsinin imzalana biləcəyini bəyan etməklə sanki Azərbaycanı tələsdirirlər. Bununla demək istəyirlər ki, artıq təkliflərimiz var və gəlin 15 gün ərzində məsələni çözək. Digər tərəfdən, görünən odur ki, ABŞ tərəfləri tələsdirir. Daha çox da Azərbaycanı tələsdirir. Dövlət katibi Entoni Blinken Azərbaycan Prezidentinə zəng edib. Anti-Azərbaycan çıxışları ilə gündəmə gələn O`Braynın Azərbaycana səfəri gözlənilir. Ermənistanın yanaşması güman ki, Amerika tərəfindən məqbul sayılır”.

Həmsöhbətimiz qeyd edir ki, Azərbaycan buna gedə bilməz:

"Açıqlamalar olmadığından, Ermənistanın təkliflərinin nədən ibarət olduğu bilinmir. Digər tərəfdən, hər şey belə asan olsaydı, çoxdan məsələni həll etmək olardı. İrəvanın Qərblə bir oyun oynadığı və bu zaman Azərbaycanın tələblərinin arxa plana keçdiyini nəzərə alsaq, belə yanaşma ilə 15 günə sülh müqaviləsinin bağlanması mümkünsüz görünür”.

Qeyd edək ki, Ermənistan parlamentinin sədri Alen Simonyan jurnalistlərə açıqlamasında yaxın 15 gün ərzində Azərbaycanla sülh müqaviləsinin bağlana biləcəyini deyib:

"Bunun üçün Azərbaycan siyasi iradə göstərməlidir. Ümumiyyətlə, beynəlxalq hüquqa və bərabərlik prinsipinə əsaslanan bütün fundamental məsələlər üzrə razılıq əldə olunub. Bununla yanaşı, o bildirib ki, Ermənistanın baş naziri Nikol Paşinyanla Azərbaycan Prezidenti İlham Əliyev arasında görüşlə bağlı hələlik razılıq yoxdur.

“Lavrovun ATƏT-in nazirlər toplantısında iştirak etmək üçün Şimali Makedoniyaya mümkün səfəri Avropa sanksiyalarının pozulması olmaz”.

Modern.az xəbər verir ki, bunu Aİ-nin xarici siyasət sözçüsü Peter Stano deyib.

Qeyd edək ki, Rusiya noyabrın 30-dan dekabrın 1-dək Şimali Makedoniyada keçiriləcək Avropada Təhlükəsizlik və Əməkdaşlıq Təşkilatının (ATƏT) Xarici İşlər Nazirləri Şurasına dəvət olunub. Rusiya tərəfi toplantıya qatılacağını elan edib.

Şuranın toplantısı Skopye şəhərində baş tutacaq. İllik iclas ATƏT-in fəaliyyətdə olan sədri, Şimali Makedoniyanın xarici işlər naziri Buyar Osmaninin dəvəti ilə baş tutacaq.

Ötən il Polşa ATƏT-ə sədrlik edib, o, Rusiyanın xarici işlər naziri Sergey Lavrovun dekabrın 1-2-də Lodzda keçiriləcək Nazirlər Şurasının iclasında iştirakına icazə verməkdən imtina etmişdi.

Türkiyə Prezidenti Rəcəb Tayyib Ərdoğanla iranlı həmkarı İbrahim Rəisi arasında telefon danışığı olub.

“Report” xəbər verir ki, bu barədə Türkiyənin Prezident Administrasiyasının mətbuat xidməti məlumat yayıb.

Bildirilib ki, danışıqlarda İsrailin Qəzzaya həmlələri, fələstinlilərə humanitar yardım fəaliyyətləri və bölgədə daimi atəşkəsə nail olmaq üçün atılacaq addımlar müzakirə edilib.

“Başda Türkiyə və İran olmaqla İslam dünyasının Fələstin torpaqlarında İsrail vəhşiliyinə qarşı ortaq mövqe nümayiş etdirməsinin önəmini Prezident Ərdoğan görüşdə dilə gətirib”, – mətbuat xidməti diqqətə çatdırıb.

Eyni zamanda, qeyd olunub ki, telefon danışığı zamanı liderlər Türkiyədə keçiriləcək Türkiyə-İran Yüksək Səviyyəli Əməkdaşlıq Şurasının hazırlıqları və gündəliyi ətrafında da fikir mübadiləsi aparıblar.

Azərbaycan Milli Məclisi ABŞ Senatı tərəfindən qəbul edilmiş S.3000 (ermənilərin müdafiə aktı) qanunu ilə bağlı bəyanat yayıb.

Bəyanatda Azərbaycana qarşı olan akt pislənilir və Cənubi Qafqazda baş verən proseslərlə bağlı “obyektiv” mövqe tutmağa çağırış edilir.

“Azərbaycan parlamenti ABŞ Senatının 15 noyabr tarixli qərarını rədd edir. Vaşinqtonun bu cür hərəkətləri regionda sülh və sabitliyə mənfi təsir göstərir.

ABŞ-ın işğalçı Ermənistana dəstəyi onun Azərbaycan torpaqlarını işğal etməsinə kömək edib.

ABŞ 30 il ərzində Ermənistana qarşı heç bir sanksiya tətbiq etməyib, əksinə, maliyyə yardımı ayırıb, yüksək səviyyədə görüşlər keçirib.

Amerika tərəfinin bu cür addımları Azərbaycan cəmiyyətində ABŞ-ın nüfuzuna xələl gətirib. Təəssüf ki, Birləşmiş Ştatlar 1992-ci ildə “Azadlığa Dəstək Aktı”na ayrı-seçkilik xarakterli 907-ci düzəlişin qəbulu ilə Azərbaycana qarşı etdiyi səhvi yenidən təkrarlayır”, – bəyanatda bildirilir.

Daha sonra sənəddə ABŞ-ın Qarabağdakı separatçı rejimə də dəstək verdiyi bildirilir.

“Birləşmiş Ştatların vasitəçi kimi bugünkü addımları Azərbaycan cəmiyyətində etibarını itirməsinə səbəb olub və son illərdə Amerikanın xarici siyasəti tamamilə iflasa uğrayıb. Bunu ABŞ-ın Yaxın Şərq və Əfqanıstandakı siyasəti sübut edir”, – parlament deputatları hesab edirlər.

“Azərbaycan Respublikasının Milli Məclisi bir daha bəyan edir ki, Azərbaycan həmişə beynəlxalq hüququn norma və prinsipləri əsasında, beynəlxalq öhdəliklərinə uyğun hərəkət edərək öz milli maraqlarına zidd olan bütün mənfi addımları qətiyyətlə və adekvat şəkildə cavablandıracaq”, – bəyanatda deyilir.

Xatırladaq ki, noyabrın 15-də senatorlar S.3000 aktının təsdiqinə səs veriblər. Bu akt ABŞ prezidentinin 107-115 ictimai qanundan istifadə edə bilməyəcəyini nəzərdə tutur.

Qeyd edək ki, “Azadlığı Müdafiə Aktı”na 907-ci düzəliş Azərbaycana kömək göstərməyi qadağan edir. Öz növbəsində 107-115 ictimai qanunu prezidentə bu düzəlişin qüvvəsini dayandırmağa icazə verir.

Əgər layihə Nümayəndələr Palatası tərəfindən qəbul edilsə və dövlət başçısı tərəfindən imzalansa, ABŞ prezidenti 907 saylı düzəlişin qüvvəsini dayandıra və 2024-2025-ci illərdə büdcə ayırmalarından Azərbaycana kömək üçün maliyyə ala bilməyəcək.

Qanun layihəsini bu ilin sentyabrın 29-da Miçiqandan olan senator Qeri Piters təqdim edib.

“Azadlığın Müdafiəsi Aktı”na 907-ci düzəlişə əsasən, ABŞ hökumətinin Azərbaycanın rəsmi strukturlarına yardım göstərməsi qadağan edilib. Amma ABŞ prezidentləri 2002-ci ildən bəri hər il 907-ci düzəlişin tətbiqini dayandırırlar. Prezidentə bu səlahiyyətlər 2001-ci ildə Konqresin tərəfindən verilib.

Son hadisələr Azərbaycan və ABŞ arasında münasibətlərin soyuduğunu göstərir. Maraqlıdır, amerikalı parlamentarilər nəyə nail olmağa çalışırlar? ABŞ administrasiyası və şəxsən prezident Bayden onların mövqelərini bölüşürmü? Rəsmi Bakıya qarşı bu cür təzyiqlərin sonu necə ola bilər? Təzyiqlər Azərbaycana ciddi ziyan vurmağa qadirdirmi?

Şərqi Avropa ölkələri üzrə rusiyalı ekspert, “Azadlıq” radiosunun jurnalisti Vadim Dubnov (Praqa) fikirlərini Pressklub.az-la bölüşüb.

O, hesab edir ki, bu kəskinləşmə Rusiya və Azərbaycanın maraqlarının ancaq bir anlıq üst-üstə düşməsi ilə əlaqədardır. “Çünki indi hər şey ilk növbədə kommunikasiya məsələləri ilə bağlıdır – bu, ən birinci qıcıqlandırıcı səbəb və əsas intriqadır“, – analitik hesab edir.

Onun sözlərinə görə, ABŞ hazırkı halda Ermənistanı dəstəkləməyə hazırdır. “Ermənistan üçün isə onun öz ərazisindən keçəcək kommunikasiyalara nəzarət etmək vacibdir.

Laçın dəhlizində əməliyyat keçirən Bakı, sanki Ermənistana işarə etdi ki, indi İrəvan da öz ərazisində də nəzarət-buraxılış məntəqəsi qura bilər və bununla da sanki Moskvanı “aldatdı”. (Əslində, Ermənistan aprelin 22-də birinci olaraq birtərəfli qaydada Azərbaycanla sərhəddə – Laçın-Xankəndi yolunun girişində buraxılış məntəqəsi yaradıb, Azərbaycan Dövlət Sərhəd Xidmətinin bölmələri isə aprelin 23-də Ermənistanla sərhəddə – Laçın-Xankəndi yolunun başlanğıcında sərhəd-keçid məntəqəsi qurublar – red.)

Amma buna baxmayaraq, hazırkı vəziyyətdə Moskva və İrəvanın mübarizəsini kənardan müşahidə etmək imkanı olan Bakı hələlik Rusiyanın tərəfindədir. Və şübhəsiz ki, maraqların bir anlıq üst-üstə düşməsi Azərbaycan rəhbərliyi üçün vacibdir.

Bakı, əlbəttə ki, yola Moskvanın nəzarət etməsini istəyərdi. Çünki onunla razılığa gəlmək daha asandır”, – Dubnov hesab edir.

Onun sözlərinə görə, Birləşmiş Ştatlar hazırda Ermənistanın mövqeyini müdafiə edir. Xüsusən də, Azərbaycanın İran üzərindən real layihədən daha çox hədə kimi görünən yol çəkmək niyyəti fonunda. “Əslində belə bir yolun tikintisinə heç nə mane olmasa da, heç kim onun əsas yol olmasını istəməz – çünki onlar əsas yolun Ermənistandan keçməsini istəyirlər.

Hesab edirəm ki, hazırkı mübarizə də buna görə gedir. Mənə elə gəlir ki, buna həm də dərhal siyasi çılğınlıqla bu intriqaya qoşulan rəsmi Bakının tərzi də təsir edir. Amma düşünürəm ki, hər şeyin bir məhdudiyyəti var.

Bu, uzunmüddətli ola bilməz. Çünki Bakının siyasəti həm Moskvadan, həm də Qərbdən bərabər məsafədə olmağı nəzərdə tutur. Və buna görə də, Rusiya ilə yaxınlaşma resursu tükənməyə yaxındır və ya ən azından tezliklə tükənməyə yaxın olacaq. Mən hələ də hesab edirəm ki, ABŞ-la uzun və ciddi çəkişmə riski Bakının strateji planlarına daxil deyil”, – rusiyalı ekspert yekunlaşdırıb.

Müəllif: Rauf Orucov - Mənbə: Pressklub.az

Prezident İlham Əliyev Macarıstanın Baş naziri ilə görüşüb

Azərbaycan ilə Mərkəzi Asiya ölkələri iqtisadi, geosiyasi baxımdan vahid məkanı özündə əhatə edir.

AYNA xəbər verir ki, bu barədə Prezident İlham Əliyev Macarıstanın Baş naziri ilə görüşündə bildirib.

"Ölkələrimiz arasında iqtisadi inteqrasiya daha da dərinləşir, Mərkəzi Asiyanı Xəzər dənizi və Qara dəniz ilə birləşdirən nəqliyyat, enerji, o cümlədən bərpaolunan enerji və digər sahələrdə yeni əməkdaşıq layihələri və platformaları inkişaf etdirilir", - Prezident qeyd edib.