PSJ-ni futbolçuları Neymar və Kilian Mbappe arasındakı pis münasibətin səbəbi məlum olub.

Qol.az xəbər verir ki, bu barədə “L`Equipe” məlumat yayıb. Tərəflər arasında münasibətlər Neymarın intizamsızlığına görə pisləşib. Mbappe Neymarın ardıcıl 2 mövsüm intizamsız davranışlar etməsinə əsəbiləşib. O, klubla yeni müqavilə imzaladıqdan sonra braziliyalını satmaqda israr edib.

Xatırladaq ki, Mbappe və Neymar 2017-ci ildən PSJ-də oynayırlar.

Azərbaycan milli komandası baş məşqçisiz qalıb.

Apasport.az saytının məlumatına görə, buna yığmanın italiyalı çalışdırıcısı Canni de Byazinin müqaviləsinin bitməsi səbəb olub.

Onun anlaşması sentyabrın 30-da bitib. AFFA de Byazini saxlamaq və ya yeni mütəxəssis gətirmək barədə yekun qərarını hələ verməyib.

Bu üzdən milli bir müddət baş məşqçisiz qalacaq. Komanda noyabrda iki yoldaşlıq görüşü keçirəcəyindən həmin vaxtadək boşluğun aradan qalxacağı gözlənilir.

Millətlər Liqasının ikinci yarısında baş tutan hər üç oyunda qələbənin əldə olunmasından sonra de Byazinin postunda qalmaq ehtimalı da yüksək qiymətləndirilir. Belarusu 2:0, Slovakiyanı 2:1, Qazaxıstanı 3:0 hesabı ilə üstələyən komandanın bu nəticələri italiyalının taleyində həlledici rol oynaya bilər.

Hər halda, bu üç rəqibdən yalnız Belarus iddialı sayılmır. Qazaxıstan qrup qalibi, Slovakiya isə dünya 51-cisi olduğundan qalibiyyətlər diqqətçəkəndir və mütəxəssisi postunda saxlanıla bilər.

İtaliyalı 2020-ci ilin iyulundan millimizi çalışdırır. Bu müddətdə komandanı 28 matça çıxaran de Byazi 5 qələbə, 7 heç-heçə və 16 məğlubiyyətə şahid olub.

Qeyd edək ki, yığmamız noyabrın 16-da Moldova, 4 gün sonra Şimali Makedoniya ilə görüşəcək.

Qətərdə keçiriləcək futbol üzrə dünya çempionatının təşkilat komitəsi turnir ərzində iştirakçılar və turistlər üçün ölkədə davranış qaydalarını dərc edib.

16 səhifəlik sənəddə akkreditə olunmuş şəxslər, habelə azarkeşlər üçün bütün təlimat və tövsiyələr sadalanır.

Təlimatın ilk hissəsi yerli sakinlərlə ünsiyyətə aiddir. Burada qeyd olunur ki, evə daxil olarkən ilk növbədə ən yaşlı şəxsə və “daha ​​yüksək statusa” malik olanlara salam vermək lazımdır.

Bildirilir ki, qətərli qadınlara toxunmaq və onlarla qucaqlaşmaq olmaz. Xanımlara müəyyən məsafə saxlayaraq şifahi salam verməyə icazə verilir. Qətərlilərlə, xüsusən də qadınlarla əl sıxmaq məsləhət görülmür.

İkinci hissədə ictimai yerlərdə davranış qaydaları təsvir olunur. Qətərlilərə nəzər salmaq “kobud və yersiz” hesab olunduğu üçün tövsiyə edilmir. Qeyd olunur ki, qətərli başqasına nə isə verirsə, onu sağ əli ilə almaq lazımdır. Ayaqları çarpaz oturmaq tövsiyə edilmir - bu, təhqir hesab olunur.

Həmçinin, ölkə qonaqlarına qadınlarla flört etmək məsləhət görülmür.

Üçüncü hissə dini məsələlərdən bəhs edir. Ölkəyə gələn qonaqlardan gündə 5 dəfə verilən azan zamanı yüksək səsli musiqini açmamaq xahiş olunur. Məsciddən başqa heç bir qanun qadınların çadra taxmasını tələb etmir, lakin onu “yerli mədəniyyətə inteqrasiya və hörmət göstərmək üçün” taxmaq yaxşı hal hesab olunur.

Dördüncü hissə geyim məsələlərinə aiddir. Ziyarətçilərdən təvazökar geyinmələri, çiyinlərini və dizlərini örtən paltarda gəzmələri xahiş olunur. Qadınlar uzun şalvar və ya ətək, sinə və boynu örtən üst paltar geyinməlidirlər. Qızlar üçün qolsuz köynəklər, qısa paltarlar və ya ətəklər, qısa toplar qəti qadağandır. Həm də paltarların çox şəffaf və ya sıx olması uyğun deyil.

Kişilərə dizlərini örtən şort geyinməyə icazə verilir. Dar şalvar, atletik şort geyinməmək tövsiyə olunur.

Sənədə əsasən, saat və ya nikah üzüyündən başqa zinət əşyaları qeyri-münasib sayılır. İslamdan başqa bir dinə aid hər hansı bir əşya varsa, onu paltarın altında saxlamaq xahiş olunur.

Qeyd edək ki, Dünya çempionatı 2022-ci il noyabrın 20-dən dekabrın 18-dək keçiriləcək.

Mənbə: sports.ru

Ötən mövsümün sonunda “Qarabağ”dan ayrılan ispaniyalı futbolçu Xayme Romero ölkəsinin “Kartaxena” komandasına keçib.

“Report” xəbər verir ki, 32 yaşlı hücumameylli yarımmüdafiəçi Sequnda təmsilçisi ilə 2022/2023 mövsümünün sonunadək müqavilə imzalayıb.

Qeyd edək ki, Xayme Romero 2019 - 2022-ci illərdə “Qarabağ”ın formasını geyinib.

Klassik güləş üzrə İran millisinin kapitanı Məhəmmədəli Gərayi İranda 22 yaşlı Məhsa Əmininin ölümü ilə əlaqədar etiraz aksiyalarında qadınlara qarşı zorakılıq göstərən hüquq mühafizəçilərini kəskin tənqid edib.

Bu barədə o, özünün “Instagram” hesabında post paylaşıb.

“Qadınlara və qızlara əl qaldıranlara səslənirəm, siz çox mənəviyyatsız və şərəfsizsiniz”, – deyə idmançı paylaşımında etirazını bildirib.

Xatırladaq ki, 22 yaşlı Məhsa Əmini sentyabrın 13-də əxlaq polisi tərəfindən saxlanıldıqdan bir neçə saat sonra komaya düşüb, sentyabrın 16-da isə xəstəxanada ölüb. Şahidlər, ailə və xəstəxana hesabatları gənc qadının təbii səbəblərdən ölümünü inkar edirlər. Bundan sonra ölkəboyu geniş aksiyalar başlayıb. Ancaq bu nümayişlər hüquq mühafizəçiləri tərəfindən kobud şəkildə yatırılır, etirazçılar həbs olunurlar. Qeyri-rəsmi məlumata görə, aksiyalarda bu günə qədər 41 nəfər həlak olub.

“Hazırda Azərbaycan millisinin sükanı arxasındayam və burada uğur qazanmaq üçün əlimdən gələni edirəm”.
Bunu futbol üzrə Azərbaycan milli komandasının baş məşqçisi Canni De Byazi gələcəkdə Albaniya yığmasına mümkün qayıdışı ilə bağlı danışarkən deyib.
İtaliyalı mütəxəssis bildirib ki, həyatda hər şey mümkündür: “Albaniya çox sevdiyim ölkədir. Mənim bu ölkə ilə xüsusi bağlarım var. Xalqınızdan özümə qarşı həmişə sevgi və hörmət hiss etmişəm”.
66 yaşlı baş məşqçi UEFA Millətlər Liqasının qrup mərhələsinin V turunda səfərdə Slovakiyaya 2:1 hesabı qalib gəldikləri matça da toxunub: “Bu komandanı məğlub etdiyimiz üçün şadam. Onlara qarşı qrupdakı ilk görüşdə 0:1 hesabı ilə uduzmuşduq. Bu, mən və komandam üçün ağır məğlubiyyət idi. Mən dostlarımla oynayanda belə, qələbəyə sevinən mütəxəssislərdənəm. Yəni, mənim üçün hər oyun vacibdir”.
Qeyd edək ki, Canni De Byazinin Azərbaycan millisi ilə müqaviləsi sentyabrın 30-da başa çatacaq.

Mali milli komandasının iki basketbolçusu Avstraliyada keçirilən dünya çempionatında Serbiya millisi ilə görüşdə (68:81) uduzduqdan sonra bir-biri ilə dava salıb.

Hadisə Serbiya millisinin basketbolçusu müsahibə verərkən tribunaların altındakı otaqda baş verib. Qızları digər basketbolçular və Mali millisinin məşqçilər korpusunun üzvləri ayırmalı olub.

Qeyd edək ki, Mali basketbol komandası ardıcıl dördüncü məğlubiyyətini alaraq dünya çempionatının pley-off mərhələsinə çıxmaq şansını itirib. ABŞ hazırkı dünya çempionudur. Amerikalılar bu turnirdə 10 dəfə qalib olublar. //qaynarinfo

Almaniya millisinin hər bir futbolçusu yığma komandanın DÇ-2022-nin qalibi olacağı təqdirdə 400 min avro alacaq.

Bu barədə Almaniya Futbol Federasiyası (DFB) məlumat yayıb.

Məlumata görə, hər bir oyunçu milli komanda qrup qalibi olduqda 50 min avro, 1/4 finala yüksəldikdə 100 min avro, yarımfinala çıxdıqda isə 150 ​​min avro alacaq.

3-cü yer üçün 200 min avro, vitse-çempionluq üçün isə 250 min avro ödəniləcək.

Mənbə: sports.ru