Azərbaycan yunan-Roma güləşçisi Eldəniz Əzizli Serbiyanın paytaxtı Belqraddakı dünya çempionatında qızıl medal qazandıqdan sonra göz yaşlarına hakim ola bilməyib.

Manset.az xəbər verir ki, güləşçimiz arzusunun ikinci dəfə dünya çempionu olduğunu bildirib.

Eldəniz Əzizli ikiqat dünya çempionluğunu Vətən müharibəsi qazisi, polkovnik-leytenant Seymur Zülfüqarova həsr etdiyini deyib.

Bu gün futbol üzrə Azərbaycan Premyer Liqasında VI turun daha 2 oyunu keçiriləcək.

Publika.az-ın məlumatına görə, günün ilk matçı Qəbələdə eyniadlı komanda ilə "Neftçi" arasında olacaq.

Hazırda "ağ-qaralar" 12 xalla 3-cü, "qırmızı-qaralar" isə 9 xalla 5-cidir.

İki indiyədək ölkə çempionatında 55 dəfə qarşılaşıb. Bunların 17-də əyalət təmsilçisi, 25-də paytaxt klubu qələbə qazanıb. 13 görüş heç-heçə ilə yekunlaşıb. Topların nisbəti də qonaqların xeyrinədir - 82:66.

"Neftçi" son 13 qarşılaşmada yalnız 1 dəfə uduzub. “Qəbələ” son 4 ev görüşündə qol vurub.

Günün son matçında "Səbail" "Zirə"ni qəbul edəcək. Komandalar turnir cədvəlində qonşu pillələrdə qərarlaşıb. 7 xalı olan "qartallar" 6-cı, rəqibindən 2 xal az toplayan "dənizçilər" 5-ci yerdə gedir.

Paytaxt təmsilçiləri bunadək Premyer Liqada 19 dəfə rəqib olublar. Bunların 3-ü "Səbail"in, 12-si "Zirə"nin qələbəsi ilə başa çatıb. Rəşad Sadıqovun baş məşqçi olduğu kollektiv qol sayında rəqibini 27:17 hesabı ilə üstələyir.

“Zirə” son 5 oyunda qələbə qazanıb. “Səbail” son 5 ev matçında qalib gəlməyib.

Azərbaycan Premyer Liqası

VI tur

10 sentyabr (şənbə)

18:00. “Qəbələ” – “Neftçi”
Hakimlər: Rəvan Həmzəzadə, Kamran Bayramov, Cəmil Quliyev, Rəşad Əhmədov
Hakim-inspektor: Asim Xudiyev
Qəbələ şəhər stadionu.

20:30. “Səbail” – “Zirə”
Hakimlər: Rauf Allahverdiyev, Pərvin Talıbov, Müslüm Əliyev, Tural Qurbanov
Hakim-inspektor: İmanxan Sultani
“ASCO Arena”.

Qeyd edək ki, turun açılış matçında "Turan Tovuz" evdə "Kəpəz"i 2:0 hesabı ilə məğlub edib. Tura sentyabrın 11-də keçiriləcək "Sumqayıt" - "Şamaxı" və "Qarabağ" - "Sabah" oyunları ilə yekun vurulacaq.

Polşanın Krakov şəhərində keçirilən usta cüdoçular arasında sentyabrın 9-da Dünya çempionatında M1 və M3 yaş kateqoriyaları üzrə qaliblər bəlli olub.

Azərbaycan Cüdo Federasiyasından verilən məlumata görə, yarışın ikinci günündə M1 yaş kateqoriyası üzrə -73 kq. çəkidə Nadir Babayev gümüş medal, -90 kq. çəkidə Murad Rəcəbli gümüş medal, -100 kq. çəkidə Tural Səfquliyev qızıl medal, +100 kq. çəkidə isə Qurban Məmmədli gümüş medal qazanıb.

M3 yaş kateqoriyasında yarışan idmançılarımız -73 kq. çəkidə Rəşad Quliyev bürünc medal medal, -81 kq. çəkidə Azər Fətullayev qızıl medal və Zülfüqar Hüseynov gümüş medal əldə edib.

Usta cüdoçularımız dünən ümumilikdə 2 qızıl, 4 gümüş və 1 bürünc medala sahib olub.

İlin əvvəlindən Rusiya Fiqurlu Konkisürmə Federasiyasına (FFKKR) digər ölkələrin milli komandalarına keçmək üçün 19 müraciət daxil olub.

Qaynarinfo bu barədə "Rosbalt"a istinadla xəbər verir.

"İlin əvvəlindən RFKF-yə 19 transfer sorğusu daxil olub. Daxil olan müraciətlərin üçdə ikisi vaxtında verilib və biz onlara müsbət cavab verdik. Daha yeddi məsələyə dekabr ayında icraiyyə komitəsində baxacağıq”, - deyə RFKF-dən bildiriblər. Təşkilatdan qeyd edilib ki, onlar idmançıların adlarını açıqlaya bilməyəcəklər, çünki bunun üçün onlar şəxsi məlumatların emalına xüsusi razılıq verməlidirlər.

"Olimpiya Oyunlarının iştirakçıları, Dünya və ya Avropa çempionatlarının qalibləri və ya mükafatçıları olmuş yüksək səviyyəli konkisürənlər hazırda transfer üçün müraciət edənlər arasında deyil", - RFKF-dən bildirilib.

Martın 1-də Beynəlxalq Konkisürmə İttifaqı (ISU) Ukraynadakı vəziyyətlə əlaqədar Rusiya və Belaruslu konkisürənləri, şort-trekçiləri və fiqurlu konkisürənləri təşkilatın himayəsində olan bütün yarışlardan kənarlaşdırıb.

“Yaxşı mübarizə aparmaq istəyirdik. Rəqibdən çəkinmirdik. İlk 10-15 dəqiqə futbolçularda həyəcan yarandı. Daha sonra düzgün müdaxilələr etdik”.

“Report”un məlumatına görə, bunu “Qarabağ”ın baş məşqçisi Qurban Qurbanov “Frayburq”a 1:2 hesabı ilə uduzduqları UEFA Avropa Liqasının qrup mərhələsinin I tur oyunundan sonra mətbuat konfransında deyib.

50 yaşlı mütəxəssis buraxılan iki qoldan sonra futbolçuların toparlandığını bildirib:

“Qarşıdakı matçlara hazırlaşacağıq. Bacardığımız qədər irəli getməyə çalışacağıq. Rəqib komandanı və baş məşqçini təbrik edirəm”.

Baş məşqçi mübahisəli penalti epizodu ilə bağlı danışıb:

“Nəsə desək, faydası olmayacaq. İkinci dəqiqədə elə penaltinin verilməsi bizim üçün xoş hal deyil. Amma görüşün sonundakı epizoda baxmamışam. Rəqibin müdafiəçisi qarşılaşmanın sonunda bizim futbolçulara təmiz penalti olduğunu söyləyib. Bəzən kiçik epizodlar bizim kimi komandalara təsir edir. Deyəcək bir söz yoxdur. İnanırıq ki, qarşıda daha diqqətli olarlar. Bu, bizi ruhdan salmayacaq. Belə oyunlarda futbolçuların təcrübəsi artır. Bəzən 3-4 qolu qapımızda görə bilərik. Amma rəqiblərdən çəkinməyəcəyik. Hakimin qərarına isə müdafiə edə və onu dəyişə bilmərik”.

UEFA Konfrans Liqasının qrup mərhələsində ilk tura yekun vurulub.

“Report”un məlumatına görə, Türkiyənin turnirdəki digər təmsilçisi “Sivasspor” evdə Çexiyanın “Slaviya” (Praqa) komandası ilə qarşılaşıb. Matçda qalib müəyyənləşməyib - 1:1.

Hesabı 8-ci dəqiqədə qonaqlardan David Yurasek açıb. Meydan sahiblərinin bərabərlik qoluna isə 27-ci dəqiqədə Dia Saba imza atıb.

UEFA Konfrans Liqası
Qrup mərhələsi, I tur
8 sentyabr

E qrupu

“Dnepr-1” (Ukrayna) – “AZ Alkmaar” (Niderland) - 0:1

“Vaduts” (Lixtenşteyn) – “Apollon” (Limassol, Kipr) - 0:0

F qrupu

“Molde” (Norveç) – “Gent” (Belçika) - 0:0

“Şemrok Rovers” (İrlandiya) – “Yurqorden” (İsveç) - 0:0

G qrupu

“Balkani” (Kosovo) - ÇFR (Rumıniya) - 1:0

“Sivasspor” (Türkiyə) – “Slaviya” (Praqa, Çexiya) - 1:1

H qrupu

“Bazel” (İsveçrə) – “Pünik” (Ermənistan) - 3:1

23:00. "Slovan" (Bratislava, Slovakiya) - "Jalgiris" (Litva) - 0:0

23:44

UEFA Konfrans Liqasında qrup mərhələsinə start götürüb.

“Report”un məlumatına görə, bu gün keçirilməli olan 16 matçdan 7-si artıq yekunlaşıb.

A qrupunda yer alan Türkiyənin turnirdəki təmsilçilərindən “Başakşehir” Şotlandiyada “Harts”ı darmadağın edib - 4:0. Qolları 26-cı dəqiqədə Hasan Ali Kaldırım, 67-ci dəqiqədə Yussuf Ndayişimiye, 75-ci dəqiqədə Stiven Kinqsli (avtoqol) və 82-ci dəqiqədə Berkay Özcan vurub.

UEFA Konfrans Liqası
Qrup mərhələsi, I tur
8 sentyabr

A qrupu

20:45. “Harts” (Şotlandiya) - “Başakşehir” (Türkiyə) - 0:4


20:45. “Fiorentina” (İtaliya) - RFŞ (Latviya) - 1:1

B qrupu

20:45. “Anderlext” (Belçika) - “Silkeborq” (Danimarka) - 1:0

C qrupu

20:45. “Vilyarreal” (İspaniya) - “Lex” (Polşa) - 4:3

20:45. “Hapoel” (Ber-Şeva, İsrail) - “Austriya” (Vyana, Avstriya) - 0:0

D qrupu

20:45. “Slovaçko” (Çexiya) - “Partizan” (Serbiya) - 3:3

G qrupu

20:45. “Balkani” (Kosovo) - ÇFR (Rumıniya) - 1:1

“Qarabağ” UEFA Avropa Liqasının qrup mərhələsində ilk oyununu keçirib.

Qurban Qurbanovun baş məşqçi olduğu komanda “Frayburq”un qonağı olub.

“Europa-Park” stadionundakı qarşılaşma meydan sahiblərinin 2:1. hesablı qələbəsi ilə bitib. Görüşə Bundesliqa təmsilçisi daha üstün başlayıb. 2-ci dəqiqədə Ritsu Doanın fərqlənməsinə qapıçı Şahruddin Məhəmmədəliyev imkan verməyib.

Daha sonra Toral Bayramov 5-ci dəqiqədə cərimə meydançasında Mattias Ginterə qarşı kobud oynayıb. Belçikalı baş hakim Erik Lambrexts VAR-a baxdıqdan sonra penalti təyin edib. Vinçentso Qrifo 7-ci dəqiqədə “Frayburq”u hesabda önə keçirib. 15-ci dəqiqədə Ritsu Doan hesab arasındakı fərqi iki topa çatdırmaqla “köhlən atlar”ı növbəti dəfə mərkəzə dəvət edib.

22-ci dəqiqədə Qara Qarayevin, 33-cü dəqiqədə Abdullah Zubirin zərbəsi dəqiq alınmayıb. “Qarabağ”ın heyətində Marko Veşoviç 39-cu dəqiqədə hesab arasındakı fərqi azaldıb. Almaniya klubu fasiləyə 2:1 hesablı üstünlüklə yollanıb.

İkinci yarı qarşılıqlı hücumlar şəraitində başlayıb. 53-cü dəqiqədə Kadi Borgesin zərbəsi təhlükəli alınsa da, qapıçı Mark Flekken topun çərçivədən keçməsinə imkan verməyib. Bir saatın tamamına kimi hər iki komanda hücumlar etsə də, hesab dəyişməz qalıb. 70-ci dəqiqədə Kadi Borges növbəti dəfə Flekken səddini keçə bilməyib. 76-cı dəqiqədə Qara Qarayevin yerinə Riçard Almeyda, Ramil Şeydayevin yerinə isə Julio Roman meydana daxil olub. 80-ci dəqiqədə Abdullah Zubirin başla zərbəsindən sonra qapıçı topu tutub. Ardınca Zubir cərimə meydançasında yerdə qalsa da, baş hakim penalti təyin etməyib. 3 dəqiqə sonra Leandro Andrade Marko Yankoviçi əvəzləyib. Bütün cəhdlərə baxmayaraq Azərbaycan çempionu bərabərlik qolunu vura bilməyib.

G qrupunun digər matçında Yunanıstan “Olimpiakos”u Fransada “Nant”a 1:2 hesabı ilə uduzub. “Qarabağ” sentyabrın 15-də II turda “Nant”ı qəbul edəcək, “Frayburq” isə “Olimpiakos”un qonağı olacaq.

"Ola bilsin ki, bu mənim sonuncu döyüşüm olmasın".

"Report"un məlumatına görə, bunu Bakıda vida döyüş gecəsi keçirəcək Azərbaycan kikboksçusu Zabit Səmədov deyib.

O bildirib ki, braziliyalı rəqibinə uduzsa, revanş döyüşü istəyəcək: "Əgər Antonio Silvaya uduzsam, mütləq revanş olacaq. Karyeramı qələbə ilə başa vurmaq istəyirəm".

O bildirib ki, kikboksçu Alim Nəbiyevi bu turnirə o dəvət edib: "Bildiyiniz kimi, mən Belarusda, o da Ukraynada yaşayıb. İstədim ki, doğma vətəndə – Azərbaycanda turnirdə çıxış etsin. Mənim sahib olduğum klubda məşq keçdi və dəvətimi yerə salmayıb turnirə qatılmağa razılıq verdi. Alim "Glory" turnirində çıxış edir. Kifayət qədər tanınmış idmançıdır. Belə bir idmançının burada çıxış etməsi də böyük üstünlükdür".

Qeyd edək ki, döyüş gecəsi sentyabrın 10-da Milli Gimnastika Arenasında keçiriləcək.

Azərbaycan futbol tarixinin ən böyük uğuru, şübhəsiz ki, 2017/18 mövsümündə “Qarabağ”ın Çempionlar Liqasının qrup mərhələsində iştirak etməsidir.

“Ölüm qrupu”na düşən Ağdam klubunun heyətində ən çox diqqət çəkən futbolçu həmin vaxt PAOK-dan icarəyə götürülən Pedro Enrike idi.

“Roma” ilə Bakıdakı qarşılaşmada fərqlənməklə Azərbaycan təmsilçisinin Çempionlar Liqasında ilk qolunun müəllifi olan braziliyalı Sports.az saytına açıqlamasında həmin mövsümü xatırlayıb.

Bu ilin aprelində ölkəsinin “İnternasional” klubuna keçən 32 yaşlı hücumçu “Qarabağ”ın karyerasındakı yüksəlişdə böyük rol oynadığını bildirib:

“Karyeramın ən uğurlu dönəmini “Qarabağ”da keçirmişəm. Bir futbolçu üçün ən böyük xəyal sayılan Çempionlar Liqasının qrupunda yalnız bu komandanın heyətində çıxış etmişəm. Özü də “Çelsi”, “Roma”, “Atletiko” kimi klublara qarşı. “Qarabağ”da keçirdiyim bir ili ömrüboyu unutmaram. Sonra “Astana”nın heyətində Avropa Liqasında çıxış etdim. Bu iki turnir daha yaxşı liqalarda oynamaq üçün pəncərədir. Görünür avrokuboklarda özümü yaxşı tərəfdən göstərə bilmişəm ki, karyeramın növbəti mərhələsində Türkiyə olub, indi isə Braziliya A seriyasında mübarizə aparıram”.

Yunanıstan və Fransada da çıxış etmiş Pedro Enrike “Qarabağ”ın bu mövsüm Avropa Liqasının qrup mərhələsində həmin ölkələrin təmsilçiləri “Olimpiakos”, “Nant”, eyni zamanda Almaniya “Frayburq”u önündə şanslarını da dəyərləndirib:

“Qarabağ” çox ağır qrupa düşüb. “Olimpiakos” Yunanıstanın ən güclü klubudu. “Frayburq”un Bundesliqanın lideridir. “Nant” da “Böyük Beşlik” çempionatlarından Fransada Liqa 1-də oynayan komandadır. Kimin qrupdan çıxacağını indidən proqnozlaşdırmaq çətindir”.

Qeyd edək ki, “Qarabağ” Avropa Liqasının qrup mərhələsində ilk oyununu sabah Almaniyada “Frayburq”a qarşı keçirəcək.

Cebhe.info