Mali milli komandasının iki basketbolçusu Avstraliyada keçirilən dünya çempionatında Serbiya millisi ilə görüşdə (68:81) uduzduqdan sonra bir-biri ilə dava salıb.

Hadisə Serbiya millisinin basketbolçusu müsahibə verərkən tribunaların altındakı otaqda baş verib. Qızları digər basketbolçular və Mali millisinin məşqçilər korpusunun üzvləri ayırmalı olub.

Qeyd edək ki, Mali basketbol komandası ardıcıl dördüncü məğlubiyyətini alaraq dünya çempionatının pley-off mərhələsinə çıxmaq şansını itirib. ABŞ hazırkı dünya çempionudur. Amerikalılar bu turnirdə 10 dəfə qalib olublar. //qaynarinfo

Almaniya millisinin hər bir futbolçusu yığma komandanın DÇ-2022-nin qalibi olacağı təqdirdə 400 min avro alacaq.

Bu barədə Almaniya Futbol Federasiyası (DFB) məlumat yayıb.

Məlumata görə, hər bir oyunçu milli komanda qrup qalibi olduqda 50 min avro, 1/4 finala yüksəldikdə 100 min avro, yarımfinala çıxdıqda isə 150 ​​min avro alacaq.

3-cü yer üçün 200 min avro, vitse-çempionluq üçün isə 250 min avro ödəniləcək.

Mənbə: sports.ru

Keniyalı Eliud Kipçoqe Berlin marafonunda 2 saat 1 dəqiqə 9 saniyə nəticə ilə birinci yeri tutub.

O, 2018-ci ildə Berlin marafonunda özünə məxsus olan dünya rekordunu yeniləyib. Həmin vaxt idmançı məsafəni 2 saat 1 dəqiqə 39 saniyəyə qət edib.

Qeyd edək ki, hazırda Kipçoqenin 37 yaşı var. O, marafonda ikiqat Olimpiya çempionu, 2008-ci il Olimpiadasının gümüş, 2004-cü il Olimpiadasının 5000 metr məsafəyə qaçışda bürünc mükafatçısıdır.

Keniyalı 2003-cü il dünya çempionatının qızıl və 2007-ci il dünya çempionatının da gümüş medalına sahibdir.

Mənbə: TASS

UEFA Millətlər Liqasının qrup mərhələsində V turun digər oyunları keçirilib.

Oxu.Az-ın məlumatına görə, A, B, C və D Liqalarında ümumilikdə 7 qarşılaşma baş tutub.

A Liqasının 3-cü qrupunda Macarıstan səfərdə Almaniyanı 1:0 hesabı ilə məğlub edərək liderliyini qoruyub. İtaliya isə İngiltərəyə eyni hesabla qalib gəlib. Bu nəticələrdən sonra britaniyalılar B Liqasına düşüb.

Monteneqroya qalib gələn Bosniya və Herseqovina millisi A Liqasına vəsiqəni rəsmiləşdirib. B Liqasındakı digər matçda Finlandiya Rumıniya ilə heç-heçə edib - 1:1.

Şimali Makedoniyanı 2 cavabsız qolla üstələyən Gürcüstan yığması B Liqasına yüksəlib. Bolqarıstana 1:5 hesabı ilə uduzan Cəbəllütariq isə D Liqasına enib.

Nəhayət, Maltanı 2:1 hesabı ilə məğlub edən Estoniya seçməsi C Liqasına vəsiqə qazanıb.

UEFA Millətlər Liqası
V tur

A Liqası

3-cü qrup

Almaniya - Macarıstan - 0:1

Qol: Adam Salai,17


İtaliya - İngiltərə - 1:0

Qol: Cakomo Raspadori


Xal durumu: Macarıstan - 10, İtaliya - 8, Almaniya - 6, İngiltərə - 2

B Liqası

3-cü qrup

Bosniya və Herseqovina - Monteneqro - 1:0

Qol: Ermedin Demiroviç, 45+1

Finlandiya - Rumıniya - 1:1

Qol: Teemu Pukki, 12 - Florin Tanase, 52

Xal durumu: Bosniya və Herseqovina - 11, Monteneqro - 7, Finlandiya - 5, Rumıniya - 4.

C Liqası

4-cü qrup

Gürcüstan - Şimali Makedoniya - 2:0

Qol: Boyan Miovski, 35 (avtoqol). Xviça Kvaratsxeliya, 65

Bolqarıstan - Cəbəllütariq - 5:1

Qol: Valentin Antov, 23. Kiril Despodov, 36 - Roy Çipolina, 26. Radoslav Kirilov, 52. İliyan Stefanov, 55. Marin Petkov, 81

Xal durumu: Gürcüstan - 13, Şimali Makedoniya - 7, Bolqarıstan - 6, Cəbəllütariq - 1.

D Liqası

2-ci qrup

Estoniya - Malta - 2:1

Qol: Rauno Sappinen, 45+6. Henri Anier, 86 - Teddi Teuma, 51

Qırmızı vərəqə: Jean Borq, 45 (Malta)

Xal durumu: Estoniya - 9, Malta - 6, San marino - 0

“Yığmadan kənarlaşdırılıb-kənarlaşdırılmadığımızı bilmirəm. Sadəcə, onu deyim ki, hazırda havada qalmışıq”.

Bunu “Report”a açıqlamasında Azərbaycan taekvondoçusu Radik İsayev milli komandadan uzaqlaşdırılması barədə yayılan xəbərlərə münasibət bildirərkən deyib.

80 kq-dan yuxarı çəki dərəcəsində Avropa, dünya və olimpiya çempionu özü ilə yanaşı, Milad Beiqi Harçeqani (87 kq) və Ayxan Tağızadənin (74 kq) də təlim-məşq toplanışına çağırılmadığını söyləyib:

“Bundan başqa, açıq Sloveniya çempionatına da aparılmadıq. Bütün aparıcı idmançılar turnirə yollansa da, bizim üçün viza açılmadı. Nə vitse-prezident Nağı Səfərov, nə də baş məşqçi bizə dəvət göndərir. Mehmandust bizi komandada istəmir, vitse-prezident isə heç nə edə bilmir. Onlara sual verin ki, niyə problem yoluna qoyulmur. Cavabını öyrənəndən sonra mənə də deyərsiniz. Özüm üçün də maraqlıdır ki, orada nə baş verir. Yığmaya lazım deyiliksə, niyə bizə məlumat verilmir?”

Qeyd edək ki, Azərbaycan taekvondoçuları açıq Sloveniya çempionatında 1 qızıl, 1 gümüş və 1 bürünc medal qazanıb.

“Qarabağ”ın yarımmüdafiəçisi Qara Qarayev millimizə uğurlar arzulayıb.

Oxu.Az-ın məlumatına görə, o, bu barədə “Instagram” səhifəsində paylaşım edib.

Qeyd edək ki, Azərbaycan millisi bu gün C Liqasının 1-ci qrupunda Slovakiyanın qonağıdır.

Xatırladaq ki, Qara Qarayev baş məşqçi Canni De Byazi tərəfindən yığmaya çağırılmayıb.

UEFA Millətlər Liqasının qrup mərhələsində V tura start verilib. "Report"un məlumatına görə, A, C və D Liqalarında ümumilikdə 10 oyun keçirilib.

A Liqasının 1-ci qrupunda Danimarkanı 2:1 hesabı ilə məğlub edən Xorvatiya seçməsi liderliyə yüksəlib. Avstriyanı 2 cavabsız qolla üstələyən Fransa yığması sonuncu pillədən qurtulub.

4-cü qrupda səfərdə Polşaya 2:0 hesabı ilə qalib gələn Niderland millisi qrup liderliyini təmin edərək final mərhələsinə yüksəlib. Qrupun digər görüşündə Belçika Uelsi məğlubiyyətə uğradıb - 2:1.
C Liqasının 1-ci qrupunda evdə Lüksemburqla 3:3 hesablı heç-heçə edən Türkiyə yığması B Liqasına vəsiqə qazanıb. Litva - Farer adaları matçında isə qalib müəyyənləşməyib - 1:1. Bu nəticədən qrupda sonuncu olan Litvanın D Liqasına düşəcəyi dəqiqləşib.

3-cü qrupda Belarusu 2:1 hesabı ilə məğlub edən Qazaxıstan seçməsi qrup liderliyini rəsmiləşdirib. Azərbaycan millisi Trnavada Slovakiyanı 2:1 hesabı ilə məğlub edərək ikinci pilləyə yüksəlib. Belarus kollektivi bu nəticədən sonra D Liqasına düşüb.

Nəhayət, D Liqasında Moldova səfərdə Latviya ilə, Andorra isə Lixtenşteynlə matçda qələbə qazanıb.

Azərbaycan yığması UEFA Millətlər Liqasında növbəti oyununu keçirib. “Report”un məlumatına görə, C Divizionunda yer alan Canni De Byazinin baş məşqçi olduğu komanda 3-cü qrupun V tur matçında Slovakiyanın qonağı olub. Trnava şəhərindəki Anton Malatinski stadionunda oynanılan qarşılaşma Azərbaycanın 2:1 hesablı qələbəsi ilə başa çatıb.

Matçın əvvəlləri sakit tepmdə keçsə də, tərəflər tədricən fəallığı artırıblar. Qapı istiqamətində ilk zərbəni 16-cı dəqiqədə Renat Dadaşov vurub. Amma 23 yaşlı forvard hədəfdən yayınıb. 10 dəqiqə sonra Bədavi Hüseynovun vurduğu top az fərqlə qapıdan aralı keçib. Oyuna ilk real qol vəziyyətini isə meydan sahibləri yaradıb. Erik Yirka başla boş qapını nişan ala bilməyib. 32-ci dəqiqədə Riçard Almeydanın zərbəsində dəqiqlik çatmayıb. 2 dəqiqə sonra Yirka növbəti dəfə diqqət mərkəzinə düşsə də, Şahruddin Məhəmmədəliyev onun fərqlənməsinə mane olub. 37-ci dəqiqədə Matuş Beronun qüvvətli zərbəsi zamanı qapı tiri Azərbaycan millisini xilas edib. 41-ci dəqiqədə yığma əla əks hücumu qolla tamamlaya bilməyib. Almeydanın ötürməsinə toxunan olmayıb. Lakin 3 dəqiqə sonra hesab açılıb. Ozan Can Kökçünün ötürməsini qəbul edən Dadaşov gözlənilməz zərbə ilə komandasını önə keçirib. Beləliklə, Azərbaycan yığması fasiləsə minimal hesablı üstünlüklə yollanıb.

İkinci hissəyə daha yaxşı başlayan slovakiyalılar bunun məntiqi nəticəsi kimi ardıcıl 2 epizodda qola yaxın olublar. Əvvəlcə ağ cinahdan təhlükəli hava ötürməsi zamanı, ardınca isə Beronun zərbəsindən sonra Məhəmmədəliyev rəqibin fərqlənməsinə imkan verməyib. 58-ci dəqiqədə Laslo Beneşin zərbəsi qapının üstündən keçib. 59-cu dəqiqədə qapı tiri hesabın bərabərləşməsinə mane olub. 65-ci dəqiqədə Kristian Vallonun ötürməsi təhlükəli alınsa da, topa toxunan olmayıb. 70-ci dəqiqədə David Hantskonun vurduğu top az fərqlə qapıdan aralı keçib. 79-cu dəqiqədə Ramil Şeydayev sol cinahdan sürətlə cərimə meydançasına daxil olsa da, qapı istiqamətində zərbə vura bilməyib. 88-ci dəqiqədə Samuel Mrazın başla zərbəsində dəqiqlik çatmayıb. 90-cı dəqiqədə Stanislav Lobotkanın vurduğu top qapıçıda qalıb. Buna baxmayaraq, rəqib son dəqiqələrdə hesabı bərabərləşdirib. Əsas vaxta əlavə olunmuş 3-cü dəqiqədə Yirka penaltini dəqiq yerinə yetirərək, tarazlığı bərpa edib. Buna baxmayaraq, Azərbaycan millisi əlavə olunmuş 5-ci dəqiqədə qalibiyyət qolunu vura bilib. Höccət Haqverdi künc zərbəsindən sonra topu qapıdan keçirib.

Tarixində ilk dəfə səfərdə Slovakiyaya qalib gələn Azərbaycan seçməsi bu nəticə ilə xallarını 7-yə çatdırıb və 2-ci pilləyə yüksəlib. 6 xalı olan Slovakiya isə 3-cü sırada qalıb.
Qeyd edək ki, milli komanda qrupda sonuncu oyununu sentyabrın 25-də Bakıda Qazaxıstana qarşı keçirəcək.

UEFA Millətlər Liqasının qrup mərhələsində V tura start verilib. "Report"un məlumatına görə, günün ilk oyunu Azərbaycan millisinin yer aldığı C Divizionunun 3-cü qrupunda keçirilib.

Evdə Belarusla qarşılaşan Qazaxıstan yığması rəqibini 2:1 hesabı ilə məğlub edib.

Hesabı 29-cu dəqiqədə meydan sahiblərindən Mixail Qabışev açıb. İlk hissənin əsas vaxtına əlavə olunmuş 3-cü dəqiqədə qonaqlar Pavel Savitskinin qolu ilə tarazlığı bərpa edib. Son nöqtəni isə 79-cu dəqiqədə Baxtiyor Zaynutdinov qoyub.

"Neftçi"nin belaruslu hücumçusu Yeqor Boqomolski bu qarşılaşmada 61 dəqiqə meydanda olub.

Bu qələbədən sonra xallarını 13-ə çatdıran Qazaxıstan millisi sona 1 tur qalmış B Liqasına vəsiqəni təmin edib. Bu isə o deməkdir ki, Azərbaycan qrup liderliyini şansını itirib.

UEFA Millətlər Liqası

Qrup mərhələsi, V tur

22 sentyabr
Ətraflı

C Liqası

3-cü qrup

18:00. Qazaxıstan - Belarus - 2:1

Qollar: Mixail Qabışev, 29. Baxtiyor Zaynutdinov, 79 - Pavel Savitski, 45+3

Qırmızı vərəqə: Askat Taqibergen, 90+4 (Qazaxıstan)

22:45. Slovakiya - Azərbaycan

Xal durumu: Qazaxıstan - 13 (5 oyuna), Slovakiya - 6, Azərbaycan - 4, Belarus - 2 (5 oyuna)

Qeyd edək ki, bu qrupun digər oyununda Azərbaycan yığması bu gün Slovakiyanın qonağı olacaq.