İtaliyanın Busto Arsizio şəhərində boks üzrə I Dünya Olimpiya Təsnifat Turnirinə start verilib. Yarışın ilk günündə Azərbaycan millisinin üzvü Nicat Hüseynov (51 kq) mübarizəyə qoşulub.

"Report" xəbər verir ki, ikiqat Avropa çempionumuz 1/32 final çərçivəsində Deepak Deepakı (Hindistan) sınağa çəkib. Hüseynov gərgin keçən döyüşdə son dünya çempionatının bürünc medalçısını 3:2 (29:28, 28:29, 29:28, 27:30, 29:28) hesabı ilə məğlub edib.

Boksçumuz ikinci görüşündə ilk mərhələdən azad olan Sahil Alahverdovi (Gürcüstan) ilə üz-üzə gələcək. Döyüş martın 6-da baş tutacaq.

Qeyd edək ki, turnirin ikinci günündə Azərbaycan millisinin daha 2 boksçusu rinqə çıxacaq.

Türkiyə Super Liqasında 28-ci turun görüşləri keçirilir.

“Fənərbağça” həmyerlimiz Renat Dadaşovun çıxış etdiyi “Hatayspor”un qonağı olub.

Azərbaycanlı futbolçu matça 79-cu dəqiqədə əvəzləmə ilə daxil olub. Lakin bu, onun komandasına məğlubiyyətdən yaxa qurtarmağa kömək etməyib.

“Fənər” bunadək vurduğu iki qolla (Osayi Samuel 24, Çengiz Ünder 40) 3 xalı qazanıb.

Bununla da, sarı-lacivərdlər turnir cədvəlində 73 xalla ilk pilləyə yüksəliblər. Bir xalı az olan “Qalatasaray”ın ehtiyatda oyunu var.

“Formula-1” üzrə dünya çempionatında mövsümün ilk Qran-prisinin qalibi müəyyənləşib.

Moderator.az-ın məlumatına görə, Bəhreyndə təşkil olunan yarışın birinci mərhələsində “Red Bull”un pilotu Maks Ferstappen hamını qabaqlayıb.

Niderlandlı üçqat dünya çempionu finişə birinci çatıb. Onun komanda yoldaşı Serxio Peres ikinci yeri tutub. İlk “üçlüy”ü “Ferrari”dən Karlos Saynz qapayıb.

Qeyd edək ki, ikinci tur 7-9 mart tarixlərində Səudiyyə Ərəbistanında keçiriləcək.

Rusiyalı tennisçi Andrey Rublev Dubayda (BƏƏ ) keçirilən ATP-500 turnirinin yarımfinal matçında diskvalifikasiya edilib.

32gun.az Rusiya KİV-nə istinadən bildirir ki, buna səbəb onun hakimi təhqir etməsidir.

Bildirilir ki, Rublev Alexander Bublikə qarşı oynayıb . Üçüncü setdə oyun 6:5 hesabı ilə Qazaxıstan tennisçisinin xeyrinə başa çatdıqdan sonra Rublev topun meydandan kənarda olduğunu iddia edərək xətt hakiminə qışqırıb.

BƏƏ-də keçiriləcək turnirin mükafat fondu 2,9 milyon dolları ötür. Müsabiqə martın 2-də başa çatır. Hazırkı çempion isə finalda Rublevə qalib gələn Medvedevdir.

Rusiya tennisçiləri beynəlxalq turnirlərdə neytral idmançı kimi çıxış edirlər. Böyük Britaniyanın qərarı ilə 2022-ci ildə yeganə Böyük Dəbilqə turniri olan Wimbledon turnirini buraxıblar.

Dünya futbolunda iz qoymuş məşçilərdən olan Joze Mourinyo yalnız bir oyunun nəticəsinə görə ağlayıb.

Qol.az “goal.com”a istinadən xəbər verir ki, portuqaliyalı mütəxəssis “Real”ı çalışdırarakən – Çempionlar Liqasının 2011-2012 mövsümünün finalında “Bavariya”ya penaltilər seriyasında uduzduqları matçın ardından göz yaşlarını saxlaya bilmədiyini deyib:

“Bavariya”ya məğlubiyyətdən sonra evə gedərkən ağladım. Bu karyeramda ilk və son oldu. Sonra mənə Xorxe Mendeş zəng vurub dedi ki, Kriştiano çox üzgün durumdadır, onun evinə get. Ölü adamdan heç bir fərqim olmadığını bildirdim. Bunu edə bilməyəcəyimi desəm də, sonda Ronaldonun evinə getdim. İkimiz də çox bərbad vəziyyətdə idik”.

Qeyd edək ki, “Real”ı çalışdırdığı müddətdə Çempionlar Liqasını qazana bilməyən Mourinyo daha sonra “Çelsi”, “Mançester Yunayted”, “Tottenhem” və “Roma”nın baş məşqçisi olub. 61 yaşlı məşqçinin adı son günlər “Bavariya” ilə hallanır.

Moskva “Spartak”ının futbolçusu Quincy Promes Dubay Əl-Maktum hava limanında sərhəd nəzarətində saxlanılıb və bir neçə saatdır ki, polis şöbəsindədir.
Hollandiyalı "qırmızı-ağ"ların düşərgəsində olduğu BƏƏ -dən uça bilməyib . Fevralın 29-da komanda Sankt-Peterburqa uçmalı idi . Promesdən başqa hamı təyyarəyə buraxılıb. “Baza”ya görə, komandanın təhlükəsizlik işçiləri onun yanında qalıb. Saxlanmanın səbəbi hələlik məlum deyil.

Xatırladılır ki, Fevralın 14-də Amsterdam məhkəməsi Promesi kokain qaçaqmalçılığına görə 6 il həbs cəzasına məhkum edib. İş üzrə məhkəmə iclası yanvarın 24-də baş tutub, prokurorluq Promesanın 9 il müddətinə azadlıqdan məhrum edilməsini istəyib. Fevralın 16-da hollandiyalı beynəlxalq axtarışa verilib.

Promes 2021-ci ilin fevralından "Spartak"da oynayır. Bu, onun ikinci dəfədir ki, komandaya qoşulur. O, 2014-2018-ci illərdə “qırmızı-ağlar”da çıxış edib. 2016/17 mövsümündə hollandiyalı komandanın tərkibində Rusiya çempionu olub .

Martın 2-də Rusiya Premyer Liqasının (RPL) 19-cu turu çərçivəsində “Spartak” səfərdə “Zenit”lə qarşılaşacaq.
"Baza" Telegram kanalı

UEFA "Qarabağ"a ciddi xəbərdarlıq edib.

Metbuat.az qol.az-a istinadən xəbər verir ki, Avropa Liqasının pley-off mərhələsinin "Qarabağ" - "Braqa" cavab oyununda azərbaycanlı bloggerlərin qaydalara zidd şəkildə stadiondan çəkilişlər aparması və ümumi çəkiliş qaydalarını pozması UEFA-nın Ağdam təmsilçisinə ciddi xəbərdarlıq etməsinə səbəb olub.

Bu barədə məlumatı "Qarabağ"ın mətbuat xidmətinin rəhbəri Anar Hacıyev də təsdiq edib.

O, bəzi blogerlərin fotoqraf akkreditasiyası alaraq videoçəkilişlər etməsinə görə belə hal yaşandığını söyləyib:

"UEFA-nın sırf meydankənarı, yəni, qapıarxası çəkiliş standartları var. O ərazi yalnız fotoqraflar üçün nəzərdə tutulub. Son oyunlarda belə hal müşahidə etdik ki, bizdən fotoqraf akkreditasiyası alırlar, telefon çəkilişləri, videoçəkilişlər edirlər. UEFA-nın sırf media hüquqlarına sahib şirkətlərlə bağlı çox ciddi yanaşması var. Çəkiliş hüququ sadəcə media hüquqlarına sahib şirkətlərə məxsusdur. Kənar hər hansı bir şəxs, televiziya və ya şirkət oyundan görüntülər çəkib onu yayımlamaq hüququna sahib deyil. Hətta klubun özü belə, 24 saat ərzində sosial şəbəkə hesabında. saytında, televiziyasında belə görüntülər yayımlaya bilməz".

A.Hacıyev söyləyib ki, UEFA məsələ ilə əlaqədar "Qarabağ"a ciddi xəbərdarlıq edib, lakin klub cərimələnməyib:

"Bəzi xəbərdarlıqlar oldu. Bu məsələ var. Digər tərəfdən də fəaliyyətin göstərilməsi ilə də bağlı bəzi problemlər var. Çəkilişlər aparan şəxslər müəyyən ərazidən kənara çıxmamalıdırlar. Onların konkret fəaliyyət ərazisi var. Sırf son matçda onların tez-tez bu ərazini tərk etməkləri, hətta qol anında meydana daxil olmaqları UEFA tərəfindən ciddi qayda pozuntusu kimi qeydə alınıb, bizə bu barədə xəbərdarlıq olunub. İnşallah, cərimələnmərik, UEFA hansısa bir halı nəzərə alar, cərimə etməz. Lakin sırf UEFA tərəfindən "Qarabağ" - "Braqa" oyununa təyin olunmuş nümayəndələr matçdan sonra bizə ciddi xəbərdarlıq etdilər. Bu halın təkrarlanmaması ilə əlaqədar ciddi xəbərdarlıqlar oldu".

A.Hacıyev qeyd edib ki, Avroliqanın 1/8 final mərhələsində "Bayer"ə qarşı keçirəcəkləri ev oyunu üçün akkreditasiya məsələlərinə daha diqqətli və ciddi yanaşacaqlar:

"Budəfəki akkreditasiya dövründə bu məsələləri nəzərə alacağıq. Yalnız işini ciddi görən, sırf iş prosesimizə mane olmayan media nümayəndələrinə akkreditasiya verəcəyik".

Qeyd edək ki, "Qarabağ" "Braqa"nı iki oyunun cəmində məğlub edərək (ilk matç - 4:2, cavab oyunu - 2:3) Avropa Liqasının 1/8 final mərhələsinə adlayıb. Komanda bu mərhələdə "Bayer"lə qarşılaşacaq. Ağdam təmsilçisi ilk görüşünü martın 7-də Bakıda, cavab oyununu isə martın 14-də Leverkuzendə keçirəcək.

Azərbaycanın sabiq yunan-Roma güləşçisi Cabbar Yusifi Rusiyada 3 il 2 ay müddətinə azadlıqdan məhrum edilib.

32gun.az xəbər verir ki, bu barədə Moskva şəhərindəki Basmannı məhkəməsi qərar çıxarıb.

Qeyd edək ki, 2023-cü ilin martında saxlanılan Cabbar Yusifi İnterpolun axtarışında olub. Rusiya onu qanunsuz silah saxlama, Ukrayna qəsdən adam öldürmə ittihamı ilə axtarışa verib.

Xatırladaq ki, Cabbar Yusifi daha əvvəl Yeniyetmələrin Olimpiya Oyunlarında yunan-Roma güləşi üzrə Azərbaycan millisinin heyətində çıxış edib.

İspaniya çempionatında ötən həftə baş tutan "Betis” - "Atletik” matçında kuryoz hal yaşanıb.

Qaynarinfo-nun məlumatına görə, qarşılaşmanın yan hakimlərindən biri Qvadalupe Porras çəkiliş aparan kamera ilə toqquşub. Hadisə hakimin meydanın mərkəzinə doğru qaçarkən yaşanıb. O, geri qayıdarkən televiziya kamerasına sərt şəkildə dəyərək yerə yıxılıb. Nəticədə üzündən ciddi zədə alıb.

Baş hakim Gilyermo Kuadra Fernandes yaşananları, "13-cü dəqiqədə vurulan qoldan sonra bir nömrəli köməkçimin oyun qaydaları ilə müəyyən edilmiş iş sahəsinə televeziya kamerası yerləşdirildi. Teleoperatorun bu hərəkəti nəticəsində sözügedən kamera ilə köməkçimin başına şiddətli zərbə dəyib və nəticədə o, böyük ölçülərdə üzünün kəsik-kontuziyası yarası aldı, həmçinin huşunu itirərək yerdə qaldı. "Betis” və "Atletik”in həkimləri vəziyyətdən tez xəbər tutduqda, onun yıxıldığı yerə gediblər. Daha sonra köməkçimin vəziyyətinin ağırlığına görə həkimlər tərəfindən atılacaq addımlar qiymətləndirilərək orada olan təcili yardım maşını ilə xəstəxanaya köçürülüb” - deməklə təsvir edib.

Matçın 13-cü dəqiqəsindən etibarən bu hallar üçün müəyyən edilmiş protokoluna uyğun olaraq, dördüncü hakim D.Nestor Holqeras Kastellanos köməkçi hakim funksiyasını üzərinə götürüb və icra edib.