Ağ Evin Azərbaycan-Ermənistan danışıqlarında baş “skripkaçı” olmaq istəyinə ikili reaksiya

Yanvarın 10-da Azərbaycanın xarici işlər naziri Ceyhun Bayramov və ABŞ dövlət katibinin Avropa və Avrasiya məsələləri üzrə köməkçisi Karen Donfrid arasında telefon danışığı olması barədə xəbər verilib. Eyni gündə xanım Donfrid Ermənistanın xarici işlər naziri Ararat Mirzoyanla da danışıb.

Azərbaycan XİN-in məlumatında deyilir ki, söhbət zamanı tərəflər, iki ölkə arasında əməkdaşlıq gündəliyini və bölgədə cari vəziyyəti müzakirə ediblər. Nazir C.Bayramov postmünaqişə dövründə Azərbaycan-Ermənistan münasibətlərinin normallaşması ilə bağlı Azərbaycan tərəfinin bir sıra konstruktiv təşəbbüslərinə baxmayaraq, Ermənistan tərəfindən prosesə davamlı əsasda müxtəlif təxribatlarla maneçilik törədildiyini diqqətə çatdırıb. Bu xüsusda, Ermənistan tərəfindən 10 noyabr 2020-ci il tarixli Üçtərəfli Bəyanat üzrə öhdəliklərin kobud şəkildə pozulmasına, Laçın yolundan hərbi təxribatlar, o cümlədən minaların qanunsuz daşınması və yerləşdirilməsi, qeyri-qanuni iqtisadi fəaliyyət və təbii sərvətlərin talanması, üçüncü ölkə vətəndaşlarının qanunsuz keçidi məqsədilə istifadə olunması kimi faktlara vurğu edilib. C.Bayramov, guya Laçın yolunun Azərbaycan tərəfindən bağlanması nəticəsində erməni sakinlərin “blokada”ya alınması, bölgədə “humanitar fəlakət” yaranması barədə iddiaların tamamilə əsassız olduğunu bildirib, konkret faktlar gətirib. Bu, təzə ildə yüksək çinli ABŞ diplomatının Bakı və İrəvana ilk zəngidir. Az öncə dövlət katibi Entoni Blinken Azərbaycan və Ermənistan xarici işlər nazirləri ilə tezliklə görüşəcəyi haqda anons vermişdi. Belə görünür, hədəf Azərbaycan-Ermənistan sülh danışıqlarına kifayət qədər yüksək səviyyədə yeni stimul verməkdir. Amma bu, mümkün olacaqmı?

Qeyd edək ki, Prezident İlham Əliyev yerli telekanallara son müsahibəsində Fransa-Ermənistan cütlüyünün birgə destruktiv siyasəti nəticəsində Brüssel platformasının faktiki öz aktuallığını itirdiyinə diqqət çəkib. Qalır ABŞ və Rusiya. Ancaq məsələ ondadır ki, Rusiyanın sülh səyləri heç də beynəlxalq hüquqa söykənmir. Çünki Moskva sülh müqaviləsi mətninə ərazi bütövlüyümüzü bəri başdan şübhə altına alan “Dağlıq Qarabağ konfliktinin həlli sonraya saxlanılır” təxribatçı bəndini əlavə eləmək istəyir. Bu, əlbəttə ki, həm Kremlin bölgə ilə bağlı uzaq perspektiv (hərbi) maraqlarına hesablanıb, həm də İrəvanın ərazi iştahana tam uyğundur. Azərbaycan sözsüz ki, belə variantı rədd edir və edəcək. Bəs ABŞ? Vaşinqton Rusiyadan fərqli, ədalətli sülh sənədi layihəsi ortaya qoya biləcəkmi?

Yada salaq ki, Birləşmiş Ştatlar da vaxtaşırı İrəvanın qulağına xoş gələn ritorikadan istifadə edib. Elə Karen Donfridin özü, yaxud ABŞ-ın Ermənistandakı missiyası təzəcə başa çatan səfiri Linn Treysi zaman-zaman “Dağlıq Qarabağ konflikti bitməyib” kimi absurd bəyanatlar veriblər, Filip Riker isə sanki Bakının acığına mövcud olmayan Minsk Qrupuna yeni həmsədr təyin edilmişdi və artıq istefa verib. Halbuki tərəflər arasında sülh sazişinə nail olmaq üçün dağa-daşa çıxmağa lüzum yox. İlham Əliyevin vurğuladığı kimi, 5 məlum prinsipi əsas götürmək yetər: “Biz bu 5 prinsipi irəli sürəndə də demişdim ki, bu, hansısa çoxcildlik olmamalıdır. Bu, çox sadə bir kağız, əsas prinsipləri əks etdirən sadə sənəd olmalıdır. Əlbəttə, orada bizim daxili problemlərimiz və Qarabağ ilə bağlı bütün məsələlər barədə söhbət də ola bilməz”.

Belə fikir də var ki, ABŞ üçün Qarabağ məsələsinin hansı şəkildə həll olunmasının əhəmiyyəti yoxdur. Əsas odur, müəyyən bir həll yolu olsun və Rusiyanın regiondakı təsir imkanları zəifləsin.

Maraqlıdır ki, bu arada ABŞ-dan davamlı şəkildə Laçın yolundakı vəziyyətlə bağlı “narahatlıqlar” eşidilməkdədir. Ermənilərin saxta təbliğatına uyan amerikalı rəsmilər həqiqəti görməzdən gələrək Azərbaycanı günahlandırmağa çalışırlar. ABŞ Senatının üzvləri Bob Menendez və Cek Rid də ötən gün ABŞ dövlət katibi Entoni Blinkenə göndərdikləri məktubda Laçın yolundakı aksiyadan “narahat olduqlarını” yazıblar. İddia ediblər ki, Azərbaycanın Qarabağı “blokada”da saxlaması 2020-ci il müharibəsindən sonra hələ də sağalmayan, onsuz da zəif olan region üçün dağıdıcı nəticələrə səbəb olur.

ABŞ-ın rəsmi şəxsləri də çox həyəcanlanıb, baxmayaraq ki, Qarabağ ermənilərində heç o qədər həyəcan sezilmir, Vardanyan isə “həyat yolumuz var”, - deyə, bağırır. Bu mərhələdə Rusiyanın rəsmi mövqeyi daha normal təsir bağışlayır. Əslində bu, təbiidir, çünki təkcə 13 yanvarda Rusiya hərbi kontingentinin 19 yük maşını Laçın yolu ilə hərəkət edib, ərzaq və digər ehtiyatlar daşıyıb. Belə olan təqdirdə tərəfsiz “vasitəçi” olmağa cəhd göstərən ABŞ-ın cəhdlərinin hansı sonluqla bitəcəyi sual olunur. Bəs ekspertlər necə düşünür, Vaşinqton, yaxud Moskva Bakının təkliflərini bazis kimi götürəcəkmi?

Tural İsmayılov: Ermənistan Rusiya və onun imzasına qarşı da açıq hörmətsizlik nümayiş etdirir

Sosial Tədqiqatlar Mərkəzinin sektor müdiri, politoloq Tural İsmayılov “Yeni Müsavat”a bildirdi ki, Vaşinqton 30 il ərzində Azərbaycan torpaqlarının işğalı faktına göz yumub: “Təəssüflər olsun ki, bu günə qədər rəsmi Vaşinqtonun vasitəçilik missiyası praktiki olaraq yararlı olmayıb. Ermənistanın gah Rusiya, gah İran, gah Fransa vasitəsiylə sülhü sabotaj cəhdlərinə ABŞ səssiz qalır”.

T.İsmayılov qeyd etdi ki, Moskva, yaxud Vaşinqtonun Bakının təkliflərini bazis kimi götürmək ehtimalları o qədər real görünmür: “Çünki ölkəmiz beynəlxalq hüququn ən ali prinsiplərinin təmin edilməsi məsələsində böyük haqsızlıqlara məruz qalıb. ABŞ Rusiyanın bölgədə aktivliyini həzm edə bilmir. Eyni zamanda, Rusiya aqressiyasının ziyanlarını yaxşı dərk etdiyi üçün Vaşinqton bölgədə sabitlikdə daha maraqlıdır”.

Ekspert hesab edir ki, bundan sonra Cənubi Qafqazda ABŞ və Rusiya qarşıdurması daha da dərinləşəcək: “Bizim üçün önəmli olan isə qlobal nizamın bərqərar olunmasıdır”.

Politoloq Məhəmməd Əsədullazadə isə bildirdi ki, ABŞ vasitəçiliyi yeni ildən başlayaraq daha qabarıq şəkildə özünü göstərir: “ABŞ dövlət katibinin Azərbaycan və Ermənistan xarici işlər nazirlərinə zəngi və yeni görüşü planlaşdırması ondan xəbər verir ki, Ağ Ev prosesi müsbət məcrada davam etdirməkdə maraqlıdır. Bu günlərdə Gürcüstanın baş naziri İrəvana səfər etmişdi. Bu mənada hesab edirəm ki, Tiflisdə ABŞ-ın təşəbbüsü, Gürcüstan da vasitəçiliyi üzərinə götürməsi ilə Azərbaycan-Ermənistan görüşü təşkil edilə bilər. Gürcüstan da bu məsələdə maraqlıdır. ABŞ-ın yanaşmasi Azərbaycanın irəli sürdüyü şərtlər daxilindədir və Vaşinqton gündəliyi buna uyğun tərtib edilib. Vaşinqton hətta Tiflisdə Azərbaycan və Ermənistan liderlərinin görüşünü də təşkil edə bilər. Yəni ABŞ daha səmimidir və regionda geosiyasi mövqeyi Azərbaycanla birgə olmağı diktə edir”.

M.Əsədullazadənin sözlərinə görə, əgər Vaşinqton Ermənistanın mövqeyini müdafiə edərsə, bu, Rusiyanın maraqlarına cavab verər: “Ona görə də burada praqmatik mövqe ortaya qoyur. Rusiya isə, əksinə, Qarabağa status tələb edir və bu da Rusiyanın regionda qalıcılığı deməkdir. Ona görə də bizim üçün və region üçün ədalətli həll yolu yalnız Vaşinqton gündəliyinin əsas tutduğu Azərbaycanın 5 prinsiplərdən ibarət sülh təklifidir. Buna əks arqumentlər isə sülhə qarşıdır və Azərbaycan buna gedə bilməz”.

//Müsavat.com

5 daimi üzvün monopoliyası, eləcə də geosiyasi rəqabətdə ərazi və potensial baxımından böyük dövlətlərdən geri qalması Azərbaycan üçün belə perspektivi imkansız edir.
Lakin Rusiya-Ukrayna müharibəsinin XX əsrdən qalma nizamı dəyişdirəcəyi, XXI əsrin yeni nizamının formalaşacağı perspektivi də aydın görünür. Və yeni dünyada ölkələr üçün öz yerini müəyyənləşdirmək imkanları da yaranacaq.
Bu reallıqlar fonunda Əliyev çıxış yolunu təqdim edir:
İslam Əməkdaşlıq Təşkilatı və Qoşulmama Hərəkatının BMT TŞ-yə daimi üzv verməsini təklif edir və bu təşkilatlar üzərindən Azərbaycan üçün perspektiv imkanlar yaradır.
Asif Nərimanlı
Teref.az

"Adamı məhkəməyə belə çağıranda, 3 il öncə baş verən hadisəni xatırlayıb-xatırlamadığını soruşurlar".
"2020-ci ildən Azercell-dən istifadəni məhdudlaşdırmışam. Səbəb qiymətlərinin çox baha olması və müştərilərinə dəyər verməməsi olub. Sonuncu dəfə 2020-ci ilin noyabr ayında Azercell-in "Sərbəst 25" tarifinə qoşulmuşam. Üstündən 3 il keçdiyi üçün də "Sərbəst 25" tarifində olduğumu unutmuşam. Amma qiymət baha, xidmət isə çox aşağı səviyyədə olduğu üçün növbəti aylarda Azercell-in internet və danışıq tariflərindən istifadə etməmişəm. Yalnız bağlanmasın deyə nömrəmin balansına ayda və ya iki aydan bir, bir manat qoyuram ki, nömrəm bağlanmasın.

GUNDEMİNFO.AZ xəbər verir ki, bu barədə tanınmış jurnalist Elmar Hüseynov yazıb.

Həmkarımız daha sonra qeyd edir: "Dünən təsadüfən dostlarımdan biri Azercell nömrəmin balansına 20 manat göndərib. Pulu göndərdikdən sonra ona təşəkkür etməyə macal tapmamış, Azercell növbəti "bombasını partlatdı":
"Sizin ayliq SERBEST25 paketiniz yenilendi. Siz 850 olkedaxili deqiqe, 15GB internet, WhatsApp ve Facebook Messenger tetbiqlerinde metn yazishmalari uchun 1GB Internet elde etdiniz. Tarif her 30 gunden bir avtomatik yenilenir".
Sözün düzü Azərbaycanın hansısa mobil operatorundan bu qədər operativlik gözləməzdim. Demək məsələ cibə girmək olduqda, Azercell operativlik nümayiş etdirir".

Baş verənlərlə bağlı Azercellin operatoru ilə əlaqə saxlasam da mənim haqlı olduğumu, amma balansı geri qaytarmayacaqlarını bildirdi. Operator hər hansı tarifin 3 ay sonra ləğv edildiyini bildirsə də, sonra da deyir ki, sonuncu hansı tarifdə olmusunuzsa o tarif nömrənin üstündə qalır.

Operatora bildirdiyimi bir daha Azercell rəsmilərinə də bildirirəm. Əgər 3 il öncə hər hansısa cinayət hadisəsi baş veribsə, bununla bağlı səni hətta şahid qismində məhkəməyə dəvət etdikdə, ilk sual bu olur ki, 3 il bundan öncə baş verən hadisəni xatırlayırsınızmı? Amma Azercell öz müştərilərinə hörmət edərək, bir sorğu belə göndərmir. Bu isə onu seçən müştərisinə ən böyük hörmətsizlikdir.

Azercell Azərbaycanda ən böyük mobil operator olaraq mədəniyyət nümayiş etdirib, sorğu göndərə bilərdi ki, Sizin 3 il öncə qoşulduğunuz "Sərbəst-25" tarifinizi yeniləmək istəyirik, buna razısınızmı? Mən də "hə" və ya "yox" seçimimi edə bilərdim. Amma görünən budur ki, Azercell öz əvvəlki reputasiyasını davam etdirir və nəticədə mənim kimi müştərilərini bazardakı digər rəqibləri qarşısında itirir. Öz müştərisinin cibinə girən mobil operatorun sonu isə heç yaxşı görünmür.
Əgər balansımı bərpa etməsə, Azercelli məhkəməyə verəcəm. //GUNDEMİNFO.AZ//

Azərbaycanda inzibati məsuliyyətdən azad etmənin xüsusi halı müəyyənləşib.

Bu, Prezident İlham Əliyevin İnzibati Xətalar Məcəlləsinə (İXM) dəyişikliyi təsdiqləməsi ilə mümkün olub.

Bildirilib ki, İXM-in 134.1-ci maddəsində inzibati xəta haqqında iş üzrə qərardan verilən şikayətə və ya protestə baxılması nəticəsində qəbul edilən qərarlar müəyyən olunub. Həmin qərarlardan biri 134.1.5-ci maddədə əks olunub. Həmin maddəyə əsasən şikayətə və ya protestə baxılarkən inzibati xəta haqqında iş üzrə qərarı buna səlahiyyəti çatmayan hakimin, orqanın (vəzifəli şəxsin) qəbul etdiyi müəyyən olunduqda, qərarın ləğv edilməsi və işin aidiyyəti üzrə baxılmaq üçün göndərilməsi haqqında qərar qəbul edilir. Lakin inzibati xəta haqqında iş üzrə qərarın lağv edilməsi və ya dəyişdirilməsi üçün əsasları müəyyən edən İXM-in 135-ci maddəsində qeyd olunan əsas (inzibati xəta haqqında iş üzrə qərarı buna səlahiyyəti çatmayan hakimin, orqanın (vəzifəli şəxsin) qəbul etməsi) əks olunmayıb. Məcəllədə olan bu ziddiyyəti aradan qaldırmaq məqsədilə inzibati xəta haqqında iş üzrə qərarın ləğv edilməsi və ya dəyişdirilməsi üçün əsasların sırasına inzibati xəta haqqında iş üzrə qəranın buna səlahiyyəti çatmayan hakim və ya orqan (vəzifəli şəxs) tərəfindən qəbul edilməsi əlavə olunub.
Dəyişikliyə əsasən, məhkəmə və digər orqanların qərarlarının icrası ilə əlaqədar icra məmurunun tələblərinin yerinə yetirilməməsinə görə inzibati məsuliyyəti nezerde tutan 528.1-ci maddənin dispozisiyası təkmilləşdirilərək yeni redaksiyada verilib. Həmin maddədə nəzərdə tutulan inzibati xətanın inzibati tənbeh almış şəxs tərəfindən inzibati tənbeh vermə haqqında qərarın qanuni qüvvəyə mindiyi gündən bir il ərzində eyni icra sənədinə münasibətdə təkrar törədilməsinə görə isə daha ciddi sanksiya nəzərdə tutan yeni inzibati xəta əlavə olunub (528.1-1-ci maddə). Bundan başqa, 528.3-cü maddədə inzibati xətanın hansı subyekt tərəfindən törədilməsi dəqiq göstərilib və 528-ci maddəyə yeni qeyd hissəsi əlavə edilməklə inzibati məsuliyyətdən azad etmənin xüsusi halı əks olunub.
İnzibati Xətalar Məcəlləsinin 150.5.1-ci maddəsinə əsasən, inzibati cərimə ödənilmədikdə, onun ödənilməsi məqsədi ilə inzibati cərimə tətbiq etmə haqqında qərarın surəti həmin qərarı qəbul etmiş səlahiyyətli orqan (vəzifəli şəxs) tərəfindən fiziki şəxsin əməkhaqqından, təqaüdündən, pensiyasından və ya digər gəlirlərindən tutulması üçün inzibati məsuliyyətə cəlb edilmiş şəxsin işlədiyi və ya oxuduğu, yaxud əməkhaqqı aldığı müəssisəyə, idarəyə, təşkilata və ya pensiya təyin edən orqana göndərilir. Qeyd olunanlara uyğun olaraq fiziki şəxsin işlədiyi və ya oxuduğu, yaxud əməkhaqqı aldığı qurum və ya pensiya təyin edən orqan tərəfindən inzibati cərimə növündə inzibati tənbeh tətbiq etmə haqqında qərarın icrası ilə bağlı tədbirlərin görülməməsinə görə inzibati masuliyyət müəyyən edən yeni maddə əlavə olunur.

Ermənistanın baş naziri Nikol Paşinyan və Azərbaycan Prezidenti İlham Əliyevin mətbuatla eyni vaxtda əlaqə saxlaması onu göstərə bilər ki, biz müəyyən qərarların astanasındayıq və hər iki tərəf öz xalqlarını buna hazırlamağa çalışır. Bu iddia ilə erməni politoloq Suren Surenyan çıxış edib.
Siyasi ekspert Samir Hümbətov isə Bakupost.az -a açıqlamasında bildirib ki, Prezident İlham Əliyevin telekanallara müsahibəsi ilə Paşinyanın keçirdiyi mətbuat konfransının hansısa əlaqəsi yoxdur.
S.Hümbətovun sözlərinə görə, Azərbaycan və Ermənistan liderlərinin mətbuatla təmaslarının eyni gündə baş tutması təsadüfdür:

"Bu, sadəcə 2022-ci ilin bitməsi 2023-cü ilin başlaması ilə əlaqədar olaraq hesabat xarakterli görüşlərdir. Dövlət başçıları yeni ildə qarşıda duran məsələlərlə bağlı ənənəvi olaraq, belə konfranslar təşkil edirlər".
Politoloq Paşinyanın mətbuat konfransında səsləndirdiyi iddialara da münasibət bildirib:
"Düşünürəm ki, Paşinyan Azərbaycana qarşı irəli sürdüyü iddialara heç özü də inanmır. O, dünənki çıxışında nə demək istədiyini özü belə anlaya bilmirdi. Guya Azərbaycanla sülh müqaviləsi imzalananda orada sərhəd, ərazi məsələsi göstərilmir. Sülh müqaviləsi beynəlxalq aləmdə tərəflərin bir-birinə qarşı ərazi iddialarından əl çəkməsi, qarşılıqlı diplomatik əlaqələrin qurulması, mehriban qonşuluq münasibətlərinin formalaşmasına əsaslanan bir sənəd kimi qəbul edilir. Görünür, Paşinyanın beynəlxalq hüquqdan anlayışı yoxdur ki, bu cür absurd fikirlər səsləndirir. O bildirdi ki, dünyada elə bir dövlət yoxdur, Qarabağı Azərbaycanın tərkib hissəki kimi tanımasın. Bu, onun bir neçə düzgün etiraflarından biri idi. Amma məsələ burasındadır ki, o, dəqiq deyə bilmədi, Qarabağ erməniləri ilə bağlı istəyi nədir?
Reallıq isə odur ki, Azərbaycan Ermənistandan beynəlxalq hüquqda təsbit olunmuş bütün müddəaları tam şəkildə yerinə yetirməyi tələb edir. Yəni, sülh müqaviləsi imzalanacaqsa, qarşılıqlı şəkildə ərazi iddilarından əl çəkilməli, sərhədlərin delimitasiya və demarkarsiyası məsələləri həll olunmalıdır. Prezident İlham Əliyev bildirib ki, istənilən yerdə danışıqlara hazıram. İstər Moskvada olan görüşdə, istər Soçidə, istər Brüsseldə, istərsə də Praqada olan görüşdə. Beynəlxalq ictimaiyyət də bilir ki, Azərbaycanın danışıqların pozulmasında heç bir rolu yoxdur. Ona görə də bununla bağlı Azərbaycana təzyiq edən yoxdur.
Ermənistanın danışıqlardan qaçması, zamanı uzatması Rusiya-Ukrayna müharibəsinin sonunu güdməsi ilə bağlıdır. Çünki Rusiya Paşinyana sülh müqaviləsi imzalamamaqla, ya da Rusiyanın şərtlərini ora daxil etməklə bağlı çox təkid edir. Fikrimcə, Paşinyan bunu gözləyir. Amma Rusiya-Ukrayna müharibəsinin nəticəsindən asılı olmayaraq danışıqlar masası məcburən qurulmalıdır. Əks halda yenidən müharibə ola bilər. Bunun nəticəsi isə Ermənistan üçün çox ağır olacaq".

Hazırda bir çox Qərb ekspertləri Rusiyanın parçalanması ilə bağlı proqnozlar irəli sürürlər. Hesablamalara görə, bu haradasa yaxın 1-2 il ərzində baş verəcək. Onların fikrincə, Putin hakimiyyətdən devriləndən sonra Rusiyanın parçalanması qaçılmaz olacaq.

Bəs Rusiya parçalanarsa, bunun Azərbaycana nə kimi faydalı, yaxud zərərli təsirləri olacaq? Ümumiyyətlə, postputin dönəmi necə olacaq? ABŞ və Avropa bu dönəmə necə hazırlaşır, nələri planlaşdırır? Bilirik ki, Azərbaycanın Rusiya ərazisində tarixi torpaqları var. Rusiya parçalanacağı təqdirdə Azərbaycan rəsmi şəkildə o torpaqlara iddia etməldirmi?

Azərbaycan cəmiyyətini düşündürən bu sualları “7Times.az“a açıqlamasında politoloq Elxan Şahinoğlu cavablandırıb: “ Rusiya Ukraynaya qarşı işğalçı müharibəyə başlamaqla ölkə faktiki olaraq bataqlığa sürükləndi. Əslində bu Rusiyanın müharibəsi deyildi, Rusiyanın maraqlarına cavab vermirdi. Bu intiqam hissi ilə yaşayan Putinin şəxsi müharibəsidir. Putin böyük imperiyanı bərpa etməklə Qərbə dirsək göstərmək xülyası ilə yaşayır. Amma alınmadı. Bir ilə yaxındır ki, müharibə gedir. Rusiyanın gözəgörünən uğurları yoxdur, itkiləri isə 100 mini keçib və bunun hesabını vermək lazım gələcək. Doğrudur, hazırda Rusiya cəmiyyəti qorxusundan Putinə dəstək verir, amma bir gün həqiqətən Putin olmasa, Rusiya cəmiyyəti onun yerinə gələnə dəstək verəcəkmi? Putinin xəstəliyi ilə bağlı kifayət qədər məlumat yayılır. Yəni, bir gün Putin hansısa səbəbdən hakimiyyətdən getsə, onun yerinə gələn şəxsin Ukraynaya qarşı müharibəni davam etdirmək iqtidarında olacağını düşünmürəm. Təzyiqlər olacaq və inanmıram ki, Rusiya cəmiyyəti bu gün Putinə verdiyi dəstəyi onun yerinə gələnə də verəcək. Bu halda Qərb Rusiyanın daha çox zəifləməyinə çalışacaq. Onsuz da ABŞ Rusiyanın Ukrayna bataqlığına düşməsindən istifadə edərək onun zəifləməsini sürətləndirən sanksiyalar tətbiq edir. Rusiya neft və qazını Qərb ölkələrinə sata bilmir. Rusiya hakimiyyəti bunu etiraf etməsə də, ölkədə iqtisadi vəziyyət getdikcə ağırlaşır. Demək olar ki, Qərb Rusiya ilə qonşu olan ölkələrdə, o cümlədən Azərbaycanda postputin dövrünə hazırlaşır. Bu dövrün necə olacağını proqnozlaşdırmaq çətindir. Əlbəttə, Rusiya zəifləyə, hətta ən pis halda parçalana da bilər. Rusiya 200 il ərzində Azərbaycana durmadan təzyiq edib, bizə erməni problemini yaradan da məhz Rusiya imperiyası olub. O üzdən Rusiyanın zəifləməsi haradasa Azərbaycanın maraqlarına cavab verə bilər. Belə ki, zəifləyən Rusiya nəhayət Cənubi Qafqazdan əlini çəkər. Əslində 44 günlük savaşda da qarşımızda Rusiya olmasa idi, məsələni birdəfəlik həll edəcəkdik. Amma imkan vermədilər. Amma Rusiya zəifləyərsə, yaxud daha pis halda parçalanma ehtimalı artarsa, bizim də burada öz maraqlarımız olacaq. Birincisi, Azərbaycanın suverenliyi və ərazi bütövlüyünün bərpası istiqamətində addımlarımızı atacağıq. İkincisi, bəli, Rusiya ərazisində tarixi torpaqlarımız var, əlbəttə indidən bu məsələdə hansı siyasət yürüdəcəyimizi demək çətindir, amma həqiqətən hadisələr elə sürətlə inkişaf edə bilər ki, həm İran, həm də Rusiya ərazisində olan tarixi torpaqlarımızın geri qaytarılması istiqamətində addımlar atmağa məcbur qala bilərik”.

Rübabə Səməndər

Bildiyimiz kimi, bu il Türkiyədə növbəti president seçkiləri keçiriləcək. Türkiyə Prezidenti Rəcəb Tayyib Ərdoğan ölkəsində prezident seçkilərinin may ayında keçiriləcəyini açıqlayıb. Türkiyə Cümhuriyyətində cərəyan edən siyasi proseslər həmişə Azərbaycan ictimaiyyətinin diqqət mərkəzində olub. Təbii ki, qarşıdan gələn president seçkiləri də Azərbaycan ictimaiyyətinin, xüsusiılə də politoloq və siyasi partiya liderlərinin diqqət mərkəzindədir.

Seçkilərin nəticələri Türkiyə Azərbaycan münasibətlərinə necə təsir göstərəcək? Türkiyədə hakimiyyət dəyişərsə, yeni iqtidar Azərbaycanın yanında olacaqamı?

Azərbaycan, eləcə də Türkiyə mediasında müzakirə olunan mövzuyla bağlı politoloq Məhəmməd Əsədullazadə 7Times.Az-a açıqlama verib: “Türkiyə Azərbaycan münasibətləri təkcə hakimiyyətlərası münasibətlər deyil. Bu münasibətlər iki xalq arasında təbii müttəfiqlik və qardaşlıq prinsiplərinə söykənir. Hələ 1918-ci ildə Osmanlı dövründə Türkiyə Azərbaycana ciddi dəstək verib, Azərbaycanda Demokratik Xalq Cümhuriyyətinin yaranmasında mühüm rol oynayıb və Azərbaycan dövlətini qoruyub. Hətta sovetlər dönəmində də Türkyə cümhuriyyətinin Azərbaycana qarşı ciddi marağı olub. Türkiyə prezidentləri və baş nazirləri dəfələrlə Azərbaycana səfər ediblər və ölkəmizlə əlaqələri daim qoruyub saxlayıblar. Həmçinin Naxçıvanın Ermənistana verilməməsində də Türkiyə ciddi mövqe ortaya qoyib. 1991-ci ildə, Birinci Qarabağ müharibəsində, müəyyən səbəblərə görə Türkiyə Azərbaycana yardım edə bilmədi. Bunun obyektiv və sybyektiv səbəbləri vardı. O zaman Türkiyə NATO üzvü olaraq ABŞ-dan çox asılı idi. Amma Türkiyə dövləti Ermənistanla bütün əlaqələrini kəsdi və adıçəkilən ölkəyə iqtisadi sanksiyalar tətbiq etdi. Rəcəb Təyyib Ərdoğanın hakimiyyəti dövründə dövlətlərimiz arasında münasibətlər daha da yüksələn xətlə inkişaf etdi, Azərbaycan və Türkiyə tarixi üçün böyük əhəmiyyətə malik Şuşa Bəyannaməsi imzalandı. Düşünürəm ki, növbəti president seçkiləri cənab Ərdoğanın xeyrinə sonuclanacaq. Amma Ərdoğan hakimkyyətdən gedəcəyi təqdirdə belə Türkiyə Azərbaycan əlaqələrinin zəifləyəcəyini zənn etmirəm. Xüsusiıə də rəsmi Ankara tərəfdən. Çünki artıq şərtlər əvvəlki kimi deyil. Yeni geosiyasi şərtlər formalaşıb. Regionda söz sahibi olan Türkiyə artıq dünya gücünə çevrilir. İstər CHP, istərsə də İYİ Partiyanın hakimiyyətə gəlişinin ölkələrimiz arasındakı münasibətlərin dəyişməsinə səbəb olacağını düşünmürəm. İnanıram ki, istənilən halda Türkiyə Azərbaycan münasibətləri yüksək səviyyədə davam edəcək. Bir daha vurğulamaq istəyirəm ki, ölkələrimiz arasındakı əlaqələr təkcə hakimiyyətlərarası əlaqələr deyil, iki xalq arasındakı dostluq, qardaşlıq münasibətləridir”.

Naxçıvan Dövlət Universiteti Azərbaycanın bəlkə də ən rüşvətxor ali məktəbidir. Bu "təhsil ocağı"nda hər nəsnənin öz qiyməti var. Rüşvətini ver, istəyirsən, dərsə gəlmədən belə qırmızı diplom al. Hər halda mənə bu barədə çoxlu şikayət məktubları gəlir və mən bu məktublara əsasən danışıram. Sadəcə başımı həmin ali məktəbə qoşmamaq üçün indiyədək sözügedən məktubları dərc etmirdim. Daha doğrusu, NDU-nu növbəti dəfələrə saxlayırdım.
Görünür, bu laqeydliyimi sezən rektor Elbrus İsayev məndən öz xeyrinə təbliğat ruporu kimi faydalanmağa qərar verib. Bir adamını öyrədib mənə təhsil sisteminə heç bir dəxli olmayan və davamlı tənqid etdiyim bir şəxsi (hələlik adını açıqlamıram) pisləyərək Elbrus İsayevi göylərə qaldıran "məlumatlar" sızdırır. Mən də təbii ki, bu məlumatı dərc ertmədim. Elbrus müəllimin adamı isə "xamlığıma" güvənib vatçap nömrəmə məni jurnalist kimi obyektiv olmamaqda günahdıran mesaj ünvanlayıb. Özü də ərkanə üslubda. Guya ki, mən ona edilmiş hansısa xüsusi diqqətə görə Naxçıvanın elmi potensialını darmadağın dağıdan bir adama məddahlıq etməli imişəm.
Elbrus müəllim, o mesajın sizin arzunuzla mənə ünvanlandığının fərqindəyəm və bunu məni axmaq yerinə qoymağınız kimi qiymətləndirirəm. Hazırda da öz digər adamlarınızı da bu işə səfərbər edib yanlışınızı davam etdirirsiniz. Sizin tərəfdarlarınız NDU-da baş verən özbaşınalıqları, rüşvətxorluqları keçmiş prorektorunuz Seymur Talıbovun adına yazırlar. Dünənə qədər qol-boyun olub tələbələri qaz kimi yolduğunuz bir adama qarşı bu hərəkətin nə qədər əxlaqi olub-olmadığını müəyyənləşdirməyi sizinlə Seymurun ixtiyarına buraxıram. Mən hər halda Seymurun vəkili deyiləm ki, onun haqqını müdafiə edəm.
Məni maraqlandıran başqa məsələlərdir. Əvvəla, NDU-nun rektoru siz idiniz, yoxsa Seymur "müəllim"? Dünənə qədər Seymurun arxasında gizlənib NDU-nu rüşvət ocağına çevirməyiniz azmış kimi, indi də ondan qalxan kimi istifadə etməyiniz müəllim, ziyalı adı daşıyan bir şəxsə yaraşmaz. Bunu özünüzə necə yaraşdırmağınız sizin vicdani məsuliyyətinizə aid məsələ olduğundan mənə o qədər də dəxli yoxdur.
Məni maraqlandıran əsas məsələ isə özümlə bağlıdır. Etiraf edim ki, məni axmaq yerinə qoymağınız və bütün xəbərdarlıqlarıma baxmayaraq bu işi davam etdirməyiniz qüruruma toxunur. Məni məcbur edirsiniz, indiyədək NDU-dan mənə ünvanlanan şikayət məktublarını yayımlayam. Əgər həqiqətən də istədiyiniz budursa, bilin və agah olun, mən əlimdəki sizinlə bağlı bütün materialları paylaşacağam. Bir az səbrli olun və vaxtınızı gözləyin. Və trollarınızı mənim səhifəmdən çəkib yerlərinə oturdun.
Heydər Oğuz
Teref.az