Rusiya-Ukrayna müharibəsinin başladığı 2022-ci ildən bəri rublun məzənnəsində qeyri-sabitlik müşahidə olunur. Müxtəlif geosiyasi və iqtisadi faktorların təsiri ilə rubl zaman-zaman dəyər itirsə də, son günlər bu valyutanın məzənnəsində artım müşahidə edilir. Rublun möhkəmlənməsi, xüsusilə də Azərbaycanla Rusiya arasında iqtisadi əlaqələri, ticarət dövriyyəsini və miqrant pul axınlarını nəzərə alaraq, ölkəmizə müəyyən təsirlər göstərə bilər.

Bu prosesin Azərbaycan iqtisadiyyatına mümkün təsirləri nələrdir?

Məsələ ilə bağlı iqtisadçı Xalid Kərimli News24.az-a açıqlamasında bildirib ki, rublun bahalaşmasının bir sıra mənfi tərəfləri var:

"Rublun bahalaşmasının Azərbaycana bəzi mənfi təsirləri var. Çünki Azərbaycanın rublla aldığı məhsullar bahalaşacaq, Azərbaycan da Rusiyadan çoxlu məhsul alır, idxal 20%-in üzərindədir və Rusiya Azərbaycana məhsul satmaqda birinci yerdədir. Bu məhsulların əhəmiyyətli hissəsi də xüsusən də bu sanksiyalardan sonra rublla satılır, rublla ödəniş olunur. Bizim aldığımız məhsullar bahalaşır, bu baxımdan bizə heç bir xeyri yoxdur. Bizim Rusiyadan aldığımız məhsulların da çoxu ərzaq, əmtəə, meşə sənayəsi, tikinti materiallari, metal və s. bunların alternativ yerləri də yoxdur ki, Rusiyada bahalaşanda başqa yerdən alaq. Sahibkarlıq xərci artır, xərc artdıqda qiymət də artır".

İqtisadçı qeyd edib ki, burada Rusiya ilə bağlı fərqli məqam var. Rusiyada Azərbaycan vətəndaşları çalışır. Rublun bahalaşması Rusiyada yaşayan azərbaycanlıların bizim ölkədə ailələrinə göndərdikləri vəsait də artacaq.