"Bank Avrasiya" 2024-cü ilin III rübü üzrə maliyyə hesabatlarını açıqlayıb.
SAVASHMEDİA.az banka istinadən xəbər verir ki, 2024-cü ilin yanvar-sentyabr ayları ərzində "Bank Avrasiya"nın xalis mənfəəti ötən ilin müvafiq dövrü ilə 11.9% azalaraq 3 milyon 483 min manat təşkil edib. 2023-cü ilin müvafiq dövründə bank 3 milyon 952 min manat xalis mənfəət əldə etmişdi.

Hesabat dövründə bankın faiz gəlirləri 8.4% azalaraq 11 milyon 193 min manat, faiz xərcləri isə 33% azalaraq 1 milyon 698 min manat təşkil edib. Bu dövrdə bankın qeyri-faiz gəlirləri 1 milyon 860 min manata ( illik müqayisədə 7.9% çox), qeyri-faiz xərcləri isə 5 milyon 996 min manata ( illik müqayisədə 3.3% çox) bərabər olub. Beləliklə bank bu dövrdə 4 milyon 648 min manat əməliyyat mənfəəti əldə edib ki, bu da illik müqayisədə 10.2% azdır.

Bu ilin oktyabr ayının 1-nə bankın aktivləri ilin əvvəli ilə müqayisədə 10.9% və ya 20.2 milyon manat artaraq 204.7 milyon manata çatıb. Cari ilin ilk 9 ayında "Bank Avrasiya"nın kredit portfeli (müştərilərə verilmiş kreditlər) isə 351 min manat azalaraq 136.8 milyon manata bərabər olub.

Bu dövrdə "Bank Avrasiya"nın cəmi öhdəlikləri 120 milyon 412 min manat təşkil edib ki, bu da ilin əvvəlinə nisbətən 15.7% və ya 16.3 milyon manat çoxdur. Bankın ümumi depozit portfeli isə cari ilin 9 ayında 37.8% və ya 18.3 milyon manat manat artaraq 66 milyon 810 manata çatıb.

2024-cü il oktyabr ayının 1-nə "Bank Avrasiya"nın cəmi kapitalı ilin əvvəli ilə müqayisədə 4.8% və ya 3 milyon 869 min manat artaraq 84 milyon 307 min manat təşkil edib.

Azərbaycan Mərkəzi Bankı balansında olan nəqliyyat vasitələrini hərraca çıxarır.

İqtisadiyyat.az xəbər verir ki, avtomobillər noyabrın 26-da saat 10:00-da hərraca çıxarılacaq.

"Mercedes", "Honda", "Hyundai", "Toyota", "Audi" və "Mitsubishi" markalarına aid avtomobillərin ümumi sayı 15 ədəddir.

Avtomobillərin markası, istehsal ili və ilkin hərrac qiyməti ilə aşağıdakı siyahıdan tanış olmaq mümkündür:

Bu ilin yanvar-avqust aylarında ölkə iqtisadiyyatında muzdla çalışan işçilərin orta aylıq nominal əməkhaqqı 997 manat 10 qəpik olub.

“Cebheinfo.az” bu gün açıqlanan rəsmi məlumata istinadən xəbər verir ki, orta aylıq nominal əməkhaqqı əvvəlki dövrlə (yanvar-iyul 2024) müqayisədə 5 manat 30 qəpik azalıb. Qeyd edək ki, bu ilin yanvar-iyun aylarında orta aylıq əməkhaqqı 1 002 manat 40 qəpik olub.

İqtisadçı-eskpert Razi Abbasbəyli “Cebheinfo.az” -a açıqlamasında deyib ki, ilin sonunda orta aylıq əməkhaqqı azalır:

“Ümumi kvalifikasiya və əlavə gəlir vergiləri üzrə hesablamalar ilin sonunda orta aylıq əməkhaqqının baza hissəsini azaldır.

Təqribən 0,5 faizə yaxın azalma baş verir. Əsasən mühasibatlıq və xəzinədarlıq proseslərində ilin sonuna doğru əməkhaqqının təkrar formalaşdırılması və yeni il üçün əməkhaqqının təyini ilə bağlı belə hallar baş verir”.

Ekspert qeyd edib ki, bu ilin sonunda orta aylıq əməkhaqqı daha da azalacaq:

“Bu ilin sonu və gələn ilin əvvəlində texniki-maliyyə məsələləri ilə bağlı orta aylıq əməkhaqqı ardıcıl olaraq azalacaq. Lakin burada narahatlığa heç bir əsas yoxdur. Belə ki, texniki və maliyyə hesablamalarına görə orta aylıq əməkhaqqının ümumi statistikası azalır. Lakin yeni hesablamalardan sonra, ilin əvvəlində orta aylıq əməkhaqqının artacağı gözlənir. Yəni, ümumi statistikada baş verən dəyişikliyə görə heç bir narahatlığa əsas yoxdur”.

“Dow Jones” və “S&P 500” indeksləri tarix boyu ən yüksək səviyyələrə çatıb.

İndex.az xəbər verir ki, bu, bankların müsbət hesabatları fonunda baş verib.

Belə ki, “Dow Jones Industrial Average” 1 % artaraq 42 863,86 bəndə, “S&P 500” 0,6 % artaraq 5 815,03 bəndə, “Nasdaq Composite” isə 0,3 % artaraq 18 342,94 bəndə çatıb.

“JPMorgan Chase” bankının səhmləri gözləntiləri üstələyən mənfəət hesabatının dərc edilməsindən sonra 4 % artıb. Eyni zamanda, “Tesla”nın səhmləri İlon Mask sürücüsüz taksi təqdim etdikdən sonra 8,7 % ucuzlaşıb.

Xatırladaq ki, “Dow Jones” ABŞ səhm bazarının ilk indikatorudur. O, ABŞ-ın 30 iri sənaye şirkətinin məlumatlarını əhatə edir.

“S&P 500” indeksinə informasiya texnologiyaları (İT), energetika, səhiyyə, maliyyə, kommunal xidmətlər, sənaye və telekommunikasiya sahələrini təmsil edən ABŞ-ın 500-ə yaxın şirkəti daxildir. İndeks demək olar ki, müxtəlif dərəcələrdə istehsal və xidmət sahələrinin hamısını əhatə edir. Üstəlik, onun böyük hissəsini İT şirkətləri təşkil edir.

Bu ilin yanvar-sentyabr aylarında Azərbaycandakı beşulduzlu hotellərdə onlayn bronlaşdırma sistemi üzərindən bir gecə qalmaq üçün orta qiymət 215,6 manat təşkil edib. Dövlət Turizm Agentliyinin hesabatına görə, bu, ötən ilin eyni dövrü ilə müqayisədə 33,3 faiz çoxdur.
Hesabat dövründə ən yüksək qiymət 349,9 manat olmaqla Qəbələdə qeydə alınıb. Bu, bir il əvvələ nisbətən 12,8 faiz çoxdur. İkinci yerdə 327 manat olmaqla Quba hotelləri qərarlaşıb. Beşulduzlu hotellər arasında üçüncü yeri isə 308,8 manat olmaqla Abşeron hotelləri tutub. Bu rayonda orta qiymət son bir ildə 82,7 faiz artıb.
“Azərbaycan Hotellər və Restoranlar Assosiasiyası”nın İdarə Heyətinin sədri Samir Dübəndi bahalaşmanı bir neçə amillə izah edir: “Bahalaşma dünyada baş verən inflyasiya, xərclərin artması kimi amillərlə izah edilə bilər. Beşulduzlu və daha aşağı kateqoriyalı hotellərin müştəriləri müxtəlif olur. Buna baxmayaraq, sözügedən sahədə bahalaşma bütün biznes seqmentlərinə təsirini göstərir. Azad bazar münasibətlərinin qanunlarına istinadən tələb və təklif arasında mütənasiblik olmalıdır. Bu pozularkən iqtisadi sistemdə neqativ hallar baş verə bilər. Əgər daha baha qiymətə xidmətlər satılırsa, deməli, onlara tələb var”.
Sədrin fikrincə, ölkənin beşulduzlu hotelləri yerli və xarici turistlərə xidmət göstərməklə yanaşı, çoxsaylı rəsmi qonaqları da qəbul edir, müxtəlif biznes xidmətlər göstərirlər. Odur ki, bahalaşma onların doluluq dərəcəsinə əhəmiyyətli dərəcədə təsir göstərməyəcək.
Turizm eksperti Kənan Hənifəyevin sözlərinə görə, bu aralar ölkəmizdə əlamətdar tədbirlərin olması ilə əlaqədar qiymətlərin yüksəlməsi mümkündür: “Hotellərin bahalaşması turist artımının, tələbatın olması ilə bağlıdır. Bahalaşma əsasən bayram günlərində, həmçinin “Formula1” və ya beynəlxalq konsertlərin olduğu ərəfədə olur. Belə zamanlarda xüsusilə də beş və dördulduzlu hotellərdə qiymətlər 20-30 faiz qalxır”.
Ekspertin fikrincə, hotellərin qonaq sayı azaldıqda qiymətlərin enməsi mümkündür: “Beşulduzlu hotellərin qiymətinin qalxması tələb-təklifə uyğundursa və mövcud hotellərdə yer yoxdursa, artıq dördulduzlu hotellər sifariş edilir. Bu da təbii olaraq dördulduzlu hotellərin qiymətində də dəyişikliyə səbəb olur. Müəyyən aylar olur ki, qonaqların sayında azalma müşahidə edilir. Bu zaman hotellər qiymətlərdə dəyişiklik edib, onları aşağı sala bilər”.
İqtisadçı Eyyub Kərimli düşünür ki, tələb artanda qiymətlərin yüksəlməsi normaldır: “Bu ilin müvafiq dövrü ilə keçən ilin müvafiq dövrünü müqayisə etdikdə turizm səfərlərində 30 faizdən yuxarı artım baş verib. Bu da hotellərin qiymətlərinə öz təsirini göstərir. Düşünürəm ki, bu, yalnız beşulduzlu hotellərə yox, digərlərinin də qiymətinə təsir edə bilər. Həmçinin qarşıda COP29 tədbiri gözlənilir. Tələb artanda, qiymətlər də yüksəlir”.
İqtisadçı bildirdi ki, bəzən qiymətlər yüksəlsə də, bunu keyfiyyətdə görmək olmur: “Fikrimcə, qiymət artımı və keyfiyyət bərabər olsa, daha yaxşıdır. Biz bəzən belə hallarla rastlaşırıq ki, qiymət artır, amma keyfiyyətdə heç bir dəyişiklik olmur. Düşünürəm turizm inkişaf etdikcə, keyfiyyət də artacaq. Qiymət siyasətini həm də rəqabət formalaşdırır. Hotellər arasında nə qədər rəqabət olsa, bu özünü qiymətlərdə də göstərəcək”.
Turistlərin Hüquqlarının Müdafiəsi Komitəsinin rəhbəri Rəhman Quliyevin fikrincə, hotellərin qiymətinin artmasının əsas səbəblərindən biri quru sərhədlərin bağlı olmasıdır: “Bu, regionlara müsbət təsir göstərir. Pandemiyadan öncə insanlar istirahət üçün daha çox Gürcüstana, Türkiyəyə üz tuturdular. Amma sərhədlər bağlı olduğundan hazırda regionlara səfər edirlər. Sevindirici haldır ki, daxili turizm günü-gündən inkişafdadır. Vəsait ölkədən kənara çıxmır”.
R.Quliyevin sözlərinə görə, hotellər qiymətlərini nüfuz və keyfiyyət üçün də artıra bilər: “Hotellər portfelini müştərinin büdcəsinə görə formalaşdırır. Bu gün hər hansı bir hotel xidmətin keyfiyyətini qaldırmaq istəyirsə, işçi sayını artırmalı, mebelləri dəyişməlidir… Bu zaman əlavə xərclər lazımdır. Bu xərclər də qiymətlərin yüksəlməsinə gətirib çıxarır. Əgər əvvəl xərclər 100 manat idisə, indi 150 manat olur. Qiymətdən narazı olan turist daha aşağı ulduzlu hotellərə üz tutacaq. Bu zaman beşulduzlu hotel müştəri portfelini daha üst kontingentlə doldurmağa çalışacaq. Hotel 100 faiz dolmasa da, kontingent daha yüksək olacaq. Eyni pulu qazanacaq, amma nüfuzu da yüksələcək”.
Komitə rəhbəri bildirdi ki, qiymətləri tənzimləmək üçün hotel sayı artırılmalıdır: “Qiyməti bazar özü tənzimləyir. Sahibkar qiyməti stabil saxlaya bilmir. Düşünürəm ki, yaxın gələcəkdə ekonom büdcəli hotellərin sayını artırsaq, bu, qiymətlərin stabilləşməsinə səbəb olacaq”. (“Kaspi” qəzeti)

Ötən ay Azərbaycanda bahalaşn və ucuzlaşan məhsullar açıqlanıb.
Bakupost.az "Trend"ə istinadən xəbər verir ki, sentyabrda ayrı-ayrı qida məhsullarından daha çox artım uzun və yumru düyünün, mal və qoyun ətinin, kolbasa məmulatlarının, kərə yağının, yumurtanın, şaftalının, qozun, şabalıdın, pomidorun, şirin bibərin, badımcanın, göy lobyanın, yerkökünün, sarımsağın, soğanın, kartofun qiymətində, azalma isə qarabaşaq yarmasının, limonun, almanın, armudun, üzümün, ağ kələmin, xiyarın, balqabağın, süfrə çuğundurunun qiymətlərində müşahidə olunub.
Digər qida məhsullarının qiymətlərində ciddi dəyişikliklər baş verməyib.

Müştərilər tərəfindən “Yelo Bank” ASC-yə yerləşdirilən depozitlərin həcmi azalıb.
Yeniavaz.com xəbər verir ki, bu ilin ilk 9 ayı ərzində müştərilərin “Yelo Bank”dakı depozitləri 35% və ya 450,5 milyon manat azalıb.
Hüquqi şəxslərin bankdakı depozitlərində isə kəskin azalma qeydə alınıb. Belə ki, hüquqi şəxslərin “Yelo Bank”dakı depozitləri bu ilin ilk 9 ayı ərzində 3,5 dəfə azalaraq 720,6 milyon manatdan 204 milyon manata düşüb.
Qeyd edək ki, 1994-cü ildən ölkəmizdə fəaliyyət göstərən “Yelo Bank” ilk olaraq “Ülpər” kommersiya bankı kimi fəaliyyətə başlayıb. Daha sonra 2002-ci ildə rebrendinq edərək “Nikoil Bank” adlandırılıb. 2019-cu ildə hazırda da istifadə olunan “Yelo Bank” adına rebrendinq edilib.
2022-ci ilin mart ayınadək “Yelo Bank”ın əsas səhmdarı “Topaz İnvestment Limited” MMC olub. Banka birbaşa nəzarət edən şəxs isə Rusiyanın “Lukoil” şirkətinin sahibi, Azərbaycan əsilli milyarder Vahid Ələkbərov olub. Ukrayna müharibəsindən sonra Rusiyaya tətbiq edilən sanksiyalar səbəbindən Vahid Ələkbərov nəzarət etdiyi bir sıra aktivləri başqa şəxslərə təhvil verib. 2022-ci ilin mart ayından etibarən “Yelo Bank”a birbaşa nəzarət edən şəxs Marina Kulişovadır. Nizamnamə kapitalına (378 milyon manat) görə Azərbaycanın ən böyük 2-ci bankı olan “Yelo Bank”ın səhmlərinin 98,94%-i Marina Kulişovaya məxsusdur.

ABŞ-da inflyasiya məlumatları açıqlanıb.

İndex.az xəbər verir ki, ABŞ iqtisadiyyatında sentyabr ayı üzrə inflyasiya 2,4%-ə yüksəlib.

İqtisadçıların inflyasiyanın 2,3% olacağını gözləyirdilər.

Qeyd edək ki, avqust ayında aylıq inflyasiya 0,2%, illik inflyasiya isə 2,5% olaraq qeydə alınıb.

Bakıda iri restoranlar şəbəkəsinə malik olan “Azərbaycan Restaurants” MMC şirkətinin (Shafron) milyonlarla vergi borcu var.
Qaynarinfo-nun məlumatına görə, şirkətin Dövlət Vergi Xidmətinin Bakı şəhəri Lokal Gəlirlər Departamentinə 2 milyon 58 min 679 manat 95 qəpik vergi borcu yaranıb.

Qeyd edək ki, “Azərbaycan Restaurants” MMC şirkətinin icraçı direktoru Vüqar Quliyev Məhəmməd oğludur.
MMC 2009-cu ildə təsis edilib. Nizamnamə kapitalı 200 manat təşkil edir. MMC “Chinar”, “Movida”, “Hard Rock”, “Paris Bistro”, “Tosca”, “Pasifico”, “Buddha Bar”, “Elektra” və digər restoranların sahibidir.