 |
|
|
"Azercell Telekom" MMC abunəçilərindən mobil nömrələrdən istifadəyə görə aylıq xidmət haqqı tutur.
Valyuta.az xəbər verir ki, “Azercell” bu rüsumu 2 manat müəyyənləşdirib.
Qeyd edək ki, bu xidmət haqqı hər ay telekommunikasiya xidmətlərindən istifadə haqlarının ümumi həcminin 2 manatdan az olduğu təqdirdə tətbiq edilir. Aylıq xidmət haqqı hesablanarkən Paycell və Simkredit xidmətlərindən istifadə nəzərə alınmır.
"Su İdmanı Sarayı" Məhdud Məsuliyyətli Cəmiyyəti (MMC) tərəfindən inşaat materialları və alətlərin satın alınması üçün keçirilən tenderin qalibi müəyyən edilib.
32gun.az-ın məlumatına görə, "GÜVƏN LUX" MMC tenderdə qalib gəlin. Tərəflər arasında 194.508,56 AZN-lik müqavilə bağlaması gözlənilir.
Lakin tenderin nəticələri mübahisələrə səbəb olub. Belə ki, qalib şirkət "GÜVƏN LUX" MMC-nin nizamnamə kapitalı cəmi 10 manat təşkil edir. Bu, belə böyük məbləğdə müqavilənin bu qədər kiçik kapitalı olan şirkətə verilməsi ilə bağlı suallar doğurur.
"GÜVƏN LUX" MMC-nin qanuni təmsilçisi Elmar Həmidov Ramiz oğludur. "Su İdmanı Sarayı" MMC-nin direktoru isə Tələt Məmmədov Balakişi oğludur.
"Su İdman Sarayı"nın nizamnamə kapitalı 420.736.722,60 AZN-dir.
Bu ilin yanvar-fevral aylarında Dövlət Gömrük Komitəsinin (DGK) xətti ilə dövlət büdcəsinə 1 milyard 17,8 milyon manat (598,7 milyon dollar) vergi və rüsum daxil olub.
Yeniavaz.com açıqlanan rəsmi məlumatlara istinadən xəbər verir ki, bu, ötən ilin eyni dövrü ilə müqayisədə 5% və ya 48,5 milyon manat çoxdur.
Qeyd edək ki, ötən ilin yanvar-fevral aylarında gömrükdən dövlət büdcəsinə 969,3 milyon manat (570,2 milyon dollar) daxil olub.
Onu da bildirək ki, ötən ilin eyni dövrü ilə müqayisədə gömrükdən büdcəyə daxil olan vəsaitlər ümumi ticarət dövriyyəsinə, o cümlədən idxala nisbətdə azalıb.
Belə ki, ötən ilin yanvar-fevral aylarında xarici ticarət dövriyyəsi 7 milyard 226,6 milyon dollar, idxalın ümumi dəyəri isə 2 milyard 446,6 milyon dollar olub.
Bu isə o deməkdir ki, ötən ilin yanvar-fevral aylarında büdcəyə daxil olan vəsait xarici ticarət dövriyyəsinin 7,9%-nə, idxalın isə 23,3%-nə bərabər olub.
Müqayisə üçün qeyd edək ki, bu ilin yanvar-fevral aylarında xarici ticarət dövriyyəsi 8 milyard 904,5 milyon dollar, idxalın ümumi dəyəri isə 4 milyard 138 milyon dollar olub.
Nəticədə bu ilin yanvar-fevral aylarında büdcəyə daxil olan vəsait xarici ticarət dövriyyəsinin 6,7%-ni, idxalın isə 14,5%-ni təşkil edib.
Açıqlanan rəqəmlərdən də göründüyü kimi, ötən illə müqayisədə idxal təxminən 2 dəfə artsa da, büdcəyə ödənilən vergi və rüsumlarda ciddi artım olmayıb.
Məsələ ilə bağlı Yeniavaz.com-a açıqlama verən iqtisadçı-ekspert Allahverdi Aydın bildirir ki, idxal artdığı halda, gömrük vergi və rüsumlarının azalması bir neçə səbəbə görə baş verə bilər:
“Bunlardan biri odur ki, bəzi malların idxalı gömrük rüsumlarından azad olunur və bu zaman büdcəyə daxil olan vəsaitlər də azalır. Ötən illə müqayisədə idxalın 2 dəfə artmasının əsas səbəbi Dövlət Neft Fondunun böyük miqdarda qızıl alması ilə bağlıdır. Rəsmi məlumatlar göstərir ki, Neft Fondu bu ilin ilk iki ayında ölkəyə təxminən 1,5 milyard dollar dəyərində qızıl gətirib. Fondun xaricdən gətirdiyi qızıllar gömrük rüsumundan azad olunduğu üçün idxalın 2 dəfə artması büdcə daxilolmalarına heç bir təsir etməyib”.
Ramazan ayının bitməsi ilə Azərbaycanda toy mövsümü canlanıb. Əslində, şadlıq sarayları orucluqda da boş dayanmayıblar və sifarişlər qəbul ediblər. Hazırda əksər restoranlarda aprel ayı üçün bütün günlər doludur. Bəs yeni toy mövsümündə qiymətlər necədir?
Teleqraf mövzu ilə bağlı Bakının məşhur şadlıq sarayları arasında sorğu keçirib.
Paytaxtın populyar və bahalı şadlıq saraylarından biri sayılan “Saphir Saray”ın böyük zalında menyu 160 manatdan, kiçik zalda isə 120 manatdan başlayır. Beləliklə, restoran toy etmək istəyən cütlüklərə 180, 200, 220, 250-320 manatlıq menyular təklif edir. “Saphir Saray”da ən bahalı menyu isə 450 manatdır.
Birdəfəyə 700 nəfərlik qonaq qəbul etmək imkanı olan “Grand Opera Hall”un toy menyusu 110-dan 170 manata qədərdir.
“Elux Event Hall”da menyu 220 AZN-dən başlayır. Restoranın meneceri bildirib ki, iyun ayına qədər qiymət artımı gözlənilmir. Lakin sentyabrdan toy menyusu 250 manata qədər bahalaşacaq.
1000 nəfərlik qonaq qəbul etmək üçün hər cür şəraiti olan “Buta Palace”ın menyu qiymətləri 150 manatdan 270-300 manat arasında dəyişir.
“Hollywood” şadlıq sarayı evlənmək istəyən müştərilərinə 2 menyu təklif edir. Birinci “Standart” adlanır, qiyməti 130 manatdan başlayır. Digər menyu isə “Premium”dur. Burada qiymət 160-200 manatdır.
Menyusu 100 manatdan aşağı olan restoran da tapmağa çalışdıq.
“Mona Liza” şadlıq sarayında 200 nəfərlik zalda bir nəfər üçün menyunun qiyməti 80 manat, 500 nəfərlik zalda isə 60 AZN-dir.
“Çıraq Palace”da menyu 50-55, “Grand Neon” sarayının 100-200 nəfərlik zallarında toy menyusu 55-80 manat arasında dəyişir.
“Alp Saray”da isə qiymətlər 75 manatdan başlayaraq 160-a qədər yüksəlir.
“Versal Hall”un menyusu 75 AZN-dən başlayır. Yeri gəlmişkən, bu restoranın meneceri son qiyməti açıqlamadı.
“Hissa Saray”da menyunun qiyməti qonaq sayına görə dəyişir. Minimum qiymət 60, maksimum isə 90 manatdır.
Paytaxtda fəaliyyət göstərən digər şadlıq saraylarında menyu qiymətləri aşağıdakı kimi dəyişir:
“Aura Hall”da menyunun qiymətləri 50 manatdan başlayır, 65-70 manata qədər artır.
“Nazlı Saray”ın kiçik zalında 50-60-70, böyük zal üçün 55-65-75 manat ödəmək lazımdır.
“Ağ Saray”da da iki zal var: 80-200 və 450-500 nəfərlik. Menyular adambaşına 75 manatdan 165 manata qədər dəyişir.
“Niaqara” şadlıq sarayında da iki zal mövcuddur. 100-250 nəfərlik kiçik və 250-550 nəfərlik böyük zal. Menyu da 55 manatdan başlayır.
Bakının ən ucuz şadlıq saraylarından biri “Mübarək”dir. Buranın iki zalı var: 150 və 200-300 nəfərlik. Menyusu isə 28-29 manatdır.
Qeyd edək ki, yuxarıda təqdim olunan qiymətlər adambaşına nəzərdə tutulub.
ABŞ Prezidenti Donald Tramp administrasiyasının aprelin 2-də tətbiq etməyi planlaşdırdığı yeni tariflərin bütün ölkələrə təsir edəcəyinə söz verib.
“Report” TASS-a istinadən xəbər verir ki, bu barədə o, prezident təyyarəsinin göyərtəsində jurnalistlərə açıqlama verərkən bildirib.
D.Tramp rüsumların ABŞ-nin ticarət balansının ən bariz şəkildə pozulduğu 10-15 ölkəyə təsir edib-etməyəcəyi ilə bağlı sualın cavabında belə deyib: “Biz bütün ölkələrdən başlamalı və nəyin baş verdiyini gözləyib görməliyik. Mən heç vaxt 15 ölkə ilə bağlı şayiə eşitməmişəm.
Belə baxanda tariflər haqqında danışdığımız bütün ölkələrə təsir edəcək. Biz isə bütün ölkələr haqqında danışırıq, yalnız bəziləri haqqında yox”.
D.Tramp ABŞ tariflərinin daha əvvəl digər ölkələrin Amerika ixracatına tətbiq etdiyi tariflərdən çox daha yumşaq olacağını söyləmişdi. “Tarixdə heç bir ölkə soyulmadığı kimi bizi soyublar. Lakin biz yenə də onlara qarşı daha yumşaq olacağıq. Buna baxmayaraq, bu, ölkə üçün əhəmiyyətli puldur”, - o demişdi.
Daha əvvəl ABŞ Prezidenti aprelin 2-dən idxal olunan mallara “güzgü rüsumları” tətbiq etmək niyyətində olduğunu açıqlamışdı. Onun sözlərinə görə, Braziliya, Hindistan, Kanada, Çin, Meksika və Aİ ölkələri ABŞ-yə orta hesabla ABŞ-nin tətbiq etdiyi gömrük rüsumlarından qat-qat yüksək tariflər tətbiq edirlər.
"Bütövlükdə hesab edirəm ki, Türkiyədə baş verən siyasi hadisələr ölkə iqtisadiyyatını çox mənfi nəticələrə aparır".
Bunu Qaynarinfo-ya açıqlamasında iqtisadçı ekspert Əkrəm Həsənov Türkiyədə baş verən hadisələrin ölkə iqtisadiyyatına təsirlərindən və türk lirəsinin gələcəyindən danışarkən deyib.
Ekspert yaxın illərdə Türkiyə iqtisadiyyatında artım gözlənilmədiyini diqqətə çatdırıb:
"Türkiyə iqtisadiyyatının vəziyyəti onsuz da yaxşı deyildi, dolların qalxması gözlənilirdi. İndi isə bu proses daha da güclənə bilər. Amma Türkiyə iqtisadiyyatı o qədər çoxşaxəli və özünü təmin edən iqtisadiyyatdır ki, orada devalvasiyanın təsiri Azərbaycandakı kimi deyil".
Əkrəm Həsənov Türkiyənin böyük sənaye müəssisələrinin olduğunu vurğulayıb:
"Türkiyə xeyli mal istehsal edir, ayrı-ayrı xidmətləri var. Kənd təsərrüfatından tutmuş sənayeyə kimi. Biz isə hər şeyi xaricdən alırıq. Ona görə Azərbaycanda qiymətlərin artması dərhal hiss olunur. Onlarda isə belə deyil. Amma Türkiyənin də xaricdən aldığı məhsullar var. Bunun Türkiyə üçün mənfi çalarları danılmazdır".
Fevral ayının sonundakı şaxtalardan sonra bir neçə gün ərzində havanın temperaturu 25-30 dərəcəyədək yüksəldi. Təbii olaraq bu ərəfədə ağaclar tumurcuqlamağa başladı, bəzi ağaclar isə çiçək açdı. Lakin ardınca havanın hərarəti yenidən sıfır dərəcəyədək endi.
Havaların bu qədər soyuması bitkilərə, məhsuldarlığa ciddi təsir göstərib.
"Hava belə olduğuna görə çiçəklər yandı. Təxminən 70 faiz şaftalı və ərik ağacından məhsul gözləmirik. Çiçək töküləndən sonra ağac yenidən yarpaqlamağa başlayır. Amma məhsulu olmur", − deyə bağ sahibi İsa Abakarov söyləyib.
Bağ sahibləri deyirlər ki, məhsuldarlığın az olması səbəbindən meyvələrin qiymətinin bahalaşması müşahidə ediləcək.
Daha ətraflı Baku TV-nin videomaterialında:
Martın 12-nə olan məlumata görə, ABŞ qeyri-qanuni immiqrantlarla və narkotiklərin qanunsuz dövriyyəsi ilə mübarizəyə təxminən 300 milyon dollar xərcləyib.
Bu barədə CNN məlumatlı mənbələrə istinadən yazıb.
Telekanalın məlumatına görə, Pentaqon ilk ayda təxminən 250 milyon dollar xərcləyib. Martın ikinci yarısına qədər, Daxili Təhlükəsizlik Departamentinin və bəzi digər qurumların xərclərini nəzərə almasaq, bu rəqəm 328 milyon dollara çatıb.
Adı açıqlanmayan mənbələrin məlumatına görə, Trampın proqramının ilk ili 2 milyard dollardan çox başa gələcək.
Son günlər bazar və marketlərdə kartofun qiyməti durmadan artmaqdadır. 10 gün bundan əvvəl bir kilosu 80-90 qəpiyə satılan kartof indi alıcılara 1,40- 1,50 manata təklif olunur. Satıcılar qarşıdakı həftədə də kartofun qiymətində artım müşahidə ediləcəyini bildirirlər.
Bəs bunun səbəbi nədir?
Sabiq deputat, iqtisadçı Əli Əlirzayev Qaynarinfo-ya açıqlamasında kartofun qiymət artımını idxalla əlaqəli olduğunu vurğulayıb:
“Bu gün ölkədə satılan kartof əsasən xaricdən idxal olunur. Qiymətin qalxmasının birinci səbəbi də bununla bağlıdır. Azərbaycana xaricdən gətirilən bütün məhsulların qiyməti artır və artmaqda davam edəcək. Xaricdən gətirilən məhsullar monopoliyadadır, gətirirlər və istədikləri qiyməti təyin edirlər. Qiymətin qalxması təbii prosesdir, dünyada gedən proseslər qiymətlərə təsir edir”.
Ekspert bunun qarşısını almaq üçün tədbirlər planının az olduğunu bildirib:
“Qiymətin enməsi birbaşa kartof istehsalının artmasından asılıdır. Məhsul çox olmalı, bazara təzə kartof çıxmalıdır. Bundan əlavə, bazarın tənzimləmə siyasəti olmalıdır. Bu da son zamanlar bazarlarda yoxdur. Bazar iqtisadiyyatı o demək deyil ki, kim necə istəyir elə də satsın. İstehsalçı məhsulunu satır, amma bazara ondan 2 dəfə baha gəlib çıxır. Bazarlarda inhisarçılıq mövcuddur. Bəzən də bunu nəqliyyat xərcləri ilə bağlayırlar”.
Əli Əlirzayev Azərbaycanda kartofun saxlanması şəratinin çətin olduğunu bildirib:
“Karof anbarlarda saxlanılmalıdır. Bu gün demək olar ki, belə anbarlar yox dərəcəsindədir”.
Ukrayna Tramp administrasiyası tərəfindən təklif olunan geniş iqtisadi sazişə, o cümlədən Amerika investisiyalarının artırılmasına dair öhdəliklərə düzəlişlər etmək tələbi ilə ABŞ-a soğru göndərib.
Bu barədə “Bloomberg“ məlumat yayıb.
Martın 28-də videokonfrans zamanı Ukrayna rəsmiləri və vəkilləri amerikalı həmkarları ilə 60 səhifəlik saziş layihəsinin təfərrüatlarını müzakirə ediblər.
Layihəyə görə, ABŞ vaxt məhdudiyyəti olmadan Ukraynada iri infrastruktur və mineral layihələr üzərində nəzarəti əldə edəcək.
Rəsmi Kiyev narahatdır ki, saziş nəinki Avropaya inteqrasiyanı çətinləşdirəcək, həm də münaqişə başlayandan bəri verilmiş bütün hərbi və iqtisadi yardımların ABŞ-a qaytarılması tələbi irəli sürüləcək.