 |
|
|
Son günlər bəzi tikinti şirkətlərinin özbaşınalığını əks etdirən xəbərlərlə tez-tez rastlaşırıq. Qanunsuz şəkildə vətəndaşların evini uçurub, onları narahat edir, istədikləri yerdə istədikləri kimi göydələnlər ucaldırlar. Nəticədə ətrafda yaşayan sakinlər toz-torpaq içində qalır, səs-küyündən evlərində otura bilmirlər.
Bütün bunlar azmış kimi indi də gecələr fəaliyyət göstərən naməlum şirkət peyda olub.
Bu barədə Suraxanı rayonu, Yeni Günəşli qəsəbəsi, “V” yaşayış sahəsinin sakinləri Publika.az-a video və fotolar göndəriblər.
Onlar adı bəlli olmayan tikinti şirkətinin məsuliyyətsizliyi üzündən hər gecə kabus yaşadıqlarını bildiriblər:
“Böyük bir ərazini hasara almış naməlum şirkət axşam 8-dən səhər 6-ya qədər ərazidə ağır texnikanın köməyi ilə iş görür. Tikinti işlərində istifadə olunan texnikalar: buldozerlər, ekskavatorlar, qazma maşınları və s. yüksək səviyyədə səs yaradır. Xüsusilə gecə yarısı aparılan işlər bizim üçün ciddi narahatlıq doğurur. Gecələr demək olar ki, istirahət edə, yata bilmirik”.
Maraqlıdır, yaşayış ərazisinə yaxın bir yerdə tikinti işləri niyə gecə vaxtı aparılır? Aidiyyəti qurumlar bu boyda həngaməni niyə görmürlər?
Məsələyə aydınlıq gətirmək üçün əmlak eksperti Elnur Azadovun fikirlərini öyrəndik.
Ekspert saytımıza açıqlamasında bildirdi ki, saatından asılı olmayaraq sakinləri narahat etmək olmaz:
“Norma ilə icazə verilən səsin həddi desibel ilə ölçülür. Tikinti işlərinin aparılmasına səhər 08:00-dan axşam 22:00-a qədər icazə verilir. Gecə saatlarında səs-küylü işlər aparmaq qadağandır”.
Sakinlərin şikayətini nəzərə alaraq Suraxanı Rayon İcra Hakimiyyəti ilə də əlaqə saxladıq.
İcra hakimiyyətindən bildirildi ki, məsələ aidiyyəti şöbəyə göndəriləcək və araşdırılıb məlumat veriləcək.
