Donald Tramp administrasiyası ilə dəfə olaraq Gürcüstandakı hadisələrə rəsmi münasibətini açıqlayıb.

Musavat.com xəbər verir ki, ABŞ Dövlət Departamentindən verilən yazılı açıqlamada ABŞ-ın 33 il ərzində Gürcüstanın, gürcü xalqının tərəfdaşı olduğu qeyd edilir: “Gürcüstanın ərazi bütövlüyü, suverenliyi və müstəqilliyini dəstəkləyirik. Biz Birləşmiş Ştatlarla münasibətləri yaxşılaşdırmaq niyyətində ciddi olduğunu nümayiş etdirmək üçün Gürcüstan hökumətinin ata biləcəyi addımları dəqiq müəyyən etmişik. "Gürcü Arzusu" hökumətinin davam edən anti-demokratik hərəkətlərinə gəlincə, vitse-prezident Vensin Münhendə qeyd etdiyi kimi, demokratik mandat opponentlərin həbsə atılması və ya senzura ilə əldə edilə bilməz".

Politoloq Şahin Cəfərlinin fikrincə, proseslər indiki administrasiyanın "Gürcü Arzusu" hökuməti ilə bağlı keçmiş administrasiyanın siyasətini ümumən davam etdirmək fikrində olduğundan xəbər verir: “Çünki münasibətlərin düzəlməsi üçün Gürcüstan tərəfinin hansı addımları atmalı olduğu məhz Bayden dövründə müəyyənləşdirilib.

Doğrudur, Dövlət Departamenti Gürcüstanla münasibətləri qiymətləndirməyə davam etdiklərini əlavə edib, lakin martın 27-də Senatın Xarici Əlaqələr Komitəsində "Gürcü Arzusu" əleyhinə hazırlanmış qanun layihəsi - "Meqobari Aktı"nın respublikaçılar və demokratların səsləri ilə qəbulu Vaşinqtonda küləyin hansı istiqamətdə əsdiyini göstərir. Gürcüstan tarixinin ən böyük iqtisadi layihəsi olan Anakliya dərin dəniz limanı layihəsindən amerikalı ortağın qovularaq Çinin (üstəlik, ABŞ sanksiyası altındakı şirkətlərin) proyektə cəlb olunması Vaşinqtonda xüsusilə qıcıq doğurur”.

Musavat.com