Belarus prezidenti Aleksandr Lukaşenko Ukraynadakı münaqişənin sülh yolu ilə həllinə çağırıb və qeyd edib ki, bir sıra Qərb ölkələrinin nümayəndələri bunda maraqlı deyillər.

Yenicag.az xəbər verir ki, onun sözlərini “Rossiya 1” telekanalı sitat gətirib.

“Gəlin danışıqlar masasına oturaq və bu mübarizəni bitirək. Bu, nə Ukrayna xalqına, nə ruslara, nə də belaruslara lazım deyil”, – Lukaşenko bildirib.

O, Qərb dövlətlərinin yüksək rütbəli nümayəndələrinin rusların və ukraynalıların bir-birini məhv etmələrinin zəruri olduğunu söyləməsi barədə məlumatı olduğunu bildirib. Belarus prezidenti aydınlaşdırıb ki, bu barədə “Amerika əsilli” insanlar danışır.

Lukaşenko hadisələrin bu inkişafını anormal hesab edib./unikal

İranın İslam İnqilabı Keşikçiləri Korpusu (SEPAH) növbəti dəfə Azərbaycana qarşı həddini aşıb.

Belə ki, SEPAH-ın sosial şəbəkə hesabında paylaşılan mesajında Azərbaycan ərazisində İsrail hərbçiləri olduğuna dair yalan informasiya yayılıb.

Xatırladaq ki, bir neçə gün öncə rəsmi Bakı bu uydurma, əsassız xəbərlərə görə ərazisində heç bir xarici ölkənin hərbi kontingentinin olmadığını bir daha bəyan edib.

Buna baxmayaraq, SEPAH yenə də öz çirkin əməllərindən əl çəkməyərək, ölkəmizə qarşı böhtan xarakterli qarayaxma kampaniyasını davam etdirir.

Maraqlıdır, İranla Azərbaycan arasında münasibətlərin normallaşdığı bir vaxtda SEPAH nə üçün yenidən belə təxribatçı addımlar atır?

Mövzu ilə bağlı “Cebheinfo.az”-a açıqlama verən politoloq Natiq Miri bildirib ki, SEPAH növbəti dəfə Azərbaycan əleyhinə informasiya təxribatına əl atır:

“Bu isə o deməkdir ki, bu günə qədər Azərbaycan əleyhinə olan bütün dezinformasiyaların arxasında SEPAH-ın dayandığını ortaya qoyur. Əgər həqiqətən ölkəmizdə İsrail hərbçiləri olsaydı, bunu aşkar etmək o qədər də problem olmazdı.

Amma heç bir fakt, görüntü və ya sənəd yoxdur. Buna baxmayaraq, SEPAH belə təxribatlarla Azərbaycanla İran arasındakı münasibətləri barışmaz vəziyyətə gətirmək istəyir.

Xatırladım ki, bir müddət öncə İran Prezidenti Məsud Pezeşkian adından ölkəmizlə bağlı yayılan dezinformasiyanın da arxasında SEPAH dayanırdı. Hərçənd ki, Məsud bəy ölkəmiz əleyhinə fikirlər səsləndirməyib, səsləndirə də bilməz. Nəticədə, sözügedən iddianın da təxribat olduğu sübut olundu”.

Ekspert qeyd edib ki, SEPAH Məsud Pezeşkianın prezidentliyi dönəmində İranın Azərbaycan və Türkiyə ilə münasibətlərinin müsbət mənada ən yüksək səviyyəyə qalxmasından narahatdır:

“Bu konteksdə isə Azərbaycan və Türkiyəyə düşmənçilik edən Ermənistan kimi ölkələr kölgədə qalar. Ona görə də SEPAH kimi qüvvələr münasibətləri korlamaq üçün daim belə dezinformasiyalardan istifadə edirlər.

Bundan başqa, Tehranda HƏMAS lideri İsmayıl Haniyənin öldürülməsi SEPAH-ın nüfuzuna ən böyük zərbə idi. Çünki SEPAH-ın bu günə qədər deyildiyi kimi qüdrətli olmadığı və himayəsindəki yüksək rütbəli qonağı qoruya bilmədiyi ortaya çıxdı.

Bu isə bütövlükdə İran dövlətinin təhlükə altında olduğunu göstərir. Artıq SEPAH bütün nüfuzunu və etimadını itirib. Bunu ört-basdır etmək üçün isə onlara iki əsas lazımdır.

Birincisi, başda Azərbaycan olmaqla, qonşu ölkələrlə münasibətləri gərginləşdirməkdir. İkincisi, İsrailə qısamüddətli də olsa, qarşılıqlı atışma təşkil etməklə SEPAH-ın zəifliyini gizlətməkdir”.

HƏMAS lideri Həniyənin İranda öldürüməsindən sonra bölgədə vəziyyət gərginləşib. Bütün dünya İranın cavabını gözləyir. Cavab vermək isə İran üçün o qədər də asan deyil. Çünki İranın İsrailə verəcək cavabının nəticələri İranın özü üçün çox ağır ola bilər. Bu səbəbdən də küncə sıxılmış İran bölgədə gərginliyin digər ölkələrə sıçraması üçün əlindən gələni edir, müxtəlif dezinformasiyaların yayılması istiqamətində addımlar atılır.
Politoloq Məhəmməd Əsədullazadə Bizimyol.info xəbər portalına açıqlamasında bildirib ki, İran mətbuatında və digər kütləvi informasiya vasitələrində Azərbaycanla bağlı dezinformasiyalar yayılıb. Qeyd edilir ki, guya “İranın Azərbaycanda İsrailin hərbi bazalarını vuracaq”. Və İsrail tərəfi də göründüyü kimi elan edib ki, guya “hərbi mükəlləfiyətlər Gürcüstandan və Azərbaycandan çıxsın”. Bu fikirlər, yazılan yazılar və yayılan iddiaların hamısı dezinformasiyadır.

“İsrailin Azərbaycanda hər hansı bir bazasından söhbət gedə bilməz. Sadəcə olaraq, İran tərəfi İsrailə birbaşa cavab verməkdən çəkinir.

ABŞ, Böyük Britaniya, Almaniya və Fransa xəbərdarlıqları məhz İsrail və İran üçün çox ciddi şəkildə siqnaldır. Və Tehran rejimi birbaşa İsrailə müdaxilə etməkdən çəkinib. Yenə də Azərbaycanı gündəmə gətirilir. Azərbaycan üzərindən manipulyasiya oyunu edir. Amma rejim özü də çox yaxşı bilir ki, İsrailin Azərbaycanda hansısa bazası yoxdur. Nəinki İsrailin, heç bir dövlətin Azərbaycanda hərbi bazası yoxdur. Sadəcə olaraq, İran rejimi yenə də Zəngilandakı camış fermasını hərbi baza kimi görürlər”-deyə politoloq bildirib.

Almaniya kansleri Olaf Şoltsla İran Prezidenti Məsud Pezeşkian arasında telefon danışığı olub.

Bu barədə Almaniya hökumətindən məlumat verilib.

Pezeşkianı hərbi gərginliyin daha da artmasının qarşısını almaq üçün mümkün olan hər şeyi etməyə çağıran Şolts əks halda region ölkələri və xalqları üçün saysız-hesabsız təhlükələrin yaranacağını bildirib.

İndoneziyanın paytaxtı dəyişdirilib.
“Star” qəzeti xəbər verir ki, bundan sonra ölkənin yeni paytaxtı Nusantara olacaq.

İndoneziya Prezdenti Coko Vidodo açıqlamasında yeni paytaxta köçməyin yeni evə köçməkdən daha çətin olduğunu ifadə edib.

Qeyd edək ki, Yava adasında yerləşən paytaxt Cakartanın 10 milyon əhalisi olmasına, hər il baş verən sel və s. təbii fəlakətlərə, infrastruktur problemlərinə və qrunt sularının həddindən çox istifadə edilməsinə görə, şəhərin şimal hissələrinin sürətlə batması müşahidə olunur. Bu səbəbdən İndoneziya hökuməti paytaxtı köçürməyə qərar verib.

Dünyanın ən böyük nəqliyyat qovşaqlarından biri olan Dubay Beynəlxalq Hava Limanı 2024-cü ilin ilk altı ayında 44.9 milyon sərnişinə xidmət göstərərək yeni rekorda imza atıb. Bu 2023-cü ilin eyni dövrü ilə müqayisədə 8% daha çoxdur.
Bu barədə əmirliyin hava limanlarını idarə edən "Dubai Airports" şirkətinin press-relizində deyilir.

2024-cü ilin birinci yarısında Dubay Beynəlxalq Hava Limanı ən çox Hindistandan sərnişin qəbul edib - 6.1 milyon. Ondan sonra Səudiyyə Ərəbistanı və Böyük Britaniya gəlir - müvafiq olaraq 3.7 milyon və 2.9 milyon nəfər. "Dubai Airports" ən yüksək sərnişin axını təmin edən ölkələr kimi Pakistanı (2.3 milyon), ABŞ (1.7 milyon), Rusiya (1.3 milyon) və Almaniyanı (1.3 milyon) göstərib.

7.9 milyon sərnişinin hava limanının xidmətlərindən istifadə etdiyi ən gərgin rejimli iş üzrə ay yanvar ayı olub.
TASS

Kanadanın Erməni Milli Komitəsinin yaydığı məlumata görə, bu ölkənin xarici işlər naziri Melani Joli növbəti dəfə Azərbaycanın ünvanına qərəzli bəyanatla çıxış edib. Mənbənin ciddiliyi təbii ki, şübhə doğurur. Ancaq hər halda, Ermənistan mediasının da cəld tirajladığı xəbərdə bildirilir ki, M.Joli ölkəsinin Azərbaycana "təzyiqləri davam etdirdiyini" bəyan edib: "Kanada münaqişənin danışıqlar yolu, Helsinki prinsiplərinə hörmət əsasında həlli naminə Ermənistanla vicdanlı əməkdaşlıq üçün Azərbaycana təzyiqləri davam etdirir". Bu azmış kimi, Joli onu da əlavə edib ki, Kanada rəsmi Bakıdan Ermənistanın ərazi bütövlüyünə hörmət etməsini və erməni əsirləri azadlığa buraxmasını tələb edir.

M.Joli müasir geosiyasətin tutduğu vəzifəsinə adekvat olmayan gülməli personajlarından növbətisidir. Almaniya XİN-in başçısı Angelina Berbok, yaxud Emmanuel Makronun sabiq birinci "diplomat"ı Katrin Kolonna kimi o da Ermənistanla Azərbaycan arasındakı qarşıdurmanın tarixi barədə heç bir məlumatı olmadan məsuliyyətsiz bəyanatlarla yadda qalıb. Əks halda xanım Joli ərazi bütövlüyü və Helsinki prinsiplərinə istinad etməzdi.

Joli kimi siyasətçilərin və Kanada kimi dövlətlərin Ermənistan sevdası Don Kixotun un dəyirmanları ilə mübarizəsinə bənzəyir. Münaqişə bölgəsindən minlərlə kilometr aralıda yerləşən, Kvebek kimi separatizmə meylli bölgəsi olan Kanadanın xarici işlər naziri ərazi bütövlüyündən danışırsa, yəqin məlumatı olmalıdır ki, bu prinsipə 30 il ərzində məhz Ermənistan riayət etməyib. Beynəlxalq hüququn əsas sütunlarından biri olan bu prinsipi qulaqardına vuran İrəvana bir dəfə olsun belə göz ağartmayan dövlətlərdən biri də elə Jolinin təmsil etdiyi Kanada olub. Sülh naminə "vicdanlı" əməkdaşlıqdan danışan Jolinin Ermənistanın əsas qanunundan xəbəri varmı? Əgər bir ölkənin konstitusiyasında digər dövlətin ərazi bütövlüyünə qarşı fetişləşdirilmiş iddia yer alırsa, hansı vicdan və ədalətdən söhbət gedə bilər?

"Kaspi" qəzeti mövzu ilə bağlı məqalə dərc edib.

Erməni diasporu və lobbisinin qurbanına və əsirinə çevrilmiş Joli kimi siyasətçilər, konqresmen və senatorlar təbii ki, belə bəyanatlar verərkən siyasi etika faktorunu unudurlar. Bu, onların şəxsi problemləridir. Ancaq Kanada boyda dövlətin, iqtisadi gücün xarici işlər nazirinin belə sadə məsələlər barədə məlumatlı olması ən azı vacibdir.

Geosiyasətin "yuyulmamış çömçələri"

Müasir dünyanın geosiyasi landşaftında elə ölkələr var ki, müstqil xarici siyasətə malik deyillər. Geosiyasətin "yuyulmamış çömçələri" olan bu dövlətlər qlobal güclərin nümayiş etdirdikləri tendensiyalara və təşəbbüslərə növbətçi yamaq funksiyasını yerinə yetirirlər. Özü də fərqi yoxdur bu ölkələr ərazilərinin sahəsinə, iqtisadi potensiallarına, əhalinin sayına görə dünyada hansı mövqeyə malikdirlər. Onlar böyüklüyündən, ya kiçikliyindən asılı olmayaraq diplomatik trekdə müstəqil sözə sahib deyillər. Belə ölkələrdən biri olan Kanadanın müasir tarixini vərəqləsək aydın şəkildə görünər ki, atdığı xarici siyasət addımlarının mütləq əksəriyyəti ABŞ-nin təşəbbüslərinin təqlidi olaraq qlobal konyunkturanın sədlərini aşmağa və müstəqillik imicini ən azı yalandan da olsa formalaşdırmağa qadir deyil. Vaşinqton və Parisin sifarişi ilə formalaşmış, Avropanın təqaüddə olan "keçmiş polis"lərindən ibarət "müşahidə missiyası"na ilk qoşulan qeyri-Avropa dövləti məhz Kanada olub. "Harada aş, orada baş" olan Kanada kimi dövlətlər aqressiv Qərbin qlobal ekspansionist siyasi xəttinin köməkçi ünsürlərindəndirlər.

Məhz buna görə də Ancelina Colinin adaşı Melaninin Azərbaycana münasibətdə qərəzli bəyanatlarını qeyri-adi və təsadüfi qəbul etmək lazım deyil. Kanada Ermənistan-Azərbaycan treki ilə bağlı başda ABŞ və Fransanın durduğu geosiyasi xəttin proksilərindən biri və növbətisidir. Üstəlik, Kanada kimi ölkələrin siyasi elitaları Cənubi Qafqaz bölgəsinin mürəkkəb etnik, siyasi və konfessional tarixini anlaya bilməzlər. Kanada bir dövlət olaraq hələ də müstəqillik kompleksini yaşayır. Faktiki olaraq Britaniya taxt-tacından müstəqil olmayan bir dövlətin siyasi rəhbərliyi necə anlaya bilər ki, bir ölkə konstitusional səviyyədə digərinə qarşı ərazi iddiası irəli sürürsə, hansı "vicdanlı" danışıqlar və "ədalətli" sülhdən söhbət gedə bilər?

Hiss olunmayan təzyiq

Kanadanın XİN rəhbərinin hansı "təzyiqlər"dən danışdığı həm də ona görə müəmmalıdır ki, Bakıda bu barədə heç kim bir kəlmə belə olsun danışmır. Danışmır, çünki Kanadanın erməni diasporunun xülyası olan belə bir "təzyiq" hiss olunmur. Hiss olunmur ona görə ki, Kanada Azərbaycana təzyiq edə bilməz. Rəngli corablar geyinən baş nazirin ölkəsi - Kanadanın Azərbaycanla bölüşə bilmədiyi nə var axı? Ermənilərə və Ermənistana simpatiyası olan hər bir dövlət yardım və dəstəyini bu ölkənin inkişafı, iqtisadi tənəzzüldən çıxması və tarixi-siyasi bataqlıqdan qurtulması naminə səylərə yönəldə bilər. Xanım Joli ermənilərə dəstək vermək istəyir? Buyurub ölkəsini Ermənistana kapital yatırmağa təşviq etsin. Hər il Ermənistanı onminlərlə vətəndaşı birdəfəlik tərk edir və üz tutduqları ölkələrdən biri də elə Kanadadır. M.Joli zəhmət çəkib kömək etsin ki, ermənilər "tarixi vətən"lərini belə asanlıqla qoyub qaçmasınlar. Tək bir il ərzində Azərbaycanın Qarabağ bölgəsindən Ermənistana köçmüş əhalinin az qala beşdəbiri üçüncü ölkələrə üz tutub. Onların Ermənistanı qoyub qaçmalarının da günahkarı bizik? Kanada kimi dövlətlər, M.Joli kimi siyasətçilər bizdən əlləri xalqımızın qanına batmış caniləri azad etməyi tələb etməkdənsə, özləri əsirlikdən qurtulsalar, daha yaxşı olar. Pul və siyasi dəstəyin könüllü əsirliyindən...

İran Prezidenti Məsud Pezeşkian xarici işlər naziri və müdafiə naziri vəzifələrinə müvafiq olaraq Abbas Əraqçi və Əziz Nəsirzadənin namizədliyini irəli sürüb.

Bu barədə dövlət başçısının mətbuat xidməti məlumat yayıb.

Qeyd olunub ki, Pezeşkian İranın neft naziri vəzifəsinə Neft Nazirliyinin keçmiş nazir müavini Möhsün Paknejadın, iqtisadiyyat naziri vəzifəsinə Mərkəzi Bankın keçmiş sədri Abdolnasser Hemmatinin və kəşfiyyat naziri vəzifəsinə isə İsmayıl Xətibin namizədliyinin qanunvericilərin baxılmasına təqdim edib. Xətib əvvəlki hökumətin nazirlik portfelini saxlayan yeganə qurum rəhbəridir.

A.Əraqçı hazırda İranın Beynəlxalq Münasibətlər üzrə Strateji Şurasının katibi vəzifəsini tutur. General-mayor A.Nəsirzadə hazırda İran Silahlı Qüvvələrinin Baş Qərargah rəisinin birinci müavinidir.

İranın 14-cü hökumətinin nazirlərinin siyahısı parlamentin Rəyasət Heyətinə təqdim edilib.

Avqustun 12-də Ermənistan Baş naziri Nikol Paşinyanın məzuniyyəti başa çatır. O, işə qayıtdıqdan sonra hökumətdə bir sıra dəyişikliklər etməyi planlaşdırır.

Hurriyyet.Az-ın məlumatına görə, bu barədə Ermənistanın "Joğovurd" qəzetində dərc edilən məqalədə bildirilir.

Qəzet hökumətinə yaxın mənbələrə istinadən yazır ki, Paşinyanın bir sıra məmurları işdən çıxaracağı və yenilərini təyin edəcəyi gözlənilir.

Nəşr, həmçinin bildirir ki, Paşinyan mətbuat konfransı keçirməyi, sülh müqaviləsi, konstitusiya dəyişdirilməsi ilə bağlı Azərbaycanın tələbləri barədə açıqlama verməyi planlaşdırır.

Məlumata görə, Ermənistanın Bakıda keçiriləcək COP29 tədbirində iştirak edib-etməyəcəyi barədə də yekun qərar verilməlidir.

Qeyd edək ki, Azərbaycan Ermənistanı COP29-a dəvət edib. İrəvan hələlik tədbirdə iştirak edib-etməməcəyi barədə qərar verməyib. /yenisabah.az