 |
|
|
Son günlər Rusiyanın bəzi siyasi dairələri və media qurumları Azərbaycana qarşı təhqiredici ifadələr səsləndirir. Ukrayna müharibəsinə dair Rusiyanın maraqlarına zidd mövqe sərgiləyənlərə qarşı dərhal tədbirlər görüldüyü halda, Azərbaycana yönələn bu hücumlara qarşı hələ də reaksiya verilməyib.
Bu vəziyyət sözügedən kampaniyanın müəyyən dairələr tərəfindən məqsədli şəkildə idarə olunduğu şübhəsini yaradır. Azərbaycan isə təyyarə qəzası ilə bağlı Rusiyaya qarşı emosional çıxışlar etməyib, yalnız obyektiv istintaq və ədalətli yanaşma tələb edib. Buna baxmayaraq, hazırda məsələ əsas mahiyyətindən yayındırılaraq, Azərbaycan haqsız yerə hədəfə çevrilməyə çalışılır. Azərbaycan cəmiyyəti isə prosesin şəffaf və qərəzsiz şəkildə araşdırılmasını gözləyir.
Son prosesləri "Sherg.az"a şərh edən Milli Məclisin deputatı Elçin Mirzəbəyli söyləyir ki, bu cür bayağı təbliğatın sifarişçiləri həqiqəti ört-basdır etməyi dayandırmalıdırlar:
"Rusiyanın hakimiyyət dairələri ilə ənənəvi işbirliyində olan media resurslarının, eləcə də XXI əsrdə yaşasaq da, XIX əsrin kommunaçıları və ya 1930-cu illərin proletkulçuları kimi düşünən və danışan neobolşevik təbliğatçılarının Azərbaycanın mülki təyyarəsinin vurulması ilə bağlı ölkəmizə qarşı səsləndirdiyi həqarətlər, uydurduğu nağıllar və əfsanələr həqiqəti etiraf edə bilməməyin, cəsarətsizliyin, xudpəsəndliyin, reallıqdan uzaq və ikrah doğuran təkəbbürün, eləcə də siyasi əxlaqsızlığın bariz nümunəsidir. Azərbaycan təyyarəsinin vurulması faktını heç nə dəyişdirmir. Düşünürəm ki, bu cür bayağı təbliğatın sifarişçiləri yaxın keçmişə və bu günün reallıqlarına – hər kəsin açıq-aşkar görə biləcəyi mənzərəyə nəzər salaraq nəticə çıxarmalı, həqiqəti inkar etməyin, yalanla ört-basdır etməyin və şər-böhtan atmağın heç bir effekt verməyəcəyini anlamalıdırlar. Bu, ilk növbədə onların öz maraqlarına xidmət edə bilər. Əks halda, heç kimin inanmadığı və güvənmədiyi, yalnız acı təbəssüm doğuran təbliğat boşluqlar yaradır və bu boşluqları "vaxtı keçmiş" və ya "istifadə müddəti başa çatmış" epitetlərlə doldurmaq mümkün deyil. "Kommunaçı" medianın və təbliğatçı zehniyyətin təhdid və həqarətlərinin "doza"sından asılı olmayaraq, Azərbaycan təyyarəsinin vurulması fakt olaraq qalır.
Belə məqamlarda ləyaqətli davranış sərgiləmək yalnız fərdlər üçün deyil, dövlətlər üçün də vacib olan bir anlayışdır. Ən azından, yaxın keçmişdə Azərbaycanın nümayiş etdirdiyi davranışdan nümunə götürə bilərlər. Azərbaycan cəmiyyəti böyük təmkin, anlayış və siyasi əxlaq nümayiş etdirərək istintaqın ədalətli aparılmasını, günahkarların cəzalandırılmasını və müvafiq təzminatların ödənilməsini gözləyir. Bunun alternativi yoxdur. Ölkəmizdə şantaj və həqarət təbliğatı qəbul edilmir və edilməyəcək. Daha yaxşı olardı ki, Rusiya hakimiyyəti işbirliyində olduğu media resurslarının nəfəsliyini açsın və havanı dəyişsin.
Yanvarın 14-də Vaşinqtonda Ermənistanın xarici işlər naziri Ararat Mirzoyan və ABŞ dövlət katibi Entoni Blinken Ermənistan Respublikası ilə Amerika Birləşmiş Ştatları arasında strateji tərəfdaşlıq haqqında sənəd imzalanıb. Bu barədə Ermənistan Xarici İşlər Nazirliyi (XİN) məlumat yayıb. Tədbir İrəvan vaxtı ilə saat 22:00-da baş tutub və Ermənistan XİN-in platformalarında işıqlandırılıb. İmzalanma mərasimi ABŞ Dövlət Departamentinin “YouTube” kanalında canlı yayımlanıb.
Rusiya Prezidentinin mətbuat katibi Dmitri Peskov Ermənistanın digər ölkələrlə münasibətləri inkişaf etdirmək üçün suveren hüquqa malik olduğunu deyib: “Biz əsas məsələdən çıxış etməyə davam edirik: bizim Ermənistanla öz ikitərəfli münasibətlərimiz var, biz bu əlaqələri yüksək qiymətləndiririk və biz onları daha da inkişaf etdirmək niyyətindəyik. İkitərəfli aspektlərlə yanaşı, inteqrasiya prosesləri çərçivəsində, o cümlədən Avrasiya İqtisadi İttifaqı (Aİİ) çərçivəsində qarşılıqlı fəaliyyətimizin aspektləri, əlbəttə, bizim üçün çox vacibdir”.
Xatırladaq ki, yanvarın 9-da Ermənistan hökuməti ölkənin Avropa İttifaqına (Aİ) daxil olması haqqında qanun layihəsini təsdiqləyib. Rusiyanın xarici işlər naziri Sergey Lavrov da bu mövzuda danışıb. Onun sözlərinə görə, Ermənistanın Aİ-yə daxil olmaq prosesinə başlamaq qərarı bu ölkənin hakimiyyətinin suveren seçimidir. Lakin Lavrov əlavə edib ki, Ermənistan eyni zamanda həm Aİ-nin, həm də Aİİ-nin üzvü ola bilməz.
Bununla bağlı xatırlatmaq istərdik ki, Rusiya Baş nazirinin müavini Aleksey Overçuk da Ermənistanın Aİ üzvlüyünün ölkənin Aİİ-yə üzvlüyü ilə bir araya sığmadığını bəyan edib.
Bəli, Ermənistanın iqtisadiyyat naziri Gevork Papoyanın da bəyanatı var idi. O bildirib ki, Ermənistan Aİİ-dən çıxmaq barədə düşünmür. Eyni şəkildə, görünür, onlar İrəvanda Ermənistanla ABŞ arasında strateji tərəfdaşlıqdan danışacaqlar. Deyirlər ki, bu, Ermənistan Respublikası ilə Rusiya Federasiyası arasında strateji müttəfiqliyə mane olmur.
Reallıq isə tamam başqadır. Bu, ondan ibarətdir ki, Rusiya Ukraynaya qarşı müharibədə çox zəifləyib və bu, hər yerdə, hətta İrəvanda da müşahidə olunur. Bəli, taktiki cəhətdən rus işğalçı qüvvələri lokal qələbələr əldə edirlər. Onlar Pokrovsk şəhərindən yan keçib onu “boğmağa” çalışırlar, lakin düşmənin daha da iddialı məqsədi Pokrovsk ilə Çasovıy Yar arasında irimiqyaslı “halqa” yaratmaqdır. Bu barədə OBOZ.UA-ya müsahibəsində Ukrayna Təhlükəsizlik Xidmətinin keçmiş əməkdaşı İvan Stupak məlumat verib.
Bundan əlavə, Müharibənin Öyrənilməsi İnstitutu (ISW) bildirir ki, rus işğalçıları Ukrayna qoşunlarını bu şəhərlərdən geri çəkilməyə məcbur etmək üçün Donetsk vilayətinin Pokrovsk və Mirnoqrad şəhərlərinə yerüstü təchizat yollarını kəsməyi planlaşdırır. Amma strateji baxımdan Rusiya artıq uduzub. Məsələn, Qara dəniz donanmasını itirdi. Ondan qalan yalnız bir filotiliyadır. Xeyli sayda tank və ya zirehli döyüş maşını məhv edilib.
Eyni şey Rusiya hava hücumundan müdafiə sistemləri ilə də baş verir. Ukrayna Silahlı Qüvvələrinin Baş Qərargahının məlumatına görə, Ukraynaya genişmiqyaslı hərbi təcavüz zamanı Rusiya işğalçı qüvvələri 1040-dan çox hava hücumundan müdafiə sistemini itirib. Nəticədə Rusiyanın müxtəlif yaşayış məntəqələrinə zərbələr endirən, neft-qaz infrastruktur obyektlərini dağıdan Ukraynanın hücumları qarşısında Rusiya Federasiyası acizdir. Məsələn, Saratov vilayətinin Engelsdəki neft bazasında. Orada ən azı 3 ədəd 120 min kubmetrlik çən məhv edilib, altı çən zədələnib və strateji təyyarə parkı 800 min ton yanacaqsız qalıb.
Ancaq bunlar Rusiyanın yeganə itkiləri deyil. Belə ki, hətta Hindistan da Rusiya neftinin daşınmasına görə ABŞ-ın yeni sanksiyalarına məruz qalan rus tankerlərini öz limanlarına buraxmayacaq. Yüksək rütbəli Hindistan rəsmisinin sözlərinə görə, yalnız yanvarın 10-dan əvvəl icarəyə götürülmüş gəmilərə, martın 12-dən əvvəl boşaldılması şərti ilə icazə veriləcək. Bundan əlavə, yanvarın 1-dən Rusiya qazının Ukrayna ərazisindən tranziti dayandırılıb və bu, “Qazprom”u il ərzində təxminən altı milyard dollar qazancından məhrum edib.
İndi isə məlum olub ki, “Qazprom”un rəhbəri Aleksey Millerin masasında “Qazprom” idarə heyətinin sədr müavini Yelena İlyuxinanın mərkəzi ofisdə və Sankt-Peterburqda işçilərin sayını azaltmaq təklifi ilə məktubu var. Sankt-Peterburq filialında guya şirkət illik 50 milyard rubl əmək haqqı fondunu verə bilmir. Böyük audit gözlənilir, nəticədə 1.5 mindən çox adam işdən çıxarıla bilər.
Bəli, bütün bunlar Rusiyanın strateji məğlubiyyətinin sübutudur ki, bu da hamıya aydındır. O cümlədən, çoxdan köhnəlmiş rus “krışasını” Amerika və Fransa ilə əvəz etməyə tələsən Ermənistan liderləri üçün. İrəvan unudur ki, belə böyük problemlərlə olsa belə, Rusiya Ermənistan üzərində çoxlu təsir rıçaqlarını özündə saxlayır. Rusiya bunu onlara xatırladacaqmı? Mütləq! Yeganə sual: Nə vaxt və hansı formada?
/AYNA.az
Meksika sərhəd rəsmiləri Meksika ilə ABŞ arasında miqrantların və qaçaqmal malların daşınması üçün istifadə edilən gizli tunelin möhürlənməsi planlarını açıqlayıblar.
Musavat.com xarici mediaya istinadla xəbər verir ki, Meksikanın Syudad Xuares şəhəri ilə Texasın El-Paso şəhərlərini birləşdirən 300 metr uzunluğunda tunel yağış sularının kollektoru sisteminin adı altında gizlədilib. Keçən həftə aşkar edilən tuneln tikintisi, ekspertlərin fikrincə, ən azı bir il çəkib.
Tunelin kəşfi vəzifəyə gəldikdən sonra qeyri-qanuni immiqrasiya ilə mübarizə aparacağını və genişmiqyaslı deportasiyalara başlayacağını vəd edən Donald Trampın andiçmə mərasiminə hazırlıq zamanı sərhəd nəzarətinin artırılması ilə eyni vaxta təsadüf edir.
Hazırda ABŞ-Meksika sərhədində belə marşrutlardan istifadənin qarşısını almaq üçün əlavə təhlükəsizlik tədbirləri görülür.
Qeyd edək ki, bundan əvvəl də ABŞ-Meksika sərhədində bu kimi tunellər aşkarlanıb.
Musavat.com
Mükəmməl bir ənənə var Amerikada. Prezidentlik müddəti sona çatan prezident özündən sonra gələn yeni prezidentə bir məktub ünvanlayır. Və o məktubu Ağ evin Oval otağındakı yazı masasının üstünə buraxır. Yeni prezident də iş otağına ilk dəfə girəndə ən birinci işi o məktubu oxumaq olur.
Prezidentlik müddəti sona çatmış Corc Buş yeni seçilmiş prezident Bill Klintona 20 yanvar 1993 tarixli belə bir gözəl məktub yazıb getmişdi:
"Bu qeydi oxuyanda siz bizim prezidentimiz olacaqsınız. Sizə ən xoş arzularımı bildirirəm. Uğurlarınız indi ölkəmizin uğurları olacaq. Mən sizə dərindən sadiqəm"…
İbrahim Nebioğlu
TEREF
Slovakiyanın Baş naziri Robert Fitso yanvarın 21-də macarıstanlı həmkarı Viktor Orbanla Kiyevin “Türk axını” qaz kəmərinin Rusiya kompressor stansiyasına hücumundan sonra Bratislavada qaz kəmərlərinin mühafizəsini müzakirə edəcək.
Bu barədə Slovakiyanın “Pravda” xəbər portalı məlumat yayıb.
Fitsonun sözlərinə görə, Volodimir Zelenski ABŞ-nin Avropa bazarına daha bahalı mayeləşdirilmiş təbii qaz tədarük etməsi üçün hər şeyi edir.
Mağaza satıcıları bildiriblər ki, çinlilərin Rusiya brendlərindən olan bu ərzaqları alması üçün böyük növbələr yaranır.
Rusiya Federasiyasından gələn bir ərzaq növü çinli alıcılar arasında son dərəcə populyardır.
Bu barədə Şençjen (Cənubi Çin) şəhərində Rusiya ərzaq mağazasına baş çəkən “aif.ru”nun müşahidəçisi məlumat verib.
Mağaza satıcıları bildiriblər ki, çinlilər daha çox məşhur Rusiya brendlərinin şokoladlarını alırlar və adətən bunun üçün böyük növbələr yaranır.
“Bizim insanlar bu şokoladları hədsiz çox sevirlər” - satıcılardan biri bildirib.
Sorğulara görə, Rusiyadan gələn şokolad alıcıların 75%-nin sevimli məhsuludur.
“Aif.ru”nun rəyçisi onu da qeyd edib ki, Rusiya istehsalı olan dondurma və bal çinlilər arasında populyarlıq baxımından ikinci və üçüncü yerdədir.
Rusiya və Gürcüstan sərhədində "Yuxarı Lars" keçid məntəqəsinin qarşısında müxtəlif ölkələrdən 1 325 yük maşını növbədə qalıb.
Demokrat.az xəbər verir ki, bu barədə "Sputnik" yazır.
Bildirilir ki, yük maşınlarının təxminən 400-ü Ermənistana məxsusdur.
Qeyd edək ki, Gürcüstan Hərbi Magistralı Rusiyanı Gürcüstan və Ermənistanla birləşdirən yeganə quru yoludur. Marşrut Vladiqafqazdan Tbilisiyə qədər, "Yuxarı Lars" sərhəd-keçid məntəqəsindən keçir.
Rusiyanın "Komsomolskaya pravda" qəzetində Azərbaycan əleyhinə material yayılıb. Dekabrın 25-də qəzaya uğramış Azərbaycan təyyarəsinin ekipajının dispetçerlərlə danışıqları dərc olunub.
"Правда" sözü Azərbaycancaya tərcümədə "həqiqət" deməkdir. Amma bu qəzetin adında "həqiqət" sözü olsa da, əsl mahiyyəti hələ də olduğu kimi ("комсомолская") qalır. Azərbaycana qarşı "oğru elə bağırdı ki..." üslubunda yazıdan da bu mahiyyət açıq-aşkar görünür.
Təbii ki, bu danışıqların yayılması məsuliyyəti tamamilə Rusiyanın üzərindən götürmək məqsədi daşıyır.
Bəli, "quşla toqquşma" və "oksigen balonunun partlaması" ifadələri təyyarə heyətinin dilindən çıxıb. Ancaq elə Rusiyalı aviasiya mütəxəssislərinin özlərinin də təsdiq etdiyi kimi, bunlar stress vəziyyətində deyilmiş ifadələrdir. Yerüstü xidmətlərlə danışan pilotlar o cür çətin situasiyada, bağlı kabinədə zədəli təyyarəni idarə etməyə çalışırdılar.
Pilot: "Deyəsən, oksigen balonu partladı" deyib. "Deyəsən" sözü var. Tam əmin deyil. Çünki salonda baş verənləri o an qiymətləndirmək imkanı yoxdur. Həmin məqamda pilotların, sadəcə və sadəcə, bir məqsədi var: təyyarəni yerə endirə bilmək.
Rusiya ilə dost münasibətlərdə olan Azərbaycanın pilotları ağıllarına gətirə bilməzdilər ki, onları yerdən raketlə vurublar, ya vura bilərlər.
İndi Rusiya tərəfdən sərgilənən davranış bir sual doğurur: "Qara qutu"ların tam oxunmasını, bütün araşdırmaların tam olaraq ortaya qoyulmasını gözləmədən belə bir "qabaqdangəlmişlik" kimə və niyə lazımdır?!
Azərbaycan əlindəki faktlara, sübutlara, sağ qalan sərnişinlərin, ekipaj üzvlərinin söylədiklərinə əsaslanır. Təyyarənin gövdəsinin üzərindəki o dəliklər bayırdan içəriyə doğru açılıb. Hansısa bir bərk cismin bayırdan təyyarənin füzelajını deşib içəri keçən fraqmentləri sərnişini, ekipaj üzvünü yaralayıb. Yaralanan heyət üzvü özü deyir: "Elə bil qolumu balta ilə çapmışdılar". Havada bu nə ola bilər? Cavab öz-özünə aydındır.
Pilotlarla yerüstü xidmətlərin danışıqlarını yayanlar iddia edir ki, Qroznı şəhərinə eniş üçün təyyarəyə icazə verilib. Amma sağ qalmış heyət üzvü isə deyir ki, qatı duman səbəbindən enmək mümkün olmadı. Təyyarəyə vurulmuş zədələr onu göstərir ki, artıq buradan geri uçmağa çalışan hava gəmisinə yerdən atəş açılıb. Rusiya mediası, onların arxasında duranlar bu versiyanı tamamilə istisna etməyə, dövriyyədən çıxarmağa çalışırlar.
Çox qəribə vəziyyətdir: Azərbaycan bəyan edir ki, təyyarə Rusiya ərazisində kənar (yerdən) müdaxilə nəticəsində zədələnib, idarəetməni itirib və qəzaya uğrayıb. Günlər keçir, Rusiya tərəfdən rəsmi heç bir reaksiya olmur. Əvəzində "quş versiyası" tam sürətlə fırladılır. Nəhayət, hadisədən 3 gün sonra Rusiya prezidenti Vladimir Putin Azərbaycanlı həmkarına zəng edir, üzr istəyir. Rusiyada bu hadisə ilə bağlı cinayət işi açıldığı bəyan olunur. Amma ardınca aşağı rəsmi səviyyələrdə, xüsusilə, media, sosial platformalar üzərindən Azərbaycana qarşı genişmiqyaslı, intensiv hücum başlanır. Yalan, böhtan, həqarətlər.
Mən bu məsələyə bir yazımda da toxunmuşdum. Əlavə olaraq, bəzi nüanslara nəzər salmaq istərdim. Rusiyanın birinci şəxsi, həm də Putin kimi prezident, xüsusi xidmət orqanlarında yetişib gəlmiş bir şəxs, faktlarla, informasiya ilə necə işləmək lazım olduğunu yaxşı bilən yüksək çinli kəşfiyyat zabiti boş yerə üzrxahlıq etməzdi. Deməli, onun qarşısına qoyulan faktlar, dəlillər üzr istəməkdən başqa yol qoymayıb.
Bəli, burada həm də siyasi məqsədəuyğunluq var: Rusiya prezidenti Azərbaycanla münasibətləri korlamaq istəmir. Çünki onsuz da dünyada, o cümlədən, postsovet məkanında Rusiya ilə səmimi dostluq, qonşuluq, tərəfdaşlıq münasibətləri saxlayan dövlətlərin sayı çox deyil; onlar getdikcə azalır.
Rusiyanın Ukraynada apardığı müharibə göz qabağındadır; Avropanın ən böyük ölkələrindən biri tarixin günorta çağında dövlət olaraq məhv oluur. Bir çox dövlətlər, xalqlar təbii olaraq düşünür: "Öz qardaşına bunları edən başqalarına nələr etməz?!" Ermənistan kimi Rusiya ilə çox yaxın - Moskvanın vassalı olmuş ölkə isə bundan bəhanə kimi istifadə edir.
Bilirsiniz, nökərlər ağalara həmişə nifrət edir; bunu tarix də, sənət də, fəlsəfə də dəfələrlə deyib, göstərib. Ermınistan da istisna olmadı. Rusiyanın ordan-burdan torpaq qoparıb verdiyi, ölkə elədiyi, süni şəkildə qurub dövlət elədiyi, qoruyub əzizlədiyi Ermənistan bu gün ABŞ-la strateji tərəfdaşlıq xartiyası imzalayır. Rusiyadan qopmaq üçün min bir oyun qurur. O da bir yana, Moskvanın Çin, Hindistan kimi nəhəng dostları sanksiyalardan qorxaraq Rusiyadan neft almaq istəmir. Başqa misallara heç ehtiyac yoxdur. Belə bir situasiyada Azərbaycan Rusiya ilə münasibətləri əvvəlki kimi qoruyub inkişaf etdirməyə çalışır. Dünyanın dörd bir tərəfində Beynəlxalq Cinayət Məhkəməsinin orderi ilə Rusiya prezidentini həbs etməyə hazır dövlətlər var, amma Putini Azərbaycan prezidenti evinə qonaq çağırır, ev ortamında qarşılayır. Bu, Rusiyaya münasibətin səmimiyyətindən xəbər vermirmi?!
Belorusu hesaba almayaq, o, Rusiya ilə vahid ittifaq dövlətində birləşib. Bundan kənarda - bütün postsovet regionunda Rusiyaya bəlkə də ən səmimi, dürüst dost olan ölkə Azərbaycandır. Moskvanın dünyaya açılan iki nəfəsliyi varsa, onlardan biri Azərbaycandır. Hətta sərnişin təyyarəsi Rusiya ərazisində vurulsa da, Azərbaycan tərəfdən Rusiya əleyhinə təbliğat aparılmadı, təhqir, aşağılama kimi xoşagəlməz davranış göstərilmədi. Üstəlik Azərbaycan rəsmiləri, mediası, ekspert dairələri məsələni belə şərh edirdi: "Rusiyanın Azərbaycan təyyarəsini qəsdən vurduğuni düşünmürük". Yəni o çətin, ağır, stressli günlərdə də Azərbaycan öz ayıq, obyektiv, ədalətli mövqeyini qoruyub saxlayırdı. Öz müdrikliyini göstərirdi. Bu cür daxili tarazlığını, mənəvi ucalığını yenə də davam etdirir.
Ancaq Rusiyada nə görürük? Hakimiyyətə yaxın və ya hökumətə bağlı olan media platformalarında Azərbaycana qarşı aramsız və amansız kampaniya aparılır.
Qəribədir, əgər bu sifariş hakimiyyətdən gəlirsə, onda Rusiya prezidentinin üzrxahlığı nə idi? Yox, bu, hakimiyyətdən qaynaqlanmırsa, onda niyə Rusiya üçün vacib olan bir dost, qonşu ölkənin əleyhinə bu cür haqsız hücumları edənlər cəzasız qalır?!
Rusiya prezidenti, xarici işlər naziri, başqa yüksək vəzifəli rəsmilər Azərbaycanı Rusiya üçün "yaxın dost", "vacib ölkə", "etibarlı tərəfdaş" adlandırırlar. Amma eyni zamanda hakimiyyətə yaxın mediada Azərbaycan hər tərəfdən hədəfə alınır, ittihamlara, həqarətə məruz qoyulur. Bu, nə yaxın qonşuluğa, nə səmimi dostluğa, nə strateji tərəfdaşlığa sığır.
Rusiyanın idarəçiliyində Prezidentdən tutmuş üzüaşağı bütün səviyyələrdə xüsusi xidmət orqanlarının təsiri həlledici səviyyədədir. Bu, həm siyasi qərarların qəbuluna təsir, həm də həmin qərarların icrasına nəzarət baxımından Federal Təhlükəsizlik Xidmətinin, eləcə də, başqa anoloji strukturların roluna aiddir. Xüsusilə, Rusiyanın Ukrayna ilə müharibə vəziyyətində, Ukraynada Qərb gücləri ilə sərt qarşıdurmada olduğu bir şəraitdə Rusiyanın həyatında və siyasətində xüsusi xidmətlərin məsuliyyəti və diqqəti birə beş artıb. Belə bir ortamda Rusiyanın etibarlı tərəfdaşına -Azərbaycana qarşı kimlərinsə siyasi "özfəaliyyət ansamblı" yaradıb, təbliğat qaçaqçılığı etməsi, "tənha atıcı" pozasına keçməsi ya mümkün deyil, ya da Federal Təhlükəsizlik Xidmətinin nəzarətindən kənarda deyil.
Azərbaycan zərərçəkmiş tərəfdir; Azərbaycana qarşı törədilmiş cinayətdə Azərbaycanın özünü təqsirkar çıxarmaq cəhdi varsa, hansı ədalətdən danışmaq olar?!
Biz bu "film"ə əvvəllər də baxmışıq; 1992-ci ildə Azərbaycan öz torpaqlarını azad etmək istəyəndə ABŞ Konqresi "Azadlığı müdafiə aktı"na 907-ci düzəliş qəbul etdi; işğalçını - cinayət törədəni deyil, işğala məruz qalanı - zərərçəkəni cəzalandırdı. Vaşinqton 44 günlük müharibədən sonra - Azərbaycan öz torpaqlarını azad edərkən, bu davranışı yenə təkrar etdi; Co Bayden administrasiyası hüquqi qüvvəsi dayandırılmış bu cəza sanksiyasını yenidən bərpa elədi.
Rusiya, onun mediası, bloqosferası bir yandan Co Baydeni "aslb-kəsir", o biri yandan, özləri onun kimi davranır; cinayəti törədənləri tapıb cəzalandırmaq yerinə, zərərçəkəni cəzalandırırlar. Bu paradoksu hara yazaq?! (Deyəsən, Baydeni qınaya-qınaya, özləru də Baydenə oxşadılar).
Rusiya tərəfinin təbliğatı, dediyimiz kimi, məsuliyyəti pilotların, ekipajın üzərinə yönəldib, əsl günahkarları aradan çıxarmaq istəyir. Yenə də söhbəti "quş" versiyasına bağlayıb, oksigen balonuna qoşublar. Ancaq əsas məsələ bu deyil. Əsas mətləb təyyarənin vurulmasıdır. Təyyarədə zərərçəkən şəxslərin yarasında "Panitsir" hava hücumundan müdafiə sisteminə - onun raketinə məxsus qəlpələrin qalıqlar var. Onlar bu yaraları Rusiya üzərində uçuş zamanı - təyyarə havadaykən alıblar. Bakıda təyyarəyə minəndə sağ-salamat idilər.
Bir sözlə, Rusiya mediasındakı təbliğata bir "quş"! Bu, əsl rus ruletidir; məsuliyyətdən qaçmaq üçün göydə uçan quşlardan mədəd umanların silahı axır bir gün, bir yerdə öz başında partlayacaq. Ancaq hələ fərqində deyillər.
Gün kimi aydın olan gerçəkləri bu cür israrla danmaq, həm də haqsız və yersiz hücumlarla pərdələmək dostluq-filan o yana qalsın, heç insanlığa sığışan bir şey deyil.
Azərbaycanın tələbləri haqlı və aydındır: hadisə hərtərəfli və obyektiv araşdırılsın, təqsirkarlar tapılıb cəzalandırılsın, zərərçəkənlərə kompensasiya ödənilsin. Burda qeyri-adi, fövqəltəbii nə var?! Heç nə! Onda bu hay-küy nəyə, daha doğrusu, kimə lazımdır?!
"Hay-küy" dedim, Ulyam Şekspirin "Heç nədən hay-küy" pyesini xatırladım: qraf Klavdio Duanaya aşiq olur. Ancaq Don Xuan bu qarşılıqlı sevgiyə mane olmaq üçün qarayaxmaya, böhtana əl atır. Ancaq axırda özü ifşa olunur; yalanı ortaya çıxır.
Şekspirin bu əsəri, bəli, romantik komediyadır. Amma bu gün Rusiyada Azərbaycana qarşı oynanılan tamaşa əsl tragikomediyadır. Üstəlik böhtan da, böhtançının kimliyi də göz önündədir. Bircə qalır, Şekspirsayağı xoşbəxt sonluq. Bu da həqiqətin etirafından keçir.
Özü də söhbət əsl həqiqətdən gedir, "комсомолская правда"dan yox!
P.S. Yeri gəlmişkən, Azərbaycanın tələbi ilə Rusiyanın kompensasiya ödəyəcəyi sərnişinlər arasında Rusiyanın öz vətəndaşları da var... (bizimyol.info)
Mən bu razılaşmadan yaxşı bir şey gözləmirəm. Xatırlayırsınızsa, ABŞ və Ukrayna 2021-ci ilin noyabrında oxşar saziş imzaladılar və cəmi üç ay sonra Rusiya Ukraynanı işğal etdi.
Axar.az xəbər verir ki, bu sözləri erməni mediasına geniş müsahibəsində diplomat, Rusiya-ABŞ prezidentlərinin ikitərəfli əməkdaşlığın inkişafı komissiyasında ABŞ tərəfindən təmsil olunan sabiq müşavir Ceyms Karden ABŞ və Ermənistan arasında imzalanan strateji tərəfdaşlıq sazişi haqda danışarkən deyib.
“Təəssüf ki, bunun nəyə gətirib çıxardığını artıq görmüşük. 2008-ci ildə NATO-nun Buxarestdə keçirilən sammitində Ukrayna və Gürcüstanın NATO-ya daxil olması barədə qərar qəbul edilib. Həmin ilin avqustunda Altı günlük müharibə zamanı Rusiya Gürcüstanı işğal etdi. Daha sonra, 2014-cü ildə Ukraynanın Qərblə yaxınlaşması səbəbindən Ukraynada Maydan hərəkatı və vətəndaş qarşıdurması alovlandı və nəticədə Rusiyanın 2022-ci ilin fevralında genişmiqyaslı işğalı ilə nəticələndi.
ABŞ-ın Ermənistanın təhlükəsizliyinin təminatçısı kimi Rusiya və ya İranı əvəz edə biləcəyi fikri Vaşinqton bürokratları üçün cəlbedici görünə bilər, onların əksəriyyəti Ermənistanda olmayıb və ya xəritədə Ermənistanı çətinliklə tapa bilər. Ermənistan üçün isə bu, çox riskli addımdır. Bu qərar ölkəni Türkiyənin ambisiyaları qarşısında aciz edə bilər”, - o bildirib.
Tehranda İran Ali Məhkəməsi qarşısında iki hakimin ölümü ilə nəticələnən atışma terror aktıdır.
TNS xəbər verir ki, bu barədə IRNA məlumat yayıb.
Nəşr qeyd edir ki, İranın baş prokuroru Mohammad Movahhedi Azad Tehran Baş Prokurorluğuna hadisəni dərhal və hərtərəfli araşdırmağı tapşırıb.
Agentlik hücumçunu saxlamağa çalışdıqlarını, lakin onun intihar etdiyini bildirib.
Azad terror aktının arxasında duranların müəyyən edilərək həbs olunmasını istəyib.
Hücum nəticəsində bir mühafizəçi və daha bir hakimin yaralandığı iddia edilir. Nəşr bildirir ki, təcavüzkarın Ali Məhkəmə və orada baxılan işlərlə heç bir əlaqəsi olmayıb.
Xatırladaq ki, yanvarın 18-də Tehran İran Ali Məhkəməsinin binası yaxınlığında atışma baş verib, nəticədə iki hakim öldürülüb.
Ölən hakimlər milli təhlükəsizlik, casusluq və terrorizm əleyhinə cinayətlər üzərində işləyirdilər