 |
|
|
May ayının ikinci həftəsidir, ancaq pomidorun qiyməti hələ də qış aylarındakından fərqlənmir. Marketlərdə və bazarlarda bu məhsul alıcılara 3.60-5 manat arasında təklif olunur. Hazırda paytaxtda satşa çıxarılan pomidorun əsas hissəsi Bakıətrafı qəsəbələrdəki istixanalardan, eləcə də Şəmkir, Göyçay və s. rayonlardakı fermer təsərrüfatlarından gətirilir.
Xatırladaq ki, ötən ilin may ayında pomidor 2.50-2.80 manat arası təklif olunurdu - indiki qiymətlərlə müqayisədə təxminən iki dəfə ucuz. Qiymətlərin yüksək olması alıcıları da narazı salır. Marketlərdə apardığımız müşahidələr göstərir ki, başqa tərəvəz məhsulları ilə müqayisədə pomidor alanlar azdır. Bəzi alıcılar isə bir neçə ədəd, ən yaxşı halda 1 kiloqram pomidor alır.
“Bazar Store” marketinin təsərrüfat bölməsinin işçisi deyir ki, qiymətlərin baha olması onlardan aslı deyil. Onun sözlərinə görə, şirkətin müqaviləsi olduğu fermerlər məhsula yüksək qiymət qoyur, ticarət şəbəkələri isə ən yaxşı halda onu 40-50 qəpik marja ilə satır.
“Ucuz olanda gündə azı yarım ton pomidor satılırsa, indiki halda bir neçə yeşik zorla alınır. Bu, market üçün də sərfəli deyil. Xarab olan məhsul da xərcləri artırır, market üçün məhsulun maya dəyərini artırır” – deyə, adının yazılmasını istəməyən “Bazar Store” əməkdaşı bildirir.
Araşdırmalar pomidorun region ölkələri ilə müqayisədə ən baha Azərbaycanda satıldığını göstərir.
Moskvada ticarətlə məşğul olan Maarif Əsgərov “AzPolitika”-ya bildirib ki, pomidor növünə, ölçüsünə görə fərqli qiymətə satışa çıxarılır. Onun sözlərinə görə, Azərbaycandan göndərilən birinici növ pomidor məhsulu topdansatışda 3.60 manata, pərakəndə ticarət mərkəzlərində 4- 4.50 manata satılır.
“Əlbəttə, ucuz qiymətə də yaxşı mal almaq olar. Əgər topdansatışda 2-3 gün ərzində satılmayan mal qalıbsa, onu yarı qiymətə əldə etmək mümkündür” –deyə, Əsgərov bildirir.
Tbilisidə yaşayan jurnalist Avtandil Məmmədov isə bildirir ki, Gürcüstan paytaxtındakı ticarət mərkəzlərində əsasən 2 növ pomidor satılır: “İstixanalarda yetişdirilən, xaricdən gətirilən xırda pomidor növü var, çox dadlıdır, onun qiyməti Azərbaycan valyutası ilə 3.80- 4 manatdır. Amma Azərbaycanda bizim də istehlak etdiyimiz pomidor burada 2.50-2.80, maksimum 3 manatdır”.
Qeyd edək ki, Türkiyənin paytaxtı Ankara şəhərindəki ticarət mərkəzlərində yüksək keyfiyyətli salxım pomidorun qiyməti 2-2.50 manat arasında dəyişir. Dahaa aşağı qiymətə məhsul almaq da olar.
Maraqlıdır ki, Azərbaycanda pomidorun qiyməti yüksək həyat səviyyəsinin olduğu Avropa ölkələri ilə müqayisədə də xeyli yüksəkdir.
Almaniyada yaşayan azərbaycanlı Vüqar Niftiyev “AzPolitika”-ya bildirib ki, ölkədə pomidorun qiyməti 1,50 - 1,80 avro (2.80-3.30 manat) arasında dəyişir. Qeyd edək ki, Almaniyada minimum əmək haqqı 1500 avro (2742 manat), Azərbaycanda isə 345 manatdır.
Niderlandda da pomidorun qiyməti Azərbaycanla müqayisədə xeyli ucuzdur. Bu ölkədə yaşayan jurnalist həmkarlarımızdan aldığımız məlumata görə, bazarlarda 2.-2.50 manata pomidor almaq mümkündür. Marketlərdə isə toros tomatın kiloqramı 4-5 manata təklif olunur.
Bəs kifayət qədər məhsul yetişdirilən Azərbaycanın yerli bazarlarında pomidorun qiyməti niyə yüksəkdir?
Xatırladaq ki, Azərbaycan adambaşına pomidor istehsalı göstəricisinə görə Portuqaliya, Türkiyə, İtaliya, İspaniya kimi ölkələrdən geridə olsa da, qonşu İrandan, Gürcüstandan, Rusiyadan xeyli irəlidədir. Belə ki, Azərbaycan 2021-ci ildə adambaşına 81,5 kiloqram pomidor istehsal edib. Bu göstərici Türkiyə ilə müqayisədə 2 dəfə az olsa da, İranla müqayisədə 2 dəfə, Rusiya ilə müqayisədə 3,9 dəfə, Gürcüstanla müqayisədə isə 5,3 dəfə çoxdur.
Kənd təsərrüfatı sahəsi üzrə mütəxəssis Vahid Məhərrəmli “AzPolitika”-ya şərhində bildirib ki, Azərbaycanda örtülü torpaqlarda yetişdirilən məhsulları istehlakçılara yüksək qiymətlərə təklif edirlər: “Apardığımız araşdırmalar göstərir ki, payız, qış və yaz aylarında Azərbaycan bazarlarında pomidorun qiyməti qonşu ölkələrlə müqayisədə hətta 2-3 dəfə baha satılır. Baxmayaraq ki, Dövlət Statistika Komitəsinın məlumatlarına əsaslansaq ölkədə pomidor istehsalının ilbəil artdığını deyə bilərik. Son 10 il ərzində ölkədə pomidor istehsalı 75,2% artıb. Eyni zamanda Azərbaycanın pomidor idxalı 2,2 dəfə azalıb, ixracı isə 4 dəfə artıb. Bu müddət ərzində pomidor istehlakı isə 46,4% artıb”.
V.Məhərrəmli deyir ki, bahalığın səbəbini yalnız pomidor istehsalı sahəsində monopoliyanın olması ilə əsaslandırmaq olar.
Onun sözlərinə görə, istixana komplekslərinin yaradılması üçün dövət hesabına ucuz kredit resursları əldə edən oliqarx məmurlar indi də bazarı inhisara almaqla mal dovriyyəsini artırmaq hesabına deyil, yüksək qiymət hesabına daha çox qazanc əldə edirlər.
Sabiq səfir Elmira Axundovanın vaxtilə Prezident Adminisitrasiyasının keçmiş rəhbəri Ramiz Mehdiyevə yazdığı gizli məktubun mətbuata sızması geniş müzakirələrə səbəb olub.
Hamını maraqlandıran əsas suallar isə bunlardır: Bu, necə baş verib? Məktubun ictimailəşdirilməsində məqsəd nədir?
Əlbəttə, bu suallara dəqiq cavabı yəqin ki, prosesin iştirakçıları verə bilər. Biz sadəcə, ehtimallar üzərində dayana bilərik.
Birincisi, hiss olunur ki, hansısa dairələr PA-nın keçmiş rəhbəri Ramiz Mehdiyevin unudulmasına istəmir. Əlbəttə, bu heç də ona simpatiyadan irəli gəlmir. Əksinə, məqsəd hakimiyyətdə olduğu illərdə Ramiz Mehdiyevin necə deyərlər, qara-qura işlərlə məşğul olduğunu, müəyyən deputatları himayə etdiyini, biznes mübahisələrində "ağsaqqal" rolu oynadığını diqqət mərkəzinə gətirmək, onun mənfi obrazının unudulmamasına çalışmaqdır. Başqa sözlə, "Rusiyanın adamı" kimi tanınan Ramiz Mehdiyevin özünü komfortda hiss etməməsi üçün vaxtaşırı bu tip fakt və kompromatlar mediaya sızdırılır və bu, normaldır.
Gizli məktubun üzə çıxmasının ikinci səbəbi isə birincidən heç də az önəmli deyil - Məqsəd Elmira Axundovanı hədəfə gətirməkdir. Fikir verirsinizsə, son illər onun karyerası enən xətt üzrə "irəliləyir". Deputat kimi yaddaqalan fəaliyyəti olmayan, tez-tez Azərbaycan dilini yaxşı bilmədiyi başına qaxınc edilən Elmira Axundovanın səfir kimi fəaliyyəti də çox uğursuz oldu. Bu, xüsusən də özünü Ukraynada müharibə başlayarkən azərbaycanlıların evakuasiyası məsələsində göstərdi. Məhz elə bu istiqamətdə tamamilə yarıtmaz fəaliyyəti onun səfir kimi geri çağırılmasında həlledici rol oynadı.
Amma Ramiz Mehdiyevin komandasının üzvü kimi unudulmaqda olan Elmira Axundovanın yenidən gündəmə gətiriılməsi yalnız siyasi səbəblə - onun yenidən deputat olmaq istəyinin üzərindən xətt çəkməklə bağlı deyil. Bu, həm də hələ də bitməyən bir biznes məsələsi - hələ çürüdülməmiş haqq-hesab, dələduzluq olayı ilə bağlıdır.
Xatırlayırsınızsa, 2018-ci ildən etibarən Elmira Axundovanın adı səs-küylü bir dələduzluq olayında hallanmağa başladı. O zaman mətbuatda gedən yazılarda qeyd olunurdu ki, Elmira Axundova ətrafındakı imkanlı adamlardan oğlunun biznesinə dəstək verməyi, birlikdə pul qazanmağı xahiş edib. Məhz bu xahişdən sonra sabiq səfirin oğlu Həbib Axundov və Elnur İbrahimovun xaricdən katric gətirib satmaq adı ilə xeyli adamdan pul aldıqları (ümumilikdə 1 milyon manatdan çox) və onları aldatdıqlarına dair xəbərlər yayıldı. Daha sonra Rusiyaya qaçan Elnur İbrahimov həbs edilib ölkəyə gətirildi və uzun müddət davam edən məhkəmə prosesindən sonra 9 il müddətinə həbs edildi. Həmin iş üzrə Həbib Axundov da zərərçəkmiş şəxs qismində tanınmışdı. Ancaq buna baxmayaraq, digər zərərçəkənlər, xüsusən də Fərman Məmmədov dələduzluq faktına görə deputat və onun oğlunu da ittiham edirdilər. Fərman Məmmədovun iddiasına görə, onun Elnur İbrahimova verdiyi pulların geri qaytarılmasına məhz Həbib Axundov zamin durub. Hətta mətbautda Elmira Axundovanın dələduzluqla üzləşən və 450 mindən çox ziyana düşən Fərman Məmmədova əvvəlcə 200 min, daha sonra isə 40 min pul qaytardığı haqda xəbərlər gedib.
Ancaq buna baxmayaraq, məhkəmə zərərçəkənlərin dələduzluqda ittiham etdikləri Həbib Axundovla bağlı heç bir cəza tədbiri görməyib.
Məhkəmə prosesində Fərman Məmmədovun vəkili olan Fuad Ağayev Bakupost.az -a açıqlamasında yekunda bir nəfərin - Elnur İbrahimovun məsuliyyətə cəlb olunduğunu bildirib. "Necə düşünürsünüz, müdafiə etdiyiniz şəxsin dələduzluqla üzləşməsində Həbib Axundovun təqsiri vardımı? O, məsuliyyətə cəlb olunmalı idimi" suallarına isə vəkil belə cavab verib:
"Mən artıq o işdə heç kimi təmsil etmirəm. Bu suala cavab vermək vəkil etikasından kənar olardı. Bu suallara Fərman Məmmədov özü cavab verə bilər".
Fərman Məmmədov isə mətbuata açıqlamasında məsələ ilə bağlı bunları deyib:
"Elmira Axundova evində elan etmişdi ki, oğlu Həbib Axundov biznes qurub, ölkəyə xaricdən katric və dəftərxana ləvazimatı gətirib dövlət orqanlarına satacaq. Bizi də oğlunun biznesinə pul qoymağa çağırıb. O zaman Elmira Axundovanın evində məndən başqa xeyli adam olub. Şəxsən mən deputat olan Elmira Axundovaya inanmışdım, oğlu Həbib Axundova biznesə qoymaq üçün külli miqdarda pul vermişdim. Həmin vaxt Həbib Axundov Gömrük Komitəsində işləyirdi. Yəni həm Elmira Axundovaya, həm də Həbib Axundova inanmamağım üçün əsasım yox idi. Aramızda həm Həbib Axundovla, həm də Elmira Axundova ilə bu məsələylə bağlı kifayət qədər danışıqlar olub, dediklərimi təsdiq edən sübutlar var. Hansıları ki, mən istintaqa, məhkəmələrə də təqdim etmişəm. Çox təəssüf olsun ki, bu günə qədər də həmin sübutlara hüquqi qiymət verilməyib. Səs yazıları var. Orada açıq şəkildə pulumu qaytarmaq üçün Elmira Axundovanın özü də, oğlu da məndən vaxt istəyirlər. Mən də bir insan kimi onlara pullarımı qaytarmaları üçün vaxt verirəm. Eyni zamanda öyrənirəm ki, lap əvvəldən heç bir biznes olmayıb".
Beləliklə, Fərman Məmmədov aldadılıb və ortada heç bir biznesin olmadığı, sadəcə "piramida" qurulduğu, əldə olunan pulların Həbib Axundovun "Favorit" marketinə qoyulduğu üzə çıxıb. Hər halda Fərman Məmmədov belə iddia edir. O, mülki iddiasının yalnız Elnur İbrahimova qarşı təmin olunduğunu, lakin məhkəmə qərarına rəğmən, bu günə qədər ona 1 qəpik də pul qaytarılmadığını bildirib.
Beləliklə, aydın olur ki, Elnur İbrahimov Fərman Məmmədovdan aldığı pulları qaytarmadığı üçün borc məsələsi yenidən gündəmə gətirilib. Görünür, o, qalan məbləği sabiq səfirdən almaq niyyətindədir. Hər halda Fərman Məmmədovun son açıqlamasındna belə anlaşılır:
"Cinayət varsa, cəza da var. Əminəm ki, biz zərərçəkənlərə qarşı törədilən cinayət gec-tez araşdırılacaq, hər kəsin əməlinə hüquqi qiymət veriləcək".
Abşeron-Xızı Regional Təhsil İdarəsi "Azərmətbuatyayım” Açıq Səhmdar Cəmiyyəti ilə 70 000 manatlıq satınalma müqaviləsi bağlayacaq.
Reportyor.info xəbər verir ki, müqavilə "Azərbaycan müəllimi” qəzetinə abunə yazılışı ilə əlaqədardır. Tenderin şərtlərindən aydın olur ki, İdarə il ərzində 70 000 nüsxə qəzetlə təmin ediləcək.
İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən, "Azərmətbuatyayımı” ASC 7 avqust 2007-ci ildə dövlət qeydiyyatına alınıb. Nizamnamə kapitalı 345 304 AZN olan şirkətin hüquqi ünvanı Bakı şəhəri, Nərimanov rayonu, Ceyhun Hacıbəyli küçəsi, ev 30 K-də yerləşir. ASC-nin qanuni təmsilçisi Salmanov Süleyman Əli oğludur. Ondan əvvəl şirkəti Səfərli Vüqar Müzəffər oğlu təmsil edib.
Vüqar Səfərli 2009-2020-ci illərdə Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) icraçı direktoru vəzifəsində işləyib. və 2021-ci ildə həbs edilib. Ona qarşı 179.4-cü (xüsusilə külli miqdarda ziyan vurmaqla mənimsəmə və israf etmə), 193-1.3.2-ci (cinayət yolu ilə əldə edilmiş külli miqdarda pul vəsaitlərini leqallaşdırma), 308.2-ci (ağır nəticələrə səbəb olan mühüm zərər vurulmaqla vəzifə səlahiyyətlərindən sui-istifadə etmə), 308-2.4-ci (satınalma prosedurları keçirilmədən külli miqdarda ziyan vurmaqla dövlət vəsaitlərini xərcləmə) və 313-cü (vəzifə saxtakarlığı) maddələri ilə ittiham irəli sürülüb.
Vüqar Səfərli Bakı Ağır Cinayətlər Məhkəməsinin hökmü ilə 10 il 6 ay azadlıqdan məhrum edilib. Hökmdə qeyd olunub ki, Vüqar Səfərli 3 il dövlət orqanlarında vəzifə tuta bilməz. Bundan başqa, onun Xətai rayonu, İsmayıllı rayonunda yerləşən fərdi yaşayış evləri müsadirə edilib, bank hesabına həbs qoyulub.
"Azərmətbuatyayımı” ASC Prezident Adminstrasiyasının ictimai-siyasi şöbəsinin keçmiş müdiri Əli Həsənovun şirkəti kimi tanınıb. Bu da səbəbsiz deyil. ASC-nin təsisçisi "Kaspi Mətbuat Yayım” MMC-dir. 1 mart 2004-cü ildə qeydiyyata alınan şirkətin hüquqi ünvanı Bakı şəhəri, Səbail rayonu, Fikrət Əmirov küçəsi, ev 1-də yerləşir. Bu ünvanda Əli Həsənovun ailə üzlərinə məxsus "Atom Qida” MMC, "Bakı 24” MMC, "Kaspi AZ” MMC, "Mətbuat Evi” MMC, "Golden Prince” MMC, "Global Advertisment” MMC və "Kaspi Co” MTK qeydiyyatda olub. Bu şirkətlər artıq ləğv edilib. Bu məlumatlar indiyə qədər təkzib olunmayıb.
Digər tərəfdən, "Azərbaycan müəllimi” qəzeti həftədə bir dəfə 300-500 tirajla nəşr edilir. Bu isə il ərzində 70 000 nüsxə etmir.
Biz hələ abunə haqqının baha olmasından danışmırıq. Hazırda qəzetlərin qiyməti 60 qəpikdir. Amma hansısa səbəbdən İdarə "Azərbaycan müəllimi” qəzetini 1 manatdan alır.
Abşeron-Xızı Regional Təhsil İdarəsinin müdiri İlhamə Abdullayevadır. Media onun fəaliyyəti haqqında tənqidi materiallarla zəngindir.
Onun bu vəzifəyə təyin olunmasından sonra Abşeron təhsilinin bərbad vəziyyətə düşdüyü barədə iddialar var. Bu iddialar indiyə qədər təkzib olunmayıb.
Türkiyənin məşhur aktrisası Nebahat Çehredən pərəstişkarlarını kədərləndirən xəbər gəlib. Belə ki, aktrisa təcili xəstəxanaya yerləşdirilib.
Məlumata görə, N.Çehrenin ürəyinə stend taxılıb. Ulduz bir gecə xəstəxanada qalıb.
Hazırda onun vəziyyəti qənaətbəxş hesab olunur.
Qeyd edək ki, Türkiyədə “Aşk-ı Memnu” serialında Firdevs Yöreoğlu obrazı ilə yadda qalan Nebahat Çehre 80 yaşına baxmayaraq illərə meydan oxuyan gözəlliyi və özünəməxsus üslubu ilə çox sevilir.
Mənbə: Haber Global
Abşeron-Xızı Regional Təhsil İdarəsi barəsində araşdırma aparılan Xırdalan şəhəri 17 nömrəli körpələr evi-uşaq bağçasının müdiri ilə bağlı daha bir açıqlama yayıb.
“Qafqazinfo” xəbər verir ki, açıqlamada sosial şəbəkələrdə səs yazısı yayılan bağça müdiri Fəranə Məhərrəmovanın əmək qabiliyyətini itirdiyi, müdir səlahiyyətlərini icra etmədiyi bildirilib.
“Sosial şəbəkələrdə yayılmış səs yazısı ilə bağlı bildiririk ki, bağçanın müdiri hazırda əmək qabiliyyətini itirdiyinə görə bağçanın müdir səlahiyyətləri Abşeron-Xızı Regional Təhsil İdarəsinin metodisti Sevinc Abbas qızı Qurbanovaya həvalə edilib. Bağça müdiri işə qayıtdıqdan sonra barəsində qanunvericiliyin tələblərinə uyğun olaraq müvafiq tədbir görüləcək”, - məlumatda vurğulanıb.
İdarədən, həmçinin qeyd edilib ki, sözügedən bağçanın fəaliyyəti Təhsil İdarəsi tərəfindən nəzarətə götürülüb. İctimaiyyətə bu barədə əlavə məlumat veriləcək.
"Üç ildir ki, neftçilərin əmək haqqı artırılmır". Dünən dia-az.info olaraq məlumat yayaraq bildirdik ki, Neftçilərin Hüquqlarının Müdafiə Təşkilatının sədri Mirvari Qəhrəmanlı İqtisadiyyat Naziri Mikayıl Cabbarova müraciət edərək sıravi neftçilərin maaşlarının artırılması ilə bağlı çağırış edib.
Yazısı BURADA: Sıravi neftçinin MAAŞ PROBLEMİ... - MÜRACİƏT
Qeyd edək ki, bu müraciət sıravi neftçilər tərəfindən geniş müzakirə olunub və onlardan bəziləri münasibətlərini də açıqlayıblar. Dia-az.info həmin müraciətlərdən bəzilərini təqdim edir. Beləliklə...
Ədalət Səncan: "Fəhləni adam yerinə qoyan yoxdur. Əsas özləridir. Fəhlə 500 manat, özlərisə 3000 manat və daha çox alırlar. Mikayıl müəllim özü görəsən o fəhləyə verilən beş yüz manatla neçə gün yaşaya bilər? Əyinlərindəki kostyumun qiyməti fəhlənin altı aylıq maaşından daha çoxdur..."
Hüseyn Zeynalov: "Ən ağir şəraitdə işləyən nefitcilərin əmək haqqısı artirilsin. 2022-çi ildə rəislərin əmək haaqısını qaldırdılar, fəhlələrin isə saatlarını kəsdilər. 24 saatlıq aqreqatların bir hissəsini 12 saata saldılar".
Rəsul Nərimanov: "Maaş axırıncı dəfə Rövnəq Abdullayevin vaxtında qalxıb... Sosial məsələlər isəə rəhmətlik Natiq Əliyevin vaxtında daha gözəl idi. İndikilər ancaq öz maaşlarını qaldırır... vəssalam".
Şəhriyar İsmayılov: "Bütün ərzaq malları demək olar ki 2 dəfə qalxıb normal qidalansan heç bu maaş da bəs eləməz. Ərzağın ən kefiyyətsizini məcbur yeyirik. Əksər işçilərin ürəyində stend var. Fəhləni muzdlu edib saatlıq tarif verirlər... Nazirlər kabineti də bayramların sayını günü-gündən artırır... İşə çıxdın pul yazılır... çıxmadın pul yazılmır. Ancaq özləri rəhbər heyət olaraq "oklad" maaş alır. Ədalətli bölgüdü? İstirahət verirlər, amma pul vermirlər..."
DAVAMI VAR...
Sosial şəbəkə platformalarında kiberdələduzlar tərəfindən Səhiyyə Nazirliyinin dəstəyi görüntüsü ilə Kapital Bank adından saxta kampaniyalar həyata keçirilir. Belə ki, yaradılan saxta hesablar vasitəsilə Kapital Bankın hər kəsə 200 AZN məbləğində pul verdiyi bildirilir. Vəsaitin alınması məqsədi ilə istifadəçilərə saxta “Telegram” kanalına daxil olmaq təklif olunaraq istifadəçilərin bank kartı məlumatları tələb olunur. Bununla da vəsait istifadəçilərə məxsus bank hesablarından kiberdələduzlar tərəfindən oğurlanır.
Səhiyyə Nazirliyi Elektron Təhlükəsizlik Xidməti ilə birgə vətəndaşlardan bu cür hallara qarşı diqqətli olmağı və hər hansı qurumun həyata keçirdiyi kampaniyalarla bağlı məlumatlarla qarşılaşdıqda ilk növbədə, həmin qurumla əlaqə saxlamağı və yaxud qurumun rəsmi veb-saytına daxil olaraq məlumatı dəqiqləşdirməyi tövsiyə edir.
Dünəndən yağan yağış paytaxtın ətraf ərazilərində bir sıra problemlərə yol açıb. Binəqədi qəsəbəsi Ağamirək İsfahani və Cəfər Cabbarlı küçələrində də yağış suları kanalizasiya sularına qarışıb. Nəticədə sakinlərin gediş-gəlişi çətinləşib, avtomobillərin hərəkətində fasilələr yaranıb.
Qəsəbə sakinlərinin Moderator.az-a verdiyi məlumata görə analoji vəziyyət qış ayından davam edir:
“Binəqədi qəsəbəsində yollarımız onsuz da yaxşı deyildi. Birtəhər pis-yaxşı asfalt çəkmişdilər. Onu da “AZƏRSU” gəlib dağıdıb getdi. Belə ki, qəsəbədəki su xətlərini yenilədilər, yolun bir tərəfini isə dağıdılmış vəziyyətdə qoyub getdilər. Düzdür, sonradan gəlib bəzi yerlərə nazik örtüklü asfalt döşədilər, amma əksər yerlər eyni vəziyyətdə qaldı. 2 gündür məhəllədə hərəkət etmək çətinləşib. Ya gərək qayıq alaq, ya da uzunboğazlı çəkmə. Vəziyyət o həddə çatıb ki, 133 saylı avtobus da artıq bu məhəlləyə gəlmir, yolunu dəyişib. İki avtomobil öz istiqamətləri üzrə hərəkət edə bilmir. Gərək biri gözləsin ki, o biri keçsin. Əks halda digər avtomobil çökək bir yerə düşəcək. Sonra gəl ordan çıx da” deyə sakinlər bildiriblər.
Moderator.az Binəqədi qəsəbəsindən foto və videoları sizə təqdim edir.
Qaçaq sabiq səfir Elmira Axundova Ramiz Mehdiyevə yazdığı danos-məktubundan danışıb.
Pravda.az-a açıqlamasında məktubda yazılanlar barədə bunları deyib: "Bəsdirin də, qurtarın bu işləri. Əşi, nə məktub yazmışam? Mən artıq pensiyaya çıxmışam. Qoyun, oturaq işləyək. Hansı məktubu yazmışam? Hə? Biz min dənə məktub yazırıq. Dəhşət. Off, mənim heç o məktub yadımda deyil. Yazırlar, yazsınlar. Heç nə deməyəcəyəm, nə deyə bilərəm? Onlar hər şey edə bilərlər. Bəlkə, özləri yazıb "qol" çəkiblər?"
Elmira Axundovanın yaddaşını təzələyək. Bu danos-məktubunuz 30 iyul 2018-ci ildə Prezident Adminstrasiyasının Sənədlərlə və vətəndaşların müraciətləri ilə bağlı iş şöbəsinə daxil olub. 15244 nömrəsi ilə qeydə alınmaqla "ağsaqqalım və dostum" deyə xitab etdiyiniz Ramiz Mehdiyevə təqdim olunub.
Ramiz Mehdiyev məktubu Daxili İşlər Nazirliyinə, nazirlikdən isə Bakı Ağır Cinayətlər Məhkəməsinin sədri Mahmud Nəbiyevə ötürülüb.
Qeyd edək ki, o günlərdə Bakı Ağır Cinayətlər Məhkəməsində Elmira Axundovanın oğlu Həbib Axundovun adı qarışdığı 8 milyon manatlıq dələduzluq işi araşdırılırdı.
E.Məmmədəliyev,
Musavat.com
TƏBİB-in tabeliyində olan Nərimanov Tibb Mərkəzinin ümumi cərrahı, tibb üzrə fəlsəfə doktoru Anar Mehdiyev işdən çıxarılıb.
İqtisadiyyat.az-ın əldə etdiyi məlumata görə, bununla bağlı Mərkəzin direktoru Fazil Alməmmədov əmr imzalayıb.
A.Mehdiyev isə işdən haqsız yerə çıxarıldığını bildirib və buna görə də məhkəməyə müraciət edib. O, tibb müəssisəsinə qarşı qaldırdığı iddiada işə bərpa olunması və əmək haqqı tələbini irəli sürüb.Nərimanov Rayon Məhkəməsi həkimin xeyrinə qərar çıxarıb.
Həkim A.Mehdiyev İqtisadiyyat.az-a açıqlamasında işdən çıxarılmasının səbəblərindən danışıb. Onun sözlərinə görə, buna Anım Günü Şəhidlər xiyabanını ziyarət etdiyi üçün işə bir saat gecikməyi səbəb olub: "Baxmayaraq ki, bu tarixdə biz işləmirdik. Çünki Nərimanov Tibb Mərkəzi təmirə bağlanmışdı. Dövlətimiz və məhkəmə var olsun ki, mənim xeyrimə qərar verdilər. Məhkəmədə direktorun Əmək Məcəlləsini kobud şəkildə pozduğu sübuta yetirilib. Çünki direktor Əmək Məcəlləsinin 70-ci maddəsinin ç bəndi ilə mənim müqaviləmə xitam verib".
Eyni zamanda həkimin haqsız yerə işdən çıxarıldığına görə Dövlət Əmək Müfəttişliyi Xidməti tərəfindən direktora cərimə protokolu tərtib olunub. Məhkəmənin qərarına əsasən, F.Alməmmədov 1500 manat məbləğində cərimələnib.
Amma Nərimanov Rayon Məhkəməsinin qərarından narazı qalan direktor Bakı Apellyasiya Məhkəməsinə müraciət edib. İş hazırda Bakı Apellyasiya Məhkəməsində hakim Fuad Talışınskinin sədrliyi ilə araşdırılır.
Qeyd edək ki, A.Mehdiyev 2004-cü ildə Azərbaycan Tibb Universitetinin Müalicə işi fakültəsini bitirib. O, 2005-2007-ci illərdə Rusiyanın Moskva şəhəri NV Sklifasovski adına Elmi Tədqiqat Təcili Yardım İnstitutunda ümumi cərrahiyyə üzrə klinik ordinatura keçib. 2008-ci ildə Moskva şəhəri RUDN hospital cərrahiyyə kafedrasında, 12 barmaq bağırsaq, mədə və mədə-bağırsaq anastomozlarının postvaqotom residiv xoralarının cərrahi müalicəsi və profilaktikası mövzusunda dissertasiyasını bitirərək tibb elmləri namizədi alimlik dərəcəsini alıb. 2012-ci ildə Almaniyada, 2014-cü ildə isə Türkiyədə təkmilləşmə kursu keçib. Bir çox elmi məqalələrin müəllifidir.