2024-cü ilin aprel-may ayları çiyələyi kəskin ucuzlaşması ilə yadda qalıb. Ötən il qiymətləri əl yandıran çiyələyi indi olduqca aşağı qiymətə almaq mümkündür.

FED.az xəbər verir ki, qiymətin ucuzlaşması istehlakçılara – əhaliyə sərfəli olsa da, indiyədək çox gəlirli sayılan çiyələk biznesinə böyük zərbə vurub. Ölkənin çiyələk mərkəzi sayılan Cəlilabadda çiyələk becərən fermerlər gəlirlərinin kəskin aşağı düşməsindən, gəlirin xərci ödəməməsindən və böyük itkilərlə üzləşdiklərini bildirirlər.

FED.az-a məlumat verən bəzi fermerlər hətta gələcəkdə başqa sahəyə keçəcəklərini də istisna etməyiblər.

Çiyələyin qiyməti keçən il ilə müqayisədə 50% ucuzlaşıb. Mövcud vəziyyət alıcıların ürəyincə olsa da fermerlər üçün acınacaqlı situasiya yaranıb.

Çiyələk əkini ilə məşğul olan fermerlər bildirirlər ki, çiyələyi onlardan 1 manata alırlar, bu qiymət keçən il 1,80 – 2 manat təşkil edirdi. Bazarda isə yerindən asılı olaraq qiymət 1,30 -1,50 manat aralığıda dəyişir.

Azərbaycandan xaricdəki çiyələk bazarında da vəziyyət ürəkaçan deyil. Yerli çiyələklərin əsas xarici bazarı sayılan Rusiyada çiyələyin qiyməti 120 rubl, yəni hardasa 2 manat civarındadır.

Xaricə məhsul ixrac edən fermer İbarət Şahbazovun dediyinə görə keçən il çiyələyin kilosunu xarici bazara 4 manatdan satırdılar, indi isə məzənnə dəyişiklikləri və s. qiymətə təsir edib. Nəticədə qazanc bir yana, mövcud qiymət fermerlərin xərclərini də qarşılamır.

Xərclərə gəlincə 1 hektar əraziyə çəkilən xərc çiyələyin əkildiyi sahədən asılı olaraq dəyişir. Çiyələk 2 tip sahədə - açıq sahələrdə və parniklərdə əkilir. Cəlilabad rayonuda çiyələk əkini ilə məşğul olan fermer Rövşən Əzizovun dediyinə görə 1 ha ərazi üçün açıq sahələrə 15 min manat, parniklərdə isə 30-35 min manat xərc çıxır. Başqa bir fermerin sözünə görə sıfırdan başlayaraq 1 hektar qapalı örtülü çiyələk ərazisi yaratmaq üçün 65 -70 min manat pul xərcləndiyini vurğulayır. Xərclər sahəni necə qurmaqdan asılı olaraq dəyişir.

Xərclərin artdığını vurğulayan fermerlər bildirirlər ki, işçi qüvvəsi də bahalaşıb - keçən il işçi qüvvəsi üçün 1 fəhləyə 16-17 manat xərc çəkirdilərsə, bu il həmin məbləğ 20-25 manat aralığında dəyişir. Bundan başqa aqro texniki xidməti xərclərinin də artması fermerlər üçün müəyyən çətinlik yaradır.

Çiyələk əkini ilə məşğul olan fermerlərin çiyələk sahəsi azı 1 hektardan başlayır. Qeyd edək ki, ümumulikdə Cəlilabad rayonunda 560 hektar sahədə çiyələk əkini aparılıb. Bu rəqəm ötən ilki göstəricidən 55 hektar çoxdur. Bu sahədə iri biznes sahibi olan Mirismayıl bəyin dediyinə görə onun şəxsi 8 hektar əkin sahəsi və ətrafında isə 40 hektar əkdirdiyi sahəsi var. Onun sözlərinə görə mövsümün başladığı 15 gün ərzində nəinki gəlir qazanıb, əksinə, artıq 300 000 manat zərər edib.

Başqa bir fermer - 3 hektar ərazisi olan İbarət Şahbazovun dediyinə görə əgər satışlar qaydasında getsəydi və qiymətlər bu səviyyədə enməsəydi bu zaman 50-60 min aralığında gəlir qazana bilərdi. 30 hektar ərazisi olan fermer İsgəndər bəy isə 150-200 min gəlir gözləyirdi.

Fermerlər qiymətlərin kəskin ucuzlaşmasını bir sıra amillər ilə əlaqələndirirlər. Fermer Tural bəy məhsulun qiymətinin ucuzlaşmasını bazarda olan təlabatla əlaqələndirir. Belə ki, onun dediklərinə görə Rusiya bazarında təlabat yoxdur, xüsusilə Krasnodarda yetişdirilən, eləcə də Rusiyaya başqa ölkələrdən Serbiya, Türkiyə və Yunanıstandan gətirilən çiyələyin indiki qiyməti çox aşağıdır.

Digər bir fermer Mirəkrəm bəyin dediyinə görə Rusiyada çiyələyin sataşandakı problemlərin bir hissəsi siyasi məsələlərlə bağlıdır. Onun fikrincə, bir neçə həftə əvvəl «Krokus» əyləncə mərkəzində baş verən terror aktından sonra Rusiyada taciklərə qarşı yoxlamalar artıb. Nəticədə onların bir hissəsi ölkəni tərk etməli olub. Bazardarda isə bəzi məhsulların, o cümlədən çiyələyin satışını taciklər təşkil edirdi. Nəticədə çiyələk satışı sistemi də pozulub.

Bəs çiyələk neçəyə olsa fermerlər üçün sərfəlidir?

Bir çox fermerin dediyinə görə çiyələyin qiyməti 2 manat olsa fermerlərə sərf edər və gəlir qazana bilərlər. Fermer Mirismayıl bəyin xarici bazarda olan qiymətlə bağlı fikirinə əsasən çiyələyin qiyməti xarici bazarda 250 rubldan yuxarı olsa gəlir gətirə bilər. Yerli bazara məhsul verən fermerlərdən İsgəndər bəyin dediyinə görə çiyələyin bağdan çxıış qiyməti yəni «bağdan yığıldı və satıldı» - ən azı 1,50 manat olmalıdır, bundan aşağı olmamalıdır.

Mövcud vəziyyətdə fermerlərin çoxu gələn il ilə bağlı nikbin fikirdə deyillər hətta bəziləri bu sahədən əl götürmək istəyirlər.

Fermer İsgəndər bəyin 30 hektar ərazisi var və fermer gələn il istəyir ki, çiyələk sahəsini azaltsın. Başqa bir fermer İbarət Şahbazov artıq intensiv bağ salmaq fəaliyyəti ilə məşğul olmaq istəyir, eyni zamanda çuğundur əkməyi planlaşdırır.

Qeyd edək ki, çiyələk biznesinin yüksək gəlirliliyi nəticəsində fermerlər bu sahədə ciddi yeniliklər tətbiq edirlər. Bəzi fermerlər mütəmadi olaraq Avropada olur, yeni tincglər və daha məhsuldar növlər gətirirlər. «Həmin sortların məhsuldarlığı yüksək olsa qiymət aşağı olsa belə çox məhsul sataraq çətin vəziyyətdən çıxmaq olar».

Ümummilli lider Heydər Əliyevin Azərbaycan üçün gördüyü işlərin nəticəsini, onun xalqımızın rifahı üçün fəaliyyətini bu gün hər bir vətəndaşımız hiss edir: "Məhz ümummilli lider Heydər Əliyevin qətiyyəti sayəsində Azərbaycan mustəqil dövlət kimi möhkəmlənib, ölkəmiz inkişaf edib. Ulu Öndər Heydər Əliyevin xalqımız üçün xidmətləri danılmazdır. Onun Azərbaycanda hakimiyyətə qayıdışından sonra ölkəmizdə bütün sahələrdə həm inkişaf baş verib, həm də uzunmüddətli perspektiv açılıb.
Ulu Öndər müstəqil Azərbaycanın sosial-iqtisadi və siyasi əsaslarının möhkəmləndirilməsində, dünyanın aparıcı dövlətlərinin etibarlı tərəfdaşına çevrilməsində, sözün həqiqi mənasında, böyük işlər gördü. Heydər Əliyev millətini bütün bəlalardan hifz edərək qoruyub, respublikada ictimai-siyasi sabitliyi təmin etdi, vətəndaş qarşıdurmasını aradan qaldırıb, ölkənin parçalanmasının qarşısını almaqla milli qurtuluşu təmin etdi. Heydər Əliyevin sayəsində yeni yüzilliyə, həm də yeni minilliyə müstəqil dövlət kimi qədəm qoymaq tariximizdə ilk dəfə baş verdi və bu, əbədi proses olacaqdır.
“Mənim həyat amalım bütün varlığım qədər sevdiyim Azərbaycan xalqına, dövlətçiliyimizə, ölkəmizin iqtisadi, siyasi, mənəvi inkişafına xidmət olub” - deyən Ulu Öndər Heydər Əliyevin dövlətçiliyimizin ən ağır günlərində göstərdiyi qətiyyət bu sözlərdəki gerçəkliyi dəfələrlə təsdiqləmişdir.
Uzun illər keçəcək, lakin çiçəklənən Azərbaycanın vətəndaşları dövlət müdrikliyi və sarsılmaz mətinliyi sayəsində Azərbaycanın gələcəyini təmin etmiş bu dahi insanı unutmayacaqlar.
Əsası Heydər Əliyevin yorulmaz əməyi ilə qoyulmuş bu dayanıqlı inkişaf ölkə başçısı İlham Əliyevin dövlət xadimi istedadı sayəsində davam edir. Prezident İlham Əliyevin həyata keçirdiyi siyasət nəticəsində Azərbaycanın regionun lider dövlətinə çevrilməsi, beynəlxalq birlikdəki yerini möhkəmləndirməsi, söz sahibinə çevrilməsi dünya miqyasında qəbuledilən reallıqdır. Qəti əminliklə deyə bilərik ki, dünyanın ən mötəbər beynəlxalq təşkilatlarının üzvü olan Azərbaycanda əldə edilən bu uğurlar dövlətimizin apardığı düzgün siyasət və xalqımızın zəhməti, əzmi, iradəsi hesabına qazanılmışdır.
Bu gün xalqımız əmindir ki, müstəqil Azərbaycan Heydər Əliyev ideyaları işığında Prezident cənab İlham Əliyevin rəhbərliyi ilə daha yüksək zirvələr fəth edəcək.

Aysel Mənsimova - politoloq

Dərnəgüldəki "Azpetrol"dan 10 litr benzin vurdum. Qısa bir məsafə getdikdən sonra maşın titrəməyə başladı. O dərəcədəki, düşündüm, bəlkə benzin yerinə dizel vurublar. Geri qayıdıb baxdım ki , ümumiyyətlə dizel pompası yoxdur. Ustalardan soruşdum, "benzin çox bərbad olduğu üçün baş verib" dedilər.

Bu barədə sosial şəbəkə istifadəçilərindən biri bildirib.

"Yanacaqdoldurma məntəqələrinə nəzarət edən hansısa bir qurum var? Bu kimi hallarda şikayət edib nəticə alaq ki, özbaşınalıqlar davam etməsin", - o qeyd edib.

Müştəri "Azpetrol"dan onunla əlaqə saxlanıldığını bildirib: "Əməkdaş gəldi, görüşdü. Deyir ki, gedək həmin məntəqədən nümunə benzin götürüb analizə göndərək, bizdə qatqı çıxmayacaq. Deyirəm, iki gün keçib, həmin benzin qalıb, ya yox, bəlli deyil, buyurun, mənim maşınımdan götürüb analizə göndərin. Razı olmadı. Qısacası, bir çox müəssisə kimi "Azpetrol"un da yola verməklə məşğul olduğu aydın oldu".
Qarşı tərəfin də mövqeyini dərc etməyə hazırıq.

Referans.az

Dövlət Gömrük Komitəsi Tovuz Gömrük İdarəsində əməliyyat keçirilməsi ilə bağlı məlumatlara aydınlıq gətirib.

Bir sıra kütləvi informasiya vasitələrində Dövlət Gömrük Komitəsinin müvafiq strukturları tərəfindən Tovuz Gömrük İdarəsində əməliyyat keçirilməsi ilə bağlı məlumatlar yayımlanıb.

Məsələ ilə bağlı komitə diqqətə çatdırır ki, qurumun Əməliyyat-İstintaq Baş İdarəsi tərəfindən enerji içkiləri və digər məhsulların qaçaqmalçılıq faktı aşkarlanıb, faktla bağlı cinayət işi başlanılıb və istintaq aparılır.

DGK qeyd edilən məsələ ilə bağlı yayımlanan xəbərlərdə Komitənin məlumatlarına istinad etmək tövsiyə edir.

***

Dövlət Gömrük Komitəsinin Əməliyyat İstintaq Baş İdarəsi tərəfindən əməliyyat keçirilib.

Bakupost.az -ın məlumatına görə, əməliyyat yoxlaması zamanı gömrük əməkdaşlarının qeyri-qanuni əməlləri aşkar edilib.

Aydın olub ki, gömrükçülər Azərbaycanı tranzit ölkə kimi keçən TIR-lar Tovuz Gömrük İdarəsinin cavabdeh olduğu ərazidə yoxlanaraq, onlardan külli miqdarda “RedBull” və bu kimi məhsullar boşaldılıb. Daha sonra sənədlər dəyişdirilərək, yük maşınları boş yola salınırmış.

Həmçinin, yoxlama zamanı Gömrük İdarəsində digər qanun pozuntuları da ortaya çıxıb.

Məsələ ilə bağlı Tovuz Gömrük İdarəsinin rəisi Elçin Şabanov dindirilmə üçün Bakıya gətirilib. Araşdırma aparılır. Qeyd edək ki, Elçin Şabanov iyun ayında Tovuz Gömrük İdarəsinin rəisi vəzifəsinə müvəqqəti təyin olunub.

2023-cü ildə Bakı üzrə keçirilən direktor müavinlərinin işə qəbulu imtahanında 62 bal toplayan informatika müəllimi Lətifə Həbibullah qızı Qəhrəmanova iddia edir ki, müsahibə mərhələsi qeyri-şəffaf olub.

Vətəndaş Meydan TV-yə açıqlamasında baş verənlərdə Bakı Şəhəri üzrə Təhsil İdarəsinin (BŞTİ) müdir müavini Anar Məmmədovu günahlandırıb:

“İlk müsahibədə məndən tədrisin təşkili sahələrini soruşdular. Cavabım nədənsə Anar Məmmədovu qane etmədi. Dedilər ki, müsahibədən 1,5 bal toplamısınız. Təhsildə Keyfiyyət Təminatı Agentliyinə müraciət edəndən sonra məni ikinci dəfə müsahibəyə çağırdılar. Bu dəfə də müxtəlif bəhanələrlə mənə mane oldular. Dedilər ki, 0,78 bal toplamısan. Yəni 1 bal da toplamamışam. 34 ilin müəllimi test mərhələsində 62 bal topladığı halda, müsahibədən 1 bal toplaya bilməməsi absurddur”.

BŞTİ-dən Meydan TV-yə bildirilib ki, Lətifə Qəhrəmanova ümumi təhsil müəssisələrində təlim-tərbiyə işləri üzrə direktor müavini vəzifəsinə işə qəbul üzrə müsabiqənin imtahan mərhələsində müsbət nəticə əldə etsə də, müsahibə mərhələsində mümkün 5 baldan yalnız 1,15 bal toplaya bilib.

Bildirilir ki o, 2024-cü il aprelin 16-da müraciəti əsasında BŞTİ-nin müdir müavini Anar Məmmədov tərəfindən qəbul edilib.

“Qəbulun nəticəsi olaraq ona yenidən müsahibədə iştirak etmək imkanı yaradılıb. Təkrar müsahibədə “Təhsil sahəsinə aid olan qulluqçu vəzifələrinin Vahid Tarif-İxtisas Sorğu Kitabçası”ndakı təlim-tərbiyə işləri üzrə direktor müavini vəzifəsi üzrə əmək funksiyaları və ixtisas tələblərinə uyğun olaraq suallar verilib. Həmin müsahibədə namizəd mümkün 5 baldan 0,78 bal toplayaraq uğur qazanmayıb”, – BŞTİ-nin məlumatında deyilir.

Əlavə olunur ki, müsahibə mərhələsində komissiya üzvləri tərəfindən qəbul edilmiş qərara əsasən 5 ballıq şkalaya uyğun olaraq 2-2,99 bal toplamış namizədlər əlavə təlimdən sonra təkrar müsahibəyə cəlb edilir.

“3-5 bal arası nəticə göstərən namizədlər müsahibədən uğurla keçib. 0-1,99 bal nəticə göstərən namizədlər isə uğur qazanmamış hesab olunurlar. Şəffaf seçimlərə əsaslanan müsabiqədə uğur qazana bilmədiyinə görə adekvat olmayan təsir vasitələrinə (əsassız ittihamları ictimailəşdirmək, özünü qanunvericiliyə uyğun olmayan statusda təqdim etmək və s.) əl atmaq pedaqoji sahədə rəhbər vəzifədə çalışmaq istəyən namizədə uyğun davranış norması deyil. Lətifə Qəhrəmanovaya tövsiyə olunur ki, növbəti müvafiq işə qəbul müsabiqələrinə qatılaraq özünü sınasın”, – BŞTİ-nin Meydan TV-nin sorğusuna cavabında bildirilib.

Məcburi köçkün Yusifov Rafiq Məhəmməd oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi saytımız vasitəsilə Prezident İlham Əliyevə və Birinci vitse-prezident Mehriban Əliyevaya müraciət edir:

“Mən, Yusifov Rafiq Məhəmməd oğlu, yazaraq sizdən xahiş edirəm ki, problemimi işıqlandırasınız.

Hazırda müvəqqəti olaraq Abşeron rayonu, Xırdalan şəhərində yaşayıram. Qeyd edim ki, Abşeron Rayon Məhkəməsi və Sumqayıt Apellyasiya Məhkəməsi mənim başıma oyun açıb. Məhkəmə mənim verdiyim sənədləri işin içərisindən çıxarıb və bir neçəsini də saxtalaşdırıb.

Məsələ ilə bağlı bir çox dövlət qurumlarına müraciət etmişəm. Lakin mənim adımdan alınan saxta arayışların hansının düzgün olub-olmadığını heç bir qurum təsdiq etmədi.

Cənab Prezident!

Mən Sizdən və Birinci xanımdan kömək istəyirəm. Xahiş edirəm ki, tapşırıq verin, işimə doğru-düzgün baxılsın.

Məhkəmələrdə qanunsuzluq, saxtakarlıq baş alıb gedir. Onlardan yuxarıda bir qurum yoxdur ki, şikayətimizi edək. Mənim adımdan alınmış saxta arayışlar Abşeron rayon İcra Hakimiyyəti və Abşeron Rayon Polis İdarəsi tərəfindən araşdırılıb və bilinir ki, sənədlər saxtadır. Ancaq bu haqda şikayətimi heç bir qurum qəbul etmir.

"JEK"-dən verilmiş saxta sənədi sübut gətirərək, mənim əleyhimə qərar verirlər".

Jalə FAMİLQIZI

Redaksiyadan: Qarşı tərəfin mövqeyini dərc etməyə hazırıq.

Qeyd: Şikayətçinin redaksiyamıza göndərdiyi video-müraciəti də olduğu kimi təqdim edirik:

Ötən aylarda Lerik sakinlərini rayondaxili yolların təmiri ilə bağlı şikayətini dərc etmişdik.

Həmin şikayətdə sakinlər bildirirdilər ki, bir müddət öncə rayondaxili yolların təmiri və yeni asfalt çəkilməsi üçün Lerik rayonuna dövlət büdcəsindən 1.200 000 (bir milyon iki yüz min) manat vəsaiti ayrılıb, amma təyinatı üzrə xərclənməyib.

Onlar iddia edirdilər ki, ayrılmış bu pulun Rayon İcra Hakimiyyətinin başçısı və Yol İstismar İdarəsinin müdiri Elxan Əliyev tərəfindən necə və hansı yollarla mənimsənildiyi məlum deyil.

Rayon sakinləri "Anaxeber.info"ya deyiblər ki, bu şikayətdən sonra rayonda bir neçə küçədə yollara görüntü xatirinə alfalt örtüyü çəkilib. Halbuki Lerik rayonunda bərbad vəziyyət və keçilməz halda olan ara küçələrin sayı yüzlərlədir.

Sakinlər deyirlər ki, asfaltlanmış 3 küçə isə rayonda icra başçısına yaxın olan, onun əsas "ideoloq"larından sayılan İmanovlara məxsusdur.

İcra başçısı Əkbər Abbasovun "ağsaqqalı" sayılan rayon maliyyə idarəsinin rəisi Hafiz İmanovun, Su- Kanalizasiyya İdarəsinin müdiri Asif İmanovun atasının evinə gedən küçə və bu işlərdə başı qalmaqalda olan Rayon Yol İstismar idarəsinin müdiri, İmanovların yaxın qohumu Elxan Əliyevin atasının evinə gedən küçələr az qala evin pilləkəninə kimi asfaltlanıb.

Sakinlər bunu özlərinə gözdağı saymaqla yanaşı, rayon sakinlərinə etinasızlıq kimi də dəyərləndirirlər: "Görünür, əvvəlki rəhbərlərin bu işlərə ya gücü çatmayıb, ya da onların evi olmayıb. Bax, budur, rayonda tərəfbazlıq, mənimsəmə, korrupsiya hallar. Soruşan, maraqlanan yoxdur ki, bu məmurlar sadə vətəndaşlardan nəyi üstündür? Vəzifəsimi? Axı o vəzifə dövlətindir və məmura məhz vətəndaşa xidmət etmək üçün verilir".

Sakinlər ümid edirlər ki, onların şikayətlərinə ölkə rəhbərliyi mütləq reaksiya verəcək və Lerikdəki bu acınacaqlı duruma əncam qılınacaq.