Fərman Məmmədov: "Nəsimi Rayon İcra Hakimiyyətinin memarı Ələsgər Rüstəmov da mənə təzyiq göstərir, o "Gold Star City" tikinti şirkəti ilə əlbir olub mənim və bacımın evini söküblər"

Bugünlərdə redaksiyamıza şikayətlə müraciət edən Bakı şəhəri, Nəsimi rayonu, "Kərpiçni" 49 ünvanında yaşayan Fərman Məmmədov 2023-cü ilin oktyabr ayından etibarən "Gold Star City" tikinti şirkəti tərəfindən müxtəlif formalı təzyiq və təsirlərə məruz qaldığını bildirib.

Şikayətçinin sözlərinə görə, qeyd olunan tarixdə şirkət nümayəndələri yaşadığı ünvandakı evləri söküb, yerində hündür mərtəbəli bina inşa etməyə başlayıb: "Həmin şirkət ötən ilin oktyabr ayından yaşadığımız ərazidəki evləri sökməyə başlayıb. Lakin şirkət nümayəndələri ilə danışığımız alınmadı və mən onların təklifi ilə razılaşmadıq. Aprelin 29-da isə "Gold Star City" tikinti şirkətinin əməkdaşları mənə təzyiq ediblər. Məni onlarla razılaşmağa məcbur etməyə çalışıblar. Halbuki, şirkətin təklif etdiyi şərtlər heç bir halda məni qane etmir. Qeyd edim ki, bunun ardınca Daxili İşlər Nazirliyinin 102 zəng mərkəzinə telefon açıblar və beləcə, məni Nəsimi Rayon Polis İdarəsinin 21-ci polis bölməsinə apartdırıblar. Düzdür, polis bölməsində mənə heç bir təzyiq edilməyib. Lakin məsələ burasındadır ki, şirkətin əməkdaşları mənim polis bölməsində olmağımdan istifadə edərək, evimi söküblər. Bu zaman 84 yaşlı anama və qızıma təzyiq göstəriblər".

Fərman Məmmədov qeyd edib ki, "Gold Star City" tikinti şirkətinin əməkdaşları ailə üzvləri evdə olduğu zaman söküntü işləri aparıblar: "Onlar ailə üzvlərimin evdə olmasına əhəmiyyət vermədən evimi söküblər. Əlimdə bunu təsdiq edən video və foto görüntülər mövcuddur. Onuda nəzərinizə çatdırım ki, Nəsimi Rayon İcra Hakimiyyətinin təsərrüfat şöbəsinin böyük məsləhətçisi, memar Ələsgər Rüstəmov da mənə təzyiq göstərir. O, "Gold Star City" tikinti şirkəti ilə əlbir olub mənim və bacımın evini söküblər. Bir məsələni də deyim ki, həmin şirkətin rəhbəri Rövşən və Aydın adlı şəxslərdir, hamı onları "İmişli uşaqları" kimi tanıyır. Odur ki, sizin vasitənizlə ölkə başçısı, Müzəffər Ali Baş Komandan cənab İlham Əliyevdən, Bakı şəhər İcra Hakimiyyətinin başçısı Eldar Əzizovdan və aidiyyatı qurumların rəhbər şəxslərindən xahiş edirəm ki, üzləşdiyim problemin həllində mənə yardımçı olsunlar".

Qeyd edək ki, yazıda qeyd olunanlarla bağlı "Gold Star City" tikinti şirkətinin mövqeyini işıqlandırmağa hazırıq.


Hurriyyet.az

Azərbaycanın bank sektorunda hələ 2015-ci il devalvasiyasından sonra necə deyərlər, “kimin kim olduğu” daha qabarıq şəkildə üzə çıxmışdı. O vaxt bu sarsıdıcı zərbədən “üzüağ çıxan” az sayda banklardan biri də “Bank Respublika” olmuşdu. Bu da təsadüfi deyildi, çünki bank sektorundakı mənbələrin mətbuata bildirdiyinə görə, onun arxasında, daha doğrusu başında, Mərkəzi Bankın o vaxtkı sədri Elman Rüstəmov dururdu...

Nəticədə “Bank Respublika” ASC-nin də digər banklar kimi zərərinin artmasına və bu səbəbdən məcmu kapitalının aşağı düşməsinə baxmayaraq, bank öz fəaliyyətində elə də böyük problem yaşamadı. Rüstəmov sahibi olduğu bankı bir çox tanınmış özəl banklar kimi iflas və müflis olmaq təhlükəsindən xilas etməyə nail oldu...

Hələ 1992-ci ildə yaradılan bu bankın rəsmən səhmdarları Quliyevlər ailəsidir. Hələ illər öncə mətbuatın yazdığına görə, əsas səhmdarlar - Natiq Quliyev, onun qardaşları Elçin və Namiq Quliyevlə birlikdə Elman Rüstəmovun yaxın adamları (yerli və qohum olduqları deyilir-red.) olmaqla onun Azərbaycanda müxtəlif sahələrə aid biznesini idarə edirlər. Bura Rüstəmova aid bəzi maşın salonları, restoranlar, şadlıq evləri, quşçuluq təsərrüfatı və sair aid edilir...

Hər necə olsa, rəsmi göstəricilərə inansaq, “Bank Respublika” doğrudan da uğurlu layihə hesab oluna bilər. Məsələn, ötən ilin yekunlarına görə, “Bank Respublika” nın ümumi gəlirləri 230 milyon 602 min manat təşkil edib. Bank bu göstərici üzrə ölkənin bank sistemində 5-ci(!) yeri tutur.

Hesabat dövründə bankın gəlirlərinin164 milyon manatı və ya bütün gəlirlərin 71%-i kredit portfelinin gəlirlərindən formalaşıb.Komissiya haqlarından 30 milyon manat daxil olub. Bu, bankın bütün gəlirlərinin 13%-i deməkdir. Valyuta əməliyyatlarından gəlirləri 11 milyona yaxın, yəni, ümumi gəlirlərin 5%-i həcmində olub. Qiymətli kağızlar bazarına yatırımlardan isə bankın gəlirinin 5 milyon manata yaxın olduğu göstərilir. Başqa banklara və maliyyə təşkilatlarına ayırdığı depozitlərdən bank 12 milyon qazanıb. Bankın digər faiz gəlirləri isə 7 milyondan çox olub.

Bütün bunlar Azərbaycan bank sektoru səviyyəsində kifayət qədər yüksək göstəricilərdir. Bəs bu bankın uğurlarında mətbuatın yazdığı kimi, onun əsl sahibi sayılan Elman Rüstəmovun Mərkəzi Bankın sədri vəzifəsindən çıxarılsa da, Baş nazirin müşaviri təyin olunmasının, yəni, formal da olsa, hakim komandada qalmasının, necə deyərlər, “vurulmaması”nın rolu nə dərəcədə böyükdür?

Görünən odur ki, bunun rolu kifayət qədər əhəmiyyətli, bəlkə də həlledicidir. Çünki bank sektoruna aid bundan əvvəlki nümunələr göstərir ki, bankların vəzifədə olan “şef”lərinin “vurulması”ndan sonra qəsdən, yaxud obyektiv olaraq onların durumları tədricən, yaxud dərhal ağırlaşır. Bir çox hallarda bu banklar ya bağlanır, ya “sürünür”, ya da əl dəyişir. Buna Fazil Məmmədovun “Ata bank”-ı, Heydər Babyevin “Bank Standard”ı başda olmaqla bir çox nümunələr göstərmək olar.

O cümlədən də keçmiş Prezident Aparatı başçısı Ramiz Mehdiyevin ailə bankı olan “Bank BTB” nümunəsi var. Mehdiyev vəzifədən ayrıldıqdan sonra bankın xalis mənfəəti demək olar, dərhal 16 milyon 653 min manat azalmış və 2020-ci ilin sonunda 9 milyon 130 min manatlıq zərərə düşmüşdü. Bunun bilərkdən edilib-edilmədiyi əlbəttə başqa söhbətin mövzusudur. Ancaq hər halda, son illəri ziyanla işləyən bankın vəziyyətinin pis olduğu və hətta Mehdiyevin oğlu tərəfindən satışa çıxarıldığı barədə mətbuatda məlumatlar yayılıb...

Təəssüf ki, Azərbaycan iqtisadiyyatı, o cümlədən də bank sektoru üçün bütün bunlar təbii haldır. Bu baxımdan Rüstəmovun olduğu bildirilən bankın, yaxud bu və ya digər məmur-biznesmenlə bağlılığı olan hər hansı başqa bir bankın da nə zamansa eyni aqibəti yaşamayacağına kimsə təminat verə bilməz. Odur ki, böyük ehtimalla iki il əvvəl MB sədrliyindən azad edilən Elman Rüstəmov da (digər “vurulmuş” məmurların aqibətini yaşayarasa) “tam gözdən düşənə” qədər Bank Respublikanın uğurları davam edəcək. Sonrasına isə “Allah kərimdir”...

Rasim Əliyev

“AzPolitika.info”

Sabiq AMEA prezidenti Ramiz Mehdiyevin kürəkəni, keçmiş deputat İlham Əlisəftər oğlu Əliyevin özü-özünü rəhbər təyin etdiyi qərar üzə çıxıb.

27 dekabr 2019-cu il tarixli qərarı imzalayan İlham Əliyev bununla özünü “Dostluq - MK” MMC-nin təsisçisi və rəhbəri müəyyən edib. Belə məlum olur ki, hər il milyonlarla manat gəlir əldə edən “Dostluq - MK” MMC-nin tən yarısını, 50 faizini İlham Əliyev 1 qara qəpik xərcləmədən, pay sahibinin özünə 5 min 600 manat ödətməklə sahiblənib.

“Dostluq - MK” MMC-nin tarixçəsi

“Dostluq - MK” MMC-ni 1 mart 2011-ci ildə şabranlı sahibkar Mansur İbrahimovla YAP-ın Xaçmaz rayon təşkilatının sədri Məhəmməd Balaqadaşovun oğlu Cavid Balaqadaşov təsis ediblər. Cəmiyyətin nizamnamə kapitalı 20 manat məbləğində müəyyən edilib və hər birinin dəyəri 5 manat olmaqla 4 paydan ibarət olub. Təsisçilərin nizamnamə kapitalında payları hərəyə 50 faiz olub.

Həmin günlərdə cibində deputat mandatı gəzdirən İlham Əliyev Şabranda at oynadıb, sahibkar Mansur İbrahimovla xoş-zor şərik olub. Ona ən müxtəlif vasitələrlə təzyiqlər göstərib, 12 hektar fındıq bağını yerlə bir edib, digər meyvə bağlarına da ən müxtəlif vasitələrlə sahiblənib. Belə bir şəraitdə İlham Əliyev Mansur İbrahimovdan “Dostluq - MK” MMC-dəki 50 faiz payını 3 milyon manata ona satmağını istəyib. Biçarə sahibkar razılıq verib.

O, alqı-satqıya gəlmədi, şəxsiyyətinin sürətini vatsapıma yolladı

İlham Əliyev Xaçmazın deputatı olduğundan alqı-satqı müqaviləsi də onun istəyi ilə Xaçmaz rayonu, 1 saylı notariat ofisində olub. Özü notariat ofisinə gəlməyən İlham Əliyev sahibkar Mansur İbrahimova vatsap üzərindən şəxsiyyət vəsiqəsinin surətini göndərib, tapşırıb ki, alqı-satqı müqaviləsində 3 milyon manatlıq sövdələşmə 5 min 600 manat kimi göstərilsin. Yəni Mansur İbrahimova 1 qəpik də vermədən, 5 min 600 manatı Mansur İbrahimovun özünə ödətməklə alqı-satqı müqaviləsi bağlanıb.

Sabiq deputat İlham Əliyev payı aldı, 3 milyon manatı ödəmədi!

İlham Əliyev Mansur İbrahimova deyib ki, 3 milyon manatlıq sövdələşmənin alqı-satqı müqaviləsində göstərilməməsini ödənəcək verginin çoxluğu ilə izah edib. Vəd verib ki, 3 milyon manatı qısa müddətdə ödəyəcək. 5 min 600 manatı da Mansur İbrahimova ödətdirib. Sonradan isə İlham Əliyev Mansur İbrahimovun telefon zənglərinə belə cavab verməyib. Alqı-satqı müqaviləsi 8 avqust 2019-cu il tarixdə bağlansa da, Ramiz Mehdiyevin kürəkəni İlham Əliyev bu günə qədər şabranlı sahibkar Mansur İbrahimovun pulunu ödəməkdən yayınır.

Mansur İbrahimov İlham Əliyevə qarşı Bakı Kommersiya Məhkəməsində də iddia qaldırıb. Onunla cavabdeh Əliyev İlham Əlisəftər oğlu arasında bağlanmış 8 avqust 2019-cu il tarixli, reyestrdə 3M-215 nömrə ilə qeyd edilən müqavilənin etibarsız sayılması barədə qətnamə qəbul edilməsini xahiş edib.

İlham Əliyev məhkəmədə hakimi şoka salan etiraf etdi – 3 milyon vəd verib, 1 qara qəpik də ödəməyib!

Hakim Emin Əliyevin sədrlik etdiyi məhkəmə iclasında İlham Əliyev də qatılıb və Mansur İbrahimova müqavilə üzrə 1 qara qəpik də ödəmədiyini etiraf edib.

Bu etirafı məhkəmə zalında olan hakim Emin Əliyev, məhkəmə katibi, Mansur İbrahimov və onun 2 vəkili, İlham Əliyevin özünün vəkili də eşidib. Hakim dəqiqləşdirici sual verərək İlham Əliyevdən alqı-satqı müqaviləsi üzrə ödəməli olduğu məbləği kimə ödəməsini aydınlaşdırıb. İlham Əliyev isə deyib ki, o, pulu 3-cü şəxsə verib. Lakin həmin 3-cü şəxsin kimliyini açıqlamayıb.

İlham Əliyevin bu ifadəsini Bakı Kommersiya Məhkəməsinin zallarında quraşdrılan video da görüb və eşidib! Qanuna görə həmin video sübut kimi istifadə oluna bilər.

Hakim İlham Əliyevin 3 milyonluq etirafını eşitdi, amma şikayəti təmin etmədi!

Ən maraqlısı da budur ki, İlham Əliyevin belə bir etirafı ortada ola-ola hakim Emin Əliyev Mansur İbrahimovun iddiasını rədd edən qətnamə çıxarıb. Ədalətsiz qətnaməni eşidən Mansur İbrahimov iflic olub.

Sonradan sahibkara təqdim edilən, Azərbaycan dövləti adından çıxarılan qətnamədə İlham Əliyevin etirafından 1 sətir belə bəhs etməyib.

Hakim çıxardığı qətnaməni böyük şübhə altına alan İlham Əliyevin etirafını gizlətməklə tərəfsiz olmadığını da ortaya qoyub!

Mehdiyevin kürəkənini apelyasiya instansiyasında da qalib çıxarıblar

Mansur İbrahimov apelyasiya instansiyasına üz tutub, Bakı Kommersiya Məhkəməsinin qətnaməsinin ləğvini istəyib. Apelyasiya instansiyasında İlham Əliyevin etirafını əsas gətirib, Bakı Kommersiya Məhkəməsində bu etiraf dilə gətirilərkən çəkilmiş videonun tədqiq olunmasını vəsatətlə tələb edib Vəsatət təmin edilməyərək İlham Əliyev apelyasiya instansiyasında da qalib çıxarılıb.

Şabranlı sahibkarın Ali Məhkəmədə də ədalət axtarışları fayda verməyib

Mansur İbrahimov deyir ki, Ali Məhkəmədə də ədalət axtarışları fayda verməyib. Artıq yaxasında deputat “znaçok”u olmayan İlham Əliyevin etirafını bu instansiyada da dinləməyib, qərar veriblər.

Mansur İbrahimov deyir ki, uzun illərdir ki, kənd təsərrüfatı sahəsində çalışıb, bu sahə ilə əlaqəli əksər dövlət tədbirlərində nümunəvi sahibkar kimi dəvət alıb:

“Ümidliyəm ki, mənə qarşı Ramiz Mehdiyevin vəzifədə olduğu illərdə başlanan, bu gün də davam edən haqsızlıqlara nəhayət ki, son qoyulacaq. Mən kənd təsərrüfatı sahəsinə sərf etdiyim zəhməti, qoyduğum sərmayəni bir böyük hipermarket açmağa sərf etsəydim, bu gün başım bu bəlaları çəkməzdi. Ədaləti ölkə daxilində axtardım, amma çox böyük haqsızlıq gördüm. Ali Məhkəmə rəhbərliyinə ümidlərim vardı. Amma orada da Bakı Kommersiya Məhkəməsindən İlham Əliyevin etiraf videosunu tələb edib baxmadılar. İllik 800 min -1 milyon 200 min manat gəlir gətirən MMC-dəki payımı 5 min 600 manata satın alındığına isə inanırlar. Halbuki, həmin 5 min 600 manatı belə bankomata mən ödəmişəm, bu barədə qəbz də əlimdədir. Buna da baxan olmadı”.

Sahibkar bir daha Məhkəmə Hüquq Şurasının sədri İnam Kərimova müraciət edərək ədalətin bərpası üçün köməklik göstərilməsini xahiş edib.

Musavat.com

“SOCAR – AQŞ”-nin sabiq Baş direktorunun barəsində qaldırılan cinayət işində irəli sürülən itihamlar öz təsdiqini tapmır deyə…
…Sıradan bir şəxs olmadığı üçün, onun ictimaiyyət tərəfindən dövlətçiliyimizə vurulan zərbə kimi qəbul edilən həbsinin müddəti dördüncü dəfə uzadılıb
Doğrudan da, artıq on aydır qanunsuz həbsdə saxlanılan, özünü, yazının başlığında çəkdiyimiz yüksək nüfuza malik “SOCAR – AQŞ ” MMC-nin qurucusu kimi tanıdan və 12 il 6 ay bu tanınmış qurumun rəhbəri vəzifəsini daşıyan Ramin İsayevin müəmmalı həbsi ilə bağlı açılmış cinayət işinin ibtidai istintaqında müddətin bu qədər uzadılmasını təkcə onu yaxından tanıyanlar yox, camaat belə qəbul etmək istəmədiyini tutulduğu gündən indiyədək açıq şəkildə bildirib. İctimaiyyətin qəti etirazına baxmayaraq, ötən həftənin son günü məlumatlı mənbə tərəfindən araz.az-ın redaksiyasına daxil olan məlumata görə, ortada it-bata düşdüyü deyilən külli miqdarda kreditlə bağlı şərlənərək, Binəqədi Rayon Məhkəməsinin Qərarı ilə “dəmir barmaqlıqlar” arxasına atılan Ramin İsayevin həbsdə saxlama müddəti 4-cü dəfə, daha 3 ay uzadılıb. Guya, irihəcmli bu iş üzrə ibtidai araşdırmanın yekunlaşması üçün, ötən 10 ay kifayət etməyib. Bu səbəbdən, istintaq orqanının müstəntiqi və ibtidai araşdırmaya prosessual rəhbərlik edən dövlət ittihamçısı prokuror seçilmiş qətimkan tədbirinin uzadılması üçün, dördüncü dəfə məhkəməyə müraciət ediblər. Məhkəmə onların müraciətinə bir daha müsbət yanaşıb.

Məlumatda bildirilir ki, bu işə indiyədək baxan hakim də dəyişdirilib. Dördüncü dəfə bu istintaq işinin uzadılması barədə qərar verən hakim Fərid Əmrullayev olub və apardığı ilk məhkəmə iclası səs-küylü alınıb. Daha doğrusu, məhkəmə iclasında hakimlə, işin gedişi zamanı prosedur qaydaların pozulan çox məqamlarına etirazını bildirən məhkumun vəkilinin arasında insident baş verib. Hətta aralarında yaranan mübahisə zamanı hakim vəkilin üstünə qışqıraraq, onu təhqir edib. Bu isə, sabiq Baş direktorun verdiyi vəsatətlərin qəbuluna hakimlərin belə imkan verməməsinin daha bir təsdiqidir. Əvvəlki məqalələrimizdə qeyd etdiyimiz kimi, saxta iddialar təsdiqni tapmır deyə, bu iş belə uzadılır. Bu isə, ona bir işarədir ki, Ramin İsayevin həbs olunmasının heç bir hüquqi əsası yoxdur.

Xatırladaq ki, Ramin İsayev 2023-cü ilin iyul ayında Baş Prokuror Yanında Korrupsiyaya qarşı Mübarizə Baş İdarəsi tərəfindən həbs edilib. Ona qarşı Cinayət Məcəlləsinin 179.4-cü (mənimsəmə-xüsusilə külli miqdarda) maddəsi ilə ittiham irəli sürülüb. Ramin İsayevlə bağlı əsas ittiham vaxtilə “Azərbaycan Beynəlxalq Bankı” ASC-dən götürülən kreditin it-bata düşməsi ilə əlaqədardır. İş üzrə dəymiş bu ziyan 16 milyon manat hesablanıb. Məhkum həbs qərarı ilə bağlı apellyasiya şikayəti də verib. O, birinci instansiya məhkəməsinin qərarının ləğv edilməsini, məhkəmə zalından sərbəst buraxılmasını xahiş edib. Bakı Apellyasiya Məhkəməsi isə, şikayəti əsassız sayaraq, rədd edib və təqsirləndirilən şəxsin həbsinin davamına qərar verib.

Onu da qeyd edək ki, “SOCAR AQŞ” MMC-ni Ramin İsayev 2007-ci ildə yaradıb. Bu qurum Azərbaycan Dövlət Neft Şirkəti (SOCAR), “Nobel Energy” və “Abşeron Qazma” MMC tərəfindən təsis edilib və kompleks qazma və quyu xidmətlərinin idarə edilməsi ilə məşğul olur. Qurumun qurucu rəhbərinə qarşı irəli sürülən 16 mi­lyon manatdan çox mənims­əmə faktı ilə bağlı əsassız iddialar isə, 2022-ci ilin oktyabr-­noyabr aylarında gen­iş ictimaiyyətin diqqətinə çatdırılıb. Elə, o vaxtdan da, onunla bağlı faktların olduqca saxtalaşdırılması, verilmiş sifarişlər əsasında, barəsində ölkənin media vasitələrində böhtan xarakterli yazıların tirajlanması və digər xoşagəlməz hallar camaatı oldu­qca narahat edən bir məsələyə çevrilib.

Məlum olduğu kimi, problemli aktivləri ilə bağlı istintaq araşdırmaları uzun zaman davam edən “Azərbaycan Beynəlxalq Bankı” ASC-nin İdarə Heyətinin sədri Cahangir Hacıyev həbs olunduqdan sonra, bank rəhbərliyi ilə cinayət əlaqələrində olmuş xeyli iş adamı da cinayət məsuliyyətinə cəlb olunub. Bu da, Ramin İsayevin həbsində maraqlı olan qüvvələrin əlinə fürsət verib. Şər qüvvələr Ramin İsayevin vaxtilə faktiki rəhbəri olduğu “Baghlan Group”la bağlı olan şirkət tərəfindən 2012-2014-cu illər ərzində “Azərbaycan Beynəlxalq Bankı” ASC-dən götürülən kreditin mənimsənilməsini, “dəridən-qabıqdan çıxaraq”, onun boynuna qoydura biliblər.

Halbuki, geri qaytarılmayan bu kreditin Ramin İsayevin mənimsəmə məqsədi ilə götürməsinə dair, istintaqda belə əsaslı faktlar mövcud deyil. Axı, necə də mövcud ola bilər ki, bu qədər pulun it-bata düşə bilməsi gülüş doğurur. Lakin Yusif Cabbarovun qisasçılığa sövq etdiyi “qara qüvvələr” və şər-böhtan şəbəkəsi, iddiaların yalan olduğuna baxmayaraq, Ramin İsayevə qarşı münasibətin dəyişməsinə imkan vermirlər. Konkret desək, şər-böhtan şəbəkəsi dinc durmaq istəmir.

Bütün bunlar çoxlarına məlumdur. Araşdırmalarımız zamanı üzə çıxardığımız fakt, dəlil və sübutlar isə onu deyir ki, Ramin İsayevin həbsində maraqlı olan qüvvələr iyrənc üsullarla ölkə mətbuatında böhtan xarakterli belə məlumatların tirajlanmasına da nail ola biliblər; Guya, “Azərbaycan Beynəlxalq Bankı” ASC-nin fəaliyyəti ilə bağlı istintaq başlayarkən, hüquq-mühafizə orqanları Ramin İsayevin fəaliyyətinə dair araşdırmalar aparıb. Guya, araşdırmalardan yayınmaq, məsuliyyətdən yaxa qurtarmaq üçün, onun ölkəni tərk etməsi, 2022-ci ilin ortalarında Türkiyə vətəndaşlığı alaraq, Ramin adını Ali adına, İsayev soyadını isə, Hakan soyadına dəyişməsi, rəsmi sənədlərdə Ali Hakan kimi qeyd olunması aşkar olunub.

Bu böhtan və yalanları mətbuata ötürənlərin adları çoxdan bizə məlumdur. Bizə o da məlum olub ki, həmin böhtançılar mediaya belə bir yalan da ötürüblər: Guya, Ramin İsayev qalmaqallı keçmişi ilə də məşhurdur və vaxtilə “KCA Deutag” şirkətində region üzrə biznesin inkişafı meneceri kimi vəzifə borclarının öhdəsindən gələ bilməməsi səbəbindən, tutduğu vəzifədən azad olunub. Bundan sonra, şirkət rəhbərliyini hədə-qorxu gəlməklə, təhdid etməyə başlayıb, Böyük Britaniya və ABŞ səfirlərinə müxtəlif məktublar göndərərək, “KCA Deutag” şirkətinin Azərbaycandakı rəhbərliyini şərləməyə çalışıb.

Mətbuat üzərindən apardığımız araşdırmaların son nəticələri də, bu məlumatların mediada dərc olunduğunu təsdiq etdi. Araşdırmalarımız onu da ortaya çıxardı ki, neft sənayesi üzrə peşəkar mütəxəssis olan, beynəlxalq neft-qaz sənayesində uzun müd­dət rəhbər vəzifələ­rdə çalışan, ölkəmizin ən uğurlu biznes idarəçilərindən biri kimi özünü tanıdan Ramin İsayevin potensialından “KCA Deutag” şirkətində işləyərkən də, lazımi səviyyədə istifadə olunub. Bir sözlə, onun bilik və bacarığından bu nüfuzlu beynəlxalq şirkət daha çox faydalana bilib. Axı, dünyanın ən nüfuzlu ali təhsil müəssisələrindən hesab olunan Harvard Universitetində ali təhsilini uğurla başa vuran, vəzifə başında olarkən möhtərəm Prezidentin Sərəncamı əsasında “Tərəqqi” medalı ilə təltif olunan belə bir insana qarşı münasibətin dəyişməməsi, onun taleyinə xoşagəlməz belə bir epizodun yazılması insafsızlıqdır. Bir də ki, beynəlxalq ictimaiyyətin belə yaxşı tanıdığı belə bir şəxsin həbsdə saxlanması xalqımıza və dövlətimizə başucalığı gətirmir. Hamı da bunu deyir ki, onun tükənməyən böyük potensialından, bacarığından və iş təcrübəsindən lazımi məqsədlər üçün istifadə olunması daha yaxşı olardı, nəinki, 2020-ci ildə “SOCAR – AQŞ” MMC-nin Baş direktoru vəzifəsindən azad edildikdən sonra, 2023-cü ilin iyul ayınadək başqa vəzifədə işləyərkən, heç bir əsas olmadan həbs olunaraq, “dəmir barmaqlıqlar” arxasında saxlanması, ona qarşı insanlıqdan kənar bu cür münasibət göstərilməsinin davam etməsi!..

Biz də, öz yazılarımızla elə bunları demək istəmişik. Redaksiyamıza qarşı məhkəmə iddiası qaldıranlar isə, belə deyirlər ki, guya, biz, yuxarıda qeyd etdiklərimizi ortaya çıxarmaqla, şərəf və ləyaqətlərinə toxunub, onları təhqir etmişik. Buna baxmayaraq, bu mövzu ətrafında araşdırmalarımızı davam etdirib, yazılarımızın davamını dərc edəcəyik. Sonda, onu da demək istəyirik ki, yazılarımızda adları keçən hər kəsin söz haqqını tanıyırıq və mövqeyini dinləyə də bilərik.

Əli HÜSEYN,
Fərhad MƏMMƏDOV,
araz.az xəbər portalının xüsusi müxbirləri.

BAŞ REDAKTORDAN:

Dəyərli oxucularımızın diqqətinə çatdırmaq istəyirəm ki, rəhbəri olduğum araz.az xəbər portalı üçün, Ramin İsayevin sifarişli həbsini tezləşdirmək məqsədi ilə, onun üz-üzə qaldığı haqsızlıqları əldə əsas tutan aşağı instansiya məhkəməsinin verdiyi ziddiyyətli Qərardan sonra, bu şəxsin həbsində maraqlı olan və barəsində böhtan xarakterli yazılar tirajladan Yusif Cabbarovla bərabər, “SOCAR – AQŞ”, “NEQSOL Holding”, “Nobel Energy”… şirkətlərinin digər rəs­mi şəxslərindən ittihamlara münasibət öyrənmək müşkül məsələyə çevrildi. Bu bizim üçün məsələnin maraqlı tərəfi olaraq qalsa da, ötən həftə araz.az-ın e-mail ünvanına Bakı Şəhəri Nəsimi Rayon Məhkəməsinin sədri İlqar Qaralovun imzasıyla Məhkəmə Bildirişi daxil oldu. Bu məhkəmə sənədində göstərilir ki, iddiaçılar Vüqar Səmədli, Fuad Behbud, Yusif Cabbarov, İmran Əhmədzadə və Rauf Ağayev tərəfindən, cavabdeh “Araz Media Qrupu” Məhdud Məsuliyyətli Cəmiyyətinə qarşı “şərəf və ləyaqətin müdafiəsi, dəymiş zərərin ödənilməsi” tələbinə dair iddia ərizəsi məhkəmənin icraatına qəbul edilib. İş üzrə şifahi icraat qaydasında keçiriləcək hazırlıq iclası may ayının 15-i saat 11-ə təyin edilib. İşə baxan hakim də, elə, sədrin özü olacaq.

Gülməlidir, vallah! Düzdür, Media Qrupunun tərkibindəki araz.az xəbər portalı bu mövzuda tənqidi yazılar dərc edib. Lakin qələmə aldığımız bu yazılarda onların şərəf və ləyaqətlərinə toxunmağımızdan söhbət gedə bilməz: Bu, doğrudan da belədir və göz qabağındadır! İddiaçıların redaksiyamızı bu iddia ilə məhkəməyə vermələri, guya, onlara vurduğumuz mənəvi ziyana görə, bizdən maddi təzminat istəmə tələbləri düzgün deyil. Bir də ki, bu onların vətəndaşlıq haqlarıdır və bunu etməyə hüquqları çatır. Mənsə, media qurumunun rəhbəri olaraq, onların iddialarına öncədən cavab kimi, bunları bildirmək istəyirəm: Azərbaycan öz müstəqilliyinə qovuşan vaxtlardan üzübəri ölkənin tanınmış “Millət”, “Meridian”, “Təhsil”, “Avrasiya”, “Hər gün”, “Araz”, “İrəvanın səsi”, “Dövlətçilik”, “Ata ocağı”… qəzetlərində, nüfuzlu ATA informasiya agentliyində çalışmışam. Əksəriyyətinin təsisçisi və rəhbəriyəm. Hüseyn Əzizoğlu imzası ilə nələr yazmışam, bunu çoxları bilir. Elə, bunlara görədir ki, iddiaçıların oxşar və xüsusi ittiham qaydasında irəli sürdükləri iddialara rəğmən, artıq, 178-ci məhkəmə iclasında cavabdeh tərəfin rəhbəri kimi iştirak etməyə hazırlaşıram. Şükür başımız üstündəki Böyük Allahımıza ki, heç bir məhkəmə prosesindən məğlub tərəf kimi geri dönməmişik. İnşəallah, yenə belə olacağına tam əminəm. Çünki ədalətli məhkəmə araşdırmaları da, həmişə müəyyən edir ki, yazılarımızın mövzusundakı əsas motiv heç kəsin şərəf və ləyaqətinə qarşı köklənmir. Çünki hüququ pozulanlara və incidilənlərə təmənnasız dəstək adlarını çəkdiyim media vasitələrinin əsas ideya və məqsədləridir. Bu ideya ətrafında birləşənlər Ramin İsayevi də, öz yazıları ilə müdafiə etməyə qərar veriblər. Çünki dərin jurnalist araşdırmaları ilə, artıq, mətbuat əməkdaşları olaraq, bizə də, bu müəmmalı həbsdəki ziddiyyət dolu qaranlıq məqamların işıq saçan çox səbəbləri məlum olub. Bu səbəbdən, bu yazılarımızda da, konkret olaraq bunu demək istəmişik ki, bəyəm, indi “Molla Nəsrəddin” jurnalı çıxan dövrdür ki, bu dərginin yaradıcıları kimi, “SOCAR – AQŞ” kimi nüfuzlu bir neft qurumunun qurucu rəhbəri də, eyni aqibətlə üzləşsin, cəza və mənəvi əzab-əziyyət çəkməyə məruz qalsın?! Axı, hər qaranlıq gecənin mütləq işıqlı bir sabahı olmalıdır!

araz.az xəbər portalı.

Elm və Təhsil Nazirliyi “Edumedia-Azərbaycan” MMC (VÖEN – 1401897631) ilə 3 satınalma müqaviləsi imzalayıb.

Yeniavaz.com xəbər verir ki, bir mənbədən satınalma metodu əsasında imzalanan müqavilələrin ümumi dəyəri 3 milyon 390 min manat olub.

Elm və Təhsil Nazirliyi “Yeni dərslik və metodik vəsaitlərin hazırlanması” üçün 1 milyon 720 min manat, “Peşə təhsili üzrə dərsliklərin hazırlanması” üçün 1 milyon 60 min manat, “Cambridge University Press” nəşriyyatının 5-ci və 6-cı siniflər üçün “Game Changer” adlı ingilis dili dərsliyi və müəllim vəsaitinin qeyri-müstəsna istifadə hüquqlarının alınması” üçün isə 610 min manat ödəniləcək.

Məlumat üçün bildirək ki, “Edumedia-Azərbaycan” MMC 13 yanvar 2011-ci ildə dövlət qeydiyyatına alınıb. Nizamnamə kapitalı 60 manat olan MMC Nəsimi rayonu, 20 Yanvar, ev 19B, m. 29 ünvanında yerləşir. MMC-nin qanuni təmsilçisi Abasov Orxan Rafiz oğludur.

"TƏBİB-in İcraçı direktoru Vüqar Qurbanov keçən günlərdə mətbuata açıqlama verdi ki, bəz o, əyalət rayonlarına tibbin səviyyəsinin qalxmasında maraqlıdır və istəyir ki, rayon sakinləri xəstələnən kimi durub Bakıya gəlməsinlər. Yaxşı... gözəl fikirlərdir. Bəs niyə bizim Ağstafaya da eyni qaydada tətbiq olunmur bu ideya?"

Qeyd edək ki, bu gün Ağstafa rayonunun sakinləri həkim çatışmazlığından əziyyət çəkir. Bu barədə dia-az.info-ya daxil olan müraciətdə də belə anlaşılır. Və artıq bir dəfə bu məsələ ilə bağlı redaksiyamıza üz tutan sakinlər TƏBİB sədrinin məlum açıqlamasından sonra yenidn müraciət ediblər və bu dəfə ölkə rəhbərliyindən xahiş edirlər ki, Ağstafa rayonunda səhiyyənin inkişafı dövlətin prioritet məsələsi kimi gündəmə gəlsin, ÇÜNKİ...

Onların sözlərinə görə, xüsusən ultrasəs müayinəsi edən radioloq həkimlərin azlığı günlərlə növbə gözləməyə səbəb olur.

Sakinlər adından dia-az.info-ya daxil olan müraciətdə daha sonra deyilir:

“Ağstafa Mərkəzi Xəstəxanasında ultrasəs müayinə aparatı yoxdur, həmçinin həkim də yoxa çıxır. Bizə Qazax rayonuna getməyimizi deyirlər. Oraya getdiyimiz zaman isə həkim tapa bilmirik. Həm də hər rayonun həkimi öz sakininə qulluq edir. Biz isə kənardan gəlməyimizə baxmayaraq, ya qəbul olunmuruq, ya da gec qəbul olunuruq. Yəqin TƏBİB-in hörmətli rəhbəri Vüqar müəllim bunu nəzərə alacaq”.

Daha sonra isə ölkə rəhbərliyinə müraciət edən sakinlər sual edir: "Vüqar Qurbanov deyir ki, xəstələr Bakıya gəlməsin... BƏS HARA GEDƏK?"

İş adamı Fərəməz Məmmədovun keçmiş dostu bazarın 35 faizinə iddia edir…

“Hürriyyət” qəzetinin 16 aprel, 2024-cü il sayında “Dövlət büdcəsini talan edən qardaşlar azadlıqda…” sərlövhəli yazı dərc etmişdik. Həmin yazıda “Alatava-2 Avtonəqliyyat” Səhmdar Cəmiyyətinin qeyri-rəsmi sahibləri - Fərəməz Məmmədov və Qalib Məmmədov qardaşlarının dövlətin milyonlarla manat vəsaitini talan etməsi ilə bağlı məlumat verilirdi. Qeyd olunurdu ki, bu haqda çoxsaylı faktlar aşkarlansa da, qardaşlar onları himayə edən məmurların hesabına hələ də “toxunulmaz” qalıblar.

Məsələ ilə bağlı “Hürriyyət”ə müraciət edən Bakı sakini Əliyev Yusif Lətif oğlu da Fərəməz Məmmədov və Qalib Məmmədovun qanunsuz əməllərindən bəhs edib. O deyir ki, Məmmədov Fərəməz Nurulla oğlu ilə keçmişdə dost olublar: “1986-cı ildə Zaqataladan Bakıya köçəndən sonra, onunla birgə iş görmüşük. Sonra, 1998-ci ildə mən özüm üçün Babək prospektində 70 min dollara 2 hektar yer almaq istəyirdim. Fərəməz dedi ki, oranı alma, mənim qardaşımın Tariyel adlı tanışı var, yaxşı yer satır, gedək oranı alaq. Bildirdi ki, həmin yer şəhərin mərkəzində “daş bazarı” kimi fəaliyyət göstərir. Getdik, o, bizi Tariyel müəllimlə tanış etdi, onunla danışıb razılaşdıq.

Məlumat üçün deyim ki, həmin yer onun icarəsində idi. O vaxt qərar vardı ki, kim hansı ərazini icarəyə götürübsə, oranı özəlləşdirə bilər. Tariyel müəllimin də həmin yeri özəlləşdirməyə maddi imkanı yox idi, ona görə şərikli işləməyə razılıq vermişdi.

Beləliklə, razılaşmaya əsasən, özəlləşdirmə olmalıydı, həmin yerin 30 faizi Tariyel müəllimə verilməli, qalan 70 faiz də Fərəməzlə mənim armada tən yarı (hərəyə 35 faiz) bölünməli idi.

Həmin günün səhərisi 70 min dollar mən, 60 min dollar da Fərəməz qoydu, yerin özəlləşdirilməsi üçün aparıb həmin pulu keçmiş nazir Barat Nuriyevin Mübariz adlı köməkçisinə verdik. 30 min manat da borcumuz qaldı. Sonra iş gördükcə həmin vəsaiti də hissə-hissə ödədik”.

Yusif Əliyev

Yusif Əliyev deyir ki, özəlləşmə prosesi yubansa da, bir müddət birgə işləyiblər: “Mən orda mağazalar, avtomobil təmiri sexləri tikdirdim. Onlar həmişə mənə deyirdilər ki, biz 5 qardaşıq, sən bizim altıncı qardaşımızsan. Sonra Fərəməz və qardaşı üzümə durdu ki, sən bura şərik deyilsən. Onlar Tariyel müəllimin də, mənim də haqqımı dandılar. Mən yatsam yuxuma da girməzdi ki, onlar belə şey edə bilərlər. Deyəndə ki, sən bu yerə ortaq deyilsən, cavab verdim ki, deyəsən siz çaşmısınız…

Həmin vaxt onların barəsində cinayət işi açılmışdı, külli miqdarda dövlət əmlakını talan etmək ittihamı ilə axtarışda idilər. Bu zaman Fərəməz kağız üzərində həyat yoldaşından ayrıldı ki, sabah bir şey olsa əmlaklarına həbs qoyulmasın. Bütün əmlakları da kağız üzərində ayrıldığı arvadının adına keçirdi(Bütün bunlarla bağlı ötən yazımızda məlumat vermişik – müəl.).

Mən bunlara qarşı mübarizə aparandan sonra Fərəməz ortalığa çıxmadı, aranı qardaşı qatırdı. Onun həmin vaxt da çox böyük maddi imkanı vardı”.

Şikayətçi deyir ki, bu hadisələrdən sonra, 2000-ci ildə ortaqlığı bitirmək qərarına gəlib: “Fərəməzə dedim ki, ayıb olsun sənə, mən gedirəm, payıma düşəni verin. O dedi ki, yox, sən gedə bilməzsən, biz qardaşıq. Dedim yox, siz qardaşlığı keçdiniz, qardaş belə hərəkət etməz.

Bundan sonra Qalib gəlib dedi ki, bizim sənə borcumuz yoxdur, amma 70 min dollar verdiyin üçün, hörmət edib sənə 70 min manat qaytararıq. Bunun da 50 min manatını veririk, qalan 20 mini də sənin “yaxşı oğlan” kimi təqdim etdiyin şəxs bizə 20 min manat “atdığına” görə, onunla əvəzləyirik.

Hansı ki, həmin adamla 5 il işləmişdilər. 5 ildən sonra deyir ki, o, bizə 20 min manat atıb, həmin 20 mini də mənə verəcəkləri puldan çıxdılar. O pulu da Qalibin bacanağı gətirib verdi ki, götür, sən onsuz da onlara heç nə edə bilməyəcəksən”.

Y.Əliyev deyir ki, həmin vaxt sənədə imza atıb 50 min manat götürsə də, hazırda həmin yerin 35 faizinə iddialıdır. Onun sözlərinə görə, 1998-ci ildəm həmin yerin özəlləşdirilməsini gözləsələr də, cəmi 6 ay öncədən “daş bazarı”nı özəlləşdirməyə başlayıblar: “Amma indiyədək həmin yer istifadə olunub, müəyyən şəxslərə icarəyə verilib. Hazırda da bu ərazidə tikinti materialları satılır. Bir hissəsi isə dayanacaq kimi istifadə olunur. Amma bu müddət ərzində gəlirdən mənə bir qəpik də pul verməyiblər”.

Şikayətçinin sözlərinə görə, həmin ərazi təxminən 4 hektardır və indiki bazar qiyməti ilə 20 milyon manata yaxın pul edir və bu vəsaitin 35 faizi onun haqqıdır: “Onları məhkəməyə vermədim. Bilirdim ki, bütün hallarda qərar onların xeyrinə çıxarılacaq. Onların geniş imkanları var, məhkəmədən də güclüdürlər”.

(Ardı var)

Hazırladı: KƏNAN

P.S. Növbəti məqalələrimizdə Fərəməz Məmmədov və qardaşı Qalib Məmmədovun dövlət əmlakını necə talamaları, hansı məmurlar tərəfindən himayə olunmaları, eləcə də öz himayədarları hesabına daha hansı şəxslərin külli miqdarda pulunu və əmlakını ələ keçirmələri haqda geniş yazacağıq.

P.P.S. Qarşı tərəfin mövqeyini də dərc etməyə hazırıq.