Bəhreyn kralı Həməd bin İsa Əl Xəlifə Rusiyaya rəsmi səfərə gəlib.

Bu barədə TASS məlumat yayıb.

Bildirilib ki, o, Rusiya Prezidenti Vladimir Putinlə danışıqlar aparacaq.

Bir qrup Avropa ölkəsi Fələstini bölgəyə sülh gətirməyə kömək edəcəyi ümidi ilə bir dövlət kimi tanıdıqlarını elan etdikdən sonra Fransanın xarici işlər naziri Stefan Sejourne Fələstinin hələ rəsmi tanınma şərtlərini yerinə yetirmədiyini bildirib.
Sejourne açıqlamasında, Fransanın bu qərarın prosesə real təsir göstərməsi üçün lazımi şərtlərin hələ yerinə yetirildiyini düşünmədiyini bildirib.

“Bu, sadəcə olaraq simvolik bir məsələ və ya siyasi mövqe məsələsi deyil, sülh və təhlükəsizlik şəraitində yaşayan iki dövlətin həllinə xidmət edən diplomatik bir vasitədir”, – deyə Stefan Sejourne qeyd edib.

Böyük Britaniyanın Baş naziri Rişi Sunak bu gün kabineti ilə iclas keçirdikdən sonra ölkədə iyul ayı üçün növbədənkənar seçkilər elan edib.

Publika.az xəbər verir ki, Rişi Sunak jurnalistlərə açıqlamasında növbədənkənar seçkilərin iyulun 4-də keçiriləcəyini deyib.

O, Kral Çarlzdan parlamentin buraxılması üçün icazə istədiyini və parlamentin növbəti həftə buraxılacağını deyib.

Bir çox Avropa ölkələri Rusiyaya zərər vermək fikrinə o qədər aludə olublar ki, bunun üçün öz ziyanlarına hərəkət etməyə hazırdırlar.
Aİ-nin yaşıl siyasəti uğursuzluğa məhkumdur. Əgər Brüssel Rusiya uranının idxalını qadağan etmək qərarına gəlsə, onun üçün xüsusi olaraq Rusiyadan olan yanacaqdan ötrü nəzərdə tutulmuş reaktorların təhlükəsizliyini təmin etmək çətin olacaq.
Bu fikri Rusiya Xarici İşlər Nazirliyinin birinci Avropa departamentinin direktoru Artem Studennikov bildirib.
Bundan əvvəl Belçikanın energetika naziri Tinne van der Straten ölkəsinin Rusiya Federasiyasından atom elektrik stansiyaları üçün uranın tədarükündən ötrü yeni müqavilələrin bağlanmasına qarşı ümumavropa səviyyəsində çıxış etməyə hazır olduğunu bəyan edib.
Rusiya Xarici İşlər Nazirliyinin rəsmisi vurğulayıb ki, Belçika və bir çox digər Avropa ölkələri Rusiyaya zərər vermək fikrinə o qədər aludə olublar ki, bunun üçün öz ziyanlarına hərəkət etməyə hazırdırlar.
Studennikov "RİA Novosti" ilə söhbətində qeyd edib: "Eyni intihar məntiqi - Avropa İttifaqında yerləşən atom elektrik stansiyaları üçün Rusiya uranının alınması üçün yeni müqavilələrin imzalanmasını qadağan etmək istəyindədir".
O xatırladıb ki, Belçika hökuməti sanksiyaların doğurduğu enerji böhranı səbəbindən atom elektrik stansiyalarının istismar müddətini birbaşa 10 il, 2035-ci ilə qədər uzatmaq məcburiyyətində qalıb.
"Lakin hətta bunu nəzərə alsaq belə, qarşıdakı istilik mövsümlərində güclü istilik çatışmazlığı və yüksək elektrik tariflərinin davam edəcəyi proqnozlaşdırılır" - diplomat sözünü yekunlaşdırıb.
Xatırladaq ki, mayın 13-də ABŞ Prezidenti Co Bayden Rusiya uranının idxalını qadağan edən qanunu imzalayıb. Rusiya Mühəndislər İttifaqının birinci vitse-prezidenti İvan Andrievskinin fikrincə, bu qərar ABŞ-da nüvə reaktorlarının bağlanmasına səbəb ola bilər.
Sputnik.

İranda növbədənkənar prezident seçkilərinin vaxtı müəyyənləşib. Seçki iyunun 28-də baş tutacaq, mayın 28-də isə namizədlərin irəli sürülməsinə başlanacaq.

Hələlik namizədlər baxımından ən çox tirajlanan ad, həm də qalib gəlməyə əsas namizəd parlamentin sədri Məhəmməd Bağır Qalibafdır. Əslində o, İranın Ali Rəhbəri Əli Xameneyinin çevrəsinin nümayəndəsi hesab olunur, çünki İran İslam İnqilabı Keşikçiləri Korpusu (SEPAH) ilə əlaqəsi var. O, İran-İraq müharibəsində korpus komandirlərindən biri olub, sonra korpusun hava qüvvələrinə rəhbərlik edib.

O, Tehranın meri olub və iki dəfə prezident seçkilərində iştirak edib, lakin 2005-ci ildə Mahmud Əhmədinejada, 2013-cü ildə isə Həsən Ruhaniyə uduzub. Təbii olaraq İranın siyasi sistemi kifayət qədər çoxşaxəlidir, sözsüz ki, prezidentliyə başqa namizədlər də olacaq və təbii olaraq hakimiyyətin müxtəlif qolları növbədənkənar prezident seçkiləri şəraitindən istifadə edərək, öz təsirlərini gücləndirməyə çalışacaqlar.

Prezident İbrahim Rəisi Xameneyinin dəstəyini alan bir sima hesab olunurdu. Üstəlik, Xameneyinin vəfat edəcəyi təqdirdə məhz Rəisinin onun yerinə əsas namizəd ola biləcəyinə inanılırdı. Bir sözlə, hadisə nəticəsində İran seçkiqabağı mərhələyə qədəm qoyur.

Azərbaycan üçün çox vacibdir ki, qonşu dövlət indiki mərhələdən mümkün qədər stabil və tez keçərək, normal məcraya qayıtsın. Bu, vacibdir, çünki İran hazırda Yaxın Şərq regionunda mühüm aktorlardan biridir.

Buna görə də İran mühüm və həssas məsələlərin müzakirəsində Azərbaycan üçün mühüm tərəfdaşa çevrilir. Bu səbəbdən Azərbaycan bu tərəfdaşın problemlərinin aradan qaldırılmasında ən maraqlı dövlətlərdən biridir.\\Ordu.az

İran Prezidenti İbrahim Rəisinin ölümü dünya mediasının əsas gündəm mövzusudur.

“AzPolitika” xəbər verir ki, hadisəni şərh edən “Sky News”-un qənaətinə görə, Rəisinin ölümü rejim üçün təhlükəli məqamdır.

Bununla belə, qeyd olunur ki, həmin hadisə nəticəsində İranın xarici siyasətində dəyişiklik gözləməyə dəyməz: “İran indi həssas bir dövrdən keçir. Rəisi İranın Ali Rəhbəri Ayətullah Əli Xameneyidən sonra ikinci ən güclü şəxs idi. Onun ölümünün böyük nəticələri olacaq. Xamneyi ölkəni sakitləşdirməyə çalışsa da, rejim bilir ki, bu, təhlükəli məqamdır və ehtiyatla davranılmalıdır”.

Yazıda qeyd olunur ki, ölkəyə 50 gün ərzində, seçkiyə qədər vitse-prezident Mohammed Mohbər rəhbərlik edəcək. Mohbər ali liderə Rəisi qədər yaxın deyil. Lakin o, illər boyu Xamneyinin maliyyəsinin böyük hissəsinə nəzarət edib və İrana qarşı tətbiq edilən sanksiyaların bəzilərindən yayınmağa kömək edib: "Rəisinin varisi çox güman ki, ali liderin seçdiyi namizəd olacaq. Təbii ki, rejimin sərt xətdən mötədilliyə qayıtmaq ehtimalı çox azdır. Həmçinin, İranın xarici siyasətində və ya Qəzza müharibəsində iştirakında əhəmiyyətli dəyişikliklər gözləməməliyik. Hər şey həmişəki kimi olacaq".

Yazıda qeyd olunur ki, 2022-ci ildə Mahsi Aminin ölümü ilə bağlı uzun müddət davam edən hökumət əleyhinə nümayişlərdən sonra Rəisinin qəfil ölümü etiraz hərəkatının ayağa qalxması və əhalinin yenidən küçələrə çıxması anı ola bilər: “İran daxilində “İslam Dövləti”nin qolları da daxil olmaqla bir çox dissident qruplar var ki, onlar bu vəziyyətdən istifadə etməyə cəhd edə bilərlər. Rəisi 2021-ci ildə cəmi 41% seçici iştirakı ilə prezident oldu ki, bu da 1979-cu il inqilabından bəri ən aşağı göstəricidir. O, bir o qədər populyar fiqur deyildi. Uzunmüddətli perspektivdə Rəisinin ölümünün ali lider üçün nəticələri olacaq. Dindar və mühafizəkar iranlılar üçün Rəisinin ölümü faciədir. Ancaq bir çoxları üçün o, əlləri qana bulaşmış insan olub”.

Gürcüstanın Baş naziri İrakli Kobaxidze ölkə Prezidenti Salome Zurabişvilinin “xarici təsir” qanununa veto qoyaraq müzakirə üçün bütün imkanları bağladığını deyib.
Kobaxidze bu barədə keçirdiyi brifinqdə bildirib.
O, bildirib ki, Gürcüstanın tərəfdaşları veto prosedurlarını mövqelərin uzlaşdırılması üçün istifadə etmək niyyətində olub, lakin Zurabişvili qanunu kobud surətdə veto edərək sağlam müzakirələr üçün bütün imkanları bağlayıb.

Kobaxidze əlavə edib ki, Gürcüstanda keçirilən sosial sorğuların nəticəsinə görə, ölkə əhalisinin 60%-dən çoxu qanun qəbul edilməsini dəstəkləyir.

Kobaxidzenin fikirlərinə münasibət bildirən politoloq Turab Rzayev “Sherg.az”a söyləyib ki, Gürcüstanda hakimiyyətdə ikitərəflilik davam edir:

“Bir tərəfdə daha çox Rusiyaya yaxın mövqeyi ilə tanınan Bidzina İvanişvili və onun “Gürcü arzusu” partiyası dayanır. İvanişvili yeni baş nazir seçkisindən sonra açıq şəkildə Avropa, Amerika və NATO-ya inteqrasiyanı tənqid etdi. Bunun əvəzində isə Rusiya və Çin ilə yaxınlaşma yolunu tutdu. Digər tərəfdə isə Fransa vətəndaşı olan Prezident Salome Zurabişvili dayanır ki, o da Qərbin dəstəklədiyi şəxs sayılır. Salome Zurabişvilidən başqa hakimiyyət ortaqları və müxalifət içərisində kifayət qədər qərbpərəst qüvvələr var. İndi isə qüvvələr arasında mübarizə açıq qarşıdurmaya keçib. Amerika Birləşmiş Ştatlarının Prezidenti Barak Obamanın dövründə Gürcüstanda ABŞ və Rusiya arasında konsensus var idi. Yəni hər iki ölkəyə uyğun Gürcüstanda siyasi mühit olacaqdı. Amma indiki halda Rusiya Gürcüstanda öz mövqeylərini gücləndirir və Qərb ilə münasibətləri qoparmaq üzrədir. Qərb isə geri addım atmır. Salome Zurabişvili “xarici təsir” qanununa veto qoyaraq hökümət ilə kəllə-kəlləyə gəlir. Artıq hökümət ilə Prezident arasında əlaqələr qırmızı xətti keçmək üzrədir. Hətta Salomenin Prezidentliyini impiçment etmək istəyirdilər. Görünən odur ki, indi də “Gürcü arzusu” və Prezident arasında münasibətlər çox gərgindir və düşməncəsinədir”.

İran lideri və ali dini lider Ayətullah Əli Xamneyinin oğlu İran prezidenti İbrahim Rəisinin ölümündən sonra atasının əsas mümkün varisi hesab olunur.

"DogruXeber.az" xəbər verir ki, bu barədə “Politico” yazıb. Qeyd edirlir ki, son illərdə Rəisinin İranın hazırkı Ali Rəhbərini əvəz edə biləcəyi ilə bağlı çoxlu fikirlər səslənirdi. Nəşr yazır ki, prezidentin ölümündən sonra İslam Respublikasında və digər ölkələrdə çoxları Xamneyinin oğlu Müctəba ilə əvəzlənəcəyinə əmin olacaqlar, çünki “namizədlərin dairəsi daralacaq”.

Mayın 19-da İran prezidenti İbrahim Rəisinin helikopteri qəzaya uğrayıb. Helikopterdə xarici işlər naziri və digər rəsmilər də olub. Hakimiyyət orqanları təyyarədəki bütün sərnişinlərin öldüyünü rəsmən elan edib.

İranda erkən prezident seçkiləri 50 gün ərzində keçirilməlidir.

Xəbər verdiyimiz kimi, İran Prezidenti İbrahim Rəisinin olduğu helikopter ötən gün qəzaya uğrayıb. Qəza nəticəsində bütün sərnişinlər həlak olub.

İbrahim Rəisi ölümündən öncə, dünən - mayın 19-da Azərbaycanla sərhəddə Prezident İlham Əliyevlə görüşəndən sonra Təbrizə gedirmiş.

Azərbaycan və İran prezidentləri ötən gün Araz çayı üzərində inşa edilmiş “Xudafərin” hidroqovşağının istismara verilməsi və “Qız Qalası” hidroqovşağının açılış mərasimində iştirak ediblər.

İran Prezidenti Seyid İbrahim Rəisi görüşdə bunun hər iki dövlət üçün uğurlu olduğunu bildirmişdi:

“Cənab Prezident, çox xoşbəxtəm ki, Azərbaycan Respublikasının hörmətli Prezidenti cənab İlham Əliyev ilə yenə də bir daha yaxından görüşürük və birgə müzakirəmizi yenidən nəzərdən keçiririk. Böyük xoşbəxtlik ondan ibarətdir ki, bu görüş bir yerdə baş tutur, burada böyük bir layihə həyata keçirilib və bu, iki xalq üçün çox uğurlu bir görüşdür. Hazırda biz istismara verilməsi iki xalq və iki dövlət üçün çox əhəmiyyət kəsb edən bir layihənin açılışında iştirak edəcəyik. Bunun özü əlamətdar bir hadisədir ki, iki xalq, iki dövlət arasında da çox mühüm böyük layihələr həyata keçirilə bilər. Ola bilsin ki, bəziləri bizim bu görüşlərimizi və birgə uğurlarımızı bəyənməsinlər. Bunlar bizim üçün əhəmiyyət kəsb etmir. Əsas odur ki, ölkələrimiz, dövlətlərimiz və xalqlarımız üçün nə xeyirlidirsə, biz onu birgə həyata keçirdik”.

Türkiyə Prezidenti Rəcəb Tayyib Ərdoğan iranlı həmkarı İbrahim Rəisi və onun nümayəndə heyətinin olduğu helikopterin qəza enişi etməsi ilə bağlı rəsmi “X” hesabında paylaşım edib.

“Qafqazinfo” xəbər verir ki, paylaşımda bu fikirlər qeyd olunub:

“İran Prezidenti, qardaşım İbrahim Rəisi və onun rəhbərlik etdiyi nümayəndə heyətinin helikopter qəzası keçirməsi bizi çox kədərləndirdi”.