Əgər söhbət Rusiya ilə münasibətlər mövzusundan gedirsə, o zaman Avropa Komissiyasının rəhbəri Ursula fon der Lyayenin mövqeyi hamıya məlumdur.
Avropa İttifaqının rəhbərliyində kadr dəyişiklikləri Aİ ilə Rusiya arasında münasibətlərin normallaşmasına səbəb olmayacaq.
Rusiya prezidentinin mətbuat katibi Dmitri Peskov iyunun 28-də keçirilən konfransda bu barədə danışıb.
"Əgər söhbət Rusiya ilə münasibətlər mövzusundan gedirsə, o zaman Avropa Komissiyasının rəhbəri Ursula fon der Lyayenin mövqeyi hamıya məlumdur. O, Aİ ilə Rusiya arasında münasibətlərin normallaşmasının tərəfdarı deyil. Biz onu belə tanıyırıq. Heç nə dəyişmir. Estoniyanın baş naziri, Aİ diplomatiyasının rəhbəri təyin olunmuş Kay Kallas da hələ diplomatik meyl nümayiş etdirməyib. O da barışmaz, bəzən rusofob ifadələri ilə məşhurdur. Ona görə də biz düşünmürük ki, Avropa diplomatiyası münasibətlərin normallaşdırılmasına tərəfdar olacaq. Moskva ilə Brüssel arasında münasibətlərin perspektivləri pisdir", - yetkili izah edib.
Xatırladaq ki, bu günlərdə Ursula fon der Lyayenin ikinci müddətə Avropa Komissiyasının rəhbəri olaraq qalacağı məlum olub. Portuqaliyanın keçmiş baş naziri Antonio Kosta Avropa Şurasının prezidenti təyin edilib. Estoniyanın baş naziri Kaya Kallas isə Aİ diplomatiyasının rəhbəri olub.

İyunun 28-nə keçən gecə Atlantada (Corciya ştatı) ABŞ-nin keçmiş və indiki prezidentləri Donald Tramp və Co Bayden arasında ölkə tarixində ilk seçkiqabağı televiziya debatı baş tutub.

Yeniavaz.com xəbər verir ki, debat iştirakçılarına əvvəlcədən yazılmış nitq mətnləri gətirmək qadağan edilib.
Debat zamanı yalnız çıxış edən namizədin mikrofonu açıq olub. Debatın moderatoru kimi CNN telekanalı çıxış edib.
Debat telekanalın studiyasında baş tutub. Debata tamaşaçılar və media nümayəndələri buraxılmayıb.

Studiyaya əvvəlcə Bayden, ardınca isə Tramp daxil olub. Onlar ABŞ-nin 46-cı və 45-ci prezidentləri kimi təqdim ediliblər. Onlar 2020-ci il prezidentlik yarışındakı teledebatda olduğu kimi, bir-birilərinin əlini sıxmayıblar.

Baydenin dedikləri…

Hazırkı Amerika lideri onun prezidentliyi dövründə heç bir hərbi qulluqçunun öldürülmədiyini bildirib.

“Mən yeganə prezidentəm ki, bu on ildə dünyanın heç bir yerində Amerika əsgəri öldürülməyib”.
Bayden iqlim dəyişikliyinə bəşəriyyət üçün yeganə ekzistensial təhlükə kimi baxdığını bildirib və Trampı bu məsələ ilə bağlı mövqeyinə görə tənqid edib.

“Onlar ətraf mühit üçün heç bir şey etmədilər. Onlar Paris iqlim sazişindən də çıxdılar”, – Bayden deyib.
O, həmçinin, eks-prezidentin “sahibsiz pişiyin əxlaqına sahib olduğunu” deyib və bununla da onun cinayət keçmişinə işarə edib.

Bayden Trampın ABŞ-nin NATO-dan çıxmasına çalışacağını bildirib.

“Bizim gücümüz bizim ittifaqlarımızdadır. Biz heç vaxt Avropada böyük müharibədən qaça bilməmişik”, – Bayden qeyd edib.

Bayden Rusiyaya bütün Ukraynanın lazım olduğunu və Putinin sovet imperiyasını bərpa etmək niyyətində olduğunu iddia edib. Eyni zamanda o, səhv edib və Rusiya liderinin “Kiyevi bərpa etmək” istədiyini bildirib.

Bayden Trampın Ukrayna ilə bağlı mövqeyinin dünyanı nüvə müharibəsinə apardığını bildirib. Amerika lideri iddia edib ki, Rusiya Ukraynadakı münaqişədən sonra Polşaya və başqa ölkələrə keçəcək.

Trampın dedikləri…

“ABŞ-də inflyasiya o qədər yüksəkdir ki, ölkəni məhvə aparır”, – Tramp deyib.

O, Baydeni prezidentliyi dövründə qeyri-qanuni miqrantlar üçün yeni iş yerləri yaratmaqda ittiham edib.
“Bu gün bizim sərhədimiz dünyanın hər yerində ən təhlükəli yerdir”, – Tramp bildirib.

Tramp həmçinin bildirib ki, onun rəqibi seçkidə ədalətli qələbə çalmaq iqtidarında deyil.
“Biz onun prezidentliyinə haqq qazandırmağa çalışırıq. Biz bu haqda mübahisə etməməliyik. Burada müzakirə ediləcək bir şey yoxdur”, – eks-prezident qeyd edib.

O, bir daha Baydenin nitqinə diqqət yetirib və cümləsini ardıcıl şəkildə tamamlaya bilmədiyini vurğulayıb.
“Düzünü desəm, onun (Baydenin) cümlənin sonunda nə dediyini bilmədim. Düşünürəm ki, o da nə dediyini bilmir”, – Tramp deyib.

Sabiq prezident ABŞ qoşunlarının Əfqanıstandan çıxarılmasını ABŞ tarixində “ən biabırçı gün” adlandırıb.
ABŞ-nin keçmiş prezidenti Baydenin oğlu Hanterə qarşı cinayət işi məsələsini də qaldırıb.

O, NATO haqqında danışarkən deyib ki, Bayden Avropalı müttəfiqlərinə Kiyevə kömək üçün əlavə vəsait ayırmaq üçün təzyiq etməli idi. O, həmçinin Kiyevin Moskva ilə hərbi münaqişədə qalib gələ bilməyəcəyini bildirib.
“Onların insanları tükənir. Onların əsgərləri tükənir. O qədər insan itirdilər. Bütün bunlar isə onun axmaq qərarlarının ucbatındandır”, – Tramp əlavə edib.

Tramp Baydenin Çindən pul aldığını və Pekinə ABŞ iqtisadiyyatına böyük ziyan vurmasına icazə verdiyini iddia edib.

Debatdan sonra

Debat bitdikdən sonra Tramp sürətlə səhnəni tərk edib. Baydenin həyat yoldaşı Cill Bayden isə Co Baydenə səhnəni tərk etməyə kömək edib. Bu, medianın diqqətindən yayınmayıb.

Trampın qələbəsi…

Nəticələri CNN tərəfindən açıqlanan ekspress sorğuya görə, 67% Trampın debatda qalib gəldiyinə inanır, yalnız 33% isə ABŞ-nin hazırkı prezidenti Baydenin qalib gəldiyini bildirir. “Newsweek” jurnalı da Trampı qələbə ilə “mükafatlandırıb”. ABŞ-nin keçmiş rəhbərinin seçki qərargahı onun çıxışını tarixi qələbə adlandırıb.

Vitse-prezident Kamala Harris debatın nəticələrini şərh edərkən, Baydenin nitqinə zəif başlaması ilə razılaşıb. Lakin o, finişin güclü olduğunu əlavə edib.

CNN-in başqa bir sorğusuna görə, seçicilərin əksəriyyəti (81%) debatın onların namizəd seçiminə təsir etmədiyini bildirib.

Media nə deyir?

CNN xəbər verir ki, Baydenin teledebatda çıxışı Demokrat Partiyasının sıralarında panikaya səbəb olub.
“New York Post” da oxşar mövqedən çıxış edib. Nəşr yazıb ki, milyonlarla insan Baydenin karyerasının canlı olaraq “sonunun şahidi olub” və “onun yenidən seçilmək üçün namizədliyini irəli sürməsinə icazə vermək siyasi səhvdir”.
“The New York Times”ın köşə yazarı və iki dəfə “Pulitzer” mükafatı laureatı Nikolas Kristof bildirib ki, Bayden respublikaçıların qalib gəlməsini istəmirsə, prezidentlik yarışını tərk etməlidir.

“Politico” qəzeti isə demokratlara yaxın üç mənbəyə istinadən yazıb ki, Baydenin uğursuzluğundan sonra partiya seçkilərdə hazırkı prezidenti başqa namizədlə əvəz etmək imkanını aktiv şəkildə müzakirə etməyə başlayıb.

Prezident İlham Əliyev altıncı çağırış Milli Məclisin buraxılması və Milli Məclisə növbədənkənar seçkilərin təyin edilməsi haqqında Sərəncam imzalayıb.

Sərəncamla altıncı çağırış Milli Məclis buraxılıb və sentyabrın 1-nə növbədənkənar seçkilər təyin edilib.

“Neçə illərdir ki, Araz çayının Saatlı rayonu ərazisindən keçən hissəsində çoxlu sayda qum karxanaları fəaliyyət göstərir. Bu karxanalarda yerin təkindən istifadə qaydalarına riayət olunmaması nəticəsində Araz çayının məcrası dəyişib, yaxınlıqda yerləşən yaşayış məntəqələrində yeraltı suların səviyyəsi aşağı düşüb, həmçinin minerallaşma dərəcəsi də dəyişib”. Tribunainfo.az xəbər verir ki, bu barədə ictimai fəal Abış Astanov yazıb.
O bildirib ki, çayın yeni məcrasında “oyuq”lar əmələ gəlib, kənarda isə dərinliyi 20 metrdən çox olan göllər və axmazlar yaranıb. “Mütəxəssislərin dediyinə görə, çayın müasir məcrasından kənarda bərpası mümkün olmayan faydalı qazıntı materiallarının çıxarılması gələcəkdə bu zona üçün su ehtiyatlarının tükənməsinə, çirklənməsinə və ətraf ərazilərdə ekoloji tarazlığın pozulmasına səbəb ola bilər”.
Astanov deyir ki, artıq neçə illərdir ki, bunun fəsadları Saatlı rayonunda öz təsirini göstərir. “Bunu hər il rayonun müxtəlif kəndlərində baş verən “su üsyanları”ndan da aydın görmək olar. Onu da qeyd etməyi özümə borc bilirəm ki, burada yaranan dərin göllərdə xeyli sayda insan boğularaq dünyasını dəyişib. Beləcə də kimlərinsə var-dövlət yığmaq hərisliyi səbəbindən insanlar həlak olur, xalqa, dövlətə, təbiətə xeyli ziyan dəyir”.
İctimai fəal qeyd edir ki,bütün bu əməllər barəsində əhali tərəfindən dəfələrlə müxtəlif dövlət qurumlarına müraciətlər olunsa da heç bir tədbir görən yoxdur. “Ona görə ki, karyer işlədənlərin özlərinin də dediyinə görə “krışa”ları Bakıda yüksək vəzifə sahibidirlər”.
Abış Astanov onu da deyib ki, yaxın günlərdə həmin karyerlərin kimlərə məxsus olması, orada hansı dövlət qurumlarının texnikalarından istifadə olunması, vergidən yayınma halları və digər qanunsuzluqlar barəsində, həmçinin onların “krışa”ları haqqında geniş məlumat verəcək.

Tayvan boğazını cəhənnəmə çevirmək” istəyən Birləşmiş Ştatlar oraya ilk gedəcək.

32gun.az RİA Novosti-yə istinadən xəbər verir ki, bu barədə Çin Müdafiə Nazirliyinin rəsmi nümayəndəsi Vu Tsyan bildirib.

“Başqalarının evlərini cəhənnəmə çevirmək istədiklərini qışqıranlar əvvəlcə özlərini cəhənnəmə getməyə hazırlamalıdırlar. Birləşmiş Ştatlarda bəzi insanlar tərəddüd etmədən Tayvan boğazını yer üzündə cəhənnəmə çevirməyə hazırdırlar”, - o vurğulayıb.

Qianın sözlərinə görə, Çin üçüncü ölkələrin təhdid və hədələrinə boyun əymək niyyətində deyil.

İyun ayında The Washington Post, Çinin adaya qarşı əməliyyata başlayacağı təqdirdə ABŞ-ın Tayvan boğazında “dron cəhənnəmi” yaradacağı ilə hədələdiyini yazmışdı .

Həmçinin bildirilib ki, Vaşinqton və Pekin son 5 ildə ilk dəfə nüvə silahı məsələsi ilə bağlı yarırəsmi danışıqları bərpa edib.

Pekin Tayvan ətrafındakı vəziyyətə görə nüvə silahından istifadə ilə hədələməyəcəyini deyir, mənbələr bildiriblər.
Track 2 danışıqlarının təşkilatçılarından biri olan alim David Santoro bildirib ki, Çin nüvə silahından istifadə etmədən ada uğrunda mübarizədə qalib gələ biləcəyinə tam əmindir.

İranda 14-cü dönəm seçkilərdə prezidentliyə namizəd Təbrizdən olan deputat Məsud Pezeşkian Tehran Bazar məscidində çıxış edib.

"Cebhe.info" xəbər verir ki, bu barədə sosial media kanallarında çoxsaylı paylaşımlar edilib. Türkcə çıxış edən Məsud Pezeşkian mərasim iştirakçıları tərəfindən alqışlanıb.

Azərbaycanlı namizəd çıxışını Məhəmmədhüseyn Şəhriyarın “Heydərbabaya salam” poemasından bir bənd şeirlə bitirib.

“Bir çox məsələlərdə Rusiyanı ittiham etmək olar. 2020-ci il noyabrın 9-dan sonrakı vəziyyətlə bağlı həm Rusiya, həm də Ermənistan üçün kəskin və ağrılı suallar yarandı. Bu məsələləri mövzu halına gətirmək üçün masa arxasında oturub danışmaq lazımdır”.

Bunu “Alternativ layihələr” qrupunun üzvü Vahe Ovannisyan deyib.

O bildirib ki, Ermənistan Rusiya ilə dialoq aparmaqdan çox, danışıqları dondurmaq yolunu seçdi.

“Mən Rusiyaya haqq qazandırmıram. Bir şəxsin hazırkı siyasi fürsətçi marağı Rusiyanı ittiham etməyi tələb edir, lakin sabah bu mövqe dəyişə bilər. Bu gün həyata keçirilən Ermənistanın xarici siyasəti deyil, bir nəfərin öz hakimiyyəti və şəxsi maraqları naminə atdığı addımlardır. Paşinyan ölkəni genişmiqyaslı eksperimentlər yolu ilə aparır və anti-Rusiya təbliğatının dozasını artırır. Rusiya isə deyir ki, Qərbə tərəf getsək, Aİİ-də mövcud olan üstünlükləri itirəcəyik. Bu, iqtisadiyyatın çökməsinə gətirib çıxaracaq. Ermənistan hakimiyyəti isə bunu yaxşı bilir. Digər tərəfdən, Azərbaycan öz strateji məqsədlərinə çatmaq üçün Ermənistanın 1-2 ciddi səhvini gözləyir. Biz bu səhvləri etməyə daha yaxınıq. Belə ki, Rusiya və İranın Ermənistana qarşı təcavüzü artıq onlar üçün “qırmızı xətt” olmayacaq. Bu, Ermənistanın regiona Rusiya və İrana düşmən olan oyunçuları dəvət etməsi fonunda baş verə bilər. Beləliklə, Ermənistanın kiçik ərazisi iki böyük mərkəzin döyüş meydanına çevrilə bilər”, – Ovannisyan vurğulayıb.

“ABŞ dövlət katibinin köməkçisi Ceyms Obrayen Bakıya gələcək”.

Globalinfo.az xəbər verir ki, bu barədə Dövlət Departamentinin mətbuat xidməti məlumat yayıb.

Bildirilir ki, Ceyms Obrayen Ermənistan və Azərbaycan arasında sülh sazişinin imzalanmasına dəstəyi təsdiqləmək niyyətindədir.

Bakıda diplomatın Prezident İlham Əliyev və xarici işlər naziri ilə görüşəcəyi gözlənilir. Qeyd olunur ki, görüşlərin məqsədi ikitərəfli münasibətlərdə irəliləyişə nail olmaq və ABŞ-ın Azərbaycanla Ermənistan arasında sülh sazişinin bağlanmasına dəstəyini vurğulamaqdır.

Qeyd edək ki, Obrayen iyunun 10-12-də İrəvanda səfərdə olub. Orada baş nazir Nikol Paşinyan və xarici işlər naziri Ararat Mirzoyanla görüşlər keçirib.

"Növbədənkənar parlament seçkilərindən sonra baş nazir seçilsəm Rusiya ilə qarşıdurmaya gedəcəyik".

TEREF bildirir ki, bunu Fransanın ifrat sağçılarının lideri, hakimiyyətə gəlməyə çox yaxın olan Jordan Bardella deyib.

Prezident Emmanuel Makronun “Milli Birlik”in Moskvadan asılılığına görə Fransanı müdafiə edə bilməməsi ilə bağlı ittihamlarına baxmayaraq, Bardella Rusiya Federasiyasının təhlükə yaratdığını bildirib.

“Mən Rusiyanı həm Fransa, həm də Avropa üçün çoxölçülü təhlükə kimi görürəm”, - deyə siyasətçi bildirib.

Onun sözlərinə görə, bu gün Rusiya Fransanın maraqlarına meydan oxuyur və bunu aylar və illərdir ki, Afrikada, Qara dənizdə və ölkənin xarici ərazilərində “bizim tarixi təsir dairəmizdə” edir.

“Mən Rusiyanın, eləcə də dünyanın istənilən başqa dövlətinin və ya qüvvələrinin müdaxilə cəhdlərinə qarşı son dərəcə ayıq-sayıq olacağam”, - Bardella bildirib.

O, həmçinin Fransanın beynəlxalq aləmdə, xüsusən də Ukrayna ilə bağlı üzərinə götürdüyü öhdəlikləri şübhə altına almaq niyyətində olmadığını təsdiqləyib, eyni zamanda, bu məsələdə hökumətinin keçməyəcəyi bir xəttin olduğunu təkrarlayıb .

“Ukraynaya maddi-texniki və müdafiə avadanlığı ilə dəstəyin davam etdirilməsinin tərəfdarı olsam da, mənim qırmızı xəttim uzun mənzilli raketlər və ya eskalasiyaya səbəb ola biləcək hər hansı hərbi texnika olaraq qalır".deyə o bildirib.

Bizimxeber.az