 |
|
|
Bakının İçərişəhər ərazisində ucaldılan “Dəmir Yumruq” abidəsi sosial şəbəkələrdə birmənalı qarşılanmayıb.
Demokrat.az xəbər verir ki, bir çox tanınmış şəxslər həmin abidəni tənqid ediblər.
Bəzi sosial şəbəkə istifadəçiləri isə sözügedən abidəyə görə, İçərişəhər" Dövlət Tarix-Memarlıq Qoruğu İdarəsinin Aparat rəhbəri İntiqam Babayevi qınayıblar.
Xatırladaq ki, bu ilin martında Gənclər və idman nazirinin keçmiş müavini İntiqam Babayev “İçərişəhər" Dövlət Tarix-Memarlıq Qoruğu İdarəsinin Aparat rəhbəri təyin edilib.
“Bir müddətdir ki, xəstə yatağındayam. Yaş artıq öz işini görür. Nə qədər yaşamaq olar? Bütün xəstəliklərim bir-birinə qatışıb. 3-4 aydır ki, yorğan-döşəkdəyəm. Televiziyaya da gedə bilmirəm. Böyrəklər bir az əziyyət verir, ürəyim bir az. Allah bilən məsləhətdir, nə vaxt məni bu dünyadan aparsa, o vaxt da gedəcəyəm. Bunu Allah bilir. Ölüm haqdır. Ən vacibi odur ki, bu dünyada ölüm var. İnsan xəstə olub, əziyyət çəkir, bax bu pisdir. Yaradıcı adam üçün xəstə yatmaq pisdir”.
DİA.AZ bildirir ki, bunu Moderator.az-a açıqlamasında xalq artisti Ceyran Haşımova deyib.
“Azərbaycanda yeganə xalq artisti tarzən qadınam. Mədəniyyətimizin inkişafı üçün çox əziyyətlər çəkmişəm. İndi işləməyə nə var ki? Televiziyalarda yollar açıqdır, cah-cəlallıq var. Biz bunları zülmlərlə qazanmışıq. İndi hər şey var, amma sənət yoxdur. Əsl sənət haqda danışanlar da yorulub. Sənətdən danışan da yoxdur. Bu məni çox narahat edir. Müğənnilərə baxıram, aparıcılar onları elə təqdim edir ki, deyirəm ki, bunlardan yəqin yoxdur. Onların nə vurğu işarələri, nə diksiyaları, nə də ki, danışıqları gözəldir. Müğənninin aylarla, illərlə üzərində işləyirdim. Mən onlara başa salırdım ki, filan mahnını oxusanız, daha yaxşı olar. Hər müğənninin səsinə, zövqünə görə mahnını onlara verirdim” deyə sənətkar deyib.
Xalq artisti bildirib ki, “Lalə” qızlar ansamblına xanımları seçərək götürüb.
“Vaxtilə ansambla maneçilik törədən çox xalq artistləri olub. Allah rəhmət etsin, başda elə Əhməd Bakıxanov idi. Bilirsiniz niyə? Bizim ansamblımız üzə çıxan kimi onların səviyyəsi aşağı düşdü. Deyirdilər ki, bu ansambla ehtiyac yoxdur. 7-8 nəfər var ki, onlar daim mənimlədir. O qədər sadiq olmayanlar oldu ki. İndi bəziləri efirə çıxır, heç “Lalə” qızların adını çəkmir. Naxələfdirlər də. Buradan fəxri adlar alıb, konsertlər veriblər. Müğənni tayfasının 90 faizi sədaqətsiz insanlardır. Bu onlarda adətdir. Mən hər xanımı, qızları ansambla götürməmişəm. Yolunu azanlar olub ki, onları bu başdan yola salmışam. Görmüşəm ki, bu qız mənə layiq deyil. Balıq başından iylənər. Mən özüm əgər möhkəm, ciddi durmasaydım onlar üstündə, yollarını azardılar. İlk növbədə məni müğənninin əxlaqı maraqlandırır. Bir ana 3 qızını saxlaya bilmir, gör nə qədər xanımlar mənim ansamblımdan gəlib-gedib. Xalq artisti Nəsibə Zeynalovanın xahişi ilə ansamblıma bir müğənni götürdüm. Şəkiyə qastrol səfərinə getmişdik. Gördüm ki, həmin qız yoxdur. Qız gəldi, əlində bir çörək, bir dənə də kolbasa. Məndən icazəsiz getmişdi. Hələ indiyə qədər heç bir qız məndən icazəsiz harasa getməyib. Ona dedim ki, yığış, yol pulunu da verirəm, get Bakıya. Yalvardılar ki, cavandır, bilməyib. Onu Bakıya göndərmədim. Bakıya çatan kimi o qızı ansamblımdan çıxardım” deyə sənətkar bildirib.
Hollivud aktyoru Conni Depp 76-cı Kann Film Festivalında göz yaşlarını saxlaya bilməyib.
Belə ki, “Jeanne du Barry” (“Janna Dübarri”) filminin təqdimatından sonra aktyor yeddi dəqiqə ərzində sürəkli alqışlanıb.
Mediada fransız tamaşaçılarının ümumiyyətlə Conni Deppi çox səmimi qarşıladıqları vurğulanıb.
Qeyd edək ki, film Fransa kralı XV Lüdovik və onun Versal sarayına gətirdiyi rəsmi məşuqəsi Janna Dübarrinin münasibətlərindən bəhs edir.
Mənbə: NEWS.ru
Operatorun Hollivud ulduzu Alek Bolduin tərəfindən təsadüfən güllələndiyi “Pas” (“Rust”) filminin çəkilişləri faciədən 18 ay sonra başa çatıb.
Bu barədə amerikalı aktyorun özü elan edib.
65 yaşlı aktyor obrazının saqqalsız fotosunu “Tanrım, bu saqqalı qırxmaq necə gözəl idi” cümlələri ilə yayımlayıb. O, həmçinin 13 yaşlı həmkarı Patrik Skott Makdermott ilə çəkdirdiyi şəkli də paylaşıb.
“Bu gənclə “Pas” filminin çəkilişlərinin son günü. Çox istedadlı və parlaq gələcəyi olan aktyor”, - deyə Bolduin şəkli şərh edib.
Xatırladaq ki, 2021-ci ildə “Western”in çəkiliş meydançasında Bolduin təsadüfən atışa hazır olan silahdan atəş açıb. Nəticədə operator Qalina Hançins və rejissor Coel Sousa yaralanıblar. Operatorun həyatını xilas etmək mümkün olmayıb.
Fevralın əvvəlində Nyu-Meksiko Ştat Prokurorluğu aktyoru Hatçinsi qəsdən öldürmədə ittiham edib. Günahı sübuta yetirilərsə, onu 18 aya qədər həbs cəzası gözlədiyi bildirilib. Aktyor özünü təqsirli bilməyib. Aprel ayında prokurorlar Bolduinə qarşı qətl ittihamlarını ləğv ediblər. Bu müddət ərzində çəkilişlər dayandırılıb və aprelin 20-dən Montanada davam etdirilib.
Mənbə: TASS
“Bu şəhərdə” komandasının Heydər Əliyev sarayında baş tutan “Əkkiz mart” konsertindən paylaşılan səhnəcik İran sosial şəbəkələrində müzakirəyə çıxarılıb.
Kult.az xəbər verir ki, "Milyonçu şouda iranlı nazir" başlığı ilə Yutub platformasına yerləşdirilən səhnəcik qısa müddətdə həm güneylilər arasında, həm də İranın bir sıra Teleqram kanallarında paylaşılıb.
Səhnəcikdə iranlı nazirə ünvanlanmış suallarda İran-Azərbaycan münasibətlərinin hazırkı durumu yumorla göstərilib.
İranda azərbaycanlıların ana dilindən məhrum edilməsi, Tehran-İrəvan qardaşlığı, Müharibə zamanı ölkəmizə İranın deyil, İsrailin dəstək verməsi, Təbrizin Azərbaycanın qədim şəhəri olması, İslam Respublikasından ölkəmizə qeyri-qanuni yollarla narkotik ixracı kimi sualları doğru cavablandıran iranlı nazir obrazı güneylilər arasında rəğbətlə qarşılansa da, İran mediası bunu təhqir olaraq dəyərləndirib.
“Tehran mediası səhnəcikdəki dialoqu “tarixin saxtalaşdırılması” adlandıraraq, tamaşaçılara yalan informasiyanın çatdırılmasında aktyorları günahlandırır.
Həmçinin, sonda Rafael İsgəndərovun “O taylı-Bu taylı azərbaycanlılar” xitabı ilə güneyli şair Səhəndin “Arazı ayırdılar” şeirini səsləndirməsi isə Quzey sənətçilərinin Xordad qiyamı ərəfəsində Güneylə həmrəylik göstərməsi kimi qarşılanıb.
Reper “A$AP Rocky” özünün “Instagram” hesabından sevgilisi Rihanna və kiçik oğlu ilə nadir ailə fotolarını paylaşıb.
Oxu.Az-ın məlumatına görə, kadrlar cütlüyün ilk övladının bir yaşının tamam olması münasibətilə yayımlanıb.
Reper silsilə fotolarına “Birinci ad günün mübarək RZA” şərhini yazıb.
Xatırladaq ki, bir il əvvəl Rihanna və “A$AP Rocky” ilk dəfə valideyn olublar. Cütlük hazırda ikinci övladlarını gözləyir.
Üstünlüyü olduğu qədər dezavantajları da olur. Gözəllik standartlarına uyğun gəlmirəm. Qəliblənmiş bir gözəllik anlayışı var və ona uyğun gəlmədiyim nöqtələrdə bəzi işlərin əlimdən qaçmasına səbəb olur.
Publika.az xəbər verir ki, bu sözləri tanınmış aktrisa Selin Şekerci "ReTouch" jurnalının suallarına cavab verərkən deyib. "Kanal D"də yayımlanan "Kraliça" serialında rol alan aktrisa "Kraliça olmaq istəmisiniz" sualına da cavab verib.
"Heç vaxt belə hekayələrin içində olmaq istəməzdim. Baxanda da, oxuyanda da özümü başqa bir personaj kimi təsəvvür edirdim. Həmişə ən çox "Pocahontasa" (cizgi film qəhrəmanı) paxıllıq edərdim. Çünki o, xalqını müdafiə edən güclü şahzadədir", - ulduz qeyd edib.
Aktrisa uzun müddətdir ki, terapiya və meditasiya ilə məşğul olduğunu da açıqlayıb. O, həmçinin hisslərini göstərməyi sevdiyini də dilə gətirib.
"General Hospital" filmində tibb bacısı "Bobbi Spenser" obrazı ilə tanınan aktrisa Ceklin Ziman vəfat edib.
Publika.az xəbər verir ki, bu barədə “Deadline” məlumat yayıb.
Bildirilir ki, 70 yaşlı sənətçinin ölüm səbəbi məlum deyil.
Zimanın vəfatını "Gündüz" dramının baş prodüseri Frank Valentini "Twitter"də açıqlayıb.
Ceklin Ziman ilk dəfə 1977-ci ildə "ABC sudser"ə qatılıb və 800-dən çox epizodda görüntülənib. O, beş dəfə "Emmi" mükafatına namizəd olub – dördü "General Hospital" üçün, biri isə “The Bay” filmində "Sofia Madison" rolunda oynadığı üçün.
Türkiyənin “Aile” serialının 11-ci bölümündə bədbəxt hadisə baş verib.
Serialı istehsal edən “Ay yapım” şirkəti hadisə zamanı bəzi işçilərinin yaralandığını bildirib.
Şirkət partlayışla bağlı açıqlama yayıb:
“Aile”nin 11-ci bölümünün final səhnəsinin çəkilişləri zamanı bədbəxt hadisə baş verdi. Bəzi həmkarlarımızın xəsarət almasına səbəb olan bu hadisənin baş verməsi ilə bağlı mümkün səhv və nöqsanlarla bağlı araşdırmalara başlanılıb. Bütün həmkarlarımıza keçmiş olsun diləklərimizi çatdırırıq”.
Qeyd edək ki, serialın baş rollarını Serenay Sarıkayayla Kivanç Tatlıtuğ canlandırır./Qafqazinfo
Mayın 9-da “Avroviziya” mahnı müsabiqəsinin birinci yarımfinal mərhələsi keçirilib. Müsabiqədə iştirak edən 15 ölkə arasında Azərbaycan da yer alıb. Ölkəmizi mötəbər yarışda Tural və Turan Bağmanov qardaşları təmsil edib.
Təəssüflər olsun ki, əkizlər müsabiqənin finalına adlaya bilməyib. Onların geyim və mahnı seçimləri fərqli olsa da, Avropa səhnəsində uğurlu alınmayıb. Əksinə sosial şəbəkələrin Azərbaycan seqmentində Bağmanov qardaşlarının geyimi sərt tənqid olunub.
Tənqidçilərdən fərqli olaraq, bəzi sənətçilər “Avroviziya” təmsilçilərimizin geyiminin və ifasının normal olduğunu düşünür. Onlardan biri tanınmış müğənni Nadir Qafarzadədir.
Teref.az xəbər verir ki, sevilən müğənni modern.az-a açıqlamasında Tural və Turanın həm geyimlərinin, həm də ifalarının qaydasında olduğunu deyib:
“Mən qardaşların çıxışından iki gün öncə onların şəklini öz sosial mediamda paylaşıb, xalqa onları qınamaması üçün müraciət etdim. Bildirdim ki, gənclər Avropa səhnəsinə çıxırlar. Ola bilər ki, Avropa səhnəsində tələblər, qanunlar başqadır. Yəqin ki, onların geyimini də belə məsləhət görüblər. Biz onların geyiminə yox, səslərinə, ifalarına baxaq. Biz isə həmin dəqiqə geyimlərini müzakirəyə çıxardıq, tənqid edirik. Bu səhnədir. Bəs guya bütün insanlar gündəlik həyatda biz istədiyimiz kimi geyinirlər? Əlbəttə, xeyr. Bunlar səhnə adamlarıdır. "Avroviziya" şou xarakterli müsabiqədir. Müsabiqədə nə muğam oxuyurlar, nə də ciddi musiqi. Avropa səhnəsi Avropa izləyicisi üçündür. Mənim yanaşmam belədir. Ola bilər ki, geyimlərdə hansısa detallar ürəkaçan deyil, amma biz istəsək də, istəməsək də, artıq bu geyimlər seçilmişdi”.
“Fikrimcə, bizim təmsilçilərimiz yarışda çox normal geyimdə iştirak etdilər. Onlardan başqa digər dövlətlərdən çıxış edən təmsilçilər bərbad formada geyinmişdilər. Mən özüm də müsabiqəni izlədim və düşünürəm ki, çox açıq-saçıq geyimlərdən istifadə olunmuşdu. Hətta ölkələrdən birinin təmsilçiləri qız paltarı geyinmişdi, demək olar ki, çılpaq idilər. Bundan əvvəl də Azərbaycanı təmsil edən iştirakçıların heç biri səhnəyə çadra və kəlağayı ilə çıxmayıb”, - Nadir Qafarzadə vurğulayıb.
İfaçının sözlərinə görə, qardaşların finala çıxmamasının səbəbi müsabiqədə onlardan daha güclü performans, şou və ifaların olmasıdır:
“Finala keçmək üçün orada güclü ifalar, şoular, performanslar var idi. Bizimkilər müsabiqədə sakit şəkildə öz ifalarını və səslərini göstərdilər. Onlar Avropa tamaşaçısına xoş gəlsin deyə 60-cı illəri təkrarlamaq məqsədi ilə retro mahnı oxuyub, retro stildə geyindilər. Bəlkə də artıq müasir həyatda bunlar qəbul olunmur. Amma ən ədəbli-ərkanlı şəkildə səhnəyə çıxan bizim iştirakçılar idi. Hətta mən təəssüf edirəm ki, onlar finala çıxmadılar. Amma yenə də bu uğursuzluq deyil. O səhnədə çıxış etmək özü bir uğurdur. Avropa tamaşaçısı onları belə sadə şəkildə qəbul edib, yadda saxlayacaq”.
Nadir Qafarzadə sonda Azərbaycan xalqını finala keçə bilməməsinə baxmayaraq, Tural və Turan qardaşlarına dəstək olmağa çağırıb:
“Gəlin, gəncləri həvəsdən salmayaq və onlara dəstək olaq, motivasiya verək. Düşünürəm ki, bizim Tural və Turan qardaşları gələcəkdə çox işlər görəcəklər. Əziz Azərbaycan xalqı, əziz Azərbaycan vətəndaşları, gəlin, özümüzünkiləri bu qədər pisləməyək. Həmişə deyirik, axı biz birlikdə güclüyük. Bunu cənab Prezidentimiz də bildirib ki, biz birlikdə güclüyük. Bu söz əbəs yerə deyilməyib. Gəlin, gücümüzü birləşdirək. Mən qardaşlara uğur arzu edirəm”.
Müğənni Elza Seyidcahan isə vurğulayıb ki, əsas məsələ müsabiqədə qalib olmaq deyil:
“Tural və Turan qardaşları əsas odur ki, bu mərhələyə qədər gəlib çıxıblar. Təəssüf ki, finala yüksələ bilmədilər. Burada qəbahətli bir şey yoxdur. Əsas odur ki, müsabiqədə iştirak etdilər. Ölkəmizi təmsil etdilər. Beynəlxalq səviyyəli müsabiqədə Azərbaycanın adı hallandı. Biz "Avroviziya" mahnı müsabiqəsində birinci və üçüncü yeri tutmuşuq. Bu dəfə fərqli oldu. Əlbəttə, dünənki yarış hələ son demək deyil. Onların uğurları qarşıdadır”.