Andorrada 16 yaşlı qızlar arasında keçirilən basketbol üzrə Avropa çempionatının C Divizionunda Azərbaycan qrup oyunlarını yekunlaşdırıb.

B qrupunda qərarlaşmış millimiz sonuncu oyununda Albaniyanı 69:64 hesabı ilə məğlub edib və qrup lideri kimi Avropa çempionatının yarımfinalına vəsiqə qazanıb.
Millinin yarımfinalda rəqibi Gürcüstan yığması olacaq. Oyun 22 iyul Bakı vaxtı ilə saat 21:30-da baş tutacaq.

"Linkoln"u Bakıda darmadağın edən Ağdam təmsilçisi növbəti mərhələyə vəsiqə qazanıb.
Bakıda "Qarabağ" və Cəbəllütariqin “Linkoln” komandası arasında keçirilən UEFA Çempionlar Liqasının I təsnifat mərhələsinin cavab oyunu keçirilib.
Qeyd edək ki, səfərdəki ilk matçda Azərbaycan təmsilçisi qələbə qazanıb - 2:1.
Bakı Olimpiya Stadionundakı cavab qarşılaşmasını albaniyalı Eldorjan Hamitinin başçılıq etdiyi hakimlər briqadası idarə edib.
Matçın 7-ci dəqiqəsində Abdullah Zubir "Qarabağ"ı irəli çıxarıb - 1:0. 45+1-ci dəqiqədə Bəhlul Mustafazadə hesab arasındakı fərqi artırıb - 2:0.
Birinci hissə bu hesabla başa çatıb.
İkinci hissədə, qarşılaşmanın 51-ci dəqiqəsində Redon Cica adını tabloya yazdırıb - 3:0.
62-ci dəqiqədə Yankoviç növbəti qolu qonaqların qapısından keçirib - 4:0.
Görüş bu hesabla başa çatıb və "Qarabağ" iki oyunun nəticəsinə əsasən ikinci mərhələyə vəsiqə qazanıb.

Argentinada oyun vaxtı qərarından narazı olduğu üçün hakimə hücum edən həvəskar futbolçu Uilyams Aleksandr Taponun meyiti tapılıb.

Teleqraf.com xəbər verir ki, adam öldürməyə cəhddə ittiham olunan 24 yaşlı futbolçunun həyat yoldaşı onun intihar etdiyini bildirib.

Cəsədi qatar stansiyasının yaxınlığında tapılan oyunçu başından güllə yarası aldığı üçün dünyasın dəyişib.

Qeyd edək ki, futbolçu idman tədbirində qəsdən adam öldürmədə ittiham edildiyi üçün 10-15 il müddətinə həbs oluna bilərdi.

Sevgilisini döyməkdə ittiham olunan Uels millisinin və “Mançester Yunayted”in keçmiş futbolçusu Rayan Giqqzin günahsız olduğu ortaya çıxıb.

BBC xəbər verir ki, 50 yaşlı keçmiş yarımmüdafiəçi bəraət alıb.

Məlumatda qeyd olunur ki, iyulun 31-nə təyin edilmiş məhkəmə prosesi baş tutmayacaq. Giqqzin bütün ittihamlar üzrə günahsız olduğu sübuta yetirilib.

Qeyd edək ki, Giqqz 2020-ci ilin noyabrında keçmiş sevgilisinə hücumda ittiham edilib. O, hadisədən sonra polis tərəfindən saxlanılsa da, bir gün sonra azadlığa buraxılıb. 2018-ci ildə yığmanın baş məşqçisi təyin olunan Giqqz 2021-ci ildə komandadan ayrılıb.

Yozua Kimmix "Bavariya”nı tərk etməyə yaxındır.

Almaniya klubu yarımmüdafiəçini satmağa razılıq verib.

Kimmix Münhen təmsilçisindəki toxunulmaz statusunu itirib. "Bavariya” rəhbərliyi sərfəli təklif qarşılığında onu satmağa hazırdır.

Qeyd edək ki, Kimmix 2015-ci ildə "Leypsiq”dən "Bavariya”ya keçib.

İtaliya A seriyası təmsilçisi "Latsio" yoxlama oyunu keçirib.
Bakupost.az xəbər verir ki, Roma klubu həvəskarlardan ibarət "Aurontso" komandası ikə qarşılaşıb. Görüş "Latsio"nun 16:0 hesablı qələbəsi ilə yekunlaşıb.
Çiro İmmobile het-trik, Pedro, Sanya Fernandes və Toma Başiç isə dubl edib.
Bu, "Latsio"nun Aurontsodakı təlim məşq toplanışında ilk yoxlama matçı olub.

Yeni mövsümə hazırlığını davam etdirən “Səbail” Türkiyə toplanışı çərçivəsində bu gün ilk yoxlama oyununu keçirib.

Bizim.Media xəbər verir ki, komanda TFF 1-ci liqa təmsilçisi “Ərzurumspor”la qarşılaşıb. Matç “dənizçilər”in 4:3 hesablı qələbəsi ilə yekunlaşıb. Aleksandr Ramalinqom dubl edibsə, Pedro Nuno və Ağabala Ramazanov hərəyə bir dəfə fərqləniblər.

UEFA-nın Klublara Maliyyə Nəzarəti Palatası “Barselona” və “Mançester Yunayted”i cəzalandırıb.

Qurumun son hesabatında 20-dən çox klubun qanun pozuntuları qeyd olunub. Kataloniyalılar ən böyük məbləğdə cərimələnib.

“Barselona” 2022-ci maliyyə ili hesablarında qeyri-maddi aktivlərin (oyunçu transferləri istisna olmaqla) satışından əldə edilən mənfəəti qaydalara uyğun olaraq gəlir hesab etməyən yanlış hesabata görə, 500 min avro cərimələnib”, - UEFA-nın rəsmi saytında bildirilib.
Cəzalananlar arasında “Mançester Yunayted”, “Trabzonspor”, “Konyaspor” və APOEL də var. Bu klublardan ilk ikisi 300 000, digərləri isə 100 000 avro məbləğində cərimələniblər.

Daha 400 min avronu isə “2022-ci maliyyə ilində qarşıya qoyulan hədəflərə çatmayan” Türkiyənin “Başakşehir” klubu ödəyəcək.

Qadın futbolçulardan ibarət Azərbaycan milli komandası Latviyadakı təlim-məşq toplanışı çərçivəsində beynəlxalq yoldaşlıq oyunu keçirib.

“Report”un məlumatına görə, Latviya yığması ilə oyun 1:1 hesabı ilə nəticələnib.

Millinin heyətində Alina Dorofoyeva fərqlənib.
Komandalar arasında növbəti oyun iyulun 17-də keçiriləcək.

"Yuventus" Super Liqa layihəsindən ayrılıb.

Publika.az xəbər verir ki, Turin təmsilçisi saytı vasitəsiylə müvafiq prosedura başladığını açıqlayıb.

"Yuventus" 2021-ci ilin aprelində Super Liqanın yaradılmasını elan edən 12 klub arasında idi. Turnirin təsisçilərinin çoxu həmin ay layihədən çıxıb.

Beləliklə, layihədə təkcə İspaniyanın "Real" və "Barselona" klubları qalıb.