Naxçıvan Muxtar Respublikası (MR), Naxçıvan şəhəri, Çənlibel məhəlləsi, bina 25, mənzil 8-də yaşayan Qarayev Səxavət Novruz oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi saytımız vasitəsilə Elm və Təhsil Nazirliyinə müraciət edir:

“Mən, Qarayev Səxavət Novruz oğlu, qeyd etmək istəyirəm ki, övladım 2019-cu il təvəllüdlü Qarayeva Ayan məktəbəqədər təhsil müəssisəsi olan Naxçıvan şəhər 12 saylı uşaq bağçasında təhsil alır. Bağçanın fəaliyyətində heç bir problem və başqa mənfi cəhətlər olmayıb.

Bağça rəhbərliyindən bildirilib ki, 5 yaşı tamam olan uşaqlar Naxçıvan Təhsil Nazirliyindən gələn məktub əsasında bağçadan xaric ediləcəklər və uşaqlar ümumi təhsil müəssisələrində yaradılacaq qruplarda məktəbəqədər hazırlıq keçəcəkdir. Məktəblərdə məktəbəqədər hazırlıq saat 9:00-da başlayıb, saat 11:00-da bitir. Biz, işləyən valideynlər üçün, bu hal çətinlik yaradır.

Belə ki, əvvəllər bağçada məktəbəqədər hazırlıq qrubları təşkil olunurdu və uşaqlar saat 06:00-a qədər bağçada olurdu. Naxçıvan Təhsil Nazirliyi bildirir ki, uşaqların çoxluğu ilə əlaqədar Fuad Nəcəfli ilə razılaşdırılaraq, 5 yaşı tamam olan uşaqların hamısını bağçadan xaric edirik. Hazırda çox-çox yaxınlığında yaşadığım 14 saylı orta məktəbdə məktəbəqədər hazırlıq qrupu açılmayacaq. Bizə bildirilir ki, 10 nömrəli məktəbdə qrup açılacaq, ora müraciət olunmalıdır. Bu məktəb də yaşadığımız yerdən uzaq məsafədədir.

Bilirsiniz, yuxarıda qeyd etdiyim kimi, məktəbəqədər hazırlıq saat 11:00-a qədərdir. Lap uşağı hansısa məktəbəqədər hazırlıq qruplarına yazdırsaq belə, saat 11-də uşağı məktəbdən götürmək lazımdır. Ancaq biz hər iki valideyn o saatda işdə oluruq. Belə çıxır ki, saat 11-dən sonra uşağa sahib çıxan heç kəs olmur. Xahiş edirik, işləyən hər iki valideynləri də nəzərə alın. Bu ərizəni tək öz adımla yazsam da, bu vəziyyədən narazı olan çox insanlar var”.

Jalə FAMİLQIZI

Redaksiyadan: Qarşı tərəfin mövqeyini dərc etməyə hazırıq.

Xəbər verdiyimiz kimi, iyulun 30-u xidmətdən kənar saatlarda Laçın rayonu ərazisində kükürd qazlı termal sularda çimən Azərbaycan Ordusunun hərbi qulluqçuları - kapitan Emnalıyev Asif Qəhrəman oğlu, gizir Cəbrayılov Fərid Famil oğlu, müddətdən artıq həqiqi hərbi xidmət hərbi qulluqçuları çavuş Səmədov Tural Maşallah oğlu və çavuş Şahmarlı Emin Oqtay oğlun həlak olub. Rəsmi məlumata görə, onların zəhərləndiyi ehtimal olunur.
Bəs kükürd qazlı termal sularda çimərkən zəhərlənmə baş verə bilərmi? Bu, hansı hallarda mümkündür?

"Termal sularda dəfələrlə əsgər çimizdirmişəm, qaşınmaya qarşı çox xeyirlidir, amma heç vaxt belə bir hadisə olmayıb"
Bakupost.az -ın suallarını cavablandıran hərbi ekspert Ədalət Verdiyev kükürdlü suda insanın zəhərlənməsi hadisəsinə rast gəlmədiyini bildirib:
“Mən bu hala rast gəlməmişəm. Termal sularda dəfələrlə əsgər çimizdirmişəm, qaşınmaya qarşı çox xeyirlidir, o vaxt bit-birəni öldürməkdən ötrü paltarı da orda yuyurduq. Amma heç vaxt belə bir hadisə olmayıb".
Ə.Verdiyev hadisənin erməni təxribatı olmasını ehtimal etmədiyini də deyib.

"Kükürd qazlı termal sularda zəhərlənmə mümkün deyil"
Kliniki Tibbi Mərkəzin (KTM) Toksikologiya Şöbəsinin müdiri Azər Maqsudov da Bakupost.az -a açıqlamasında praktikada belə bir hadisə ilə üzləşmədiyini bildirib.
O qeyd edib ki, kükürd qazlı termal sularda zəhərlənmə mümkün deyil:
"Bu heç ədəbiyyatda da yoxdur. Mən rast gəlməmişəm. Termal sularda o konsentrasiya olmur ki, onun toksik və boğucu təsiri olsun”.

"Belə bir şey tibbi praktikada yoxdur"
Kliniki Tibbi Mərkəzin toksikologiya şöbəsinin həkimi Aynur Məmmədova da Bakupost.az -a termal kükürdlü sularda zəhərlənmə hadisəsinə rast gəlmədiklərini bildirib:
“Dəri ilə təmasdan perkutal zəhərlənmə ola bilər. Amma o sularda nə ola bilər ki, əsgərləri öldürsün? O əsgərlər sularda nə qədər qalıb ki, belə reaksiya getsin? Bu, mümkün deyil. Əgər belə bir şey olsaydı, o müalicəvi sulara nə qədər insan girir, bu vaxta qədər zəhərlənmə olardı. Belə bir şey tibbi praktikada yoxdur, mənə də təəccüblü gəldi”.

İnternetdə apardığımız qısa araşdırma zamanı isə ötən il Rusiyanın Tümen şəhəri yaxınlığındakı Yar qəsəbəsindəki termal sularda uşaqların kütləvi şəkildə zəhərləndiyi faktı ilə rastalşdıq. Qeyd olunur ki, "Tümenskiy" adlı isti su hovuzunda çimən 16 uşaq özünü piss hiss edib.
Həkimlər uşaqlara baxış keçirdikdən sonra 2012, 2015 və 2016-cı il təvəllüdlü üç uşaq xəstəxanaya yerləşdirilib. İlkin məlumatda zəhərlənməyə suda həddindən artıq xlor olmasnın səbəb olduğu bildirilib. Qeyd olunub ki, bu maddənin yüksək konsentrasiyası bədən üçün ciddi nəticələrə səbəb ola bilir.
Tümen vilayət prokurorluğunun araşdırmasından sonra isə bildirilib ki, istirahət mərkəzində mövcud olan avadanlıqlara düzgün qulluq edilmədiyindən hovuzdakı suyun dezinfeksiya edilməsi üçün istifadə olunan reagentlərin sızması baş verib ki, bu da uşaqların səhhətinin pisləşməsinə səbəb olub. Hadisə nəticəsində ölüm halı baş verməyib. Qeyd olunub ki, termal istirahət mərkəzinin sahibizərər çəkmiş uşaqlara 375 min rubl kompensasiya ödəyib.

“Son bir neçə ildir, təəssüf ki, ölkədə dələduzluq halları artıb. Vəziyyət o yerə çatıb ki, artıq 10 nəfərdən ikisi ya dələduzluğa məruz qalıb, ya da son anda dələduzun qurbanı olmaqdan xilas olub. Hətta elələri var ki, toplu formada dələduzluq edib, Azərbaycandan qaçmağı da bacarıb”.

Bu sözləri azərbaycanlı jurnalist KONKRET.az-a açıqlamasında bildirib.

Onun sözlərinə görə, “Hüquq-mühafizə orqanlarında 100-lərlə insanın etibarından sui-istifadə edib, onların pullarını mənimsəyənlərlə bağlı kütləvi şikayətlər var. Ən pis hal bilirsiniz nədir? Hazırda dələduzluq edənlərin əksəriyyətində qanunla mühakimə ediləcəkləri qorxusu yoxdur, çünki onlar düşünür ki, mənimsədikləri pullarla özlərinə müəyyən dairələrdə “dost qazanıb” məsuliyyətdən yaxa qurtara biləcəklər.

Bu, qorxunun olmaması məhz onların daha rahat dələduzluq etməsinə, əlləri-qollarını sallayaraq insanları aldatmasına gətirib çıxarır. Dələduzluğun artmasından əbəs yerə danışmıram. Əsas məqsədim bu yolla həm insanları maarifləndirmək, həm dələduzluq edənləri cəmiyyətimizə tanıtmaqdır. İndi haqqında yazacağım Mətin Canbulat oğlu Həsənov 10-dan çox şəxsin etibarından sui-istifadə edərək 100 min manatdan çox pulları mənimsəyərək Birləşmiş Ərəb Əmirliklərinə qaçıb. Daha sonra aldatdığı şəxslərə avqustun 8-də ölkəyə qayıdıb pullarını qaytaracağı vədini versə də, təbii ki, aldadılanların heç biri onun bu sözlərinə güvənmir.

Ona görə ki, M.Həsənov indiyədək də dəfələrlə belə vədlərlə insanları aldatmış və öz pis əməllərini yenə də davam etdirmişdir. Təəssüf ki, aldadılan şəxslərdən biri də elə mən özüməm. Belə ki, adıçəkilən şəxs iyulun 18-də iş görüb, pul qazanmaq adı ilə məndən 2000 manat, eyni gün başqa saatda isə 600 manat da əlavə pul alaraq yoxa çıxıb. Aldadıldığımı, dələduzluğa məruz qaldığımı bildiyim üçün dərhal hüquq-mühafizə orqanlarına şikayət etmişəm. Elə həmin gün M.Həsənovun həyat yoldaşı Elnurə Həsənova adlı xanım mənim “Whatsapp”ıma şikayəti geri götürməyimi, şikayəti geri götürəcəyim təqdirdə pulun avqustun 5-dək yarı hissəsini verəcəyini, avqustun 8-də isə digər hissəsini M.Həsənov tərəfindən qaytarılacağını yazıb. Mən isə qarşı tərəfə pulumu qaytarmayana qədər şikayətimi geri götürməyəcəyimi bildirmişəm. İyulun 30-da M.Həsənovun həyat yoldaşı yenidən mesaj yazaraq avqustun 5-də pulu verməyəcəyini, məsələni M.Həsənovla öz aramızda həll etməli olduğumu bildirib.

Təbii ki, əvvəlcədən bunun belə olacağına əmin olduğum üçün şikayətimi geri götürməmişdim. Çünki bilirdim ki, bu da yeni vədlərdən, sadəcə vaxt qazanıb şikayətdən yayınmaq cəhdlərindən biridir. Ən pisi bilirsiniz nədir? Yuxarıda qeyd etdiyim kimi, belə adamlar əllərini-qollarını sallayaraq rahat şəkildə cəmiyyətdə gəzir, hələ yeri gələndə kənarda-bucaqda düzgünlükdən, dürüstlükdən danışırlar. Ona görə də M.Həsənov kimilərini bütün cəmiyyət tanımalıdır, onlar belə əməllərindən əl çəkməlidir, başqaları da onun bu cür çirkin hərəkətlərinin qurbanına çevrilməməlidir, cəmiyyətimiz sağlamlaşdırılmalıdır. Əks halda, cəmiyyət uçuruma sürüklənir”.

HƏMAS siyasi bürosunun rəhbəri İsmayıl Haniyənin öldürüldüyünü təsdiqləyib.

Qruplaşmanın yaydığı məlumatda qeyd olunur ki, İ.Haniyə İranın yeni seçilmiş Prezidenti Məsud Pezeşkianın andiçmə mərasimindən sonra iqamətgahına qayıdıb. İsrailin raket zərbəsi nəticəsində Haniyə və bir mühafizəçisi ölüblər.

Mənbə: TASS

İyulun 26-da Bakı şəhəri üzrə məktəbəqədər təhsil müəssisələrinə qəbul başlanıb.
Qaynarinfo-nun məlumatına görə, məktəbəqədər təhsil müəssisələrinə uşaqların qəbulu elektron qaydada www.bq.edu.az elektron sənəd qəbulu sistemi vasitəsilə aparılsa da, 4 gün ərzində bütün yerlər dolub.
Xeyli sayda uşaq bağçalara qəbul olmaq hüququndan məhrum edilib. Bunlar arasında jurnalistlərin övladları da var.
Elm və Təhsil Nazirliyi isə bağçada oxumaq hüququndan məhrum olan uşaqlarla bağlı heç bir tədbir görmür.
Məktəbəqədər və Ümumi Təhsil üzrə Dövlət Agentliyi bağçalara qəbul oluna bilməyən uşaqların valideynlərinə “yer yoxdur” deməklə kifayətlənir.
2021-ci ildən yerli icra hakimiyyəti orqanlarının tabeliyində olan dövlət məktəbəqədər təhsil müəssisələri Elm və Təhsil Nazirliyinin tabeliyinə verildikdən sonra paytaxtda bağçalara qəbul planı bir qədər də artıb.
Bağçalarda valideynlərdən əlavə “aylıq ödənişlər” tələbi ləğv edilməsə də, nədənsə qəbulda problemlər yaradılır.
Məktəbəqədər və Ümumi Təhsil üzrə Dövlət Agentliyi hər bağçada qəbul proseduruna uyğun olaraq say müəyyən edib. Həmin saydan bir nəfər də artıq şagird qəbul edilmir.
Nəticədə 180 nəfər şagirdin təhsil almaq imkanı olan bağçalarda qəbul sayı kəskin azaldılıb. Valideynlər övladlarını daha çox özəl bağçalara yönəltməyə məcbur edilir.
İllərdir Yeni Yasamalda yerləşən 98 saylı bağçada 150 nəfərdən çox şagird təhsil alırdısa, hazırda bu say həddi azaldılıb. Səbəbi isə guya bir sinifdə 30-32 uşaqdan artıq təhsil vermək imkanının olmamasıdır.

Aylar əvvəl məktəbəqədər təhsil müəssisələrinə uşaqların qəbulu elektron qaydada www.bq.edu.az elektron sənəd qəbulu sistemi vasitəsilə aparan valideynlərin hesabları silinib. Hər kəsdən Elm və Təhsil Nazirliyinin nəzdində Məktəbəqədər və Ümumi Təhsil üzrə Dövlət Agentliyinin “finiş fitini” gözləmək tələb edilib.
İyulun 26-da Məktəbəqədər və Ümumi Təhsil üzrə Dövlət Agentliyi “finiş fitini” çalan kimi bağçalarda qəbul başlanılıb. Üzərindən 4 gün keçməsinə baxmayaraq, nədənsə bağçalarda qəbul planı dolub.
Məktəbəqədər və Ümumi Təhsil üzrə Dövlət Agentliyi silinən valideyn sorğuları ilə bağlı tələbləri isə rədd edir.
20 noyabr 1989-cu ildə “Uşaq hüquqları haqqında” Konvensiya BMT tərəfindən qəbul edilib və dünyanın hər bir yerində yaşayan uşaqlara konvensiya ilə müəyyən edilmiş hüquqları təmin edən birinci universal kodeksdir. Bu kodeksə görə hər bir uşağın təhsil almaq hüququ var!