Qazax sakininin külli miqdarda vəsaiti fırıldaqçı dəstə üzvləri tərəfindən mənimsənilib

“Həbsdən çıxıb, yenə insanları aldatmağa davam etdilər; Bu qədər insan dələduzluğa məruz qalıb, heç bir tədbir görülmür”

Qazax rayonunun Hüseynbəyli kənd sakini Mustafayeva Fatma Hüseyn qızı tərəfindən “Hürriyyət”in redaksiyasına şikayət məktubu daxil olub. Şikayətçi iddia edir ki, kənddə hər kəsin tanıdığı qızıl dükanının sahibi Firdovsi, Gülara Abdullayeva və Xəyal Yaxyayev tərəfindən dələduzluğa məruz qalıb. Onun sözlərinə görə, adıçəkilən şəxslər tərəfindən aldadılaraq, 2040 manat məbləğində pulu OCOS şəbəkə biznesinə qurban gedib.

Məlumata əsasən, Gülara Abdullayeva, Xəyal Yaxyayev və qeyriləri ölkə daxilində “İnsuccess” adlı saxta şirkət yaradıblar. OCOS beynəlxalq dələduzluq piramidasını ölkəyə gətirərək, özlərini ciddi “investisiya şirkəti” kimi təqdim ediblər. Beləliklə, uydurulmuş “kriptovalyuta” yaratmaqla, vətəndaşları yüksək gəlir vədi ilə aldadıblar. Yəni yatırımın 50 faizini qazanc kimi əldə etməyi mümkün etdiklərini bildiriblər.

Rəsmi qurumlara müraciət edən Mustafayeva Fatma Hüseyn qızı ona dəyən zərərin qaytarılmasını, Firdovsi adlı həmyerlisi və digər şəxslər barəsində hüquqi tədbir görülməsini xahiş edir:

“Bildirirəm ki, Nizami küçəsində, bina 8, mənzil 7 ünvanında yaşayıram. Firdovsi qızıl dükanının sahibidir. OCOS adlı piramida sistemi ilə məni və bir çox adamı aldadıb. Külli miqdarda pul mənimsəyərək, aradan çıxıblar.

Daxili İşlər Nazirliyinin (DİN) “102” xidməti-zəng mərkəzi sisteminə müraciət etsək də, bir nəticə əldə edə bilmədik.

Firdovsinin Qazaxda, Bakıda və Türkiyədə bir neçə evi, bağları və s. var. Niyə müsadirə olunmur? Niyə bunlar sorğu edilmir, yoxlanılmır? Bu qədər insan dələduzluğa məruz qalıb, heç bir tədbir görülmür. Bu adam əlini-qolunu sallayaraq gəzir.

Gülarə və Xəyalın həbs olunması o demək deyil ki, məsələ həll olunub. Aldadılan camaat nə etsin? Bizə dəyən zərəri kim ödəyəcək? Əvəllər də tutulmuşdular. Sonra həbsdən çıxıb, yenə insanları aldatmağa davam etdilər”.

Xatırladaq ki, 2021-ci ildə Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinin həyata keçirdiyi əməliyyat nəticəsində sosial şəbəkələrin imkanlarından istifadə edərək dələduzluq yolu ilə insanların etibarından sui-istifadə edərək zərərçəkənlərin külli miqdarda pul vəsaitini ələ keçirən mütəşəkkil cinayətkar dəstənin üzvləri saxlanılıb

DİN-ə bir qrup şəxsin investisiya şirkəti adı altında şəbəkə biznesi yaradaraq çoxsaylı vətəndaşları aldatmaları və pullarını ələ keçirmələri barədə əməliyyat məlumatları daxil olub. Baş İdarə əməkdaşlarının Azərbaycan Mərkəzi Bankının mütəxəssislərinin iştirakı ilə apardıqları araşdırmalar zamanı müəyyən olunub ki, Bakı şəhər sakinləri – Gülara Abdullayeva, Xəyal Yaxyayev və digərləri ölkə daxilində “İnsuccess” adlı fəaliyyət istiqaməti qeyri-müəyyən olan şirkət yaradıb və “OCOS” adı altında beynəlxalq dələduzluq piramidasını ölkəyə gətirərək sosial şəbəkələrdə reklamını təşkil ediblər. Bu şəxslər əslində mövcud olmayan kriptovalyuta yaradaraq, guya onun beynəlxalq valyuta bazarında satışını təşkil etdiklərini və şişirdilmiş yüksək gəlirlər vəd etməklə vətəndaşların pul vəsaitlərini aldatma yolu ilə ələ keçiriblər. Bu qayda ilə adı çəkilən şəxslər qurduqları şəbəkə biznesinə piramida şəklində çoxsaylı vətəndaşları cəlb edərək, onlara faktiki mövcud olmayan, uydurulmuş kriptovalyuta – OCOS satıblar. Araşdırma zamanı dəstə üzvlərinin investisiya paketi adı altında şişirdilmiş yüksək gəlirlər təklif edərək ümumilikdə 10 minə yaxın vətəndaşı aldatdıqları və təxminən külli miqdarda vəsaitlərini ələ keçirdikləri müəyyən edilib.

Əməliyyat tədbirlərinin davamı olaraq həmin şəxslərin paytaxtın Xətai rayonu, Sumqayıt şəhəri və digər məkanlarda icarəyə götürdükləri ofislərə baxış keçirilən zaman iş üçün əhəmiyyət kəsb edən maddi sübutlar aşkar edilərək götürülüb. Nəticədə dəstə üzvləri barəsində Cinayət Məcəlləsinin 178.3.1-ci (mütəşəkkil dəstə tərkibində dələduzluq), 178.3.2-ci (Dələduzluq, külli miqdarda ziyan vurmaqla törədildikdə) , 193-1.3.1 və 193-1.3.2-ci (mütəşəkkil dəstə tərəfindən cinayət yolu ilə əldə edilmiş külli miqdarda pul vəsaitlərini və ya digər əmlakı leqallaşdırma) maddələri ilə cinayət işi başlanıb.

Bu ilin mart ayında verilən hökmə əsasən, təqsirləndirilən Xəyal Yaxyayev 15 il, Gülara Abdullayeva isə 12 il müddətinə azadlıqdan məhrum ediliblər.

Cinayət işi üzrə 217 nəfər zərərçəkmiş şəxs qismində tanınıb.

Cəmilə ƏZİMOVA

Samux rayonunun Lək kəndinin sakinləri kəndarası yolların baxımsız olmasından şikayətlənirlər.

Onların sözlərinə görə, uzun müddətdir təmir edilməyən yollardan yayda toz-torpaq, qışda isə palçıq səbəbindən istifadə etmək günü-gündən müşkülə çevrilir.

Sakinlər deyirlər ki, kəndarası yolların baxımsız olması qəza riskini də artırır. Belə ki, sürücülərin maşınları yollardakı çalalara salmamaq üçün tez-tez hərəkət istiqamətini dəyişməsi bir-biriləri üçün təhlükə yaradır.

"Yolda maşın sürə bilmirik. Keçən gün az qala qarşıdan gələn avtomobillə toqquşmuşduq. Yolların hamısı oyuq-oyuqdur", - deyə kənd sakini söyləyib.

Məsələ ilə bağlı Lək bələdiyyəsinin sədri Cəsur Məmmədov açıqlama verib:

"Kəndimizdə əsas yol var, bu köhnə asfaltdır. Oraya mütəmadi olaraq çınqıl tökürük. Yaxın günlərdə yolu təmir etmək planımızdadır".

Daha ətraflı Baku TV-nin materialında:

Bəlkə də ən vacib olmayan, amma hər halda aktual problemlərdən birinin təqdimatına keçməzdən əvvəl hörmətli oxucuya zahirən sadə, hətta uşaqcasına bir sual vermək istərdim: “Sizcə, donuzun neçə ayağı var?”. Hər hansı bir normal ağıl sahibi insan, hətta həyatında bu heyvanı görməsə belə, tərəddüd etmədən cavab verəcəkdir: "Dörd".

Bu həm doğru, həm də yanlış cavab olacaq. Fizioloji nöqteyi-nəzərdən hər şey düzdür, amma bu məsələyə əxlaqi dəyərlər, davranış və həyat tərzi prizmasından baxsaq, düzgün cavab “2” olacaq. Bəli, söhbət məxluqlardan gedir (onları adlandırmaq üçün başqa ad yoxdur), onlar insan doğulsalar da, homosapiens səviyyəsinə çata bilməyiblər.

Təəssüflə etiraf etməliyik ki, aramızda çoxlu məsuliyyətsiz vətəndaşlar var ki, onlar ətrafdakı zibil və çirkaba baxmaqdan inanılmaz, az qala maniyakal həzz alırlar. Təkcə baxmaqla kifayətlənsəydilər, dərd yarıydı, onlar sonradan “cücərtilərindən” həzz alacaqları “zibil toxumları” səpirlər. Bəs kim özünü zibil qabındakı suda balıq kimi hiss edir? Düzdür, donuzlar.

Belə ki, Bakının Səbail rayonunda yerləşən “jurnalistlərin evi”ndə “ikiayaqlı donuzlar” məskunlaşıb. Ola bilsin ki, bu, bəzilərini təəccübləndirəcək, digərlərini şoka salacaq və digəri bir anda "Şübhə edən Fomaya" çevriləcək. Ola bilməz ki, cəmiyyətdəki neqativ halları üzə çıxarmağa və pisləməyə çağrılan jurnalist mühitində özləri çirkab içində yaşayanlar elan edilsin. Üstəlik, sözün hərfi mənasında.

Bu fotolara nəzər salın. Onlar Balaxanı zibilliyində yox, “jurnalistlərin evi”ndən hazırlanıb. Bu, su borularının keçdiyi bir havalandırma şaxtasıdır. Kadrlardan göründüyü kimi, mədənə atılan zibil, o cümlədən plastik butulkalar, bankalar, kolbalar və mənşəyi məlum olmayan sarğı və ya əski parçası həmin boruların üzərinə uğurla “düşüb”. Söz yox ki, “çeşid” zəifdir və özünə hörmət edən “bomj” ona yaxınlaşmayacaq.

Üç il əvvəl biz “jurnalistlərin evi”ndəki zibil probleminə qısaca toxunmuşduq. Xüsusən də bu sətirlərin müəllifi səmimi olaraq başa düşmürdü ki, guya ziyalı adamlar nə üçün nəcisli uşaq bezlərini və boş butulkalarla balkondan atıblar, xüsusən də zibil qabları düz evin həyətində yerləşirsə. Binadan 10-20 metr aralıda. Görünür, həddindən artıq məşğul olmaq, vaxt azlığı və aşılmaz tənbəllik günahkar idi.

İndi isə bu problemə daha bir problem əlavə olunub. Bəzi sakinlər daha da məşğul və ya tənbəl və ya bəlkə də daha "mədəniyyətli" oldular. Şaxta giriş qapısından bir metr məsafədədirsə, niyə zibil pəncərədən atılmalıdır?

Beləliklə, hər cür xəstəliklər, qarışqaların, tarakanların, milçəklərin və digər canlılar onlara qayğı göstərdikləri üçün "ikiayaqlı donuzlara" səmimi minnətdardırlar. Ola bilsin ki, mən bir az şişirtmişəm, amma bu vəziyyətdə vəba, tif, ospa kimi çoxdan unudulmuş və məğlub olan xəstəliklərin geri dönməsini gözləmək olar.

Rus şairi Nekrasovun belə bir sözü var: “Sən şair olmaya bilərsən, amma vətəndaş olmalısan”. Bu halda vətəndaşlıq tələb olunmur, sadəcə olaraq insan olmaq lazımdır. Və heç də mütləq olaraq böyük hərflə deyil...

Müəllif: Fed Bakinski - Mənbə: AYNA.az

Xəbər verdiyimiz kimi, sentyabrın 1-də Milli Məclisə növbədənkənar seçkilərdə 65 sayılı Salyan-Biləsuvar-Neftçala seçki dairəsindən deputatlığa namizədliyini irəli sürən Ana Vətən Partiyasının (AVP) sədri Fəzail Ağamalının qızı Günay Ağamalının seçkilərdən öncə səsləndirdiyi fikirlər rayon ziyalılarının narazılığına səbəb olub. Belə ki, Günay Ağamalı Salyan camaatının ona olan etimadını yüksək qiymətləndirdiyini vurğulamışdı.

TEREF Demokrat.az-a istinadən xəbər verir ki, mövzu ilə bağlı açıqlamasında “Ədəbiyyat” qəzetinin baş redaktoru, Salyandan olan ədəbiyyatşünas alim Azər Turan bildirib ki, Azərbaycanda demokratik seçki olacaq:

“Hazırda seçki prosesi siyasi gündəmdir. Siyasi məsələlərə o qədər də dərindən fikir bildirmək istəmirəm. Lakin inanıram ki, Azərbaycanda demokratik seçki olacaq və salyanlılar öz seçimini edəcək. Mənim Fəzail Ağamalının qızının fəaliyyətindən xəbərim yoxdur, heç onu tanımıram. Ola bilər ki, Fəzail Ağamalının oğlu və ya qızı atasından daha layiqli namizəd olsun. Bu seçicilərin rəyindən asılıdır.

Bəlkə də Salyan camaatı Günay Ağamalını deyil, daha layiqli namizədini seçəcək. Kim seçiləcəksə, bu, xalqın seçimi olacaq.

Mən daha çox xalqın verəcəyi səsə inanıram. Son nəticəni gözləyək. Xalq namizədini özü seçəcək. Salyandan həmişə görkəmli şəxslər çıxıb. Qeyd edim ki, parlament tariximizdə Azərbaycandan Rusiya imperiyasının I Dövlət Dumasına seçilmiş 5 deputatdan biri də məhz salyanlı Əsədulla bəy Muradxanov olub”.

“Nar” 22 iyul - Milli Mətbuat Günü münasibətilə media nümayəndələrini təbrik edib və onlar üçün dayanıqlılıq və iqlim dəyişikliyinə yönəlmiş maarifləndirici təlim proqramının keçirilməsini dəstəklədiyini bildirir. Bu təşəbbüs dayanıqlılıq və iqlim dəyişikliyi gündəmini effektiv şəkildə idarə edə biləcək peşəkar media nümayəndələrinin inkişafına “Nar”ın dəstəyini nümayiş etdirir.

Dayanıqlılıq və iqlim dəyişikliyi sahəsində ekspert xidmətləri təqdim edən “Sustainera Solutions” şirkətinin müxətəssislərinin keçdiyi təlim çərçivəsində dayanıqlılıq və iqlim dəyişikliyinin təşviqində medianın həlledici rolu, eko piarın vacibliyi və dayanıqlılıq kommunikasiyasında tendensiyaların rolu barədə önəmli aspektlər vurğulanıb.

“Nar”ın İctimaiyyətlə Əlaqələr və Korporativ Ünsiyyət departamentinin direktoru Hökümə Kərimova media əməkdaşlarını təbrik edib və təlim haqqında fikirlərini bölüşüb: “Nar” olaraq məqsədimiz jurnalistləri həyati vacib ekoloji məsələlərlə bağlı ictimaiyyəti məlumatlandırmaq və cəlb etmək təşəbbüslərində dəstəkləmək və bununla da daha yaşıl və daha dayanıqlı dünyaya töhfə verməkdir. Bu il ölkəmizin COP29 tədbirinə ev sahibliyi edəcəyi üçün biz hesab edirik ki, jurnalistlərin dayanıqlılıq və iqlim dəyişikliyi məsələləri ilə bağlı məlumat vermək üçün zəruri biliklərlə gücləndirilməsi çox önəmlidir”.

Mətbuat gününü qeyd edən jurnalistlər üçün dayanıqlılıq və iqlim dəyişikliyi üzrə təlimdən əlavə Fibonacci intellektual oyunu da təşkil edilib. 30 media orqanını təmsil edən jurnalistlər 6 komandada biliklərini yarışdırıblar. 1, 2 və 3-cü yeri tutan qalib komandalara müxtəlif dəyərli hədiyyələr təqdim edilib. Tədbir haqqında qısa videonu buradan izləyə bilərsiniz.

Hazırda 2,2 milyon abunəçiyə yüksək keyfiyyətli rabitə xidmətləri göstərən “Nar” son 5 ildə Müştəri Loyallığı İndeksinə görə ölkədə lider mobil operatordur. Mobil operator müştəriyönümlülük strategiyasına sadiq qalaraq sərfəli qiymət qarşılığında üstün xidmət təqdim edir.

Azərbaycan Ermənistanı COP29 iqlim sammitinə dəvət edib.

Bunu Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev II Qlobal Media Forumunda xarici jurnalistlərə deyib.

H.Hacıyev bildirib ki, İrəvana rəsmi dəvət göndərilib:

“Muxtar Babayev (COP29-un prezidenti) Ermənistanın xarici işlər nazirinə dəvət məktubu göndərib”.

O qeyd edib ki, hər iki ölkənin rəsmi diplomatik münasibətləri olmadığı halda bu məktubun göndərilməsi Azərbaycanın xoşməramlı və inklüziv yanaşmasının nümunəsidir.

Prezidentinin köməkçisi əlavə edib ki, COP29 qlobal səydir və həlledici danışıqlar “Ermənistan və Azərbaycanın hüdudlarından kənara çıxır”.

“İndi Ermənistan hökumətinin qərar vermə vaxtıdır”, - H.Hacıyev vurğulayıb. (Report)

Sentyabrın 1-də keçiriləcək növbədənkənar parlament seçkilərində namizədlər arasında xeyli maraqlı adlar var. Köhnə deputatlardan bəzilərinin namizədliyini verməməsi nə qədər diqqətdədirsə, deputat olmaq istəyən yeni namizədlər də o qədər maraqla qarşılanır.

AFN.az-a daxil olan məlumata görə, deputat olmaq fikrinə düşənlərdən biri də Azərbaycan Ağsaqqallar Şurasının sədr müavini Bayram Yusifovdur. Onun hansı dairədən namizəd olacağı ilə bağlı hələlik dəqiq məlumatımız yoxdur, lakin namizədliyini vermək üçün hazırlıqlar apardığı bildirilir.

Bu ad əslində oxucularımız üçün yad deyil. Belə ki, bir müddət öncə B.Yusifovun haqqında iş adamının şikayətini ictimailəşdirmişik. Özü də iş adamı olan B.Yusifov 2015-2016-cı illərdə guya Nofəl Hacıyev adlı şəxsə 1.500.000 (bir milyon beş yüz min) manat pul verdiyini iddia edərək, Xırdalan şəhərində, Bakı-Quba magistralının 14-cü kilometrliyinin qərb tərəfində yerləşən “Çinar AN” MTK-ya məxsus yaşayış binalarından 25 mənzil və 1000 kv. metrdən artıq qeyri-yaşayış sahəsinin qanunsuz olaraq öz adına rəsmiləşdirilməsinə nail olub. Halbuki, həmin mənzillər və qeyri-yaşayış sahəsi 2013 və 2014-cü illərdə qanuni şəkildə müxtəlif vətəndaşlara satılıb. Əslində isə Nofəl Hacıyevin rəsmi olaraq “Çinar AN” MTK-ya heç bir bağlılığı yoxdur. O, MTK-da nə payçı, nə də sədr olmayıb, bununla da mənzil satmaq, müqavilə bağlamaq səlahiyyətlərinə də malik olmayıb. Mənbə bildirid ki, Bayram Yusifov Nofəl Hacıyevi aldadıb, müqavilələrin sadəcə olaraq, sığorta üçün girov kimi verilməsini tələb edib, lakin verdiyi pulu aldıqdan sonra həmin 25 mənzilin və qeyri-yaşayış sahələsni də mənimsəyərək sahiblənmək üçün “Çinar AN” MTK-ya qarşı iddia ilə məhkəməyə müraciət edib.

Həmin yazı ilə ətraflı BURADAN tanış ola bilərsiz.

B.Yusifovun əməlləri bununla bitmir. O, başqa bir şirkəti – “Təbriz” MTK-nı da ələ keçirərək “Çinar AN” MTK-nın gününə salıb. Hər iki MTK-ya ümumilikdə 13 milyon 130 min manat ziyan vurub. Bütün bu əməlləri hələ iş adamı olarkən törədən B.Yusifov Ağsaqqallar Şurasının sədr müavini olduqdan sonra da qarşısına başqa məqsədlər qoyub. Bunlardan biri Şuranın sədri olmaq idi, lakin buna nail ola bilmədi. Mərhum Fəttah Heydərovdan sonra bu vəzifəyə Eldar Quliyev gətirildi. İndi isə B.Yusifov deputat olmaq fikrinə düşüb. Maraqlıdır, ola biləcəkmi?!

B.Yusifovun mövqeyini verməyə hazırıq.

Azərbaycanda qaz sayğaclarının yoxlanılması ilə bağlı texniki reqlamentin təsdiq edilməsi gözlənilir.

Bunu İqtisadiyyat Nazirliyi yanında Antiinhisar və İstehlak Bazarlarına Nəzarət Dövlət Xidmətinin əməkdaşı Nəzrin Mirzəzadə jurnalistlərə açıqlamasında deyib.

Qeyd edək ki, bu ilin əvvəlindən qaz sayğacların müayinəsinin həyata keçirdiyi laboratoriya Azərbaycan Dövlət Neft Şirkətinin (SOCAR) “Azəriqaz” İstehsalat Birliyinin nəzarətindən çıxarılaraq Antiinhisar və İstehlak Bazarına Nəzarət Dövlət Xidmətinin tabeliyində olan Azərbaycan Metrologiya İnstitutuna ötürülüb.

Laboratoriyada məişət və sənayedə istifadə olunan ölçmə vasitələrinin yoxlanılması, bu vasitələrin metroloji tələblərə (xəta normalarına) uyğunluğunun təyin və təsdiq edilməsi, sənaye tipli sayğacların, həcm korrektorlarının təmiri və kalibrlənməsi işləri icra edilir. Həmçinin qaz sayğaclarına edilən kənar müdaxilə hallarının müəyyən edilməsi tədbirləri həyata keçirilir.

Utrext Universitetinin (Niderland) alimləri pişik kleptomaniyasının - ev pişiklərinin təsadüfi əşyaları oğurlayıb evlərinə gətirmək meylinin səbəblərini aşkarlayıblar.

Tədqiqat zamanı bioloqlar dünyanın hər yerindən ev heyvanlarının davranışlarını öyrəniblər. Onlardan bəziləri ayda 100-ə qədər oğurluq edib.

Məsələn, Böyük Britaniyanın Bristol şəhərindən olan pişik Çarli hər gün gəzintidən plastik oyuncaqlar, paltar sancaqları, rezin ördək, eynək, bıçaq və digər əşyalarla qayıdır.

Texaslı Kleo isə sosial şəbəkələrdə kompüter siçanı oğurlaması ilə məşhurlaşıb.

Məlum halları təhlil etdikdən sonra alimlər ev heyvanlarını oğurluq etməyə sövq edən bir neçə amili müəyyən ediblər.

Pişiklərin kiçik mədələri var, buna görə də ovlarını öz ərazilərində saxlamağa meyillidirlər. Eyni instinkt onların evə yeyilməz əşyalar gətirməsinə səbəb ola bilər.

Bundan əlavə, müəyyən yun və plastik əşyalar pişikləri cəlb edir, çünki onların tərkibində heyvan mumu növü olan lanolin var.

Tədqiqatçılar qeyd ediblər ki, pişiklər əşyaları sahiblərinə hədiyyə olaraq oğurlamırlar, bunu yalnız öz maraqları üçün edirlər.
gazeta.ru