 |
|
|
Kür çayının suyunun bir hissəsinin su anbarlarında toplanması və qonşu ölkələrdə çayın suyundan istifadənin artması Azərbaycan ərazisində suyun azalmasına təsir edən amillərdəndir.
Bunu Milli Hidrometeorologiya Xidmətinin müvəqqəti rəisi Rafiq Verdiyev deyib.
Onun sözlərinə görə, Kür çayı ölkəyə daxil olanda onun müəyyən hissəsi su anbarlarında toplanılır:
“Əks halda yay aylarında əkin sahələrinin suvarılmasında ciddi problemlə qarşılaşarıq. Ümumilikdə isə əvvəlki illərlə müqayisədə ölkəyə daxil olan suyun həcmi azalıb. Bunun paralelində qonşu ölkələrdə sudan istifadə də artıb ki, bu da Kür çayının suyunun azalmasına təsirsiz ötüşməyib”.
Rafiq Verdiyev deyib ki, qarölçmə nəticələrinə görə Kür çayında suyun səviyyəsinin necə olacağı ilə bağlı nəticələr mart ayının sonuna bəlli olacaq:
“Gürcüstanlı həmkarlarımızla daim əlaqədəyik. Qıraqkəsəmən məntəqəsində stansiyamız var və o məntəqə üzrə ölkəyə daxil olan suyun həcmini qiymətləndirəcəyik. Biz Kür çayı ilə bağlı məlumatı əsasən bu məntəqədən alacağıq. Aprel-may aylarında artımın olması gözlənilsə də, indidən nəsə demək çətindir”.
Martın 15-dən Neftçilər prospekti və Akademik Zərifə Əliyeva küçəsindən nəqliyyat vasitələrinin hərəkəti bərpa olunacaq.
Teref.az APA-ya istinadən bildirir ki, bu barədə Bakı Şəhər Dövlət Yol Polisi İdarəsinin baş inspektoru Araz Əsgərli məlumat verib.
Onun sözlərinə görə, həmin yollarda aparılan təmir işləri bu gün ərazində başa çatacaq. Sabah səhər saatlarından isə yollar tam istifadəyə veriləcək.
Qeyd edək ki, Neftçilər prospekti və Akademik Zərifə Əliyeva küçəsində üç gündür təmir işləri aparılır. Bununla bağlı həmin yollarda avtomobillərin hərəkəti dayandırılıb.
Sabahdan marşrut avtobusları da ənənəvi xətlə hərəkət edəcək.
Bakıda “Dünya Göz” klinikasında göz həkimi işləyən Türkiyə vətəndaşı Mehmet Şeref Öğretmenoğlunun pullarını sürücüsünün sifarişi ilə evində işləyən usta oğurlayıb.
Qaynarinfo-nun əldə etdiyi məlumata görə, oğurluq hadisəsi Mehmet Şerefin sürücüsü Elşən Allahverdiyev tərəfindən planlaşdırılıb və həkimin kirayədə qaldığı villada usta işləyən 1990-cı ildə Sumqayıt şəhərində dünyaya gələn Tofiq adlı usta tərəfindən həyata keçirilib.
Mehmet Şeref üç il əvvəl Elşən adlı taksi sürücüsü ilə tanış olub. Taksi sürücüsü həkimi bir neçə dəfə işə aparıb-gətirdikdən sonra onun etibarını qazanıb.
Həkim Bakıda yaşadığı evdə it və quşlar saxlayırmış. Onlara qulluq etmək lazım olduğu üçün o, Elşənə evin açarının bir kopyasını verib. Mehmet Şeref Elşənə onu işə aparıb-gətirmək üçün ayda 150 manat, bazar günləri əlavə işləyəndə 30-40 manat pul veririrmiş.
Həkim 18 iyul 2021-ci il tarixdə, Qurban bayramı ilə əlaqədər evinə qonaq gələn dostu ilə həyətdə oturub. Həmin vaxtı Elşən də onlarda olub, tez-tez evə girib çıxırmış. Səhəri günü əl çantasında olan dollarları dəyişmək qərarına gəlib. Çantanı açarkən içindəki 2000 dollar və 1700 manat puldan yalnız 1100 dolların orada olduğunu görüb.
Həmin günü o, həyat yoldaşı ilə birlikdə Qubaya dincəlməyə gedib. Geri qayıtdıqdan sonra Elşənə zəng edib ki, gəlib onu işə aparsın. Lakin Elşən gəlməyib, daha sonra ümumiyətlə mobil telefonunu söndürüb. Bundan sonra həkim Elşəndən şübhələnməyə başlayıb və bu barədə bir tanışına bildirib.
Adını demək istəmədiyi tanışı Elşənə zəng edərək, onunla danışdıqdan sonra sonuncu həmin günü axşam saatlarında həkimə zəng vurub, üzrxahlıq edib, 3500 manata yaxın pulu əl çantasından oğurladığını bildirib və yaxın günlərdə evini sataraq ödəyəcəyinə söz verib. Mehmet Şeref ona inanıb və polisə şikayət etməyib.
Axşam saat 19:00 radələrində o, dostları ilə öz evinə qayıdan zaman evinin dəmir hasarının başında usta Tofiqi, darvazanın qarşısında isə öz maşının yanında dayanmış Elşəni görüb. Mehmet Şeref Tofiqdən hasarın başında nə etdiyini soruşub. Sonuncu bildirib ki, guya Elşənin ona olan 50 manat borcunu almağa gəlib. Həkimin yanında tanışları olduğu üçün onlara baş qoşmayıb və çıxıb getmələrini tələb edib. Səhəri günü, Türkiyəyə getmək üçün hazırlıq görən zaman əl çantasını açdıqda içində saxladığı 6000 manatın olmadığını görüb. Elşəndən şübhələndiyi üçün zəng edərək, yanına çağırıb. Sonuncu gələcəyini desə də, telefonu söndürüb.
Mehmet Şeref bundan sonra Elşənin və tanışın hərəkətlərindən şübhələndiyi üçün onları işdən qovub. Bu barədə hüquq-mühafizə orqanlarına müraciət edib.
Məhkəmədə şahid qismində “Dünya Göz” MMC-nin baş direktoru Hüseyin Kucukalı çıxış edərək bildirib ki, xəstəxanada da təmir işlərini təqsirləndirilən şəxs Tofiq aparıb. Mehmet Şeref rəhbərlik etdiyi xəstəxanada həkim işləyir və ona Badamdar qəsəbəsindən kirayə ev tutublar. Evin tavanında çökmə olduğu üçün təmirə ehtiyacı yaranıb. O, da bu işləri görməyi xəstəxanada usta kimi çalışan Tofiqə tapşırıb. Hadisə də sözügedən evdə baş verib.
Təqsirləndirilən şəxs – Tofiq bildirib ki, bütün bu olaylar Elşən Allahverdiyevin sifarişi ilə baş verib.
Hakim Azər Tağıyevin sədrliyi ilə keçirilən məhkəmə prosesində Tofiqə 2 il 9 ay 28 gün azadlığın məhdudlaşdırılması cəzası təyin edilib. Elşən Allahverdiyevlə bağlı isə hər hansı bir qərara rast gəlinməyib.
Hər iki şəxs rüşvət almaqda ittiham olunur
Səfərbərlik və Hərbi Xidmətə Çağırış üzrə Dövlət Xidmətinin Sabunçu Rayon İdarəsinin rəis müavini Adil Hüseynov, bu idarənin Həqiqi hərbi xidmətə çağırış şöbəsinin rəisi Toğrul İsgəndərov həbs olunub.
Onlar rüşvət almaqda ittiham olunur.
Bu barədə Baş Prokurorluğun yaydığı məlumatda bildirilir ki, adları çəkilən şəxslər Korrupsiyaya qarşı Mübarizə İdarəsinin keçirdiyi əməliyyat nəticəsində saxlanılıb.
Adil Hüseynov saxta tibbi rəy əsasında hərbi xidmətə yararsızlıq müddətinin 3 il uzadılması, Toğrul İsgəndərov isə həqiqi hərbi xidmətə cəlb olunmamaq müqabilində rüşvət almaqda ittiham olunur.
"Həmin vəzifəli şəxslərin üzərində və xidməti otaqlarında axtarış aparılan zaman iş üzrə əhəmiyyət kəsb edən sübutlar aşkar edilərək götürülüb. Adil Hüseynov və Toğrul İsgəndərov Cinayət Məcəlləsinin 311.3.2 və 311.3.3-cü (təkrar və külli miqdarda rüşvət alma) maddələri ilə təqsirləndirilən şəxs qismində cəlb olunub. Barələrində məhkəmə qərarı əsasında həbs qətimkan tədbiri seçilib. Hazırda istintaq-əməliyyat tədbirləri davam etdirilir”, – Baş Prokurorluqdan bildirilib.
Adil Hüseynov və Toğrul İsgəndərovun bu ittihama münasibəti, özlərini təqsirli bilib-bilmədikləri məlum deyil.
Azərbaycanın hüquq-mühafizə orqanları İranın casus şəbəkəsinə qarşı xüsusi əməliyyat keçirib.
TEREF.AZ haqqın-a istinadla xəbər verir ki, əməliyyat nəticəsində saxlanılanlar var.
Hüquq-mühafizə orqanlarının xüsusi əməliyyatı nəticəsində saxlanılan iranlı casusların adları açıqlanıb. Bunlar Mənsur Vəlişev, Hilal Əsədov, Nahid Qəhrəmanlı, Elvin Quliyev, İsmayıl İsmayılov, Vüsal Alışev, Elvin, Murad Abdullayev, Mehman Fətəliyev, Bəhruz Kərimov, Samir Salam, Nizami Əhməd, Kərbəlayi Hasil, Kərbəlayi İlqar, Tural Vəliyev, Hacı Maarifçi Əlili, Bəxtiyar Babaşev, Ramil Məmmədov, Nizami Əhməd, Sakif Ağabalayevdir.
Güc stukturlarına yaxınlığı ilə seçilən Telegram kanalları onların fotosunu yayıb:
Türkiyədə Kahramanmaraş mərkəzli zəlzələlərdə dağılan və ya tikinti qaydalarına zidd dəyişikliklərin aşkarlandığı binalarla bağlı aparılan araşdırmalarda 99-u podratçı, 149 məsul şəxs, 13 bina sahibi, 18 binada dəyişiklik edən 279 şübhəli şəxs həbs edilib.
Teref.az xəbər verir ki, fevralın 6-da Kahramanmaraş mərkəzli zəlzələ nəticəsində dağılan və ya qanun pozuntusuna yol verildiyi müəyyən edilən binalarla bağlı Baş prokurorluqlar tərəfindən başladılan araşdırmalarda 1171 şübhəlinin məsuliyyəti müəyyən edilib.İstintaqlar çərçivəsində 77-si podratçı, 217-si binaya cavabdeh, 45-i binaların sahibi, 31-i binada dəyişiklik edən 370 şübhəli şəxs barəsində məhkəmə nəzarəti həyata keçirilib.
Eyni zamanda, 250 şübhəli barəsində axtarış elan edilib. Məlumata görə, 95 nəfər barəsində isə həbs qətimkan tədbiri seçilib.
Araşdırmalar zamanı 22 şübhəlinin xaricdə olduğu müəyyən edilib, 103 şübhəli isə ifadələri alındıqdan sonra sərbəst buraxılıb.
Egey dənizində su nəqliyyatının hərəkəti məhdudlaşdırılıb.
Cebhe.info "TRT Haber"ə istinadən xəbər verir ki, buna səbəb ekstremal hava şəraiti olub.
Belə ki, fırtına kiçik qayıqlar üçün dənizdə hərəkəti təhlükəli edib.
Qeyd edilib ki, Geyikli və Bozcaada adaları arasında müntəzəm reyslə hərəkət edən qayıq marşrutları da ləğv olunub. Dənizdə bütün növ su nəqliyyatının hərəkətinin hava şəraitinin normallaşmasından sonra bərpa ediləcəyi vurğulanıb.
Bu gün Bakının Nəsimi rayonu, Səməd Vurğun küçəsində baş vermiş silahlı insidenti törətməkdə şübhəli bilinən daha 2 şəxs hava limanında Bakı-İstanbul reysində saxlanılıb.
Bakupost.az -ın əldə etdiyi məlumata görə, onlar təcili şəkildə bilet alaraq İstanbula uçmaq istəyiblər. Lakin bu zaman xüsusi xidmət orqanları əməkdaşları həmin təyyarəni uçuşa hazırlaşarkən uçuş zolağından geri qaytarıblar. Cinayəti törətməkdə şübhəli bilinən şəxslər elə təyyarə salonundaca qandallanıb.
Qeyd edək ki, bu gün Bakı Dövlət Sirkinin yaxınlığında silahlı atışma baş verib. hadisə Nicat adlı şəxsə görə baş verib. Belə ki, Nəsimi rayonu, Səməd Vurğun küçəsində, “Vurğun Rezidens”də yerləşən zala məşqə gələn Nicat oradan çıxarkən silahlı hücuma məruz qalıb. Naməlum şəxs onu öldürməyə cəhd etsə də, istəyinə nail ola bilməyib.
Hadisə nəticəsində 2002-ci il təvəllüdlü Fəqan Rəhimli və 1983-cü təvəllüdlü Tamerlan Hüseynov xəsarət alıb. Onlar Kliniki Tibbi Mərkəzin Təcili tibbi yardım şöbəsinə yerləşdirilib.
Bir müddət öncə Bakıdakı iri marketlərdən birində baş verən oğurluq hadisəsi, indi isə şəhərin mərkəzindəki atışmada insanların güllələnməsi ölkənin kriminogen durumu ilə bağlı məsələni gündəmə gətirib. Son zamanlar bu kimi hallarının sayında baş verən dəyişiklik cəmiyyətin narahatçılığına səbəb olub. Bəs görəsən belə kriminogen halların sayı niyə artır və bununla mübarizədə cəmiyyətin üzərinə hansı məsuliyyət düşür?
Mövzunu KONKRET.az-a şərh edən təhlükəsizlik məsələləri üzrə ekspert Elman Nurəliyev bildirib ki, insan mövcud olduqca şəxsi həyata qəsd, oğurluq, talan və bu kimi hadisələr baş verəcək: “Belə kriminogen hadisələrə qarşı bütün dünya mübarizə aparır. Azərbaycanda da hüquq mühafizə orqanları bu cür halların sayının minimuma endirilməsi istiqamətində ciddi səy göstərir. Amma həyat fəaliyyəti olan yerlərdə təhlükə riskinə qarşı hazırlıqlı olmalıyıq. Yəni həm mənəvi, həm psixoloji, həm də praktiki cəhətdən hazırlıqlı olmaq vacibdir. Bu kimi hadisələri müxtəlif kateqoriyalara bölmək olar. Məsələn, obyektlərə, şəxslərə qarşı olan təhdidlər var. Obyektlərə qarşı olunan təhdidlərin sayını minimuma endirmək üçün bütün təhlükəsizlik tədbirlərini vaxtında görmək lazımdır. Əgər obyektdə pul və digər qiymətli əşyalar saxlanılırsa, yaxud insan fəaliyəti varsa, b zaman oğurluq, qarət və talan planı hədəfə çevriləcək. Ona görə də, bu cür obyektlər öz təhlükəsizlik sistemlərini elə qurmalıdırlar ki, özlərini baş verəcək kriminogen hadisələrdən sığortalaya bilsinlər. Yəni nəzarət müşahidə kameraları qurulmalı, buraxılış sistemi olmalıdır. Orada çalışan bütün işçilərə təhlükəsizlik təlimləri keçirilməlidir. Məsələn, insanlara bu cür hadisələr zamanı nə etməli və şübhəli şəxsi necə müəyyənləşdirməli olduğu, nəzarətsiz çantalara necə yanaşılması aşılanmalıdır”.
Ekspert əlavə edib ki, ictimai işlərlə məşğul olan, yaxud vəzifə daşıyan şəxslər də öz təhlükəsizliyini təmin etmək üçün müəyyən addımlar atmalıdır: “Təbii ki, heç kim 100 faizlik sığortalanmadan danışmır. Amma önləyici tədbirlər görməklə bu cür hadisələrdən minimal zərərlə qurtulmaq mümkündür. Həyat fəaliyyətinin təhlükəsizliyi ilə bağlı kurslar fəaliyyət göstərir. Biz müraciət edənlərə bu cür kurslar təşkil edirik. Təhlükəsiz əmək şəraitinin yaradılmasından tutmuş, işdən kənar hallardakı təhlükəsizlik tədbirləri ilə bağlı bütün mövzularda təlimlər keçirilir. Sadəcə olaraq insanların bu təlimlərə marağı yoxdur. Ümumiyyətlə, təhlükəsizlik qaydalarına qarşı biganəlik mövcuddur. İnsanları saxlayıb 30 saniyəlik təlim keçməyə və təhlükəsizlik məsələlərini izah etməyə çalışanda belə, onlar bunu vaxt itkisi kimi xarakterizə edirlər və yayınırlar. Ona görə də, insanların yanaşması və düşüncəsi dəyişməlidir”.
“Biz də eşitmişik ki, bu il "Heydər Əliyev İli" münasibətilə böyük əfv sərəncamı imzalanacaq. Hər il olduğu kimi bu il də ümid edirik ki, Cahangir azadlığa çıxacaq". Bunu Gununsesi.info-ya açıqlamasında “Azərbaycan Beynəlxalq Bankı” ASC-nin İdarə Heyətinin hazırda həbsdə olan sabiq sədri Cahangir Hacıyevin bacısı Əminə Hacıyeva bildirib.
Qardaşının Azərbaycan dövlətinə, mərhum Heydər Əliyevə və indiki ölkə rəhbərinə sadiq olduğunu vurğulayan Əminə Hacıyeva bildirib ki, Cahangir Hacıyevi qabiliyyətinə görə Heydər Əliyev irəliyə çəkib: “Heydər Əliyev onu şəxsən çağırıb, işə təyin edib. Bunu heç kəsin xahişi olmadan edib. Çünki Cahangir qardaşım olsa da çox bilikli, istedadlı insandır. Bir neçə ildir ki, o, həbsdə qalır. Biz onun azadlığının İlham Əliyevin iradəsindən asılı olduğunu düşünürük”.
Cahangir Hacıyev 14 il Azərbaycanın ən böyük banklarından biri olan Azərbaycan Beynəlxalq Bankına (ABB) rəhbərlik edib. Hökmə əsasən, “Azərbaycan Beynəlxalq Bankı” ASC-nin İdarə Heyətinin keçmiş sədri Cahangir Hacıyev 16 il 3 ay müddətinə azadlıqdan məhrum edilib.
Sabiq bankir rəhbərlik etdiyi dönəmdə bankda baş verən qanunsuzluqlarda, ayrılan milyonlarla kreditin geri qaytarılmamasında günahlandırılıb. Cahangir Hacıyevin ölkənin maliyyə bazarında əsas fiqurlardan birinə çevrilməsində ləğv edilmiş MTN generalı Eldar Mahmudovla əlaqələri də əsas rol oynayıb. Uzun illər yaxın münasibətdə olan Cahangir Hacıyev və Eldar Mahmudov bu əlaqələrini quda olmaqla daha da möhkəmləndirdilər. Eldar Mahmudovun oğlu ilə Cahangir Hacıyevin qızının toyu 2012-ci ilin noyabrda baş tutub. Bu yaxın qohumluq əlaqəsi onun imkanlarını və bank sektorundakı nüfuzunu daha da möhkəmləndirdi.
Lakin hər iki şəxsin, Eldar Mahmudov və Cahangir Hacıyevin ulduzu eyni vaxtda söndü. Eldar Mahmudovun gedişi ilə Cahangir Hacıyevin də dəmir barmaqlıqlar arxasındakı yolu göründü. Cahangir Hacıyev 8 ildir həbsdədir və görünür ki, azadlığa buraxıla bilər.
“Bakı” Hüquq Şirkətinin rəhbəri Natiq Ələsgərov “Yeni Müsavat”a deyib ki, Cahangir Hacıyevin əfv olunacağına o qədər də inanmır. Hüquqşünas belə bir ehtimalı istisna etmir: “Azərbaycanda iqtisadi cinayət törətmiş şəxslər əsasən hansısa əmlakı, yaxud da külli miqdarda büdcə vəsaitini mənimsəyən şəxslərin həbsi, məhkəməsi və az sonra azadlığa buraxılması adi hal alıb. Adamlar böyük məbləğləri mənimsəməklə dövlətə, ayrı-ayrı vətəndaşlara çox böyük iqtisadi zərər vururlar. Həbsə alınandan sonra həmin mənimsədikləri məbləğin 15-20 faizini xərcləyir və azadlığa çıxırlar. Nəticədə belə mənimsəmələr, büdcə pullarını oğurlamalar, vətəndaşlara qarşı vəzifə daşıyıcılarının mütəşəkkil dəstə şəklində cinayətlərinin sayı artır. Bir tərəfdən tv-lərdə "Məhkəmə-hüquq sistemində islahatların dərinləşdirilməsi haqqında" prezident fərmanından danışırlar, o biri tərəfdən isə dövlətə, xalqa qarşı iqtisadi cinayətlər etmiş şəxsləri azad edirlər. Azərbaycan vətəndaşında məhkəmə-hüquq sisteminə inam elə belə də yerlə sürünür. Bu cür hallar isə bu inamsızlığı daha da dərinləşdirir.
Konkret Cahangir Hacıyevə gəldikdə, ona qarşı irəli sürülən ittihamlara nəzər salsaq, bu adam uzun illər ölkənin sistem xarakteri daşıyan bankına rəhbərlik edib və həmin bankı rəsmən çapıb talayıblar. Aydın məsələdir ki, bu cinayəti Cahangir Hacıyev təkbaşına etməyib və edə də bilməzdi. Lakin məhkəməsində Cahangir Hacıyev bu haqda susmağa üstünlük verdi. Yəni özünün cinayət ortaqlarını ələ verməkdən yayındı. Belə bir halda ona qanunun ən sərt üzü göstərilməli idi. Onun məhkəməsi çoxsaylı qanun pozuntları ilə aparıldı. Bununla belə, barəsində çıxarılan hökm dəyişdirilməməlidir.
“Azərbaycan Beynəlxalq Bankı” ASC və onun törəmə müəssisəsi olan “Bank MBA Moskva” MMC-yə 69 müəssisənin veksellər və kredit borcları, eləcə də Azərbaycan Respublikasının ərazisində olan 17 yerli müəssisə və şirkətə verilmiş kreditlər üzrə banka dəymiş ziyan ümumilikdə 4 milyard 100 milyon manat təşkil edib. Cahangir Hacıyevin azadlığa buraxılması onun yolu ilə getmək istəyənləri həvəsləndirəcək. Bu baxımdan, Cahangir Hacıyevə humanist münasibət qəbulolunmazdır və gələcəkdə dövlətə xeyir verməyəcək".
Hüquqşünas deyir ki, “Məhkəmə-hüquq sistemində islahatların dərinləşdirilməsi haqqında” prezident fərmanına görə vurduğu iqtisadi zərəri ödəməyən şəxs məhkəmənin müəyyən etdiyi cəzanı tam şəkildə çəkməlidir: “Bunun üçün cəzaçəkmə müəssisələrində rüşvət yığışdırılmalı, qandallanmış korrupsionerlər üçün türmədə lüks yaşayış şəraiti tam şəkildə aradan qaldırılmalıdır. Bu gün dövlət büdcəsini talayan məmurlar həbsə düşəcəkləri halda türmədə aylıq 5-10 min manat hesabına günlərinin pis keçməyəcəyini bilirlər. Ona görə də çox böyük məbləğlər oğurlamağa iştahlıdırlar. Bilirlər ki, oğurladıqlarının az bir hissəsini verib türmədə yaşayışlarını təmin edəcəklər. Yəni özünə orada yüksək şəraitli kamera düzəltdirə biləcəklərinə əmindirlər. Belə münasibətlər sisteminin varlığı büdcə oğurluqlarını stimullaşdırır”.
Hüquqşünas məsələnin digər tərəfinə də diqqət çəkdi: “Məmurların cinayətlərini müəyyən etmək üçün ilk növbədə onların gəlir və xərcləri üzərində nəzarət olmalıdır. Məmurların gəlir və xərclərinin bəyan edilməsi haqda qanunvericilik qəbul edilməli və mütləq icra olunmalıdır. Digər tərəfdən, məhkəmə-hüquq islahatları da dərinləşdirilməlidir. Əvvəl-axır hər şeyə qiymət verən məhkəmələrdir. Onlar da korrupsiya mexanizminin tərkib hissəsi olduğu halda, təbii ki, mübarizə səmərəli olmayacaq. Təəssüf ki, məhkəmə sistemi də Prezidentin təşəbbüslərini əngəlləyir. Məsələn, 2018-ci ildə dövlət başçısı "Məhkəmə-hüquq sistemində islahatların dərinləşdirilməsi haqqında" Fərman imzaladı. Onun bəzi müddəaları hələ də icra olunmayıb. Fərmanda “Elektron məhkəmə” informasiya sistemində dərc edilən məhkəmə qərarları üzrə müxtəlif meyarlar əsasında effektiv axtarış aparmaq üçün müvafiq funksional imkan yaradılması tapşırılmışdı. Burada məqsəd vahid məhkəmə təcrübəsinin formalaşdırılmasıdır. Yəni əhali, vəkillər, digər maraqlı şəxslər oxşar işlər üzrə əvvəlki məhkəmə qərarlarını rahatlıqla tapmaq imkanına malik olmalıdır ki, məhkəmələr vahid təcrübədən kənarlaşa bilməsin. Bu gün ortaya qoyulan axtarış sistemi dünyanın ən qəliz sistemlərindən biridir. Əksər məhkəmələr, ümumiyyətlə, qərarlarını dərc etmir. Bu, prezident fərmanına əhəmiyyət verilməməsidir. Dövlət Statistika Komitəsinin məlumatına görə, Azərbaycanda ən geniş yayılmış cinayət dələduzluq və oğurluqdur. İndi dələduzluq üzrə maddələrdə nəzərdə tutulub ki, bir şəxs vurduğu zərəri ödəyirsə, bundan başqa vurduğun zərərin yarısını dövlət büdcəsində keçirirsə, məsuliyyətdən azad olunur. Cəza siyasətinin humanistləşdirilməsi cəza ilə bağlı məsələlərin iqtisadi tərəfinin də həllini tənzimləyir. Azadlıqdan məhrumetmə dövlətə heç də ucuz başa gəlmir. Penitensiar Xidmətin saxlanmasına dövlət büdcəsindən, faktiki, vətəndaşların cibindən ayrılan vəsaitlərin miqdarı dəfələrlə azalacaq. Böyük nəzarətçi korpusu, çoxsaylı maşın parkı, idarəetmə aparatı təkmilləşəcək. Oğurluq, dələduzluq, vergidən yayınma, mənimsəmə kimi cinayətlərdə vətəndaş vurduğu ziyanı ödəyirsə, üstəlik cərimə də ödəyirsə, onu həbs etməklə nəyə nail olmaq olar? Bu sahədə cərimələrin artırılması da düzgündür. Bundan dövlət büdcəsinə ancaq xeyir var. Digər tərəfdən də bu hallar korrupsiya cinayətlərinin də qarşısını alacaq. Azərbaycanda vətəndaşların əksəriyyətinin ən qorxduğu məsələ azadlıqdan məhrum edilmədir. Ən kasıb, imkansız birinə həbs təhlükəsi yaranırsa, qohum-əqrəba, dost-qardaş bir yerə toplanır, pul yığır və çıxış yolu aramağa, həbsdən yayındırmağa yollar axtarırlar. Hakimə, prokurora yollar axtarırlar ki, məsələni həll etsinlər. Onsuz da yol tapır, pullarını verirlər. Belədirsə, qoy həmin pullar kimlərinsə cibinə deyil, dövlət büdcəsinə getsin. Korrupsiya olanda vətəndaşın xərci qat-qat artıq olur. Belə isə vətəndaş vurduğu ziyanı ödəyəcək, dövlət büdcəsinə cərimə ödəyəcək. Bu, məsələnin daha ədalətli həlli olmaqla yanaşı, büdcəni məhbusa pul ayırmaqdan azad edir və büdcəyə əlavə gəlir daxil olmasına yol açır. Əgər Cahangir Hacıyev azadlığa çıxmaq istəyirsə, bu ona təxminən 6 milyard manatdan bir qədər artıq vəsaitə başa gələcək. Qanun bunu deyir. Belə bir şəxsin əfvlə azadlığa çıxması qanunların əhəmiyyətini xeyli azalda bilər".
“Yeni Müsavat”