 |
|
|
Lerikdə yerləşən məşhur "Relax” İstirahət Mərkəzinin bir hissəsi sökülə bilər.
Qaynarinfo-nun əldə etdiyi məlumata görə, rəsmi olaraq 14 hektar ərazini əhatə edən "Relax” İstirahət Mərkəzi əlavə olaraq meşə fonduna məxsus torpaq sahəsinin 4,77 hektarlıq sahəsində də qeyri-qanuni olaraq obyektlər tikib.
Artıq məsələ ilə bağlı ekalogiya və təbii sərvətlər naziri Muxtar Babayevin də xüsusi tapşırığı var. Tapşırığa əsasən, İstirahət Mərkəzinin meşə fonduna daxil olan ərazisi tam olaraq boşladılmalıdır.
Həmçinin təbiətə dəymiş ziyanla bağlı kompensassiya da ödənilməlidir. Ekologiya və Təbii Sərvətlər Nazirliyinin mütəxəssisləri tərəfindən bununla bağlı akt tərtib edilib. Artıq Lənkəran Regional Meşə Təsərrüfatı Mərkəzi məhkəməyə də müraciət edib.
Materialları nəzərdən keçirən Şirvan şəhər Məhkəməsi mövcud iddia tələbi əsasında Lerik Rayon Məhkəməsi tərəfindən göndərilmiş işin aidiyyəti üzrə baxılmasına dair fikir ayrılığının həll edilməsi üçün işi Azərbaycan Respublikası Ali Məhkəməsinə göndərib.
Ali Məhkəmədə iddia təsdiqini taparsa, "Relax” İstirahət Mərkəzinin rəhbərliyi tərəfindən təbiətə dəymiş maddi ziyanın ödəniləcək, torpaq sahəsi üzərində yerləşən qeyri-yaşayış sahələri isə söküləcək.
Qeyd edək ki, "Relax” İstirahət Mərkəzinin sahibi millət vəkili İqbal Məmmədovdur. İstirahət Mərkəzində adam ölümündən tutmuş məmurların döyülməsinə kimi qalmaqallı hadisələr baş verib.
2019-cu ildə öz vəzifə borclarını yerinə yetirmək üçün gələn vergi məmurları deputatın qohumları və oğlu Mirhəmid Nərimanlı tərəfindən döyülmüşdü. Nəticədə deputatın oğlu da daxil olmaqla 6 qohumu həbs olunmuşdu.
Ötən il Bakının Xəzər rayonu ərazisində yerləşən uşaq və qadın sığınacağına basqın edilməsi və oraya sığınan qadının əri tərəfindən qətlə yetirilməsi hadisəsi ilə bağlı açılmış cinayət işi üzrə məhkəmə prosesi başa çatıb.
Globalinfo.az xəbər verir ki, Bakı Ağır Cinayətlər Məhkəməsində hakim Rahib Salmanovun sədrliyi ilə keçirilən proses ötən həftə başa çatıb. 27 yaşlı arvadını sığınacaqda qətlə yetirən 1987-ci il təvəllüdlü Sübhan Hətəmov (ad və soyadlar şərtidir) Cinayət Məcəlləsinin 120.1-ci (qəsdən adam öldürmə) maddəsi ilə ittiham edilib.
Məhkəmə istintaqı zamanı qətl hadisəsinin təfərrüatı məlum olub. Sübhan Hətəmov ifadəsində bildirib ki, hadisədən bir müddət əvvəl arvadı Ülkər Hətəmova (ad-soyad şərtidir) əməliyyat olunması üçün xəstəxanaya yerləşdirilib. O, həmin vaxt həyat yoldaşının xəstəxananın palatasında orada işləyən mühafizəçi ilə öpüşdüyünü görüb. Bundan sonra Sübhan arvadının başqa şəxslə də münasibətdə olmasını bilib və ailədəki münasibətlər lap pisləşib.
Həyat yoldaşını 16 bıçaq zərbəsi ilə qətlə yetirən Sübhan ifadəsində bunları deyib:
“2010-cu ildə Ülkərlə tanış olduq, bir-birimizi sevib, evləndik. 3 uşağımız dünyaya gəldi. Xəzər rayonunda mənim valideynlərimlə birgə yaşamağa başladıq. Anam 2017-ci ildə vəfat etdi, atamla hazırkı dövrədək birgə yaşamışıq. Evli olduğumuz müddətdə Ülkərlə ailədaxili münaqişələr olurdu, o, sərbəst yaşamaq istədiyini deyirdi və bir neçə dəfə Bərdə rayonuna – atasının evinə də getmişdi. Hirsim soyuduqdan sonra gedib onu yenidən evə gətirirdim. Təxminən 5 ay əvvəl Ülkər qadın problemi ilə əlaqədar, həmçinin kor bağırsağından əməliyyat olunmaq üçün 26 saylı xəstəxanaya yerləşdirildi. Ülkər zəif olduğundan həkim demişdi ki, əməliyyatdan öncə müalicə alsa yaxşıdır. O, xəstəxanada olarkən axşam saat 19 radələrində ərzaq alıb yanına getdim. Palataya daxil olarkən Ülkəri xəstəxanada mühafizəçi işləyən Əliyar adlı şəxslə öpüşən vəziyyətdə gördüm. Həmin vaxt Əliyar dərhal palatadan qaçdı, Ülkər isə səhv hərəkət etdiyini dedi, uşaqlara görə onu bağışlamağımı istədi. Sonra Ülkər əməliyyat olundu və onu evə gətirdim. Uşaqların xətrinə arvadımı bağışlamışdım, ona telefon işlətməyi qadağan etmişdim”.
Təqsirləndirilən şəxs bildirib ki, bundan sonra da ailədəki münasibətlər yaxşılaşmayıb:
“Mübahisələr səbəbindən o, yenə Bərdəyə atasının evində getdi. Təxminən bir həftə sonra Ülkər əlaqə saxlayıb, uşaqları görmək istədiyini dedi. Əgər ona mobil telefon alsam, mənimlə barışacağını bildirdi. Mən də telefon alıb, Bərdəyə gedib Ülkəri gətirdim. Təxminən 3 ay keçdi, sakitlik idi. Bir müddət sonra onun telefonunu götürüb yoxlayan zaman başqa nömrədə Vatsap proqramından istifadə etdiyini gördüm. Oraya girəndə arvadımın bir oğlanla yazışdığını, həmin oğlana çılpaq şəkillər, videolar atdığını gördüm. Ülkər ilk olaraq hər şeyi inkar etdi, sonra isə uşaqların xətrinə onu bağışlamağımı dedi. Ülkər mənimlə evlənməmişdən əvvəl həmin oğlanla sevgili olduqlarını, bir-birini istədiklərini, lakin o vaxt ailəsinin razı olmadığını, həmin oğlan ilə bir neçə dəfə təbii yolla cinsi əlaqədə olduqlarını dedi”.
Sübhan Hətəmov qeyd edib ki, bundan sonra artıq arvadını öldürmək qərarına gəlib:
“Lakin qohumlarım məni sakitləşdirib boşanmağın ən yaxşı yol olduğunu dedilər, mən də razılaşdım. Həmçinin Ülkərin ailə üzvləri ilə əlaqə saxladım, video, şəkilləri onlara da göndərdim. Ülkərin qohumları onu qəbul etmədiklərini dedi. Onun telefonunu alıb satdım. Bir gün sonra isə arvadım evdən qaçıb polis şöbəsinə gedərək məndən şikayət etdi. Guya onu döydüyümü, təcavüz etdiyimi, bu səbəbdən sığınacaq istədiyini bildirdi. Onu sığınacağa yerləşdirdilər, sonra uşaqları da oraya apardılar. Məni Xəzər RPİ-nin 3-cü polis bölməsinə dəvət edib, izahatımı aldılar və orada arvadımın dediklərinin yalan olduğunu bildirdim. Ülkərin məqsədi məni həbs etdirib sərbəst həyat yaşamaq idi. Hadisədən bir gün əvvəl sığınacağa gedib şikayətini geri götürməsini, boşanıb hər kəsin öz həyatını yaşayacağını dedim. Məndən boşanacağını, lakin atasının evinə də getməyəcəyini, mənimlə də əlaqə saxlamaq istəmədiyini, onsuz da hər şeyin üzə çıxdığını, həmin oğlan ilə bir-birini istədiklərini və onunla yaşayacağını dedi. Sığınacaqdan çıxdıqdan sonra onun valideynləri ilə əlaqə saxlayıb Bakıya dəvət etdim”.
Həbs edilmiş şəxs əlavə edib ki, qayınatasıgil Bakıya gələndən sonra birgə sığınacağa gediblər. Orada Ülkər bütün qohumlarından imtina etdiyini deyib:
“Onlar sığınacaqdan çıxıb getdikdən bir neçə saat sonra, saat 19 radələrində mən təkrar sığınacağa getdim, bu dəfə mənimlə danışmağa çıxmadı. Hasardan sığınacağın həyətinə tullandım. İlk olaraq sığınacağın mətbəxinə baxdım və Ülkərin orada olduğunu gördüm”.
Bundan sonra Sübhan zorla Ülkəri sığınacağın həyətinə çıxarıb və mətbəxdən götürdüyü bıçaqla arvadına 16 zərbə endirərək onu oradakı insanların gözü qarşısında öldürüb.
Məhkəmədə mərhum Ülkər Hətəmovanın atası qızının daha əvvəl başqa şəxslə münasibətdə olduğunu biliklərini deyib. O, Sübhana etdiyi hərəkətə görə bəraət qazandırmadığını bildirsə də, ondan şikayətçi olmadığını deyib:
“Sübhanın niyə belə etdiyini başa düşürəm və 3 azyaşlı uşaqlarına görə ona qarşı heç bir şikayət və ya tələbimiz yoxdur”.
Bundan başqa Ülkərin gizli münasibətdə olduğu Rafiq adlı şəxs də şahid qismində dindirilib. O, Ülkərin evlənəndən sonra onu axtarıb tapdığını və Bakıda müxtəlif ünvanlarda, əsasən hotellərdə görüşdüklərini bildirib. O, Ülkərə onunla ailə qurmayacağını bildirdiyini və başqa qızla evlənəcəyini əvvəldən söyləməsini də qeyd edib.
Məhkəmədə həmçinin məlum olub ki, Sübhan barəsində qətl törətmə maddəsi ilə yanaşı Cinayət Məcəlləsinin 158-ci, yəni Hüquqi şəxslərin binalarının (otaqlarının) toxunulmazlığını pozma maddəsi ilə də iş açılıb.
Bakı Ağır Cinayətlər Məhkəməsində hakim Rahib Salmanovun sədrliyi ilə keçirilən prosesin yekununda ona 10 il həbs cəzası təyin edilib.
Su problemi son günlər paytaxt sakinlərinin ümumi probleminə çevrilib.
Məlumata görə, Suraxanı, Nərimanov, Xəzər, Sabunçu, Xətai rayonlarında həftələrdir su gəlmir.
Bəzən su təminatı bərpa edilsə də, bu sevinc uzun çəkmir.
Sakinlərin sözlərinə görə, “Azərsu” ASC-nin qaynar xətti ilə əlaqə saxladıqda anbarlarda su ehtiyatının olmaması ilə bağlı cavab alırlar.
Baku TV-nin mövzu ilə bağlı hazırladığı süjeti təqdim edirik:
Azərbaycan Ali Məhkəməsinin sədri üçün tələb olunan 68 yaş həddini ötən gün tamamlayan 70 yaşlı Ramiz Rzayev vəzifəsindən getmək istəmir.
Belə ki, mətbuata açıqlama verən Ramiz Rzayev yeni qanuna görə onun səlahiyyət müddətinin başa çatmadığını deyib.
Bununla da Rzayev hələ uzun illər Ali Məhkəmə sədri postundan getmək istəmədiyini nümayiş etdirib.
Sirr deyil ki, ölkənin məhkəmə hüquq-sistemininin məhv edilməsində, ölkə vətəndaşının məhkəmə ədalətinə inamının itməsində xüsusi rolu olan şəxslərdən biri də məhz Ramiz Rzayevdir.
Qeyd edək ki, hələ bir neçə il əvvəl Prezident İlham Əliyev Azərbaycanda məhkəmə-hüquq islahatlarının dərinləşdirilməsi ilə bağlı fərmanı olub.
Həmin fərmanda bir neçə dəfə “korrupsiya” ifadəsinin yer alması əslində bu sahədə vəziyyətin hansı səviyyədə olduğunun isbatı idi.
Bu gün Avropa Şurasına üzv ölkələr içərisində Azərbaycan Avropa İnsan Hüquqları Məhkəməsinə ən çox şikayət göndərilən ölkələrdən biridir.
Hər il yüzlərlə vətəndaşın Azərbaycana qarşı işi üzrə qərarlar qəbul olunur. Bu qərarlara görə dövlət büdcəsindən külli miqdarda vəsaitlər vətəndaşlara ödənilir.
Ramiz Rzayevin fəaliyyəti nəticəsində həm də büdcəyə ziyan gəlir.
Azərbaycan Avropa İnsan Hüquqları Konvensiyasını ratifkasiya edəndən sonra Ali Məhkəmə Plenumu Avropa İnsan Hüquqları Məhkəməsinin presedent hüququnun məcburiliyinin dövlət tərəfindən tanınması barədə xüsusi qərar qəbul edib.
Ötən illərdə nə baş verib?
Elə bir həftə, yaxud da elə bir ay olmur ki, konvensiyanın 5 və 8 (azadlıq və ədalətli məhkəmə araşdırması hüququ) -ci maddələrinin pozuntuları təkrarlanmasın.
Bu işdə isə əsas məsuliyyət payı ömürlük Ali Məhkəmə sədri olmaq arzusu ilə yaşayan Ramiz Rzayevin üzərinə düşür.
Pərviz Həşimli
Gununsesi.info
Ermənilərin təxribatı ilə törədilən Sumqayıt hadisələrindən 35 il ötür.
1988-ci il fevralın 28-də baş vermiş bu hadisələr SSRİ Dövlət Təhlükəsizlik Komitəsinin erməni millətçiləri ilə birgə Azərbaycana qarşı təşkil etdiyi və həyata keçirdiyi təxribatların növbəti tərkib hissəsi idi. Məqsəd isə hər zaman olduğu kimi, dünya ictimaiyyətində yanlış rəy formalaşdırmaq, antiazərbaycan əhval-ruhiyyəsi yaratmaq idi. Bütün şahid ifadələri Sumqayıt hadisələrinin təşkilatçısının erməni, iki dəfə məhkum edilən Eduard Qriqoryan olduğunu sübut edir. Qriqoryan Sumqayıt hadisələri zamanı beş ermənini şəxsən öldürüb. Bir sözlə, Sumqayıtda etnik zəmində törədilən iğtişaş həmin dövrdə bu sıradan olan məqsədyönlü təxribatların kulminasiyası idi.
Sumqayıt şəhərinin əhalisi 1988-ci ildə 258 min nəfər idi və bunun təqribən 18 minini etnik ermənilər təşkil edirdi. 1988-ci ilin fevralına qədər Sumqayıtda etnik zəmində hər hansı qarşıdurma olmayıb və bu gün də Sumqayıt digər Azərbaycan şəhərləri kimi çoxmillətli və çoxkonfessiyalı xüsusiyyətini saxlamaqdadır.
1988-ci il fevralın 26-da Sumqayıtın mərkəzi meydanı Azərbaycanın Dağlıq Qarabağ regionunda ermənilər tərəfindən iki gəncin öldürülməsinə etiraz olaraq nümayişçilər tərəfindən tutuldu. Erməni ekstremistləri və təxribatçı agentlər tərəfindən bu etiraz aksiyası iğtişaşa doğru təhrik edildi. İğtişaşı araşdırmaq üçün SSRİ Baş Prokurorluğu tərəfindən cinayət işi başlandı, xüsusilə mühüm işlər üzrə müstəntiq Vladimir Qalkinin rəhbərliyi ilə ölkənin müxtəlif regionlarından cəlb edilmiş 231 nəfər istintaqçı və bir o qədər də əməliyyatçıdan ibarət xüsusi istintaq-əməliyyat qrupu yaradıldı. SSRİ Baş Prokurorluğunun apardığı istintaq nəticəsində iğtişaş zamanı 6 azərbaycanlının öldürüldüyü müəyyən edildi. Məhkəmənin qərarı ilə 92 nəfər uzunmüddətli həbs cəzasına, bir nəfər isə ölüm hökmünə məhkum olundu. Lakin SSRİ Baş Prokurorluğu tərəfindən aparılmış istintaqla iğtişaş iştirakçılarının yalnız bir qismi müəyyən edilib məhkəmənin qərarı ilə cəzalandırıldı, SSRİ-nin siyasi rəhbərliyi və SSRİ Dövlət Təhlükəsizlik Komitəsinin təzyiqləri nəticəsində istintaq məntiqi sonluğa çatdırılmadı, onun təşkilatçıları və sifarişçiləri müəyyən edilmədi.
Bu cinayətin əsl mahiyyətini açmaq, SSRİ Baş Prokurorluğunun üstündən sükutla keçdiyi məqamları araşdırmaq üçün Azərbaycanın qəti siyasi iradəsinin təzahürü olaraq, Azərbaycan Respublikasının Prezidenti İlham Əliyevin göstərişi və Baş prokurorun qərarı ilə həmin kütləvi iğtişaşlarla əlaqədar keçmiş SSRİ Baş Prokurorluğu tərəfindən istintaqı aparılaraq sonradan dayandırılmış beş cinayət işinin icraatı təzələnərək vahid icraatda birləşdirildi və istintaqın aparılması Baş prokurorun birinci müavininin rəhbərliyi ilə prokurorluq, Daxili İşlər Nazirliyi və Dövlət Təhlükəsizliyi Xidmətinin müstəntiq və əməliyyatçılarından ibarət yaradılmış istintaq-əməliyyat qrupuna həvalə edildi.
İstintaq-əməliyyat qrupu tərəfindən həyata keçirilmiş zəruri istintaq-əməliyyat tədbirləri nəticəsində hadisələrin həqiqi mahiyyəti üzə çıxıb, iğtişaşların sovet rəhbərliyində təmsil olunmuş ermənipərəst qüvvələrin göstərişi ilə əvvəlcədən hazırlanmış ssenari üzrə erməni separatçı qüvvələri tərəfindən törədildiyi müəyyən edilib. Buna sübut olaraq demək olar ki, 2016-cı il martın 31-də Moskva şəhərində jurnalist Səadət Qədirovanın “Sumqayıt hadisələri barədə ilk mənbələrdən” adlı kitabının təqdimat mərasimində SSRİ prokurorluğunun ilkin istintaq-əməliyyat qrupunun üzvü olmuş Vladimir Kaliniçenko və digərləri çıxış edərək Sumqayıt hadisələrinin erməni lobbisinə xidmət edən SSRİ rəhbərliyinin sifarişi ilə SSRİ Dövlət Təhlükəsizlik Komitəsi tərəfindən təşkil olunduğunu, bu səbəbdən də iğtişaşların təşkilatçılarından heç kimin məsuliyyətə cəlb olunmadığını bildiriblər.
Hazırkı istintaq qrupu tərəfindən toplanmış materialların qiymətləndirilməsi və təhlili təsdiq edir ki, Sumqayıtdakı iğtişaş Azərbaycana qarşı Ermənistan xüsusi xidmət orqanları və SSRİ Dövlət Təhlükəsizlik Komitəsi tərəfindən təşkil edilmiş təxribat olub. SSRİ Konstitusiyası əsasında Dağlıq Qarabağın Azərbaycandan ayrılmasının qeyri-qanuniliyini dərk edən erməni ideoloqları və SSRİ rəhbərliyində onları açıq dəstəkləyən şəxslər ermənilərin və azərbaycanlıların birgə yaşamasının qeyri-mümkünlüyünü əsaslandırmaq, azərbaycanlıların artıq tam şəkildə Ermənistan ərazisindən qovulmasını təmin etmək və Azərbaycanı nüfuzdan salmaq üçün bu təxribata əl atıblar.
1988-ci ilin yanvar-fevral aylarında, yəni, Sumqayıtda kütləvi iğtişaş baş verməzdən əvvəl şəhərdə fəaliyyət göstərən 14 əmanət kassasından milliyyətcə erməni olan 84 əmanətçi tərəfindən 143 min 64 rubl məbləğində əmanətlər götürülüb. İstintaqın gedişində, həmçinin məlum olub ki, həmin aylarda şəhərdə fəaliyyət göstərən poçt bölmələrindən Ermənistanla çoxsaylı telefon danışıqları aparılıb, pul köçürmələri edilib.
İstintaq zamanı müəyyən edilib ki, 1988-ci il fevralın 27-29-da Sumqayıt şəhərində baş vermiş məlum hadisələrin fəal iştirakçılarından biri məhz Eduard Qriqoryan olub. Qriqoryan öz ətrafında adamları cəmləşdirib onlara rəhbərlik edərək, “ermənilərə ölüm”, “ardımca” və sair çağırışlarla özündə olan və əvvəlcədən hazırlanmış siyahıya əsasən erməni millətindən olan şəhər sakinlərinin evlərinə hücumlar həyata keçirib. İstintaq zamanı hücuma, zorakılığa və işgəncələrə məruz qalmış erməni millətindən olan zərərçəkmişlər (Lyudmila və Karina Mejlumyan bacıları, Manvel Petrosyan və digərləri) göstəriblər ki, onların evlərinə hücum edənlərə rəhbərlik və göstəriş verən məhz Eduard Qriqoryan olub, orada olan insanlar onun göstəriş və əmrlərinə əsasən hərəkət ediblər. İstintaq zamanı maraqlı bir fakt da üzə çıxıb.
Belə ki, erməni millətindən olan Sumqayıt şəhər sakinlərinin öldürülməsinə görə məhkum olunmuş Eduard Qriqoryan 1989-cu il dekabrın 22-də hökm oxunduqdan sonra - SSRİ mövcud olduğu zaman – 1991-ci il avqustun 26-da Ermənistan Respublikası, Yerevan şəhər 1 saylı istintaq təcridxanasına köçürülüb. Ortaya sual çıxır ki, hansı “xidmətlərinə” görə Eduard Qriqoryan Ermənistana təhvil verilib? 2015-ci il fevralın 9-da Eduard Qriqoryanın 2000-ci il sentyabrın 1-nə kimi qüvvədə olan Azərbaycan Respublikası Cinayət Məcəlləsinin müvafiq maddələri ilə təqsirləndirilən şəxs qismində cəlb edilməsi barədə qərar çıxarılıb, məhkəmənin qərarı ilə həbs qətimkan tədbiri seçilməklə barəsində axtarış verilib.
İstintaqla Sumqayıt şəhərində yaşayan ermənilərin böyük bir hissəsinin “Krunk” cəmiyyətinə pul vəsaiti köçürdüyü müəyyən edilib. Sumqayıt şəhərində zərərçəkən ermənilərin əksəriyyəti Dağlıq Qarabağ Muxtar Vilayətində fəaliyyət göstərən “Krunk” cəmiyyətinə könüllü maddi vəsait köçürməkdən imtina edənlər olub. Belə ki, cinayətkar dəstə bir binaya, bloka daxil olaraq birinci mərtəbələrdə yerləşən erməni millətindən olan sakinlərin evlərinə daxil olmayaraq, yuxarı mərtəbələrdə yaşayan ermənilərin mənzillərinə hücum ediblər. Sonradan məlum olub ki, hücuma məruz qalmayan evlərin sahibləri “Krunk” cəmiyyətinə vaxtlı-vaxtında pul vəsaitləri köçürənlərdir. Şahidlərin ifadələri ilə müəyyən edilib ki, “Krunk” cəmiyyətinə pul köçürən ermənilərin evləri hücuma məruz qalmayıb. Hətta müəyyən edilib ki, erməni millətindən olan musiqiçilər toydan və digər tədbirlərdən əldə etdikləri pul vəsaitinin bir hissəsini “Krunk” cəmiyyətinə köçürüblər.
Cinayət işinin materialları bir daha göstərir ki, Sumqayıtın azərbaycanlı sakinlərinin fərdi humanizmi və şücaəti olmasaydı, hadisələr planlaşdırılmış təxribat planına uyğun olaraq daha geniş miqyas alardı. Milliyyətcə erməni olan şahidlərin ifadələrindən göründüyü kimi, onlarla erməni hadisələr vaxtı azərbaycanlı ailələr tərəfindən öz evlərində yerləşdirilməklə xilas edilib.
SSRİ dövründə foto-video çəkilişə xüsusi nəzarət və senzura tətbiq olunmasına baxmayaraq, hadisələrin əvvəlcədən quraşdırılmış vasitələrlə foto-video çəkilişi aparılıb və dərhal SSRİ ərazisindən çıxarılaraq erməni lobbi təşkilatları vasitəsilə antiazərbaycan kampaniyasının tərkib hissəsi kimi yayılıb.
Ermənistan və erməni lobbisi dairələri tərəfindən Sumqayıt hadisələri qəsdən Azərbaycana qarşı təbliğat və dezinformasiya məqsədilə istifadə edilsə də, Azərbaycan dövlətinin həyata keçirdiyi tədbirlər, aparılmış obyektiv və faktlara söykənən istintaq materialları ilə həmin iğtişaşların məhz erməni millətçilərinin və onların havadarlarının öz məkrli niyyətlərinə nail olmaq məqsədilə təşkil edilərək törədilməsi kifayət qədər və təkzibedilməz faktlarla sübuta yetirilib.(Report)
Dördotaqlı evi məcburi köçkün tərəfindən zəbt olunan sumqayıtlı ailə 10 illərdir ki, kirayələrdə qalır.
APA xəbər verir ki, Ağakişiyevlər ailəsi 1994-cü ilə kimi Ağakişiyev Firuddin Balaqadaş oğluna uzun illər işlədiyi, Sumqayıt şəhərində yerləşən “Ximkombinat”dan (indiki Üzvi-Sintez Birliyi )1978-ci ildə verilən evdə yaşayıblar. 1994-cü ildə müraciətləri əsasında icra hakimiyyəti tərəfindən onlara köhnə evi dövlətə təhvil vermək şərti ilə verilən yeni dördotaqlı evə köçmək istəyərkən məlum olur ki, onların halal mənzili Kəlbəcərdən məcburi köçkünlər Muxtarov Zakir Ədil oğlu, Muxtarov Solmaz Ədil qızı və onların ailəsi tərəfindən zəbt olunub. Ailə Sumqayıt sakininin mənzilinə qapısını sındıraraq daxil olub. Bununla da Ağakişiyevlər dövlətə təhvil verdikləri evə geri qayıdıblar. Amma bu evdə yaşamaq da onlara qismət olmayıb.
Beləliklə hər iki evini itirən ailə o gündən kirayələrdə gün keçirir. Ağakişiyevlər indiyədək kirayələrdə 30 min manatdan çox pul xərclədiklərini bildirirlər.
Həqiqət Ağakişiyeva deyir ki, həyat yoldaşı Firuddin Ağakişiyev rəhmətə gedənə kimi öz evlərində yaşamaq üçün uzun müddət mübarizə aparıb, amma öz evində yaşamaq ona qismət olmayıb. O, 2019-cu ildə rəhmətə gedib. Həqiqət xanımın tək istəyi heç olmasa övladlarının kirayələrdən qurtulmasına nail olmaqdır.
Həqiqət xanım bildirir ki, zəbt olunan mənzil 27.08.2007-ci il tarixdən onların adına özəlləşdirilib və bütün ailə üzvləri indiyədək elə o evdə qeydiyyatdadırlar.
Sumqayıt Şəhər Məhkəməsinin 03 avqust 2011-ci il tarixli qətnaməsi ilə evin boşaldılması haqda iddiası təmin edilib. Amma əllərində məhkəmə qətnaməsi olsa da, artıq 12 ildir ki, icra edilmir.
Məhkəmə qətnaməsinin uzun müddət icra edilməməsinə görə həyat yoldaşı İnsan Hüquqları üzrə Avropa Məhkəməsinə də şikayət verib. Bu barədə qətnamə qəbul edilib, kömək kimi ailəyə İnsan Hüquqları üzrə Avropa Məhkəməsi tərəfindən 2 310 avro məbləğində kompensasiya da ödənilib.
Həqiqət Ağakişiyeva deyir ki, aidiyyəti dövlət qurumlarına göndərilən rekord sayda məktublara, teleqramlara, müraciətlərə, çoxsaylı məhkəmələrə baxmayaraq, yerinə yetirilməyən vədlərdən başqa heç bir şey əldə etməyib.
Gələn cavablar isə adətən, bu istiqamətdə olub:
“Dövlət Proqramına əlavələrin icrası ilə əlaqədar evlər tikildikdən sonra yataqxanalarda müvəqqəti məskunlaşmış ailələrin, o cümlədən sizin mənzilinizdə məskunlaşmış məcburi köçkün ailəsinin köçürülməsinə qanunla nəzərdə tutulan qaydada baxılacaqdır”.
Ya da: “Hazırda Komitənin balansında boş mənzil fondu olmadığı üçün həmin mənzildə müvəqqəti məskunlaşmış məcburi köçkün ailəsini başqa yaşayış sahəsi ilə təmin etməsi imkanı xaricindədir”.
Ağakişiyevlərin evində yaşayan məcburi köçkün Solmaz Muxtarova isə bildirir ki, dəfələrlə aidiyyəti qurumlara müraciət ediblər, amma onlara verilən cavab “səbirli olun” olub.
Məsələ ilə bağlı Qaçqınların və Məcburi Köçkünlərin İşləri Üzrə Dövlət Komitəsi ilə əlaqə saxladıq. Aldığımız cavab isə belə oldu:
“Sorğunuza cavab olaraq bildiririk ki, Dövlət Komitəsinin mənzil fondunda boş yaşayış sahələri yoxdur, eyni zamanda, məcburi köçkünlər üçün yeni yaşayış sahələri inşa edilmir. Onlar üçün mənzillər bundan sonra yalnız işğaldan azad edilmiş ərazilərdə tikiləcək. İşğaldan azad edilmiş ərazilərə respublikanın şəhər və rayonlarda müxtəlif təyinatlı müvəqqəti məskunlaşma obyektlərində yaşayan məcburi köçkünlərin köçürülməsi zamanı başqasının mənzilində yaşayan məcburi köçkünlər də mərhələli şəkildə köçürüləcəklər”.
Məsələ ilə bağlı hüquqşünas Ruslan Mustafazadə isə bildirir ki, didərgin düşmüş məcburi köçkünlərin yaşayış problemlərinin başqa mülkiyyətçilərin hesabına həll edilməsi Konstitusiya ilə yolverilməzdir. Bu vəziyyətdə vətəndaşın kirayələrdə xərclədiyi pulla bağlı dəymiş zərərə görə vəsatət qaldırmaq hüququ yaranır.
Həqiqət xanım isə bildirir ki, həyat yoldaşı qanunvericiliklə müəyyən edilmiş müddətlərdə onun xeyrinə olan Sumqayıt Şəhər Məhkəməsinin 03 avqust 2011-ci il tarixli qətnaməsinin icra edilməməsinə görə ailəyə dəymiş maddi və mənəvi ziyanın əvəzi olaraq hər iki qurumun ayrılıqda 10 000 manat ödəməsi üçün Sumqayıt şəhər İcra və Probasiya İdarəsinə və Qaçqınların və Məcburi Köçkünlərin İşləri üzrə Dövlət Komitəsinə qarşı məhkəmədə iddia qaldırıb, amma bu tələbləri təmin olunmayıb.
"Olimpiya kompleksləri, idman qurğuları və stadionların hamısı ideal vəziyyətdə deyil".
"Report"un məlumatına görə, bunu gənclər və idman naziri Fərid Qayıbov "ARB 24" televiziyasına müsahibəsində deyib.
Nazir problemlərin aradan qaldırılması üçün çalışdıqlarını bildirib: "Bəzi idman qurğularının 20-30 yaşı var və indiki tələblərə uyğun gəlmir".
Teref.az yazır ki, məşhur jurnalist. "Prima TV" nin baş redaktoru Aygün Muradxanlının hava alanında çemodanını sındırıblar. Bu hadisə ilə bağlı Aygün xanım yazır:
"Bu, oktyabrdan bəli AZAL-ın sındırdığı ikinci çemodanımdır. Hər dəfə hava limanının yerüstü xidmətləri bir dənə kağız verir ki, buyrun, qeydiyyata alındı, sizə dəyən ziyan ödənəcək.
AZAL adama pul ödəyər??? Oktyabrdan sınan çemodan üçün inadına bəlkə 45-50 dəfə zəng elədim verdikləri nömrəyə. Ya qulağıma mahnı çaldı, ya da kimsə dedi ki, qeydiyyata alınıb, sizə zəng edəcəyik. O zəng gəlməmiş, ikinci ziyanı da vurdular. Bu dəfə əl çəkən deyiləm. İndilik ən böyük arzum bənövşəyi çemodanların Cahangirin burnundan gəlməsidir. Elə çemodan formasında."
Sizə isə əziz dostlar, məsləhət görürəm dünyanın ən böyük quldur şirkətlərindən olan AZAL-dan istifadə eləsəz, yola həsir zənbillə çıxın. Bəlkə Cahangir həsiri yeməyə.
Teref.az olaraq qarşı tərəfin mövqeyini dərc etməyə hazırıq!
Teref.az
Tacikistanın şimalında, Düşənbə-Çanak magistralının Suqd rayonuna gedən hissəsində qar uçqunu nəticəsində 3 nəfər ölüb.
Bu barədə bazar günü “Innovative Road Solutions” (IRS) şirkətinin yola xidmət göstərən Tacikistandakı filialı məlumat verib.
“Düşənbə-Çanak avtomobil yolunun 157-ci km-də (Şaxristan aşırımı) “Musso” markalı avtomobil qar uçqunu altında qalıb. Nəticədə 3 nəfər yerindəcə ölüb, bir sərnişin isə Şəhristan rayon xəstəxanasına yerləşdirilib”, - məlumatda deyilir.
Xatırladaq ki, fevralın 15-də Tacikistanın Dağlıq Bədəxşan vilayətində və Varzob rayonunda baş vermiş bir neçə qar uçqunu nəticəsində 18 nəfər həyatını itirmişdi.
Mənbə: TASS
Təbii fəlakət qurbanlarının sayı 44 min 374-ə çatıb
Türkiyədə dəhşətli zəlzələ qurbanlarının sayı açıqlanıb. AYNA “Anadolu” agentliyinə istinadən bildirir ki, təbii fəlakət nəticəsində ölənlərin sayı 44 min 374-ə çatıb.
Qeyd edək ki, fevralın 6-da yerli vaxtla saat 04:17-də Türkiyənin Kahramanmaraş vilayətinin Pazarcık rayonunda 7,7 bal, saat 13:24-də isə Elbistan rayonunda 7,6 bal gücündə iki zəlzələ baş verib. Dərinliyi 7 kilometr olan zəlzələ 10 vilayətdə ciddi dağıntılara səbəb olub. Zəlzələdən zərər çəkmiş 10 vilayətdə üç ay müddətinə fövqəladə vəziyyət rejimi elan edilib.