Azərbaycanın Türkiyədəki səfirliyi prezident seçkiləri ilə əlaqədar vətəndaşlara müraciət edib.
Bu barədə səfirliyin “X” hesabında yazılıb.
Qeyd olunub ki, 18 yaşını tamamlamış, aktiv seçki hüququna malik Azərbaycan vətəndaşları fevralın 7-də Azərbaycanda keçiriləcək prezident seçkilərində səsvermə hüququndan istifadə üçün lazımi məlumatları səfirliyə təqdim etməlidirlər.
Onlar soyad, ad, ata adını, doğum tarixlərini, Türkiyədə daimi və ya müvəqqəti yaşadıqları ünvanları və əlaqə məlumatlarını “consul_ankara@mission.mfa.gov.az” elektron poçt ünvanına göndərməlidirlər.

Moldovalı deputat Doyna German deyib ki, hakimiyyət 2024-cü ilin sonuna qədər MDB çərçivəsində imzalanmış, demək olar ki, bütün sazişlərdən çıxmağı planlaşdırır.
Moldovanın MDB-dən çıxmaq istəyi yeni deyil. Keçmiş ruspərəst prezident İqor Dodonun hakimiyyətdən getməsi və onu qərbpərəst xanım Maya Sandunun əvəz etməsindən sonra bu istəklər daha da artıb. Sandu faktiki olaraq rəsmi Kişinyovu Kreml orbitindən çıxarıb, Qərbə inteqrasiya etmək yolunu seçib.
Sandu hakimiyyətə gəldiyi ilk vaxtlar bunu radikal formada etsə də, Rusiyanın Ukraynaya hücumu və ərazilərini işğalı fonunda geri addım ataraq, prosesi daha səssiz və ləng aparmağa başladı. Çünki Kremlin növbəti hədəfi həm də Moldova idi. Lakin Kişinyovun bəxti onda gətirdi ki, Moskva Ukraynada istədiyi nəticələri əldə edə bilmədi və Qərbin yardımları, Kiyevin inadlı müqaviməti ilə üzləşdi.
İndiki məqamda Maya Sandunun qarşısında iki mühüm seçim var. Ya o, Moldovanı həqiqətən də 2024-cü ilin sonuna qədər MDB-dən çıxaracaq, ya da prezident seçkilərinə fokuslanacaq. Qeyd edim ki, 2024-cü ilin noyabrında Moldovada prezident seçkiləri planlaşdırılır.
Sandu hesab edir ki, Rusiya gözlənilən seçkidən əvvəl sabitliyi pozmağı planlaşdırır. Onun bu narahatlığı əbəs deyil: Kreml uzun müddətdir, Moldovada hakimiyyət dəyişikliyi etmək istəyir. Son zamanlar ruspərəst deputatların verdiyi açıqlamalar da bu baxımdan diqqət çəkir. Misal üçün Moldovanın müxalif “İntibah” partiyasının rəhbəri Nataliya Paraska deyib ki, Rusiya və digər MDB ölkələri ilə münasibətlərin kəsilməsi yerli əhalinin istəyi deyil, rejimin seçimidir. Paraska Moldova müxalifətinin Avrasiya İqtisadi İttifaqı və BRİKS ilə əməkdaşlığa hazır olduğunu bildirib.
Rusiyanın Moldovaya əsas təzyiqi ölkədə ruspərəstlər olsa da, görünməyən bir silahı da var. Söhbət Qaqauziya Muxtariyyətindən gedir. Qaqauzlar Moldovanın həm Aİ üzvlüyünə, həm də Rumıniya ilə birləşmək istəyinə qarşıdır. Bundan başqa, Kişinyov-Moskva gərginliyi fonunda artan qaz qiymətləri son aylarda qaqauzları qəzəbləndirib. Sonuncu dəfə Qaqauziya muxtar bölgəsinin paytaxtı Komratda enerji tariflərinin artırılmasına etiraz mitinqi keçirilib.
Nəticə etibarilə Doyna Germanın iddia etdiyi kimi, Moldovanın 2024-cü ilin sonuna qədər MDB çərçivəsində imzalanmış bütün sazişlərdən çıxması o qədər də ağlabatan deyil. Xüsusilə prezident seçkilərindən əvvəl Sandu hakimiyyəti belə bir riskə getməz. Lakin Sandu yenidən prezident seçilsə, rəsmi Kişinyovun bu addımı atması mümkündür. Hətta Sandu buna görə növbədənkənar prezident seçkilərinə belə gedə bilər.
Müəllif: Politoloq Turan Rzayev
Teref. Xocanın Blogu
Səhifəmiz hamnın üzünə açıqdır

Baku TV-də Gülnar Muradovanın təqdimatında yayımlanan “Oralarda necədir?” rubrikasının yeni buraxılışı efirə gedib.

Bu dəfə qədimi qəsrlər diyarı, tarixi tikililəri ilə məşhur olan Avropanın ən yaşıl ölkəsi Şotlandiyadan bəhs olunub.

Qeyd olunub ki, məhz Şotlandiyada küçədə ətəkdə gəzən və bununla fəxr edən əsl kişilər görə bilərsiniz. Bura əsl viskinin və yas mərasimlərində belə səslənən volınkanın vətənidir.

Edinburqun yarım milyon əhalisi var və hər il bura 25 dəfə çox turist gəlir. Bu şəhərdə hara baxsan, tarixi görmək mümkündür. 500, 600 yaşı olan tikililər hələ də dimdik ayaq üstdə və əla vəziyyətdədir.

Edinburqda yaşı 700 il olan binalar var və oradakı evlərdə sadə şotlandiyalılar yaşayırlar. Bu sakinlər evin 45-ci sahibləridirlər. Şotlandiya deyən kimi ağla kişilərin geyindiyi məşhur kilt və şotland ruhunu təcəssüm etdirən volınka gəlir. Bizdə kişinin ətək geyinməsi nə deməkdir, bunu hamı bilir. Amma şotland kişiləri üçün bu geyim əsl kişilik, mərdlik, cəsarət, sərtlik və azadlıq deməkdir.
Əsl kilt bir neçə qat parçadan ibarətdir və ağır geyimdir. Məhz bu səbəbdən onu geyinən kişilərə soyuq olmur. Bəs şotlandların yemək zövqü necədir? Haggis adlanan yemək bizim cızbız kimi qoyunun ürəyindən, qara və ağciyərindən hazırlanır. Soğan da qızardılır və kartof püresi ilə birlikdə təqdim olunur. Haggisi səhər, günorta, axşam yemək şotlandlar üçün normaldır.

Şotlandiyada insanlar öz sağlıqlarında yasları üçün pul yığırlar və ya buna görə sığorta ödəyirlər: kimsə aylıq 10 funt, kimsə 60 funt, yəni bizim pulla 127 manat. Adi dəfn mərasimi 300 funtdur (639 manat). Əgər nəşi krematoriyada yandırarlarsa, 750 funta (1600 manat) başa gəlir.

Ətraflı Baku TV-nin süjetində:

Slovakiya öz ərazisində Rusiyaya məxsus daşınmaz əmlakı dondurmaq niyyətində deyil.
Bu barədə ölkənin Baş naziri Robert Fitso bildirib.

“Məsələn, Çexiya, öz ərazisində Rusiyaya və ya onun nümayəndələrinə yaxud da sahibkarlarına məxsus daşınmaz əmlakı dondurub. Biz əlbəttə ki, bu yolla getməyəcəyik”, – o deyib.

Qarabağdakı qanunsuz fəaliyyət və əməllərinə görə, Azərbaycanın müvafiq qurumları tərəfindən həbs olunan və artıq ləğv olunan qondarma rejimin keçmiş dövlət naziri milyarder Ruben Vardanyanla bağlı yeni faktlar üzə çıxıb.

Milyardlarla çirkli pullar necə yuyulub?

Forbes nəşrinin məlumatına görə, 2019-cu ilin martında Ruben Vardanyana məxsus “Troyka Dialoq” ofşor şəbəkəsi ilə bağlı informasiyalar mətbuata sızıb. Araşdırmaya görə, Vardanyan məhz həmin ofşor şəbəkəsi vasitəsilə çirkli pulların yuyulmasında iştirak edib. Bildirilir ki, 2000-ci illərdə bu şəbəkə vasitəsilə xaricə 4,6 milyard dollar köçürülüb.

Hələ Vardanyan separatçı rejimdə “vəzifə” tutan dövrdə isə Rusiya mətbuatında Putinin keçmiş xüsusi nümayəndəsi Anatoli Çubaysla Moskva vilayətində onun sarayının tikintisinə cavabdeh olan sahibkar İlya Suçkovun söhbətinin səs yazısı dərc edib.

Səs yazısında Anatoli Çubays İlya Suçkova məlumat verib ki, o, özünün Moskva yaxınlığındakı Peredelkino bağ evləri massivindəki malikanəsini satmağı və bununla da çirkli pulların yuyulması sxemini işləyib-hazırlamaq və idarə etməyi Ruben Vardanyana tapşırıb.

Plana əsasən, Anatoli Çubaysa məxsus 35-36 milyon dollar dəyərində malikanə keçmiş məmurun yaxın adamlarına 7-8 milyon dollara satılmalı imiş. Bütün pul və alqı-satqı əməliyyatları isə İsveçrədə yerləşən və elə A.Çubaysın özünə məxsus olan şirkət vasitəsi ilə həll edilməli idi. Əsas məqsəd isə yüksək alqı-satqı prosesində tələb olunan vergilərdən yayınmaq olub.

Lakin plan son anda baş tutmayıb. Belə ki, A.Çubaysın şirkəti qısa müddət ərzində iflas olub. Bununla belə, həmin hadisə də göstərir ki, Vardanyan çirkli pulların yuyulmasında böyük təcrübəyə sahib birisi olub.

Qeyd edək ki, Ruben Vardanyan sentyabrın 27-si Azərbaycandan Ermənistan istiqamətində hərəkət edərkən saxlanılıb. Ona qarşı Cinayət Məcəlləsinin 214.1 (terrorçuluğu maliyyələşdirmə), 279.3 (qanunvericiliklə nəzərdə tutulmayan silahlı birləşmələrin və ya qrupların yaradılmasında və fəaliyyətində iştirak etmə) və 318.1-ci (Azərbaycan Respublikasının dövlət sərhədini qanunsuz olaraq keçmə) maddələri ilə ittiham irəli sürülüb, barəsində həbs qərimkan tədbiri seçilib.

Qərb Vardanyanın ifadələrindən niyə qorxur?

Bizim.Media-ya açıqlamasında politoloq Cümşüd Nuriyev bildirir ki, Qərbdə bəzi dairələr Vardanyanın istintaqın gedişində onları ifşa edəcək çoxsaylı məsələlərdən danışa biləcəyindən qorxur:

“Ona görə də “Forbes”də belə açıqlamalar yaymaqla Vardanyanı qabaqlamaq üçün tədbirləri görürlər. Bu həm də Vardanyanı Azərbaycan istintaq orqanları ilə əməkdaşlıqdan yayındırmaq məqsədilə ona edilən xəbərdarlıqdır. Vardanyanın bu çirkin əməllərinin arxasında Qərb dayanır. Onun Azərbaycan istintaq orqanlarına Avropa İttifaqında hansı parlament üzvlərini pulla ələ aldığı barədə məlumat verib.

Bu mənada “Forbes”in açıqlaması “qara məni basınca, mən qaranı basım” məsələsinə oxşayır. Vardanyan Rusiyada Çubaysdan başqa, İqor Seçinlə də yaxın olub. Birlikdə çirkli pulların yuyulmasında iştirak ediblər. Qarabağda qanunsuz şəkildə qızış çıxaran “Geopramayninq” şirkərinin rəhbərilə də biznes ortağında olub.

“Forbes” belə yazını gündəmə gətirməklə əslində bir növ onu qabaqlamağa çalışır. Çünki Vardanyan Azərbaycan hüquq mühafizə orqanlarına açıqlamasında onların kim olduğunu açıq ortaya qoyur. Bu mənada onlarla Vardanyanın heç bir fərqi yoxdur. Hər iki tərəf çirkli pulların yuyulmasında əlbirdir”.

Qeyd edək ki, ilkin ifadəsi zamanı Vardanyanın USAİD rəhbəri Samanta Pauer və digər Qərb rəsmiləri ilə əməkdaşlıq etdiyi üzə çıxmışdı. Bu da oliqarxın ikili agent olması ehtimallarını gündəmə gətirmişdi.

Rüfət Sultan, Bizim.Media

İran İslam Respublikasında ən güclü siyasi və dini hakimiyyəti əlində cəmləyən ali dini rəhbər Əli Xameneinin karyerası bitir. 2024-cü ilin martında cənab Xameneini kimin əvəzləyəcəyinə qərar verəcək orqan olan Ekspertlər Assambleyasına seçki keçiriləcək.
İndi İranda bağlı qapılar arxasında ölkənin siyasi gələcəyi ilə bağlı aparılan müzakirələrdə mühüm qərarlar verilməsi üçün tez-tez iclaslar keçirilir.
Qısası, Xameneini əvəzləmək üçün pərdə arxasında və siyasətin görünən üzündə qızğın mübarizə başlayıb.
İran siyasi arealında mövcud olan mühafizəkarlarla mötədillər arasındakı rəqabət bu dəfə Xameneinin kreslosu uğrunda mübarizə kontekstində təhlil edilməlidir.
İran Konstitusiyasına əsasən, Ekspertlər Məclisi ali rəhbərin təyin edilməsi, onun fəaliyyətinə nəzarət və vəzifədən azad edilməsinə cavabdehlik daşıyır. O, islam hüququ üzrə ixtisaslaşmış hüquqşünaslar və din xadimlərindən ibarət 88 nəfərlik tərkibə malikdir.
Yəqin ki, Xameneinin yaşı və səhhəti ilə əlaqədar həssaslığı onun Ekspertlər Məclisini öz nüfuz dairəsində saxlamaq cəhdlərini boşa çıxarır.
Liberallarla mühafizəkarların arasındakı mübarizənin rəngi indiki mərhələdə öz adamlarının Ekspertlər Assambleyasına salınması fonunda açılır.
Assambleya üçün seçkidə iki fiqur üzərində diqqət cəmlənir - biri hazırkı Prezident İbrahim Rəisi, digəri isə onun sələfi Həsən Ruhani.
Açıq şəkildə Ruhaninin prosesdən sıxışdırılıb, onun Məclisə seçilməsinin qarşısının alınması üçün kampaniya aparılır, amma məsələ burasındadır ki, indiki Prezident Rəisinin də populyarlığı aşağıdır.
Halbuki, radikal dini-siyasi dairələr üçün Ruhani artıq qəbuledilməz bir obraza çevrilib, buna görə də onun Ekspertlər Məclisinə gedən yolu rəvan olmaya bilər. Ruhani üçün ən mənfi ssenari isə onun namizədliyinin rədd edilməsi və ehtimal olunan diskvalifikasiya riskidir.
İranda pərdəarxası siyasətdə ali rəhbərlik uğrunda mübarizəyə gəlincə, Ruhaninin heç bir şansı yoxdur, o, uzağı, Ekspertlər Məclisinin üzvü olub, ali rəhbəri seçmək hüququndan istifadə edə bilər.
İslam Respublikasının ali rəhbər statusuna yiyələnmək üçün ən çox fəallığı Xameneinin oğlu Möctəba Xamenei ilə İbrahim Rəisi və onları dəstəkləyən qruplaşmalar göstərirlər.
Rəisinin İrandakı iqtisadi-sosial duruma görə reytinqinin azalması fonunda isə Möctəbanın ulduzu parlayır, hərçənd ki, proseslər fərqli bir məcraya gedə və ümumiyyətlə tamamilə fərqli bir namizəd də irəli sürülə bilər.
Yeri gəlmişkən, İranda keçmiş prezident Mahmud Əhmədinejadın da siyasətə qayıdışına dair iddialar yenə bərq vurur. Əhmədinejad faktoru İranda üfüqlərə qalxan siyasi mübarizənin bir komponentidir, böyük ehtimalla keçmiş prezidenti sərt xətt tərəfdarları müəyyən proseslər üçün təbliğat tezislərinə hazırlayırlar.
Amma Əhmədinejadla sövdələşmə o zaman mümkündür ki, keçmiş prezident hətta ali rəhbərliyi də hədəfə alan açıqlamalarından, mübahisəli davranışlarından geri çəkilsin.
Əhmədinejadı ələ almaq mümkündür, bunun müqabilində o, hökumətdə vəzifə iddiası ilə çıxış edə bilər.
Göründüyü kimi, İranda pərdəarxası və açıq siyasi mübarizə Tehran üçün “qırmızı xət”ləri də müəyyən edir və bu “xətt”in cızılması SEPAH-ın faktiki səlahiyyətindədir.
Proseslər SEPAH-ın istədiyi hüdudlardan kənara çıxsa, o zaman İranda siyasi təlatümlərin meydanlardakı səsi ucala bilər - etiraz aksiyaları kimi...
Aqşin Kərimov

“Rusiyanın dominantlığının olduğu sahələrdə asılılığı azaltmaq və ya zəiflətmək istəyirdinsə, hazır təhlükəsizlik yastıqların və sair olmalıydı. Belə bir durumda vektoru dəyişdirmək ciddi təhlükə, hətta dövlətin onurğa sütununu sındırmaq deməkdir”.

Bu barədə erməni politoloq Narek Qalstyan deyib.

Onun sözlərinə görə, Ermənistan uzun illər elə bir siyasət aparıb ki, bu gün də Rusiyadan tam asılıdır və bundan qurtula bilmir.

“Strateji önəm kəsb edən sahələrdə Rusiyanın üstünlüyü var, bura hərbi sektor da daxildir, silahların çoxunu oradan gətirmişik, atom enerjisi - uranı oradan gətiririk, əsas ticarət tərəfdaşımız Rusiyadır, nəqliyyat - dəmir yolu rus şirkəti tərəfindən idarə olunur, xarici fəaliyyətdə Rusiyadan asılıyıq və sair. Bu asılılıq da həmişə Ermənistanı xarici siyasətində korrektəyə məcbur edib. Bu isə o deməkdir ki, Rusiya amili nəzərə alınmaqla digər güc mərkəzləri ilə münasibətlər qurulmalıdır. Elə bir vəziyyətdəyik ki, Rusiyadan asılıyıq, həm də sistemli şəkildə. Rusiya isə bizdən asılı deyil və öz maraqları var”, - ekspert vurğulayıb.

Qalstyan qeyd edib ki, bu gün Rusiyanın içində olduğu geosiyasi reallıq onu regional siyasətinə yenidən baxmağa və Ermənistanın qonşuluqdan uzaq münasibətləri olan Azərbaycan və Türkiyə ilə yaxınlaşmağa məcbur edir: “İndi bu, Rusiyanın maraqlarına uyğundur. Belə bir deyim var: daimi müttəfiqlər yoxdur, daimi maraqlar var. Xüsusən də böyük dövlətlər üçün bu, əsas prinsipdir”.

Politoloqun fikrincə, Ermənistanı Rusiyadan uzaqlaşdırmağa çalışan Qərbin bu ölkə ilə bağlı hazır planı yoxdur.

“Deyilən sözlə yerdəki reallıq fərqlidir. Rusiya Ukraynada planlaşdırılmamış uzun sürən hərbi əməliyyatlara görə ciddi geosiyasi problemlərlə üzləşib, bu durumda Türkiyə və Azərbaycana ehtiyacı var.

Rusiya ilə düşmənçilik Ermənistana baha başa gələ bilər. Rusiya hazırda bizim müttəfiqimiz deyil, bəs bizə onunla düşmənçilik lazımdırmı? Bəli, Rusiya bir çox məsələlərdə Azərbaycana qarşı çıxmır. Bu o deməkdir ki, artıq əleyhimizə işləməyə başlamaları kimi ciddi təhlükə var. Bu bizə lazımdırmı?”. \\News24.az

ABŞ-nin Yəməndə İranın dəstəklədiyi husilərin (“Ənsar Allah”) hücumlarına qarşı Qırmızı dənizdə “hava nəqliyyatına nəzarəti” qorumaq üçün koalisiya qurduqdan sonra İran İnqilab Keşikçiləri Korpusu (SEPAH) 55 min nəfərlik dəniz polisi qrupu yaratdıqlarını açıqlayıb.

Məlumata görə, SEPAH Dəniz Qüvvələrinin komandanı, kontr-admiral Əli Rza Tengsiri paytaxt Tehranda keçirilən tədbirdə çıxış edib.

Dənizlərdə fəaliyyət göstərəcək polis qüvvələri yaratdıqlarını deyən Tengsiri, indi okean səfərbər qüvvələri (Bəsiç) yaratdığını və bunların Tanzaniyaya çatacaq qədər böyük qayıqları olduğunu bildirib.

İranlı komandir 55 min nəfərdən ibarət dəniz səfərbər qüvvələrini ilk olaraq Fars körfəzində qurduqlarını və növbəti mərhələdə ölkənin şimalındakı (Xəzər dənizi) sularda qurmağı planlaşdırdıqlarını qeyd edib.

Tengsiri məlumat verib ki, səfərbərlik qüvvələrinə aid qayıqlar 107 millimetrlik raketlərlə təchiz edilib.

Vladimir Putin Rusiya Müdafiə Nazirliyinin kollegiyasının genişləndirilmiş iclasında bildirib ki, ABŞ Rusiya və Avropanı bir-birindən ayırmaqla öz məqsədlərinə nail olub.

Putin ABŞ-nin Rusiya ilə Avropanı bir-birinə düşmən etməklə bağlı məqəsədinə çatdığını bildirib və buna görə məsuliyyəti öz boynundan atmağa çalışıb: "Onlar (ABŞ – red.) bizi və Avropanı bilərəkdən bu münaqişəyə sürüklədilər, bu mənada öz məqsədlərinə çatdılar. İndi onlar maliyyə məsuliyyəti və ödənişlər yükünü Avropanın üzərinə atırlar. Avropanın indiki iradəsiz və onurğasız siyasətçiləri buna müqavimət göstərə bilmirlər”.

Putin əlavə edib ki, Avropa ABŞ-yə müqavimət göstərə bilməz, çünki o, media, iqtisadiyyat və siyasətdə böyük ölçüdə Vaşinqtondan asılıdır.

Göründüyü kimi, suveren ölkəyə qarşı ədalətsiz, açıq işğalçılıq müharibəsinə başlayan Putin öz hərbi, siyasi və iqtisadi uğursuzluğuna, az qala bütün dünyanı Rusiyaya qarşı düşmən etdiyinə görə məsuliyyəti özündən başqa hər kəsin üzərinə atır.
Mənbə:TASS