 |
|
|
“Biz əvvəllər dəfələrlə bildirdiyimiz kimi, artıq razılaşdırılmış üç prinsip əsasında sülh gündəliyinə sadiq qalırıq”.
Bunu Ermənistanın Baş naziri Nikol Paşinyan Xarici İşlər Nazirliyində səfirlər üçün keçirilən Yeni il qəbulunda deyib.
“Ümid edirik ki, son vaxtlar regionda və region ölkələrində baş verən hadisələr sülh prosesinin qəsdən ləngiməsinin baş verdiyini göstərmir”, - Paşinyan qeyd edib.
“Rusiya ya suveren dövlət olacaq, ya da ümumiyyətlə olmayacaq”.
“AzPolitika.info” xəbər verir ki, bunu Rusiya Prezidenti Vladimir Putin dünən hakim “Vahid Rusiya” partiyasının 21-ci qurultayı zamanı bəyan edib.
“Biz bunu həmişə xatırlamalı və heç vaxt unutmamalıyıq, uşaqlarımıza da öyrətməliyik. Çox vacibdir ki, bu da həmişə bizim beynimizdə və ürəyimizdə olsun. Biz gələcəyimizi özümüz qərarlaşdıracağıq və yaradacağıq” - deyə, Putin bildirib.
Kreml rəhbəri vurğulayıb ki, bu, suveren dövlət dünyagörüşüdür, əsl sivil konsolidasiya və birgə işin əsasıdır.
“Rusiya bəzi ölkələr kimi kolbasa müqabilində öz suverenliyindən imtina edə və kiminsə satelliti ola bilməz”
2024-cü ilin martında keçiriləcək seçkiyə hazırlaşan Vladimir Putin öz seçki kampaniyanısını gözlənildiyi kimi, Qərbdən və NATO-dan gələn “təhlükə” üzərində qurub. Özünün ucsuz-bucaqsız ərazilərinə tam nəzarət edə və bu ərazilərdə, xüsusilə də Moskva və Sankt-Peterburqdan kənarda yaşayan rusiyalıların normal həyatını təmin edə bilməyən Putin Ukrayna torpaqlarına göz dikməsinə, bunun üçün qanlı, çoxsaylı itkilərlə müşayiət olunan uğursuz bir savaşa başlamasına haqq qazandırmaq üçün müxtəlif bəhanələr gətirməkdə davam edir. Bu bəhanələrin ən öndə gələni isə həmişəki kimi, guya Rusiyanın suverenliyinə, təhlükəsizliyinə yaranan təhdidlərdir. Həmin təhdidlər isə, guya Qərbin əli ilə Ukraynadan, onun artıq qanlı savaşın bir çox faciələrlə, itkilərlə üz-üzə qoyduğu kasıb, çarəsiz Ukrayna xalqından gəlirmiş...
İndi Putin daha bir “təhlükə mənbəyi” tapıb – Finlandiya!
Rusiya başçısı yeni çəkilən “Moskva. Kreml. Putin” adlı sənədli filmdəki müsahibəsində Finlandiyanı hədələyib: “Onlar götürüb Finlandiyanı NATO-ya sürüklədilər. Finlandiya ilə heç bir problemimiz yox idi, indi isə olacaq. Çünki biz indi orada Leninqrad Hərbi Dairəsi yaradacağıq və müəyyən hərbi hissələri ora cəmləşdirəcəyik”.
Putinin sözlərinə görə, Rusiya ilə Finlandiya arasında bütün mübahisələr, o cümlədən ərazi xarakterli mübahisələr 20-ci əsrin ortalarında həll olunub. Bundan sonra guya iki ölkə arasında “ən mehriban, ən səmimi” münasibətlər yaranıb.
Xatırladaq ki, söhbət İkinci Dünya Müharibəsindən əvvəl SSRİ-nin Finlandiya ərazilərini işğal etməsindən gedir və Finlandiya Rusiyanın Ukraynaya qarşı başlatdığı işğalçılıq müharibəsini görəndən sonra özü NATO-ya üzvlük üçün müraciət edib.
Kremlin “qardaş xalq” adlandırdığı Ukraynaya qarşı törətdiyi hərbi cinayətləri və açıq-aşkar işğalçılıq niyyətlərini müşahidə edən Finlandiyanın NATO-ya üzvlük üçün müraciət etməsi əlbəttə ki, təbiidir. Putinin buna görə Finlandiyanı qınaması və hədələməsi isə Kremlin son illər yürütdüyü açıq irticaçı siyasətin növbəti təzahürüdür...
Putin bazar günü hakim “Vahid Rusiya” partiyasının qurultayında yenə əvvəlki “tezislərini” təkrarlayıb. Ryusiyalıların qulağını növbəti “dəhşətli təhdid ssenarilərilə” dolduran Kreml sahibi guya Rusiyanın suverenliyinə böyük təhlükələr yarandığını iddia edib.
Putin bildirib ki, Rusiya ya özünü təmin edən suveren dövlət olacaq, ya da ümumiyyətlə olmayacaq: "Biz yadda saxlamalı və heç vaxt unutmamalıyıq, uşaqlarımıza da öyrətməliyik ki, Rusiya ya suveren, özünü təmin edən dövlət olacaq, ya da ümumiyyətlə olmayacaq... Rusiya bəzi ölkələr kimi kolbasa müqabilində öz suverenliyindən imtina edə və kiminsə satelliti ola bilməz”.
Sanki indiyə qədər kimsə nəhəng təbii sərvətləri və insan potensialı olan, buna baxmayaraq, korrupsiya, oğurluq, saxtakarlıq içərisində boğulan, bütün dünyanın “yanacaq doldurma məntəqəsi” olmaqdan o yana gedə bilməyən Rusiyanın özünü təmin edən, inkişaf etmiş iqtisadiyyat qurmasına mane olub. Az qala 25 ildir hakimiyyətdə olmasına baxmayaraq, indiyə kimi “özünü təmin edən Rusiya” qura bilməyən, nəinki müasir avtomobillər, kompyuterlər, telefonlar və s. hətta mismar belə istehsal edə bilməyən, əvəzində öz dost-tanışlarını milyarderə çevirən idarəçiliyə görə məsuliyyət daşıyan Putin yox, kimsə başqasıdır...
Qeyd edək ki, “Vahid Rusiya”nın qurultayı 2024-cü ildə keçiriləcək prezident seçkilərində Vladimir Putinin namizədliyini yekdilliklə dəstəkləyib. Bu “sensasiyalı” qərarla bağlı partiya sədri Dmitri Medvedev açıq səsvermənin keçirilməsini təklif edib və təbii ki, hamı da bunu dəstəkləyib.
Beləliklə də Putinin növbəti “seçki xeyir-duası”nı qeyri-adekvat, nifrətlə dolu açıqlamaları, nüvə hədə-qorxuları ilə Rusiyanı biabır edən, dünyanı Rusiyanın üstünə güldürən, Ukrayna xalqına qarşı az qala açıq faşist çağırışları edən Medvedevin özü vermiş olub. Bu isə bir daha onların hər ikisinin eyni düşüncədə olduğunun növbəti nümunəsidir...
“AzPolitika.info”
Qərbdə əmindirlər ki, NATO tezliklə prezident Vladimir Putinin tələbləri qarşısında aciz qalaraq, Ukraynanı Rusiya ilə təkbətək buraxa bilər... Kremlin qəddar qərarlar verəcəyi təqdirdə, gələcək taleyi birbaşa Rusiyadan asılı vəziyyətə düşən Ukraynadan geriyə heç bir dövlət əlamətinin qalmayacağı ehtimal olunur...
ABŞ və Qərb Ukrayna savaşında taktikanı dəyişməyə başlayıb. Belə ki, hazırda Ukrayna savaşı Qərbin hərbi-siyasi hədəflərində prioritet deyil. Ukraynaya maliyyə və hərbi yardımlar artıq azaldılıb. Və birmənalı şəkildə demək olar ki, Ukrayna savaşı indi ikinci, daha dəqiq desək, arxa plana keçirilib.
Onu da qeyd etmək lazımdır ki, ABŞ və Qərb təmsilçiləri son vaxtlar hətta Ukraynanın Rusiya qarşısında ehtimal olunan məğlubiyyəti barədə belə, açıq mətnlə danışmağa başlayıblar. Belə ehtimalların ABŞ prezidenti Co Baydenin dilindən gündəmə gətirilməsi isə rəsmi Kiyev üçün faciəvi hərbi sonluğun ilkin əlaməti də sayıla bilər. Çünki prezident Co Bayden vurğulayıb ki, Rusiya Ukrayna üzərində qələbədən sonra NATO ölkələrinə hücum edəcək. Və bu, Ağ Ev sahibinin Ukraynanın hərbi məğlubiyyətini elə indidən qəbul etməsi anlamına gəlir.
Prezident Vladimir Putin isə Ağ Ev sahibi Co Baydenin dediklərini cavabsız buraxmayıb. O, Rusiyanın Ukrayna üzərində qələbəsi ilə bağlı deyilənlərlərdən məmnun olduğunu qətiyyən gizlətməyib. Ancaq Kreml sahibi NATO ölkələrinə qarşı hər hansı ərazi iddiaları olmayan Rusiyanın onlara hücum etmək niyyəti barədə deyilənlərin yalan olduğunu da bildirib. Və bu, Kreml sahibinin Qərb siyasi dairələri qarşısında psixoloji qələbəsi anlamı daşıyır.
Hazırda əsas müzakirə mövzusu ondan ibarətdir ki, ABŞ və Qərb faktiki olaraq, Ukraynanı tərk etmək üzrədir. Ukrayna ordusu son vaxtlar Qərbdən yetərincə hərbi yardım ala bilmir. ABŞ-ın 2024-cü il üçün hərbi büdcəsində Ukraynaya yardım məqsədilə cəmisi 900 milyon dollar nəzərdə tutulub. Halbuki, Ağ Ev gələn il Ukraynaya 70 milyard dollarlıq hərbi yardım paketi vəd etmişdi. Və ABŞ bu vədin yerinə yetirilməsinin çox çətin olacağını artıq açıq şəkildə vurğulayır.
Nə qədər qəribə də olsa, eyni proseslər Avropa Birliyi ölkələri arasında da müşahidə olunur. Belə ki, Avropa Birliyinin vəd etdiyi 60 milyard dollarlıq dəstək paketi hazırda bloklanmış vəziyyətə düşüb. Bəzi Avropa Birliyi ölkələri, xüsusilə də, Macarıstan bu məbləğin Ukraynaya verilməsi barədə qərarı veto edib. Macarıstan vetonu dayandırmağın qarşılığında Avropa Birliyindən 30 milyard avroluq maliyyə dəstəyi tələb edir. Və bu məsələnin 10 milyard avro ilə həll edilə biləcəyi də qətiyyən istisna olunmur.
Göründüyü kimi, Ukrayna həm ABŞ-dan, həm də Avropa Birliyindən əvvəlki kimi rahat dəstək ala bilmir. Ağ Ev strateqləri isə Ukrayna savaşının maliyyələşdirilməsini tamamilə Avropa Birliyinin üzərinə yükləməyə çalışırlar. ABŞ-ın israrlı tələbləri və təzyiqləri nəticəsində Avropa Birliyi Ukraynanı öz sıralarına qəbul etmək üzrə rəsmi Kiyevlə birbaşa danışıqlara başlamaq qərarı verib. Halbuki, Ukraynanın indiki vəziyyəti Avropa Birliyi üzvlüyü üçün müəyyən edilmiş kriteriyaların heç birisinə uyğun deyil. Ancaq bu qərarın alınmasında əsas məqsəd Avropa Birliyinə üzv ölkələrin Ukraynaya maliyyə dəstəyi göstərməsinə əngəl törətməsinin qarşısını almaqdan ibarətdir.
Digər tərəfdən, Avropa Birliyi Rusiyaya qarşı yeni sanksiyalar barədə də qərar verib. Düzdür, hələlik bu qərar da bəzi qurum üzvləri tərəfindən müqavimətlə qarşılanır. Ancaq bununla belə, Rusiya yeni sanksiyalara məruz qalması artıq qaçılmaz xarakter daşıyır. Halbuki, Kremldən xəbərdarlıq edilir ki, yeni sanksiya paketi özündən əvvəlkilər kimi, məhz Avropa Birliyinə böyük zərbə vuracaq. Rusiya siyasi dairələri hesab edirlər ki, Qərbin Rusiya ilə qarşıdurması çərçivəsində Ukraynanın Avropa Birliyinə üzv qəbul edilməsi barədə qərar verilərsə, bunun nəticələrini ilk növbədə Avropa ölkələrinin əhalisi ödəməli olacaq.
Təbii ki, burada yalnız Ukrayna savaşının maliyyələşdirilməsi nəzərdə tutulmur. Kreml həm də müharibədən sonra dağıdılmış Ukraynanın yenidən bərpa edilməsinə çəkiləcək fantastik xərclərə də dolayısı ilə eyham vurur. Rusiya siyasi dairələri əmindirlər ki, Qərb ölkələri Rusiyanın dondurulmuş 300 milyard dollarlıq maliyyə vəsaitinin Ukraynaya verilməsinə qətiyyən cəsarət edə bilməzlər. Çünki Ukrayna savaşı ətrafında situasiya tədricən Rusiyanın xeyrinə dəyişməyə başlayıb.
Məsələ ondadır ki, Kremldə Rusiyanın hərbi qələbəsinə artıq daha çox inanırlar. Rusiya dövlət liderlərinin ritorikası da hazırda yenidən sərtləşməyə və prinsipial məzmun daşımağa yönəlib. Belə ki, Kreml təmsilçiləri sülh danışıqlarına başlamaq üçün Ukrayna savaşının əvvəlində irəli sürdükləri şərtləri təkrarən gündəmə gətirməkdədirlər. Əsas tələblərdən biri isə məhz Ukraynanın tamamilə tərksilah edilməsi ilə birbaşa bağlıdır.
Eyni zamanda, Kreml Ukraynanın NATO-ya üzvlük niyyətini də qəbul etmir. Halbuki, bir müddət öncə NATO Ukraynaya üzvlük qapısını açmağa hazılaşdığını bəyan etmişdi. Ancaq Rusiya növbəti dəfə vurğulayıb ki, Ukrayna dövlət kimi mövcud olmaq istəyirsə, NATO üzvlüyünü birdəfəlik unutmalıdır. Üstəlik, Ukrayna ərazisində heç bir NATO hərbi bazası yerləşdirilməməlidir. Və bu, Qərbin Ukrayna savaşında əlverişsiz situasiyaya düşməkdə olduğunu nəzərə aldıqda, Kremlin sərt demarş qərarı verdiyini də təsdiqləyir.
Onu da qeyd etmək lazımdır ki, ABŞ xüsusi xidmət servislərinə yaxın Qərb mənbələri Rusiyanın qalib gələcəyi təqdirdə, NATO prezident Vladimir Putinin Ukrayna ilə bağlı sərt xəbərdarlığını nəzərə almaq məcburiyyətində qala bilər. Yəni, bu halda, NATO Ukraynanın üzvlük məsələsini gündəmə gətirməkdən imtina etməli olacaq. Bu isə o deməkdir ki, NATO prezident Vladimir Putinin tələbləri qarşısında aciz qalacaq və Ukraynanı Rusiya ilə təkbətək buraxacaq.
Məsələ ondadır ki, Kreml sahibi açıq şəkildə Ukraynaya NATO üzvlüyü şansı tanımayacağını bəyan edib. Ona görə də, indiki halda, Ukraynanın hələ uzun müddət Qərb və Rusiya arasında bufer zona rolunu oynaya biləcəyi qətiyyən istisna deyil. Qərbdə bəzi praqmatiklər artıq indidən hesab edirlər ki, Rusiya Ukrayna savaşının qalibidir. Ona görə də, Ukraynanın bir dövlət kimi gələcək taleyi məhz Kremldən asılı vəziyyətə düşmüş kimi görünür. Əgər, Kreml qərar verərsə, Ukraynadan geriyə heç bir dövlət əlaməti qalmaya da bilər. Və bu, prezident Co Baydenin Rusiyanın hərbi qələbəsi barədə danışmasından sonra Qərb siyasi dairələrində ən çox müzakirə olunan mövzular sırasına daxildir.(Yeni Müsavat)
Zelenski həqiqətən dəhşətli bir həftə keçirib. Onun komandası AB-yə daxil olmaq üzrə danışıqlara başlamaq qərarından sonra qələbəni elan etsə də, üzvlük üçün müharibə Kiyevin qələbəsi ilə başa çatmalıdır. Ancaq bunların heç birinə hazırda zəmanət verilmir.
Axar.az xəbər verir ki, bu barədə CNN-in məqaləsində deyilir.
Məqalədə Zelenskinin Ukraynaya kömək istəməsi üçün ABŞ-a səfəri mövzusuna da toxunulub.
“ABŞ və AB-nin maddi dəstəyi olmasa və ya onlardan biri maliyyə dəstəyini dayandırsa, çox güman ki, yaxın iki ildə Ukraynanın böyük hissəsi Rusiyanın işğalı altına düşəcək”, – deyə bildirilir.
Rusiya Prezidenti Vladimir Putin Yeni ili necə qarşıladığından danışmağı sevmir.
Ənənəyə görə, Prezident gecə yarısı əhaliyə müraciət edir.
Bəs bundan sonra adətən nə olur?
“Cebhe.info” xəbər verir ki, “Bundan sonra yaxınlarınızla bir qədəh şampan, gündəlik mövzularda söhbətlər”, – deyə Putin “Moskva. Kreml. Putin” proqramının müəllifi və aparıcısı Pavel Zarubinə müsahibəsində deyib.
Dövlət başçısı hədiyyələri hələ seçmədiyini də bildirib.
"Ancaq əlbəttə ki, Yeni ili birlikdə qeyd etdiyim insanlar üçün xoş bir şey etməyə çalışacağam", - Prezident əlavə edir. Bundan əvvəl “Vladimir Putinlə ilin yekunları”nda dövlət başçısı övladlarını və nəvələrini onun üçün “ən yaddaqalan hədiyyə” adlandırmışdı.
“Zakarpatiya kənd sovetində qumbaraatanların partlaması Ukraynada vətəndaş müharibələrinin tezliklə başlayacağından xəbər verir”.
KONKRET.az xəbər verir ki, bunu eks-prezident Leonid Kuçmanın keçmiş müşaviri Oleq Soskin öz “YouTube” kanalında deyib.
Onun fikrincə, Transkarpatiyadakı kimi hallar daha çox olacaq.
“Qarşıdurma olacaq, artıq başlayır. Hərbi komissarların mənzillərini, evlərini partladacaqlar”, – Soskin bildirib.
Ekspert hesab edir ki, cəbhədə uğursuzluqlar və geri qayıdan veteranların psixoloji travması cəmiyyətdə silahlı qarşıdurmalara, həmçinin Ukraynanın Polşa və Macarıstanla sərhədlərində münaqişələr də silahdan istifadəyə səbəb ola bilər.
Bundan əlavə, ekspert Ukrayna hakimiyyətinin 2024-cü ildə ölkənin tam məhvinə səbəb ola biləcək kadr siyasətini pisləyib. Teleqraf.com
“Rusiyanın təsirini genişləndirə biləcəyi bir çox coğrafi məkanların olmasına baxmayaraq, Moskva bunu NATO-ya qarşı etməyəcək”.
KONKRET.az xəbər verir ki, bu sözləri ukraynalı hərbi ekspert Aleksandr Kovalenko deyib.
O bildirib ki, alyansa qarşı hər hansı təcavüz Rusiya Federasiyasının hərbi-siyasi rəhbərliyi üçün intihar addımıdır.
Ekspert əmindir ki, Şimali Atlantika Alyansı bu gün Moskvaya hücum etmək qərarına gəlsəydi, ciddi müqavimət göstərmədən tez bir zamanda Rusiyanın paytaxtını işğal edərdi.
“Əminənm ki, belə bir müharibə “İkinci Dünya Müharibəsi” və ya “Moskva döyüşü” adlandırılmayacaqdı. Çünki, hər şey çox tez baş verəcəkdi”.
Eyni zamanda analitik xatırladıb ki, hətta Vaqner PMC dəstəsinin lideri Yevgeni Priqojin Rusiyanın paytaxtını ələ keçirməyə demək olar ki, müvəffəq olub.
“Hətta tam hüquqlu heyəti olmayan, qeyri-qanuni hərbi birləşmələr dəstəsi olan Priqojin belə demək olar ki, bunu bacardı. Sadəcə, Priqojin heç vaxt işini tamamlamadı, çünki o, cəsarətsiz idi. Amma Şimali Atlantika Alyansı irəliləsəydi, Qırmızı Meydanda növbəti qələbə paradı artıq Abrams və Leopard tankları ilə keçiriləcəkdi”, – deyə Kovalenko əlavə edib.
Pakistan əfqanları öz ölkəsindən deportasiya etməklə “Taliban” hökumətinə təzyiq göstərməyə çalışır.
Bu açıqlama ilə “Taliban” təşkilatının təsis etdiyi sərhədlər və qəbilələr naziri Molla Nurullah Nuri çıxış edib.
O qeyd edib ki, İslamabadın bu hərəkətləri qəddar olduğu qədər, qaçqınların statusunu tənzimləyən beynəlxalq normalara da ziddir.
O əlavə edib ki, son 3 ay ərzində 438 mindən çox əfqan Pakistanı tərk etmək məcburiyyətində qalıb.
Məlumat üçün əlavə edək ki, Əfqanıstanla həmsərhəd ölkələrdə bu ölkənin təqribən 8,2 milyona yaxın vətəndaşı məskunlaşıb. Artıq həmin ölkələr qeyri-qanuni şəkildə onların sərhədlərini keçmiş əfqanları öz ölkələrindən deportasiya etməyə başlayıb. Bu isə “Taliban” iqtidarı üçün ciddi sosial təzyiq yaradıb.
MƏnbə: Sputnik Əfqanıstan
Böyük Britaniyanın Quayakildəki fəxri konsulu Kolin Armstronq qaçırılıb.
APA xəbər verir ki, bu barədə “El Universo” qəzeti məlumat yayıb.
Oğurluq şənbə günü səhər tezdən Ekvadorun Los Rios əyalətində baş verib.
Öz növbəsində Ekvador polisi X sosial şəbəkəsindəki (keçmiş Twitter) səhifəsində bildirib ki, “bu səhər tezdən Los Riosda iş adamına qarşı baş vermiş cinayətlə əlaqədar Ekvador polisinin ixtisaslaşmış bölmələri istintaq-əməliyyat tədbirləri həyata keçirir”.
Qəzet yazır ki, konsulla birlikdə daha bir nəfər qaçırılıb.