 |
|
|
Dekabrın 23-də İran və Azərbaycan baş prokurorları Mohammad Kazem Movahedi-Azad və Kamran Əliyev onlayn görüşdə son razılaşmalar, ikitərəfli hüquqi və məhkəmə əməkdaşlıqları, o cümlədən iki ölkənin Baş Prokurorluqları arasında əməkdaşlığa dair Anlaşma Memorandumunun yekunlaşdırılması ilə bağlı müzakirə və fikir mübadiləsi aparıb.
İranın Azərbaycandakı səfirliyinin məlumatına görə, söhbət zamanı tərəflər Azərbaycanın Tehrandakı səfirliyinə hücumla bağlı faciəvi hadisəni və onu törədən şəxslə bağlı İran məhkəmə sisteminin təqib prosesini nəzərdən keçiriblər.
“Bu kontekstdə formal maneələr aradan qaldırıldıqdan və iş yekunlaşdıqdan sonra məhkəmənin vaxtının müəyyən ediləcəyi və yaxın vaxtlarda keçiriləcəyi açıqlanıb”, səfirlik qeyd edib.
Məlumatda həmçinin bildirilir ki, görüşdə iki qonşu dövlətin münasibətlərini “dostluq və qardaşlıq münasibətləri adlandıran tərəflər” ikitərəfli münasibətlərdə yeni səhifənin başladığını vurğulayıb.
İran baş prokuroru Azərbaycan baş prokuroru Kamran Əliyevi İrana səfərə dəvət edib.
Azərbaycan Baş Prokurorluğu görüşlə bağlı hələ məlumat yaymayıb.
Xatırladaq ki, bundan öncə bu il sentyabrın 14-də İqtisadi Əməkdaşlıq Təşkilatına üzv dövlətlərin Baş prokurorlarının Bakıda keçirilən 4-cü iclası çərçivəsində iki ölkənin baş prokurorları arasında görüş keçirlib. Görüşdə iki ölkə arasında hüquqi əməkdaşlıq, o cümlədən ekstradisiya, məhkumların verilməsi, narkotik vasitələrin qanunsuz dövriyyəsi, ekoloji hüquqpozmalar və digər maraq kəsb edən mövzular müzakirə edilib. Həmçinin İranda məhkum edilən Azərbaycan vətəndaşı Fərid Səfərlinin barəsində cinayət işi müzakirə olunub.
Bundan öncə isə Azərbaycan baş prokuroru İrana səfəri zamanı bu ölkədə gizlənən Azərbaycanda dövlətə xəyanətdə günahlandırlan şəxslərin təhvil verilməsi məsələlrini qaldırıb.
Xatırladaq ki, danışıqlardan sonra İranda Azərbaycan səfirliyinə hücum sahəsində istintaqda bir yenilik olması ilə bağlı hər hansı məlumat yayılmayıb. Rəsmi Bakı Tehrandakı səfirliyinə silahlı basqını terror kimi qiymətləndirib. İran istintaq orqanı isə silahlı basqının şəxsi zəmində olduğunu bildirib. İranda həbsdə olan Fərid Səfərlinin apellyasiya şikayəti də təmin edilməyib. Həmçinin Azərbaycanın dövlətə xəyanətdə günahlandırdığı Azərbaycan vətəndaşlarının təhvil verilməsi ilə bağlı bir xəbər yoxdur.
amerikaninsesi
Dekabrın 23-də Azərbaycan ilə İran arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının həmsədrləri, Azərbaycan baş nazirinin müavini Şahin Mustafayev və İranın yol və şəhərsalma naziri Mehrdad Bəzrpaş arasında telefon danışığı olub.
İranın Azərbaycandakı səfirliyinin məlumatına görə, telefon danışığı zamanı iki ölkə arasında iqtisadi sahədə, o cümlədən nəqliyyat və enerji sahələrində əlaqələrin son vəziyyəti müzakirə edilib, fikir mübadiləsi aparılıb.
“Tərəflər həmçinin Astarada yeni tranzit marşrutu və birgə bəndlər də daxil olmaqla, birgə layihələrin yekunlaşdırılmasının sürətləndirilməsini vurğulayıblar”, məlumatda qeyd edilir.
Şahin Mustafayev iki ölkə arasında tranzit daşımalarından danışarkən deyib ki, 2023-cü ildə iki ölkə arasında yükdaşımalar 40 faiz, beynəlxalq tranzit 57 faiz, dəmir yolu daşımaları isə 47 faiz artıb.
“Bu dövrdə iki ölkə ərazisindən dəmir yolu ilə ilk dəfə olaraq, əsasən Rusiyaya 700 min tondan çox yük daşınıb. Tərəflər, həmçinin iki ölkənin iqtisadi, ticarət və humanitar sahələrdə əməkdaşlıq üzrə Dövlət Komissiyasının həmsədrlərinin iştirakı ilə yaxın vaxtlarda Astara sərhədində iki ölkə arasında yeni tranzit keçidinin açılması barədə razılığa gəliblər”, İran səfirliyi Şahin Mustafayevə istinadən bildirib.
Şimal-Cənub nəqliyyat dəhlizi ilə yükdaşımaların artırılması region dövlətlərinin diqqət mərkəzindədir. Belə ki, Rusiya-Ukrayna müharibəsi həm region ölkələrinin, həm də beynəlxalq sanksiyalar altında olan Rusiya və İranın ticarət əlaqələrinə ciddi təsir edib.
Bu səbəbdən İran və Rusiya Xəzər dənizi sahili boyunca uzanan dəmir yoluna Hindistan, İran, Rusiya, Azərbaycan və digər ölkələr arasında dəmir yolları və dəniz yolları vasitəsilə əlaqəni asanlaşdıracaq 162 kilometrlik Rəşt-Astara dəmir yol xəttinin çəkilişini Şimal-Cənub nəqliyyat dəhlizinin mühüm komponenti kimi qəbul edir.
Bu il mayın 17-də Rusiya və İran Şimal-Cənub dəhlizinin quru dəmir yolu marşrutunun tamamlanması üçün tələb olunan sonuncu Rəşt-Astara dəmir yolu hissəsinin tikintisi barədə hökumətlərarası saziş imzlayıb.
Sənədə əsasən Moskva və Tehran layihələndirmə, tikinti, eləcə də mal və xidmətlərin çatdırılmasını birgə maliyyələşdirir. Tərəflər artıq 2024-cü ilin əvvəlində Rəşt-Astara dəmir yolu xəttinin tikintisinə başlanılacağını bəyan edib.
Burada həmçinin, Astara (Azərbaycan) -Astara (İran) dəmir yolu xəttinin çəkilişi də İran dəmir yollarını Azərbaycan dəmir yolu sisteminə birləşdirən Şimal-Cənub layihəsinin bir hissəsidir. Yolun uzunluğu 10 kilometrdir, - Astara şəhərindən İran sərhədinə 8 kilometr və İranın Astara şəhərindən Azərbaycan sərhədinə 2 kilometrdir.
Noyabrın 16-da Moskvada keçirilən "Nəqliyyat həftəsi" forumunda Rusiya Baş nazirinin birinci müavini Andrey Belousov Şimal-Cənub dəhlizinin inkişafından danışarkən deyib ki, 2023-cü ilin sonunda Şimal-Cənub dəhlizi ilə yükdaşımaların həcmi 18 milyon tona çata bilər, bu da 2021-ci illə müqayisədə demək olar ki, 33 faizdən çoxdur.
"Hazırda dəhlizin tərkib hissəsi olan hər üç marşrut üzrə aktiv iş aparılır. Beləliklə, şərq marşrutu ilə müntəzəm konteyner daşımalarına başlanılıb. Transxəzərdə Volqa-Xəzər dəniz gəmiçiliyi kanalında və Mahaçqala dəniz limanında dibdərinləşdirmə işləri başa çatdırılır, bu da 4,5 metrə qədər suqəbuledici gəmiləri suya buraxmağa imkan verəcək. Qərb marşrutu çərçivəsində İranla Rəşt-Astara dəmir yolunun bir hissəsinin tikintisinin maliyyələşdirilməsinə dair saziş bağlanıb və Azərbaycanla sərhəddə avtomobil buraxılış məntəqələrinin buraxılış qabiliyyəti iki dəfə artırılıb", o qeyd edib.
Andrey Belousovun qənaətincə, 2030-cu ilə qədər bu dəhlizlər üzrə yükdaşımaların həcminin ildə 700 milyon tona çatdırılacağı gözlənilir.
Baş nazirin birinci müavini deyib ki, Rusiya və Azərbaycan 2023-cü ilin sonuna kimi Rəşt-Astara dəmir yolu hissəsinin tikintisinə dair saziş imzalamalıdır.
"Bu ilin sonuna kimi biz Azərbaycanla da analoji saziş imzalamalıyıq. 2028-ci ildən isə bu marşrut yük daşımalarında əlavə artımla tam istifadəyə veriləcək. Yükdaşımalarının əlavə artımı başlanğıc üçün ildə 15 milyon ton yük nəzərdə tutulub", o bildirib.
Xatırladaq ki, İkinci Qarabağ müharibəsindən sonra İran-Azərbaycan münasibətlərində gərginlik yaranıb. Müharibədən sonra İran Azərbaycanla, Azərbaycan isə qarşılıqlı olaraq İranla sərhəddə hərbi təlimlər keçirib. İran rəsmiləri Azərbaycana qarşı hədələyici bəyanatlarla çıxış edib.
2023-cü il yanvarın 27-də Azərbaycanın Tehrandakı səfirliyinə silahlı basqın olub, nəticədə diplomatik missiyanın təhlükəsizlik xidmətinin rəhbəri həlak olub, daha iki mühafizəçi yaralanıb.
Azərbaycan prezidenti İlham Əliyev silahlı basqını terror aktı kimi qiymətləndirib.
Bununla yanaşı son aylarda iki ölkənin xarici işlər naziri problemlərin həlli istiqamətində çoxsaylı telefon danışıqları aparıb. İran xarici işlər naziri Azərbaycan Prezidenti, Azərbaycan xarici işlər naziri isə İran Prezidenti tərəfindən qəbul edilib. İki ölkənin rəsmiləri qarşılıqlı səfərlər edib.
Oktyabrın 6-da Azərbaycanla İranın sərhədindəki Ağbənd bölgəsində (Azərbaycanın Zəngilan rayonu) iki ölkə arasında sərhəd-keçid məntəqəsinin tikintisinə başlanılıb. Elə həmin gün Azərbaycanla bu ölkənin Naxçıvan Muxtar Respublikasını birləşdirəcək İran tərəfinin Araz dəhlizi adlandırdığı (Ağbənd-Culfa) dəmir yolu və avtomobil yolunun, həmçinin Araz çayının üzərində salınacaq körpünün layihələri razılaşdırılıb. Bu layihənin həyata keçirlməsi həmçinin Sovetlər dövründə mövcud olan Moskva-Tehran dəmir yolunun açılması deməkdir. Sovetlət dövründə dəmir yolunun bu hissəsi Ermənistan ərazisindən keçirdi. Ermənistan Birinci Qarabağ müharbəsi zamanı, 1991-ci ildən dəmir yolunun bu hissəsini bağlayıb. İkinci Qarabağ müharibəsindən (2020-ci il) sonra da dəmir yolunun Ermənistandan keçən hissəsinin açılması danışıqların əsas mövzularından biridir. Amma hələ ki, Ermənistan tərəfi ilə razılıq əldə edilməyib.
4,9 milyondan çox Rusiya vətəndaşının borca görə Yeni il bayramı öncəsi xaricə çıxışı müvəqqəti məhdudlaşdırılıb.
Təkcə Moskvada bu ilin 11 ayı ərzində məhkəmə icraçıları səyahətin məhdudlaşdırılması ilə bağlı 742 min əmr verib. Üstəlik, bu sənədlərin yarıdan çoxu Yeni il ərəfəsində etibarlılığını davam etdirir.
2022-ci ildə, Yeni il öncəsi 8 milyon rusiyalının borclarına görə səyahətləri məhdudlaşdırılıb. Bayram qabağı xaricə getməyə icazə verilməyən rusiyalıların bu sayı rekord həddə çatıb.
РИА Новости
Argentinanın yeni prezidenti Xavyer Miley dövlət qulluqçularının kütləvi şəkildə işdən çıxarılması prosesinə başlayıb.
Bu barədə "Brief" "Telegram" kanalı məlumat yayıb.
"Argentina prezidenti Xavyer Miley 2023-cü il yanvarın 1-dən sonra işə götürülən bütün dövlət qulluqçularını işdən çıxarıb. Təxminən 23 min insan dərhal işini itirdi", deyə nəşr yazır.
Dekabrın 21-də Miley Argentina iqtisadiyyatını liberallaşdırmaq üçün 300 islahat təqdim edən fərman imzalayıb. Dövlət başçısının sözlərinə görə, onların məqsədi iqtisadi azadlığı qaytarmaq və ölkənin inkişafını ləngidən çoxlu sayda maneələri aradan qaldırmaqdır.
Həmin gün o, Argentinada 2025-ci ilin sonuna qədər fövqəladə vəziyyət elan edib. Eyni zamanda, islahatlar ölkə əhalisinin bir hissəsinin etirazına səbəb olub, minlərlə insan mitinqlər keçirib. \\Qaynarinfo
Villi Brandt adına Berlin-Brandenburq Beynəlxalq Hava Limanında (BER) proqram təminatı nasazlığı səbəbindən onlarla reys gecikir.
“Report” xəbər verir ki, bu barədə “Bild am Sonntag” qəzeti yazıb.
Nəşrin məlumatına görə, Milad bayramına bir gün qalmış onlarla təyyarə havaya qalxmağı gözləyir. Sərnişinlərə məlumat verilib ki, Berlin hava limanında proqram təminatında nasazlıq olub. Bir çox səyahətçi qar yağdığından baqajlarını təyyarəyə yerləşdirə bilməyib.
Qeyd edək ki, şənbə günü Berlində əlverişsiz hava şəraiti müşahidə olunur. Səhər saatlarından yağan yağış bəzi hallarda sulu qara keçir. Güclü külək vəziyyəti daha da ağırlaşdırır.
Ermənistanın baş naziri Nikol Paşinyan bir müddətdir Azərbaycanla imzalanacaq sülh müqaviləsi barədə ard-arda bəyanatlar səsləndirsə də, bu dəfə də vədinə xilaf çıxaraq sülh prosesini baltalamaq qərarına gəlib. Erməni hökumətinin başçısı bu dəfə Qarabağ separatçıları kartından istifadə edib.
Məsələ burasındadır ki, özünü separatçı qurumun prezidentinin müşaviri adlandıran Vladimir Qriqoryan “Azatutyun” radiosuna müsahibə verərək bildirib ki, Qarabağ separatçılarının keçmiş lideri Samvel Şahramanyan qondarma qurumu buraxdığı barədə əvvəlki qərarını ləğv edib. Erməni mediası isə hakim komandanın göstərişi ilə bu xəbəri gecə-gündüz eninə-boyuna tirajlayaraq, Şahramanyanın öz qərarını ləğv etməsi barədə məlumat yayıb.
Qriqoryanı danışdıran və belə bir açıqlama verməyə vadar edən elə Paşinyan komandasının özü olduğu bəllidir. Regionda sülhə, iqtisadi inkişafa, erməni xalqının rifahına gedən yola əngəl olmaq, revanşizm siyasətini davam etdirmək, görünür, Ermənistan hakimiyyətinin sapmayacağı yeganə yoldur. Bu dəfə də iki ölkə arasında sülhə gedən yolun görünməsi Paşinyanın Qərbdəki havadarları və ağalarını narahat edib. Bu səbəbdən də prosesi ləngitmək, baltalamaq üçün .
Amma erməni hökuməti belə bir xəbəri tirajlamaqla əslində özünün nə qədər çürük və oyuncaq olduğunu bir daha sübut edib. Belə olmasaydı, səslənən bəyanatın Ermənistan üçün nə qədər təhlükəli olduğunu sonradan dərk edən hakim komandanın təkzib xarakterli addımlar atması, ruporları vasitəsilə bu açıqlamanı tənqid edən fikirləri ortaya çıxmazdı. Separatçı Şahramanyanın dilindən bu məsələni ortaya atmaqla, Paşinyan sülhə zərbə vurmaqla yanaşı, özünün də oyuncaq olduğunu üzə çıxarıb. Bunu faktlarla ortaya qoymaq mümkündür.
Birincisi, sözügedən açıqlamanı verən Vladimir Qriqoryan əvvəlcə özünü Qarabağ separatçılarının keçmiş lideri Samvel Şahramanyanın müşaviri kimi təqdim edərək, radioya açıqlama verib.
Sonradan isə açıqlamanı təkzib edərək şəxsi fikri olduğunu, Şahramanyanın da müşaviri olmadığını bəyan edib. Məşhur lətifədə deyildiyi kimi, yaxşı, bu ətdirsə, pişik hanı? Pişikdirsə ət hanı? Yəni, sadə bir adamın fikrinin erməni mətbuatında iki gündür tirajlanması kimə və hansı mərkəzlərə xidmət edirdi? Təbii ki, sualın cavabı gün kimi aydındır: sülh prosesini baltalayan Paşinyan komandasına.
Ətraflı
İkincisi, İrəvan hökuməti dekabrın 21-də müşavirə keçirərək, yeni qərar qəbul edib. Qərara əsasən, dövlət büdcəsində dəyişiklik ediləcək. Yəni, separatçı qurum tərəfindən verilən kreditlərin ödənilməsi üçün kommersiya banklarına 225 milyard dram ödəniləcək. Bu isə, 550 milyon dollardan çox, yəni ölkə büdcəsinin 10 faizini təşkil edir. Kreditlərin kimə və necə veriləcəyi, borc alanların hansı faizinin separatçı rejimlə heç bir əlaqəsi olmadığı barədə isə bir kəlimə də kəsilmir.
Bu isə Paşinyan hökumətinin növbəti yeyinti mənbəsi olacaq. Büdcədən ayrılan çox ciddi məbləğ kommersiya bankları vasitəsilə müəyyən şəxslərin cibinə axacaq. Bu məsələni ört-basdır etmək üçün də Şahramanyan kartından istifadə edilib və artıq erməni KİV-lərində Qarabağ ermənilərinin linçlənməsi kampaniyasına start verilib.
Artıq hakim fraksiyanın üzvü Arusyak Julhakyan və katibi Artur Hovannisyan separatçı Şahramanyana qarşı sərt bəyanatlar səsləndiriblər. Julhakyan bildirib ki, Ermənistan respublikası ərazisində bir hökumət var və ancaq bu hökumətin institutları fəaliyyət göstərir. Digər qurum və institutlar qeyri-leqaldır, onların fərman və sənəd imzalamaq hüququ yoxdur. Katib qeyd edib ki, baş verənlər ölkəni hərbi təxribata cəlb etmək niyyətini güdür və bu işin arxasında olanlar cəzalandırılacaq.
Arusyakın da açıqlamalarından məlum olur ki, hakim fraksiya baş verən vəziyyətdən narahatdır və baş nazirin hesablanmamış addımları artıq partiya daxilində ciddi narazılıqlara səbəb olub. Şübhəsiz ki, Ermənistan prezidenti Vaaqn Xaçaturyan və parlamentin spikeri Alen Simonyanın bir müddət əvvəl “Ermənistan ərazisində heç bir separatçı qurumun dövlət orqanları fəaliyyət göstərə bilməz” fikrini xatırlatmaq yerinə düşər. Belə olduğu halda, Şahramanyanın özünün də xəbəri olmadan Paşinyan direktivləri ilə “fərman imzalaması” təbii ki, fraksiyada çaşqınlığa səbəb olub. Bu çaşqınlığı aradan qaldırmaq, hadisənin anlaşılmazlıq olduğunu sübuta yetirmək üçün deputatlar və rəsmilər artıq fəaliyyətə keçiblər.
Əslində “Vətəndaş müqaviləsi”ni qorxuya salan rəsmi Bakının reaksiyasıdır. Təbii ki, erməni siyasi elitası da anlayıb ki, baş verənlər Azərbaycan tərəfindən düzgün analiz edilir və bu bəyanatların arxasında revanşizm meyllərinin olduğu artıq bilinir. Bu isə Azərbaycan dövlətinin kəskin reaksiyasına səbəb ola bilər və Nikol Paşinyan separatizmi bəsləyən şəxs kimi qəbul edilə bilər.
Əgər Ermənistan və havadarları öz çirkin planları üzərində iş qurursa, Qərbi Azərbaycan Respublikasının yaradılması prosesinə başlanmalıdır. 30 il bundan öncə öz torpaqlarından qovulan insanların Qərbi Azərbaycana qayıtmaq hüququ, bu prosesi əsaslandıran tarixi əsas və güclü Azərbaycan Ordusu var. Və sülhdən boyun qaçıran rəsmi İrəvan bunu tam gözü önünə almalıdır.
Ortaya maraqlı bir sual çıxır, xəbər iki gündür tirajlanır və hakim fraksiyanın katibi olan Artur yəqin ki, məsələdən halidir. Bu iki gün ərzində niyə ağzına su alıb susurdu? Sonradan baş verəni analiz edib rəsmi Bakının qəzəbinə düçar olacaqlarını anladıqdan sonra addım atmaq kimə lazımdır? Paşinyan komandası görəsən toydan sonra nağara siyasətindən nə zaman uzaqlaşacaq?
Şahramanyanın adından ortaya atılan iddia isə yeni məqamları üzə çıxarıb. Məlum olub ki, separatçı qurumun “vəzifəliləri” sentyabr ayından “maaş” almırlar və bu məsələdə Nikol Paşinyanı günahlandırırlar. Onların tələbinə boyun əyməmək və bir dram da xərcləmək niyyətində olmayan hakim komanda bu son oyunu ilə maaş söhbətinin də üstündən xətt çəkdi.
Göründüyü kimi, separatçı rejimə “can vermək” planı elə başlayan kimi də fiaskoya uğrayıb. Rəsmi İrəvan yəqin ki, növbəti hərbi əməliyyatın Ermənistan üçün daha dağıdıcı və dövlət sisteminin məhvi ilə nəticələnəcəyini anlayır. (report.az)
“HƏMAS hərəkatı Qəzza zolağında saxlanılan girovların azad edilməsi ilə bağlı İsraildən ciddi təkliflər almayıb”.
Yeniavaz.com xəbər verir ki, bunu hərəkatın Siyasi Bürosunun üzvü Hussam Badran “Əl-Cəzirə” telekanalına şərhində bildirib.
“İsrail girov məsələsi ilə bağlı ciddi və real təkliflərlə çıxış etməyib. Yəhudi hakimiyyət orqanları Qəzzada saxlanılan israillilərin manevr edib ailələrini çaşdırmağa çalışır”, - məlumatda deyilir.
Badranın sözlərinə görə, HƏMAS-ın prioriteti anklava qarşı təcavüzü dayandırmaqdır:
“Yalnız bu məqsədə çatdıqdan sonra hərəkat bütün digər məsələlər haqqında danışa biləcək”.
Macarıstan Bolqarıstanın Şengen zonasına daxil olmasına vetonunu ləğv etdi. Səbəb Sofiyanın Rusiya qazının öz ərazisindən tranziti üçün rüsumları ləğv etməsidir.
Bunu Macarıstanın Xarici İşlər və Xarici İqtisadi Əlaqələr Nazirliyinin rəhbəri Peter Siyarto deyib.
Bolqarıstan tərəfi Macarıstanı məlumatlandırıb ki, yanacağın daşınmasına görə rüsumlar haqqında qanun qüvvəyə minib və müvafiq layihə rəsmi sənədlər toplusuna daxil edilib.
“Macarıstana təbii qaz tədarükünə görə əlavə vergini ləğv edən qanun rəsmən dərc edilib”, – Macarıstan Xarici İşlər Nazirliyinin mətbuat xidməti xəbər verir.
Tribunainfo.az xəbər verir ki, “Wall Street Journal”da dərc olunan məqalədə deyilir ki, Yevgeni Priqojinin ölümündə Rusiya Təhlükəsizlik Şurasının rəhbəri Sergey Patruşev əli olub.
Amerika dövri nəşrinin yazdığına görə, 2022-ci ilin yayından başlayaraq Patruşev hakimiyyətə bir neçə dəfə Priqojinin təhlükəli ola biləcəyi barədə xəbərdarlıq etsə də, onu ciddi qəbul etmədilər, çünki “Vaqner” RMC cəbhədə uğur qazanırdı.
Lakin oktyabrda Priqojin Rusiya prezidentinin adını çəkərək kifayət qədər kəskin tonda sursat çatışmazlığını elan etdi, bundan sonra onların təmaslarının dayandırıldığı iddia edildi və Putin Vaqnerlə Müdafiə Nazirliyi arasında ictimai fikir ayrılığına müdaxilə etmədi.
Vəziyyət 2023-cü ilin iyun qiyamı zamanı gərginləşdi. Daha sonra WSJ-nin məlumatına görə, Patruşev Priqojinə yaxın olan zabitləri onunla əlaqə saxlamağa və ondan üsyanı dayandırmağı xahiş etməyə inandırmağa çalışıb.
O, həmçinin Qazaxıstan prezidenti Kasım-Jomart Tokayev (o iştirak etməkdən imtina edib) və Belarus prezidenti Aleksandr Lukaşenko ilə əlaqə saxlayıb, münaqişənin həllində vasitəçilik istəyib.
Üsyan bitdikdən sonra Patruşev, WSJ-yə görə, Priqojini öldürmək üçün plan hazırlamaq əmrini verdi. Nəşrin yazdığına görə, ölkənin ali rəhbərliyi bundan xəbərdar olsa da, onun hazırlanmasına qarışmayıb.
WSJ-nin məlumatına görə, avqustun 23-də Priqojinin şəxsi təyyarəsinin qanadı altına bomba qoyulub və o, biznes-jet havaya qalxdıqdan dərhal sonra partlayıb.
Ermənistanda “Sputnik” radiosunun yayımı dayandırılıb. Bu, Ermənistan rəhbərliyinin açıq-aşkar antirusiya addımıdır.
Bunu rusiyalı politoloq Sergey Markov deyib.
“Amma Rusiyadan sərt cavab olmayacaq. Çünki Paşinyan bununla Moskvanı sərt davranmağa təhrik edib, bu sərt cavabdan erməni əhalisi arasında kütləvi antirusiya təbliğatı aparmaq üçün istifadə edə bilər. Bunun hesabına da Ermənistanda ictimai rəyi rusiyapərəstlikdən antirusiyaya çevirər. Bu zaman da bütün gücü ilə xəyanət bıçağını Rusiyanın kürəyinə sancıb, Ermənistanı ABŞ, Fransa, AB, NATO simasında Kremlin düşmənlərinə doğru apara bilər. Ona görə də Rusiyanın cavabı çox, çox yumşaq olacaq. Hansı ki, bu halda daha uyğundur”, - o bildirib.
Mənbə: axar.az