Pensiyası azaldılan qazinin həyat yoldaşının da pensiyası azaldılıb

İki ildir ƏƏSMN tabeliyində DSMF-in Xüsusi Şərtlərlə Təyinat üzrə Mərkəzi Filialının 1-ci dərəcəli Qarabağ əlilinin pensiyasına 8 il qabaq çıxarılan məhkəmə qərarı ilə əlavə olunan 110 manatın dələduzluqla kəsilməsinə, pensiyasının 2023-cü ildə ayda 138,79 manat, 2024-cü ildə ayda155 manat, bu ilin iki ayında hər ay 167 manat azaldılmasına hüquqi qiymət verilmir.

Bu iki ildə prokurorluğa, ombudsmana, PA-ya,MM-ə, NK-ya, Ali Məhkəməyə, Konstitusiya Məhkəməsinə, Ədliyyə Nazirliyinə, Maliyyə Nazirliyinə, Hesablama Palatasına, Məhkəmə Hüquq Şurasına,… minə yaxın şikayətlər edilsə də, vurğuladığımız kimi, əlil-qazinin (daşınar) əmlakı nəinki qaytarılıb, pensiyası bərpa edilib, əksinə, 12 ildir 10 nəfərlik ailəsi ilə növbəsində olduğu, 9 ildir məhkəmə qərarı ilə də haqq etdiyi daşınmaz əmlakından-mənzilindən də məhrum edilib. Ayrı-seçkiliyin, tənqidə görə təqibin dərəcəsinə baxın, 1-ci dərəcəli Qarabağ qazisinin dövlət orqanlarına müraciəti 2 əlil elmi işçisi, 4 körpəsi olan ailəsinin də sosial təminatdan məhrum edilməsi ilə sonuclanıb. Hətta 1-ci dərəcəli əlilə qulluq edən həyat yoldaşının pensiyası da gizlin, xəbər vermədən azaldılıb, hər ilin birinci ayının artımı “dövlət dələduzluğu” ilə mənimsənilir.

Qərəzli ayrı-seçkilik, dələduzluq o həddədir ki, 32 ildir işləməyən əmək pensiyaçısı kateqoriyasına keçən 1-ci dərəcəli Qarabağ əlilinin pensiyası işləməyi davam etdirdiyinə görə yığılan sığorta-pensiya kapitalına uyğun “Əmək pensiyaları haqqında” qanunun 37.3.2-1 maddəsi əsasında (müraciət etsə də,) yenidən hesablanmır. DSMF yetkililəri rəsmi məktublarla pensiyanın əlil-qazinin ölüb işləməyi dayandıracağından sonra (??) yenidən hesablanacağını bildirir. Hələ də bu boyda nazirlik, bu yekəlikdə fond yetkililəri qərəzlə, ayrı-seçkiliklə anlamırlar ki,“işləməyən kateqoriya” anlayışı-termini işi dayandırmaq demək deyil. Ölənəcən işi dayandırmayan pensiyaçının pensiyası bəyəm öləndən sonra yenidən hesablanacaq? Absurd deyilmi? Qanunverici bu absurdluğa hələ də “biz nə edə bilərik” deyir…

Baş prokurorluğun 161 -korrupsiya ilə mübarizə əlaqə xidmətinə şikayət yenə də qanuna zidd olaraq barəsində şikayət edilən DSMF-ə göndərilib. Pensiya təminatı departamentinin müdiri Eyvaz İsmayılov bu il də Konstitusiyanın qüvvədə olmadığını, pensiyanın öləndən sonra yenidən “ölənə kimi yığılan kapitala və ölü iş stajına uyğun” hesablanacağını “hörmətlə” bildirib. Hörmətli departament müdiri şikayətçi əlilin həyat yoldaşının pensiyasının azaldılmasını isə “dövlət (dələduzluq) sirri” kimi “Fərdi məlumatlar haqqında” qanuna zidd olduğundan (?-M. B.) cavablandırmaqdan imtina edib.

Pensiyamızdan məhrum olsaq da, ölmədik, bunu da gördük; heç demə, pensiyanın məbləği, kəsilməsi barədə məlumat “fərdi” məlumat imiş, “dövlət dələduzluq sirri” kimi qorunurmuş! (??) Belə çıxır, Qarabağ qazisi öləndən sonra da pensiyası yenidən hesablanmaycaq, “fərdi məlumatdır” axı, ailəsinə yox, yalnız ölənə verilə bilər!(?)

Məğrur BƏDƏLSOY

P. S. Yeni maliyyə və əmək və əhalinin sosial müdafiəsi nazirinin qərəzli ayrı-seçkiliyə son qoyacağına ümidliyik.
hurriyyet.az

Xəbər verdiyimiz kimi Musa Kılıç Uzman Fizioterapevt Reabilitoloq kimi saxta diplom əsasında fəaliyyət göstərməsi təsdiqləndi.

Türkiyə vətəndaşı uzman fizioterapevt Musa Kılıç peşə ixtisasının tanınması üçün Səhiyyə Nazirliyində keçirilmiş imtahana dəvət olunub, imtahanda müvafiq keçid balını toplaya bilmədiyi üçün uğursuz nəticə əldə edib və ona TKTA tərəfindən yalnız akademik tanınma şəhadətnaməsi təqdim olunub.

Bu barədə Təhsildə Keyfiyyət Təminatı Agentliyindən məlumat verilib.

Qeyd olunub ki, martın 2-i sosial mediada Türkiyə vətəndaşı Musa Kılıçın bakalavriat səviyyəsi üzrə Tbilisi Dövlət Tibb Universitetindən əldə etdiyi diplomun saxta olduğuna dair məlumat paylaşılıb və müvafiq qurum tərəfindən adıkeçən şəxsin kvalifikasiyasının tanınmadığına dair fərziyyə irəli sürülüb.

Xarici kvalifikasiyaların tanınması üzrə məsul qurum olaraq Elm və Təhsil Nazirliyinin tabeliyində Təhsildə Keyfiyyət Təminatı Agentliyinin (TKTA) qeyd olunan məqamı aydınlaşdırmaq zərurəti yaranıb:

“Qeyd etmək istərdik ki, M.Kılıc “Fizioterapiya və tibbi reabilitasiya” ixtisası üzrə əldə etdiyi dövlət nümunəli (həqiqi) ali təhsil sənədi ilə xarici kvalifikasiyasının tanınması üçün TKTA-ya müraciət edib. M.Kılıçın müraciəti üzrə icraat Nazirlər Kabinetinin 2023-cü il 3 fevral tarixli, 34 nömrəli Qərarı ilə təsdiq edilmiş “Xarici dövlətlərin ali təhsilə aid kvalifikasiyalarının tanınması Qaydaları”na əsasən aparılıb. M.Kılıç peşə ixtisasının tanınması üçün Səhiyyə Nazirliyində keçirilmiş imtahana dəvət olunmuş, imtahanda müvafiq keçid balını toplaya bilmədiyi üçün uğursuz nəticə əldə etmiş və ona TKTA tərəfindən yalnız akademik tanınma şəhadətnaməsi təqdim olunub. Sözügedən şəhadətnamədə də qeyd olunduğu kimi akademik tanınma ərizəçiyə yalnız Azərbaycan Respublikası ərazisində təhsilin növbəti pilləsi (səviyyəsi) üzrə təhsilini davam etdirmək hüququ verir”.“Qafqazinfo”

Qeyd edək ki, daha əvvəl xəbər dərc olunmuşdur ki, Musa Kılıç MedEra hospitalında Uzman Fizioterapevt Reabilitoloq kimi fəaliyyəti qanunsuzdur və bunula bağlı hüqu- mühafizə orqanları araşdırma aparılması vurğulanırdı.

Bakı şəhər sakini Rüfət Razim oğlu Əsgərov 2008-ci ilin iyun ayında “MuğanBank”a (lisenziyası 2023-cü ildə ləğv edilib) yerləşdirdiyi əmanətin yoxa çıxdığını iddia edir.

“Qafqazinfo”ya müraciət edən R.Əsgərov illər əvvəl banka qoyduğu 300 min dollar pulu və faizlərini geri ala bilmədiyini deyir.

Şikayətçi bildirir ki, həmin il bankın Gəncə filialında fiziki şəxs kimi uzunmuddətli və sığortalanmış depozit hesabı açıb: “Əmanəti və faizini müddət bitəndən sonra götürəcəkdim. Yeddi müqavilə bağlayaraq əmanət yerləşdirdim və həmin gün Azərbaycandan çıxıb başqa ölkəyə getdim. İldə bir-iki dəfə Gəncəyə gedərkən “MuğanBank”a baş çəkərək müqaviləm haqqında maraqlanırdım, hər dəfə mənə heç bir problemin olmadığı deyilirdi. 2019-cu ilə qədər bu formada davam etdi”.

R.Əsgərovun sözlərinə görə, 2020-ci ildə “MuğanBank”dakı əmanətini götürmək istəyib: “Banka zəng edib bildirdim ki, bir həftəyə Gəncəyə gələcəyəm, əmanətimi hazırlasınlar, gəlib götürəcəyəm. Həmin vaxt mənə dedilər ki, “sizin bank hesabınız yoxdur”. Hesab nömrəmi təqdim etdikdə həmin hesabın Gəncədə deyil, bankın Goranboy filialında olduğunu dedilər. Dərhal Gəncə filialına, həm də “MuğanBank”ın Bakıdakı baş ofisinə məktub göndərdim. Cavab gəldi ki, hesabımın Gəncə filialına aid olduğu doğrudur. Lakin guya mən şəxsən gedib əmanəti tam şəkildə çıxarmışam. Onlar göstərdiyi tarixdə isə mən Azərbaycanda olmamışam”.

Bundan sonra vətəndaş məhkəmələrə üz tutmalı olub: “Məhkəmədə qalib gəldim. Lakin bank Ali Məhkəməyə müraciət etdi. Ali Məhkəmə də Dövlət Arxiv İdarəsindən sənədin başqa cür formasını istədiyi üçün iş yenidən Apellyasiya Məhkəməsinə göndərildi. Dövlət Arxiv İdarəsindən və Mərkəzi Bankdan Apellyasiya Məhkəməsinə cavab gəldi. Cavabda mənim haqlı olduğum, bankın isə yalan dediyi bir daha sübut olundu. Lakin sabahı gün “MuğanBank”ın lisenziyası ləğv olundu”.

Bank bağlanandan sonra R.Əsgərov Əmanətlərin Sığortalanması Fonduna müraciət edib: “Bütün məhkəmə sənədlərinin surətini onlara təqdim etdim. 59 gün sonra fonda getdim ki, bir məlumat əldə edim. Oradan mənə bildirdilər ki, siz bizə müraciət etməmisiniz. Lakin sonra fonddan bildirildi ki, “siz sığortalı əmanətçilərin siyahısına düşməmisiniz və sizə pul verilməyəcək”. Mənə adi qaydada, şablon cavab verdilər. Lakin mənim məsələm şablon cavab tələb etmir, bu iş məhkəmə müstəvisində sübuta yetirilib.

Ekspertiza müəyyən edib ki, mənə ümumilikdə faizlərlə birgə 537 min dollar qaytarılmalıdır”.

O, məsələni yenidən məhkəmə müstəvisinə daşıdığını əlavə edib: “Bakı Apellyasiya Məhkəməsinin icraatında olan iş vaxtı bankın lisenziyası müflisləşmə ilə bağlı ləğv edildiyindən işə mülki icraatda baxılması mümkün olmadı və icraata xitam verildi. Mən kreditor tələbimi Əmanətlərin Sığortalanması Fondunda qeydiyyatdan keçirdim və 2024-cü ildə kreditor tələbimi qəbuledilməzlər siyahısına salınmasına dair Bakı Apellyasiya Məhkəməsinin inzibati kollegiyası qərardad qəbul edib. İndi mənim tələbimə mülki qaydada baxılması mümkün deyil, inzibati icraat qaydasında da bankın ƏSF-yə təhvil verdiyi sənədlər arasında mənim pul vəsaitimlə bağlı sənəd olmadığından inzibati icraat qaydasında da kreditor tələbim təmin olunmur. İndi mən neyləyim? Qanunsuz olaraq illərlə məhkəmə çəkişməm gedir. Hazırda da Ali Məhkəməyə hər iki məhkəmə aktından şikayət vermişəm”.

Məsələ ilə əlaqədar Əmanətlərin Sığortalanması Fonduna sorğu ünvanladıq. Qurumdan müraciətimizə cavab olaraq bildirildi ki, hazırda məsələ ilə bağlı məhkəmə çəkişməsi davam edir: “Vətəndaş Əsgərov Rüfət Razim oğlunun özünün də bildirdiyi kimi, hazırda bankla sonuncu arasında məhkəmə mübahisəsi davam edir. Kreditorun mübahisələndirdiyi tələb üzrə məhkəmə yekun aktı qanuni qüvvəsini aldığı təqdirdə tərəfimizdən qərarla bağlı ətraflı məlumat təqdim edilə bilər”.

Milli Onkologiya Mərkəzinin girişində xəstə yaxınlarından əlavə ödəniş tələb olunduğu iddia edilir.

Patrulaz.az-a müraciət edən vətəndaşlar Milli Onkologiya Mərkəzində xəstə yaxınlarına qarşı qanunsuz məhdudiyyətlər tətbiq edildiyini iddia edirlər. Onların sözlərinə görə, gün ərzində bir xəstənin yanına maksimum iki nəfərin buraxılmasına icazə verilir. Əgər üçüncü şəxs və ya daha çox insan xəstəni görmək istəsə, mühafizəçilər onlardan əlavə ödəniş tələb edir.
Xəstə yaxınları bunun heç bir hüquqi əsasının olmadığını bildirirlər: “Burada yatanların çoxu ağır vəziyyətdə olan xəstələrdir, bəziləri isə bəlkədə ömrünün son günlərini yaşayır. Onların ailə üzvlərinə və sevdiklərinə ehtiyacı var. Belə bir vəziyyətdə yaxınlarını görmək üçün insanlardan pul tələb edilməsi heç bir yerə sığmır,” – deyə şikayətçilər bildiriblər.

İddialara görə, bu hərəkətlər xəstəxana mühafizəçilərinin təşəbbüsü ilə həyata keçirilir. Vətəndaşlar adiyyatı qurumlardan bu halların araşdırılmasını və xəstə yaxınlarına maneələr yaradılmamasını xahiş edirlər.

Sabirabad rayon Şəhriyar kənd sakini Faiq Abdullayev deyir ki, ona məxsus torpaq sahəsi qanunsuz olaraq, Sabrabad rayonunun torpaq şöbəsinin müdiri Vəli Əliyev tərəfindən qeyri-qanuni olaraq icarəyə verilib.

"DİA-AZ"ın məlumatına görə, şikayətçi açıqlamasında deyir ki, bununla bağlı dəfələrlə aidiyyatı qurumlara müraciət etsə də, heç bir nəticəsi olmayıb. Abdullayevin iddiasına görə, bu qanunsuz əməlin arxasında İcra hakimiyyətinin 1-ci müavini Həsən Həsənov durduğu üçün onun şikayətinə baxan yoxdur.

Ona məxsus obyektə getdiyində Həsən Həsənov və Vəli Əliyev onu ölümlə hədələyir. O, bununla bağlı dəfələrlə Sabrabad rayonunun icra başçısının qəbuluna düşmək istəsə də, Həsənov buna mane olub.

Şikayətçi deyir ki, 5 nəfərdən ibarət ailə üzvü var, maddi durumu çox zərifdir. Qanunsuz olaraq torpağı əlindən alındığı üçün təsərrüfatla da məşğul ola bilmir.

O, aidiyyatı qurumlara müraciət edərək ona məxsus olan torpağın qaytarılması üçün kömək etmələrini xahiş edir.

Məsələ diqqətimizdədir...

Tanınmış televiziya aparıcısı Zamirə Dadaşova "Azəriqaz"dan şikayətçidir

AFN.az xəbər verir ki, bu barədə o özünün feyzbuk səhifəsində yazıb. "Azəriqaz"ın artıq hesablama apardığını deyən Z.Dadaşova bildirib ki, sonuncu dəfə 2024-cü il noyabrın 24-də yaşadığı evin qaza olan borcu ödənilib: "61 manat ödəniş olub. 2025-ci il yanvarın 1-də limitlə əlaqəli sayğacın sıfırlanması gözlənilirdi. Xəzər rayon qaz idarəsinin əməkdaşı ancaq fevralın 1-də gəlib sayğaca baxış kecirib və qəbz də təqdim etməyib. Məlum olub ki, fevralın 1-nə qədər mən limiti kecmiş olmuşam (baxmayaraq yanvarın 1-də limit sıfırlanmalı idi) və 360 manat ödəməliyəm. Dediklərinə görə, fevralın 1-dən 2025-in hesabatı aparılacaq. Yəni 1200 kub limit hesablanacaq. Hec nə demədik. Fevral ayı ücün sərfiyyat 720 kub olduğu halda mən "limiti kecmiş" hesab olundum və sərfiyyat 22 qəpikdən hesablandı. Mən "Azəriqaz"ın rəhbəri Azər Məmmədovdan soruşuram: niyə bu xalqı sevdiyi, canını belə verməyə hazır olduqları dövlətdən iyrəndirirsiz? Düşmənisiz bu dövlətin? Əgər siz mənim 100-200 manatıma qalmısızsa gəlin istəyin verim. Mənim kimi yüzlərlə insan var bu özbaşnalıqla üz üzədir. Deyəndə də abonenti borclu cıxarırlar və bu durum hec kimin vecinə deyil. Mən əminəm, Cənab prezident onu sevən xalqa qarşı bu addımları atanların cəzasını verəcək! Azər Məmmədov və onun kimi məmurlar sizin Allahınız yoxdur, bəlli. Amma bu xalqın Allahı var! Ən ağır cəzanı isə o verir! Unutmayın! Bu xalqın ahı yerdə qalmayacaq!

Sözüm bütün məmurlaradır: Dövlət başcısı cənab İlham Əliyev sizi bu fəzifəyə təyin etməyib ki, onu dəstəkləyən və sevən xalqı əzib tapdalayasız. Bəsdirin bu insanların cibinə girib arvadınıza, sevgililərinizə lyüks həyat yaşatdınız! Siz bu millətin, bu xalqın əziyyətlə qazandığı pullarla varsız!"

Ötən il Təhsil İşçiləri Azad Həmkarlar İttifaqına sədr təyin edilən Araz Paşayev 2 ay sonra Təhsil Tələbə Krediti Fondunun İdarə Heyətinin sədri vəzifəsindən çıxarıldı.

AzFakt.com xəbər verir ki, Araz Paşayevin Təhsil Tələbə Krediti Fondunun İdarə Heyətinin sədri vəzifəsindən çıxarılmasına səbəb Hesablama Palatasının bu qurumun fəaliyyətində aşkarladığı qanunsuzluqlar idi.

Xüsusi təmtəraq və təqdimatla himayədarları tərəfindən vəzifəyə gətirilən, ictimaiyyətə savadlı, yenilikçi və şəffaf kadr kimi təqdim olunan yeni sədrin fəaliyyətində Hesablama Palatasının ciddi nöqsanlar aşkarlaması və bu barədə aidiyyatı qurumlara rəsmi müraciətlər etməsi Araz Paşayevin əsas himayədarı olan “İçərişəhər” Dövlət Tarix-Memarlıq Qoruğu İdarəsinin rəisi Rüfət Mahmudu çətin vəziyyətə salıb.

Əldə etdiyimiz məlumata görə Rüfət Mahmud Araz Paşayev barədə yuxarılara verdiyi yüksək təqdimata görə qınanılıb.

Araz Paşayevin Təhsil Tələbə Krediti Fondundakı bacarıqsızlığı onun Təhsil İşçiləri Azad Həmkarlar İttifaqına necə rəhbərlik edəcəyini ciddi sual altına alıb.

Məlumata görə Elm və Təhsil nazirliyinin rəhbərliyi və digər aidiyyatı qurumlar Təhsil İşçiləri Azad Həmkarlar İttifaqının yeni sədri barədə heç də ürəkaçan fikirdə deyillər. Onlar Araz Paşayevin Təhsil Tələbə Krediti Fondundakı uğursuz fəaliyyətinin İttifaqda da təkrarlana biləcəyindən narahatlıq keçirir, dəfələrlə tədbir və iclaslarda bunu Rüfət Mahmudin diqqətinə də çatdırıblar.

Qeyd edək ki, Araz Paşayev Təhsil Tələbə Krediti Fondunda əvvəl hüquqi ünvanı Rüfət Mahmuda məxsus mənzildə qeydiyyatda olan “UNİVERSİTAS-İNTERNATİONAL” Məhdud Məsuliyyətli Cəmiyyətinin qanuni təmsilçisi olub.

Bu şirkət bir çox dövlət qurumlarında dəyəri milyon manatlarla ölçülən tenderlərdə qalib elan edilib.

Bir müddət əvvəl xəbər vermişdik ki, Bakının Nərimanov rayon ərazisində yaşayış yerlərinin qeyri-yaşayış təyinatlı istifadəsi kütləvi hal almağa başlayıb. Tribunainfo.az bildirir ki, rayonun bir sıra yerlərində bu hallar daha açıq şəkildə müşahidə olunmaqdadır.
Belə ki, Yusif Vəzir Çəmənzəminli küçəsində yaşayış binasının qarşısı kəsilərək, alt mərtəbə obyektə çevrilib. Bundan başqa, Nərimanov rayonu, Mirzə Uluqbəy və Faiq Yusifov küçələrində də analoji durum yaşanır.
Amma məsələ orasıdır ki, bunca ictimailəşməsinə baxmayaraq, Nərimanov rayonunda qanunsuz obyektlərin tikintisi prosesi dayanmayıb.
Ötən gün daha bir qanunsuz tikinti işinin üstü açılıb. Tribunainfo.az xəbər verir ki, bu dəfə qanunsuz tikinti işlərinin aparılması Nərimanov rayonunun Təbriz küçəsində qeydə alınıb. Orada iri ticarət obyekti inşa edilir.
Aydın məsələdir ki, bu prosesdən Nərimanov rayon İcra Hakimiyyəti və digər səlahiyyətli qurumların xəbəri var. Əgər xəbərləri yoxdursa, o zaman nəyəsə görə göz yumublar.
Maraqlıdır ki, Nərimanovun icra başçısı Elgün Həbibullayev bu cür ciddi hadisələri görməzdən gəldiyi halda, balkonuna bir mismar vuranı daha tez görür. Deyə biləcəyimiz isə odur ki, Türkiyədə baş verən zəlzələdən sonra Azərbaycan Prezidenti İlham Əliyevin göstərişinə əsasən, yaşayış yerlərinin qeyri-yaşayış sahəsinə çevrilməsi, belə bir təyinatlı istifadəsi və ya obyektə çevrilməsi qadağan olunub. Həbubullayev isə buna əhəmiyyət vermir, göstərişə əməl etmir və öz bildiyi kimi davranır.
Məsələ ilə bağlı Nərimanov rayon İcra Hakimiyyəti və Şəhərsalma və Arxitektura Komitəsinin də mövqeyini dərc etməyə hazırıq.

Şəhid ailəsi onlara məxsus olan həyətyanı torpaq sahəsinin zəbt edildiyini iddia edir.

“Qafqazinfo”ya müraciət edən şəhid Saleh Səfərovun atası Səfərov İrzəxan Həmzəxan oğlu bildirib ki, ona məxsus 0.06 ha həyətyanı torpaq sahəsi Masazır bələdiyyəsi tərəfindən qanunsuz olaraq ələ keçirilib.

Ata deyir ki, Masazır bələdiyyəsinin 16.04.2007-ci tarixli, 17 saylı qərarına əsasən, alqı-satqı müqaviləsi ilə İslamova Zümrüd Rəşid qızına verilmiş 0.06 ha həyətyanı torpaq sahəsini notarial qaydada 24.12.2024-cü ildə alıb.

Daha sonra torpağı rəsmi olaraq adına keçirmək üçün Əmlak Məsələləri Dövlət Xidməti Daşınmaz Əmlakın Kadastrı və Reyestrinə müraciət edib: “Qurumun 4 saylı Abşeron Ərazi İdarəsi tərəfindən isə bildirildi ki, torpaq başqa vətəndaşa məxsus torpaq sahəsilə üst-üstə düşdüyündən çıxarış almaq mümkün deyil. Qanunla mənə məxsus olan torpaq sahəsi Masazır bələdiyyəsi tərəfindən başqa şəxsə satılıb. Bu işdə hətta Abşeron Rayon İcra Hakimiyyətinin Memarlıq şöbəsinin keçmiş müdiri Elvin Quliyevin də əli olub”.

Məsələyə aydınlıq gətirmək üçün Abşeron rayonu Masazır bələdiyyəsinin sabiq sədri, hazırda isə sədr müavini olan Elşad Sadıqovla əlaqə saxlamaq istəsək də, zənglərimizə cavab vermədi.

Yeni seçilən bələdiyyə sədri Firdovsi Cəlalov isə suallarımızı belə cavablandırdı: “Hazırda məsələ hüquq-mühafizə orqanları tərəfindən araşdırılır. Bununla bağlı cinayət işi açılıb. Dünən də məhkəmə iclası olub, hazırda proses davam edir. Bəzi lazım olan sənədlər də təqdim ediləndən sonra növbəti məhkəmə iclası keçiriləcək”.

Qeyd edək ki, Saleh Səfərov 44 günlük Vətən müharibəsində Füzuli istiqamətində gedən döyüşlərdə şəhidlik zirvəsinə ucalıb. Vəzifə borcunu şərəflə yerinə yetirdiyi üçün ölümündən sonra “Vətən uğrunda”, “İgidliyə görə”, “Füzulinin azad olunmasına görə”, “Xocavəndin azad olunmasına görə” və “Şuşanın azad olunmasına görə” medalları ilə təltif edilib.