Daşkəsən şəhər sakini İsayev Elman İslam oğlu tərəfindən Hürriyyet.az saytının redaksiyasına şikayət məktubu daxil olub. Müraciəti olduğu kimi dərc edirik.

“Mən, Qarabağ veteranı İsayev Elman İslam oğlu, yazaraq sizdən xahiş edirəm ki, şikayətimi işıqlandırasınız.

Əvvəllər Daşkəsən şəhər avtobazasında işləyirdim. Sonra isə Gəncə marşrutunda şəxsi maşınımla işləməyə başladım. Xroniki xəstəliklərimə görə məni təqaüdə çıxardılar. Təqaüd az olduğuna görə, mən marşrutda da işləyirdim. Qaynatamın avtobus sürmək hüququ olduğuna görə, onunla bərabər işlədim. Elə həmin gündən qara günümüz başladı.

Mənim günlərimi ayrı-ayrı adamlara satdıqlarına görə, şikayətçi olmuşam. Vergimi aşağı qiymətlə alıb, mənə 24 gün iş günü verirdilər. Üç ildir təqaüdüm kəsilib. Hazırda məndən 120 manat pul alıb, 15-16 iş günü verirlər.

Dolana bilmədiyim üçün aidiyyəti orqanlara şikayətə başladım. Ən sonda da cənab Prezident İlham Əliyevə və Rəqəmsal inkişaf və nəqliyyat naziri Rəşad Nəbiyevə şikayətlər yazdım. Həmin şikayətlər isə Azərbaycan Yerüstü Nəqliyyat Agentliyinin (AYNA) Gəncə Regional İdarəsinin müdiri Müzadil Həsənova göndərilib. Onlar da acığa düşüb, işimi lap ağırlaşdırdılar. Mənə cərimə yazdılar. Belə ki, 120 manat dövlət rüsumu ödəyirəm. 100 manat məbləğində cərimə yazdılar.

Məlumat verim ki, maşınım xarab olduğu üçün sərnişinləri mənzil başına “Sprinter”lə çatdırdığım cərimə yazdılar. Bildirdim ki, dövlətin vergisini ödəmişəm. Deyirlər ki, bizə aidiyyəti yoxdur. Bir sözlə, işləməyə imkan vermirlər. Yazdığım şikayət də elə özlərinə qayıdır”.

Məsələ ilə bağlı Azərbaycan Yerüstü Nəqliyyat Agentliyi (AYNA) ilə əlaqə saxladıq. Qurumdan bildirildi ki, Daşkəsən-Gəncə marşrut xəttində sərnişindaşıma fəaliyyəti göstərən İsayev Elman İslam oğlu müxtəlif vaxtlarda ay ərzində 30-31 gün olaraq fəaliyyət göstərmək istəməsi ilə bağlı müraciətlər edib. Ona ay ərzində sürücülərin istirahət günləri və nəqliyyat vasitəsinə texniki qulluq günləri nəzərə alınmaqla, hərəkət qrafiki üzrə digər sürücülər kimi 18-19 gün işləyə biləcəyi bildirilib.

Daşıyıcı sərnişindaşıma fəaliyyətini “Fərqlənmə nişanı” aldığı nəqliyyat vasitəsi ilə həyata keçirir. Lakin səlahiyyətində olan digər nəqliyyat vasitəsi ilə qeyri-qanuni sərnişindaşıma fəaliyyəti göstərməsi aşkar edilib, bununla da o, digər daşıyıcların fəaliyyətinə maneçilik törədir. Dəfələrlə edilən xəbərdarlıqlara və İnzibati Xətalar Məcəlləsinin müvafiq maddəsi ilə protokol tərtib edilməsinə baxmayaraq, o, bir “Fərqlənmə nişanı” ilə 2 nəqliyyat vasitəsi ilə sərnişindaşıma fəaliyyəti göstərməyə davam edir. Ona İdarəyə dəvət olunaraq bir daha xəbərdarlıq edilib.

Aynurə İSMAYIL

Hurriyyet.az

Qobustan qəsəbəsi, Qaradağ rayonu, Massiv 1 A sakini Nağılı Cavid Təbriz oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi saytımız vasitəsilə Daxili İşlər Nazirliyinə müraciət edir.

“Yazaraq bildirirəm ki, 7 iyul 2024-cü ildə, səhər saatlarında evimizdən oğurluq olub. Həmin gün səhər saat 7:20-də ailəvi olaraq uşağın imtahanı səbəbindən evdən çıxmışdıq.

İpoteka kreditinə müraciət edib, bankdan 44 min manat pul götürmüşdük. Pulu evdə paltar səbətinin içində gizlətmişdik. İmtahan bitdikdən sonra evə qayıdanda gördük ki, qapı sadəcə örtülü vəziyyətdədir, açarla bağlanılmayıb. Yataq otağına keçəndə isə gördük ki, pul olan çanta boş şəkildə yerə atılıb. Çantada olan 44 min manat pulun hamısı oğurlanmışdır.

DİN-in 102 xidmətinə dərhal məlumat verdik, gəlib əl izlərini götürdülər, qonşular dindirildi. Hadisədən 3 ay keçməsinə baxmayaraq, hələ heç bir xəbər yoxdur.

Məsələ ilə bağlı Daxili işlər Nazirliyinə getmişəm, həmçinin ərizə ilə də müraciət etmişəm. General Arzu müəllimində qəbulunda olmuşam. Sağ olsun, zəng vurub Qaradağ polisinə göstəriş verdi. Ondan sonra Qaradağ polis rəisi məni qəbul etdi.

Bakı şəhər Baş polis İdarəsinə və Nazirlər Kabinetinə də məsələ ilə bağlı məlumat vermişəm. Hər bir qrum söz verir, lakin həbs olunan yoxdur.

Onu da qeyd edim ki, keçən il qonşunun evinə də oğru girmişdi, polis tapa bilmirdi. Daxili işlər naziri Vilayət Eyvazovun qəbulunda olandan sonra oğru tapıldı. Mən də Vilayət Eyvazovun qəbuluna düşmək istəyirəm, alınmır.

Rəsmi qurumlardan xahiş edirəm ki, mənim işimə ciddi yanaşsınlar”.

Daxili İşlər Nazirliyinin (DİN) Mətbuat Xidmətindən Hurriyyet.az-a bildirildi ki, vətəndaş Cavid Nağılının müraciəti əsasında Qaradağ RPİ-nin 11-ci Polis Bölməsində araşdırma aparılır və araşdırmanın nəticəsindən asılı olaraq müvafiq qərar veriləcək.

Jalə FAMİLQIZI

Hurriyyet.az

Kanalımıza müraciət edən Bakı şəhər sakini Eyvaz İsmayılov həyat yoldaşından boşandıqdan sonra övladı ilə görüşə bilmədiyini və övladının hazırda təhlükədə olması bildirir.
Eyvaz İsmayılov deyir ki, həyat yoldaşı Səfurə Qasımova ilə rəsmən boşandıqdan sonra 6 yaşlı övladı Elçin İsmayılovla görüşə bilmir. Şiksyətçi iddia edir ki, Uşaq Ucar rayonu,Qarabörk kəndində 1 ci qrup psxi xəstə ilə birgə yaşayır və həyatı təhlükədədir. O Bakı şəhəri,Yasamal rayonunda yaşadığı üçün uşaqla normal şəkildə görüşməyinə süni əngəllərlər yaradıradıldığını bildirir. Vətəndaş bununla bağlı Yasamal Rayon İcra Hakimiyyəti Başçısı yanında Qəyyumluq və Himayəçilik, Yetkinlik Yaşına Çatmayanların İşləri və Hüquqlarının Müdafiəsi Komissiyasınına bununla bağlı müraciət etdiyini, onların saxta faktlara əsaslanan qərar çıxartdığını deyir. İsmayılovun iddia edir ki, qərarala razılaşmayaraq yüksək qurumlara şikayət etdiyi üçün təyziqlərə məruz qalıb. Komissiyanın sədri Təravət Muradova və oranın əməkdaşı Elçin Əhmədov onu ölümlə hədələyirlər.

Daha ətraflı aşağıdakı videoda:

Kanal13

Qaradağın Soltan ağası deyəsən rəiyyəti ələ salıb. Artıq, bir həftəyə yaxındır ki, su "atlı olub" , Qaradağ rayonunun Müşfiqab, 28 May və digər qəsəbələrinin sakinləri "piyada". Bu qədər deyirlər, danışırlar, şikayət edirlər, bütün bunlara rəğmən 5 gündən sonra əhaliyə özlərinin dili ilə desək üfunət qoxuyan bulanıq su verirlər və sanki, "sizə hələ bu da çoxdur" deyərcəsinə, onu da kəsirlər.

"DogruXeber.az" bildirir ki, sözügedən ərazinin sakinləri dövlət qurumlarının onları işsizlik azmış kimi, üstəlik min bir əziyyətlə qazandıqları və boğazlarından kəsib pulunu ödədikləri su ilə belə imtahan etdikləri üçün nəinki qurumlardan, hətta dövlətdən, ölkədən belə iyrəndiklərini, boğaza yığıldıqlarını deyirlər. Bu isə onu deməyə əsas verir ki, Zaur Mikayılov və onun Qaradağ Rayon Su Kanal idarəsinə yenicə təyin etdiyi "təptəzə" rəhbər - Binəqədi rayonunda eyni vəzifədə çalışarkən "sultanlıq səltənəti"ndə qohumlarına xidməti ilə "məşhurluq qazanan" Sultan Əmiraslanov qəsdən vətəndaşları hövsələdən çıxarırlar ki, onlar ayağa qalxıb, dövlətə, hakimiyyətə etiraz etsinlər.

O, Sultanov Əmiraslanov ki, əvvəl Yasamal Rayon Su-kanal idarəsində mühəndis, ardından keçmiş "Azərsu" ASC-nin baş idarəsində mühəndis, sonradan sirli bir sıçrayışla Binəqədi rayonu Su-kanal idarəsinin rəisi təyin olunub.

Nə hikmətsə əldə etdiyimiz məlumata görə, bu qoçaq oğlan Sultan Əmiraslanovun adı çalışmaqla bərabər Dövlət İdarəetmə Akademiyasının tələbələri siyahısında yer alırmış.

Bəlli ki, bu təhsil məsələsi Əmiraslanovun karyerasındakı sirli sıçrayışın pik həddinə qalxan nərdivanın söykəndiyi divar rolunu oynayır.

Maraqlıdır, görəsən, hələ o, qədər də böyük olmayan vəzifənin öhdəsindən gələ bilməməsinə rəğmən, başına qohum-əqrəbasını toplayan bu şəxs hara hazırlanır?

Halbuki, hazırda nəinki özü, heç rəhbəri olduğu idarənin çalışanları belə əhali ilə normal ünsiyyət qurmağı bacarmırlar, ya da bəlkə qurmaq istəmirlər. Bu isə rəhbərin səriştəsizliyini göstərən əsas nüanslardan hesab olunur.

DogruXeber.az

Abşeron Sukanal İdarəsinin bir qrup əməkdaşı işdən çıxarıldıqlarını iddia edirlər.
Xezerxeber.az xəbər verir ki, məhz buna görə, onlar idarə qarşısına toplaşaraq narazılıqlarını ifadə ediblər.
İşdən çıxarıldıqlarını iddia edən şəxslərin sözlərinə görə, Abşeronda "İri Şəhərlərin Birləşmiş Su Təchizatı Xidməti" Publik Hüquqi Şəxs yaradıldıqdan sonra işçilərin kütləvi ixtisarı həyata keçirilib.
İşçilərə öz ixtisaslarına uyğun başqa bir ünvanda iş axtarmaları tövsiyə edilib. Abşeron su meliorasiya sistemləri idarəsində isə onlara iş yerinin olmadığı bildirilib.
İddialarla bağlı Dövlət Su Ehtiyatları Agentliyindən rəsmi mövqe bildirilib.
Mövzu ilə bağlı daha ətraflı videomaterialı təqdim edirik:

Bakının Nəsimi rayonunun Novruzov qardaşları, Cəlil Məmmədquluzadə küçələrindəki ərazidə “Eleven Park Residence” yaşayış kompleksi inşa edən “Pilot 16” MMC ilə bağlı qalmaqallar bitmir.

Şirkətin tikinti meydançasının yerləşdiyi ərazidə yaşayan sakinlərdən Editor.az-a daxil olan videodan aydın görünür ki, şirkət yalnız ərazidə yaşayan sakinlərin deyil, binanın inşaatında çalışan usta və fəhlələrin də həyatını, təhlükəsizliyini görməzdən gəlir. İş şəraitində əmək, təhlükəsizlik və sağlamlıq qaydalarını pozan ustalar qoruyucu geyim olmadan hündürlükdə yerləşən mərtəbələrdə tikinti işləri aparırlar.

Həmin görüntüləri təqdim edirik:

16 müəllimin 1 yararsız qarmonu var...

Qarabağ Regional Mədəniyyət İdarəsinin Ağdam rayon Qaradağlı kənd uşaq musiqi məktəbinin müəllimləri - Abbasov Şahbaz Vəliyəddin oğlu, Rüstəmov Vüsal Qardaşxan oğlu, Əmrahov Orxan Xosrov oğlu, Bayramov Sadiq Kamil oğlu, Vəliyev Zamin Kərəm oğlu,Ələsgərova Əsmər Mahir qızı , Bayramov Rafiq Kamil oğlu və Əliyeva Sevinc Ənvər qızı tərəfindən “Hürriyyət”in redaksiyasına şikayət məktubu daxil olub.

Şikayətçilər saytımız vasitəsilə Prezident İlham Əliyevə, Milli Məclisin sədri Sahibə Qafarovaya, Baş nazir Əli Əsədova, Baş porokuror Kamran Əliyəvə, eləcə də digər aidiyyəti qurumların rəhbərlərinə müraciət ünvanlayıblar. Həmin məktubu olduğu kimi dərc edirik:

“Yazıb bildirmək istəyirik ki, Qaradağlı kənd Uşaq Musiqi Məktəbində bəzi müəllimlərin haqqı tapdalanır. Qarabağ Regional Mədəniyyət İdarəsinin rəisi Qalib Həsənov məktəbimizdə müəllim və kənd camaatının etirazına baxmayaraq, Qarayev Fəqani Elbrus oğlunu direktor əvəzi kimi təyin edib.

Qeyd edək ki, məktəbimizdə dərs keçməyə yararlı musiqi aləti yoxdur. 16 qarmon müəlliminin bir yararsız qarmonu var. Oturmağa isə yararlı stol, stul yoxdur. İstilik sistemi bərbad haldadır.

20 sinifə qarşılıq direktorun otağında, bir də onu dəstəkləyən müəllimlərin sinifində salyarka peçi, qalan siniflərdə isə odun peçi yanır. Müəllimlər evlərindən odun gətirib yandırır. Yarı sinifin müəllimləri isə isidici gətirib, sinif otaqlarını qızdırırlar. Demək olar ki, hər an yanğın hadisəsi baş verə bilər. Bir sözlə, dözülməz halda çalışırıq.

Direktor dərs saatlarını isə özünün yaxın adamlarına, onu dəstəkləyən müəllimlərə verir. Hərəsinə 20-24, hətta 30 saat dərs verir. Qalan müəllimlərə isə 7-10 saat dərs yazılır. Deyirik ki, bu nə ədalətsiz bölgüdür, biz cənab Prezidentə, Mədəniyyət Nazirliyinə şikayət edəcəyik. Deyir ki, hara şikayət edirsiniz edin, məni bura Qalib müəllim təyin edib, o, kimə deyirsə, dərsi də ona verirəm, onun dediyini edirəm.

Biz artıq direktorun əlindən cana doymuşuq. Hər gün direktor tərəfindən hədə-qorxulara məruz qalırıq. Dərdimizi kimə deyək, bilmirik. Şikayət etmədiyimiz orqan və təşkilatlar qalmayıb”.

Məsələ ilə bağlı Mədəniyyət Nazirliyinin mətbuat xidməti ilə əlaqə saxladıq. Araşdırıb, məlumat verəcəklərini bildirdilər.

Aynurə İSMAYIL

Hurriyyet.az

Gəncə şəhər sakini, 44 günlük Qarabağ müharibəsinin iştirakçısı, qazi İsmayılov Elşən Arzuman oğlu tərəfindən “Hürriyyət”in redaksiyasına növbəti şikayət məktubu daxil olub. Prezident İlham Əliyevə və digər səlahiyyətli qurumların rəhbərlərinə müraciət edən şikayətçinin məktubunu olduğu kimi dərc edirik:

“Cənab Prezident!

Mən, Gəncə şəhər sakini, II Qarabağ müharibəsi iştirakçısı, qazi İsmayılov Elşən Arzuman oğlu, yazaraq Sizdən xahiş edirəm ki, bizə köməklik göstərəsiniz.

Bu günə kimi heç kəsin malında gözü olmayan adamlarıq. Nəyimiz var, nəyimiz yox, ona qane olmuşuq. Yuxarıda da qeyd etdiyim kimi, qaziyəm, 1 qrup gözdən əliləm.

Hazırda haqqımı istədiyim üçün təhdid olunuram. Xanlar Vəliyevin adından istifadə edən qardaşı oğlu, Gəncənin keçmiş icra başçısı Elmar Vəliyevin oğlu Elmir Vəliyev məni və yaxınlarımı təhdid edir. İnanıram və güvənirəm ki, mənim bu müraciətim cavabsız qalmayacaq.

Qeyd edim ki, sərəncamla 116.0 kv metr torpaq sahəmiz var. Əlimdə qanuni sənədim olsa da, Elmir Vəliyev həmin torpaq sahəsini məndən almaq istəyir.

Dəfələrlə müraciət etmişəm, bildirmişəm ki, bu yer mənimdir, imkan verin mən də bu yerdən faydalanım. Yarımcan adamam, ən azından sən evində rahat yatanda mən canımı qoymuşam, bir gözümdən olmuşam. Mən heç kəsin yerini, məkanını zəbt etmirəm. Mənim olana sənəd çıxarmaq istəyirəm, əlimdə sərəncamım var.

“Grand bazar”ın rəhbəri Mahmud məni təhdid edir. Mənə deyirlər ki, “Elmir Vəliyev sifarişlə adam öldürəndir, ondan uzaq dur”. Qeyd edim ki, Mahmud Elmar Vəliyevin oğlunun adına olan bazarda pulyığandır.

Elmir Vəliyev və Mahmud açıq-aşkar mənə deyirlər ki, nə etsən də, bu yeri sənə verəsi deyilik, dövlət də bizik, dövləti idarə edən də.

Mən, haqqımı hanısa məmur balasına verməliyəm? Oddan, topdan, tüfəngdən qorxmayan oğlan heç harınlamış məmur balasının qarşısında acız qalarmı?!

Onu da deyim ki, Daşınmaz Əmlak Komitəsinin keçmiş müdiri Kərəm Həsənovla Elmar Vəliyev qudadır. Özləri verdiyi sərancamı bu gün “düzgün sənəd saymırlar”. Biz oranı pulsuz almamışıq, pulumuzu verib almışıq. Emir Vəliyev mənə deyir ki, apar o sərancamı kağız kimi başqa yerdə... istifadə et. Görün, bunlar nə qədər harınlayıblar ki, dövlətin verdiyi sənədi hara layiq görürlər.

İnanıram ki, Xanlar Vəliyevin bu şantaj məsələsindən xəbəri də yoxdur. Onu da bilirəm ki, Azərbaycanın bütövlüyü uğrunda canından, qanından keçmiş qazilərə və şəhidlərə necə hörmətlə yanaşır. Mən müharibə iştirakşısı, 1 qrup əlil kimi, xahiş edirəm ki, onun adı ilə məni təhdid edənlərə qarşı bir tədbir görsün.

Torpağa sənədi Elmar Vəliyevin müavini Məharət bəy verib. İndi Zaur adlı şəxs bizim qarşımızı kəsərək, bizi ora buraxmır. Mənim çörək pulu qazanmağıma mane olurlar.

19.09.2024-cü il tarixində, günorta saatlarında Mahmud adlı şəxs zəng edərək, bizi bazara çağırdı. Fikirləşdim ki, yəqin razılığa görə çağırır. Təəssüflə qeyd edirəm ki, Azərbaycan Respublikasının vətəndaşı olan Mahmud və Elmir Vəliyev mənə və digər müharibə iştirakçılarına, “sizi gərək erməni öldürərdi, sizi öldürməməklə ən böyük səhv ediblər”, - dedilər(Digər lazımsız söz-söhbətlər də oldu, mən də o söyüşlərin qarşısında susa bilməzdim).

Mən şərəfimlə, ləyaqətimlə vətənimin keşiyində durub, sağlamlığımı vermişəm. Onlar kimi evdə və yaxudda çarpayının altında gizlənməmişəm. Bir gözümdən olmuşam, amma vətənim üçün tək gözümü yox, canımı da verməyə hazıram. Mənim ailəm - atam, anam mənə belə tərbiyə verib. Mən kiminsə bir tikə çörəyini əlindən alıb, atama və yaxud da əmimə güvənən adam olmamışam. Bəli, hər gecə gözümü yumanda o ağrı-acıları çəksəm də, hələ müharibənin səsləri beynimdən getməsə də bu gün də deyirəm ki, canım sənə qurbandı Azərbaycan! Və bunu söz xatirinə yox, bir Azərbaycan kişisi kimi ürəkdən deyirəm.

Cənab Prezident!

Mən, sizdən ev, maşın və yaxud da torpaq, villa istəmirəm. Mənə və ailəmə aid olan, qanuni torpağımı istəyirəm. Elmar Vəliyev və oğlu bir qazinin torpağına göz dikir, buna susmayın”.

Jalə FAMİLQIZI

Redaksiyadan: Yazıda adları qeyd olunan şəxslərin mövqeyini dərc etməyə hazırıq

Bir qrup müharibə və əmək veteranları - Fatma Rzayeva, Mabəddin Ağayarov, Tamilla Baxşıyeva, Olqa Kobzar, Mərziyyə Məmmədova, Dilzar Əfəndiyeva, Yaşar Qurbanov, İlahi Sultanov, Şəhla Qurbanova, Məmmədsafa Cəfərov, Arif Musayev, Səfurə Rəhimova, Mənsurə Əliyeva və digərləri tərəfindən Hurriyyet.az saytının redaksiyasına şikayət məktubu daxil olub. Həmin məktubu olduğu kimi dərc edirik:

“Biz Mərdəkanda yerləşən "Müharibə Veteranlarının Respublika Xəstəxanası”nda hökm sürən özbaşınalıqların bəzi məqamlarını ürək ağrısı ilə sizə çatdırmağı özümüzə borc bilirik. Adıçəkilən xəstəxanaya bir il öncə direktor təyin olunmuş, öz yerində olmayan, vəzifə həddini aşan, tutduğu vəzifədən sui-istifadə edən Cəlilov Nicat Vidadi oğlu təyin olunduğu ilk gündən burada zindan rejimi yaradıb. Xəstəxananın arxa hissəsində kəsə və təhlükəsiz yerdə olan qapıdan mağazaya gedən yolu zəncirlədib, xəstələri uzaq, təhlükəli avtomobil yolunun hərəkət hissəsi ilə mağazaya getmək məcburiyyətində buraxıb.

Dəfələrlə “diktator direktor”dan gündüz vaxtı qapının açıq qalmasını xahiş etsək də, özünü “kral” hesab edən Cəlilov Nicat edilən xahişləri rədd edib. Bizim çoxsaylı müraciətlərimizi “Bakı Baş Səhiyyə Mərkəzi” Publik Hüquqi Şəxs araşdırır və eyni məzmunda cavablar verir. Yəni harınlayıb Firovunluq dərəcəsinə qədər yüksəlmiş “diktator direktor”u müdafiə edən cavablar veriblər ki, həmin cavablar biz veteranları qane etmir.

İlkin Səhiyyə Xidməti Departamentinin Xidmətlərin Təşkili şöbəsinin müdiri Nəhmət Rəhimov, Daxili nəzarət monitorinq departamentinin rəhbəri Orxan Qurbanov, "Bakı Baş Səhiyyə Mərkəzi" PHŞ- nin direktor müavini Ləman Mursaqulova, eyni zamanda zəng etmiş Elbrus adlı şəxs veteranlara, tibbi personala qan udduran “diktator direktor” Nicat Cəlilovu müdafiə edirlər. Hansı ki, Nicat Cəlilovun təzyiqləri, şiddətləri nəticəsində "Müharibə Veteranları Respublika Xəstəxanası”nı çox savadlı, bacarıqlı həkimlər, orta tibb işçiləri tərk ediblər. Laborant həkim Elnarə Nicat Cəlilovun şiddəti nəticəsində insult keçirib. Göz həkimi olan gənc Ruqiyyə xanım Nicat Cəlilovun şiddəti nəticəsində intihar edib, bir azyaşlı uşağı anadan yetim qalıb. Allah ona rəhmət eləsin.

Hal-hazırda Nicat Cəlilovun bu özbaşnalıqlarına görə, xəstəxanaya az sayda veteran gəlir. Tibb müəssisəsində bahalı dərmanları xəstələrə yazırlar və biz özümüz həmin dərmanları aptekdən alırıq, deyirlər ki, xəstəxanada dərman çatışmır.

Nicat Cəlilov lüks otaqları pulla satır, pul aldığı xəstələri xəstəxanada 1 (bir) ay saxlayır, digərlərini 10-11 günə evə yazır. Xəstəxananın yeməkxanasında da biabırçı bir mənzərə hökm sürür. Hər gün iylənmiş balığa xəstələrə yedizdirirlər. Bir toyuğu 100 yerə bölüb, bir dırnaq qədərini duru yeməyin içinə atıb, veteranlara iaşə xidməti göstərirlər.

Bu qədər nöqsanların içində batan Nicat Cəlilovu nəyə, hansı yaxşı cəhətlərinə görə müdafiə edirlər? Görəsən, bu diktatorun, rüşvətxorun, vəzifə həddini aşanın, tutduğu vəzifədən sui-istifadə edənin arxasında kimlər durub? Nicat Cəlilovun bu özbaşınalıqları prezidentə, dövlətə qarşı sabotajdır.

"Bakı Baş Səhiyyə Mərkəzi" qida normalarının tətbiq edilməsini 30 il öncə baş nazir olmuş, bütün təltifləri əlindən alınaraq, xalq düşməni kimi həbs olunmuş Surət Hüseynovun imzaladığı 9 mart 1994-cüil tarixini 103 saylı qərarının 5-ci əlavəsini rəhbər tutaraq şikayətimizi cavablandırmaqla, “diktator direktor”u müdafiə edir. Biz veteranların fikirlərini ifadə edərək qəti şəkildə xahiş və tələb edirik ki, öz yerində olmayan “diktator direktor”u özünü “kral” hesab edən, Prezident siyasətinə zidd hərəkətlər edən dövlətə qarşı sabotaj edən, rüşvət aldığı xəstələri aylarla xəstəxanada saxlayan, pul verməyən veteranları 10-11 günə evə yazan, dünya malından gözü doymayan, təzyiq və şiddət edən, bahalı dərmanları yazdıraraq apteklərdən bizləri dərman almaq məcburiyyətində qoyan, lüks otaqları pulla satan rüşvətxor Cəlilov Nicat Vidadi oğlu "Müharibə Veteranlarının Respublika Xəstəxanası”nın direktoru vəzifəsindən azad olunması istiqamətində əməli köməklik göstərmənizi sizdən xahiş edirik.

Hal-hazırda biz həmin xəstəxanaya müalicəyə gəlməyə qorxuruq, düşünürük, Nicat Cəlilov göstəriş verər ki, şikayət edənlərə zəhərli iynə vurub öldürsünlər. Elə bu səbəblərdən də ora getməyi dayandırdıq. Tam şəkildə inanırıq ki, sizin birbaşa köməyinizlə veteranların bu xahişinin düzgün, ədalətli həlli gərçəkləşəcək”.