Dövlət Gömrük Komitəsi və "Azpetrol LTD" MMC arasında məhkəmə çəkişməsi davam edir.
Pravda.az-ın xəbərinə görə, Komitənin MMC barəsində tərtib etdiyi protokola növbəti dəfə Səbail Rayon Məhkəməsinin hakimi Azər Tağıyevin sədrliyi ilə sentyabrın 24-də baxılacaq.

Xatırlatma: Protokol İnzibati Xətalar Məcəlləsinin 485.2-ci (Azərbaycan Respublikasının Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə vəzifəli şəxslər min manat məbləğində, hüquqi şəxslər min beş yüz manat məbləğində cərimə edilir) maddəsinə əsasən tərtib olunub.

Qeyd: "Azpetrol LTD" 04.10.2004-cü ildə dövlət qeydiyyatına alınıb, nizamnamə kapitalı 779 106.70 manatdır. Qanuni təmsilçisi Ceyhun Məmmədov Əhməd oğludur.

Xəyal Quliyev

Bakıda özünü Daxili İşlər Nazirliyinin (DİN) əməkdaşı kimi təqdim edən dələduzlar peyda olublar.

Oxu.Az xəbər verir ki, bu barədə məlumatlar məktəblərin "WhatsApp" qruplarında yayılıb.

Bildirilib ki, mənzillərin ətrafında özlərini nazirliyin əməkdaşı kimi təqdim edən bir qrup şəxs vətəndaşlardan şəxsiyyət vəsiqələrinin olub-olmadığını soruşur və biometrikadan keçməli olduqlarını bildirir.

İddiaya görə, onların əllərində notbuk, biometrik cihaz və sakinlərin siyahısı olub.

Daxili İşlər Nazirliyinin Mətbuat Xidmətinin əməkdaşı İbrahim Əmiraslanlı Oxu.Az-ın sorğusuna cavab olaraq, bildirib ki, bununla bağlı polis orqanlarına hər hansı məlumat daxil olmayıb.

"Əgər hansısa vətəndaş bu halda dələduzluğa məruz qalma riski ilə üzləşərsə və ya şübhə yaranarsa, polisə, eləcə də "102" Xidməti-Zəng Mərkəzinə məlumat verməyi tövsiyə edirik", - deyə açıqlamada qeyd edilib.

Dövlət Turizm Agentliyi tərəfindən keçirilən tender müsabiqəsi ləğv olunub.

Yeniavaz.com xəbər verir ki, tender müsabiqəsinin ləğv edilmə səbəbi kimi “Dövlət Satınalmaları Haqqında” Qanunun 35.1.1.-ci maddəsi göstərilib.
Qanunun qeyd olunan maddəsində göstərilir ki, müvafiq lisenziyaya və ya icazəyə malik olan təchizatçıların sayı üçdən az olduqda müsabiqə ləğv olunur.
Qeyd edək ki, tenderin keçirilməsində məqsəd “Xınalıq və Köç yolu” Dövlət Tarix Mədəniyyət və Etnoqrafiya Qoruğunda Mədəniyyət evinin bərpası üzrə layihə smeta sənədlərinin hazırlanması ilə bağlı olub.

Onu da bildirək ki, bir müddət əvvəl Dövlət Turizm Agentliyinin “Xınalıq və Köç Yolu” Dövlət Tarix-Mədəniyyət və Etnoqrafiya Qoruğunda qəzalı evlərin bərpası (44 ev) üçün keçirdiyi tender müsabiqəsi tənqidlərə səbəb olub. Belə ki, Agentlik Xınalıqda 44 evin bərpası üçün “Maqro Construction” MMC-nin Azərbaycan Respublikasındakı Filialına (VÖEN – 1604374251) 6,6 milyon manat vəsait ayırıb. Bu isə o deməkdir ki, Xınalıqda bir ədəd evin bərpasına 151 min manat vəsait xərclənəcək.

1950-ci illərdə İstanbulda üç polis təqaüdə çıxdıqdan sonra dolanışıq dərdi ilə üz-üzə qalır. Onlar əvvəlki işlərinə görə tanındıqları bir binanı kirayəyə götürərək “Küçükpazar Karakolu” adlı saxta polis bölməsi qururlar. Hər şeyi gerçək bir polis bölməsinə uyğun şəkildə təşkil edirlər və işlərinə davam edirlər. Hətta yerli polis rəisinin məlumatı olmadan bu bölgədəki cinayət işlərini də idarə edirlər. Bir müddət sonra, əsl polis bölməsindən bir məmur kömür paylanması üçün göndərilir və "Küçükpazar Karakolu" haqqında heç bir məlumatın olmadığını anlayır. Nəhayət, məsələ şəhər polis rəhbərliyinə çatır və bölgə rəisi bu saxta karakolu qanuniləşdirmək qərarına gəlir. Bu hadisə illər boyu xatırlanmaz, amma saxta olaraq qurulan bu karakol sonradan rəsmi status qazanır!
Tərxan Paşazadə
TEREF

İctimai fəal Haldun Novruzzadə "MilliÖn", "E-manat" terminalları ilə bağlı müzakirələrə səbəb olan paylaşım edib.

Globalinfo.az xəbər verir ki, H.Novruzzadə kredit ödəyən zaman əlavə komissiya haqqı tutulduğunu bildirib.

"Deməli, "MilliÖn", "E-manat" kimi aparatlar sentyabr ayından ödədiyiniz kreditlərdən bir faiz xidmət haqqı tutur. Məsələn, 2000 manat kredit ödəyirsinizsə, 20 manatını "MilliÖn" avtomatik çıxır. Bunu da qəbzdə göstərmir deyə sizin xəbəriniz olmur. Buna görə də əskik pul ödədiyiniz üçün adınız gecikməyə düşür", - deyə fəal bildirib.

"MilliÖn" Xidmət Mərkəzindən saytımıza verilən məlumata görə, həmin komissiyanı banklar tutur:

"Hər bir komissiya bank tərəfindən təyin olunur. Ödəniş zamanı məbləği daxil etməmişdən öncə monitorun üzərində komissiyanın çıxılacağı barədə məlumat yazılır. Ola bilər ki, müştəri buna diqqət yetirmədən ödəniş edir. Ümumiyyətlə, "MilliÖn" tərəfindən komissiya tətbiq edilmir".

“Sirab”ın Bakı ərazisində evlərə su çatdırılmasına görə şikayətlərin sayı artıb. Yenicag.az-a müraciət edən müştərilər bildiriblər ki, “Sirab” su sifarişləri zamanı müştərilərə sayğısız yanaşırlar. Onlar qeyd edib ki, şirkət guya telefon tətbiqləri üzərindən sifarişləri qəbul etmək üçün xidmət təşkil edib, lakin bu sifarişlər günlərlə gecikir.

Müştərilər bildirib ki, sifarişləri qəbul etdikdən sonra “Sirab” suları bir gün sonraya çatdırılacağını desə də, sifariş edilən sular günlərlə evlərə çatdırılmır. “Bəhanə edirlər ki, Bakıda Formula 1 yarışları keçirildiyi üçün yollar bağlıdır. Formula 1 yarışları qurtardığı halda, müştərilərinə bu bəhanəni gətirirlər,” – deyə müştərilər qeyd edib.

Müştərilər qeyd edir ki, “Sirab” bir müddət əvvəl mənzillərə çatdırılan suların qiymətini qaldırıb. Şirkət bu qiymət artımını xidmətinin keyfiyyətinin artırılması ilə əlaqələndirib.

“Lakin xidmət çox aşağı səviyyədə göstərilir, sular günlərlə mənzillərə çatdırılmır. Qəribədir ki, görəsən, “Sirab”ın Bakıda Formula 1 yarışlarının yekunlaşmasından, paytaxtın yollarının açılmasından niyə xəbəri yoxdur?” – deyə müştərilər bildirib.

Qeyd edək ki, “Sirab” su sifarişlərindən şikayət edənlər Bayıl qəsəbəsi sakinləridir. Bu qəsəbə istiqamətində yollar açıq olduğu halda, şirkət müştərilərini narazı salır.

Paytaxtda insanların dincəlməsi üçün kifayət qədər parklar salınıb.

Amma təəssüf ki, bu parklarda uşaqların əyləncəsi nəzərə alınmayıb. Bir sözlə, Bakıda bir çox parklarda attraksionlar ya yoxdur, ya da işləmir.

Bu da həm valideynlərin, həm də uşaqların narazılığına səbəb olur.

"Əvvəl attraksionlar var idi. İndi yoxdur, deyə əylənə bilmirəm" , - azyaşlı deyib.

Bəs görəsən, niyə parklarda attraksionlara rast gəlinmir? Onların fəaliyyəti nəyə görə dayandırılıb?

Məsələ ilə bağlı Fövqəladə Hallar Nazirliyindən bildirilib ki, 2024-cü ilin ötən dövrü ərzində Bakı şəhərində yerləşən müxtəlif məkanlarda aparılmış yoxlamalar nəticəsində ümumilikdə 18 ədəd mexanikləşdirilmiş attraksionun istismarı ilə bağlı nöqsanlar aşkar edilib. Bu səbəbdən həmin attraksionların fəaliyyəti dayandırılaraq qanunvericiliyin tələblərinə uyğun müvafiq tədbirlər görülüb.

Dənizkənarı Bulvar İdarəsindən isə bildirilib ki, bulvar ərazisindən yığışdırılan attraksionlar müasir tələblərə cavab vermir və istismar müddətini başa vurub. Köhnəlmiş attraksionların yığışdırılması həm də təhlükəsizlik baxımından vacib idi. Onların yeni nəsil attraksionlarla əvəzlənməsi istiqamətində işlər aparılır.

Ətraflı Baku TV-nin süjetində:

"2024-2025-ci tədris ilində təhsildə ciddi inkişaf dinamikası gözlənilir. Yəni müəyyən dəyişikliklər ola bilər".

Bu sözləri demokrat.az-a açıqlamasında təhsil eksperti Vüsal Kərimli deyib.

O bildirib ki, təhsil sistemində bu il daha yaxşı nəticələr gözlənilir.

"Dəyişikliklərdən biri də universitetlərin elmi araşdırması və istinadlarla bağlı keyfiyyət göstəricilərinin ölçülməsidir. Bu göstəricilərlə bağlı işlərin aparılması məsələsi gündəmə gələcək. Reytinqlərdə iştirak edən universitetlərin sayı və universitetlərin beynəlxalq reytinqlərdə yüksəlməsi gözlənilir. Düşünürəm ki, bu istiqamətdə xeyli işlər görülüb. Bu il daha yaxşı nəticələr görəcəyik. Eyni zamanda, bu il distant təhsilin başlanması ilə bağlı müəyyən işlər görüləcək. Daha doğrusu, mövcud vəziyyəti yaxşılaşdırmaq üçün qiymətləndirmə kriteriyaları üzərində işlər aparılacaq. Düşünürəm ki, 12 illik təhsil və bakalavriat pilləsinin 3 ilə keçilməsi ilə bağlı məsələlər müzakirəyə çıxarılacaq".

“O qadın kimdirsə, yoldaşımı öyrədib ki, get boşan, öz həyatını yaşa”

Astara rayonu, Ərcivan kənd sakini Feyziyev Eldar Camal oğlu tərəfindən “Hürriyyət”in redaksiyasına şikayət məktubu daxil olub. Şikayətçi 3 uşaq anası olan həyat yoldaşının tapılması üçün kömək istəyir:

“Yazaraq bildirirəm ki, 3 uşaq atasıyam. İşsizlikdən heç yerdə işləmirəm. Yoldaşım da işləmir, bu səbəbdən də bizə ünvanlı sosial yardım vermirlər. Hara gedirəm müraciətimə baxılmır.

Hazırda Bakı şəhərində qohumların birinin evinə sığınmışıq. Çarəsiz vəziyyətdəyik. Keçən ilin noyabr ayında yoldaşım uşaqları aldadıb, “atana paltar aparıram” deyərək evdən qaçıb. Həmin gündən uşaqlarım anasız qalıb. Feyziyev Nəzakət Nəcəbəli qızı 3 uşağını atıb, “qohumumdur” dediyi qadına qoşulub, evdən qaçıb. 1 ildən çoxdur ki, polis uşaqların anasını tapa bilmir.

Mən sizin qəzet və sayt vasitəsilə səlahiyyətli qurumlardan xahiş edirəm, yoldaşımı tapıb uşaqlarıma qovuşdursunlar. O qadın yoldaşımı aldadaraq, evdən aparıb. Narkomandır, xəstədir, hansı yoldadır bilmirəm, amma uşaqlarıma görə narahatam.

Məktəb açılıb, uşaqları məktəbə yola salmaq lazımdır. Dövlət tərəfindən heç bir yardım da almıram.

O qadın kimdirsə, yoldaşımı öyrədib ki, get boşan, öz həyatını yaşa. Polis əməkdaşlarından xahiş edirəm ki, yoldaşımın tapılmasında mənə kömək göstərsinlər. Polisə müraciət etmişəm, amma tapa bilmirlər. Mən uşaqlarımın analarına qovuşmasını istəyirəm”.

LALƏ

Hurriyyet.az

Redaksiyadan: Yazıda adları qeyd olunan şəxslərin mövqeyini dərc etməyə hazırıq.

Bu ilin 11-22 noyabr tarixlərində Bakıda keçiriləcək COP29 konfransına müxtəlif ölkələrdən minlərlə ziyarətçinin səfər edəcəyi nəzərə alınaraq, COP29 Azərbaycan Əməliyyat Şirkəti, Azərbaycan Yerüstü Nəqliyyat Agentliyi və Bakı Şəhər Dövlət Yol Polisi idarəsi tərəfindən optimallaşdırılmış nəqliyyat sxeminin tətbiqi üzrə müvafiq işlər davam etdirilir.

Modern.az-ın məlumatına görə, COP29 Azərbaycan Əməliyyat Şirkətindən bildirilib ki, böyük ziyarətçi axının effektiv şəkildə idarə edilməsi, eləcə də konfrans tarixlərində paytaxtda qonaqların və şəhər sakinlərinin rahat hərəkətinin təmin edilməsi məqsədilə icrası planlaşdırılan tədbirlər çərçivəsində Bakı şəhərinin bir sıra mərkəzi küçələrində xüsusi COP29 nəqliyyat zolaqlarının salınmasına başlanılıb.

COP29 loqosunu əks etdirməklə işarələnən bu zolaqlar sürətli və fasiləsiz hərəkətin təmin edilməsi məqsədilə tədbir nəqliyyatı üçün ayrılıb.

Konfrans zamanı həmin zolaqlardan yalnız ictimai nəqliyyat vasitələri və tədbirlə əlaqədar xüsusi icazələrə sahib olan nəqliyyat vasitələri istifadə edəcək. Konfransa qədər müvafiq yol nişanları quraşdırılmayan zolaqlardan bütün nəqliyyat vasitələri istifadə edə bilər.

Bundan əlavə, konfrans zamanı şəhərin müxtəlif əsas hissələrində ümumilikdə 14 nəqliyyat qovşağının təşkil edilməsi planlaşdırılıb. Tədbir məkanı olan Bakı Stadionunun yerləşməsi, şəhərin metrostansiya xəritəsi, otel və yaşayış komplekslərinin sıx yerləşdiyi ərazilər və digər amillər nəzərə alınaraq planlaşdırılan nəqliyyat qovşaqları şəbəkəsi müxtəlif marşrut və nəqliyyat sxemlərini özündə ehtiva edəcək. Sxemlər barədə hərəkət iştirakçıları davamlı olaraq məlumatlandırılacaq. Belə ki, bu qovşaqların strateji yerləşməsi istər qonaqların, istərsə də şəhər sakinlərinin müxtəlif növ nəqliyyat vasitələrinə rahat və maneəsiz çıxışını və təyinat nöqtəsinə rahat çatmaları üçün sərf edilən zamanı minimallaşdıracaq. Təyin olunacaq əhatəli nəqliyyat marşrutları üzrə tədbir əməliyyatlarının səmərəli təşkili üçün yüzlərlə taksi və 400-ə yaxın avtobus, o cümlədən ekspress ictimai avtobuslar, xüsusi “konfrans avtobusları” və “hava limanı avtobusları”nın hərəkəti təşkil edilərək müntəzəm sərnişindaşıma xidməti icra olunacaq. Nəqliyyat sxeminin tətbiqində əsas amillərdən biri də tədbirin keçiriləcəyi tarixlərdə vətəndaşların şəxsi avtomobillərindən istifadəni minimuma endirilməsi məqsədilə əlçatan və rahat alternativlərin təmin edilməsidir.