 |
|
|
Ötən ay Bakı şəhərində keçirilən BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası dünyanın bütün dövlətlərinin, beynəlxalq təşkilatlar və fondlarının diqqətini Azərbaycana çəkdi. Sözügedən mötəbər tədbirə Azərbaycan hökumətinin yüksək səviyyədə hazırlaşması, yüz minə yaxın rəsmi qonaq və turistlərin rahat, təhlükəsiz qəbul edilib yola salınması bir daha ölkəmizin qüdrətinin miqyasından xəbər verirdi.
Təəssüflər olsun ki, KOB-29 kimi mötəbər tədbirə ev sahibliyi edən Bakı şəhəri özü də ciddi ekoloji problem yaşamaqdadır.
Belə ki, paytaxtda aparılan qanunsuz tikililər, şəhərsalma-məskunlaşma normalarına cavab verməyən iaşə obyektlərinin inşası şəhərin ekoloji tarazlığını daha da pozub.
AzFakt.com-un əməkdaşı Bakı şəhərinin mərkəzi və ətraf ərazilərinin ekoloji vəziyyəti ilə bağlı reportaj hazırlayarkən şəhərdə bəzi iş adamlarının şəxsi mənfəətləri naminə daha sözün əsl mənasında təbiətə qənim kəsildiklərinin şahidi olub.
Onsuzda yaşıllıq sarıdan ciddi problemləri olan Bakı şəhərində olan-qalan 5-10 ağac qalıb ki, onlar da yuxarıda da qeyd etdiyimiz kimi bəzi sahibkarlar tərəfindən məhv edilməkdədir.
Apardığımız müşahidələr zamanı məlum oldu ki, paytaxtda ağaclara qənim kəsilən müəssisələrdən biri də Binəqədi rayon ərazisində - Bakı-Sumqayıt yolunun kənarında fəaliyyət göstərən "EvroHome" inşaat malları bazarıdır.
Qeyd edək ki, bir zamanlar yaşıllıq yerləşən bu ərazidə nədənsə gecələr ağaclar yavaş-yavaş yoxa çıxdı və əvəzində tikinti bazarı peyda oldu.
Amma gözlənilirdi ki, təbiətin məhvi hesabına böyüyən, ərsəyə gələn bu inşaat bazarı heç olmasa günahlarını yuyaraq qazandıqları milyonlardan qəpik-quruş ayırıb magistral yolun kənarında bir-iki ağac əkəcəklər. Lakin təəssüflər olsun ki, paytaxtın ən böyük bazarlarından biri olan "EvroHome"-nin rəhbərliyi magistral yolun kənarında olan 4-5 şam ağacını da məhv edib.
Hər ay yüz min manatlarla vəsait qazanan bazarın 4-5 ağacın həyatına qənim kəsilməsi- onların qurumasına göz yumması qaranlıq mətləblərdən xəbər verir.
Xatırladaq ki, EvroHome bazarı oliqarx Azay Möhnətova məxsusdur.
Azay Möhnətovun Bakıda xeyli sayda bazarı, isrirahət mərkəzləri var.
EvroHome bazarı bir neçə il öncə yanmışdı. Hadisə zamanı sahibkarla külli-miqdarda ziyan dəymişdi.
Bazarda sahibkarlardan hər ay yüz min manatlarla icarə pulu yığılır.
EvroHome bazarının sahibkarlardan yığılan icarə haqqından nə qədərinin vergi ödədiyi barədə açıq internet resurslarında məlumata rast gəlinmir.
Məsələ ilə bağlı EvroHome rəhbərliyinin münasibətini örgənə bilmədik
Ağdam rayonu Seyidli kəndində qeydiyyatda olmaqla, Ağdam rayonu, “Dördyol-1” qəsəbəsi, ev 1231 ünvanında yaşayan keçmiş məcburi köçkün Sadıqova Mətanət Əli qızı Ağdam Rayon Mərkəzi Xəstəxanasının direktoru Nəbiyev Canəli Xanəli oğlu tərəfindən hüquqlarının pozulması səbəbi ilə Ağdam rayon Prokurorluğuna şikayət edib.
Daha öncə də Moderator.az hüquqlarının pozulduğunu iddia edən vətəndaşın xahişini nəzərə alaraq onun şikayət ərizəsi olduğu kimi yayımlamışdı.
Şikayətçi I vitse-prezidentə müraciətində Ağdam Rayon Mərkəzi Xəstəxanasının direktoru Nəbiyev Canəli Xanəli oğlunun vəzifə səlahiyyətlərini aşaraq cinayət məsuliyyəti yaradan davranış və hərəkətlərə yol verdiyini bildirmişdi.
Sadıqova Mətanət Əli qızının Ağdam rayon Prokurorluğuna ünvanladığı şikayət ərizəsini təqdim edirik:
"Hörmətli Prokuror!
Mən Bakı şəhərində Respublika Klinik Xəstəxanasında 30 il, Ağdam rayon Mərkəzi Xəstaxanasında isə 2012- ci ildən həkim kimi fəaliyyət göstərmişəm. 2020- ci ildən isə Ağdam rayon Mərkəzi Xəstəxanasında Ailə Sağlamlıq Mərkəzinin şöbə müdiri vəzifəsində işləyirəm. Həmişə nümunəvi işimə görə dəyərləndirilmişəm.
2024-cü ilin may ayının 14-dən Canəli Nəbiyev "Ağdam rayon Mərkəzi Xəstəxanası" publik hüquqi şəxsin direktoru təyin edildikdən sonra, tutduğum qulluq mövqeyinə görə onun tərəfindən ayrıseçkiliyə məruz qoyulmuşam. Belə ki, Canəli Nəbiyev "Ağdam rayon Mərkəzi Xəstəxanası" publik hüquqi şəxsin direktoru təyin edildikdən qısa müddət sonra müdiri olduğum Ailə Sağlamlıq Mərkəzi şöbəsini Quzanlı qəsəbəsində yerləşən Mərkəzi Xəstəxanadan, mərkəzdən təxminən 10 km aralıda yerləşən, gediş-gəlişin olmadığı Xındırıstan kənd həkim məntəqəsinin binasına köçürmək barədə qərar verdi. Onun bu qərarı hansı niyyətlə etdiyini deyə bilmərəm. Lakin həmin qərar açıq surətdə bizim şöbənin işini çətinləşdirdi. Odur ki, mən şöbə müdiri kimi bu qərara etiraz etdim. Çünki, köçürülməli olduğumuz bina şöbənin qarşısında duran vəzifələrin yerinə yetirilməsi üçün zəruri avadanlıq, cihaz, generator, laboratoriya, TƏBİB-in internet xətti və s. ilə təchiz olunmamışdı. Bu, işin yerinə yetirilməsinə əhəmiyyətli dərəcədə təsir göstərir və əhali arasında narazılığa səbəb olurdu. Mənim Direktorun qəbul etdiyi qərara etiraz etməyim, onun mənə qarşı qərəzli mövqe tutmasına səbəb oldu. Direktor əsassız olaraq məni sıxışdırır, mənə qanunsuz olaraq intizam cəzası verir və əsassız olaraq təhqir edirdi. Mən bu cür haqsızlıqlara qarşı qanun çərçivəsində mübarizə aparmağa çalışırdım. Mübahisələrimiz hətta məhkəmə müşavirəsinə çıxmış və mənim haqlı olduğum sübuta yetirilmişdir.
Belə ki, direktor Canəli Nəbiyev 09 sentyabr 2024-cü il tarixdə müxtəlif xəstəxanalara yazılı müraciət ünvanlayaraq, cinayət xarakterli əməllər törətdiyimi bəyan edərək, mənim müalicə üçün xəstəxanaya qəbul edilməməyimi xahiş və tələb etmişdir. Əslində onun bu hərəkəti mənim qulluq mövqeyimə görə ayrı-seçkiliyə məruz qoyulmağımın bariz təzahürü idi. Canəli Nəbiyev məhz Ailə Sağlamlıq Mərkəzinin şöbə müdiri kimi qulluq mövqeyimə, yəni şöbə müdiri vəzifəsində işlədiyimə, onun qanunsuz qərarlarına etiraz etdiyimə görə mənə qarşı ayrı-seçkilik edərək, mənim sağlamlığımı qorumaq hüququmun həyata keçirilməsinə mane olurdu.
Canəli Nəbiyevin mənə qarşı tutduğu mövqe, onun mənə münasibətdə yol verdiyi əməllər intizam, mülki və cinayət məsuliyyətinə cəlb edilməsi üçün həm hüquqi, həm də faktiki əsaslara malikdir. Mən hazırkı ərizə ilə Canəli Nəbiyevin istintaqı məhz prokurorluğa aid olan əməllərinə istinad etməklə onun haqqında Azərbaycan Respublikası Cinayət Məcəlləsinin 154.2, 308.1 və 309.1-ci maddələri ilə cinayət işinin başlanmasına və onun cinayət məsuliyyətinə alınmasını xahiş edirəm.
“Ağdam rayon Mərkəzi Xəstəxanası” publik hüquqi şəxsin direktoru Canəli Nəbiyevin bir çox xəstəxanalara müraciət edərək müalicə məqsədi ilə xəstəxanaya qəbul edilməməyimi xahiş və tələb etməsi ilə bağlı məktubu qeyd etdiyim hər üç cinayət üzrə faktiki əsası təşkil edir. Həmin məktubun surətini əldə etdiyimə görə onu sübut növü kimi ərizəmə əlavə edirəm.
Azərbaycan Respublikasının Konstitusiyasının 41-ci maddəsinə əsasən, hər kəsin sağlamlığını qorumaq və tibbi yardım almaq hüququ vardır. Konstitusiyanın 71-ci maddəsi isə müəyyən edir ki, Konstitusiyada təsbit edilmiş insan və vətəndaş hüquq və azadlıqlarını qorumaq qanunvericilik, icra və məhkəmə hakimiyyəti orqanlarının borcudur.
Beləliklə, sağlamlığın qorunması hüququ, yəni müalicəyə ehtiyacı olan şəxsin müalicə müəssisəsinə qəbul olunaraq müalicə almaq hüququ Konstitusiya ilə müəyyən edilir. Bu hüququ heç kəs məhdudlaşdıra və ya qadağan edə bilməz. Belə bir səlahiyyət Direktor Canəli Nəbiyevə də verilməyib. Onun müalicə müəssisəsinə qəbul olunmağımı qadağan etməsi, Konstitusiyada nəzərdə tutulan sağlamlığın qorunması hüququnun pozuntusunu təşkil edir.
“Əhalinin sağlamlığının qorunması haqqında” Qanunun 3-cü maddəsi insan və vətəndaş hüquq və azadlıqlarının müdafiəsini əhalinin sağlamlığının qorunması sahəsində dövlətin vəzifəsi kimi müəyyən edir. Direktorun məktubu həm də əhalinin sağlamlığının qorunması sahəsində dövlətin vəzifəsinin yerinə yetirilməməsinə yönəlmiş göstərişdir. Qanunun 10-cu maddəsinə müvafiq olaraq, Azərbaycan Respublikası vətəndaşlarının sağlamlığını qorumaq və tibbi yardım almaq hüququ vardır.
Direktor tərəfindən yazılmış məktub onun barəsində CM-nin 154.2-ci maddəsi ilə cinayət işinin başlanması və onun həmin maddə ilə cinayət məsuliyyətinə cəlb olunması üçün əsasdır.
CM-nin 154-cü maddəsinə əsasən:
154.1 İrqindən, milliyyətindən, dinindən, dilindən, cinsindən, mənşəyindən, əmlak vəziyyətindən, qulluq mövqeyindən, əqidəsindən, siyasi partiyalara, həmkarlar ittifaqlarına və digər ictimai birliklərə mənsubiyyətindən asılı olmayaraq şəxsin hüquq və qanuni mənafelərinə zərər vurmaqla şəxsin bərabərlik hüququnu pozma -
min manatdan iki min manatadək miqdarda cərimə və ya bir ilə qədər müddətə islah işləri ilə cəzalandırılır.
154.2 Eyni əməllər vəzifəli şəxs tərəfindən qulluq mövqeyindən istifadə etməklə törədildikdə -
İki min manatdan üç min manatadək miqdarda cərimə və ya iki ilədək müddətə islah işləri və ya üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə iki ilə qədər müddətə azadlıqdan məhrum etmə ilə cəzalandırılır.
Mənim müalicə müəssisəsinə qəbul olunma imkanımdan məhrum edilməm hüquq və qanuni mənafelərimə zərər vurmaqla bərabərlik hüququmu pozmuşdur. Buna görə də, Direktor Canəli Nəbiyev CM-nin 154.2-ci maddəsi ilə cinayət məsuliyyətinə cəlb olunmalıdır.
Ağdam rayonu üzrə əhalinin sağlamlığının qorunması sahəsində işin təşkilinə cavabdeh olan vəzifəli şəxs, Direktor Canəli Nəbiyevin sağlamlığının və tibbi yardıma ehtiyacı olan şəxsin xəstəxanaya müalicə üçün qəbul edilməməsi ilə bağlı xəstəxanalara yazılı müraciət etməsi, onun özünün vəzifə səlahiyyətlərini aşmasına və vəzifə səlahiyyətlərindən sui-istifadə etməsinə dəlalət edir.
Direktorun həmin əməli həmçinin vəzifə səlahiyyətlərini aşması kimi də dəyərləndirilməlidir. Vəzifəli şəxs tərəfindən xidməti səlahiyyətlərin hüdudlarından açıq-aşkar surətdə kənara çıxan hərəkətlər etməsi fiziki və ya hüquqi şəxslərin hüquqlarına və qanuni mənafelərinə, yaxud cəmiyyətin və ya dövlətin qanunla qorunan mənafelərinə mühüm zərər vurduqda bu əməl Cinayət Məcəlləsinin 309.1-ci maddəsinin tərkibini yaradır.
Direktorun həmin məktubu yazması vətəndaşın Konstitusiyada nəzərdə tutulmuş hüququnun həyata keçirilməsinə vəzifə səlahiyyətlərini aşmaqla mane yaradılmasına həm vətəndaşın, həm də dövlətin qanunla qorunan hüquq və mənafelərinə mühüm zərər vurduğuna görə cinayət kimi dəyərləndirilməlidir.
Bu cinayətin ictimai təhlükəliliyi ondan ibarətdir ki, vəzifəli şəxsin qanunvericiliklə müəyyən edilmiş səlahiyyətlərindən kənara çıxan hərəkətlər etməsi fiziki və ya hüquqi şəxslərin hüquqlarına və qanuni mənafelərinə, yaxud cəmiyyət və ya dövlətin qanunla qorunan mənafelərinə mühüm zərər vurmuşdur. Nəticədə həm insan və vətəndaşın konstitusiya hüquq və azadlıqları, həm də dövlət orqanlarının normal fəaliyyəti pozulur.
Cinayət Prosessual Məcəlləsinə əsasən, CM-nin 154.2 və 308.1-ci maddələrində nəzərdə tutulan cinayətlərin istintaqı rayon prokurorluqlarının səlahiyyətlərinə aiddir.
Qeyd olunanlara əsasən, Canəli Nəbiyev haqqında Azərbaycan Respublikası Cinayət Məcəlləsinin 154.2 və 308.1-ci maddələri ilə cinayət işinin başlanması və onun cinayət məsuliyyətinə cəlb olunması tələb olunur."
***
Həkim Sadıqova Mətanət bildirib ki, Canəli həkimin 3 ayda kollektivə rəhbərlik etdiyi müddətdə 70 nəfərə yaxın əməkdaşa töhmət verib, bir neçə əməkdaş isə Canəli həkimin əlindən didərgin düşüb:
"Atalarımızın gözəl bir misalı var. Deyirlər ki, xoruz yox idi səhər açılmırdı?.. Bəyəm Canəli həkim yox idi Ağdamda tibbi xidmət yox idi? Əlbəttə var idi. Özü də çox yaxşı var idi.
Ağdamın çətin günlərində biz həkimlər əhalimiz üçün nə lazım idisə onu da etmişik. Və otuz ildə heç on nəfər əməkdaşımız töhmət almayıb. Hörmətli Canəli həkim isə 3 ayda kollektivə rəhbərlik etdiyi müddətdə 70 nəfərə yaxın əməkdaşımıza töhmət verib, bir neçə əməkdaşımız isə Canəli həkimin əlindən didərgin düşüblər.
Qoy Allahımız, Prezidenttimiz və TƏBİB rəhbərliyi bizə yar olsun"
moderator.az
...Hələ bəyənmədiyimiz Sovetlər dönəmində "ağ qızıl" defiyimiz pambıq Azərbaycan zəhmətkeşinin- pambıq yetişdirənlərimizin ən qürurlu qazanc meydanı- sahəsi idi...
İndi bu sahələrə baxanda rəhmətlik Lenin yada düşür. Lenin deyirdi: "Bal tutan barmaq yalar...".
Bunun fəlsəfəsi o idi ki, zəhmət çəkən bəhrəsini mütləq görməlidir.
Bəs Azərbaycanın pambıq yetişdirəni bu zəhmətinin bəhrəsini görə bilirmi?
XXX
Tezadlar.az- ın təqdim etdiyi və bu gün qeydə aldığı foto və video görüntülər Ağcabədi rayonunun ərazisində, qeydə alınıb. Fermerin aylardır zəhmət çəkdiyi bu məhsul - "ağ qızıl" niyə indi sahibsiz qalıb, məhv olur??? Axı dövlət hər mövsümdə fermerə ən yüksək səviyyədə güzəştli maliyyə yardımı edir... Bəs niyə bu qədər diqqət və qayğının məhsulu məhv edilməlidir???
Aşağıdakı foto və videokadrlar bu iqtisadi sabotajı özündə əks etdirir:
«Gold Residence» MMC Bakı şəhəri, Nərimanov rayonu, Aşıq Molla Cüma küçəsi, 28 ünvanında yerləşən doqquzmərtəbəli binanın sakinlərinə qarşı qanunsuz hərəkətlərinə son qoymur.
Reyting.az saytında kollektiv qaydada müraciət edən həmin yaşayış binasının sakinləri bildirirlər ki, «Gold Residence» MMC-nin özbaşınalıqları, qanunsuz əməlləri və sakinlərin həyatına yaratdığı təhlükələr davam edir.
Sakinlər redaksiyamız vasitəsi ilə Azərbaycan Respublikası hökumətinin, Baş prokurorun, Ekologiya və Təbii Sərvətlər Nazirliyinin, Fövqaladə Hallar Nazirliyinin, Şəhərsalma və Arxitektura Komitəsinin, Bakı Şəhər İcra Hakimiyyətinin və Nərimanov Rayon İcra Hakimiyytinin diqqətinə bir neçə aydır ki, «Gold Residence» MMC-nin qanunsuz hərəkətlərinə məruz qaldıqlarını bir daha çatdırmaq istəyirlər.
Sakinlər yazırlar ki, Bakı Şəhər İcra Hakimiyyətinin 26 yanvar 2024-cü il tarixli 11 nömrəli Sərəncamı ilə «Gold Residence» MMC-yə Nərimanov rayonu, Fətəli Xan Xoyski prospekti, 128, 130 və Əhməd Rəcəbli küçəsi, 5B ünvanlarındakı yerquruluşu planında göstərilən koordinatlar daxilində yerləşən 1,178 ha ərazi ili 36386,06 manata 49 illik icarəyə verilib. Bu sərəncamdan sui-istifadə edən «Gold Residence» MMC isə Fətəli Xan Xoyski prospekti, 128 və 130 nömrəli binaları qanunsuz olaraq söküb. Bu faktla bağlı Nərimanov Rayon Prokurorluğunda cinayət işi başlanıb. Hazırda həmin 240066135 nömrəli cinayət işinin istintaqı aparılsa da, bu günədək MMC-nin işçiləri məsuliyyətə cəlb olunmayıb, MMC-nin direktoru prokurorluğa çağırılaraq dindirilməyib, zərərçəkənlərə dəymiş zərər ödənilməyib.
Şikayətçilərin yazdığına görə, «Gold Residence» MMC-nin direktoru, İmişli rayonunun Əliqulular kənd sakini, 1991-ci il təvəllüdlü İsazadə Anar Sabir oğlunu ümumiyyətlə söküntü ərazisində bu günədək görən olmayıb. Əldə olunmuş məlumata əsasən, o, hazırda hüquqi şəxs yaratmadan fiziki şəxs kimi özünün 5500704602 nömrəli VÖEN-dən istifadə edərək sahibkarlıqla məşğul olur. Deyilənlərə görə, pərakəndə qaydada ayaqqabı satır. Yəni, İsazadə Anar Sabir oğlu «Gold Residence» MMC-nin formal direktorudur. Onun adından MMC-ni qanunsuz idarə edən təsisçisi Hüseynov Elnur Əyyam oğludur.
Elnur Hüseynov əraziyə gələn kimi Bakı Şəhər İcra Hakimiyyətinin 26 yanvar 2024-cü il tarixli 11 nömrəli Sərəncamından sui-istifadə edərək müvafiq yerquruluşu planında göstərilən koordinatlardan kənara çıxaraq MMC-yə ayrılmış ərazidən artıq sahəni qanunsuz olaraq hasarlayıb. Çox güman ki, bunu hansı yollasa Bakı Şəhər İcra Hakimiyyətinin vəzifəli şəxsləri ilə razılaşaraq edib.
Yerquruluşu planı
Sakinlər bildirir ki, MMC ona həmin Sərəncamla ayrılmış koordinatlardan kənara çıxaraq Fətəli Xan Xoyski prospekti, 128 nömrəli binadan prospektdə yerləşən «Gloriya» gül dükanınadək qanunsuz hasar çəkib. Bununla da, həmin Sərəncama aidiyyəti olmayan Aşıq Molla Cümə küçəsi, 28 nömrəli doqquzmərtəbəli binanın Fətəli Xan Xoyski prospektinə çıxışı bağlanıb. Nəticədə sakinlərin hərəkətləri qanunsuz olaraq məhdudlaşdırılıb. Bu azmış kimi, MMC-nin işçiləri gecə vaxtı Aşıq Molla Cümə küçəsi, 28 nömrəli doqquzmərtəbəli binanın 4-cü blokunun üstünü qanunsuz olaraq söküb, nəticədə blokun giriş qapısı yararsız hala düşüb. Söküntü zamanı binanın 1-ci mərtəbəsində yerləşən Fərid adlı sahibkarın obyektinin divarı dağıdılıb, binanın qaz, rabitə və işıq xətlərini zədələnib. Soyuq havalarda bina sakinləri bir neçə saat işıqsız və qazsız qalıblar.
Xatırladaq ki, adıçəkilən binanın sakini Elxan Qarayevə məxsus qarajın «Gold Residence» MMC-nin rəhbəri Elnur Hüseynovun əmri ilə qanunsuz sökülməsi və digər qanunsuzluqları barədə əvvəllər yazmışdıq.
«Gold Residence» MMC Fətəli Xan Xoyski prospekti, 128 və 130 nömrəli binaların ətrafında olan təxminən 30-dan çox ağacı qanunsuz olaraq kəsib. Bu barədə sakinlər tərəfindən Ekologiya və Təbii Sərvətlər Nazirliyinə məlumat verilməsinə baxmayaraq, bu günədək hər hansı tədbir görülməyib.
Aşıq Molla Cümə küçəsi, 28 nömrəli binanın sakinləri redaksiyamız vasitəsi ilə aidiyyəti dövlət qurumlarının rəhbərlərindən xahiş edirlər ki, «Gold Residence» MMC-nin Bakı Şəhər İcra Hakimiyyətinin 26 yanvar 2024-cü il tarixli 11 nömrəli Sərəncamından sui-istifadə hallarına son qoymasını, binanın Fətəli Xan Xoyski prospektinə baxan hissəsinə Fətəli Xan Xoyski prospekti, 128 nömrəli binadan «Gloriya» gül dükanınadək çəkilmiş qanunsuz hasarı sökməsini, binanın 4-cü blokunun dəmir qapısının təcili olaraq dəyişdirməsini, blokun qarşısına tökülmüş söküntü materiallarının yığışdırmasını, söküntü zamanı etajlarda sındırılmış pencərə şüşələrini yeniləməsini, sakinlərin hər tərəfə sərbəst çıxışının təmin edilməsini və MMC tərəfindən yol verilmiş digər qanunsuzluqların aradan qaldırmasına göstəriş versinlər.
Ötən həftə “AQA Şirkətlər Qrupu”nun təsisçisi, tanınmış iş adamı Aydın Dəmirçinin oğlu Qafar Dəmirçinin həbs edilməsi ölkə mətbuatının gündəmini zəbt etdi. Yayılan məlumatlarda “Monte Ferro” şirkətinin vitse-prezidenti Qafar Dəmirçinin ağacları kəsərək təbiətə külli miqdarda ziyan vurmaqda ittiham edildiyi bildirilirdi.
Həmçinin qeyd olunurdu ki, DİN-in Baş Mütəşəkkil Cinayətkarlıqla Mübarizə İdarəsi müəyyən edib ki, “plazalar kralı” kimi tanınan oğul Dəmirçinin rəhbərlik etdiyi “Monte Ferro” şirkəti Şəkinin meşəlik ərazilərində ağacları qanunsuz kəsib. Az qala, böyük bir meşə sahəsinin məhv edilməsi nəticəsində isə təbiətə nə az-nə çox – təxminən 8 milyon manatdan çox ziyan dəyib.
Qafar Dəmirçi ilə birgə şirkətin bir neçə əməkdaşı Cinayət Məcəlləsinin 259.3-cü (ağacları kəsmə-qabaqcadan əlbir olan bir qrup şəxs tərəfindən xeyli və külli miqdarda ziyan vurmaqla) maddəsi ilə cinayət məsuliyyətinə cəlb edilib. Məhkəmənin qərarı ilə Q.Dəmirçi barəsində 3 aylıq həbs qətimkan tədbiri seçilib. “Plazalar kralı” işçiləri ilə məhkəmə zalından birbaşa istintaq təcridxanasına göndərilib.
Məlumat üçün deyək ki, bu yaxınlarda Dəmirçilərin meşələrə qənim kəsildiyi ilə bağlı sosial şəbəkələrdə məlumatlar yayılmışdı. Həmin xəbərlərdə deyilir ki, Dəmirçilər Şəkidə 800 hektara yaxın ərazidə ağacları kürətdirib. İddia olunur ki, 2021-ci ildə sözügedən şəxslərə məxsus “Monte Ferro” şirkəti Şəkidə geniş bir ərazini zəbt edərək özəlləşdirib.
Aktualinfo.org-a Qafar Dəmirçinin həbsinə səbəb olan meşələrin kəsilməsi ilə bağlı yeni məlumatlar daxil olub. Burada diqqət Qafar Dəmirçinin həbsinə deyil, onun Şəkidə 800 hektara yaxın ərazidə meşə fonduna aid torpaqları necə özəlləşdirilməsinə yönəldilib.
Məlumatlı mənbənin sözlərinə görə Dəmirçilər ailəsi Şəkidə və ətraf rayonlarda meşə fonduna aid torpq sahələrini uzun müddət Ekologiya və Təbii Sərvətlər Nazirinin müavini olmuş Firdovsi Əliyevin vasitəçiliyi ilə özəlləşdiriblər. Qeyd edək ki, burada məhv edilən ərazilər göstərilənlərdən qat-qat çox, dövlətə vurulan maddi ziyan isə dəfələrlər yuxarıdır. Bunun başında isə Firdovsi Əliyevin dayandığı bildirilir. Maraqlıdır, bu cinayət işində Firdovsi Əliyevi nələr gözləyir.
Qeyd edək ki, Firdovsi Əliyev 2002-ci ildə Azərbaycan Respublikasının Ekologiya və Təbii Sərvətlər Nazirliyində Ekoloji Siyasət İdarəsinin rəisi və 2003-cü ildə Ekspertiza İdarəsinin rəisi işləyib. O, 2004-2023-cü ilə kimi ekologiya və təbii sərvətlər nazirinin müavini olub. 2023-cü ilin mart – oktyabr aylarında ekologiya və təbii sərvətlər nazirinin müşaviri vəzifəsində işləyb. Prezident İlham Əliyevin 25 oktyabr tarixli sərəncamı ilə Firdovsi Əliyev Samux Rayon İcra Hakimiyyətinin başçısı təyin olunub.
Qeyd edək ki, Şəkidə meşələrin məhv edilməsi daha əvvəllərə gedib çıxır. Hələ 2019-cu ildə Şəkinin Bideyiz kəndinin camaatı mal-heyvanlarını otarmaq üçün nəzərdə tutulmuş 147 hektar örüş ərazisinin şirkət tərəfindən tutulması barədə Ekologiya və Təbii Sərvətlər Nazirliyinə şikayət ediblər. Həmin vaxt şikayətçi kənd camaatının çoxu polisə çağırılıb. Hətta ərazini kənddə patrul nəfərləri qoruyurmuş.
Bəs 2019-cu ildən başlanan etirazların nəticəsi niyə özünü beş il sonra ortaya çıxardı. Məlumatlı mənbənin sözlərinə görə Dəmirçilər ailəsinə Ekologiya və Təbii Sərvətlər Nazirliyində məhz Firdovsi Əliyev havadarlıq edirmiş. Hətta icarə müqaviləsinin birinci səhifəsinin üst tərəfində nazirliyin gerbi olan möhürü vurmaqla Firdovsi Əliyev özü təsdiq etmişdir.
Göründüyü kimi beş-altı ildən də çox müddətdə “Monte Ferro” şirkətinin Şəkidə, Qaxda, Zaqatalada minlərlə hekter meşə fonduna aid torpaqların talan edilməsinə ekologiya və təbii sərvətlər nazirinin müavini olmuş, meşələrin qorunmasına birbaşa cavabdeh olan Firdovsi Əliyev şərait yaratmışdır. Məlumata görə Firdovsi Əliyevlə birgə Meşələrin İnkişafı Xidmətinin sabiq rəisi meşəçilik təcrübəsinə malik olmayan Namiq Xıdırov da icarəyə verilən meşə fondu torpaqlarından tam qanunsuz formada təyinatdan kənar istifdə edənlərə qarşı heç bir qanuni tədbir görməmiş, əksinə öz maddi maraqlarının təmin olunması müqabilində onlara şərait yaratmışlar.
Ona görə də 2023-cü Fidövsi Əliyev Ekologiya və Təbii Sərvətlər Nazirliyində vəzifəsindən azad edildikdən sonra Şəki Regional Meşə Təsərrüfatı Mərkəzinin müdir işləmiş Vətən Müharibəsi qazisi olan Əkrəm Babayevin göstərişi ilə “Monte Ferro”MMC-ilə 2019-cu ildə bağlanan müqaviləyə xitam verilməsi üçün yerli məhkəməyə müraciət edilmişdir. Odur ki, ETSN səviyyəsində müdafiəsiz qalmış “Monte Ferro” MMC rəhbərliyi yenə dirəniş göstərərək məhkəmənin işini qeyri-müəyyən vaxtadək təxirə salmağa nail olmuşdur. Amma bu da çox uzun çəkməmişdir.
Məlumatlı mənbənin sözlərinə görə Şəkidə və ətraf rayonlarda meşə fonduna aid torpq sahələrini özəlləşdirməyə Dəmirçilər ailəsi külli miqdarda xərc çəkmişlər. Həmin vəsaitlərin bir ucu isə Fidövsi Əliyevin doğulduğu, Lerik rayonunun Monidigah kəndinə çəkilən yola qədər gedib çıxır.
Mövzu ətrafında daha maraqlı məlumatları yaxın günlərdə diqqətinizə çatdıracıq.
Aktualinfo.org
Məqalədə irəli sürülən iddialarla bağlı bütün maraqlı tərəflərin fikirlərini dərc etməyə hazırıq!
TEREF
Tamaşaçılar arasında kifayət qədər populyarlıq qazanan "Komedixana"nı son illərin ən uğurlu layihələrindən biri hesab etmək olar. Bir çox hallarda cəmiyyəti narahat edən aktual problemləri yumoristik üslubda tamaşaçıya çatdıran komedixanaçılar həm güldürməyi, həm də düşündürməyi bacarırlar.
Dekabrın 16-da Komedixana komandası Heydər Əliyev sarayında "KomediMən" adlı konsert proqramı təqdim etdilər. Proqramın bilet qiymətləri orta statistik azərbaycanlı üçün elə də cazibədar deyildi. Konsertə baxmaq istəyənlər 20 manatdan 200 manata qədər olan qiymətlərə bilet almalıydılar ki,bu da üəpiyi-qəpiyə calayıb syın sonunu gətirənlər üçün heç də komik sayıls bilməz.
Konsertin ədəbi-bədii,satirik-komik mıziyyətlərindən bəhs etmək istəmirik. Komedixanaçıların komedisi qalsın bir kənara, biz sizə Respublika sarayının komediyasından danışmaq istəyirik. Səhnədə özünə əl qatan artistlərin saraydakı komediyadan xəbərləri olsaydı,yəqin ki, konserti dayandırıb üstündən də bir stəkan su içərdilər. Amma təbii ki,içə bilsəydilər...
Nədən ki, Respublika sarayında 40 qəpiklik suyu tamaşaçıya 3 manata sırıyırlar. Bəli-bəli,məhz sırıyırlar. Çünki, heç bir ticari əxlaqa sığmayan bu hərəkətə başqa ad vermək olmaz. Heç Bolşoy teatrda, Royal Albert sarayında, La Skalada belə haqq-hesab olmaz. Özünü qızmar yay günlərində olduğu kimi İstanbulun küçələrində ,Londonun əzəmətli teatrlarında hiss edirsən, içdiyin suyun müqəddəslər tərəfindən dualandığına inanırsan,hər qurtumu içdikcə mənəvi-ruhi saflaşdığını hiss edirsən. Ta o vaxta qədər ki,həmin suyun məhəllə marketində 40 qəpiyə satıldığını yadına salanacan.
Bu nə təfəkkürdü,deşüncə tərzidir? Talançılığ da belə olmaz, oğurluqdursa da bir əxlaqı olmalıdır. Ölkənin bir nömrəli sarayı nədən özüne toyxana kimi aparır ? Utandırıcıdır,daha səhnədə komediya oynamağa nə ehtiyac vardı ki,elə bufetdə tragikomediya oynanılırdı də...
Nizami demişkən:
Bir inci saflığı olsa da suda,
Baha satılanda dad verir o da...
Nicat Mahmudov
Rubrika. az
P.S. Söhbət 3 manatdan getmir e, söhbət tamaşaçıya "vnimatelni" olmaqdan gedir.
Ukrayna Rusiya Silahlı Qüvvələrinin radiasiya, kimyəvi və bioloji müdafiə qoşunlarının komandanı, general-leytenant İqor Kirillovun qətlində iştirak etməyib.
Axar.az xəbər verir ki, bunu Ukrayna Prezident Ofisi rəhbərinin müşaviri Mixail Podolyak deyib.
"Ukrayna terror üsullarından istifadə etmir. Generalın öldürülməsi daxili qarşıdurmanın nəticəsidir", - Podolyak bildirib.
Qeyd edək ki, bu gün səhər Moskvada baş verən həmin partlayış nəticəsində Ukrayna Rusiya Silahlı Qüvvələrinin radiasiya, kimyəvi və bioloji müdafiə qoşunlarının komandanı, general-leytenant İqor Kirillov öldürülüb. Generalın Ukrayna Baş Kəşfiyyat İdarəsinin sui-qəsdi nəticəsində öldürüldüyü barədə məlumat yayılıb.
Abşeron rayonu, Xırdalan şəhəri, 27-ci məhəllə, ev 2 B, mənzil 40-da yaşayan Lətifov Asif Aydın oğlu tərəfindən Hurriyyet.az saytının redaksiyasına şikayət məktubu daxil olub. Saytımız vasitəsilə Prezident İlham Əliyevə, DTX rəisi Əli Nağıyevə və Dövlət Vergi Xidmətinin rəisi Orxan Nəzərliyə müraciət edən şikayətçi Xırdalanda yerləşən AAAF Yaşayış Kompleksinin vəzifəli şəxslərindən şikayətçidir.
“Hörmətli Prezident!
Hörmətli Cənablar!
Dəfələrlə mətbuatda və sosial şəbəkələrdə Xırdalanda yerləşən AAAF Yaşayış Kompleksində yaşanan problemlər və haqsızlıq haqda məlumatlı olsam da, bilməzdim ki, bu film kimi olayı mənim də başıma gətirəcəklər. Cünki, özlərinin bir sözü var, “gələn vergi və digər yoxlamaları “yağlayıb”, lazımı qaydada yola salırıq".
2019-cu ilin fevral ayından peşəkar idmancı olduğuma görə, AAAF Yaşayış Kompleksində yerləşən “Zirvə İnternational Sport Clubs” MMC-yə məşqçi olaraq dəvət aldım. 12.06.2024-ci ilə qədər orada müəllim kimi xidmət etdim. Hətta pandemiya dönəmində də səhər 06:00-dan axşam 18:30-a qədər məşqçi kimi işimin başında olmuşam. Sıravi vətəndaşlarla yanaşı, güc strukturlarının əməkdaşlarına da dərs deyib, bilik və təcrübəmi bölüşmüşəm.
2024-cü il, iyun ayının 12-də “Zirvə” fitness zalının yeni icarədarının yanlış hərəkətlərinə, səhlənkarlığına və işlədiyim dönəmdə məvacibimin verilməməsinə etiraz etmişəm. Abrımı saxlayaraq, dərs dediyim tələbələrin bir qismini də götürərək, şəhərdə yerləşən diğər idman zalına getmişəm. Hal-hazırda da dərs dediyim tələbələrin bir qismi imtahandan uğurla keçərək, DİN-in Polis Akademiyasında, FHN-nin Akademiyasında və DTX-nın Akademiyasında təhsil alırlar.
Bildirirəm ki, 2022-ci il, may ayının 15-dən AAAF Yaşayış Kompleksində yerləşən “Zirvə İnternational Sport Clubs” MMC-də növbəti dəfə məşqci kimi ştata qəbul edilmişəm. Şəxsiyyət vəsiqəm və diplomumla mühasibatlıqda rəsmi məşqçi-müəllim işimlə bağlı sənədə qol cəkmişəm. Məvacibim də 400 manat göstərilib.
20.09.2023-cü ildə bizi mühasibatlığa çağırıb, ştatdan çıxmağımız təklif olundu. Sənədə qol çəkdirən Ülkər xanım bildirdi ki, “vergiyə görə bundan sonra qeyri-leqal işləyəcəm”. Bizə ödənilməyən 1 il 3 ayın məvacibini tələb etdikdə isə dedilər ki, hamısı birdən ödəniləcək. Digər illərin məvacibini isə almışam, portalda rəsmi qeyd olunub.
Ödənilməyən əmək haqlarımla bağlı dəfələrlə AAAF Yaşayış Kompleksinin sədri Tofiq Heydərova rəsmi məktub göndərsəm də, hec bir cavab verilməyib. Məcbur olub 04.11.2024-cü ildə Əmək Əhalinin Sosial Müdafiə Nazirliyinin nəzdindəki Əmək Müfəttişliyi Xidmətinə müraciət etmişəm. Xahiş etmişəm ki, mənə ödənilməyən əmək haqqımla bağlı müvafiq araşdırma aparılsın. Həmin Xidmətdən sosial arayışımı alanda mənə bildirdilər ki, almadığım əmək haqlarına görə məndən vergi və sığorta haqqı tutulub. Hətta tabelə saxta qol çəkilərək, mənə yazılan məvaciblər mənimsənilib.
Qeyd etmək istəyirəm ki, məvacib bizə mühasibatlığın tabel kağızına qol çəkdikdən sonra nəğd təqdim edilirdi. Bu barədə Prezident Admnistrasiyasında Natiq müəllimin köməkçisinin qəbulunda oldum. Kiməsə zəng edərək məvacibimin dərhal ödənilməsini xahiş etsə də, artıq 7-ci aydır ki, pulumu ala bilməmişəm.
14.11.2024-cü ildə yenidən Əmək Müfəttişliyinə dəvət olunaraq ətraflı izahat yazsam da, bu günə qədər heç bir nəticə yoxdur. Azərbaycan Respublikası vətəndaşını 1 il 3 ay müddətində gün ərzində 13 saat işlədərək, ona rəsmi yazılmış 400 manat məvacibini mənimsəyənlər haqda qanunun tələblərinə uyğun niyə tədbir görülmür? Kimlərsə niyə mənim aylarla almadığım əmək haqqım mənimsənilməlidir?! Bu hansı qanunda var? Bu qanunsuzluğu edənlər niyə cəzalandırılmır? Günahsız vətəndaş kimi mən haqqımı istəyirəm.
12.07.2024-cü ildə AAAF-ın Emin adlı hüquqşünası 3 gün ard-arda mənə zəng edərək bildirdi ki, gəlim hansısa sənədə qol çəkim. Yalnız məvaciblərim mənə təqdim ediləndən sonra sənədə imza atacağımı bildirmişəm.
Bu barədə ətraflı Dövlət Təhlükəsizlik Xidmətinin Abşeron rayon şöbəsinin rəisi, polkovnik İlham Əliyevə də şikayət etmişəm. Lakin nəticə yoxdur.
Hörmətli Prezident!
Hörmətli Cənablar!
Xahiş edirəm, bu məsələdə köməyinizi əsirgəməyəsiz”.
Hurriyyet.az
Sumqayıtın səhiyyəsi son bir ildə məhv olub. Bəli, tam olaraq bir ildə. Cəlilabad Rayon Xəstəxanasından Sumqayıt Tibb Mərkəzinə qəfil transfer edilən Elnur Azadxanov vəzifəsinin icrasına başladığı ilk gündən bu günə qədər şəhərin tibbi xidmətini reanimasiyalıq edib. Azadxanov təyin ediləndən insanlar nə normal tibbi xidmət görür, nə də müalicə. Sumqayıt şəhərinin demək olar ki, bütün dövlət tibb müəssisələri acınacaqlı gündədir. Hətta sakinlər icbari tibbi sığortadan da istifadə edə bilmir. Bu prosesin bir neçəsinin özüm şahidi olmuşam. İndi onları bir-bir sadalayacağam. Əgər ehtiyac olarsa, faktları, sənədləri də təqdim edəcəyəm.
Deməli belə. Təxminən 6 ay öncə bir tanış gənc oğlan həyətində iş görərkən ehtiyatsızlıqdan hündürlükdən yıxıldı, ayağı bud hissədən sındı. Təcili yardım tapa bilmədiyimiz üçün xəstəni şəxsi avtomobilimizlə Sumqayıt Tibb Mərkəzinin tabeliyində, lap 5 metrliyində olan Təcili Tibbi Yardım Xəstəxanasına çatdırdıq. Xəstə müayinə, rentgen olunandan sonra ona təcili əməliyyat yazıldı. Xəstəxanaya daxil olanda dedilər ki, narahat olmayın, bütün əməliyyat, müayinə və müalicələr icbari tibbi sığorta hesabına həyata keçiriləcək. Sevindik, düşündük ki, ölkənin səhiyyə sistemi inkişaf edir, insanlara yüksək xidmət göstərilir. Amma...
Sevincimiz cəmi yarım saat çəkdi. Yarım saatdan sonra xəstəni əməliyyata götürəcək cərrah bizi çağırıb “niyə gəlmirsiniz” dedi. Anlamadıq. Düşündük ki, xəstə yaxınları niyə əməliyyata girməlidir? Yaxınlaşanda, cərrah bizi otağına aparıb “Mendeleyev cədvəli”nə oxşayan bir vərəqi qarşımıza qoyub dedi: “1600 manat, razısınız?”
Cərrahdan soruşdum ki, axı bütün xərcləri İcbari Tibbi Sığorta üzrə Dövlət Agentliyi ödəyir, niyə biz əlavə pul ödəməliyik?
Cənabi cərrah əsəbiləşib özündən çıxdı. Əvvəlcə bir az İcbari Tibbi Sığorta üzrə Dövlət Agentliyinin arxasınca danışandan sonra son sözü bu oldu: “İcbari Tibbi Sığorta üzrə Dövlət Agentliyi yalnız əməliyyat xərclərini ödəyir, 3 min manat. Bu 3 min manata həkimin maaşı, əməliyyatda iştirak edən tibb işçilərinin və xəstənin əməliyyat sarğılarının xərcləri daxildir. Qalan xərcləri siz ödəməlisiniz”.
Özümü saxlaya bilməyib cərrahdan soruşdum ki, başqa nə xərclər qaldı? Xəstəyə pomidor-xiyar almalıyıq? Əgər bütün xərcləri icbari sığorta ödəyirsə. Cərrah nə desə yaxşıdır? Qayıdasan ki, bəs xəstənin ayağına paslanmayan materialdan mil, diyircək, gips və sair avadanlıqlar yerləşdirilməlidir ki, həmin xərcləri xəstə yaxınları ödəməlidir.
Məsələ ilə bağlı Sumqayıt Tibb Mərkəzinə müraciət edəndə bildirdilər ki, bütün xərcləri icbari tibbi sığorta qarşılayır.
Xahiş etdim ki, həmin cərrahla əlaqə saxlasınlar. Mərkəzdən cərrahla əlaqə saxladılar. Təxminən yarım saatdan sonra cərrah bizi yenidən çağırıb dedi ki, həmin avadanlıqları İcbari Tibbi Sığorta üzrə Dövlət Agnetliyi ödəyir, amma bundan ötrü tender elan olunmalıdır, həmin avadanlıqlar alınmalıdır, sonra biz əməliyyat etməliyik.
Yenidən Sumqayıt Tibb Mərkəzinə müraciət edəndə, qurumdan dedilər ki, cərrah düz deyir.
Biabırçılığa baxın. Deməli, xəstə bilməlidir ki, 10 gündən sonra yıxılacaq, 10 gün əvvəldən xəstəxanaya məlumat verməli, xəstəxana da Sumqayıt Tibb Mərkəzinə müraciət etməlidir. Sumqayıt Tibb Mərkəzi tender elan eləməlidir ki, 10 gün sonra filankəs yıxılacaq, ayağı sınacaq, ona lazım olan avadanlıqlarla bağlı şirkət müəyyənləşsin. Həmin şirkət müəyyən ediləcək, tenderin qalibi elan olunacaq, avadanlıqları alacaq, xəstəxanaya gətirəcək, təhvil verəcək, ondan sonra cərrah həmin xəstəyə zəng vuracaq ki, avadanlıqlar gəldi, yıxıl. Əgər xəstə Sumqayıt səhiyyəsinə məlumat verməmiş yıxılıbsa, günah özündədir, canı çıxsın, yıxılmasın.
Bu, cənab Azadxanovun taktikasıdır. Azadxanov Sumqayıt Tibb Mərkəzinə rəhbər təyin olunandan sonra özünəməxsus taktika ilə idarə edir qurumu. Şərhə isə ehtiyac yoxdur.
TƏBİB-in yeni transfer etdiyi Elnur Azadxanovun tabeliyindəki Sumqayıt Tibb Mərkəzi ilə bağlı silsilə bıabırçılıqları növbəti sayımızda oxuya bilərsiniz.
TNS.az
Yuxarı Şirvan suvarma kanalının infrastrukturunun bərpası, habelə mövcud təsərrüfatların su təminatı məsələlərinin vaxtında və effektiv şəkildə həllinin dəstəklənməsi, su ehtiyatlarından daha səmərəli istifadə olunması, magistral kanalın suburaxma qabiliyyətinin artırılması məqsədilə Yuxarı Şirvan suvarma kanalı yenidən qurulması haqqında Sərəncam Prezident İlham Əliyev tərəfindən 08 aprel 2024-cü ildə verilib. Aprelin 16-da isə Prezident İlham Əliyev Hacıqabul rayonunda yenidən qurulacaq Şirvan suvarma kanalının təməlini qoyub və çıxış edib.
Hazırda isə Azərbaycan Dövlət Su Ehtiyatları Agentliyi Şirvan suvarma kanalının yenidən qurulması ilə bağlı müvafiq tədbirləri davam etdirir.
Azərbaycan Dövlət Su Ehtiyatları Agentliyinin Tikilməkdə Olan Obyektlərin Müdiriyyəti Şirvan suvarma kanalının yenidən qurulması işləri çərçivəsində Yuxarı Şirvan kanalının yenidən qurulması (IV mərhələ) üzrə bir mənbədən satınalma metodu ilə keçirdiyi tendeirin qalibini elan edib. Qalib “ELİT-S” Məhdud Məsuliyyətli Cəmiyyəti olub və tərəflər 119.000.000 milyon manat məbləğində satınalma müqaviləsi bağlanılıb.
Qeyd edək ki, 119.000.000 milyon manat dəyərində tender udan MMC qanunvericiliyin tələbinə uyğun olaraq şərtlər toplusunda müəyyən edilmiş miqdar dəyərində icra olunmuş və ya icrasının 80%-dən çoxu tamamlanmış oxşar xidmətlər üzrə müqavilə təqdim etməli, eyni zamanda, satınalma müqaviləsinin icrası üçün maliyyə imkanlarının və ödəmə qabiliyyətinin olması ilə bağlı şərtlər toplusunun tələbinə əsasən təchizatçının satınalma predmeti üzrə müəyyən edilmiş ehtimal olunan qiymətin 30%-i həcmindən çox olmayaraq, yəni 35.000.000 manat maddi vəsaitə çıxışının olması barədə bank təminatı verməlidir.
İndi gəlin MMC-nin oxşar xidmətlər üzrə fəaliyyətinə diqqət yetirək. “ELİT-S” MMC daha əvvəllər, hazırda Dövlət Su Ehtiyatları Agentliyinə tabeli Regional Su Meliorasiya Xidmətindən əvvəlki “Meliorasiya və Su Təsərrüfatı” ASC-nin regionlarda yerləşən bir neçə idarəsinin keçirdiyi tenderlərin qalibi olub. Həmin tendrləri diqqətinizə çatdırırıq.
Ağsu Suvarma Sistemləri İdarəsi tərəfindən Əlabbas kanalı üzərindəki Bəddərə akvedukunun əsaslı təmiri üzrə keçirilmiş tenderədə 460.000 manat məbləğində müqavilə 12.12.2023-cü ildə elan edilib.
Göyçay Suvarma Sistemləri İdarəsi tərəfindən Yeniarx kanalının təmiri (PK00+00-PK22+00; L=2,2) (PK27+00-PK45+00;L=1,8 km) üzrə keçirilmiş tenderədə 208.000 manat məbləğində müqavilə 11.12.2023-cü ildə elan edilib.
Qəbələ Suvarma Sistemləri İdarəsi tərəfindən cari təmir işləri üzrə suvarma kanallarının lildən təmizlənməsi və çay məcrasının təmizlənməsi işlərinin satın alınması üzrə keçirilmiş tenderədə 1.063.537,49 manat məbləğində müqavilə 11.07.2023-cü ildə elan edilib.
Yuxarı Şirvan Kanalı İstismarı İdarəsi tərəfindən bir mənbə üsulu ilə Yuxarı Şirvan Kanalının Kürdəmir rayonu ərazisində yerləşən Girdimançay dükkerinin sutullayıcı ilə birlikdə əsaslı təmiri işlərinin satın alınması üzrə keçirilmiş tenderədə 244.998 manat məbləğində müqavilə 06.11.2023-cü ildə elan edilib.
Göründüyü kimi, “ELİT-S” MMC o qədər də böyük həcmi olmayan, “Meliorasiya və Su Təsərrüfatı” ASC-yə tabeli bir neçə idarənin ümumi dəyəri iki milyon manata yaxın olan işlərin icrasını həyata keçirib. Bəs görəsən MMC 119 milyon manat dəyəri olan dövlət sifarışini həyata keçirmək iqtidarındadırmı?
Dövlət Vergi Xidmətinin reyestr məlumatlarında “ELİT-S” (VÖEN : 1600024541) MMC-nin 09.06.2004-cü ildə Qarabağ Ərazi Vergilər Baş İdarəsində dövlət qeydiyyatına alındığı göstərilir. İlk hüquqi ünvanı Nizami rayonu ev 13, mən 41 (küçəsi yoxdu) olan MMC-nin son ünvanı Füzuli rayonun Aybasanlı ərazi vahidliyi qeyd olunub. Nizamnamə kapitalı 10 manat olan MMC-nin qanuni təmsilçisi Əliyev Elmidar Eldar oğludur. MMC-nin təsisçisi Səlimov Hüseyin Məhəmməd oğludur. MMC-yə İbrahimov Fuad İbrahim oğlu, İmanov Müşfiq Nəriman oğlu da rəhbərlik edib.
“Lisenziyalar və İcazələr haqqında Azərbaycan Respublikası Qanununun 8.1 maddəsinə uygun olaraq İqtisadiyyat Nazirliyi tərəfindən aparılan lisenziyaların və icazələrin vahid reyestrində MMC -nin Azərbaycan Respublikasının İqtisadiyyat Nazirliyinin EL-352/2019 nömrəli 25.09.2019-cu il tarixli qərarı ilə dağ-mədən işləri, dağ və buruq qazmalarının aparılması fəaliyyət növü üzrə lisenziya alması barədə məlumat var. Lisenziyada fəaliyyətin həyata keçirildiyi obyektlərin ünvanı kimi Quba rayonunun ərazisində yerləşən “Qudyalçay” qum-çınqıl yatağı göstərilir.
Müəmmalı məsələlər də elə bundan sonra başlayır. Dağ-mədən işləri üzrə lisenziyası olan, qum-çınqıl yatağı istismar edən bir MMC suvarma kanalının yenidən qurulması işlərinı necə həyata keçirəcək? Dövlət Su Ehtiyatları Agentliyinin Tikilməkdə Olan Obyektlərin Müdiriyyətin Satınalma komissiyası Nazirlər Kabinetinin 30.12.2023-cü il tarixli, 494 saylı Qərarına əsasən, müvafiq sahədə peşəkarlığını və təcrübəsini qiymətləndiribmi? MMC-dən 80 faiz oxşar xüsusiyyətli 3 sayda müqavilə tələb edilibmi? MMC-nin bu oxşar xüsusiyyətli işləri harada görüb? Axı, Şirvan suvarma kanalının yenidən qurulması işləri Qəbələdə suvarma kanallarının lildən təmizlənməsi, Bəddərə akvedukunun əsaslı təmiri demək deyil.
İnternet axtaış sistemləri üzərindən apardığımız araşdırmada “ELİT-S” MMC-nin “İnstaqram” və “facebook”sosial şəbəkələrindəki hesabında ünvanı Binəqədi r-nu, Rəsulzadə qəs., Baksol 15 G göstərilir. Sözügedən ünvanda hazırda beton zavodu fəaliyyət göstərir və yeni tikilən binaları beton qarışığı ilə təmin edir. Apardığımız araşdırmalar zamanı 119 milyon manatlıq tender udan “ELİT-S” MMC haqqında bundan artıq məlumat tapa bilmədik. Güman ki, Dövlət Su Ehtiyatları Agentliyinin sədri Zaur Mikayılov MMC haqqında daha çox bilgilərə sahibdi.
Əldə etdiyimiz qeyri rəsmi məlumatlara görə MMC-ni rəsmi olaraq Elmidar Əliyev idarə etsə də qeyri rəsmi sahibi başqa şəxslərdir. Həmin şəxsin MMC-nin qanuni təmsilçilərindən biri olmuş İmanov Müşfiq Nəriman oğlu olduğu da bildirilir. Hətta qeyd edilir ki, Müşfiq İmanov tikinti sektorunda özünə yer tutan, kifayət qədər geniş əlaqələri olan bir biznesmendir. Çox güman ki, o əlaqələrdən bir ucu da Dövlət Su Ehtiyatları Agentliyinə, onun tabeliyindəki Tikilməkdə Olan Obyektlərin Müdiriyyətinə də gedib çatır.
Aktualinf.org