Aşağıda qeyd olunan təsdiqini tapdığı halda işəgötürən;
İnzibati Xətalar Məcəlləsi Maddə 193. İşçini əmək funksiyasına daxil olmayan işi (xidməti) yerinə yetirməyə məcbur etmə
-Əmək müqaviləsinə xitam veriləcəyi və ya kollektiv müqavilədə müəyyən edilmiş güzəşt və imtiyazlardan məhrum ediləcəyi hədə-qorxusu ilə işçini əmək funksiyasına daxil olmayan işi (xidməti) yerinə yetirməyə məcbur etməyə görə-min manatdan iki min manatadək məbləğdə cərimə edilir.
-Əmək müqaviləsinə xitam veriləcəyi və ya kollektiv müqavilədə müəyyən edilmiş güzəşt və imtiyazlardan məhrum ediləcəyi hədə-qorxusu ilə işçini əmək funksiyasına daxil olmayan işi (xidməti) yerinə yetirməyə məcbur etməyə görə-min manatdan iki min manatadək məbləğdə cərimə edilir.
SOCAR Geofizika və Geologiya idarəsindən yazdılar:


SOCAR Geofizika və Geologiya idarəsinin rəhbərliyi gecənin bu vaxtı 15 günlük ev istirahətində olan işçiləri hədə qorxu mesajları (əlavə olunub) ilə məcburi işləməyə çağırış edirlər. Həm də heç bir nəqliyyat vasitəsi ilə təmin etmədən Güzdəyə getmələrini tələb edirlər.Qanunla əmr verilməlidir və həmin işçilərin əlavə işə cəlb edilmələri barədə gün yazılmalıdır.
Partlayıcı maddələr olan anbara vahid partlayıcı vəsiqəsi olan işçilər daxil ola bilər.Bu vaxtı bir hadisə baş versə kim cavabdehlik daşıyır? Sizcə qanuna uyğundurmu istirahət günündə işçini işə cəlb etmək?
Geofizika və geologiya İdarəsinin 1 ci müavini Mansurov Sərvan, bölüm rəisi Mahmudov Əziz, Neft Daşları ekspedisiyasının rəisi Məmmədov Bəxşeyişin bu qanunsuz əməlini görmürlər?
Mirvari Gahramanli
TEREF

Tərtər Rayon İcra Hakimiyyəti yolların təmir olunması ilə bağlı tenderə yekun vurub.
TEREF Qaynarinfo-ya istinadla xəbər verir ki, tenderin qalibi “Koneks Construction” MMC seçilib.
Artıq şirkətlə icra hakimiyyəti arasında satınalma müqaviləsi imzalanıb. Müqavilənin maliyyə dəyəri 430 108,47 manatdır.
İqtisadiyyat Nazirliyi yanında Dövlət Vergi Xidmətinin reyestr məlumatlarında “Koneks Construction” MMC-nin 27 noyabr 2019-cu ildə qeydiyyata alındığı göstərilir. Şirkətin nizamnamə kapitalı 10 AZN-dir. Hüquqi ünvanı Bakı şəhəri Binəqədi rayonu, Səttar Bəhlulzadə küçəsi, ev 39, mənzil 202-də yerləşən MMC-nin qanuni təmsilçisi Fərzəliyev Mehdi Məhəmmədəli oğludur.
Şirkət dövlət satınalmalarında fəal iştirak edir və daha çox yerli icra hakimiyyətlərinin keçiridyi tenderlərin qalibi olur.
“Koneks Construction” MMC-nin geyimlə bağlı tenderlərin qalibi seçilməsi şirkət haqqında müəyyən şübhələrə səbəb olub.
Medianın yazdığına görə, şirkət tender əməliyyatlarında iştirak üçün yaradılıb.
Tərtər Rayon İcra Hakimiyyətinin başçısı Müstəqim Məmmədovdur. O, 2014-cü ildən rayona rəhbərlik edir. Müstəqim Məmmədovun icra başçısı kimi karyerası isə 2012-ci ildən başlayır. O, həmin il Yevlax Rayon İcra Hakimiyyətinin başçısı təyin edilib.
Müstəqim Məmmədov mətbuatda ən çox tənqid edilən icra başçılarındadır.

Vətəndaş bələdiyyə sədrini saxta sənəd verməkdə ittiham edir

Lənkəran Rayon Gərmətük qəsəbə sakini Xalıqlı Farid Möhübbət oğlu yerli bələdiyyədən şikayətçidir.

O, "Arqument.az" deyib ki, bələdiyyə onlara məxsus torpağı başqalarına verib.

"Şikayətim Lənkəran rayon Gərmətük qəsəbə bələdiyəsinin sədri Təmirlan Ağamirzə oğlu Rzayevdəndir. 1993-cü ildə atam Hüseynov Möhübbət Xalıq oğlu Həzi Aslanov adına sovxozdan quşçuluq fermasını alıb. Biz uzun illər ailəmizlə birlikdə orada işçilər üçün nəzərdə tutulmuş 1 otaqlı evdə yaşamışıq. Təsərrüfat işləri heyvandarlıq və quşçuluq işləri ilə məşgul olmuşuq. Biz ora köçəndə mən indiyə kimi xatırlayıram ki, oralar bərbad daşlıq əkinçiliyə yararsız bir vəziyyətdə idi. Ailəmizin dəstəyi ilə biz oraları daşlardan və kolluqlardan təmizləyib hasarladıq", - deyə o qeyd edib.

Farid Xalıqlı deyir ki, uzun illər yaşadıqları evin yerləşdiyi ərazinin bir hissəsini indi başqaları zəbt edib. Buna da şəraiti yaradan isə bələdiyyə sədri Təmirlan Rzayevdir: "Biz həmin ərazidə təkcə elektriki bərpa etmək üçün 7 ədəd beton dirək və 1000 metrdən çox elektrik naqili çəkmişik. Biz ora köçəndə orada heç kəs yaşamırdı. Əzab-əziyyət və böyük çətinliklərə baxmayaraq, biz orada 20 ildən artıq yaşamışıq. Hər dəfə atama deyərdim ki, gəl buranı özəlləşdirək Atam deyirdi ki, bura bir ətək pul vermişəm, burada canımızı qoymuşuq. Valideyinlərim məni o evdən əsgərliyə yola salıblar".

Bələdiyyə sədri Təmirlan Rzayev

"Maddi imkanımız cox pis idi, mən əsgərlikdən qayıdandan sonra ustalıqla məşğul olmağa başladım, atam insult xəstəsi idi və biz təsərrufatı davam etdirə bilmədik və xəstə atamla orada yaşaya bilməzdik. O səbəbdən baba evinə köçməyi qərar verdik. 2022-ci il may ayının 15-də mən oranı bərpa etmək üçün 10 000 manatdan artıq vəsait xərcləyərək yenidən hasarlama, hamarlama işləri apardım, suyu, işığı bərpa etmişəm. Atam rəhmətə getdi, muvəqqəti olaraq iş dayandı və birdə ayıldıq ki, qəsəbəmizin bələdiyyə sədri Təmirlan Rzayev heç kimə demədən həyətimizdə bölgü işləri aparıb və saxtakarlıq etməklə orada 4 nəfərə torpaq ayırıb. Bələdiyyə sədri həmin şəxslərə saxta sənəd də təqdim edib. Mən xəbər tutanda dərhal Təmirlan Rzayev ilə əlaqə saxladım. Bildirdi ki, bir az səbirli ol, onlara digər ərazidə torpaq ayrılıb və mən onları oraya köçürərəm, 6 ay məni ələ salandan sonra bildirdi ki, onlar çıxmırlar", - Lənkəran sakini belə deyir.

Xalıqlı bildirib ki, o, bələdiyyə sədrinin saxta sənədlə torpaq satmasından hüquq-mühafizə orqanlarına, məhkəməyə müraciət edəcək.

Onun sözlərinə görə, Əmlak Məsələləri Dövlət Xidmətinin Lənkəran şöbəsi də həmin şəxslərin torpaqlarını reyestrdən keçirməyib: "Mən anamla həmin şəxslərin evlərinə getdik. Özləri o torpaqların bizim olduqlarını etiraf etdilər. Onlar bildirdilər ki, bizə torpaq ayrılanda biz bələdiyyə sədrindən soruşduq ki, bura sizin torpaqdır? Təmirlan dedi ki, onların (yəni bizim) sənədi yoxdur. Amma özü də həmin şəxslərə qeyri-qanuni sənəd təqdim edib. Qərara aldım ki, Lənkəran Əmlak Xİdmətinə gedim. Oradan bildirdilər ki, çox maraqlıdır bu ərazi bizim balansımızda olmalıdır, amma yoxdur. Təklif etdilər ki, məhkəməyə muraciət edim. Bir çox araşdırmalar edəndən sonra mənə məlum oldu ki, Təmirlan Rzayev öz saxtakarlığı ilə necəsə o ərazini öz xəritəsinə əlavə edib. Qərara gəldik ki, anam İradə Hüseynova Əmlak Komitəsinə muraciət etsin. Həmçinin Gərmətük qəsəbə sakinləri də bu məsələdən narahat oldular. Onlar imza toplayaraq cənab Prezidentə və bir neçə quruma muraciət yollayıblar. Hazırda isə o ərazidə qanunsuz tikili gedir".

"Kənd sakini olaraq ordan başqa heç yerdə torpağımız yoxdur. İstifadəmizdə olduğu üçün o torpaqlar ilk olaraq bizə təklif olunmalıdır. Amma Təmirlan Rzayevin öz bildiyini edib. Onu da deyib ki, bu onun ilk saxtakarlığı deyil", - Fərid Xalıqlı belə deyib.

"Arqument.az" məsələ ilə bağlı Gərmətük qəsəbə bələdiyəsinin sədri Təmirlan Rzayevlə əlaqə saxlayıb.

O deyib ki, ona göstəriş Lənkəran Rayon İcra Hakimiyyətindən verilib.

Bələdiyyə sədri bildirib ki, həmin ərazidə 4 nəfərə yer verilib, onlardan biri şəhid ailəsi, digər 3 nəfər isə qazidir.

"Arqument.az"ın "Sizin balansınızda olmayan ərazini necə sata və ya kiməsə verə bilirsiniz? Bu, qanunaziddir. Həm də saxta sənədlə necə topraq verə bilirsiniz?" sualına bələdiyyə sədri: "Mənə icra hakimiyyətindən dedilər", - deyə cavab verib.

Farid Xalıqlı isə deyir ki, şəhid ailəsi onlar həmin ərazidən topraq istmədiyini bildirib: "Mənim şəhid ailəsi və ya qazilərlə heç bir problemim yoxdur. İcra hakimiyyəti bələdiyyə sədrinə deyib ki, Gərmətük dairəsində, "Mandarin" Uşaq Əyləncə Mərkəzinin arxasındakı ərazidə yer versin. Bələdiyyə sədri isə düşünüb ki, onsuz da şəhid və qazi ailələrindən pul ala bilməyəcək. Həmin əraziləri gələcəkdə başqasına satsın deyə onlara bizim ərazini verib. Bununla da çalışır ki, bizi şəhid və qazi ailələri ilə üz-üzə qoysun. Əslində isə onlara Gərmətük dairəsində torpaq verilməli idi. Şəhid ailəsi özü də bizə dedi ki, mən sizin torpağı yox, oranı istəyirəm. Dedi ki, əgər mənə başqa ərazidə yer verilsə, bu gün sizin torpaqdan çıxaram. Amma Təmirlan Rzayevin əlinə fürsət düşüb deyə bizim torpağı paylamaqla məşğuldur".

Bələdiyyə sədri: "Bəs həmin ərazi hansı sənədlə başqalarına verilir?" sualına isə yenə eyni cavabı verib: "İcra Hakimiyyətinin tapşırığı ilə".

"Bəs icra hakimiyyəti sizi hansısa qanunsuzluğu etməyə sövq etsə, etməlisiniz?" sualına isə bələdiyyə sədri cavab vermək istəməyib.

Aydın görünür ki, ərazi heç kəsə sənədlə verilməyib, Əmlak Məsələləri Dövlət Xidmətinin Lənkəran Şöbəsinin balansından da torpaq saxta yolla çıxarılıb, amma heç bir digər qurumun da balansına salınmayıb.

Qanuna görə isə bələdiyyə yalnız öz balansında olan torpağı sata, icarəyə verə bilər.

Bələdiyyə sədri torpaq alan şəxslərə saxta sənəd vermədiyini desə də, "Arqument.az" həmin sənədi əldə edə bilib.

Həmin saxta sənədin surəti

Lənkəran Rayon İcra Hakimiyyəti isə məsələyə münasibət bildirməyib.

"İnşaat Konstruksiyaları” MMC-nin qanuni təmsilçisi Rauf Əliyev artıq Bakıda məşhur mənzil fırıldaqçısı kimi ad çıxarıb. Onun şəhərin tikinti mafiyasında əsas fiqurlardan biri kimi tanıyırlar. Çünki illərlə eyni metodlarla vətəndaşları aldadır, amma heç bir cəza almır. Belə əminlik yaranır ki, Rauf Əliyev çox yüksək çinli məmurlar tərəfindən himayə edilir. Əgər elə olmasaydı, çoxdan dəmirbarmaqlıqlar arasında idi. Görünür ki, "əl əli yuyar, əl də üzü" prinsipi ilə işləyən Rauf Əliyevə buna görə "gözün üstə qaşın var" deyilmir. O da bu minvalla binalar tikir, camaatı gah aldadır, gah süründürür, gah illərlə vəd verib başından edir, nəticədə özü də qazanır, himayədarlarını da yemləyir. Misal üçün şirkətin Xətai rayonu, Fəzail Bayramov küçəsindəki pilot layihəsi olsun. 7 il əvvəl sakinlər kirayələrə köçürülüb, onlara həmin ərazidə inşa olunan binadan mənzillər veriləcəyi vəd edilib. Amma iki il ərzində yeni mənzillərə köçəcəyi vədi alan sakinlər, o gün-bu gün kirayələrdə qalıblar. Şirkət əvvəlcə bunu pandemiya dövründə yaranmış maliyyə çətinlikləri ilə izah edib, sakinlər də anlayışla qarşılayıb. Sonra bu məsələ getdikcə acı bağırsaq kimi uzanıb. Sakinlər başa düşüblər ki, şirkət rəhbəri onlara yalan danışır. Artıq pandemiya da keçmişdə qalıb, di gəl, hələ də mənzillər təhvil verilməyib. Sakinlərin sözlərinə görə, şirkət sahibi Rauf Əliyev hər dəfə eyni sözü verir, amma dediyinin üstündə durmur. Hətta bu yaxınlarda Xətai rayon icra başçısının yanında qəbulda olublar. Şirkət sahibi icra başçısının yanında sakinlərə bir daha vəd verib ki, bir həftə ərzində problem həllini tapacaq. Ancaq icra başçısı ilə görüşdə də söylədikləri fıs çıxıb. Sakinlər bir araya gələrək həmin binanın ərazisində çadır qurmağa, etiraz etməyə hazırlaşırlar. Onların bildirdiyinə görə, son zamanlar bəzi sakinlərin kirayə haqlarının ödənilməsində də gecikmələr, hətta heç verməmək halları var. Bu da ikiqat narazılıq doğurub. Ən əsası isə 7 ildir ki, camaat öz mənzillərinə köçə bilmir və kirayələrdə qalıb. Son olaraq isə şikayətin Real TV-də işıqlanması zamanı Xətai RİH məmuru şirkət rəhbərinə tövsiyələr olunduğunu, xəbərdarlıq edildiyini açıqlayıb. Daha sonra Rauf Əliyev telefon danışığında bir həftə sonra problemin həll ediləcəyini bildirib. Amma sakinlər ona inanmır və yenə yalan danışıb vaxt qazandığını qeyd edirlər.
Bu azmış kimi, məlum olub ki, şirkət rəhbəri 18 mərtəbəli bina nəzərdə tutsa da, sonradan onun 20 mərtəbəli olması üçün razılıq alacağını bildirib. Maraqlıdır ki, layihədə 18 mərtəbə göstərildikdən sonra daha iki mərtəbə artırılmasına necə icazə verilə bilərdi? Məlumdur ki, bu qərar Şəhərsalma və Arxitektura Komitəsinin səlahiyyətində olan məsələdir. Görünür, Rauf Əliyev komitə rəhbərliyi ilə "dil taparaq" problemi çözüb və daha iki mərtəbə qaldırılmasına razılıq ala bilib. Bu faktın özü də sübut edir ki, Bakıda tikinti şirkətləri ilə komitə arasında min cür oyunlar, sövdələşmələr gedir. Nəticədə şəhərin arxitekturası pozulur, şəhərsalma nizamı xaosa çevrilir, rüşvət, pul marağı ucbatından məmurlar biznes sahiblərinin hər bir qanunsuz hərəkətinə şərait yaradır, göz yumurlar. Beləliklə, paytaxt yaşamaz bir hala gəlir. Üstəgəl, əziyyət çəkən vətəndaşlar olurlar, adlanırlar, şirkət sahibləri isə hər bir problemi rüşvətlə aşırmağın mümkün olduğunu anlayaraq, müxtəlif qanunsuzluqlara yol verir, payçılara kələk gəlir, fırıldaq, dələduz yollarla pul qazanırlar. Onsuz da əmindirlər ki, onlara yaşıl işıqdır, komitəni də pulla ələ almaq mümkündür, ona görə də vətəndaşlara "atmaq" olar. O baxımdan "İnşaat Konstruksiyaları" MMC-dən narazı olanlar bilməlidirlər ki, belə MTK rəhbərlərinin arxasında himayədarları və rüşvət alan qurumlar dayanırlar. Əziyyəti çəkən isə sakinlər olurlar.
Yeri gəlmişkən, Dərəçiçək” MTK da Rauf Əliyevə məxsusdur. Məhkəmənin qərarı ilə Rauf Əliyev Cinayət Məcəlləsinin 213.3-cü maddəsi ilə nəzərdə tutulan cinayət əməlinin törədilməsində təqsirli bilinib və ona 2 il müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə, 5 il müddətinə azadlıqdan məhrumetmə cəzası təyin edilib. Məhrum etmə cəzası Cinayət Məcəlləsinin 70-ci maddəsinə əsasən, şərti olaraq tətbiq edilib və onun üzərində 3 il sınaq müddəti müəyyən olunub. İş üzrə verilmiş mülki iddia qismən təmin edilib. İş adamından 659.152,54 manat tutulub, dövlət büdcəsinə keçirilməsinə qərar verilib və qalan hissədə mülki iddia təmin olunmayıb.
Rauf Əliyev şirkəti tərəfindən 2016-cı ildə Bakının Yasamal və Nizami rayonlarında icra başçılarının sərəncamı ilə tikilən binaların tikinti fəaliyyəti ilə məşğul olan şəxslərə görə Bakı şəhəri Lokal Gəlirlər Baş İdarəsinə təqdim etdiyi bəyannamələrə təhrif olunmuş məlumatlar daxil edib, ümumilkdə 3175824,89 manat, 2018-ci ildə Bakı şəhəri Xətai rayon icra başçısının sərəncamı ilə tikilən binaların tikinti fəaliyyəti ilə məşğul olan şəxslərə görə Bakı şəhəri Lokal Gəlirlər Baş İdarəsinə təqdim etdiyi bəyannamədə 2019-cu ilin cəmi 673584,12 manat sadələşdirilmiş vergisini dövlət büdcəsinə ödəməkdən yayınıb.
Mediada gedən xəbərlərə görə, Rauf Əliyev müəmmalı yollarla tikdirdiyi binalarda əlavə mərtəbə tikilməsi ilə bağlı FHN əməkdaşlarını da “razı sala” bilib. Fövqəladə Hallar Nazirliyinin əməkdaşları bu binaların dayanıqlılığı ilə bağlı müayinələr aparıb və müvafiq texniki rəy veriblər.

Azər Talıbov

Anaxeber.info

Növbədənkənar parlament seçkilərindən sonra Milli Məclisin yeni tərkibdə keçirilən ilk iclasında bəzi deputatların yatması müzakirələrə səbəb olub. Bu hadisənin ölkə başçısının parlamentdə çıxışı zamanı baş verməsi müzakirələri daha da alovlandırıb.

Yenisabah.az xəbər verir ki, dövlət televiziyasının kameralarına mürgülü vəziyyətdə yaxalanan parlamentarilər bu davranışlarını müxtəlif səbəblərlə əlaqələndiriblər. Parlamentin ilk iclasında yatdığı yerdə görüntülənən qocaman deputat Səttar Möhbalıyevin reaksiyası onun personası ətrafında ciddi ajiotaj yaradıb.

Qeyd edək ki, 69 yaşlı Möhbalıyev dövlət başçısının çıxışı zamanı yuxulamasını səhhəti ilə əlaqələndirib. O, jurnalistlərə açıqlamasında səhhətində ciddi problemlərin olduğunu bildirib. Deputat deyib ki, neçə vaxtdır kəskin ürək ağrılarından əziyyət çəkir: “Yaxın günlərdə icazə alıb müalicə olunmaq üçün 20 günlüyünə Almaniyaya gedəcəm”. vakansiyalar

Naxçıvandan deputat seçilən Səttar Möhbalıyevin bu sözləri onu hədəfə gətirib. Hazırda sosial şəbəkələrin Azərbaycan seqmenti Möhbalıyevdən bu suala cavab verməyi tələb edir: Səhhətində ciddi problem olan adam imza vərəqləri götürərkən DSK-ya sağlam olduğuna dair arayışı necə verib? Xəstə şəxs necə ağır təbliğat kampaniyası aparıb?

Müstəqil müşahidəçilər hesab edirlər ki, Möhbalıyev bu açıqlaması ilə yüksək rütbəli məmurların, digər vəzifəli şəxslərin, deputatların sirrini açmış olub. Deputat açıq şəkildə etiraf edib ki, vəzifəli və imkanlı şəxslər Azərbaycan səhiyyəsinə etibar etmirlər.

Sosial şəbəkələrdə Səttar Möhbalıyevə “Azərbaycanın ən yaxşı ürək həkimi ilə parlamentdə yanaşı oturursunuz. Səhhətinizi niyə Rəşad Mahmudova etibar etmirsiniz?” məzmunlu suallar ünvanlayanlar da olub.

“Yeni Sabah”ın əldə etdiyi məlumata görə, 69 yaşlı deputatın məlum davranışı təkcə sosial şəbəkə iştirakçılarını deyil, həm də hakimiyyət komandasında söz sahibi olan insanları qıcıqlandırıb. Onlar deputata səhhətindəki problemləri gizlətdiyinə görə ciddi irad bildiriblər.

Son vaxtlar hakimiyyətin “gözündən düşən” və buna görə də Həmkarlar Konfederasiyasındakı vəzifəsini itirən deputatın məlum davranışlarından sonra daha ciddi problemlərlə üzləşəcəyi bildirilib. Onun yaxın zamanlarda “səhhətində yaranmış problemlərlə əlaqədar” ərizə yazaraq, deputat mandatından imtina edəcəyi istisna olunmur.

"Dövlət Gömrük Komitəsinin yeni rəhbərliyinin təyinatından sonra DGK-da heç nə dəyişməyib! Şahin Bağırov da Səfər Mehdiyevin yolunu gedir. Əvvəlki kimi rüşvət və korrupsiya. Necə də olmalı idi ki... Səfər Mehdiyev başda olmaqla, özündən əvvəlki DGK sədrlərini cəzasız görən Şahin Bağırov anlamaq çox asandır".

Bu barədə Dia-az.İnfo-ya göndərilən məqalədə bildirilir.

Məqalə müəllidi daha sonra davam edir: "Məsələ ondadır ki, bir çox sahibkarlar öz mallarını gömrük qeydiyyatından keçirən zaman süründürməçilik və bunun nəticəsi olaraq, əlavə xərcə düşmələrindən şikayət edirlər. Misal üçün, laboratoriyadan keçirilərək, yoxlanılmasına ehtiyac olan malların əksəriyyətini rəsmiləşdirmək xeyli vaxt aparır. Bir çox hallarda bir malın laborator analizinin cavabı 7-10 günə verilir. Bu, olduqca uzun müddətdir və müvafiq laboratoriyaların nədən belə ləng işləməsi sual doğurur. Eyni zamanda, gecikmə həmin avtomobillərin gömrükdə saxlanılması ilə bağlı xərcləri artırır və hər maşın üçün təxminən 600-700 dollar təşkil edir. Sahibkar bu məbləği özündən asılı olmayan mənasız səbəblərdən nəqliyyat vasitəsinin sahibinə və digər xərclərə ödəməli olur.

Ancaq sahibkarın “çiləsi” bununla da bitmir. Əgər bir yük maşınında 2-3 cür, yaxud daha çox çeşiddə məhsul varsa, gömrük əməkdaşları heç bir izahat vermədən qaçaqmalçılıqla mübarizə adı altında həmin avtomobili anbara yönəldirlər. Bu da olur sahibkara qurulmuş növbəti “pul tələsi”. Sözügedən prosesi ən çox Bakı Baş Gömrük İdarəsində müşahidə olunur".

Şuşa Şəhəri Dövlət Qoruğu İdarəsinin keçirdiyi tender müsabiqəsinin (Açıq tender) qalibi “Laguna Group” MMC (VÖEN-1004604201) olub.

Yeniavaz.com xəbər verir ki, tenderin qalibi olan şirkət Şuşa şəhəri ilə qardaşlaşmış Xivə (Özbəkistan) şəhərində “Şuşa günləri” tədbirinin keçirilməsi xidmətini həyata keçirəcək və qarşılığında 122 min 449 manat 18 qəpik alacaq.

Məlumat üçün bildirək ki, daha əvvəl də “Laguna Group” MMC dövlət qurumlarının keçirdiyi çoxsaylı tender müsabiqələrində qalib olub. Şirkət barədə açıq internet resurslarda geniş məlumat yoxdur. “Laguna Group” MMC-nin nə rəsmi saytı, nə də sosial şəbəkə hesabları mövcuddur. Dövlət Vergi Xidmətinin yenilənmiş “Kommersiya qurumlarının dövlət reyestri məlumatları”nda da şirkət barəsində məlumatlar mövcud deyil.

Qeyd edək ki, “Laguna Group” MMC 15 fevral 2017-ci ildə dövlət qeydiyyatına alınıb. MMC qeydiyyata alınan zaman nizamnamə kapitalı 10 manat olub. Hüquqi ünvanı Bakı şəhəri, Binəqədi rayonu, Əcəmi Naxçıvani ev 27, m. 102-də yerləşib, qanuni təmsilçisi isə Qarayev Ərtoğrul Hafiz oğlu olub.

Binəqədi rayonu, Əcəmi Naxçıvani ev 27, m. 102-də daha bir şirkət – “My Vings” MMC (VÖEN – 1002351891) dövlət qeydiyyatına alınıb və bu şirkətin qanuni təmsiçisi Rəfiyev Müzadil İlqar oğludur. Hazırda bu şirkət fəaliyyət göstərmir. Rəfiyev Müzadil İlqar oğlunun qanuni təmsilçisi olduğu başqa bir şirkət – “Aqroman” MMC də (VÖEN – 1202544661) Şuşa Şəhəri Dövlət Qoruğu İdarəsinin keçirdiyi 800 min manatlıq tender müsabiqəsində qalib olub.

Rəfiyev Müzadil İlqar oğlu xarici işlər nazirinin müavini Rəfiyev Yalçın İlqar oğlunun qardaşıdır. Hazırda xarici işlər nazirinin müavini olan Yalçın Rəfiyev də Binəqədi rayonu, Əcəmi Naxçıvani ev 27, m. 102 ünvanında qeydiyyatdadır. Tenderin qalibi olan “Laguna Group” MMC-nin qanuni təmsilçisi olmuş Qarayev Ərtoğrul Hafiz oğlunun da Yalçın Rəfiyevin yaxın qohumu olduğu bildirilir.

Onu da bildirək ki, Yalçın Rəfiyev 9 fevral 1987-ci ildə Şəmkir şəhərində anadan olub. 2007-ci ildə Bakı Dövlət Universitetinin “Beynəlxalq Hüquq və Beynəlxalq Münasibətlər” fakültəsinin “Beynəlxalq Münasibətlər” ixtisası üzrə bakalavr pilləsini fərqlənmə diplomu ilə bitirib. 2010-2011-ci illərdə İtaliyanın Roma şəhərində yerləşən NATO Müdafiə Kollecində Ali Kursunda, 2014-2016-cı illərdə isə Avstriyanın Laksenburq şəhərində yerləşən Beynəlxalq Antikorrupsiya Akademiyasının “Korrupsiyaya qarşı mübarizə üzrə mütəxəssis” proqramı üzrə magistr proqramında təhsil alıb.

2019-cu ilin sentyabr ayından 2023-cü ilin sentyabr ayınadək Xarici İşlər Nazirliyinin Beynəlxalq Təhlükəsizlik İdarəsinin rəisi vəzifəsində çalışıb. 8 sentyabr 2023-cü il tarixindən xarici işlər nazirinin müavini təyin olunub.

Xırdalan şəhərində piyadaların hərəkəti üçün səki qalmayıb.

XALQ.AZ xəbər verir ki, bu barədə Xırdalan sakinləri məlumat verib. Onların sözlərinə görə, Xırdalanın hər yerində bütün səkilərdə ya obyekt inşa edilib, ya da avtomobil parklanması üçün ayrılıb. Piyadalar isə min bir zülmlə yol gedib gəlirlər. Sakinlərin sözlərinə görə, bu işdə məsuliyyət daşıyan Abşeron Rayon İcra Hakimiyyəti şikayətləri eşitmir. Edilən heç bir müraciətə də baxılmır.

Sakinlər bildirib ki, Xırdalan bazarının qarşısında vəziyyət lap betərdir. Piyadalar pilləkənlərin üstü ilə hərəkət edir. Tezliklə bir tədbir görülməsini tələb edən sakinlər bildirib ki, belə davam edərsə icra hakimiyyəti avtomobil yollarını da satışa çıxaracaq.

Heç təsadüfi deyil ki, Abşeron İH məhz mütəmadi olaraq torpaq zəbti, torpaq mübahisəsi səbəbindən məhkəməyə verilir. Qarşıdakı 30 gün ərzində icra hakimiyyətinin məhkəmələrdə 54 çəkişməsi var ki, onlardan da əksəriyyəti torpaq münasibətləri üzrə mübahisədir.

Həmçinin qeyd edək ki, Fövqəladə Hallar Nazirliyi Abşeron ərazisində dəfələrlə icra hakimiyyəti tərəfindən satılmış torpaqlarda qanunsuz tikililərin söküntüsünü aparıb.

Qarşı tərəfi dinləməyə hazırıq.

Səbail rayonunda Gülbala Əliyev küçəsidir bura. Bir qrup makler doluşub Bayıl ərazisinə, xüsusən də "Akapen" deyilən əraziyə, vur-hay ev tikib satırlar. Özü də, Səbail rayon İcra Hakimiyyətinin və SOCAR-ın gözünün qabağında hər gün bir ev tikirlər. Təsəvvür edin ki, səhər işə gedəndə görürəm yeri qazırlar, axşam qayıdanda görürəm ki, artıq 3 otaqlı ev tikilib, üstü də bağlanıb. Diqqət etsəniz görəcəksiniz ki, evlər neft quyusunun düz 10 metrliyində tikilib. Əvvəldən tikilənlər heç, bu fotodakılar cəmi bir neçə ayın, üstü və yanı uçulanlar isə bir neçə günün evləridir.

Bura bataqlıq idi, qamış basmışdı. Həbsdən yeni çıxan makler və onun bandası buranı cəmi bir ilə şəhərciyə çevirdi. Bir qat kərpicdən bataqlıqda ev tikib satırlar. Artıq bəzi evlərdə yaşayış var. Dəhşətlidir. Bu evlərdə birazdan çatlar yaranacaq, evi həşərat basacaq.
SOCAR yekə-yekə danışırdı ki, qanuna görə neft kəmərlərinin və neft quyularının yanında ev tikə bilməzlər.

Bir neçə il öncə valideynlərimin yaşadığı Bayıl dərəsindəki evlər sürüşməyə görə köçürüldü. Mən də bu "Akapen" deyilən ərazidən 3 sot torpaq aldım ki, onlara ev tikdirim. SOCAR-ın Bibiheybət NQÇİ-nin Nehrəmdən olan rəisi özünü ən pis yollara qoyub dirəndi ki, olmaz, qanun imkan vermir. Məsafə olmalıdır və sair və ilaxır. Çox bezdirdilər, tikə bilmədim. Sonra torpaqlarımız işğaldan azad olundu, mən də həmin ərazini satdım ki, bir-iki ilə valideynlərim Zəngilana qayıdacaq zatən, neynirəm əlavə evi.
Bir də gördüm satdığım torpaqda iki dənə ev tikib satdılar.

Ay SOCAR, bəs qanun icazə vermirdi? Yenə burada uzaq məsafə var idi, 200 metrdən çox idi. İndi fotoda gördüyünüz evlərlər neft quyusunun arasındakı məsafə heç 10 metr deyil. Adamın ağzının içində qanunu pozurlar, sən də gəlib şou göstərib evin bir qismini söküb gedirsən. Üstündən bir neçə gün keçir, SOCAR-ın baş ofisinə şəkil çəkib atırsan ki, sökdüm. Vəssalam. Sonra maklerə göz-qaş edirsən ki, get tik. Belə söküntüləri 365 dəfə görmüşük ay zavallı SOCAR.
Nəysə ki, hansısa məmurun adından istifadə edib SOCAR-ı da, Səbail rayon İcra Hakimiyyətini də divara dirəyib dayanmadan ev tikirlər. Özü də, məmurun özünün yox ha, qardaşının adı gələndə hamısı mil kimi dayanır...

Elməddin Muradlı