 |
|
|
Elm və Təhsil Nazirliyi “Study in Azerbaijan” layihəsi çərçivəsində Azərbaycanın ali təhsil müəssisələrinə əcnəbi tələbələrin cəlb edilməsi üzrə bir mənbədən satınalma metodu ilə keçirdiyi açıq tenderə yekun vurub və 25.11.2024-cü ildə “Lumos Consulting Services” Məhdud Məsuliyyətli Cəmiyyəti ilə 100.000 manat məbləğində satınalma müqaviləsi bağlayıb.
Qeyd edək ki, Elm və Təhsil Nazirliyinin Satınalma Komissiyası “Dövlət Satınalmaları Haqqında” Qanununun tələblərini elə bir mənbədən satınalma metodu ilə keçirdikdə pozub. Sözügedən qanunun 49-cu maddəsinə görə: satınalma predmeti yalnız hər hansı konkret təchizatçıda olduqda və ya hər hansı konkret təchizatçı həmin satınalma predmeti üzərində xüsusi hüquqlara malik olduqda və satınalma predmetinin əvəzedicisi və alternativi olmadıqda; satınalma predmetinə təcili tələbat yarandıqda.
Göründüyü kimi Elm və Təhsil Nazirliyi xüsusi hüquqlara malik olmayan, analoji işlərdə təcrübəsi olmayan, çəmi5-6 ay əvvəl dövlət qeydiyyatına alınmış bir MMC ilə satınalma müqaviləsi bağlamışdır ki, bu da satınalmada qanun pozuntusuna yol verildiyinə əsaslı şübhələr yaradır. Sözügedən MMC-nin müvafiq sahədə peşəkarlığı, ixtisas göstəriciləri, texniki və maliyyə imkanların, işçi qüvvəsi, uyğunluğun meyarı tələbləri ilə üst-üstə düşürmü?
Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “LUMOS CONSULTİNG SERVİCES” (VÖEN: 1703785571) Məhdud Məsuliyyətli Cəmiyyətinin 10.05.2024-cü il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 100 manat olan MMC-nin hüquqi ünvanının , BAKI ŞƏHƏRİ SƏBAİL RAYONU, NEFTÇİ QURBAN ABBASOV, ev 5, qanuni təmsilçisi kimi isə Qasımov Adil Faiq oğlu qeyd olunub. Reyestr məlumatlarında MMC-nin təsisçisi və ilk qanuni təmsilçisi kimi Məcidov Nihat Sərvan oğlu göstərilir.
Bəs Nihat Məcidov kimdir? Elm və Təhsil Naziri Emin Əmrullayevin əmri ilə 2024-cü ilin iyulunda “ETN Yüksək Texnologiyalar Parkı” MMC-nin baş direktoru vəzifəsinə təyin etdiyi şəxs. Elm və Ali Təhsil üzrə Dövlət Agentliyinin sədr müavini Əminağa Sadıqov yeni baş direktoru kollektivə təqdim edərkən o, yeni vəzifəyə təyinatına görə elm və təhsil naziri cənab Emin Əmrullayevə göstərilən etimada görə minnətdarlığını bildirərək, qurumun fəaliyyətinin gücləndirilməsi üçün əlindən gələni əsirgəməyəcəyini vurğulayıb.
Qeyd edək ki, Nihat Məcidov 1999-cu ildə Bakı şəhərində anadan olub. 2016-2020-ci illərdə ADA Universitetində təhsil alıb, bakalavriat səviyyəsini iqtisadiyyat ixtisası üzrə fərqlənmə diplomu ilə bitirib. 2019-2024 illər ərzində EY, Procter & Gamble, KPMG, McKinsey & Company şirkətlərində müxtəlif vəzifələrdə işləyib. 2024-cü ilin yanvar ayından etibarən son təyinatadək SABAH.HUB innovasiya mərkəzində strategiya və layihələrin idarə olunması şöbəsinə rəhbərlik edib.
Görsənən odur ki,“Lumos Consulting Services” MMC bundan sonra Elm və Təhsil Nazirliyindən hələ çox tenderlər udacaq, Nihat Məcidov da təsisçisi olduğu MMC ilə Emin Əmrullayevin etimadını doğruldacaq.
Aktualinfo.org
Prezidentin Cəbrayıl, Qubadlı və Zəngilan rayonlarında xüsusi nümayəndəsinin müavini Səbuhi Mehdizadə uzun illər məmur olaraq çalışmasına baxmayaraq, adında qeyri-yaşayış binası olan biznes obyekti var...
AzFakt.com xəbər verir ki, 5 mərtəbəli biznes obyekti Bakı şəhəri, Yasamal rayonu, Abbas Mirzə Şərifzadə küçəsində yerləşir və hazırda həmin binadan ARB telekanalı studiya olaraq istifadə olunur.
Binanın reyster sənədi Səbuhi Knyaz oğlu Mehdizadənin adına Azərbaycan Respublikasının Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsi tərəfindən verilib. Sənəd 01100003-1-2605-001980/0619 kod nömrəsi ilə qeydiyyatdan keçib.
Sənəddə göstərilir ki, Səbuhi Mehdizadənin adına olan qeyri-yaşayış binası 0.0472 ha ərazidə yerləşir və ümumi sahəsi 1480.8 kvadratmetrdir.
Xatırladaq ki, Səbuhi Knyaz oğlu Mehdizadə Prezident İlham Əliyevin 15 iyul tarixli sərəncamı ilə Cəbrayıl, Qubadlı və Zəngilan rayonlarında Azərbaycan Respublikası Prezidentinin xüsusi nümayəndəsi Vahid Hacıyevin müavini vəzifəsinə təyin olunub.
Mediada yer alan məlumatlara görə, Səbuhi Mehdizadə bundan əvvəl sözü gedən Nümayəndəlikdə baş məsləhətçisi vəzifəsində çalışıb.
Səbuhi Mehdizadə Xüsusi nümayəndəlikdən öncə bir sıra önəmli dövlət vəzifələrində çalışıb. O, Nümayəndəlikdə çalışmazdan əvvəl Kənd Təsərrüfatı nazirinin müşaviri, “Təmiz şəhər” ASC-nin İdarə Heyəti sədrinin müavini, İqtisadiyyat Nazirliyinin İstehlak Mallarının Ekspertizası Mərkəzinin direktoru, Azərbaycan Stolüstü Tennis Federasiyasının Baş katibi, “Azərbaycan Respublikasının Ağır Atletika Federasiyası” İctimai Birliyinin İdarə Heyətinin sədr müavini vəzifələrində çalışıb. Hazırda o, Azərbaycan Stolüstü Tennis Federasiyasının vitse-prezidentidir.
Bundan başqa Səbuhi Məmmədov “Hovers Group” MMC şirkətinin təsisçisilərindən biridir. 2011-ci ildə yaradılan bu çirkət isə on milyonlarla manat dəyəri olan tenderlərin qalibi olub.
“Hovers Group” MMC son olaraq yerli mətbuatda bir neçə gün əvvəl Naxçıvandan 12 milyonluq tender udması ilə gündəmə gəlib.
Həmin məlumatda bildirilir ki, Naxçıvan Muxtar Respublikasi Dövlət Su Ehtiyatlari Agentliyi tərəfindən 06.09.2024-cü il tarixində “Əlincəçaydan su götürən və Culfa rayonunun ərazisindəki Bənəniyar su anbarını qidalandıran kanalın yenidən qurulması”nın satınalınması ilə əlaqədar elan edilmiş açıq tender prosedurunda Bakı şəhəri, Nəcəfqulu Rəfiyev, 17 ünvanında qeydiyyatda olan “Hovers Group” Məhdud Məsuliyyətli Cəmiyyəti qalib elan olunmuş və həmin Cəmiyyətlə 12.430.027,54 manat məbləğində müvafiq satınalma müqaviləsinin bağlanması nəzərdə tutulur.
Məlumat Naxçıvan Muxtar Respublikasi Dövlət Su Ehtiyatlari Agentliyi tərəfindən dövlət satınalmalarının vahid internet portalına 14.11.2024-cü il tarixdə yerləşdirilib.
Dövlət qurumundan 12 milyon manatdan çox sifariş udan bu MMC-nin rəsmi veb saytında qeyd olunan məlumatlara görə HOVERS GROUP Məhdud Məsuliyyətli Cəmiyyəti 1 iyul 2011-ci ildə İlqar Zeynalov tərəfindən təsis edilib. Sürətlə inkişaf edən şirkət bərpa və tikinti, eləcə də dizayn layihələri xidmətlərinin həyata keçirilməsi ilə məşğul olur. Bir çox müxtəlif miqyaslı və mürəkkəb layihələrin arxasında “Hovers Group”un adı var. Qeyd edilir ki, tikinti və bərpa işləri müasir tikinti texnologiyalarından və avadanlıqlarından istifadə edən yüksək ixtisaslı mütəxəssislər tərəfindən aparılır. Şirkət həmçinin Bakıda, “Hovers Beton” zavodunda hər növ markalı beton istehsalını, Metal zavodunda isə istənilən formalı metal tir istehsalını həyata keçirir və bu tikinti materiallarının lazımi istiqamətlərə çatdırılmasını təmin edir.
Dövlət satınalmalarının vahid internet portalından görünür ki, MMC son 5 ildə Məcburi Köçkünlərin Sosial İnkişaf Fondu ilə ümumi dəyəri 7 653 800 manat dəyəri olan 3 satınalma müaviləsi, Mənzil İnşaatı Dövlət Agentliyi “MİDA” Məhdud Məsuliyyətli Cəmiyyəti ilə ümumi dəyəri 41 626 681 manat dəyəri olan 3 satınalma müaviləsi bağlayıb.
Bunlardan əlavə Azərbaycan Meliorasiya və Su Təsərrüfatı Açıq Səhmdar Cəmiyyətinin Tikilməkdə olan meliorasiya və irriqasiya obyektlərinin birləşmiş müdiriyyəti ilə ümumi dəyəri 2 552 433 manat dəyəri olan 2 satınalma müaviləsi, Gənclər və İdman Nazirliyi ilə Yevlax şəhərində Olimpiya İdman Kompleksinin tikintisi üzrə malların (işlərin və xidmətlərin) satın alınması üzrə 18.197.058,59 manat dəyəri olan 1 satınalma müaviləsi, Kənd Təsərrüfatı Nazirliyi ilə Qobustan rayon Cəngi ərazisində yararsız “Pestisid” dərman tullantılarının mövcud saxlanılma Poliqonunun təmiri üzrə 552.437,95 manat dəyəri olan 1 satınalma müaviləsi bağlanıb.
Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “HOVERS GROUP” (VÖEN: 1501843641) Məhdud Məsuliyyətli Cəmiyyətinin 01.07.2011-ci il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 345 720.00 manat olan MMC-nin hüquqi ünvanının , BAKI ŞƏHƏRİ NƏSİMİ RAYONU, ABBAS SƏHHƏT, ev 73, qanuni təmsilçisi kimi isə Zeynalov İlqar Adıgözəl oğlu qeyd olunub.
Dövlət Vergi Xidmətinin reyestrində edilmiş dəyişiklikdə isə “Hovers Group” MMC-nin BAKI ŞƏHƏRİ NƏRİMANOV RAYONU, AZADLIQ PR., ev 114, mənzil 76 ünvanında Səbuhi Knyaz oğlu Mehdizadə tərəfindən təsis edildiyi göstərilir. O 2015-ci ilin fevralına qədər MMC-nin qanuni təmsilçisi olub. Ondan sonra MMC-yə müxttəlif vaxtlarda Hümbətov Cəmşid Ellər oğlu, Rəhimov Şəhriyar Kamal oğlu qanuni təmsilçilik edib.
Göründüyü kimi Səbuhi Mehdizadə bir sıra dövlət qurumlarında yüksək vəzifələrdə çalışıb. Təsisçisi olduğu “Hovers Group” MMC isə işlədiyi qurumlardan son beş ildə 70 milyon manata yaxın dövlət sifarişi alıb.
Qarşı tərəfin mövqeyini dərc etməyə hazırıq.
AzFakt.com
“10 ildən çoxdur ki, İmişli Şəkər Zavodundan metal alıb satıram. Bu yaxınlarda tələb etdim ki, bu proses sənədləşdirilsin, alqı-satqı qanuni şəkildə aparılsın. Bundan sonra zavod rəhbərliyinin göstərişilə zavoda girişimi əngəllədilər. Zavodun mənə olan borcu da ödənilməyib. İndi mənimlə nə alqı-satqı edirlər, nə də borcumu ödəyirlər”.
Bunu Meydan TV-yə İmişli rayon sakini Qədir Ağayev deyir. Onun sözlərinə görə, indiyədək zavoddan qeyri-rəsmi aldığı metala görə son vaxtlar müqavilə imzalanmasını tələb etdiyi üçün zavod rəhbərliyi onunla davam edən on illik iş birliyinə son verib:
“Aramızdakı metal alqı-satqısının sənədsiz olması mənə həmişə problemlər yaradıb, əlavə xərclərə düşmüşəm. Çünki aldığım metalı İmişlidən Bakıya daşıyanda yolboyu saxlanılıram, cərimələnirəm. Nəticədə zavodla gördüyüm işdən zərərli çıxıram. Bu yaxınlarda zavodun qarşısında məsələ qaldırdım ki, mənə satdıqları metalı sənədləşdirsinlər. Həmin gündən zavodun direktoru Ceyhun Salmanov zavoda girişimi qadağan etdi. Mən də şikayət etməyə başladım. Gördülər ki, qanunsuz əməllərinin üstü açılacaq, məni zavoda dəvət etdilər, 3 aylıq müqavilə bağladılar və bildirdilər ki, dəymiş 17 min manat zərəri şirkət mənə 3 ay ərzində güzəştli metal satmaqla qarşılayacaq. Ancaq iki həftədən sonra müqaviləni ləğv elədi”.
Qədir Ağayevin sözlərinə görə, zavod metalı “Whatsapp” üzərindən satır:
“İllərdir ki, “Whatsapp”da bir qrup yaradılıb, zavod metalın fotolarını həmin qrupa yerləşdirir, məlumatları qeyd edir, kim çox pul verirsə, ona da satır. Belə deyək də, metalı “Whatsapp” üzərindən hərraca çıxarır. Qrupda mənim kimi yüzlərlə müştəri var. Kim çox pul verir, metal ona da satılır. Zavoddan sonuncu dəfə metal alanda baxdım ki, məni aldadıblar. Depozit qoyandan sonra malların içərisindən lazımlı metalların götürüldüyünü anladım. Bu da məni 17 min manat zərərə saldı. Tələb etdim ki, ya malı versinlər, ya da zərəri ödəsinlər. Bunlar da mənimlə müqavilə imzaladılar. Ancaq 11 dəfə metal götürəndən sonra direktor mənə metal satışını dayandırdı”.
Qədir Ağayev deyir, onunla əməkdaşlığı dayandırmalarının səbəbi vergi ödəməmək məqsədi güdür:
“Bir vətəndaş olaraq mənim istədiyim odur ki, qanuni işləyək, vergisini ödəyək. Alıb apardığım metalın sənədi olsun ki, polis də yolda saxlayıb məni cərimələməsin. Bu tələbi dilə gətirməyim xoşlarına gəlmədi. Zavoda girişimi əngəllədilər, özümü də “Whatsapp” qruplarından kənarlaşdırdılar. Təkcə mən əməkdaşlıq etdiyim 10 il ərzində onlardan milyon yarım manatlıq metal götürmüşəm. Axı mən tək deyiləm, xeyli adamla illərdir ki, sənədsiz, sübutsuz metal alqı-satqısı edirlər. Araşdırılsa, ortaya çıxar ki, zavodun yüz minlərlə manat vergidən yayınma halları var”.
Qədir Ağayev deyir ki, İmişli Rayon Prokurorluğuna şikayət edəndən sonra “Azərsun Holding”in baş ofsinə dəvət olunub:
“Şirkətin hüquqşünasıyla görüşdüm, başıma gələnləri danışdım. Dedi “ərizə yaz, hamısı yoluna qoyulacaq”. Tələbimi soruşdular, dedim, bir ay güzəştli qiymətlə metal satsınlar, borclarımı qaytarım. Bildirdilər ki, 14 gündən sonra zavoda gedim, orada məni dinləyib, məsələni həll edəcəklər. 14 gün keçdi, getdim zavoda, direktorun köməkçisi qəbul etdi, dedi, get, metal satışı olanda xəbər edəcəyik”.
Bir həftə əvvəl Qədir Ağayev yenə “Azərsun Holding”ə gedib, ancaq orada onu qəbul edib dinləyən olmayıb.
Meydan TV “Azərsun Holding”in məsələ ilə bağlı mövqeyini öyrənmək üçün şirkətin mətbuat xidmətinə müraciət edib. Bir neçə gün sonra mətbuat xidmətindən bildirilib ki, şirkətin vətəndaşın dedikləri ilə bağlı hər hansı açıqlaması olmayacaq.
Bakıdakı apteklərdən birində müdirin xanım işçini döydüyü iddia olunur. Bununla bağlı Meydan TV-yə təqdim edilən videogörüntülərdən də aydın olur ki, hadisə aptekin içində baş verib. Görüntülərdə bir kişi xanım işçini yerə yıxıb təpikləyir, döyür.
Hadisənin iyulun 7-də Rəşid Behbudov küçəsindəki aptekdə baş verdiyi bildirilir. İddiaya görə, görüntülərdə Aysel adlı işçisini döyən aptekin müdiri Elnur Cabbarovdur.
Elnur Cabbarov hazırda eyni aptekdə çalışan başqa bir xanım əməkdaşının həyat yoldaşı ilə də problem yaşayır. Bu barədə Meydan TV-yə danışan Qabil Quliyev deyir ki, bu məsələnin də kökü aptek müdirinin xanım işçisini döyməsinə gedib çıxır:
“Aptekdə iş yoldaşı Ayselə “müəllim dovşana oxşayır” mesajı yazıb. Aysel də ona gülüş işarəsi atıb. Elnur Cabbarovun apteklərinə nəzarət edən qadın da bunu müdirə çatdırıb ki, sənin haqqında belə deyirlər. Bu da Ayseli o cür döyüb, təpikləyib. Aysel evə gedəndə anası o vəziyyətdə onu görüb, soruşub ki, sənə nə olub? Deyib ki, müdir döyüb. Anası inanmayıb ki, nə danışırsan, belə şey olar? Qardaşımın yoldaşı da onunla aptekdə işləyir, Aysel ondan xahiş eləyib ki, kameradakı görüntüləri monitordan çəkib göndərsin. Qardaşımın yoldaşı da göndərib. Ayselin anası bundan sonra qızının döyülməsilə əlaqədar Ailə, Qadın Komitəsinə və 22-ci polis bölməsinə şikayət edib”.
Qabil Quliyev danışır ki, polis bölməsində bir müddət araşdırma gedib, sonradan Ayseldən barışıq ərizəsi alıb, işi bağlayıblar. Bunu Meydan TV-yə Ayselin digər yaxınları da təsdiqləyib.
Ardınca Elnur Cabbarov videonu ona göndərənin kimliyini araşdırmağa başlayıb və Şəhanə Quliyeva olduğunu müəyyənləşdirib:
“Bizdə Elnur Cabbarovun səs yazısı var, deyir ki, polisə, jurnalistlərə 50 minə qədər pulum çıxdı. Mənə heç kim heç nə eləyə bilməz. Beləcə, işi bağlayır. Başlayır, qardaşımın həyat yoldaşına nalayiq, heç bir əxlaqa sığmayan, təhqir dolu mesajlar yazmağa. Axırda elə bir şey yazır ki, heç bir həyat yoldaşı onu götürməzdi. Qardaşım da onun yazdıqlarını oxuyurdu. Dilə gətiriləsi ifadələr deyil. Hansı kişinin yoldaşına, bacısına o sözləri desələr, o, qəbul edərdi? Ümumiyyətlə, kiminsə yoldaşına onu yazmağı kimsə özünə necə rəva görə bilər? Bundan sonra qardaşım durub gedir onun yanına ki, nə istəyirsən? 7 ildir qardaşım Şəhanə Quliyeva ilə evlidir. Qardaşımla əlbəyaxa olurlar. Sonra gedib qardaşımdan polisə şikayət edir. Nəticədə qardaşımı tuturlar. Ona deyirəm ki, qardaşımın həyat yoldaşına niyə belə şeylər yazmısan? Deyir, yaxşı eləmişəm…”.
Zamin Quliyev haqqında cinayət işi başlanıb, ona qarşı Cinayət Məcəlləsinin 127 (qəsdən sağlamlığa az ağır zərər vurma) və 221-ci (xuliqanlıq) maddələrilə ittiham irəli sürülüb. Hazırda Nərimanov Rayon Polis İdarəsində istintaq davam edir.
Qabil Quliyev deyir ki, qardaşı təqsirsizdir, qarşı tərəf öz hərəkətlərilə onu təhrik edib:
“Bu adam cəzasızlıq mühitində istədiyini edir. Zərərçəkmiş kimi tanınıb. Mənə deyir ki, bir şərtlə barışıq ərizəsi yazaram, qardaşın o qadını boşasın. Deyirəm, siz nə danışırsınız? Niyə boşanmalıdır? Mənim qardaşım elektrikdi, gündəlik çörəkpulu qazanmaqla məşğuldu. Belə bir adam dayandığı yerdə başına iş açıb”.
Meydan TV Elnur Cabbarovun ünvanına səslənən ittihamlar, həmçinin görüntülərlə bağlı şərh almaq üçün onunla əlaqə saxlamağa dəfələrlə cəhd göstərib. Onun 211-– nömrəli telefonuna çoxsaylı zənglərimizə cavab verməyib.
Daxili İşlər Nazirliyinin mətbuat xidmətindən bildirilib ki, məsələ ilə bağlı araşdırma aparılır.
Meydan TV-nin əldə etdiyi məlumata görə, paytaxtda Maliyyə Nazirliyinin qarşısında, “Dostluq” kinoteatrının yaxınlığında, Ayna Sultanovanın heykəlinin yanında, Əhmədli qəsəbəsində “Bakı” kinoteatrının ətrafında və s. yerlərdə Elnur Cabbarova məxsus çoxsaylı apteklər fəaliyyət göstərir.
"Kristal Abşeron" şirkətinin Nizami rayonu Məshəti Gəncəvi küçəsi 130A və 130C ünvanında yerləşən binalarında yaşayan sakinlər "Aznet" intenet provayderindən şikayətçidirlər.
Sakinlər "Arqument.az"a deyiblər ki, "Aznet" faktiki olaraq dələduzluqla məşğuldur. Şirkət aylıq internet abunəçilərindən 25 manat xidməthaqqı alsa da, heç 40 mbit/s sürət internet vermir. Halbuki yeni internet tariflərinə görə, 25 manat ödənişə görə 100 mbit/s sürət verməlidir.
Maraqlıdır ki, sakinlərin istifadə etdiyi Wifi modem də "Aznet" tərəfindən verilib və sakinlərə bildirilib ki, bu, ən son model modemdir və 5G sürəti dəstəkləyir, amma hazırda əksi baş verir. Şirkət hazırda sakinlərdən 25 manat alıb 20-25, bəzən bundan da aşağı sürət verir.
Sakinlər dəfələrlə "Aznet"ə müraciət etsələr də, problemləri həll olunmur. Onların sözlərinə görə, "Kristal Abşeron" bu provayderlə anlaşıb, faktiki hər iki monopolist şirkət sakinləri informasiya blokadasında saxlayır.
"Əvvəllər 40 mbit internet sürəti üçün "Aznet" intenet provayderinə 18 manat ödəyirdik. İnternetin qiyməti qaldırılandan sonra abunəçisi olduğumuz "Aznet" intenet provayderi bizə 100 mbit əvəzinə 10, 15, 20, 25 mbit intenet verir. Bunu sübut edən görüntülər var əlimizdə. Dəfələrlə bu monopolist şirkətə müraciət etsək də, nəticə yoxdur. Faktiki bizim hüquqlarımızı pozur, intenet demək olar ki, yoxdur. Bizdə Wifi modem en son modeldir. Bütün binada Kristal Abşeronun binalarına ancaq Kristal Abşeronun rəhbərliyinin icazə verdiyi internet provayderlər xidmət göstərməsi vətəndaşların haqlarının pozulmasıdır", - sakinlər belə deyirlər.
Onlar bildiriblər ki, "Kristal Abşeron"un anlaşdığı keyfiyyətsiz "Aznet" - internet provayderi hazırda onları boğaza yığıb.
Bundan əvvəl də "Rahat Telecom" İnternet provayderi sakinlərə eyni problemi yaşadıb. Çoxlu etirazlardan sonra "Rahat Telecom" "Aznet"lə əvəzlənib, amma problem irin salan yaraya çevrilib, getdikcə dərinləşir...
Sakinlər digər provayderlərə müraciət etsələr də, şirkət onların mənzillərə internet çəkməsinə imkan verməyib.
Bildiriblər ki, yalnız bizimlə "razılaşan" provayderlər mənzillərə internet çəkə bilərlər.
Dəfələrlə saxta mandatla Milli Məclisə düşən və ölkənin əsas tikinti monopolistlərindən olan Ağalar Vəliyev 21-ci əsrdə insanların ifadə azadlığını, internetə çıxışının qarşısını alır.
Sakinlər Azərbaycan Respublikası İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə müraciət etsələr də, nəticə yoxdur. Qurum onlara rəsmi cavabında bildirib ki, şikayət aidiyyəti üzrə göndəriləcək, amma heç bir addım atmayıb.
Son olaraq sakinlər həm "Kristal Abşeron", həm "Aznet" - internet provayderinin özbaşınalığı, həm də Antiinhisar və İstehlak Bazarına Nəzarət Dövlət Xidmətinin yarıtmaz fəaliyyətindən "supernazir" Mikayıl Cabbarova müraciət ediblər.
Görünür, Mikayıl Cabbarovun da başı daha "ciddi işlər"ə qarışdığından onların tələblərinə məhəl qoymur.
Azərbaycan Dövlət Su Ehtiyyatları Agentliyi “İri Şəhərlərin Birləşmiş Su Təchizatı Xidməti” publik hüquqi şəxsin Nəqliyyat və Xüsusi Texnika İdarəsinin, 1 nömrəli avtoparkın müdiri – Bakı şəhəri Sabunçu rayonu, Yeni Ramana qsəbəsi, Dadaş Bünyadzadə küçəsi 10E ünvanında qeydiyyatda olan Süleymanov Elçin Zakur oğlu tərəfindən Prezident İlham Əliyevə, Birinci vitse-prezident Mehriban Əliyevaya, Baş Prokuror Kamran Əliyevə, Daxili İşlər naziri Vilayət Eyvazova, Prezidentinin köməkçisi Fuad Ələsgərova, bir sıra aidiyyatı dövlət qurumlarının rəhbərlərinə və mətbuat orqanlarına müraciət ünvanlanıb.
Bir nüsxəsi də Aktualinfo.org-a daxil olan müraciəti olduğu kimi diqqətinizə çatdırırıq:
Möhtərəm cənab Prezident!
Məruzə edərək Sizə bildirirəm ki, 26.07.2024-cü il tarixində avtopark müdiri vəzifəsinə təyin edilmişəm. Təyin olduğum müddət ərzində aşağıda qeyd olunan dövlət əmlakının talan edilməsi ilə bağlı cinayət faktlarının şahidi olmuşam (qeyd olunan bütün cinayət faktları ilə bağlı təsdiqedici sənədlər, video və şəkillər mövcuddur. Bütün
məsuliyyəti hiss edirəm və cavab verməyə hazıram).
1. Külli miqdarda (100 000 tonlarla) yanacağın talan edilməsi.
2. Təmirə dayanan nəqliyyat və xüsusi texnikalarının üzərindən qismən yararlı ehtiyyat hissələrinin qanunsuz çıxarılması və digər nəqliyyat vasitələrinə quraşdırılması.
3. Uzun müddətdə təmirə dayanan nəqliyyat və xüsusi texnikalarının ehtiyyat hissələrinin talan edilməsi.
4. Silinməyə gedən nəqliyyat və xüsusi texnikaların talan edilməsi.
5. Müxtəlif ehtiiyat hissələrini satan şirkətlərlə bağlanan müqavilələrdə nəzərdə tutulmayan ehtiyyat hissələrinin digər (daha bahalı) ehtiyyat hissələri ilə əvəz edilməsi.
6. Sürücülərə məcburi ehtiyyat hissələrinin aldırılması.
7. Nəqliyyat və xüsusi texnikaların mühərriklərinin yağ dəyişməsi müddətlərinin uzadılaması və bununla dövlət əmlakına qəsdən ziyan vurulmasi.
8. 70 % nəqliyyat və xüsusi texnikalarının səs boğucularının daxilində olan katalizatorların çıxarılması və satılması.
9. Ford Trasit markalı nəqliyyat vasıtələrinin üzərindən olan Turboların çıxarılması və yoxa çıxması.
10.Müxtəlif səbələrdən icazə alan işçilərin işdə olmadığı müddət barəsində ərizələrin alınmaması və tabellərdə qanunsuz olaraq günlərin hesablanması.
11. Avtomobilləri yuyub təmizləyən ştatında olan Rüstəm Xəlilov adında işçinin illərlə işə gəlmədiyi halda əmək haqqının veriməsi.
12.Ezamiyyətə gedən sürücülərin ezmiyyət məvaciblərinin günlərlə geciktirilməsi.
13.Əlavə saata qalan və qeyri iş günləirndə işə cəlb olunan sürücülərin və çilingərlərin əmək haqqına əlavələrin kəsilməsi və geciktirilməsi.
14. Bir sıra nəqliyyat vasitələrinin mühərrik nömrələrinin texniki pasportda mövcud olan nömrələrə uyğun olmaması.
15.Təmirə gələn nəqliyyat və xüsusi texnikaların təmir kitabında qeydiyyata alınmaması, qüsur və quraşdırma aktlarının tərtib edilməməsi.
16.Bir sıra mühəndis və fəhlələrin vəzifələrinə təyin olunması barəsində əmrlərin olmasına baxmayaraq, elektron müqavilələrin olmaması.
17.Ehtiyyat hissələri və bütün növ yağların qaima-faktura ilə verilməsi əvəzinə müvəqqəti buraxılış vərəqəsi ilə verilməsi. Qaima-faktura isə 2 aydan sonra təqdim olunması.
Möhtərəm cənab Prezident!
Bütün bu faktlarla bağlı Nəqliyyat və xüsusi texnika idarəsinin rəisi Samir Şahin oğlu Cəbrayılova yazılı formada dəfələırlə müraciət edərək komissiyanın yaradılması və 1 nömrəli avtoparka göndərilməsini tələb etmişəm, Lakin Samir Cəbrayılov cinayət faktlarını daima ört bastr etməyə çalışıb. Mənə təziq göstərir və susmadığım halda mənimlə bağlanmış 3 aylılq əmək müqaviləsini davam etmədiyi ilə qorxudur. 1 nömrəli avtoparkdan heç-bir səsin çıxmaması tapşırığını verib. Avqust ayının hesabatını imzalamadığım üçün məni hədələyir.
11.10.2024-cü il tarixində saat 11:35 radələrində İdarə rəisi Samir Cəbrayılov tərəfindən 1 nömrəli avtoparka göndərilmiş “qoçular” İdarə rəisinin müavini Ülfət Kazımov və İdarə rəisinin müşaviri Nurlan Tağızadə xidməti vəzifələrimi yerinə yetirən zaman otağımda olan İP kamerasını quldurcasına əldə etmək məqsədi ilə mənə fiziki qüvvə tədbiq edərək yerə yıxdılar, tələm tələsik otağı və ərazini tərk edərək (sifarişçinin) Samir Cəbrayılovun yanına getdilər. Faktla bağlı Abşeron rayonu Polis İdarəsində mənim tərəfimdən şikayət ərizəsi təqdim edilmişdir. Eyni zamanda aldığım xəsarətlə bağlı məhkəmə tibbi ekspertizadan da keçmişəm. 12.10.2024-cü il tarixində Ülfət Kazımov və Nurlan Tağızadə Abşeron rayonu Polis İdarəsinə çağırılmış və soyğunçuluq nəticəsində əldə ettdikləri mənə məxsus İP kamerasını, işi aparan təhqiqatçıya təhvil vermişdilər. Hal hazırda təhqiqat davam edir.
Bu cinayət hadisəsi ilə bağlı İdarə rəisi Samir Cəbrayılova yazılı məlumat verdiyimdən sonra, mənə təhkim olunan xidməti avtomobil məndən alındı, xidməti otaqımda olam əmlaklar çölə çıxarıldı və tabeliyimdə olan işcilər tərəfindən xidməti otaq möhürləndi. İdarə rəisi telefon vasitəsi ilə mənə bildirdi ki, məni işdən azad edib. Lakin əmr hələ də mövcud deyil. 28.10.2024-cü il tarixində mövcud olmayan əmək müqaviləmə xitam verildi.
Ülfət Kazımov və Nurlan Tağızadə tərəfindən törətdikləri cinayət əməllərinin səbəbi, Samir Cəbrayılovun 30.10.2024-cü il tarixində 1 nömrəli avtoparkda rəhbər və mühəndis heyəti ilə keçirilən müşavirədə özünün qeyri adekvat davranışının videogörüntülərinin ələ keçirilməsi olmuşdur.
İclas zamanı Samir Cəbrayılov aşağıdakıları qeyd etmişdir (vedomateriallar mövcuddur):
1. Samir Cəbrayılovun Dövlət Gömrük Komitəsində işlədiyi dövr ərzində rüşvət yolu ilə pulun əldə ediləsi və o,dövrdə buna icazənin olması haqqında.
2. 300 000 AZN məbləğində mövcud olmayan mal-materialların qəbul etdiyinin və qəbul sənədinə imza atdığının etiraf edilməsi haqqında.
3. Avtoparkdan bütün hallarda səsin çıxmaması tapşırığının (yani bütün faktlarlın gizlədilməsi) verilməsi haqqında.
4. Aralarında problem olan işçilər, işin sonunda ərazidən kənarda bir birlərinə qarşı soyuq silahdan (bıçaq) istifadə etmələri barəsində tapşırıq verdiyini və hətta bu kimi hallarda özünə məxsus (Samir Cəbrayılova) xəncəlində istifadə üçün təqdim edə biləcəyini də bildirməsi haqqında.
5. Küçədə böyüdüyünü, küçə aləminin qaydalarının bildiyini, onu dəstəklədiyimiz halda digər idarə rəislərinin başlarının əzilməsi haqqında
6. Əvəllər oğurluq edən işçilərə inandığını və gələcəkdə oğurluq əməllərinin təkrar olmaması tapşırığının veriməsi haqqında.
İdarə rəisi Samir Cəbrayılovun belə arxayın çıxışı, bütün işçilərə dediyi kimi, yüksək vəzifəli bir generalın qohumu olmasıdır.
Əvvəlki dövrlərdə rüşvətə əl atan bütün köhnə işçiləri vəzifəyə təyin edib, lakin oğurluğun qarşısını alan vicdanlı işçiləri isə uzaqlaşdırıb. Hal-hazırda cinayət faktlarına göz yumadığıma və susmadığıma görə idarə rəisi Samir Cəbrayılov məni də vəzfədən uzaqlaşdırdı. Hal hazırda işə gedə bilmirəm.
Çox təsüflə qeyd etməliyəm ki, bu gün bu sahəyə diqqət çox aşağıdır. Bunun səbəbi, İdarə rəisi Samir Cəbrayılovun Nəqliyyat sahəsindən uzaq olmasıdır.Bütün bu faktlarla məlumatlı olduqları halda Azərbaycan Dövlət Su Ehtiyyatları Agentliyinin və “İri Şəhərlərin Birləşmiş Su Təchizatı Xidməti” publik hüquqi şəxsin rəhbərləri susur, heç bir reaksiya vermir.
Möhtərəm cənab Prezident!
Hansı vəzifədə oluramsa olum çalışdığım sahədə, amalım Ümummilli Lider Heydər Əliyevin İdeallarına sadiq qalmaq, müstəqil Azərbaycan dövlətimizin iqtisadiyyatını gücləndirmək, müxtəlif yollarla dövlət əmlakını mənimsəmələrinin qarşısını almaq və Sizin daxili siyasətinizi dəstəkləmək olmuşdur.
Möhtərəm cənab Prezident!
Yuxarıda qeyd olunan xüsusatların araşdırılmasına dair, tabeliyinizdə olan xüsusi- xidmət və hüquq-mühafizə orqanlarına müvafiq göstəriş verməyinizi Sizdən xahiş edirəm. İnanıram ki, məs Sizin müdaxilənizdən sonra mənim əlimdə olan sübutedici faktlar və dəlillər əsasında bu cinəyətkar dəstə zərərsizləşdiriləndən sonra ədalət mühakiməsi vasitəsi ilə, törətdikləri cinayət əməllərinə görə layiqli cəzalarını alacaqlar.
Aktualinfo.org
P.S. Mövzu ətrafında araşdırmalarımızı davam etdiririk. Yaxın günlərdə daha geniş məlumatları diqqətinizə çatdıracıq. Əks tərəfin də mövqeyini dinləməyə hazırıq.
"Sumqayıt şəhəri, 9-cu mikrorayon ərazisində zibillər vaxtında yığışdırılmır. Üfunət səbəbindən ərazidən keçmək mümkün deyil".
TEREF bildirir ki, bunu Bakupost.Az-a şikayət edən Sumqayıt sakinləri deyib.
Onların sözlərinə görə, yaxınlıqda böyük supermarket yerləşir. Sakinlərdən başqa, market də xarab olan məhsulları və zibilləri ora atır:
"Ərazidə antisanitariyya vəziyyəti hökm sürür. Zibil konteynerləri günlərlə boşaldılmır. Bu, həm ətraf mühitə ziyan vurur, həm də insanların sağlamlığına ciddi təhlükə yaradır. Hər gün eyni mənzərə ilə qarşılaşırıq. Zibil tullantıları vaxtında yığışdırılmadığı üçün ətrafa pis qoxu yayılır. Konteynerlərdə yer olmadığı üçün sakinlər zibili yerə atmağa məcbur olur".
Məsələ ilə bağlı Sumqayıt Bələdiyyəsinin mətbuat katibi Səbuhi Allahverdizadə Bakupost.az-a ada bildirib ki, bələdiyyənin yaranmış vəziyyəti birbaşa həll etmək imkanı yoxdur, sakinlər isə siqnal xidməti vasitəsilə müəyyən məbləğ qarşılığında əraziyə xüsusi məişət tullantıları maşını cəlb edə bilərlər:
"Şəkillər və videolardan görünür ki, antisanitariya vəziyyətin yaranmasında yaxınlıqdakı supermarketin böyük rolu var. Çünki məişət tullantılarının qalaqlanıb qaldığı yer həmin obyektə çox yaxındır. Problemin tam həlli üçün Sumqayıt İcra Hakimiyyəti ilə əlaqə saxlanılması məqsədəuyğundur," - deyə o əlavə edib.
Sumqayıt İcra Hakimiyyətinin mətbuat katibi Eyvaz Qocayevlə də əlaqə saxladıq. O, Bakupost.az -a problemin əsas səbəbkarı kimi yaxınlıqdakı böyük supermarketin fəaliyyətini göstərdi:
"Supermarketə ərazinin təmizliyini nəzarətdə saxlamaq və tullantıların vaxtında yığışdırılması üçün ciddi tapşırıq verilib. Hazırda həmin ərazi zibillərdən tamamilə təmizlənib", - deyə Eyvaz Qocayev bildirdi.
Ulu öndərdən yaxşı kim deyəcək ki?
Gəncə gəncəlilər üçün nədir? Tək bu sualı cavablandırmaq üçün bir kitab yazmaq mümkündür, o ki qaldı bir məqalənin daxilində bu suala işıq tutmaq olsun. Bu 5 hərfdə Gəncə sakini üçün həm Vətən, həm torpaq, həm namus, həm ev-eşik, həm ailə, həm həyat, həm ölüm, həm uşaqlıq, həm yetkinlik, həm fərəh, həm qürur, həm sevinc, həm kədər – bir sözlə, bütün dünya cəmləşib. Bəs yaxşı, qeyri-gəncəli, Azərbaycanın digər bölgələrində dünyaya göz açan, yaşayan üçün nədir Gəncə? Bu suala isə Ulu öndər Heydər Əliyevin sözləri ilə cavab versək, məsələyə tam aydınlıq gətirmiş olarıq: “Biz hamımız – harada yaşamasından asılı olmayaraq, hər bir azərbaycanlı – Gəncə ilə, onun qədim və zəngin tarixi ilə fəxr edirik”.
Bəli, hər bir azərbaycanlı üçün bu qədim Nizami yurdu fəxr mənbəyidir. Onu qorumaq, bacardığımız qədər vəsf etmək hər birimizin borcudur. İllah da ki bu, sənin vəzifə borcun ola, buna görə sənə dövlət büdcəsindən aybaay maaş ödənilə. Belə məsul işlə vəzifələnənlər, düşünmək olardı ki, gecəni gündüzə qatırlar, bəzən sutkalarla yuxusuz qalırlar – təki Gəncəmiz abad olsun, təki bu küçələrdə dolaşan Cavad xanla oğlu Hüseynqulu xanın, Nizami babamızın, bu torpaq uğrunda müxtəlif dövrlərdə canından keçən minlərlə ərənin ruhu abad şəhərin mənzərəsindən şad olsun. Amma, nə yazıq ki, reallıq belə deyil. Daha doğrusu, bu düşündüklərimizlə reallıq arasında yerlə göy qədər fərq var…
Şikayət, şikayət, şikayət…
Etiraf etmək nə qədər acınacaqlı olsa da, Gencexeber.az-ın redaksiyasına hər gün gəncəlilərdən onlarla şikayət daxil olur. Bu şikayətlər şəhərin, demək olar ki, bütün ərazilərini əhatə edir. Şikayətlərin mövzusu isə müxtəlifdir: kommunal xidmətlərin yarıtmaz fəaliyyətindən tutmuş qədim şəhərin küçələrində dəstə-dəstə dolaşan sahibsiz itlərin saçdığı təhlükəyə qədər. Bəzən əməkdaşlarımızda hətta belə sual da yaranır: görəsən, dövlət başçısının əhalinin rifahının yaxşılaşdırılmasına, yerli icra hakimiyyətlərinin üzərlərinə düşən vəzifələrini vicdanla yerinə yetirmələrinə dair zaman-zaman səsləndirdiyi tələblərini Gəncənin başbilənləri eşitmirlərmi? Ya yaddaş pozğunluğu var bunlarda, eşidirlər, amma çox tez də unudurlar? Eşidib məhəl qoymamalarını isə ağlımıza gətirmək istəmirik. Ən azından bu qədər laqeydliyi sadəcə təsəvvür etmək adamı dəhşətə məhkum edir. Bəs elə isə səbəb nədir? Nə üçün vəzifəsi şəhəri abadlaşdırmaq, gəncəlilərin normal həyat tərzini təmin etmək olan adamlar bu dərəcədə biganədirlər Gəncəyə? Əslində, bunun səbəbini ehtimal edirik, hətta deyərdik ki, bilirik. Amma bu barədə yazının sonunda…
O ki qaldı hər yerdən əli üzülən gəncəlilərin bizə müraciətlərinə… Təbii ki, onların hamısını kiçik bir yazıda əhatə etmək mümkünsüzdür. Elə bir məqsədimiz də yoxdur zatən. Amma bir neçə nümunəni oxuculara təqdim edəcəyik.
“Həsən ağanın kəsdiyi başa sorğu-sual yoxdur!”
Oktyabrın 18-də Gəncədə faciə baş verdi: İsaq Cəfərov küçəsində qaz sızmasından sonra meydana gələn və ölümlə nəticələnən partlayış beşmərtəbəli yaşayış binasının iki blokunda yerləşən 35 mənzili yararsız hala saldı. Hadisə yerinə gələn Gəncə Şəhər İcra Hakimiyyətinin başçısı Niyazi Bayramov Gencexeber.az-a verdiyi açıqlamada bildirdi ki, “FHN-nin komissiyasının rəyini gözləmək lazımdır ki, bilinsin, bina təmir oluna bilər, yoxsa sökülüb yenidən tikilməlidir”. Daha sonra zərərçəkənlərə hər cür dəstək göstəriləcəyinə dair vəd də verdi: “Həmin binada yaşayış mümkün olmadığı üçün kimin yaxın qohumu var, onlara yönləndiriləcək. Kimdə çətinlik yaransa, onlara kirayə ev tutulacaq. Bu gün onlara ilkin yardım olunacaq”. Nə gözəl! Operativ və işgüzar! Amma belə yerdə deyiblər: “Avazın yaxşı gəlir, oxuduğun Quran olsa”. Təəssüf ki, Bayramovun oxuduğu Quran olmadı. Faciədən 20 gün ötdükdən sonra zərərçəkənlər redaksiyamıza müraciət etdilər. Onlar Gəncə şəhər İcra Hakimiyyətinin fəaliyyətsizliyindən, eləcə də onların acınacaqlı vəziyyətlərinə tam biganəlik nümayiş etdirməsindən narazılıqlarını bildirdilər. Dağılan binanın sakinləri söylədilər ki, İcra Hakimiyyəti müvəqqəti yaşamaq üçün kirayə pulu ayrılacağını vəd edib, ailə başçılarının bank rekvizitlərini toplayıb, lakin 20 gündən çox vaxt keçməsinə baxmayaraq heç bir maddi yardım göstərməyib: “Evimiz dörd blokdan ibarətdir. Partlayışdan sonra üçüncü tamamilə dağılıb, dördüncüdə isə mənzillərə qismən ziyan dəyib. Buna baxmayaraq, bizə heç bir köməklik göstərilmədiyi üçün bəzi insanlar öz mənzillərinə qayıtmağa məcbur olublar. Mənzilimiz dağılmasa idi, biz də qayıdardıq. Nə qədər qohum evində qalmaq olar?”.
Bundan sonra əməkdaşımız Gəncə Şəhər İcra Hakimiyyətinə sorğu ünvanladı. Qurum cavabında bildirdi ki, yaxın zamanda bu haqda məlumat veriləcək. Səbəb? Nə üçün indi yox, yaxın zamanda? Diqqət edin səbəbə: “MÜVAFİQ ŞÖBƏNİN MÜDİRİ EZAMİYYƏTDƏDİR”. Təsəvvür edirsinizmi bunu? İnsanlar evsiz-eşiksiz qalıb, əşyalarının bir hissəsi məhv olub, onlara dövlət rəsmisi tez bir zamanda yardım olunacağına dair söz verib və… Ağa, Bəy, Xan, Padşah dincəlir! Rəiyyət isə… Əşi, rəiyyətdir də! Redaksiya olaraq İcra Hakimiyyətindən yeni məlumatları gözləməkdən savayı çarəmiz qalmadı. Və səbrimiz nəticəsini verdi, İH-dən lütf edib bizi də, sakinləri də “sevindirdilər”. Qəzanın baş verməsinin az qala 1 ayının tamamında belə açıqlama gəldi: “Kirayə mənzillərlə bağlı məsələ müsbət yöndə öz həllini TAPACAQ”. Məqalə yazılanda (qəza baş verəndən 35 gün sonra!) İH hələ də axtarışda idi, amma bir şey tapa bilməmişdi. Hara tələsir ki? “Papaq” filminin qəhrəmanının təbirincə desək – “Həsən ağa bu məhəllənin böyüyüdür, ağsaqqalıdır! Həsən ağa cəmi mahalın atasıdır, ağsaqqalıdır! Həsən ağanın kəsdiyi başa sorğu-sual yoxdur!” İndi biz nə karəyik ki, “kəsilən başa” görə kimisə narahat edək? Necə deyərlər, sərgüzəştlər davam edir!
Ümid ölsə-ölsə, Gəncənin bərbad yollarında öləcək
Gəncənin bitmək bilməyən problemlərindən biri də yollarla bağlıdır. İlahi, axı nə qədər şikayət olar? Hərdən elə təsəvvür yaranır ki, Gəncə rəhbərliyi ümumiyyətlə işə avtomobillərlə deyil, helikopter və ya təyyarələrlə gedib-gəlir. Əks halda şəhərin bərbad vəziyyətdə olan küçələrini, piyadaların və avtomobil sahiblərinin hər gün təkrarlanan iztirablarını görərdilər axı! Əgər görsəydilər, onlarda olan məsuliyyəti, vəzifələrinə canla-başla əməl etmə dərəcələrini nəzərə alaraq, dərhal əncam çəkərdilər! Deməli, görməyiblər. Ya da ki… Ya da ki, özləri hərəkət etdikləri küçələri normal vəziyyətə gətirir və bununla da rahatlıq tapırlar. Çox təfərrüata varmadan sadəcə Gəncənin bərbad yollarla “zinətlənmiş” bəzi ərazilərini sadalayaq: Cümhuriyyət küçəsi, 20 saylı marşrut avtobusunun dayanacağnın yaxınlığı; Sevinc qəsəbəsi, 11 saylı marşrut avtobusunun dayanacağının ətrafı; 28 May və Nizami Gəncəvi prospektlərinin kəsişməsi; 13 saylı tam orta məktəbə aparan bir neçə köməkçi yol; Sevinc qəsəbəsinin 10-cu küçəsi; Abbas Səhhət küçəsi; Natavan qəsəbəsindəki Milli Qəhrəman Ənvər Arazovun adını daşıyan küçə; Əlişir Nəvai küçəsi; Bayan küçəsi və s. Sıralamanı hələ davam etdirmək də olardı. Amma bunda bir fayda görmürük. Çünki eyni problemi bəzən 2-3 dəfə saytımızda işıqlandırmışıq, gəl ki, ölü nöqtədən bir tərpəniş olmayıb. Sakinlər isə ümidlə yaşayırlar. Çünki ümid sonuncu ölür. Gəncə rəhbərliyinin şəhər yollarına göstərdiyi biganəliksə belə bir ehtimal irəli sürməyə əsas verir: ümid ölsə-ölsə, bərbad yolların birindəki qəzada canını tapşıracaq.
Gözdən pərdə asmaq “ustalığı”
Yollardan söz düşmüşkən onu da qeyd edək ki, bəzən şəhərin başbilənləri onlara ünvanlanan iradlardan sanki bezirlər, usanırlar, təngə gəlirlər. Və… Düşünürsünüz ki, yolları təmir edirlər? Qətiyyən! Yol təmirini imitasiya edirlər, gözdən pərdə asırlar, vəssalam. Nümunələr də “N” qədər. Biz yenə də bəzilərini misal gətirməklə kifayətlənəcəyik.
Bursa küçəsində təmir işlərinə başlanılıb: asfalt çəkilib, yolun kənarlarına yeni bordürlər düzülüb. Lakin naməlum səbəblərdən görülən işlər yarımçıq buraxılıb. 600 metr uzunluğu olan küçənin təxminən 40 metri, Mircəlal Paşayev küçəsi ilə kəsişməyədək olan hissəsi, olduğu kimi – asfaltsız və baxımsız halda qalıb. Hələ bu azmış kimi, təmir işləri zamanı aidiyyəti qurumun əməkdaşları yeraltı elektrik naqillərini zədələyiblər. Bu səbəbdən ərazi dörd gün işıqlandırılmayıb. Həmçinin bəhs etdiyimiz natamam təmirdən sonra küçənin müxtəlif hissələrində tikinti tullantıları qalıb.
Və ya Natavan qəsəbəsindəki Milli Qəhrəman Ənvər Arazovun adını daşıyan küçə. Problem saytımızda işıqlandırıldıqdan sonra küçədə özünəməxsus “təmir işləri” aparılıb. Belə ki, yoldakı çuxurlar… QUMLA ÖRTÜLÜB!
Adil xan Ziyadxanov küçəsində də eyni hal yaşanıb. Beynəlxalq xəstəxananın yanında avtomobil yolunun səthində iri çuxurların əmələ gəlməsinə dair saytımızda yazı dərc edildikdən sonra aidiyyəti xidmətlərin əməkdaşları əraziyə baxış keçirərək yolun həmin hissəsini təmir etmək əvəzinə sadəcə… TORPAQLAYIBLAR!
Sonra… Amma ehtiyac varmı? Bu halların hamısı bir ata-ananın dünyaya gətirdiyi əkiz övladlar kimi bənzərdirlər. Ən əsas ortaq xüsusiyyətləri isə laqeydlikdir, vəzifəli şəxslərin öz vəzifə borclarına laqeydlikləri.
Gəncədə göydən daş yağır
Gəncənin bitməyən problemləri zəncirinin daha bir halqası isə şəhərdəki binaların təhlükə saçan fasadlarıdır. Elə tikililər var ki, gəncəlilər onların yanından keçəndə sözün əsl mənasında həyatlarını təhlükəyə atırlar. Və bu, şişirtmə deyil. İki il əvvəl Gencexeber.az qırmızı kərpiclə üzlənən fasadlarda çatların əmələ gəlməsi və təhlükə mənbəyi olması barədə məlumat vermişdi. Təbii ki, ənənəyə sadiqlik nümayiş etdirildi, heç bir tədbir görülmədi. Cəmi 1 aydan sonra isə, martın 19-da, evin qırmızı kərpicli üzlüyü ana və uşağın üzərinə düşdü. Hadisə şəhərin Nizami Gəncəvi prospektində baş verdi. Nəticədə hər iki şəxs ağır vəziyyətdə xəstəxanaya çatdılrıldı. Düşünmək olardı ki, şəhər rəhbərliyi, heç olmasa, indi əməli işə başlayacaq. Amma… 2024-cü ilin oktyabrı. Yəni ana və övladının başına gələn hadisədən 2,5 il sonra. Gəncədə kişi yalnız sayıqlığı sayəsində binanın damından düşən fasad qırıntılarından yayınıb və real ölümdən qurtulub. Bu dəfə hadisə Dədə Qorqud küçəsində (Köhnə Yevlax avtovağzalı) yerləşən “Nicat Aptek”in qarşısında baş verib. Belə ki, beşmərtəbəli binanın önündən keçən 1969-cu il təvəllüdlü Arif Nəzərovun üzərinə tikilinin fasadından ayrılan hissələri tökülüb. Kişi son anda bədbəxt hadisədən yayınmağı bacarıb.
Təhlükə saçan fasadlardan biri də Azərbaycan Respublikasının ilk Baş prokuroru İsmət Qayıbovun doğulduğu və qırmızı kərpicdən tikilmiş binada müşahidə olunur. Saytımız bu problemi işıqlandırdıqdan və İsmət Qayıbov küçəsi, 9 ünvanında yerləşən tarixi binanın fasadının və damının zədələnməsini bildirdikdən sonra Gəncə şəhər İcra Hakimiyyəti məsələ ilə bağlı açıqlama verib. Qurumdan redaksiyamıza bildirilib ki, həmin bina xüsusi mülkiyyətdədir. Buna görə də, təmir-bərpa işləri qanunla mülkiyyətçinin vəsaiti hesabına aparılmalıdır: “Məlumat üçün bildiririk ki, “Tarix və mədəniyyət abidələrinin qorunması haqqında” Azərbaycan Respublikası Qanununun VI fəslinin (Mühafizə məqsədilə abidələrdə aparılan inşaat-möhkəmləndirmə və abadlıq işləri) 25-ci maddəsinə (Mühafizə məqsədilə abidələrdə inşaat-möhkəmləndirmə və abadlıq işlərinin aparılması) uyğun olaraq, xüsusi mülkiyyətdə olan abidələrlə əlaqədar inşaat-möhkəmləndirmə və abadlıq işləri müvafiq icra hakimiyyəti orqanının müəyyən etdiyi orqanın (qurumun) razılığı ilə mülkiyyətçinin vəsaiti hesabına aparılır. Gəncə şəhəri, İsmət Qayıbov küçəsi, 9 ünvanında yerləşən sözügedən bina “Yerli əhəmiyyətli tarixi-memarlıq abidəsi” kimi Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsi tərəfindən qeydiyyata alınıb. Bina xüsusi mülkiyyətdədir… Yaranmış vəziyyətə görə Gəncə İH MƏSULİYYƏT DAŞIMIR”. Belə. Bu yanaşma bilirsiniz nəyə bənzəyir? Evdə kanalizasiya borusu zədələnir, otaqları, mətbəxi, dəhlizi nəcasət basır, evin kişisi isə divanda bardaş qurub oturur, nəcislə zəngin suyun üzərində üzən evin əşyalarına baxıb əhli-əyalın ona ünvanladığı “bir çarə et, boğulduq, ay kişi!” nalələrinə sakitcə, təmkinini pozmadan cavab verir: “Məlumat üçün nəzərinizə çatdırım ki, bu məsələyə “Azərsu” baxır, mən heç bir məsuliyyət daşımıram. Lazım bilsələr, gəlib tədbir görəcəklər”. Belə anlaşılır ki, Gəncədə potensial ölüm mənbəyi olan fasadlara hələ uzun illər çarə qılan olmayacaq. Amma belə olmamalıdır axı! Bu şəhər hamımızın göz bəbəyidir, onu hamılıqla qorumalıyıq. Bu, xüsusən də, Qədim Nizami yurdunu qorumağa, abadlaşdırmağa vəzifələnənlərə aiddir. Necə yəni “yaranmış vəziyyətə görə Gəncə İH məsuliyyət daşımır”? Necə yəni “bina xüsusi mülkiyyətdədir”? Bu şəhəri sizə tapşırıblar e! Etimad göstəriblər! Səlahiyyətiniz çatmır – zəhmət çəkin, səlahiyyətli orqanları “tərpədin”, işə cəlb edin. Onlara təsir etmək gücündə deyilsinizsə, yuxarı instansiyalara üz tutun, deyin ki, tabeliyimizdə olan şəhər sakinlərinin başına göydən daş yağır! Yoxsa çəkilin kənara, əlinizi qoyun cibinizə, alibi kimi də “məsuliyyət daşımırıam”ı gözümüzə soxun.
Daha nələr, nələr…
Bu yazını hələ çox uzatmaq olar, çünki Gəncə başbilənlərinin fəaliyyətsizliyi uzun illərdir davam edir və miqyası hər ötən günlə böyüməkdədir. Əhalinin bərbad su təchizatı, küçələrin zibil içində batıb-getməsi, sutkanın qaranlıq saatlarında şəhər küçələrinin zülmətə qərq olması, sıradan çıxan su və kanalizasiya borularının aylarla təmir edilməməsi və bunun nəticəsi kimi küçələrin “okeana” çevrilməsi, Gəncəçayın məcrasının zibilxanalara dönməsi, Dəmiryolçular parkının illərdir zəlil vəziyyətdə qalması, şəhər küçələrində dəstə-dəstə sahibsiz itlərin dolaşması və zaman-zaman sakinlərə hücum etməsi və s. və i.a. Hansını deyəsən, hansını yazasan? Zatən illərdir sakinlər bizə yazırlar, zəng vururlar, üzbəüz dərdlərini söyləyirlər, biz də illərdir yazırıq, yazırıq, yazırıq… Nəticə isə – NƏTİCƏSİZLİK! Və bu yazını əvvəldən oxuyanların arasında hansısa məqamda kimsə təəccübləndimi? Kimsə əsəbi halda monitorun qarşısından “ola bilməz!” hayqırıb ayağa qalxdımı? Kimsə qımışıb “day bunlar ağ elədilər e, yəqin bir az başqa cür olub hadisə” düşündümü? Əlbəttə ki, yox. Çünki Gəncədə yaşayanların, bəlkə də, hamısı bu qeyd edilən konkret halları nəzərdən keçirdikdən sonra “hə, bizim də başımıza belə oyun açmışdılar” söyləyəcəklər.
Bunlara da “dur” deyən tapılar
Sonda isə yuxarıda verdiyimiz vədə əməl etmək, “Nə üçün vəzifəsi şəhəri abadlaşdırmaq, gəncəlilərin normal həyat tərzini təmin etmək olan bu adamlar bu dərəcədə biganədirlər Gəncəyə?” sualına cavab vermək istərdik. Çünki onlar Gəncəni SEVMİRLƏR! Çünki Gəncəni sevənlər heç vaxt onun bu günə düşməsinə yol verməzdilər. Qocaman Xalq şairimiz Nəriman Həsənzadənin gözəl sözləri var: “Gəncə, bilirsiniz ki, Azərbaycançılığın Vətənidir. Azərbaycançılıq Gəncədən başlayıb”. Bax budur Gəncə! Anlayın nəhayət! Bütün Azərbaycanın gözü Gəncədədir. Siz də onu biganəliyinizlə, səriştəsizliyinizlə, məsuliyyətsizliyinizlə bütün Azərbaycanın gözü qarşısında göz dağına çevirmisiniz. Yəqin ki, sizə bir “dur” deyən tapılar bu məmləkətdə. Və bir daha, yekun olaraq, Ulu Öndərimizin sözlərini təkrarlayırıq. Təkrarlayırıq ki, qulağınızda sırğa olsun: “Biz hamımız – harada yaşamasından asılı olmayaraq, hər bir azərbaycanlı – Gəncə ilə, onun qədim və zəngin tarixi ilə fəxr edirik”.
Son günlər bəzi estetik həkimlərin diplomsuz çalışdığı iddia olunur. Onlardan biri də “AzE Estetik Mərkəz” MMC-nin direktoru Ülviyyə İlyasovadır. Belə ki, diplomu olmadığı deyilən Ü.İlyasovanın 14 noyabr tarixində qanunsuz apardığı cərrahi əməliyyat zamanı bir qadın ölüb.
Hər kəsi iki sual düşündürür:
1. Səhiyyə Nazirliyi bununla bağlı tədbir görəcəkmi?
2. Diplomsuz həkimlərə bu icazəni kim, hansı rəsmi qurum verir?
Məsələ ilə bağlı Globalinfo.az Səhiyyə Nazirliyinə sorğu ünvanlayıb.
Nazirlikdən saytımıza bildirilib ki, məsələ cinayət tərkibli olduğundan bu hadisəni hüquq-mühafizə orqanları araşdırır.
Səhiyyə Nazirliyindən aksiya keçirən jurnalistin iddiasına cavab - 20.05.2019, Sputnik Azərbaycan
Bundan başqa, araşdırmaların nəticəsi barədə məlumatları istintaq orqanının açıqlaya biləcəyi qeyd edilib:
“Əlavə olaraq qeyd etmək istərdik ki, cərrahların çalışdığı müəssisələrdə tibbi xidmətin göstərilməsinə nəzarət, Səhiyyə Nazirliyinin müvafiq qurumları tərəfindən plan üzrə, həmçinin daxil olan şikayət və təqdimatlar əsasında digər qurumlarla birlikdə plandankənar yoxlamalar şəklində aparılır. Nəzarət tədbirləri zamanı nöqsanlar aşkar olunduqda müvafiq qanunvericilkdə nəzərdə tutulan qaydada inzibati tənbeh tədbirləri (inzibati cərimə) görülür, təkrar aşkar edildikdə əlavə tədbirlər həyata keçirilir. Xüsusi ağır hallarda, həmçinin ölüm faktları zamanı isə bu məsələ məhkəmə-tibbi ekspertizası və hüquq-mühafizə orqanlarının səlahiyyətinə keçir. Təkcə 2023-cü il ərzində aparılan planlı və plandankənar yoxlamalar əsasında müxtəlif müəssisələrdə 22 inzibati cərimə tətbiq olunub. Cari ilin 10 ayı ərzində yoxlamalar zamanı 15 qayda pozuntuları aşkar olunub və bu haqda inzibati tənbeh tədbirləri görülüb”.
Qurumdan verilən məlumata görə, vətəndaşlar istənilən həkimlə bağlı nazirliyə sorğu ünvanlaya bilərlər:
“Vətəndaşların diqqətinə çatdırmaq istərdik ki, həkimlər beş ildən bir sertifikasiyadan keçirlər. Hər bir pasiyentin müraciət etdiyi həkimin sertifikatını tələb etmək hüququ var. Həkim həmin sertifikatı təqdim etməzsə, o zaman vətəndaş AEM-in “bir pəncərə” sistemi, “qaynar xətt”i (012 596 05 20), aem@pharma.az elektron ünvanı və ya pharma.az saytının MÜRACİƏT bölməsi vasitəsi ilə bizə müraciət edə bilər. Belə olan halda araşdırılma aparılır və lazım gələrsə, plandankənar yoxlama keçirilməsi barədə qərar qəbul edilir. Adı çəkilən həkimlərə qarşı ittihamlarla bağlı AEM-ə rəsmi şikayət təqdim olunduğu təqdirdə tərəfimizdən araşdırma aparmaq barədə qərar qəbul edilə bilər”.
Qeyd edək ki, Səhiyyə Nazirliyinə ünvanladığımız “Diplomsuz həkimlər işlə necə təmin olunur?” sualı cavabsız qalıb.
Xatırladaq ki, sentyabr ayında estetik həkim Ülviyyə İlyasova polis nəzarətinə götürülmüşdü.
Xatırladaq ki, Ülviyyə İlyasovanın pasiyentinin ölümü ilə bağlı məsələni ABŞ-da yaşayan azərbaycanlı jurnalist Qənirə Ataşova ictimailəşdirib. O, özünün sosial şəbəkə hesabında bununla bağlı video müraciət edib. Q.Ataşova bildirib ki, Ülviyyə İlyasovanın qanunsuz apardığı cərrahi əməliyyat daha bir qadını ölümün pəncəsinə atıb. Jurnalistin iddiasına görə, noyabrın 14-də diplomu və tibbi təhsili olmayan Ülviyyə İlyasova qanunsuz şəkildə liposaksiya əməliyyatı həyata keçirib:
“1989-cu il təvəllüdlü, 35 yaşlı Bəsti Hacıyeva bu əməliyyatdan sonra ağır vəziyyətə düşüb. Ev şəraitində müalicə adı altında vəziyyəti daha da pisləşən Bəsti xanım bu gecə “Liv Bona Dea” Hospitalın reanimasiya şöbəsinə, septik-şok diaqnozu ilə yerləşdirilib”.
Q.Ataşova bildirib ki, xəstənin bədənində geniş infeksiya ocaqları aşkarlanıb, qanı zəhərlənib və həyatı ciddi təhlükədədir. Onun sağalıb-sağalmayacağı hələ də məlum deyib.
Jurnalistin sözlərinə görə, bu faciənin ən düşündürücü tərəfi Ülviyyə İlyasovanın heç bir tibbi təhsili olmamasına baxmayaraq, əməliyyat aparmağa davam etməsidir:
“Ona belə əməliyyatları öyrədənlər isə Azərbaycan Tibb Universitetini bitirmiş, özlərinə “həkim” deyən, lakin bu kimi qanunsuz işlərə şərait yaradan şəxslərdir. Bir daha aidiyyəti qurumlara çağırış edirəm. Saxta sertifikatlarla fəaliyyət göstərən və qanunsuz tibbi əməliyyatlar həyata keçirən şəxslərin fəaliyyəti dərhal dayandırılmalıdır. Gənc qadınların həyatını məhv edənlər məsuliyyətə cəlb olunmalıdır. Bu kimi hallara şərait yaradan “həkimlər” də qanun qarşısında cavab verməlidir.
Bəsti Hacıyeva ilə bağlı vəziyyət bir cəmiyyətin vicdan məsələsidir. Gənc qadınların həyatına biganə qalmaq olmaz. Liposaksiya cihazlarını ölkəyə gətirənləri araşdırmaq lazımdır. Savadsız insanlara lazer aparatı kimi cərrahi aparatları paylayanlar kimlərdir?”.
Gəncə Dövlət Tibb Kollecinin Tibb bacısı fakültəsinin şöbə müdiri tələbələrdən rüşvət tələb etməkdə ittiham olunub.
TEREF Oxu.Az-a istinadən xəbər verir ki, tələbələrdən birinin valideyninin sosial şəbəkədə paylaşdığı bu iddia geniş müzakirə mövzusu olub.
İddiada qeyd olunub ki, fakültənin şöbə müdiri Yeganə Abbasova kollecdə tələbələrdən hər bir sərbəst işə, imtahana və kollokviuma görə rüşvət tələb edir.
"Tələbələr nəzəri biliklər ala bilmirlər, şöbə müdiri deyir, havayı yerə oxumayın, pul verməsəniz, keçməyəcəksiniz. Artıq pul çatdıra bilmirik", - deyə valideyn qeyd edib.
Məsələ ilə bağlı Səhiyyə Nazirliyi Gəncə Tibb Kollecinin İctimaiyyətlə əlaqələr şöbəsindən Oxu.Az-ın sorğusuna cavab olaraq bildirilib ki, sözügedən şikayətlə bağlı kollec rəhbərliyinə müraciət daxil olmayıb.
"Bildiririk ki, tibb kollecləri tərəfindən imtahan sessiyaları payız və yaz semestrinin sonunda keçirilir. Gəncə Tibb Kolleci tərəfindən imtahanlar beş nəfərdən ibarət İmtahan Attestasiya Komissiyası tərəfindən aparılır. Bundan əlavə, kollecin xüsusi komissiyası fəaliyyət göstərir ki, bu da valideynlər və tələbələr tərəfindən daxil olan şikayətləri araşdırır və müvafiq tədbir görür.
Qeyd olunan şikayətlə bağlı isə Gəncə Tibb Kollecinə müraciət edilməyib. Şikayətçi anonim olduğundan ittihamların kimə aid olduğunu müəyyənləşdirmək mümkün deyil, buna baxmayaraq, sosial şəbəkələrdə yayılan məlumatla bağlı araşdırma aparılır.
Əlavə olaraq qeyd etmək istərdik ki, anonim şikayətçinin əlində sübutlu faktlar varsa, Azərbaycan Respublikasının Səhiyyə Nazirliyinə və hüquq-mühafizə orqanlarına da müraciət edə bilər", - deyə açıqlamada vurğulanır