Vərdiş – mütəmadi olaraq təkrarlanan və şüuraltı olaraq baş verməyə meylli davranışların rutinidir.

Orta məktəbdə oxuyan vaxtlarımızda riyaziyyat müəllimimizin vərdiş barəsində dərsdə şuluqluq edən şagirdlərə tez-tez çəkdiyi bir misal var idi, "fikir vermə qardaş, tökülmüşlərim öyrəşib".

Amma, böyüdükcə şahidi olduq ki, tökülmüşlərimizin uşaq vaxtı öyrəşdiyi məsumca davranışlarımız, böyüdükcə qorxunc, zərərli vərdişlərə çevrilir.

"Zərərli vərdiş" deyərkən, bu dəfə özümüzə deyil, başqa insanlara zərər verən vərdişlərimizi nəzərdə tuturuq.

Məsələn, rüşvət almaq.

"DogruXeber.az" bildirir ki, bu dəfə rüşvətdən danışmağımıza səbəb hər zaman xüsusi vurğuladığımız kimi Elm və Təhsil Nazirliyinin ən gəlirli bölmələrindən olan daxili nəzarət şöbəsinin müdiri vəzifəsindən Quba rayon icra hakimiyyətinin başçısı vəzifəsinə qədər yüksələn İlqar Mahmudov barəsində əldə etdiyimiz məlumatlardır.

Əvvəla, qısa xatırlatma edək ki, bir neçə müddətdir Quba rayon Ağbil kənd sakinləri Ümid Müzəffərov, Valeh Məmmədov və Əlibəyqışlaq kənd sakini Tərlan Qonaqovun hər iki kəndin keçmiş bələdiyyə sədri Şahin Tağıyev barəsindəki iddialarını silsilə şəkildə yayımlayırıq. Yayımladığımız yazılarda da adıçəkilən şəxslərin şikayətçi olduqları keçmiş bələdiyyə sədri Şahin Tağıyevin qanunazidd əməllərindən icra başçısının da xəbərdar olduğunu vurğulamışıq.

O, Şahin Tağıyev ki, etdiyi bütün qanunsuz işlərə - kəndlərin ərazilərini satmağına, yaxınlarının adına çoxillik icarə müqaviləsi ilə rəsmiləşdirməsinə və sair rəğmən (hər halda kənd sakinlərinin iddiaları belədir) qanun qarşısında mühakimə olunmaq əvəzinə, bu gün də bələdiyyədə işləyir.

Bundan əlavə, Quba rayonu ərazisində aparılan digər qanunsuz işlərə nəzər saldıqda, ərazi üzrə Ekologiya və Təbii Sərvətlər İdarəsinin də Quba rayon icra hakimiyyəti ilə birlik olduğunu düşünmək olar.

O, birlik ki, rayonun meşələrini, tarix boyu minilliklərlə mövcud olan çaylarını tamamilə məhv etmək üzrədir.

Qum, çınqıl biznesi üçün çayların məcrası dağıdılır, kömür biznesi üçün ağaclar məhv edilir, boşaldılmış meşə sahələri də əkin sahəsi kimi satılır. Əlbəttə ki, sosial mediada yayımlanan və bütün ölkənin belə məlumatlı olduğu bu qanun pozuntularından yerli icra hakimiyyətinin, Ekologiya və Təbii Sərvətlər İdarəsinin məlumatsız olması mümkün deyil.

Aşağıdakı görüntülərə diqqətlə baxın.

Vulkan yatağını xatırladan bu ərazi Quba rayonunda Vəlvələçay çayının ərazisidir. Görüntüləri lentə alan şəxsin də dediyi kimi ərazini bu vəziyyətə gətirən hansısa iş adamlarının şəxsi biznes maraqlarıdır, onların maraqlarını təmin edən isə rayon rəhbəri və Ekologiya və Təbii Sərvətlər İdarəsinin maddi maraqlarıdır.

Gördüyünüz kimi çayın ətrafında hektarla ərazi ağır texnikalar vasitəsilə qazılaraq, dağıdılaraq torpağın altından daş, qum çıxarılıb, satış üçün daşınıb aparılır. Vətəndaşın sözlərinə görə orada nəinki Vəlvələçayın ətrafı qazılaraq məcrası dəyişdirilir, ümumiyyətlə otlaq sahələri və yaşıllıq ağacları da məhv edilməklə ekologiyaya ciddi ziyan vurulub.

Qeyd edək ki, əldə etdiyimiz məlumata görə eyni mənzərə Qudyalçayın da Quba rayonundan keçən hissəsində mövcuddur.

İş adamı, icra başçısı və regional Ekologiya İdarəsi rəisi - bu üçlüyün daha çox pul qazanmaq sevdası ekologiyaya ciddi zərər vurur, təsərrüfat və örüş sahələrinə yararsız hala salır.

İlqar Mahmudovun adını bu cür qanunsuz işlərdə birinci qeyd etməyimizə səbəb onun rayon rəhbəri olaraq bütün bunlara susaraq şərait yaratmasıdır.

Halbuki, bütün bunların qarşısını almaq üçün İlqar Mahmudovun aidiyyatı qurumlar qarşısında məsələ qaldırmaq, bu terrorun dərhal dayandırılmasını tələb etmək etmək səlahiyyətləri var. Bu səlahiyyətlərindən buvaxta qədər istifadə etməməsi İlqar Mahmudovun şəxsi maraqlarının olduğunu işarə edir.

Görünür, İlqar Mahmudov yenicə "lövbər saldığı" Quba rayonunda özfəaliyyətini getdikcə daha da genişləndirir. Amma deyəsən bu fəaliyyətə yerli sakinləri qəbul edib, onların problemlərini dinləmək daxil deyil. Bunu da bir neçə gün əvvəl 8 azyaşlı övladını da götürüb Quba rayonunun Gədikqışlaq kəndindən taa Bakıya gəlib prezident administrasiyasının qarşısında aksiya keçirən Qabilə İbrahimovadan eşitmiş olduq. Xanım media nümayəndələri qarşısında təkrar-təkrar "Məni bura gəlməyə vadar edən Quba rayonunun icra başçısıdır. Əlini uzadıb mənə deyir ki, "Hara istəyirsən get şikayət elə"." cümləsini vurğuladı.

Əlqərəz...

Mövzunun əvvəlində rüşvətdən danışıb, ardından İlqar Mahmudov fəaliyyətinə diqqət çəkməkdə sözümüzün canı budur ki, o, hazırda icra başçısı olaraq da vəzifə səlahiyyətlərini maraqlarına uyğun istifadə etməyin yolunu tapıb. Amma, bir müddət əvvəl sosial mediada yayımlanan vətəndaş müraciətini oxuduqda isə anladıq ki, Mahmudov keçmiş işini də kənara qoymayıb. Oradakı nüfuzundan və şəxsi əlaqələrindən bu gün də istifadə etməkdədir.

Hər halda, bu "Nyus.az" saytına rəsmi müraciət ünvanlayan keçmiş təhsil işçisinin iddiasıdır.

Adam müraciətində bildirir ki, ailə dostunun xanımı illərdir müəllimə işləyib. Səhhətindəki ciddi problemlər səbəbilə ötən il keçirilən sertifikasiya imtahanında iştirak etməkdən imtina etmək istəyib, ancaq müəyyən səbəblərdən bu mümkün olmayıb.

Uzun sözün qısası, xanım sonunda imtahanda iştirak edib, lakin lazımi nəticəni toplaya bilməyib. Belə olan halda işindən azad olunub. Bu şəxs də ailə dostuna kömək etmək məqsədilə şəxsi əlaqələrindən istifadə edərək, problemi həll etməyə çalışıb. Bunun üçün də ağlına gələn ad uzun illər təhsil sahəsindən tanıdığı İlqar Mahmudov olub. O, Quba rayonuna gedərək, İlqar Mahmudovla görüşüb, məsələni danışıb. Mahmudov da ona kömək edəcəyini deyib və kiminləsə telefonla danışdıqdan sonra keçmiş həmkarına bir telefon nömrəsi verib ki, "Bakıya get, bu adama zəng elə, onunla görüş, tələb olunan məbləği ona ver, o, kömək edəcək".

Adam, elə də edib. Lakin, bir müddət onu ümidlə gözlətdikdən sonra ondan pulu alan şəxs zəng edib, pulunu geri qaytarıb.

Əvvəla, geri qaytarılmış olsa belə alınan məbləğ rüşvətdir və bu rüşvət qanunun qərarına təsir etmək üçün alınıb. Üstəlik, bu işin ssenarisini yazan Quba kimi hər sezonu, hər qarışı gəlir gətirən bir rayonun rəhbəri - dövlətin məmuru İlqar Mahmudov yazıb.

Belə çıxır ki, Mahmudov üçün keçmiş kimi bildiyimiz işi heç də keçmişdə qalmayıb.

Mövzunu davam etdirəcəyik.

Redaksiamız hər kəsin söz haqqını tanıyır.

DogruXeber.az

El & En memarlıq şirkəti Dövlət Şəhərsalma və Arxitektura Komitəsindən ümumi dəyəri 805,593 manat olan bir neçə müqavilə alıb. Bundan əlavə, Ərazi Tikinti Planlaşdırma Mərkəzi də həmin özəl şirkətdən bir neçə yüz min manat dəyərində layihələr sifariş edib. Bu memarlıq layihələri azad olunmuş ərazilərdə və Azərbaycanın digər bölgələrində görüləcək işləri əhatə edir.

Bu şirkətin həmtəsisçisi isə oğlu ilə birlikdə Dövlət Şəhərsalma və Arxitektura Komitəsinin nəzdindəki İctimai Şuranın rəhbəri və eyni zamanda Memarlar İttifaqının sədri olan Elbay Qasımzadədir.

Facebook-da bu barədə məlumat verən memar və professor Elçin T. Əliyev, Dövlət Şəhərsalma və Arxitektura Komitəsinin İctimai Şurasının sədri ilə bu müqavilələri alan şəxsin eyni adam olduğunu vurğulayıb və bunun özəl şirkətlə dövlət qurumu arasında açıq bir maraq toqquşması olduğunu bildirib.

“O, ölkə prezidentinin vizyonuna uyğun olaraq nəzarət etməli olduğu bir dövlət orqanından sifarişlər alıb. Son üç il ərzində təkcə Qasımzadə Qarabağda bərpa işlərinə nəzarət edən dövlət təşkilatlarından ümumilikdə 1,360,093 manat dəyərində sifarişlər alıb.

2014-cü ildə qəbul edilmiş İctimai Şuralar Haqqında Qanunun məqsədi dövlət qurumlarının fəaliyyətinin şəffaflığını artırmaq, idarəetmədə vətəndaşların iştirakını təmin etmək və cəmiyyətin maraqlarını qorumaq idi. Lakin bu gün İctimai Şuralar – üzvlərinin hamısı nəzarət etməli olduqları dövlət orqanından maddi asılılıqda olan şəxslərdən ibarət olaraq – dövlət qurumlarının qərarlarını legitimləşdirmək üçün istifadə edilir, ictimai nəzarət mexanizmi kimi deyil,” – deyə Əliyev bildirib.

Əliyevin bu məsələ ilə bağlı bir müddət əvvəl Facebook-da paylaşmasından sonra, məsul olduğu www.etender.gov.az saytını idarə edən digər bir dövlət orqanı – Rəqabətə Nəzarət və İstehlak Bazarına Nəzarət Xidməti El & En şirkəti haqqında bütün məlumatları sildiyini iddia edir.

O, həmçinin qeyd edir ki, Qasımzadənin Memarlar İttifaqına 12 illik rəhbərliyinin nəticəsində memarlıq sahəsində dəhşətli korrupsiya səbəbindən ölkədə bir neçə nəfərdən artıq işçisi olan müstəqil memarlıq şirkəti qalmayıb. Bazarda yalnız Memarlar İttifaqının sədri, Şəhərsalma və Memarlıq üzrə Dövlət Komitəsinin rəhbərləri, layihə institutlarının direktorları kimi vəzifədə olan məmurlar tərəfindən yaradılmış böyük qurumlar fəaliyyət göstərir.

Azərbaycan Memarlar İttifaqından Elçin T. Əliyevin tənqidi yazısı ilə bağlı Qasımzadənin fikrini öyrənmək üçün əlaqə saxladıq. Komitə əməkdaşı agentliyin xahişini sədrə çatdıracağını vəd etsə də, yanvarın 10-da Memarlar İttifaqının rəhbəri ilə telefon danışığı baş tutmayıb.

Mənbə: Elçin T. Əliyevin Facebook paylaşımı.


Şəhərsalma və Memarlıq Dövlət Komitəsi nəzarət orqanının rəhbərinə layihələr verirŞəhərsalma və Memarlıq Dövlət Komitəsi nəzarət orqanının rəhbərinə layihələr verir.
Yenixeber.org

“Mən hemofiliyadan əziyyət çəkirəm. Hətta mənim ailə üzvlərimdən belə bu xəstəlikdən həyatını itirən şəxslər olub. Mənim qanımın kodu var və orada faktor 9 çatmadığı üçün bu xəstəlikdən əziyyət çəkirəm. Doğuşdan sonra bunun diaqnozu olur ki, insan qanında faktor 9 göstəricisi nə qədərdir və ona görə də xəstə müalicə və müayinə olunur”.

Bunu Yenicag.az-la söhbətində Qan Donorları Assosiasiyasının sədri Fuad Əskərov deyib.

Hemofiliyadan əziyyət çəkən həmsöhbətimiz hazırda səhv analizin nəticəsində səhhətində yaranan problemləri dilə gətirərək, TƏBİB, Səhiyyə Nazirliyi və İcbari Tibbi Sığorta üzrə Dövlət Agentliyinin sözügedən məsələdə ona qarşı laqeydlik göstərdiyini bildirib.

Onun sözlərinə görə, TƏBİB 2000-ci ildən etibarən, bütün laboratoriya cavablarını inkar edib özü müayinələr keçirdi ki, hemofiliyalılara yeni diaqnoz qoysunlar:

“Belə olan halda, məndə 6.6 diaqnozu qoyuldu. Hansı ki köhnə dövrlərdə mənə 1.6-1.7 diaqnozu qoyulmuşdu. Bu isə dəyişmir, çünki genetik koddur. Mən də yeni analizlər nəticəsində dərman preparatları ilə təmin olundum və nəticədə dərmanlarım kəsildi. Çünki məndəki xəstəliyi yüngül hemofiliya hesab etdilər. Nəticədə, məhdudiyyətlərim çoxaldı, orqanlarımın bir çoxu hərəkət fəaliyyətini itirdi. Hansı ki, çox aktiv biri olmuşam, vaxtilə Himalay və Norveç dağlarına çıxmışam. Yəni düzgün dərman preparatları ilə təmin olunduğum halda sağlam insanlardan heç də fərqli olmamışam.

Amma son illərdə dirsəklərim və çiyinlərimin fəaliyyəti məhdudlaşıb və bu, artıq sağalmayacaq. Ona görə ki, əlilliyin dərəcəsi məndə artıb. 2024-cü ildə öz istəyimlə Moskvaya getdim, çünki bildirirdim ki, dərmanlarımın sayı azdır və mənə vurulan doza qanaxmaları kəsmir. Moskvada mənə diaqnoz qoydular ki, Azərbaycandakı diaqnoz səhv olub. 1.9 diaqnozu mənə qoyuldu ki, bu da xəstəliyimin necə ağır olduğunu göstərir”.

F. Əskərov söyləyib ki, Azərbaycana yaxınlaşandan sonra yenidən yanvar ayında analiz verib:

“Analizimin nəticəsi göstərdi ki, məndə 12%-dir. Yəni mən artıq sağalmışam. Lakin hemofiliya kimi genetik xəstəliklər sağalmır, eləcə də 12% çox gülməlidir, çünki mən ağır formalı hemofiliyadan əziyyət çəkirəm, 12% isə uşaqlarda belə tapılmayan dozadır. Yenidən TƏBİB-in xətti ilə Respublika Klinik Xəstəxanasında analiz verdim və cavab çıxdı ki, məndə 0.3%-dir. Bu, o deməkdir ki, artıq ölüm həddindəyəm. Yəni 1 ayın içərisində 2-3 fərqli cavab gəldi. Bir də 6.6% diaqnozu qoyuldu”.

Həmsöhbətimiz bildirib ki, hazırda ona 3 analiz qoyulub və həkimlər də məəttəl qalıb ki, hansı diaqnozla müalicəni davam etsinlər:

“Çünki istənilən həkim laboratoriyadan gələn cavaba əsaslanaraq, müalicə aparır. Yoxsa ki, həkim müayinəsi ilə qanın tərkibi təyin oluna bilməz. Mən isə acınacaqlı bir haldayam və dərmanları qəbul edirəm. 3 analizin hansına görə dərmanları qəbul etdiyim də bəlli deyil. Həmçinin digər orqanlarım da məhv olur. Hər 3 quruma – TƏBİB, Səhiyyə Nazirliyi və İcbari Tibbi Sığorta üzrə Dövlət Agentliyinə bununla bağlı müraciətlər etməyimə baxmayaraq, nəticəsi yoxdur. Hətta o həddə çatdım ki, ölkə rəhbərliyinə yazdım ki, mənə köməklik edin”.

Assosiasiya rəhbəri onu da dilə gətirib ki, rəsmi qurumlar onun problemini üzərindən atır:

“Səhiyyə Nazirliyi TƏBİB-ə, TƏBİB İcbari Tibbi Sığorta üzrə Dövlət Agentliyinə, onlar da yenidən TƏBİB-ə yönləndirirlər. Nəticədə isə mən istənilən vaxt həyatımı itirə bilərəm. Deməli, laboratoriyada bu problem varsa, onda təkcə Fuad Əskərov üçün bu problem yoxdur. Bu, elə mənim kimi digər vətəndaşlar üçün də böyük problemdir. Bu, elə qlobal mövzudur ki, yalnız mənə verilən 3 cavab səhv ola bilməz. Çünki Azərbaycanda 1.750 nəfərdən çox hemofiliyalı yaşayır. Deməli, onların da həyatları təhlükədədir. Həm də bu qan analizi hər yerdə verilmir. Bunun üçün xüsusi laboratoriya olmalıdır. İrsi qan xəstəlikləri isə 2006-cı ildən dövlət proqramındadır və bu iş üçün milyonlarla pul xərclənilir. Nəticə isə göz qabağındadır ki, pullar heç də yaxşı yerlərə xərclənməyib.

Son 3 ildə mənə mənşəyi bəlli olmayan dərmanlar vurulub. Hazırda qaraciyər sirrozu olmaq təhlükəsi ilə üz-üzəyəm. Çünki qana dərman düzgün vurulmayanda xəstə inhibitor da ola bilər. Artıq məlum olub ki, illərdir dövlət proqramından xərclənən maliyyələr haraya xərclənib ki, biz bu kimi acınacaqlı hala düşdük?”

“AAAF Park” Yaşayış Kompleksinin girişindəki Ümummilli Lider Heydər Əliyevin posterinin və dövlət atributları olan guşənin sökülərək yerində inşa edilən obyektdə bağlı məlumat vermişdik.

Ulusal.az xəbər verir ki, Dövlət Şəhərsalma və Arxitektura Komitəsinin rəsmi icazəsi olmadan tikilən obyektin ümumi sahəsi 700 m(2)-dir.

Artıq iş adamı, qanunsuz inşa edilən obyektin sahibi Vüqar Sədizadə Ulu Öndər Heydər Əliyevin posteri və dövlət atributlarını sökdürərək maşın dayanacağına yerləşdirib.

Digər aidiyyatı qurumlar – FHN-nin Tikintidə Təhlükəsizliyə Nəzarət Dövlət Agentliyi və Abşeron rayon İcra Hakimiyyəti də sözügedən qanunsuz obyektin tikintisinə müdaxilə etməyib.

Həmçinin iddia edilir ki, Abşeron rayon İcra Hakimiyyəti və Dövlət Şəhərsalma və Arxitektura Komitəsinin Abşeron üzrə şöbəsinin bir neçə əməkdaşı məhz bu tikintiyə görə cəzalandırılıb.

Qeyd edək ki, “AAAF Park” Yaşayış Kompleksinin girişində inşa edilən bu obyekt Şəhərsalma və Tikinti Məcəlləsinin məskunlaşma sistemi, zonalaşdırma və ərazi zonaları barədə olan müddəalarını kobud surətdə pozur.

Eyni zamanda Məcəllənin konkret olaraq 4.1-ci maddəsi – ekoloji təhlükəsizlik və ətraf mühitin mühafizəsi də burada tapdanıb.

Azərbaycan Texniki Unversitetində elm qalıb bir yanda, rəhbərlik “oyunbazlıqla” məşğuldur…

Bu iddia Azərbaycan Texniki Unversiteti ilə bağlı redaksiyamıza ünvanlanan müraciətdə yer alır. Aktuallığını nəzərə alıb, müraciəti müəyyən ixtisar və düzəlişlərlə dərc edirik:

Azərbaycan Texniki Unversitetində universitetində ezamiyyətə ancaq universitet rəhbərliyi və onların öz yaxın ətrafı (rektor, özünə yaxın olan prorektorlar, dekanlar, kafedra müdirləri, şöbə müdirləri və ən çoxda “seçilmiş” kadrlar) göndərilir. İş o yerə çatıb ki, ayrı-ayrı qrant layihələri üzrə ezamiyyətə gedənlərə belə mane olmağa çalışılır, orda da öz adamlarını göndərmək istəyirlər.

Sonrada deyirlər elm niyə inkişaf etmir? Elmin inkişafı üçün bir alimi bir beynəlxalq konfransa göndərmək ıazımdır, bir xarici elm mərkəzləri, nümayəndələri ilə münasibət qursun. Ancaq yaxın adamları Universitetin pulları hesabına xaricdə guya təhsil alırlar.

Vilayət Vəliyevin moşenniklik işlərindən biri də, Unversitetin ayrı-ayrı işlərini aldadıb müxtəlif adlar altında unversitetə gətirdiyi müəyyən şəxslərə gördürüb, pulunu ödəməməsi, puldan söhbət açılmasın deyə həmin şəxslərə təzyiq göstərməsidir. Ziyalıları, alimləri yaxşı vəzifə adıyla işə dəvət edirlər, sonra ona kiçik işlərdən başlamaqla unversitetin çatışmazlıqlarını düzəltməyi tapşırırlar. İşlər yerinə yetirildikcə, azğınlaşır, daha böyük xərcli işlər tapşırılır. Sonrada, “işlərin öhdəsindən gələ bilmirsən” deyilərək, işdən azad edirlər. İnsanların “işə” cəlb olunmasında isə hətta prorektorlar, “seçilmiş” dekan və kafedra müdirləri iştirak edirlər. Tam bir qapalı “moşenniklik” sxemi qurulmuşdur. Təzyiq vasitəsi kimi, müxtəlif oyunlar“ qurur və bu çirkin oyunlara Unversitetdəki öz adamlarını cəlb edir. Odur ki, Unversitetdə təhsil, elm qalıb bir yanda, “oyunbazlıqla” məşğuldur. Bu işlərə onun çirkin əməllərinə kölə olmuş prorektorlar, dekanlar məcburən cəlb olunur. Bu adamlarında bəzisini onun rəhbər olduğu elmlər namizədi üzrə ixtisaslaşmış şuranın işi ilə, bəzilərinin fakultəsinin adını dəyişdirərək işdən xaric etməklə təhdid edərək müti vəziyyətə salmışdır. Ona görədə bu adamlar məcburiyyətdən Vilayət Vəliyevin məddahlığı ilə məşğuldurlar.

Vilayət Vəliyevin nə üçün 2024-cü ildə 117 tələbəni qovmasının səbəbini açıqlamaq əvəzinə (Bu işdə Nəqliyyat və logistika dekanı Allahverdi Şərifov və Energetika fakultəsi dekanı Hüseyqulu Quliyev xüsusi fəallıq göstərmişdir) qazilərə qarşı mənfi münasibətini bir az da inkişaf etdirərək, Energetika fakultəsi Elmi Şurasının yarısını bir qazinin imtahanda suallara cavab verə bilməməsinə (axırda bir Elmi Şura üzvü bildirib ki, qazilər lazımi yerdə — cəbhədə öz cavablarını vermişdir), Unversitetin Fizika kafedrasının dosenti Cuməli müəllimin Vilayət Vəliyevin ədalətsiz işlərinə qarşı heç nə edə bilməyəcəyindən danışmışdır. Cuməli müəllimin əsas iradlarından biridə Vilayət Vəliyevin qızını, oğlunu, baldızını və neçə belə qohumlarını unversitetə yığması, lakin tədris-köməkçi heyətini ixtisara salmasıdır. Artıq unversitetin bütün aparıcı alimləri, kafedra müdirləri – prof. Nizami Yusifov, dos.Hikmət Əliyev, prof. Ələkbər Hüseynov hətta iclaslarda belə açıq şəkildə rektorun şərait yaratdığı biabırçı kadr axınının qarşısının alınmasının vacibliyindən danışır.

Cuməli müəllim (fizika kafedrası) bu məsələləri, unveristetin çatışmazlıqların, hərc mərcliyi, qanunsuzluğu, moşennikliyi, dələduzluğu dediyinə görə Vilayət Vəliyev onun qeyd etdiyi qanunsuzluqları “araşdırmaq” üçün bir “komissiya” düzəltdi. Komissiya elə işlədi ki, Cüməli müəllim “borclu”, “günahkar” çıxdı (50 ilin dosenti guya “laboratoriya” dərsi deyə bilmirmiş).

Vilayət Vəliyev bir alimin ard-arda ixtiraları olduğunu, qrant udduğunu bildikdə onu qiymətləndirmək əvəzinə, həmin alimin işlərini aşağılamağa, qiymətdən və həvəsdən salmağa çalışır. Özü isə, ancaq Unversitetdən gələn pulları sağa-sola dağıtmaqdan başqa bir iş görmür. Ödənişli təhsildən gələn milyonlarla pullar (1 tələbənin illik ödənişi 2000-3000 manatdır, unversitetdə ən azı 3000-4000 ödənişli əsaslarla oxuyan tələbə-magistr on milyon ətrafında vəsait alınır) hara xərclənir, necə silinir bilinmir. Bütün qanunsuzluqlara “qanuni” don geyindirmək üçün Unversitetin Elmi Şurasını “Milli Məclisə” çevirib, Əmək məcəlləsinin maddələrinə “düzəlişlər” etdirir.

Cüməli müəllim demişdi ki, necə olur bir ailənin 3 üzvü unversitetdə işləyir? Qızı kimya kafedrasının müəllimidir, ancaq iqtisadiyyat üzrə enerji ixtisaslarında magistr dissertasiyasına rəhbərlik edir. Rəhbərliyi ilə hazırlanan magistr dissertasiyası bir kurs işi səviyyəsində deyil. Hər halda bu qanunsuzluğu, Elm və Təhsil naziri Emin müəllim araşdırılmasına göstəriş verər. Yoxsa, bu elə belə davam edəcək, ildənilə saxta dissertantların sayı artacaq. Keçən il Vilayət Vəliyevin professoru olduğu, kuratorluq etdiyi, iqtisadiyyat kafedrası üzrə 200-dən çox magistr dissertasiyasının pulla işlənildiyi meydana çıxdı. Unversitet bu xəbərlə çalxalandı, ancaq o fakultədən indidə bakalavr qrupları qan ağlayır. Maraqlıdır, dərsi oldu-olmadı bütün müəllimləri unversitetə yığır, görəsən qızı da müəllimdi, o da unversitetə gəlirmi?

Guya kaferdra müdirlərini, dekanları yığıb tapşırır ki, tələbə “tapşırmaq” olmaz, müstəsna hal kimi özüm həll edəcəm, deyir. Halbuki, oğlu qapı-qapı düşüb müəllimlərə adam tapşırırdı. Ölkə rəhbərliyi həmişə bildirmişdir ki, imkanlı məmurların yaxınları özlərini təvözakar aparmalıdır. Rektorun qohumlarının bahalı maşınları unversitet həyətində, yarışlarda olduğu kimi şütüyür.

Ancaq bu hərəkətlər dağıdılan pulların adı tutulmasın, onlar haqqında fikirləşən olmasın və fikri başqa istiqamətə yönəltməkdən başqa bir şey deyil. Bu da ancaq dağıdılan vəsaitlərdən fikri yayındırmaq üçündür.

Onlarla adamı işindən gücündən edib, aldadlb Unversitetə çağırıb, sonrada, müxtəlif bəhanələrlə yolları ayırmaqdan danışır. Özbaşınalıq o qədər artıb ki, veteranlara iş gördürüb, pulunu vermir. Müxtəlif bəhanələrlə, vaxtı uzadır, çox inad edəndə, təzyiqlər göstərir.

Unversitetdə moşenniklik, özbaşınalıq, dələduzluq o qədər artıb ki, belə bir traqikomik hadisə baş verib: Bir vəzifə sahibi ziyalını Vilayət Vəliyev aldadıb, işindən gücündən edib, gətirib universitetdə vəzifə verib. Üstündən bir müddət sonra ona unversitet adına xərcli bir iş tapşırıb, deyib işi yerinə yetir nə xərc çəksən qaytaracağıq. O ziyalıda inanıb 3000-4000 xərc çəkib, işi tamamlayıb, üstündən aylar, illər keçir nəinki pulunu qaytarırlar, hələ adınada söz çıxarırlar ki, guya o ziyalını işə götürəndə o ziyalı pul söz vermişdi, pulu vermir. Bu başıbəlalı ziyalı onu unversitetə gətirən dekanla hər bu Vilayət Vəliyevin özünə münasibətindən danışanda dekan əli ilə, “jest”lə “5” göstərirmiş. Bu ziyalıda deyir bəlkə səhv başa düşür. Ancaq o, onu unversitetə gətirən prorektorun yanında olanda, baxır ki, o da əli ilə jestlə “5” göstərir. Sonra naəlac qalan bu ziyalı unversitetdə çoxdan işləyən biri ilə, bu haqda danışır, həmin şəxsdə ziyalıya vəzifələrin necə satıldığı haqqında məlumat verirlər. Bu ziyalıda 3000-4000 manatının necə batdığını və o “5”liyin də nə qədər olduğunu başa düşür. Nə qədər ziyalıda olsa, dələduzluq və moşenniklikdən başı çıxmasada bilir ki, başa düşür ki, “5”liklər qurtaran deyil lap bu gün 3000-4000 manat kimi sabah “5”liklər “6”lıq, “7”lik olacaq. Nə isə, ziyalılarında ard-arda unversitetdən kənarlaşdırılmasınında sirri belə açılır.

Unversitetdə sadalanan rəzillikləri edən rektorun, prorektorun, dekanların nə şəhidlərimizlə, nə qazilərimizlə nə də veteranlarımızla yaxından-uzaqdan heç bir əlaqəsi yoxdur (bunlar o adamlardandı ki, müxtəlif çirkli əlaqələri ilə yaxınlarını müharibə alovundan kənar saxlamağı bacarıblar). Türklərin bir məsəli yada düşür: “Ölüsü ölməyənə halva şirin gələr”. Odur ki, inanırıq ki, bunların etdikləri göydə Allahın yerdə Möhtərəm Prezidentimizin nəzərindən yayınmayacaq. Allah dövlətimizi, millətimizi başda Ali Komandanımız olmaqla var etsin./yenixeber.org

Zaqatala şəhərinin zibil poliqonu ötən əsrin 60-cı illərində şəhərin şimal-qərb hissəsində salınıb. O zaman bu poliqon şəhərdən xeyli aralı və heç bir təhlükə mənbəyi hesab edilməyən ərazidə yerləşirdi.

Bizim.Media-nın yerli bürosu xəbər verir ki, son illər şəhərin infrasturukturunun böyüməsı xüsusən Şimal-qərb massivinin salınması ilə həmin poliqonun da yerinin dəyişdirilməsini vacib edirdi. Bu barədə ötən il sakinlərin haqlı narazılığı haqda bəhs etmiş, müvafiq qurumların fikir və rəyini dinləmişdik. Bir neçə ay əvvəl Zaqatala şəhərinin yeni zibil poliqonunun yeri müəyyənləşib. Bu isə Mazıx kənd sakinlərini narahat etməyə başlayıb. Əməkdaşımız sakinlərlə görüşüb, şəhər rəhbərliyinin məsələyə münasibətini öyrənib.

Zaqatala şəhərinin yeni inkişaf strukturu poliqonun yerinin dəyişdirilməsini zəruri edən əsas amillərdən biri idi. Təkcə bu ərazidə son beş ildə 200-dən artıq yeni fərdi mənzillər inşa edilib. Məsələyə müvafiq qurumların rəyi və məsləhəti ilə baxılıb və Katex çayın sol sahilində yer ayrılıb. Bu isə Mazıx kənd sakinlərinin ürəyincə deyil.

Mazıx kənd sakin Akif Abdullayev bildirir ki, kənd sakinlərinin ərazidə pay torpaqları var. Yaxınlıqda isə şəhərin zibilini atmaq üçün quyu qazıblar.

Digər kənd sakini İsa Məmməd zibil poliqonuna çevrilən ərazinin onların mal-qara örüş yeri olduğunu bildirir:

“Bizim mal-qara bu əraziyə gəlir. Pay torpaqlarımız da buradadır, örüş yerləri də buralardır. Üstəlik 10-15 km aralıda həyət evləri də var. Biz istəyiik burada deyil, başqa bir meşəlikdə olsun. Çünki zibil poliqonu digər yaşayış məntəqələri üçün də təhlükə yaradır”.

Zaqatala rayon icra hakimiyyəti başçısının şəhər üzrə nümayəndəsi Oruc Qaraxanov isə deyilənlərin əsası olmadığını, müvafiq dövlət orqanlarının əraziyə baxış keçirəndən, dövlət balansında olduğunu tam dəqiqləşdirəndən sonra onların rəyi əsasında tam qanuni bir ərazi seçildiyini diqqətə çatdırır.

“Aidiyyəti dövlət qurumlarının birgə rəyi və razılığı əsasında zibil poliqonu şəhərə nisbətən yaxın, həmin ərazidən başqa bir əraziyə köçürülüb. Hazırda şəhərin zibilləri həmin əraziyə daşınır. Bu gün texniki şərtlərə uyğun olaraq və eyni zamanda təhlükəsizlik tələblərinə qorunmaqla həmin ərazidə işlər görülür. Həmin ərazidə heç bir yaşayış məntəqəsi yoxdur, yəni yaşayış ərazisi deyil. Qeyd etmək istərdim ki, tamamilə məqsədəmüvafiq bir yer seçilib”, - deyən şəhər nümayəndəsi dövlət orqanlarının da məsələyə müsbət rəy bildirdiyini diqqətə çatdırdı.

O.Qaraxanov onu da əlavə edib ki, hazırda poliqonun yerinin dərinləşdirilməsi istiqamətində iş gedir. Eyni zamanda tezliklə zibil poliqonunun ətrafı mühafizəyə alınacaq. Bu da ilk növbədə mal-qaranın təhlükəsizliyi deməkdir. Digər tərəfdən küləkli havalarda müxtəlif kağız parçası və etilen paketlərin kənara dağılmasının qarşısını alacaq. Bununla yanaşı ərazidə nümayəndəliyin daimi işçiləri zibillərin boşaldılmasına və tənzimlənməsinə nəzarət edəcək.

“Azərlotereya” ASC birmənalı şəkildə insanları məhvə sürükləyən, onları maddi nemətlər istehsalından ayırıb, zəngin həyatdan məhrum edən mərc oyunlarına vərdiş təşviq edir.

“Azərlotereya” ASC aşkar formada və sadə yollarla insanları fırıldaq oyunlara cəlb edir.

Küçələrdə, məhəllələrdə, metro çıxışlarında, bazarlarda, dayanacaqlarda, az qala hər tində bucaqda, o cümlədən rayonlarda “Poz, qazan” oyunlarını genişləndirir. İnsanlar da küçələrdə bu mərci gördükcə şirniklənir, həvəslənir, nəticədə hər gün uduzurlar.

“Poz, qazan” və “Misli” ölkənin bütün küçələrini zəbt edib və ölkədə açıq qumarxanaya çevrilib. Avtobus dayanacaqlarında, lotoreya satış nöqtələrində hər gün, xüsusilə kasıb təbəqənin müxtəlif adlar altında təqdim edilən lotereyaları böyük həvəslə almasının şahidi oluruq. Belə lotereyaların satılması sosial problemlərin artdığı və işsizliyin ölkədə hökm sürdüyü dövrə təsadüf etdiyi üçün daha çox insanı cəlb edir.

İnsanlar bu kimi oyunlar nəticəsində var-yoxdan çıxaraq evini, maşınını, həyatını qurban verir və hətta öz ailə üzvünü belə gözə almayaraq qumarda uduzurlar, faciələr baş verir.

Azərbaycanda kazino və qumar çoxdan qadağan olunub. Qumarın ölkədə təşkili ciddi məsuliyyət yaradır. Lakin “Azərlotereya” ASC Bakı küçələrini qumarxanaya çevirib. Şəhərdə total şəkildə “Poz qazan” qumarı gedir.

Paytaxtın hansı nöqtəsinə getsən, qumarla qarşılaşırsan. Küçə ticarətinin, səyyar satışın qadağan edildiyi ölkədə “Azərlotereya” rahatlıqla qumar nöqtələrini qurub. Beləcə, “Azərlotereya” kasıb əhalini qumarla soyub talamaqla məşğuldur.

Bəziləri deyilə bilər ki, "Poz qazan" leqal lotereyadır, dövlət icazə verib, heç kəs də oynamağa məcbur edilmir. Lakin bir məsələ unudulur ki, ASC şəhərin bir çox ünvanlarında bu biznesi təşkil etməklə insanları oynamağa təşviq edir, şirnikləndirir. Halbuki küçədə meyvə-tərəvəz satmağa icazə verilmir, amma “Poz qazan” qumarı oynamaq olar?!

Buna baxmayaraq, küçələrdə qumar şiddətlə gedir, əksəriyyət də bu tələyə düşür, hər gün milyonlar dövr edir və qazanan məhz “Poz qazan” təşkil edənlər olur. Ağıllı adamlar bir şey çox düşündürür, görəsən, küçələrdə kasıb təbəqəni qumara cəlb etmək kimlərə lazımdır?!

Lotereya oyunları güclü inkişaf etmiş, əhalisi varlı və zəngin yaşayan Amerikadan tumuş Avropa ölkələrinə qədər dünyanın hər yerində oynanır. Amma...
Amması o ki, lotoreya oyunlarının prinsipinə görə, qazancın 70-80% uduşa vurulur, yığılan pulun vergisi verilir, 20 faiz qazanc götürülür. “Azərloteriya” ASC isə qazancın 10-15 faizini uduşa buraxır, qalanını isə özü mənimsəyir.

SAVASHMEDİA.az

Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyi tərəfindən idxal inək, idxal qoyun, idxal qoç, keçi, təkə, arı ailəsi və digər malların alınması və özünüməşğulluq layihəsi çərçivəsində təchizatı işlərinin satın alınması məqsədilə 2024-cü il 13 dekabr tarixində keçirilmiş açıq tender proseduruna yekun vurub. Tələblərə uyğun və aşağı qiymət (62 146 514,00 AZN) təqdim etmiş “Agro Best ” Qapalı Səhmdar Cəmiyyətinin təklifinin aksept edilməsi nəzərdə tutulur.
Qeyd edək ki, Dövlət Məşğulluq Agentliyi özünüməşğulluq layihəsi çərçivəsində idxal inək, idxal qoyun, idxal qoç, keçi, təkə, arı ailəsi və digər malların alınması üzrə ” Agro Best ” daha əvvəlki illərdə də bir neçə satınalma müqaviləsi bağlayıb.
Dövlət satınalmalarının vahid internet portalına yerləşdirilmiş məlumatlara görə tərəflər arasında 65.987.525 manat məbləğində 27.04.2022-ci ildə, 4.140.900 manat məbləğində 20.12.2022-ci ildə, 73.574.800 manat məbləğində 16.03.2023-cü ildə, 7.044.690 manat məbləğində 09.10.2023-cü ildə, 66.854.876 manat məbləğində 16.05.2024-cü ildə, 175.538,88 manat məbləğində 07.11.2024-cü ildə satınalma müqavilələri bağlanıb.
Göründüy kimi, Dövlət Məşğulluq Agentliyi son üç ildə “Agro Best ” Qapalı Səhmdar Cəmiyyəti ilə ümumi dəyəri 217778329 manat məbləğində 6 satınalma müqaviləsi bağlayıb. Bağlanılması nəzərdə tutulan bu tenderi də əlavə etək bu 279 924 843 manat dövlət vəsaiti edir.
Bəs bu şirkət haqqında açıq mənbələrdə nə kimi məlumatlar var.
Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “AGRO BEST” (VÖEN:1405235391) Qapalı Səhmdar Cəmiyyətinin 20.08.2020-ci il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 2010.00 manat olan QSC-nin hüquqi ünvanının, BAKI ŞƏHƏRİ NƏSİMİ RAYONU, FEYZULLA QASIMZADƏ, ev 1, m. 48, qanuni təmsilçisi kimi isə İsmayılov Anar Əlif oğlu qeyd olunub.
Reyestrə edilmiş dəyişikliklərdə Məhdud Məsuliyyətli Cəmiyyət kimi dövlət qeydiyyatına alınıb. 22.04.2021-ci ildə təşkilatı hüquqi formasını dəyişərək Qapalı Səhmdar Cəmiyyətinə çevrilib. Təsisçisi və ilk qanuni təmsilçisi Səmədov Taleh Tofiq oğlu olub. Daha sonra Ələkbərov Nahid Kamil oğlu müxtəlif vaxtlarda şirkətə rəhbərlik edib.
Şirkət haqqında açıq mənbələrdə daha nə kimi məlumatlar var?
Elektron medianın 09.10.24-cü ildə yaydığı məlumatda mal-qara satışı ilə məşğul olan “Agro Best” QSC gömrük qaydaları əleyhinə olan inzibati xətaya görə cərimələndiyi, Dövlət Gömrük Komitəsi tərəfindən şirkət barəsində İnzibati Xətalar Məcəlləsinin 485.2-ci (Azərbaycan Respublikasının Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə) maddəsinə əsasən cərimə protokolu tərtib edildiyi bildirilir.
Protokol baxılması üçün Nəsimi Rayon Məhkəməsinə göndərilib. Hakim Babək Pənahovun sədrliyi ilə keçirilən prosesdə qərar elan olunub. Qərara əsasən, şirkətə inzibati tənbeh tətbiq edilib, yəni cərimə kəsilib. Cərimənin məbləği açıqlanmayıb.
Elektron medianın 22 oktyabr 2024-cü ildə mal-qara satışı ilə məşğul olan “Agro Best” QSC gömrük qaydaları əleyhinə olan inzibati xətaya görə cərimələndiyi, Dövlət Gömrük Komitəsi tərəfindən şirkət barəsində İnzibati Xətalar Məcəlləsinin 485.2-ci (Azərbaycan Respublikasının Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə) maddəsinə əsasən cərimə protokolu tərtib edildiyi bildirilir. Protokol baxılması üçün Nəsimi Rayon Məhkəməsinə göndərilib. Hakim Anar İbadzadənin sədrliyi ilə keçirilən prosesdə qərar elan olunub. Qərara əsasən, şirkətə inzibati tənbeh tətbiq edilib, yəni cərimə kəsilib.
Xatırladaq ki, gömrük qaydaları əleyhinə olan inzibati xətaya görə vəzifəli şəxslər 1000 manat məbləğində, hüquqi şəxslər 1500 manat məbləğində cərimə edilir.

Maraqlıdır ki, dövlət qeydiyyatından keçdikdən qısa müddət sonra 300 milyon manata yaxın dəyəri olan tenderlərin qalibinin “Agro Best” QSC-nin nəinki veb-saytı, hətta sosial şəbəkə hesabları belə yoxdur.

Qeyd edək ki, Azərbaycan Respublikası Nazirlər Kabinetinin “Kommersiya təşkilatlarının illik maliyyə hesabatlarının və birləşdirilmiş (konsolidə edilmiş) maliyyə hesabatlarının təqdim edilməsi və dərc edilməsi Qaydaları”nın təsdiq edilməsi haqqında 2010-cu il 27 may tarixli, 97 nömrəli qərarı var. Həmin qərarın 5-ci ( İllik maliyyə hesabatlarının və birləşdirilmiş (konsolidə edilmiş) maliyyə hesabatlarının dərc edilməsi) bəndində göstərilir ki;

5.1. “Dövlət sirri haqqında” və “Kommersiya sirri haqqında” Azərbaycan Respublikası qanunlarının tələbləri nəzərə alınmaqla, ictimai əhəmiyyətli qurumlardan və birləşdirilmiş (konsolidə edilmiş) maliyyə hesabatlarını hazırlayan kommersiya təşkilatlarından (mikro və kiçik sahibkarlıq subyektləri istisna olmaqla), habelə dövlət zəmanəti ilə kredit alan və ya dövlət borcunun xərclənməsi ilə bağlı layihələrdə iştirak edən, həmçinin büdcədən subsidiya, subvensiya, qrant və ya müəyyən səlahiyyətlərin yerinə yetirilməsi ilə bağlı büdcə vəsaiti ayrılan kommersiya təşkilatlarından həmçinin aşağıdakılar tələb olunur:

5.1.1. qurumun internet səhifəsi olduqda, həmin məlumatlardan sərbəst istifadə edilməsini təmin etmək şərtilə, illik maliyyə hesabatının və birləşdirilmiş (konsolidə edilmiş) maliyyə hesabatlarının qanunla müəyyən edilmiş hallarda auditor rəyi ilə birlikdə həmin internet səhifəsində və ya mətbu orqanda dərc olunması;

İnternet axtarış sistemləri üzərindən apardığımız araşdırmada “AGRO BEST” Qapalı Səhmdar Cəmiyyətinin son illər büdcədən müəyyən səlahiyyətlərin yerinə yetirməsinə baxmayaraq illik maliyyə hesabatları barədə heç bir məlumat tapa bilmədik.

Qeyd edək ki, “Dövlət Satınalmaları Haqqında” Azərbaycan Respublikası Qanununun 23-cü maddəsində təchizatçıların uyğunluq göstəriciləri müəyyən edilib. Təchizatçı olaraq “AGRO BEST” QSC Qanunun 23.4.2-ci maddəsində qeyd olunan tələb üzrə – son maliyyə ili üzrə maliyyə hesabatı, habelə azı son 12 (on iki) aylıq dövrü əhatə edən bank dövriyyəsi barədə bank (banklar) tərəfindən verilmiş arayış təqdim etməlidir.

Xatırladaq ki, bir müddət əvvəl Dövlət Məşğulluq Agentliyi tərəfindən özünüməşğulluq proqramı çərçivəsində vətəndaşlara verilən heyvanların arıq, xəstə olması, ölməsi barədə yayılan məlumatlar geniş ictimaiyyət arasında müzakirələrə səbəb olmuşdu. Bununla bağlı sosial şəbəkələrdə və elektron mediada kifayət qədər geniş məlumatlar da var. Amma Dövlət Məşğulluq Agentliyinin son üç ildə üç yüz milyon manat civarında satınalma müqaviləsi bağladığı “Agro Best” QSC-nin adından başqa heç bir məlumat yoxdu.

Aktualinfo.org

Azərbaycan Dövlət Su Ehtiyatları Agentliyinin tabeliyində olan “İri Şəhərlərin Birləşmiş Su Təchizatı Xidməti” publik hüquqi şəxsi mexanika sahəsi üçün lazım olan bolt-qaykalar alır.

Mia.az xəbər verir ki, Xidmət bu məqsədlə “Direct Line Trading” MMC ilə müqavilə bağlamağı planlaşdırır.

Bolt-qaykaların toplam dəyəri 214 155 AZN-dir(pravda).

Xatırladaq ki, Azərbaycan Dövlət Su Ehtiyatları Agentliyi və onun tabeliyində olan digər müəssisələrdə də şübhəli tenderlər artıb.

Məsələn, az əvvəl Agentliyin "Regional Su Meliorasiya Xidməti" publik hüquqi şəxsinin 336 732 manatlıq kombi alması və bu məqsədlə "Buta Supply" MMC ilə imzaladığı müqaviləyə diqqət edək.

Bu şirkətlə anlaşmanın təfərrüatına toxunmadan qeyd edək ki, şirkət dövlət xidmətinə 16 kombi, 1 metrlik 231 ədəd radiator və 3 430 metr boru satacaq və bunun müqabilində 337 min manat alacaq.

Əgər normal kombilərinin birinin 1000-1500 manat olduğunu nəzərə alsaq, 337 min manatın necə əsaslandırılaraq ayrılması maraq doğurmaya bilməz.

Hazırda bu və ya digər məqamlarla yanaşı, Azərbaycan Dövlət Su Ehtiyatları Agentliyinin 5 iri şəhərlə müqayisədə digər şəhər və rayonlarda vəzifəli şəxslər arasında fərqli maaş tətbiqi ilə yanaşı, Abşeron və Şirvandakı yeni qalmaqallarla bağlı araşdırmamız davam edir.

Azərbaycan Dövlət Su Ehtiyatları Agentliyinin sədri Zaur Mikayılovdur. Onun adı indiyə qədər bir çox neqativ iddialarda, o cümlədən iki qudasını yüksək vəzifəyə təyin etməsi kimi xoşagəlməz məsələlərdə hallanıb.

MİA.AZ