Növbəti tədris ili üçün Azərbaycanda tələbə qəbulunun əhəmiyyətli şəkildə artırılması gözlənilir. Sıravi müəllim olaraq, Elm və Təhsil nazirinə, universitet rektorlarına müraciət edirəm:
1. Ali məktəblərin müasir təlim texnologiyalarının dəstəklənməsinə, tələbə sıxlığı, tədris qrafiki, tədris-təcrübə bazaları ilə bağlı normativlərə, təhsilalanların auditoriyadankənar, professor-müəllim heyətinin elmi-pedaqoji, tədqiqat fəaliyyətinə şərait yarada biləcək maddi-texniki bazasının mövcudluğu məsələsi nəzərə alınıbmı?
2. Daha bir ciddi məsələ: pandemiya ilə gələn elektronlaşma, elektron bazalar ali məktəblərdə tədris resurslarına münasibəti dəyişib. Bu gün mobil telefon xüsusilə universitetlərimizdə kitab şəklində dərslikləri, tədris vəsaitlərini, dəftər-qələm və sair yazı vasitələrini tam sıxışdırmaqdadır. Təbii ki, heç kəs elektron bazaların əleyhinə deyil. Lakin telefon və ya kompüterdəki məlumat bazası kitab formasında dərslikləri, yazını aradan çıxarmamalıdır. Bu, ilk növbədə, tələbə gənclərin sağlamlığına (görmə, onurğa, psixi vəziyyət və s.) ciddi ziyan vurur, ikincisi, etibarlılıq, əlçatanlıq, qorunma, müəllif hüquqları və s. cəhətlərdən əlverişli deyil, üçüncüsü, təhsilalanların yazı qabiliyyət, yaddaş və vərdişini sıradan çıxarır.
On bir il bundan əvvəl Azərbaycanda Prezident Fərmanı ilə qəbul olunmuş təhsilin inkişaf "Strategiyası"nda ali məktəblərdə ixtisaslar üzrə əsas dərsliklərin yaradılmasının (qonorar, nəşriyyat və çap ödənişi) maliyyələşdirilməsi nəzərdə tutulmuşdu.
Biz niyə tələbəni dərslikdən, professor-müəllim heyətini öz ixtisası üzrə tədris resursu yazıb qonorar almaq imkanından məhrum edirik. Əgər faydasız layihələrə, eksperimentlərə (bu layihələr etibar edilən adamlar sahə üzrə səriştə və təcrübəsi olan mütəxəssis olsa, layihələri də faydalı eləmək olardı) xərclənən vəsaitin 10 faizi ETN tərəfindən ali məktəblərin tədris resurslarına, universitetlərə qəbul ediləcək on minlərlə gəncin real tədris ehtiyacına xərclənsə, daha faydalı olmazmı?
3. İnşallah, ETN-də, universitetlərdə vəzifələrin etibarlı, sadiq, başı çıxmadığından hər şeyə "hə" deyən adamlara paylanılıb qurtarmasının da bir sonu olarsa, yəqin ki, yuxarıda göstərilən çox vacib məsələlərə də diqqət yetirməyə vaxt qalacaq.
4. Nə qədər ki, Dövlət İmtahan Mərkəzi il boyu ali məktəblərə qəbul prosesi aparmaqla orta təhsil sistemində davamiyyət və qiymətləndirməni iflic edib, heç olmasa, universitetlər əziyyət çəkmədən DİM-in onlara verdiyi tələb kontingentindən öz xeyrinə istifadə etmək şansını dəyərləndirə bilsin. Axı, bu şans olmasaydı, bəzi universitetlər iddia etdikləri tələbə sayını almaya bilərdi.

Filologiya elmləri doktoru,
professor
Telman Vəlixanlı
Bakupost.Az

İBu gün demək olar, bütün saytlarda və sosial şəbəkələrdə sabiq Xarici İşlər naziri Elmar Məmmədyarov və sabiq Mədəniyyət naziri Əbülfəs Qarayevin Cıdır düzündəki görüntüləri yayımlanıb. Kadrlardan görünür ki, ikisinin də necə deyərlər, maşallah, kefi kök, damağı çağ...

Türkiyədən - Bursa və Ankara şəhərlərindən Şuşaya gələn Türkiyə nümayəndə heyətinə təqdim edilən sabiq nazirlərə türkiyəli qonaqların maraq, hörmət dolu səmimi münasibətini anlamaq asandır.

Onlar nə bilsinlər ki, bu nazirlər onların bildiyi əksər türkiyəli nazirlərdən deyil.

Nə bilsinlər ki, onların hər birinin “nazir keçmişi” talanan onlarla milyon dövlət vəsaiti, korrupsiya, rüşvət faktları ilə zəngindir.

Nə bilsinlər ki, onları bu cür yerlərə çəkib gətirən hislər sırasında vətən, torpaq, Qarabağ sevgisi ən son yerlərdədir.

Çünki gerçəkdən vətən sevən olsaydılar, heç də dünyanın ən imkanlı, varlı, sosial təminatlı xalqı olmayan bir xalqın sərvətinə, bərəkətinə, büdcəsinə qənim kəsilməzdilər, onu talamazdılar...

Türkiyəli qonaqlar haradan bilsinlər ki, bu sabiq nazirlərin hər ikisinin rəhbərlik etdikləri nazirliklərdə DTX əməliyyat keçirəndən sonra külli miqdarda büdcə talançılığı, korrupsiya, rüşvət faktları aşkarlanıb. Hər iki nazirlikdə yüksək rütbəli məmurlar, idarə rəisləri, birində isə hətta nazir müavini həbs olunub.

Onlar milyonlarla, on milyonlarla dövlət vəsaitinin “tenderlər”, müxtəlif maliyyə maxinasiyaları və korrupsiya yolu ilə taladıqlarını etiraf ediblər. Azərbaycan reallığından az-çox xəbəri olanlar bu cür cinayətlərin nazirin nəzərindən kənar baş verməsinin mümkünsüz olduğunu, əksinə, məhz onun xeyir-duası ilə baş verdiyini gözəl bilirlər.

Azərbaycan reallığı həm də odur ki, bir nazirliyin az qala yarısı koprrupsiya, rüşvət, talançılıq maddələrilə qısa müddətə də olsa “içəri salınır”, amma nazirlər bu “qovğadan” “aydan-arı, sudan duru” çıxa bilirlər. Onların ən ağır cəzaları isə uzağı vəzifələrindən atılmalarıdır. Sonra da istədikləri yerə gedir, öz bizneslərilə, mülklərilə, var-dövlətlərilə məşğul olurlar. Və heç bir mənəvi diskomfort hissi keçirmədən, əksinə, fəxrlə Cıdır düzünə, Şuşaya qədər gedirlər, oralarda “poz verirlər”. Guya vətəni, torpağı, Qarabağı sevirlər...

Ölkənin ən həlledici, taleyüklü, məsuliyyətli günlərində “evdən işləyən” Məmmədyarov necə “vətənsevərdirsə”, özü 16 il bu ölkənin naziri olsa da, hər iki oğlu illərdir ABŞ-də, özü də milyonlarla dollar qiyməti olan evlərdə yaşayır, nə orduya qatılıblar, nə də Qarabağ uğrunda döyüşüblər. Budur Azərbaycan, Qarabağ sevgisi?

Əbülfəs Qarayev isə başçılıq etdiyi nazirlikdəki talançılığın, büdcə oğurluğunun miqyasına görə “liderlər” sırasında olub. Məmmədyarovun da nazirliyi ondan geri qalmayıb...

“Vətənpərvərlik” talançılıq, rüşvətxorluq deyil. Belə məmurların sadəcə, “halal işləməsi” kifayət edərdi ki, o torpaqlar uğrunda döyüşənlərin, şəhid olanların, yaralananların da haqqı onlara halal edilsin. Amma nə “halal işləyiblər” nə də o torpaqlarda can qoyanların halallığını alıblar...

Cıdır düzü, Şuşa və digər torpaqlarımız uğrunda döyüşənlərin aldığı 80 manat aylıq pensiya Ə.Qarayevin bəlkə də kepkasının qiymətindən qat-qat aşağıdır. Cıdır düzünə gəzməyə, yaylağa, kefə gedən sabiq nazirlərdən fərqli olaraq, həmin vətəndaşlarımız oralara can verib can almağa, şəhid olmağa getmişdilər...

Normal hüquq-mühafizə, məhkəmə sistemi olan ölkələrdə rəhbərlik etdikləri qurumlarda aşkar olunan və rəsmən təsdiqini tapan korrupsiya, talançılıq faktlarından sonra bu adamlar Cıdır düzündə yox, tamamilə başqa ünvanda olmalı idilər. Odur ki, nə Cıdır düzü onlara yaraşır, nə də onlar Cıdır düzünə...



Cəlal Məmmədov

“AzPolitika.info”

Bu gün Qusar Rayon İcra Hakimiyyətinin başçısı Şair Balaşərif oğlu Alxasov vəzifəsindən azad edilib. Musavat.com xəbər verir ki, “Unikal” işdən çıxarılan Şair Alxasovun əmlaklarının siyahısını əldə edib:

– Qusarda evi ilə qarşı-qarşıya yerləşən hotel;

– Qusar şəhəri ərazisində tikdirdiyi 5 mərtəbəli binalar;

– 6 nömrəli məktəbin yanında hotel;

– Nəriman Nərimanov parkında restoran;

– Bayraq meydanının yaxınlığında 2 hotel;

– Meşə fonduna aid olan 27 hektarlıq torpaq sahəsi;

Qeyd edək ki, Şair Alxasov meşə fonduna aid olan 27 hektarlıq torpaq sahəsini 1 sotu 5 min manatdan satırmış.

Xatırladaq ki, bir neçə gün öncə icra başçısı Şair Alxasovun yaxın adamı, bələdiyyə sədri Əlfəddin İbrahimov Qusarda torpaq sahələrini rüşvət qarşılığında qanunsuz satdığına görə cinayət məsuliyyətinə cəlb edilib.

Bakının mərkəzində- metronun “Gənclik” stansiyasının yaxınlığında iri, çoxillik ağacların olduğu yaşıllıq ərazidə park salınır. Parkın içərisində 1930-cu illərin ortalarında tikilmiş tarixi binanın bir hissəsi sökülüb.

Bu barədə sosial şəbəkələrdə də məlumat yayılıb. Memar, sənətşünaslıq üzrə elmlər doktoru, professor Elçin Əliyev bildirib ki, “Antena meydançası” deyilən yerdə park salınır. 2024-cü ilin əvvəlindən ərazinin planlaşdırılması ilə bağlı genişmiqyaslı işlərə başlanılıb.

Lakin parkın ərazisində, Nəsibbəy Yusifbəyli 121 (keçmiş 7-ci Dağlı) ünvanında 1930-cu illərin ortalarında tikilmiş memarlıq abidəsi – “Radio Mərkəzi”nin binası yerləşir. Bugünə qədər binanın içərisində Sovet İttifaqı dövründə Qərb radiostansiyalarının siqnallarını dəf etmək üçün istifadə olunan unikal avadanlıqlar qalır.

Mütəxəssislərin fikrincə, tarixi bina yaxşı texniki vəziyyətdədir. Binanın fasadında o memarlıq dövrünün çoxsaylı ornamentləri var – Bakıda belə orijinal tikililər çox az qalıb.

Yaşlı sakinlər deyirlər ki, həmin ərazidən istirahət mərkəzi kimi istifadə edilib. Bir neçə ildir metronun yaxınlığındakı əksər yaşıllıq zonasındakı Eldar şamı ağacları kütləvi qurumağa başlayıb. İndi də bu ərazidə tikinti gedir, sözügedən binanın bir hissəsi dağıdılıb.


“Gənclik ərazisində salınan parklarda kafelər, çayxanalar açılır. Bu bina tarixi abidə kimi qorunmalıdır. Əgər səs-küy olmasaydı, yəqin ki, söküntü davam edəcəkdi”, – 67 yaşlı bakılı Nazim Əzizov Meydan TV-yə deyib.

Binanın varlığından çoxu xəbərsizdir. Amma Əzizov hesab edir ki, parkın tikintisinə icazə verənlər binanın varlığından xəbərdardılar.

Başqa bir sakin də deyib ki, sosial şəbəkələrdə və mətbuatda bu barədə yazılandan sonra söküntü işi dayandırılıb.

Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən Report”a bildiriblər ki, bina tarix-mədəniyyət abidələrinin reyestrinə daxil deyil. Dövlət Xidməti binanın reyestrə daxil edilməsinin nəzərdən keçiriləcəyini elan edib.

Dövlət Şəhərsalma və Arxitektura Komitəsindən isə bildirilib ki, komitə yanında Bakı Şəhər Memarlıq və Şəhərsalma Baş İdarəsinin əməkdaşları tərəfindən Nəsibbəy Yusifbəyli küçəsində 1930-cu illərin ortalarında tikilmiş “Radio Mərkəzi” kimi tanınan binanın yerləşdiyi əraziyə baxış keçirilib və binanın bəzi hissələrində söküntü faktı aşkarlanıb.

Sözügedən ünvanda aparılan işlərin heç bir müvafiq icazəverici sənədləri olmadığından və qeyd edilən binanın fasadındakı memarlıq elementlərinin mövcudluğunu nəzərə alaraq, Bakı Şəhər Memarlıq və Şəhərsalma Baş İdarəsi tərəfindən işlər dayandırılıb və müvafiq tədbirlərin görülməsi üçün aidiyyəti qurumlara müraciət edilib.

Xaricdəki bloqerlərin Azərbaycanda hansısa məmurlardan böyük məbləğdə pul alması ilə bağlı iddialar böyüyür.

TEREF Lent.az-a istinadən xəbər verir ki, bir müddət əvvəl Avropada yaşayan siyasi fəal Surxan Lətifov belə bir status paylaşıb: “Deməli, Almaniya prokurorluğu konkret faktlar əsasında Almaniyada olan azərbaycanlı bloqerlərə qarşı araşdırma başladıb. Məsələ bundadır ki, həmin bloqerlər müxtəlif dövrlərdə şantaj yolu ilə azərbaycanlı məmurlardan 500 min avro pul alıblar. Pulvermə prosesi isə Azərbaycan DTX tərəfindən sübutlarla rəsmiləşdirilib Almaniya prokurorluğuna verilib. …İndi prokurorluğa çağırılıb bir-bir ifadə verirlər. Daha çox hansısa Tural Sadıqlı adlı bloqerin adı hallanır”.

Surxan Lətifovun bu açıqlamasından bir neçə gün sonra isə hazırda Almaniyada yaşayan azərbaycanlı jurnalist Əfqan Muxtarlı feysbuk sosial şəbəkəsində status yazıb. O, konkret sübut olmadığını qeyd edərək, ad çəkmək istəməyib, lakin xaricdə yaşayan azərbaycanlı bloqerlərin Azərbaycan məmurlarını şantaj edərək pul alması barədə məlumatlar eşitdiyini və Almaniya prokurorluğuna sorğu göndərdiyini yazıb.

“Azərbaycan hakimiyyəti Avropda olan bəzi bloqerlərin şantaj yolu ilə məmurlardan pul aldıqları barədə sübutları Almaniya və digər ölkələrin prokurorluqlarına təqdim edib. Hətta deyilənə görə bir bloqer şantaj yolu ilə 270 min avro alıb. Əlimdə konkret sənədlər olmadığı üçün ad çəkə bilmirəm. Amma Almaniya prokurorluğuna göndərilən sorğuma cavab gələn kimi dərc edəcəm. Bax, şantaj etmək yalnız səhv deyil, həm də cinayətdir. Xüsüsən Avropada bunu bağışlamırlar. Həm də inanmıram ki, Almaniya bazarlığa gedə, Azərbaycan höküməti iddiadan geri çəkilsə, almanlar işi bağlaya. Bağlamazlar” – deyə, Muxtarlı qeyd edib.

Tural Sadıqlı isə sahibi olduğu youtube kanalında bu iddiaları yalan adlandırıb, əksinə ona qarşı belə iddia səsləndirənlərin “Azərbaycan hakimiyyəti tərəfindən Avropa yerləşdirildiklərini” qeyd edib.

Əfqan Muxtarlı növbəti statusunda Tural Sadıqlının öz statusuna istinad edərək onu Azərbaycanın hakimiyyət nümayəndələri ilə iş birliyində ittiham edib.

Qeyd edək ki, sosial şəbəkə platformalarında Azərbaycan hakimiyyəti ilə bağlı sərt və ağır təhqirlərdən ibarət ritorikadan istifadə edən Tural Sadıqlı bu günlərdə xarici medianın “azərbaycanlı bloqerlərdən istifadə etdiyini” əsas gətirərək onlarla əməkdaşlıqdan artıq imtina etdiyini qeyd edən status yazıb.

“Mənim xaricdə belə etirazım varsa, düşünürəm ki, bu etirazı öz dilimizdə, öz hakimiyyət nümayəndəmizə etməliyəm və edirəm. Baxmayaraq ki, alman, ingilis, rus, ərəb dillərində danışıram və bunu etməyə imkanlarım da var. Əvvəllər bunu etmişəm. Lakin düşünürəm ki, səhv etmişəm”, – deyə Tural Sadıqlı qeyd edib.

Əfqan Muxtarlı isə qeyd edib ki, Tural Sadıqlının bu ritorika dəyişikliyi Almaniya prokurorluğunun “bildiyi söhbətlərlə” bağlıdır: “İndi alman prokurorluğu da bilir söhbəti. Və alman prokurorluğu çox söhbətləri bildiyi üçün Tural problemləri “öz hakimiyyətimizin nümayəndəsi ilə etməliyəm və edirəm” deyir”.

Tural Sadıqlı isə ikinci videomüraciətində onunla bağlı Azərbaycanda axtarış elan edilməsi səbəbindən Almaniyada 2015-2016-cı illərdə “mühacir statusunun ləğv edilərək Azərbaycana təhvilvermə” ilə bağlı məhkəmə prosesləri keçirildiyini xatırladıb. Lakin həmin vaxt məhkəmə onun mühacir statusunun davam etməsinə qərar verib.

Əfqan Muxtarlının Almaniya prokurorluğuna sorğu göndərməklə bağlı anonsu Tural Sadıqlı tərəfindən “donosbazlıq” (!) kimi qiymətləndirilib. O, eyni zamanda Azərbaycana qaytarılması məsələsində Müsavat başqanı İsa Qəmbərin və AXCP sədri Əli Kəriminin də maraqlı olduğunu bildirib.

Əfqan Muxtarlı isə bir daha Almaniya prokurorluğuna sorğu göndərdiyini yazıb və bəzi faktlar açıqlayıb: “Bəli, Almaniya prokurorluğuna sorgu göndərərək Azərbaycandan olan bloqerlərə cinayət işinin açılması barədə mətbuatda gedən məlumatlara, eyni zamanda cinayət işi üzrə ifadə verən adamların açıqlamalarına rəsmi şəkildə münasibət bildirmələrini istəmişəm. Tural, bu sorğu səni niyə narahat edir? Burada söhbət məsələyə aydınlıq gətirməkdən gedir, hər hansı məlumat verməkdən yox. Şəxsən mən Turala qarşı cinayət işinin qaldırıldığını deməmişəm. Çünki məndə məlumat olsa da, rəsmi sənəd yoxdur. Və rəsmi sənəd olmasa, kimsənin də adını çəkən deyiləm. Mən Tural deyiləm ki, faktsız adamlar barədə danışım, yazım. Hələ onu demirəm ki, istintaqdan qaçıb gedənlər var. Almaniyada qala bilmirlər, Bakıya dönmək üçün də razılıq vermirlər”.

Əfqan Muxtarlının sərt ifadələrlə yazdığı statusundan görünən odur ki, “müxalifətçi bloqer adı ilə kimisə şantaj edib pul alanlar”, məmurlardan faktları gizlətmək müqabilində pul alanlar, “Azərbaycanda məmurların etdiyi özbaşınalıqlar barədə faktları bloqerə verən vətəndaşın adını 5-10 min avroya görə” həmin məmurlara deyənlər olub.

“Mən Turalın məlum statusuna görə tənqid etmişəm. Onun pul alıb-almaması ilə bağlı heç nə deməmişəm”, – deyə Muxtarlı yazıb.

Almaniya Prokurorluğundan isə saytın yazılı sorğusuna cavab olaraq Federal Ədalət Məhkəməsinin dövlət ittihamçısı, mətbuat katibinin müavini Michael Ramöllerin imzası ilə belə bir cavab verilib: “Federal Prokurorluq həbslər və ittiham aktları halında apardığı istintaq prosedurları barədə mütəmadi olaraq ictimaiyyətə məlumat verir. Bundan başqa, Federal Prokurorluq, ümumiyyətlə, konkret araşdırmalar apardığını və ya konkret məsələ ilə məşğul olduğunu açıqlamır. Bununla belə, qeyd etmək istərdim ki, Federal Prokurorluq federal orqan olaraq yalnız dövlət təhlükəsizliyi sahəsində cinayət təqibini həyata keçirir. Əks halda, məsuliyyət federal əyalətlərin prokurorluq orqanlarının üzərinə düşür. Bu, şantaj iddialarına da aiddir”.

Sadıqlı kimlərlə görüşüb?

Əfqan Muxtarlının Tural Sadıqlı ilə bağlı yazdığı sonuncu statusunda diqqətçəkən məqam isə Sadıqlının görüşdüyü və əməkdaşlıq etdiyi məmurlarla bağlıdr: “Tural statusunda iddia edir ki, xaricilərə Azərbaycanda baş verənlər barədə danışmaq olmaz, xaricilərin konfransında iştirak etmək olmaz. Əvvələr edibmiş və peşman olub. Həmin statusda da qeyd edib ki, mən problemləri öz hakimiyyətimizlə, öz məmurumuzla müzakirə edirəm.

Bax, sual verirəm, sən, Tural Avropada hansı Azərbaycan məmuru ilə görüşüb dərdləşirsən? Kimdir o məmur? Nə danışırsız? Müxalifətci, özü də Əliyevi sərt şəkildə tənqid və təhqir edən birini nə əcəb Azərbaycan məmuru qəbul edir? Nəyin müqabilində? Mən belə bir status yazsaydım, satqın elan edilmişdim. Tural və onun kimiləri yeri göyü dağıdırdı. Mən Turala satqın-filan demirəm. Qoy camaat özü qiymət versin. Sadəcə yuxarıdakı suallara cavab yazsın bəsdir”.

Muxtarlı Turalın atası Əlövsət Sadıqlının Prezident Aparatında görüşüb Turalın məsələsini müzakirə etmək istədiyini yazdığını da xatırladıb.

Əlövsət Sadıqlı sayta açıqlamasında Prezident Administrasiyasına görüşə getdiyini təsdiqləyib. O, hüquq-mühafizə orqanları ilə iş şöbəsinin əməkdaşları ilə görüşdüyünü bildirib: “Bəli, oğluma görə Prezident Administrasiyasına getmişəm. Ora getməkdə məqsədim oğlumun təhlükəsizliyi ilə bağlı olub. Hüquq-mühafizə orqanları ilə iş şöbəsinin əməkdaşları məni qəbul etdilər və dinlədilər”.

Məmurları şantaj və məmurların şantajı

Yaxın tarixə nəzər yetirəndə bəzi azərbaycanlı məmurların mediadan “rəqib hesab etdikləri digər məmurlar”a qarşı qara piar aparmaq üçün istifadə etdiyini xatırlaya bilirik. Məmurlar mediadan istifadə edərək digər məmurlara qarşı şantaj kampaniyası aparır, onların özləri və ailə üzvləri ilə bağlı məlumatları mediaya sızdırırdılar.

Köhnələrdən daha çox Ramiz Mehdiyev, Eldar Həsənov və Eldar Mahmudovun bu məsələdə həvəsli olduqlarını xatırlatmaq mümkündür. Onlar yaratdıqları, sonradan isə “reket media” adı qoyduqları kiçikçaplı media orqanlarının (əvvəl qəzet, sonra isə saytlar) vasitəsilə maraqlarına uyğun olmayan məmurlar barədə məlumatlar yaradıb yayırdılar. Bu kiçikçaplı qəzet və saytlarda yayılmış “ilkin informasiya” daha sonra daha tirajlı media ilə “istinad mədəniyyəti nümayiş etdirilərək” tirajlanılır, ictimai müzakirəyə nail olunur və gündəlik hesabatlarda əksini tapırdı.

Son 3-4 ildə ölkə daxilində media ilə bağlı yaradılmış şəffaf mühit, medianın məmurlardan asılılığının əhəmiyyətli dərəcədə azalması yerli media üzərindən bu cür “əməliyyatlar qurmağa” imkan vermir. Ara-sıra baş verən epizodik halların qarşısı isə alınır, bunu edənlər asanlıqla ifşa olunurlar.

Yeni üsul isə xaricdə məlumatları gizlədilmiş domenlər və sosial mediada yaradılmış səhifələr vasitəsilə informasiyaların tirajlanmasıdır. Tural Sadıqlı və Əfqan Muxtarlı arasındakı mübahisələri diqqətlə izlədikdə isə prosesə xaricdəki bloqerlərin də cəlb edildiyini deməyə əsas verir.

Diqqətli izləyici xaricdəki bloqerlərin, o cümlədən xaricdəki “media orqanı” adı ilə fəaliyyət göstərən “TV-lərin” yazdığı “araşdırmaları” izlədikdə xeyli məqsədli sızdırılan məlumatın olduğunu görə bilir.

O zaman sual ortaya çıxır: Bu “TV” və bloqerlərin məqsədi, ritorikası, apardığı qara piar kampaniyası göz önündədir. Onlar, belə desək, öz məqsədləri üçün işlərini yerinə yetirirlər. Yaxşı, bəs onlarla əməkdaşlıq edən məmurlar və ya məmurların nümayəndələri kimlərdir? Bu məlumatlar hansı üsullarla ötürülür?

Suallar açıq qalır…

2008-ci ildə “Bank Respublika”ya 5 min manat əmanət yatıran Bakı şəhər sakini Cəfərov Tahir Tağı oğlu bankdan pulunu geri ala bilmir. “Bank Respublika”dan ona bildiriblər ki, pulu batıb.

Tribunainfo.az xəbər verir ki, şikayətçi tanınmış rəssam-fotoqraf, prezidentlərin rəssam-fotoqrafı olan Tahir Cəfərovdur. O bildirib ki, 16 il əvvəl banka yatırdığı pul səbəbsiz yerə batıb:

“ “Bank Respublika”ya 2008-ci ildə 5 min manat pul qoymuşam. Üstündən 16 il keçib. İndi bankdan pulumu ala bilmirəm. Mənə deyirlər ki, bu pul batıb gedib. Pulu qoyanda mənə “Bank Respublika”dan əmanət kutabçası da verdilər və indiyə qədər də onu saxlamışam. İndi gətirib özlərinə verirəm. Deyirlər, pul yoxdur, batıb.
Mərkəzi Banka da müraciət etmişəm. Ordan da deyirlər ki, pulunuz batıb. Deyirlər, gərək vaxtında gəlib pulunuzu alardınız. Gəlib aparmamısız deyə pul batıb. Deyirəm, mənə bu barədə bildiriş verməmisiniz ki, gəl pulunu apar. Əgər belədirsə, pulun bankdan qalması təhlükəlidirsə, qadağandırsa, mən gedib başqa banka qoyardım pulumu. Bu müddət ərzində qoyduğum pulun faizini də almamışam.
Pulum etibarlı yerdə qalsın deyə qoymuşdum banka ki, qocalanda lazım olar. İndi qocalımışam və bu pul mənə lazımdır. Mən bankdan öz pulumu almaq istəyirəm, borc götürmürəm, pul istəmirəm ki. Öz pulumu geri istəyirəm. Ancaq ala bilmirəm. Səbəb də odur ki, mən guya pulumu gec götürdüyüm üçün pulum batıb”.