 |
|
|
Ermənistanda siyasi böhran kəskinləşir, müxalifət Nikol Paşinyan hökumətini “Qarabağı Azərbaycana satmaqda” ittiham edərək əhalini hakim qüvvəni iqtidardan uzaqlaşdırmağa çağırır. Paytaxt İrəvanda bir neçə gündür davam edən aksiyalar kütləviliyi təmin edə bilməyib, amma dünən axşam vəziyyət bir qədər dəyişib. “Respublika” meydanına 10 minə yaxın etirazçı toplaşıb.
Paşinyan bəyan edib ki, istefa vermək niyyəti yoxdur, hakimiyyət legitimdir və çevriliş cəhdlərinə adekvat reaksiya veriləcək. Artıq mitinq təşkilatçılarının həbsinə başlanılıb, eks-prezident Robert Koçaryanın oğlu, “Ermənistan” fraksiyasından olan deputat Tadevos Adevisyan həbs edilib, çoxlu sayda fəallar da nəzarət altına alınıb. Paytaxtda bütün küçə və prospektlər bağlıdır, çoxminlik polis qüvvələri İrəvanın baş meydanında hakimiyyətdən əmr gözləyir...
Müxalifətin əsas şüarını onlardan əvvəl başda Prezident Vladimir Putin olmaqla Rusiya rəsmiləri səsləndirib və daha uca səslə səsləndirməyə davam edirlər. Dünən xarici işlər naziri Sergey Lavrov da bildirdi ki, Ermənistan Qarabağı Azərbaycanın tərkib hissəsi kimi tanımaqla Rusiyanı fakt qarşısında qoyub. O, deyir ki, Paşinyan hökuməti regiona xarici qüvvələri cəlb etməklə destablizasiya yardır. Rusiya bu cəhdlərə qarşıdır...
Bundan əvvəl Rusiya XİN-nin rəsmi nümayəndəsi Mariya Zaxarovanın anti-Paşinyan bəyanatlarını xatırlayaq. Onların birində Zaxarova demişdi ki, “Rusiyada yaşayan vətənpərvər ermənilərin sayı Ermənistandakı ermənilərin sayından çoxdur”. Yəni lazım gəlsə, onları da səfərbər edib, qərbpərəst Paşinyanı hakimiyyətdən qovacağıq. Artıq Rusiyadan Ermənistana kütləvi axın başlayıb, dünən İrəvanda etiraz aksiyasının böyüməsində kənardan gələnlərin sayı əhəmiyyətli rol oynayıb.
Ermənistana Qarabağdan da gedənlərin sayı çoxalıb. Bu gün səhər elan olunan rəqəmlər bir neçə mini ifadə edirdi. Azərbaycan Dövlət Təhlükəsizliyi Xidməti onlara müraciət edərək təhlükəsizliklərinə tam qarantiya olduğunu, qalıb Azərbaycan qanunları ilə yaşamağa davam etməkdə heç bir problem olmadığını bildirmişdi.
Bu çağırışa əməl edəcəkləri inandırıcı görünmür, çünki Avropaya, ABŞ-a köçmək üçün “unikal” şans yaranıb. Köçəri millət kimi ad çıxarmış ermənilərin çoxu yəqin bu şansı qaçırmaz. Bu, həm də Azərbaycana qarşı oynanılan sonuncu “etnik təmizləmə” kartıdır. Həm Ermənistan, həm də Qərbdə onları dəstəkləyən dairələr artıq bu barədə danışmağa başlayıblar.
Ermənilərin Qarabağı tərk etməsi Rusiyanın işinə yarayır, çünki onlar Ermənistan müxalifətinin şüarlarını dəstəkləyən kütlədir, İrəvanın küçə və meydanlarında öz yerlərini tutacaqlar. Bu, Paşinyan iqtidarını devirmək üçün çox vacib alətdir. Erməni müxalifətinin “yaralı yeri” cəmiyyətdə reputasiyasının pis olmasıdır. Vaxtı ilə ölkəni çapıb-talayan siyasi elitaya hörmət yoxdur, böyük çoxluq onları Ermənistanın indiki ağır durumuna görə də ittiham edir. Qarabağdan, Rusiyadan gəlmiş bir neçə min adam müxalifətin “ayıbını” örtə, Ermənistanda siyasi böhran yarada bilər.
Rusiya müttəfiq ölkədə hakimiyyəti dəyişməkdə qərarlıdır, buna özünün Cənubi Qafqazdakı həyati maraqlarının qarantı kimi baxır. Qərpərəst Paşinyan devrilir, hakimiyyətə Rusiyanın dəstəklədiyi keçmiş siyasi elita qayıdır, Qərbə inteqrasiya prosesi dayanır, Ermənistan Kremldən idarə olunan hərbi, siyasi, iqtisadi birliklərdə qalır. Nəticədə, Rusiya Qafqazda zəifləyən hərbi-siyasi nəzarətini bərpa edir. Qərb regiondan sıxışıdırılıb çıxarılır, Rusiya və İranın sərhədində bufer zona yaranır və təhlükəsizlikləri sığortalanır.
Amma bu planın icra olunması yazıldığı qədər rahat deyil. Çünki;
- Ermənistanda hakimiyyət əhalinin fəal hissəsinin dəstəyinə malikdir, üstəlik, polis, xüsusi xidmət orqanları Paşinyanın nəzarətindədir, ordunun siyasi proseslərə neytrallığı təmin olunub;
- Rəy sorğularına görə, Ermənistanda əhalinin 70 faizə qədəri Rusiyanı dost, müttəfiq ölkə saymır, bu siyahıda Fransa, ABŞ ilk yerləri tutur;
Ətraflı
- Ermənistanda iqtidara alternativ qüvvələrin reytinqi aşağıdır, onlara rəhbərlik edən eks-prezidentlər - Robert Koçaryan, Serj Sarkisyan korrupsioner, talançı imici ilə məşhurdular, onların ətrafına toplaşanlar keçmiş siyasi elitadan faydalananlar, habelə Rusiya xüsusi xidmət orqanları tərəfindən idarə olunan şəxslərdir;
- ABŞ, Fransa Nikol Paşinyanı açıq şəkildə müdafiə edir, onu əllərindəki güclü alətlərlə dəstəkləyir və s.
Bu faktorları nəzərə alaraq, Ermənistanda sui-qəsd, terror, hərbi çevriliş və s. yollarla iqtidarın dəyişdirilməsi ölkəyə ancaq xaos, hərc-mərclik gətirə bilər. Nəticədə, əhali daha sürətlə ölkəni tərk edə, iqtisadiyyat iflic ola, dövlət strukturları deqredasiyaya uğrayaraq sıradan çıxa bilər.
Bəzi təhlilçilər Ermənistanda revanşist qüvvələrin hakimiyyətə qayıtmasını Azərbaycana təhlükə kimi qiymətləndirirlər. Belə əsaslar gətirilir ki, Rusiya dərhal mövqeyini dəyişib yeni iqtidarı dəstəkləyəcək, onun daxildə və regionda mövqelərini gücləndirmək üçün Azərbaycandan nələrisə qoparacaq və s.
Əvvəla, qeyd olunduğu kimi, qiyam yolu ilə hakimiyyət dəyişikliyi Ermənistana sarsıdıcı zərbə vuracaq, belə bir vəziyyətdə olan ölkə Azərbaycan üçün nə qədər təhlükə törədə bilər?
İkincisi, Ukraynada rüsvayçı vəziyyətə düşən Rusiyanın Ermənistanı hansı alətlərlə dəstəkləyib, onu Azərbaycan qarşısında duruş gətirə biləcək ölkəyə çevirə bilər? Moskvanın belə vasitələri varmı, yaxud xaos içində olan, Rusiyaya, onun tör-töküntüsünə nifrət edən cəmiyyəti nə ilə sakitləşdirə bilər? Qarabağı yenidən işğal etməklə? Bu mümkündürmü?
Əlbəttə, bunlar sağlam məntiqə sığmır, reallıqlar tam fərqlidir, Rusiya hətta bütün gücünü səfərbər etsə belə, bu planda heç nəyə nail ola bilməz.
Üçüncüsü, Azərbaycan, onun strateji müttəfiqi olan Türkiyə bütün bunları seyr edəcəkmi? Rusiyanın Cənubi Qafqazda təsirini bərpa eməyə gücü qalacaqmı?
Bunlar ritorik suallardır, əlbəttə, Rusiya Paşinyanı iqtidardan qovub Ermənistanda öz nüfuzunu bərpa etmək istəyir, amma bu vəzifəni 3 ildir yerinə yetirə bilmir. Bu dəfə bütün gücünü qoyub, amma gözlənilən ən real nəticə Ermənistanın Rusiyanın əlində “ölməsidir”..
AzPolitika
SEPAH-ın Hərbi Dəniz Qüvvələrinin komandanı Fars körfəzinin səkkiz sahilyanı dövlətinə regional təhlükəsizliyi təmin etmək üçün dəniz ittifaqı yaratmağı təklif edib.
Axar.az xəbər verir ki, bu barədə “Tasnim” agentliyi məlumat yayıb.
Kontr-admiral Əli Rza Tanqsirinin sözlərinə görə, Körfəz ölkələri səkkiz dövlətin ittifaqı çərçivəsində qarşılıqlı əməkdaşlıq yolu ilə regional təhlükəsizliyi təmin etməyə qadirdir:
“Dəniz ittifaqı region xalqlarının sülh şəraitində yaşamasına kömək edəcək. Kənar şəxslər regionda qanunsuz mövcudluğuna haqq qazandırmaq üçün iranofobiyaya təhrik edirlər. Xarici hərbi qüvvələr silah satmaq və neft ehtiyatlarını talamaq məqsədilə bölgədə yerləşirlər”.
Bir neçə gün öncə, Azərbaycan öz ərazilərində lokal anti-terror əməliyyatlarına başlarkən, Avropa İttifaqının (Aİ) müxtəlif strukturlarında kök atan erməni lobbistləri və “sorosçular”Azərbaycana qarşı qarayaxma kampaniyasına başladılar.
Hətta Aİ-nin 27 dövlət adından Azərbaycanı pisləyən bəyanat da qəbul olunacaqdı. Ancaq Macarıstan nümayəndəsi buna veto qoydu və bəyanat yalnız Aİ nümayəndəsi Cozepp Borelin şəxsi adından yayıldı.
Maraqlıdır ki, Bakıya gələrkən, yüksək səviyyədə olan Aİ-Bakı əlaqələrindən dəm vuran, suverenlikdən və beynəlxalq hüquqdan danışan Aİ ölkələrinin əksəriyyəti, bu məsələdə Macarıstanın göstərdiyi cəsarəti və qətiyyəti göstərə bilmədi.
Hazırda Macarıstanın Türkiyə və Azərbaycana olan dəstəyi, vacib məsələlərdə öz mövqeyini ortaya qoyması Avropadakı erməni lobbisinin kabusuna çevrilib.
Viktor Orban hökuməti Türkiyə və Azərbaycan üçün əhəmiyyətli məsələlərdə stabil xətt yürüdür. Qətiyyən hər hansı manevr etmədən, hər hansı bazarlığa getmədən haqlı olanın yanında yer alır. Nə Yunanıstana, nə də Ermənistana “xoş gəlməyə” çalışmır. Hətta müxətlif Avropa ekspertləri bildirir ki, Fransa prezidenti Makron üçün Avropada ən çox “baş ağrısı” yaradan, onun “Avropa lideri”nə çevrilmək arzusuna “mane olan” siyasətçilərdən biri Ərdoğandır, digəri Urbandır.
Lakin Macarıstanın bu siyasi xətti yalnız bir nəfərlə, bir hökumətlə bağlı deyil. Bu ölkə 2004-cü ildə Aİ-yə üzv olduğundan bəri, Türkiyənin də ittifaqa qoşulması üçün səylər göstərib, sözün yaxşı mənasında “lobbiçilik” edib. İstər sağ, istərsə də sol yönümlü hökumətlər dövründə rəsmi Budapeştin Ankaraya münasibəti bəli olub. Budapeşt hər zaman Brüsseli inandırmağa çalışıb ki, Türkiyənin ittifaq üçün əhəmiyyəti böyükdür. Qeyd edib ki, müxtəlif qərəzli bəyanatlar vermək yerinə, Türkiyənin Avropa regionuna inteqrasiyasına dəstək olmaq lazımdır.
Macarıstan həm də Türk Dövlətləri Təşkilatında müşahidəçi üzvdür. Macarıstan təkcə Türkiyə və Azərbaycanla yox, digər Türk dövlətləri ilə də yüksək səviyyəli əlaqələr saxlayır.
Hələlik, Macarıstan Türk dövlətləri ilə bu qədər yaxın olan ilk və son Avropa ölkəsi olaraq qalır. Elə Avropa İttifaqında “səlib yürüşü” əhvalında olanların qarşısında da Macarıstan durur.
Bu gün Macarıstan erməni lobbisinin hər vəchlə ələ keçirməyə çalışdığı, amma yol tapa bilmədiyi azsaylı ölkələrdəndir. Ramil Səfərovun Azərbaycana ekstradisiyası məsələsində ermənipərəst Avropa siyasətçilərinin qaldırdığı hay-küyünə qarşılıq Budapeştin təmkini və qətiyyəti hamıya məlumdur.
Əlbəttə ki, Azərbaycan və Türkiyə xalqları bu qətiyyəti, bu xarakteri gözdən qaçırmır... Və heç vaxt unutmayacaq.
Rüfət Əhmədzadə
AzPolitika.info
Türkiyə, Rusiya və İranın xarici işlər nazirləri Hakan Fidan, Sergey Lavrov və Hüseyn Əmir-Abdullahian BMT Baş Assambleyasının 78-ci sessiyası çərçivəsində Astana formatında görüş keçiriblər.
Görüşdən bir qədər öncə Rusiya və İran XİN başçıları arasında təkbətək qısa görüş olub. Daha sonra Fidan da onlara qoşulub.
Birgə şəkil çəkdirdikdən sonra nazirlər danışıqları bağlı qapılar arxasında davam etdiriblər. Müzakirələrə BMT Baş katibinin Suriya üzrə xüsusi nümayəndəsi Geyr Pedersen də qoşulub.
Mənbə: TASS
Atlantik Şurasının Avropa Mərkəzinin analitiki Raçel Rizzo yazır ki, Ukrayna prezidenti Vladimir Zelenskinin bu dəfəki Vaşinqton səfərində üzünə yaxşı baxmayıblar. Hətta onun konqresdə çıxış tələbini geri çeviriblər. Bəzi konqresmenlər gələcək karyeralarını düşünüb Zelenski ilə şəkil çəkdirmək belə istəməyiblər.
Ovqat.com-un məlumatına görə, Rizzo Ukrayna prezidentinin 9 ay əvvəlki Vaşinqton səfəri ilə bufədəkini qarşılaşdıraq bildirib:
“Zelenskinin bugünkü Konqres səfəri dekabr ayında etdiyi səfərdən tamamilə fərqli idi. Doqquz ay əvvəl Konqresin birgə iclasında çıxışı gurultulu alqışlarla qarşılandı, bu gün isə Nümayəndələr Palatasının spikeri Kevin Makkarti Ukrayna prezidentinin yenidən çıxış etmək istəyini rədd etdi. Bunun əvəzinə Zelensky Mak-Karti, Nümayəndələr Palatasının bəzi üzvləri və iki partiyalı senator qrupu ilə təkbətək görüşdü. Doqquz ay əvvəl Konqres üzvləri Mavi-Sarı paltar geyindilər və Ukrayna bayraqlarını dalğalandırdılar, ABŞ-ın hərbi səylərinə dəstəyin zəifləməyəcəyini söyləyirdilər. Bu gün isə bəzi konqesmenlər və senatorlar siyasi gələcəklərinə mənfi təsir edər qorxusu ilə Zelensky ilə şəkil çəkdirmək belə, istəmədilər.
Bu gün Konqresin hər iki palatasında ABŞ-ın daha çox silah və pul göndərməli olduğu halda, əks hücumun vəd edilmiş nəticələr vermədiyini, ABŞ-ı Çindən yayındırdığını və ABŞ-ın Ukraynanı uzun müddət dəstəkləyə bilməyəcəyini söyləyənlərin sayı artmışdı. Respublikaçıların partiyadaxili mübarizəsi tam göz qabağındadır: keçən həftə dörd Respublikaçı millət vəkilindən ibarət bir qrup Baydenə məktub yazaraq onu "Ukraynaya qələbə üçün lazım olan raketləri, əsasən ordu taktiki raket sistemlərini və ya ATACMS verməyə" çağırmışdı. Yalnız bir neçə gün sonra, hər iki palatadan bir qrup Respublikaçı Ukraynaya əlavə pul və silah verilməsinə qarşı çıxaraq idarəetmə və büdcə İdarəsinə bir məktub göndərdi”.
Atlantik Şurasının Avrasiya Mərkəzinin daimi elmi işçisi Endryu D ' Anyerinin fikrincə isə səfərdə ən böyük məyusluğu ABŞ-ın Milli Təhlükəsizlik müşaviri Cek Sallivanın Bayden Administrasiyasının Ukraynaya ATACM uzun mənzilli raket sistemlərinin tədarükünü təsdiqləməyəcəyini bildirməsi yaratdı: “Cəmi iki həftə əvvəl dövlət katibi Entoni Blinkenin Kiyevə səfərindən sonra ABŞ yetkiləri bundan imtina etdilər. Ağ Ev rəsmilərinin "olacaq - olmayacaq " oyunu onlara heç bir fayda gətirmir. Kiyev ATACMS-in Rusiyanın işğal olunmuş Krımdakı əməliyyatlarını daha etibarlı şəkildə istifadə etməsini istəyir. Bundan əlavə, amerikalılar Ağ Evin Ukraynaya qalib gəlməsinə necə kömək edəcəyi barədə dəqiq bir plan eşitmək arzusundadırlar, ancaq bunun əvəzinə yalnız "lazım olduğu qədər" eşidirlər və təxirə salınmış vədlər haqqında məruzələrlə qarşılaşırlar. ATACMS-in verilməsinin qorunması, bu payızın sonunda yeni bir konqres yardımı və raket göndərmə qanun layihəsini qəbul etmək üçün uzun bir oyunun bir hissəsi ola bilər, lakin bu elan Pennsilvaniya prospektindəki süründürməçilik və qətiyyətsizliyin narahat bir mənzərəsinə uyğundur”.
Müşahidəçilərin fikrincə, Zelenskinin bu cür soyuq qarşılanması səbəbsiz deyil. ABŞ-ın və Qərb ölkələrinin ayırdığı hərbi yardımın Ukraynadakı korrupsionerlər tərəfindən yeyildiyinə, onlara isə yalan vədlər verildiyinə inanılır. Endryu D ' Anyeri də bu ehtimalı istisna etməyərək yazır:
“Zelenskinin səfəri həm Konqresi, həm də Bayden administrasiyasını korrupsiyanın aradan qaldırılmasına doğru sürətlə irəlilədiyinə əmin etmək məqsədi daşıyırdı, bunu Aleksey Reznikovu Rüstəm Ömərovla əvəz etmək, həmçinin, ölkənin bütün çağırış komissiyalarının rəhbərlərini işdən çıxarmaq qərarı da sübut edir.
Nəhayət, səfərin daxili siyasi boyutu da var; Ukraynada növbəti prezident seçkilərinə cəmi yarım il qalıb və hərbi vəziyyətin davam edib-etməyəcəyinə dair qərar hələ qəbul edilməyib və seçkilər təxirə salınıb”.
NYU YORK – Sentyabrın 21-də BMT Təhlükəsizlik Şurasında brifinq keçirilib. Brifinqin müzakirə mövzusu sentyabrın 19-da Azərbaycanın Qarabağda keçirdiyi hərbi əməliyyat və regiondakı humanitar durum idi.
Albaniyanın sədrlik etdiyi brifinqdə giriş nitqini siyasət və sülh quruculuğu əməliyyatları üzrə BMT baş katibinin köməkçisi Miroslav Cenka etdi. Baş katib köməkçisi sentabrın 19-u iki mülki vətəndaşın və dörd polis əməkdaşının mina partlayışı nəticəsində həlak olmasından sonra Azərbaycanın Qarabağ iqtisadi regionunda “lokal xarakterli anti-terror tədbirləri” başlatdığını bildirib.
Miroslav Cenka hərbi əməliyyatların Laçın və Ağdam yolları ilə humanitar yüklərin daşınmağa başlamasından bir gün sonraya təsadüf etdiyini və bunun regionda olan həssas əhali üçün humanitar fəsadlarının ağır olacağı ilə bağlı narahatlıqları ifadə etdi.
“Hərbi əməliyyatların dayandırılması ilə bağlı dünənki bəyanatı qeyd etməklə bildirmək istəyirik ki, yerdəki vəziyyət qeyri-sabit olaraq qalır. Biz həmçinin Qarabağın yerli sakinlərinin nümayəndələri ilə Azərbaycan hökumətinin ilkin mübadilə üçün bu gün səhər görüşməsini müsbət addım hesab edirik,” Cenka deyib.
BMT nümayəndəsinin çıxışının ardınca BMT Təhlükəsizlik Şurasının üzvləri Fransa, ABŞ, Birləşmiş Krallıq, Çin, Rusiya, o cümlədən, BƏƏ, İsveçrə, Braziliya, Türkiyə və digər ölkələrin elçiləri çıxışlar ediblər.
Çıxış edən nümayəndələrin əksəriyyəti son hərbi əməliyyatın sülh prosesinə zərər vuracağı və yerli əhalinin humanitar durumunu daha da ağırlaşdıracağı ilə bağlı narahatlıqlarını ifadə ediblər.
Brifinqdə çıxış edən ABŞ nümayəndəsi Linda Tomas-Qrinfild ölkəsinin Qarabağdakı hərbi əməliyyatların davam etməsindən narahahat olduğunu və bu addımların dərhal dayandırılmasına çağırdığını bildirdi.
“Böhranın yeganə həlli zorakılığa son qoyulması və davamlı sülhə nail olunmasıdır. Biz Dağlıq Qarabağ sakinlərinin haqlarının və təhlükəsizliyinin Azərbaycanın ictimai bəyanatlarına müvafiq olaraq qorunmasına əminliyin olması üçün beynəlxalq missiyanın əhəmiyyətini vurğulayırıq,” Tomas-Qrinfild deyib.
Daha sonra çıxış üçün Ermənistan xarici işlər naziri Ararat Mirzoyana söz verildi. Mirzoyan çıxışına Azərbaycanın həyata keçirdiyi hərbi əməliyyatın beynəlxalq hüquqa və 2020-ci ilin noyabrında imzalanmış üçtərəfli sazişə zidd olduğunu bildirməklə başladı.
“Bu hücumun intensivliyi və ağırlığı bir şeyi aydın edir – Azərbaycanın niyyəti Dağlıq Qarabağın erməni sakinlərinin etnik təmizləməsini yekunlaşdırmaqdır.”
“Hal-hazırda 200-dən çox insanın öldüyü, 400-dən çox insanın yaralandığı haqda məlumatlar var. Bu rəqəmlərə mülki əhali, qadınlar, uşaqlar da daxildir. Uşaqlar, qadınlar və yaşlı insanlar da daxil olmaqla 10 mindən çox insan evini tərk etməyə və qidasız şəkildə açıq havada qalmağa məcbur olub.”
Ermənistan xarici işlər naziri çıxışı zamanı sentyabrın 20-də əldə edilmiş atəşkəs mətnində qeyd olunmasına baxmayaraq, Azərbaycan ərazisində heç bir Ermənistan qüvvəsinin olmadığını bildirməklə yekunlaşdırdı.
“Daha bir vacib məqamı vurğalamaq istəyirəm. Bəziləriniz öz çıxışlarınızda "tərəflərə" müraciət edirsiniz. Bu yanaşma və bu terminologiya artıq münasib deyil. Artıq münaqişənin tərəfləri yoxdur. Cinayətkar və qurbanlar var.”
Ermənistan xarici işlər nazirindən sonra çıxış üçün söz Azərbaycan xarici işlər naziri Ceyhun Bayramova verildi.
“Ermənistanın müraciəti Azərbaycanın öz suveren ərazisində lokal anti-terror tədbirləri ilə bağlıdır və bu tədbirlər beynəlxalq hüquqa tam uyğundur. Buna görə də Ermənistanın Təhlükəsizlik Şurasını çağırması, BMT nizamnəməsinə ziddir,” Azərbaycan xarici işlər naziri bildirdi.
Hərbi əməliyyatın artıq dayandırıldığını vurğulayan Bayramov əlavə edib ki, BMT Təhlüksəzlik Şurasının brifinqi keçirilən gün rəsmi Bakı artıq Qarabağın erməni sakinləri ilə Azərbaycana reinterqasiya dialoqu çərçivəsində ilk görüşünü keçirib və erməni sakinlərə humanitar dəstək mərkəzi hökümət tərəfindən tezliklə həyata keçiriləcək.
Azərbaycan xarici işlər naziri Ermənistan xarici işlər nazirinin Azərbaycanın üçtərəfli sazişi pozması ilə bağlı dediklərinə toxundu: “Əksinə, bu sazişi pozan ərazidə qoşunlar saxlayan Ermənistandır. Heç bir suveren dövlət öz torpağında bu cür ağır hərbi mövcudluğa göz yummazdı, Azərbaycan da istisna deyil.”
Ceyhun Bayramov bütün çətinliklərə baxmayaraq, Azərbaycanın bərabər və qarşılıqlı hörmət əsasında həqiqi dialoqa və danışıqlara sadiq olduğunu bildirdi: “Bununla yanaşı Azərbaycan ölkənin Qarabağ regionunun etnik erməni sakinlərinə öz konstitusiyasında və müvafiq beynəlxalq insan hüquqları mexanizmlərində qeyd edilən bütün hüquqlar və azadlıqlara zəmanət verir.”
BMT Təhlükəsizlik Şurasının brifinqində son çıxışı Avropa İttifaqının Xarici məsələlər üzrə Ali Nümayəndəsi Cozep Borrell etdi. Borrel çıxışına Qarabağ erməniləri ilə həmrəyliyini ifadə etməklə başladı və əlavə etdi ki, mübahisələrin həlli üçün gücün istifadəsi qəbuledilməzdir.
“Mən aydın şəkildə bildirmək istəyirəm ki, Avropa İttifaqı həm Azərbaycanın, həm də Ermənistanın suverenliyini və ərazi bütövlüyünü dəstəkləyir və biz hər kəsdən eyni mövqeni gözləyirik. Biz Ermənistan və Azərbaycan arasında sülh danışıqlarının bərpasına çağırırıq və bu dialoqda dəstəyimizi davam etdirməyə sadiq olduğumuzu bildiririk,” Borrell bildirdi.
amerikaninsesi
ABŞ Konqresinin Nümayəndələr Palatasının spikeri respublikaçı Kevin Makkarti Ukrayna lideri Volodimir Zelenskinin ABŞ parlamentinin birgə iclasında çıxış etmək istəyini rədd etdiyini bildirib.
“Qafqazinfo” xəbər verir ki, bu haqda “NBC News” məlumat yayıb.
Onun sözlərinə görə, məşğul qanunvericilik həftəsini nəzərə alsaq, bunun üçün vaxt yoxdur.
Makkarti Zelenskinin artıq qanunvericilərlə görüşdüyünü xatırladıb. O əlavə edib ki, Ukrayna lideri Böyük Britaniya və İtaliya hökumət başçılarının 2023-cü ildə səfəri zamanı eyni şəkildə qarşılanıb.
Türkiyə Prezidenti Rəcəb Tayyib Ərdoğan İsrailin Baş naziri Binyamin Netanyahu ilə qarşılıqlı səfərlər barədə razılığa gəldiyini bildirib.
“Report”un məlumatına görə, bu barədə o, Nyu-Yorkda Türkiyə mətbuatına müsahibəsində bildirib.
“Əvvəllər Netanyahu xəstəliyi səbəbindən bizə gələ bilmirdi. Amma indi mən ona dedim ki, bu səfəri etməlidir, sonra mən və komandam İsrailə gedəcəyik. Razılığa gəldik. Ümid edirik ki, biz bunu çox gecikdirmədən görəcəyik və İsraillə enerji ehtiyatları sahəsində qazma işlərinə başlayacağıq. Biz enerji resurslarının təkcə Türkiyəyə deyil, həm də Türkiyə üzərindən Avropaya çatdırılması üçün marşrutlardan istifadə etməyə başlayacağıq ”, - deyə o vurğulayıb.
Tacikistan Respublikasının Prezidenti Emoməli Rəhmon Azərbaycana işgüzar səfər edəcək.
Bu barədə "Report"un ABŞ bürosuna açıqlamasında BMT Baş Assambleyasının 78-ci sessiyasında iştirak etmək üçün Nyu-Yorkda səfərdə olan Tacikistanın xarici işlər naziri Sirociddin Muhriddin bildirib.
Nazir Azərbaycanla əlaqələrin yüksək səviyyədə olduğunu vurğulayıb: “Bu yaxınlarda Azərbaycan Prezidenti cənab İlham Əliyev ölkəmizə işgüzar səfərə gəldi. Səfər çərçivəsində iki ölkənin liderləri bir sıra çox mühüm ikitərəfli əməkdaşlıq sənədlərini imzaladılar. Eləcə də, bir neçə gün bundan əvvəl Mərkəzi Asiya Dövlət Başçılarının 5-ci Məşvərət görüşünü təşkil etdik. Cənab İlham Əliyev ölkə başçımız Emoməli Rəhmon tərəfindən görüşə fəxri qonaq qismində dəvət edildi. Biz onun görüşdə iştirakından böyük məmnunluq duyduq”.
“Bu yaxınlarda Azərbaycanda, Bakıda Mərkəzi Asiya Ölkələrinin İqtisadiyyatları üçün Xüsusi Proqram (SPECA) üzrə sammit keçiriləcək. Tacikistan sammitdə dövlət başçısının rəhbərliyi ilə yüksək səviyyədə iştiraka hazırlaşır", - nazir vurğulayıb.
Türkiyə Prezidenti Rəcəb Tayyib Ərdoğan Azərbaycan Prezidenti İlham Əliyevlə telefonla danışıb.
Bu barədə Türkiyə Prezidenti Administrasiyası məlumat yayıb.
Məlumata görə, Türkiyə dövlət başçısı Azərbaycan Prezidentindən Qarabağdakı son vəziyyətlə bağlı məlumat alıb.
“Ərdoğan bir daha İlham Əliyevə Türkiyənin Azərbaycana ürəkdən dəstəyini ifadə edib. Görüş zamanı iki lider ölkələrini yaxından maraqlandıran regional məsələlər ətrafında da fikir mübadiləsi aparıblar”, - məlumatda bildirilir.
