 |
|
|
BMT Təhlükəsizlik Şurasının iclasında Rusiyanın təşkilatdakı daimi nümayəndəsi Vasili Nebenzya bildirib ki, Avropa İttifaqı rusofob bloka çevrilib.
O əlavə edib ki, Aİ bu mübarizədə uduzur.
Martın 4-də Avropa Komissiyasının sədri Ursula fon der Leyen Avropanın silahlanması dövrü elan edib . Onun təklif etdiyi plan dörd il ərzində 800 milyard avro sərmayəni səfərbər edəcək.
“Azərbaycan İsrail və Amerika ilə müttəfiqliyə dair strateji sənəd imzalaya bilər. Bunu cənab prezident də çıxışında istisna etməyib”.
Bu sözləri siyasi şərhçi Ramiyə Məmmədova Tribunainfo.az-a deyib. Knessetdə gedən müzakirələrə toxunan ekspert bildirib ki, İsrail bunun üçün vasitəçilik etməyə çalışır: “Bu sənəd Tramp dövründə imzalana bilər. Sadəcə, Amerika lideri bu haqda danışmayıb, Cənubi Qafqazın adını çəkməyib. Ona görə də gözləmək lazımdır”.
Qeyd edək ki, martın 17-də iqtisadiyyat naziri Mikayıl Cabbarov İsrailə gedəcək. İsrail nəşrləri yazır ki, Bakı İbrahim sazişinə qoşula bilər.
“Nə qədər ki, biz “hamıya sülh, sabitlik” deyirik, İslam coğrafiyasının qeyri-sabitliyindən qidalanan güc qrupları da boş oturmur. Gərginlik və xaos yaratmağa çalışırlar”.
Tribunainfo.az xəbər verir ki, bunu Türkiyə Prezidenti Rəcəb Tayyib Ərdoğan Nazirlər Kabinetinin iclasından sonra mətbuata açıqlamasında deyib.
“Qonşu Suriyada keçmiş rejim qalıqlarının məzhəblərarası qarşıdurma yaratmaq məqsədi daşıyan təxribatçıların həyata keçirdikləri terror aktlarında şahidi olduq.
Türkiyə olaraq Suriyanın birliyini, həmrəyliyini və ictimai sülhünü hədəf alan hər cür hücumu, terroru və hədə-qorxuları ən kəskin şəkildə qınayırıq. Suriya lideri Əhməd əş-Şaara inklüziv siyasət yürüdür. İnanırıq ki, Suriyada tezliklə əmin-amanlıq bərqərar olacaq. Suriya mövzusunda kimsə bizə dərs verə bilməz”, – Ərdoğan qeyd edib.
Təkcə Ukraynanın deyil, Rusiyanın da kartları yoxdur, buna görə də sülh sazişi bağlamalı olduqlarını deyirlər.
Teleqraf xəbər verir ki, bu barədə ABŞ Prezidenti Donald Tramp bildirib.
Amerika lideri Rusiya-Ukrayna müharibəsini növbəti dəfə “mənasız” adlandırıb və buna son qoyacağını bəyan edib.
“Onların kartları yoxdur, əslində heç kimin yoxdur. Rusiyada da yoxdur. Lazım olan tək şey sövdələşməyə getmək və insanları öldürməyi dayandırmaqdır. Bu, mənasız müharibədir, biz buna son qoyacağıq”, - Tramp vurğulayıb.
“Region ölkələri “İŞİD” terror qruplaşmasına qarşı birgə fəaliyyət göstərmək və bu məqsədlə əməliyyat mərkəzi yaratmaq barədə razılığa gəliblər”.
“Report” xəbər verir ki, bunu Türkiyənin xarici işlər naziri Hakan Fidan deyib.
Onun sözlərinə görə, terrorçulara qarşı birgə mübarizə vacibdir: “Biz region ölkələri olaraq İŞİD-ə qarşı mübarizədə qərarlıyıq. Türkiyə uzun müddətdir bu mübarizəni öz tərəfində aparır. İŞİD təkcə bir ölkəyə deyil, regionun bir çox dövlətinə zərər vurduğundan qruplaşma ilə təkbaşına mübarizə aparmaq çətindir.
Ona görə də bizim bir araya gəlib güclü platforma yaratmağımız vacib idi. İndi biz bu platformanın yaradılması istiqamətində ilk addımı atmışıq. Bunun başlanğıcı birgə əməliyyat mərkəzinin yaradılması olacaq”.
Fidan əlavə edib ki, PKK regional problem olduğundan ona İŞİD-ə qarşı tətbiq olunan metodologiya və tədbirlərlə yanaşılmalıdır:
“PKK Türkiyədə bir kvadrat metr əraziyə nəzarət etməsə də, Suriyanın üçdə birini işğal edib və enerji qaynaqlarına nəzarət edir. İraqda İraq Kürdüstanında 700 kəndi, Sincar bölgəsini və bəzi başqa əraziləri işğal ediblər. Yəni bu, təkcə Türkiyənin problemi deyil”.
Qeyd edək ki, birgə əməliyyat mərkəzinin yaradılmasında Türkiyə, Suriya, İordaniya, İraq və Livan iştirak edəcək.
ABŞ-ın xarici siyasətində xaotik qərarlar kimi görünən addımlar əslində sistemli və məqsədyönlü strategiyanı əks etdirir.
Musavat.com xarici mediaya istinadla xəbər verir ki, siyasi ekspert Qriqori Trofimçukun fikrincə, Vaşinqtonun əsas məqsədi Rusiyanı Çindən ayırmaqdır. Qriqori Trofimçuk xarici siyasət, müdafiə və təhlükəsizlik üzrə məşhur rusiyalı ekspertdir.
"Tramp administrasiyası qarşısına Moskvanı Pekindən qoparmaq üçün genişmiqyaslı plan qoyub. ABŞ bu cütlüyü eyni anda zəiflətməyin çox baha başa gələcəyini anlayaraq, hədəf kimi Rusiyanı seçib. Bunun üçün isə Moskva ilə gizli əməkdaşlıq formatı yaradılaraq, Çin rəhbərliyində Kremlə qarşı şübhə yaradılmağa çalışılır".
Ekspertin sözlərinə görə, Tramp Rusiyanı Çindən uzaqlaşdırmaq üçün iki əsas ssenari üzərində işləyir:
1. Moskvanı Vaşinqtonla əməkdaşlığa cəlb etmək və bu prosesi Çinin gözündə diskreditasiya etmək – yəni Molotov-Ribbentrop paktına bənzər yeni gizli razılaşma mümkündür.
2. Rusiyanın təbii ehtiyatları və iqtisadi resurslarına nəzarəti gücləndirmək.
Bu çərçivədə ABŞ-ın G7 sammiti ilə bağlı verdiyi son qərarlar da Rusiyanın xeyrinə, Çinin isə əleyhinə işləyir. Vaşinqton G7-nin Rusiyaya qarşı bəyanatını yumşaltmaqla yanaşı, Çinə qarşı sanksiyaları sərtləşdirmək niyyətindədir.
Bu siyasət Vaşinqtonun qlobal strategiyasında ciddi dönüş nöqtəsi sayıla bilər. Əsas sual isə budur: Kreml Trampın oyununun bir hissəsi olmağa razı olacaqmı?
Musavat.com
Yaxın Şərqdə geosiyasi dinamika dəyişir.
Musavat.com xəbər verir ki, Türkiyə, İordaniya, İraq, Suriya və Livan təhlükəsizlik və müdafiə sahəsində əməkdaşlığı dərinləşdirmək üçün yeni ittifaq qurur. Ammanda keçirilən təhlükəsizlik sammitində bu ölkələrin xarici işlər nazirləri, müdafiə nazirləri, kəşfiyyat rəhbərləri və baş qərargah rəisləri bir araya gəlib. Daha sonra nümayəndə heyətləri İordaniya kralı II Abdullah tərəfindən qəbul edilib.
Sammitin əsas qərarları:
İŞİD-ə qarşı birgə mübarizə üçün operativ mərkəz yaradılacaq.
PKK-nın bölgədəki fəaliyyəti terrorizm kimi qiymətləndiriləcək və ona qarşı İŞİD-ə tətbiq olunan tədbirlər görüləcək.
Yeni Suriya hökumətinə terrorla mübarizə və sabitliyin təmin olunması üçün hərtərəfli dəstək veriləcək.
Türkiyənin xarici işlər naziri Hakan Fidan PKK-nın yalnız Türkiyə üçün deyil, həm də İraq və Suriya üçün təhlükə yaratdığını vurğulayıb. Onun sözlərinə görə, PKK-nın İraqda və Suriyada işğal etdiyi ərazilərə qarşı ciddi tədbirlər görüləcək.
Bölgə ölkələrinin bir araya gəlməsi İsrail və ABŞ-ın Yaxın Şərqdə həyata keçirməyə çalışdığı geosiyasi planlara qarşı atılmış addım kimi qiymətləndirilir. Ekspertlərə görə, bu proses İslam dünyasının xarici güclərin bölgədəki müdaxiləsinə qarşı mübarizədə birləşdiyinin siqnalıdır.
Bu yeni ittifaqın bölgənin siyasi xəritəsinə necə təsir edəcəyi və ABŞ-İsrail cəbhəsinin buna hansı cavabı verəcəyi yaxın zamanlarda aydınlaşacaq.
Musavat.com
Çinin işğalı halında Amerika qoşunlarını göndərəcəyini vəd edən Co Baydendən fərqli olaraq, Tramp Tayvanı müdafiə etmək üçün açıq-aşkar öhdəlik götürməkdən yayınıb
Tayvanlılar Ukraynada baş verən vəziyyətlə Çin tərəfindən adalarına qarşı yaranan təhdidi paralel şəkildə müqayisə edirlər. Ukraynalılar kimi tayvanlılar da qonşu dövlətin davamlı təzyiqi altında yaşayırlar. Həmçinin Tayvan Ukrayna kimi aqressiyanın qarşısını almaq üçün böyük ölçüdə Qərbin dəstəyinə etibar edir.
Musavat.com xəbər verir ki, bu barədə “The Telegraph” qəzeti yazır.
Asiya məsələləri üzrə mütəxəssis, Beynəlxalq Münasibətlər Şurasının (CFR) üzvü Devid Saks qeyd edir ki, tayvanlılar arasında narahatlıq hissi getdikcə artır.
Nəşr yazır ki, Donald Trampın Ukrayna ilə bağlı siyasəti Tayvan üçün ciddi nəticələrə yol aça bilər. O, Kiyevə təhlükəsizlik zəmanətlərini istisna edib, hərbi yardımı müvəqqəti olaraq dayandırıb və Volodimir Zelenskini təbii sərvətlər məsələsində güzəştlər etməyə və atəşkəsə razı olmağa çağırıb.
Eyni zamanda, Tramp açıq şəkildə bildirib ki, ABŞ-ın ənənəvi müttəfiqləri onların tam dəstəyinə etibar edə bilməzlər.
Tayvan adası, Çin tərəfindən davamlı təzyiq altındadır. Çin mütəmadi olaraq hərbi gəmilər və qırıcılar vasitəsilə güc nümayiş etdirir. Tayvan Çin aqressiyasını dayandırmaq üçün ABŞ-ın dəstəyinə arxalanır. Çinin işğalı halında Amerika qoşunlarını göndərəcəyini vəd edən Co Baydendən fərqli olaraq, Tramp Tayvanı müdafiə etmək üçün açıq-aşkar öhdəlik götürməkdən yayınıb. Onun sözlərinə görə, Tayvan Amerika çip sənayesini "oğurlayıb" və Tayvan iqtisadiyyatının onurğa sütunu olan yarımkeçiricilərə 25 faizlik tariflərlə hədələyib.
"Tramp təcridçiliyi təmsil edir, bu isə o deməkdir ki, Tayvanı tərk edə bilər", – deyə Tayvanın Sinçzhu şəhərindən olan mikrosxem mühəndisi Çen-Vey Lay bildirib.
Tayvan dünyanın yarımkeçirici istehsalının mərkəzidir və adada genişmiqyaslı müharibə qlobal iqtisadi böhrana səbəb ola bilər. Ancaq əgər Tramp çip istehsalını ABŞ-a köçürə bilsə, Tayvana marağı azalacaq.
Tayvanlılar həmçinin, Trampın Tayvanı Çinlə danışıqlarda sövdələşmə vasitəsi kimi istifadə etməsindən də qorxurlar. Pekinə qarşı tətbiq olunan sanksiyalara baxmayaraq, ekspertlər hesab edir ki, Tramp Çinlə bir razılaşma şərti yaratmağa çalışır.
Tayvanda populyar olan "Bu gün Ukrayna, sabah Tayvan" şüarı, ABŞ-ın gələcək siyasəti ilə bağlı narahatlıqları əks etdirir.
Trampın Ukraynaya yanaşmasındakı kəskin dəyişiklik Tayvan üçün narahatedici bir siqnaldır.
Musavat.com
Tramp öz tələblərini irəli sürməyə çalışır, lakin İran bunu qəbul etməyəcək.
Demokrat.az xəbər verir ki, bunu İranın Ali Rəhbəri Seyid Əli Xamenei ABŞ Prezidenti Donald Trampın danışıqlar çağırışına cavabında deyib.
“İran şübhəsiz ki, onların tələblərini qəbul etməyəcək”, - Xamenei qeyd edib.
Qeyd edək ki, ABŞ Prezidenti Donald Tramp Xameneiyə məktub göndərərək İranın nüvə silahı hazırlamasının qarşısını almaq üçün danışıqlara çağırdığını, hərbi əməliyyatdansa diplomatiyaya üstünlük verdiyini bildirib.
Ukrayna prezidenti Volodimir Zelenski gələn həftə Səudiyyə Ərəbistanına səfər edəcəyini açıqlayıb.
Tribunainfo.az xəbər verir ki, dövlət başçısı X (keçmiş Twitter) platformasında verdiyi açıqlamada səfərin bazar ertəsi günü başlayacağını və bu çərçivədə Səudiyyə Ərəbistanının vəliəhd şahzadəsi Məhəmməd bin Salmanla görüş keçirəcəyini bildirib.
Ukrayna lideri vurğulayıb ki, bu səfər çərçivəsində Ukraynanın təhlükəsizlik maraqları, ərzaq ixracı, regionda sabitliyin qorunması və beynəlxalq diplomatik səylər müzakirə olunacaq. Zelenskinin Səudiyyə Ərəbistanından ayrılmasının ardından, rəsmi Kiyev bu ölkədə diplomatik mövqelərini gücləndirmək üçün yüksək səviyyəli nümayəndə heyətini orada saxlayacaq.
Ukrayna nümayəndə heyətinə Prezident Ofisinin rəhbəri Andrey Yermak, xarici işlər naziri Andrey Sıbiga, müdafiə naziri Rüstəm Umerov və Prezident Ofisi rəhbərinin müavini Pavel Palisa daxildir. Bu heyətin ABŞ Administrasiyasının rəhbərləri ilə görüşü planlaşdırılıb.