Prezident İlham Əliyevin mayın 9-da Moskvada keçiriləcək Qələbə paradına qatılmayacağı barədə məlumat vermişdik.

TEREF xəbər verir ki, APA Azərbaycan liderinin Moskva səfərini ləğv etməsinə təsir göstərən bəzi amilləri öyrənə bilib.
Qeyd edək ki, AZAL-ın sərnişin təyyarəsinin qəzaya uğramasından 5 ay keçsə də, Rusiya tərəfindən hər hansı əməliyyat istintaq tədbirləri aparılmayıb, eləcə də bu hadisədə günahı olanlar tapılaraq məsuliyyətə cəlb olunmayıb.
Eyni zamanda, bir müddət əvvəl Azərbaycanın bir sıra media resurslarına kiberhücumların Rusiyadan edildiyi təsdiqini tapıb. Moskva bu məsələyə də aydınlıq gətirməyib.
Bundan başqa, bir neçə gün əvvəl Azərbaycan parlamentinin üzvü Azər Badamovun Rusiyaya girişinə qadağa qoyulub, o, Moskvada aeroportda saxlanılaraq, deportasiya edilib. Rusiya tərəfi isə məsələ ilə bağlı əsaslandırılmış hər hansı açıqlama verməyib.
Bütün bu amillərin Azərbaycan Prezidentinin Moskvaya səfərinin təxirə salınmasına təsir göstərdiyi bildirilir.

Ermənistan yeni Konstitusiya layihəsi üzərində işləyir və bu layihə 10 ay ərzində hazır olacaq.

Musavat.com xəbər verir ki, bu barədə Ermənistanın ədliyyə naziri Srbuhi Qaloyan parlamentdə keçirdiyi brifinqdə açıqlama verib.

Qaloyan Konstitusiyanın yeni mətnində müstəqillik bəyannaməsinin xaric edilib-edilməməsi məsələsinin hələ müzakirə olunduğunu söyləyib. "Biz müxtəlif variantları müzakirə edirik, amma mətn hələ də hazırlanır. Konsepsiya eynidir, bu konsepsiya çərçivəsində müxtəlif normalar üzrə müzakirələr aparılır," – deyə nazir əlavə edib.

Nazir həmçinin bu məsələnin referendumda müzakirəyə çıxarılma vaxtı ilə bağlı hələlik dəqiq bir məlumatın olmadığını bildirib.

"Mətn hazır olduqdan sonra, şübhəsiz ki, konseptual mövqeləri ictimaiyyətə təqdim edəcəyik və bu barədə geniş müzakirələr aparacağıq," – deyə Qaloyan vurğulayıb.

TEREF rbc.ru-ya istinadən bildirir ki, 9 May – Qələbə Günündə Moskvada keçiriləcək hərbi parad bu il rekord sayda xarici liderin iştirakı ilə müşayiət olunacaq. Rusiya Prezidentinin köməkçisi Yuri Uşakovun sözlərinə görə, tədbirə 29 ölkənin dövlət və hökumət başçısı qatılacaq.

Uşakov bildirib ki, Qələbənin 80 illiyinə həsr olunmuş paradda Azərbaycan, Ermənistan, Belarus, Qazaxıstan, Qırğızıstan, Tacikistan, Türkmənistan və Özbəkistan prezidentləri iştirak edəcək.

Bundan əlavə, Bosniya və Herseqovina, Abxaziya, Cənubi Osetiya, Çin, Misir, Kuba, Vyetnam, Monqolustan, Laos, Myanma, Fələstin, Slovakiya, Serbiya, Papua-Yeni Qvineya, Zimbabve, Bura Faso, Efiopiya, Qvineya-Bisau, Venesuela, Konqo və Braziliya kimi ölkələrin də rəhbərləri Moskvaya gələcək.

Uşakov qeyd edib ki, bu qədər yüksək səviyyəli iştirakı “Rusiya ilə tərəfdaşlıq münasibətlərinə verilən önəmin göstəricisi” kimi qiymətləndirmək olar.

Fridrix Merz Almaniya Kansleri seçilib.
Ajans.az xəbər verir ki, Bundestaq onun namizədliyini ikinci cəhddə təsdiqləyib.

Merz ikinci cəhddə tələb olunan 316 səsdən 325-ni toplaya bilib.

O, ilk cəhddə 310 səs toplamışdı.

Ermənistanda baş nazir Nikol Paşinyanın impiçmenti tələb olunur.

“Report” “Aysor”a istinadən xəbər verir ki, “Biz yatmırıq” vətəndaş hərəkatının təşəbbüskarı Edqar Kazaryan parlamentdə baş nazir Paşinyana etimadsızlığın ifadəsi olan impiçment prosesinin uğurlu olacağına əminliyini bildirib.

“Məndə belə təəssürat yaranır ki, impiçmentin əleyhinə olanlar onun uğursuzluğundan deyil, uğurundan narahatdırlar. Bu proses mütləq müvəffəqiyyətlə başa çatacaq - bütün rəqibləri məğlub etməklə. Heç kim öz xırda ambisiyalarını, maraqlarını rəhbər tutaraq xalqın iradə və istəyi qarşısında müqavimət göstərə bilməz. Xalq isə Nikol Paşinyanın istefasını istəyir”, - Edqar Kazaryan sosial şəbəkədəki səhifəsində yazıb.

Daha əvvəl “Biz yatmırıq” vətəndaş hərəkatının təşəbbüskarları Edqar Kazaryan və Narek Malyan Paşinyana etimadsızlıq təşəbbüsü ilə çıxış edərək parlamentin deputatlarına məktublar göndəriblər.

İsrailin Baş naziri Benyamin Netanyahunun Azərbaycana səfərinin təxirə salınması ətrafında müzakirələr davam edir. Səfərin baş tutmamasına bir neçə mühüm faktor səbəb göstərilir. Bildirilir ki, İsrail hava qüvvələri ilə Türkiyəyə məxsus F-16 qırıcılarının qarşılıqlı şəkildə “xəbərdarlıq mesajı” göndərməsi iki ölkə arasında gərginliyin artmasına səbəb olub. Bununla yanaşı, Suriyada davam edən silahlı toqquşmalar və İsrailin bu ölkədəki hərbi müdaxilələri də Netanyahunun səfərini riskli və qeyri-məqbul vəziyyətə gətirib.

Moskvada keçiriləcək 9 May paradı və İranın bölgədəki təsiri də səfərin təxirə salınmasına təsir edən digər amillərdən hesab edilir.

Globalinfo.az-a danışan politoloq Əlimusa İbrahimov deyib ki, İsrail hökuməti səfərin təxirə salınmasını Qəzza və Suriyada baş verən son hadisələrlə əlaqələndirib:

“Bu səbəbi kifayət qədər ciddi arqument saymayan siyasətçilər də var. Onlar səfərin təxirə salınmasının əsas səbəbini Türkiyənin baş nazirin təyyarəsinə öz ərazisindən keçmək üçün icazə verməməsində görürlər.

Hər iki səbəb baş nazirin səfərinin təxirə salınması üçün əsas götürə bilər. Suriya və Qəzzada İsrail tərəfindən ciddi əməliyyatlar aparılır. İsrail Müdafiə Nazirliyi 60 min yeni əsgərin ehtiyatdan orduya çağırılması haqqında qərar qəbul edib ki, bu da əməliyyatların genişləndirilməsi anlamına gəlir. Əməliyyatların genişləndirilməsi Netanyahu hökumətinə qarşı narazılığın artması ilə nəticələnə bilər. Belə bir zamanda Netanyahunun 5 günlük xarici səfərə çıxması əhali tərəfindən mənfi qarşılanardı. Məhz buna görə də Netanyahunun səfəri təxirə salınması məqsədəuyğun görünür”.

Politoloq qeyd edib ki, Türkiyənin İsrail təyyarəsinə öz ərazisindən keçməyə icazə verməməməsi də səfərin təxirə salınması üçün əsas kimi nəzərdən keçirilə bilər:

“Çünki Netanyahu Azərbaycana gəlmək üçün 3 istiqamətdən – İran, Türkiyə, Qara dəniz – birindən istifadə etməli idi. Məlum olduğu kimi, Netanyahunun təyyarəsi İran səması ilə uça bilməzdi, Qara dəniz üzərində Rusiya ilə Ukrayna müharibəsi səbəbindən keçmək olduqca təhlükəlidir. Qalır Türkiyə üzərindən gəlmək. Ona da Türkiyə hökuməti icazə vermədi. Beləliklə Netanyahu Azərbaycana gəlmək üçün uyğun və təhlükəsiz hava məkanı tapmadığına görə səfəri təxirə saldı, deyə bilərik. Bu zaman isə başqa sual yaranır: İsrail hökuməti səfəri hazırlayarkən Türkiyənin mümkün reaksiyasını nəzərə almamışdımı?

Əlbəttə ki, almışdı və Türkiyənin icazə verəcəyinə əmin idi. Amma İsrail ordusunun Suriyadakı son əməliyyatları Türkiyənin hava məkanını bağlamasına səbəb oldu”.

Bölünmüş Kipr problemi nəhayətində adada iki suveren dövlətin yaradılması prinsipləri əsasında həll olunacaq.

TNS xəbər verir ki, “Anadolu” agentliyinin məlumatına görə, bu barədə Türkiyə Prezidenti Rəcəb Tayyib Ərdoğan 3 mayda Şimali Kiprə səfərindən qayıdarkən jurnalistlərə açıqlamasında bildirib.

"Biz Kipr Türk Cümhuriyyəti Prezidenti Ersin Tatar tərəfindən irəli sürülən iki dövlət əsasında həll prinsipini bütün gücümüzlə dəstəkləyirik. Bu məsələdə töhfə verməyə və konstruktiv yanaşma nümayiş etdirməyə davam edəcəyik. 17–18 mart tarixlərində BMT-nin himayəsi altında Cenevrədə geniş tərkibdə keçirilən qeyri-rəsmi görüşdə qərar verildiyi kimi, Kipr türkləri gec-tez adada suveren bərabərliklərini və bərabər beynəlxalq statuslarını qeydiyyatdan keçirəcəklər", – Ərdoğan bildirib.

Ərdoğanın sözlərinə görə, Türkiyə bu yolda Şimali Kipr Türk Cümhuriyyətinin hər zaman yanında olacaq: "Biz ədalətli, daimi, davamlı və reallıqlara əsaslanan bir həll istəyirik. Bölgəmizdə baş verən hadisələr də bu reallığın artıq qəbul edilməsinin zəruri olduğunu göstərir. Artıq hər kəs anlamalıdır ki, adada iki xalq və iki dövlət mövcuddur".

O əlavə edib ki, Ankaranın Kipr türklərinə və onların müstəqil dövlətinə dəstəyi davamlıdır və Türkiyə Şimali Kiprin təhlükəsizliyinin zəmanətçisidir.