 |
|
|
Azərbaycan Prezidenti İlham Əliyev oktyabrın 10-da ABŞ dövlət katibi Antoni Blinkenlə telefon danışığında inandığını bildirib ki, əgər Ermənistan siyasi iradə nümayiş etdirərsə, bu ilin sonunadək sülh müqaviləsi imzalana bilər.
Prezident İlham Əliyev Cenevrədə Azərbaycanın və Ermənistanın xarici işlər nazirləri arasında keçirilmiş birinci ikitərəfli görüşü müsbət qiymətləndirib.
Dövlətimizin başçısı, həmçinin Praqada keçirilmiş görüş nəticəsində qəbul edilmiş bəyanatın sülh prosesinə töhfə verəcəyinə ümidvar olduğunu ifadə edib.
Prezident, eyni zamanda, həm Antoni Blinkenin, həm də Ceyk Sallivanın təşəbbüsü ilə Azərbaycanla Ermənistan nümayəndələri arasında keçirilmiş görüşlərə toxunub, bunu sülhə doğru atılmış addımlar kimi qiymətləndirib.
Azərbaycan Prezidenti Birinci Qarabağ müharibəsindən sonra 3900-dən çox soydaşımızın itkin düşmüş şəxs hesab olunduğunu xatırladıb, Ermənistanın kütləvi məzarlıqların yeri barədə məlumat verməsinin vacibliyini qeyd edib. Prezident İlham Əliyev ABŞ dövlət katibindən öz imkanlarından istifadə edərək bu məsələnin həllinə nail olunmasına kömək göstərməsini xahiş edib. Dövlətimizin başçısı deyib ki, Beynəlxalq Qızıl Xaç Komitəsində şahidlərin ifadələri və digər məlumatlar əsasında bəzi kütləvi məzarlıqların yerləri haqqında müəyyən məlumatlar var.
Telefon söhbətində Azərbaycan-Ermənistan əlaqələrinin gələcək inkişafı ilə bağlı müzakirələr də aparılıb.
Türkiyə və Aİ parlament komitəsinin sədri İsmayıl Emrah Karayel Rusiya ilə dörd Qərb ölkəsi arasında danışıqların İstanbulda keçirilə biləcəyini açıqlayıb. Onun sözlərinə görə, Türkiyə regionda gərginliyi azaltmaq və bir sıra beynəlxalq problemlərin həllinə nail olmaq istəyir və bunun üçün çalışır.
“Biz güman edirik ki, tərəflər razılaşarsa, İstanbul danışıqlar məkanına çevrilə və bütün tərəflər üçün məqbul bir yer ola bilər”, - deyə siyasətçi bəyan edib.
Qeyd edək ki, bir müddət öncə Türkiyənin Ukraynadakı vəziyyətlə bağlı Rusiya ilə Qərb arasında danışıqlar təşkil etməyi planlaşdırdığı bildirilib. Məlumata görə, müvafiq təklif artıq “vacib və özəl” diplomatik kanallar vasitəsilə Vaşinqtona çatdırılıb. Amerika tərəfdən planla bağlı ilk şərhlər çox müsbət olub.
Xatırladaq ki, bundan əvvəl Türkiyə Prezidentinin rəsmi nümayəndəsi İbrahim Kalın da Rusiya ilə Ukrayna arasında mümkün danışıqların bərpa oluna biləcəyini açıqlayıb.
Fransadakı erməni diasporu Ermənistanın Türkiyə və Azərbaycanla münasibətlərinin normallaşması prosesinə qarşıdır.
Bunu Türkiyənin xarici işlər naziri Mövlud Çavuşoğlu Strasburqda Türkiyə vətəndaşları ilə görüşündə deyib.
O qeyd edib ki, bu diasporun üzvləri yaxşı münasibətlərin qurulmasına qarşıdırlar və düşmənçiliyi dəstəkləyirlər. Nazir Fransada yaşayan soydaşlarını bu fenomenlə mübarizə aparmağa çağırıb.
M.Çavuşoğlu xatırladıb ki, Türkiyə-Amerika Koordinasiya Komitəsi də hər zaman erməni diasporunun Türkiyə və türk xalqına qarşı böhtanlarına qarşı uğurla mübarizə aparıb.
Macarıstan parlamenti İsveç və Finlandiyanın NATO-ya daxil olmasını hələ də müzakirə etməyib. Bu, onunla bağlıdır ki, Nümayəndələr Palatasının spikeri Laslo Köver bu məsələyə yer verməyib. Ümumiyyətlə isə ABŞ-ın rəhbərlik etdiyi hərbi alyansın 30 üzvü arasında yalnız Macarıstan və Türkiyə İsveç ilə Finlandiyanın NATO-ya üzv olmasına qarşıdır.
Axar.az xəbər verir ki, bu barədə Macarıstan mediası məlumat yayıb.
"Macarıstan hökuməti müvafiq qanun layihəsini 2,5 ay əvvəl parlamentə təqdim edib. Üstəlik, sosialistlər qərarların qəbulu prosesini sürətləndirmək istəyiblər, lakin spiker bundan imtina edib. Sosialistlər bu məsələ ilə bağlı səsvermə təşəbbüsü ilə çıxış edəndə hökumət partiyalarından olan deputatlar “yox” deyiblər.
Bu arada Finlandiya prezidenti vurğulayıb ki, onların NATO-ya daxil olması əsasən Türkiyədən asılıdır. Macarıstanla bağlı o, yalnız Budapeştin AB ilə fikir ayrılıqlarının olduğunu bildirib", - məlumatda deyilir.
İsveçin ən nüfuzlu qəzetlərindən biri olan "Dagens Nyheter" "Momentum" partiyasının siyasətçisi Marton Tomposun sözlərinə əsaslanaraq Macarıstanın üzvlük prosesini ləngidə biləcəyini yazıb. Siyasətçi hesab edir ki, Orban Finlandiya və İsveçin NATO-ya daxil olmasından Brüsselə təsir üçün istifadə edir.
ABŞ dövlət katibinin konsulluq məsələləri üzrə köməkçisi Rena Bitter oktyabrın 7-dən 19-dək Frankfurt, Varşava, Krakov, İstanbul və Ankaraya səfər edəcək.
Teleqraf.com xəbər verir ki, bu barədə Dövlət Departamentinin bəyanatında deyilir.
"Dövlət katibinin köməkçisi səfər zamanı ABŞ konsulluq əməliyyatlarına nəzar salacaq və xaricdəki ABŞ vətəndaşlarını qorumaq və ABŞ-a qanuni səyahəti asanlaşdırmaq üçün dərin və davamlı öhdəliyimizi vurğulamaq üçün xarici hökumətlərdən olan həmkarları ilə görüşəcək", - deyə bəyanatda bildirilir.
Rusiya Prezidenti Vladimir Putin və ukraynalı həmkarı Volodimir Zelenski noyabrda İndoneziyada keçiriləcək G20 sammitində iştirak barədə razılığa gəliblər.
Teref.az “Report”a istinadən xəbər verir ki, bu barədə “The National” nəşri BƏƏ-nin İndoneziyadakı səfiri Husin Bagisə istinadən yazıb.
Bildirilib ki, dövlət başçıları Bali sammitinə gəlsələr, bu, onların münaqişə başlayandan bəri ilk dəfə eyni meydançada görünməsi olacaq.
“Hər ikisi iştirak etməyə razılaşdılar. Vəziyyət adi deyil”, – diplomat bildirib.
Gərəksiz gərginliyin qarşısını almaq üçün ölkə liderləri müxtəlif mehmanxanalarda yerləşdiriləcəklər.
İsveçin Baş naziri səlahiyyətlərini icra edən Maqdalena Andersson Türkiyə Prezidenti Rəcəb Tayyib Ərdoğanla NATO-ya üzvlüklə bağlı memorandumun icrasını müzakirə edib.
"Haber Global" xəbər verir ki, liderlər Fransa Prezidentinin təşəbbüsü ilə Avropa İttifaqı tərəfindən yaradılmış yeni siyasi platforma olan Avropa Siyasi Birliyinin (AQS) birinci sammiti çərçivəsində görüşüb.
Andersson isveçli jurnalistlərə bildirib ki, ölkəsi İsveç Madriddə əldə olunmuş razılaşmaya uyğun hərəkət edir.
İsveçli nazir onu da qeyd edib ki, bu görüşdən əvvəl hökumət başçısı postunda onun yerinə keçəcəyi gözlənilən Ulf Kristerssonla danışıb və Ərdoğana hökumət dəyişikliyindən sonra vəziyyətin necə inkişaf edəcəyi barədə məlumat verib.
İsveç və Finlandiyanın NATO-ya qəbulu ilə bağlı protokollar bu il iyulun 5-də alyans ölkələrinin nümayəndələri tərəfindən imzalanıb. Üzvlük müraciəti təşkilatın 28 ölkəsi tərəfindən təsdiqlənib.
Ermənistan Azərbaycanın ərazi bütövlüyünü tanıyıb.
DİA.AZ “Report”a istinadla xəbər verir ki, bu barədə Praqada Azərbaycan Respublikasının Prezidenti İlham Əliyev, Fransa Respublikasının Prezidenti Emmanuel Makron, Avropa İttifaqı Şurasının Prezidenti Şarl Mişel və Ermənistan Respublikasının baş naziri Nikol Paşinyan arasında baş tutan görüşdən sonra Yelisey sarayının rəsmi saytında dərc edilmiş bəyanatda deyilir.
Sənəddə vurğulanıb ki, Ermənistan və Azərbaycan Birləşmiş Millətlər Təşkilatının Nizamnaməsinə və hər iki tərəfin bir-birinin ərazi bütövlüyünü və suverenliyini tanıdığı 1991-ci il Alma-Ata Bəyannaməsinə sadiqliklərini təsdiqləyiblər.
“Onlar təsdiqləyiblər ki, bu, sərhədlərin delimitasiyası komissiyalarının işi üçün əsas olacaq və oktyabrın sonunadək sərhəd komissiyalarının növbəti iclası Brüsseldə baş tutacaq.
Ermənistan Azərbaycanla sərhəddə Aİ-nin mülki missiyasına yardım göstərməyə razılaşıb. Azərbaycan bu missiya ilə ona aid olduğu dərəcədə əməkdaşlığa razılıq verib.
Missiya oktyabr ayında faəliyyətə başlayacaq və maksimum iki ay müddətində davam edəcək. Missiyanın məqsədi - güvən yaratmaq və öz hesabatları vasitəsilə sərhəd komissiyalarının fəaliyyətinə töhfə verməkdir”-deyə, bəyanatda qeyd olunub.
“Azərbaycan Türkiyə və Ermənistan arasında münasibətlərin normallaşdırılması üzrə aparılan prosesi dəstəkləyir”.
Bunu Azərbaycan Respublikasının Prezidenti İlham Əliyev Praqada “Avropa siyasi birliyi” Zirvə Toplantısı çərçivəsində “Avropa qitəsində sülh və təhlükəsizlik” mövzusunda keçirilən dəyirmi masada çıxışı zamanı deyib.
Dövlət başçısı vurğulayıb ki, Azərbaycanla Ermənistan arasında olan normallaşma prosesi və Türkiyə ilə Ermənistan arasındakı normallaşma prosesi bir-birini tamamlayacaq proseslərdir, bütövlükdə regionda sülhün və əmin-amanlığın təmin olunmasına xidmət göstərə biləcək haldır.
Ermənistanın xarici işlər naziri Ararat Mirzoyan parlamentdə deputatların suallarını cavablandırıb. A.Mirzoyan rəsmi İrəvanın Azərbayacının sülh müqaviləsi ilə bağlı yeni təkliflərini nəzərdən keçirdiyini deyib. Nazir diqqətə çatdırıb ki,rəsmi Bakının təklif etdiyi 5 bənddə Ermənistan üçün qəbuledilməz heç nə yoxdur.
DİA.AZ-ın məlumatına görə, siyasi elmlər doktoru, politoloq Cümşüd Nuriyev bu barədə “Sherg.az”a danışarkən bildirib ki, Azərbaycanın Ermənistana təklif etdiyi beş prinsip BMT nizamnaməsinin əvvəlcədən qəbul olunan on əsas prinsipinin birinci beşliyinə daxildir:
“Ölkələrin ərazi bütövlüyü, sərhədlərin tanınması, dövlətlərin bir-birinin daxili işinə qarışmaması, bir-birinə qarşı zor tətbiq etməməsi məsələsi də dünya tərəfindən qəbul edilən prinsiplərdir. Paşinyan bunu Mirzoyandan öncə qəbul edib. Təbii ki, bu təklif olunan beş bənddə Azərbaycan üçün olan ən əsas məsələ ərazi bütövlüyünün Ermənistan tərəfindən tanınmasıdır. Beynəlxalq hüquq da bunu dəstəklədiyi üçün Ermənistanın qəbul etməkdən başqa yolu yoxdur.
Digər tərəfdən rəsmi İrəvan indi elə bir vəziyyətdədir ki, Azərbaycana şərt qoya bilmir. Bütün müzakirələrdə şərtləri həmişə qalib tərəf müəyyənləşdirir. Məğlub tərəfin həmin şərtlərlə razılaşır ya yox bu, onun problemidir. Ermənistan tərəfi razılaşmamaq variantını bir neçə dəfə yoxlasa da, bir şey alınmadı”.
Ekspertin sözlərinə görə, hadisələrin gedişi artıq Ermənistan çıxılmaz bir dalana girdiyini göstərir və rəsmi İrəvan sülh müqaviləsini imzalamasa, həmin dalandan çıxa bilməz:
“Azərbaycan tərəfi onu siyasi bir çıxmaza salıb. Sülh müqaviləsində təbii ki, ölkələrin ərazi bütövlüyü, sərhədlərin delimitasiyası və demarkasiyası gündəmə gəlir.
Ermənistan siyasi rəhbərliyi digər dövlətlərlə münasibətlərində vahid mövqeyə malik olmadığına görə, indi Avropa İttifaqı onu bu məsələni yekunlaşdırmağa məcbur edir. İndiki halda sülh müqaviləsinin ilkin variantının ilin sonuna qədər hazırlanması gözləniləndir".