ABŞ Prezidenti Co Bayden Varşavada moldovalı həmkarı Maya Sandu ilə görüşüb.

Bu barədə Moldova mətbuatı məlumat paylaşıb. Bildirilib ki, tərəflər Ukrayna müharibəsinin Moldova üçün nəticələrini müzakirə ediblər. Qeyd olunub ki, Sandu söhbət zamanı ölkəsinin azad dünyanın bir parçası olaraq qalmaq istədiyini bildirib və Moldova rəsmilərinin ölkədə sülh və sabitliyi qorumaq səyləri ilə bağlı danışıb.

Maya Sandu müharibə fonunda Moldovanın iqtisadi sabitliyini gücləndirmək üçün ABŞ-ın daha çox dəstəyinə ehtiyac duyduğunu qeyd edib. Moldova Prezidentinin Baydeni ölkəsinə bir daha səfər etməyə dəvət etdiyi bildirilib.

Rusiya Xarici İşlər Nazirliyi Xankəndidəki separatçı tör-töküntülərinin “xarici işlər naziri” Sergey Qazaryanın Rusiyaya səfər etməsinə və görüşlər keçirməsinə münasibət bildirib.

APA-nın Moskva müxbiri xəbər verir, Rusiya XİN-in rəsmi nümayəndəsi Mariya Zaxarova bu gün keçirdiyi brifinqdə Sergey Qazaryanın Rusiya Federasiyası ərazisində şəxsi məqsədlərlə səfərdə olduğunu vurğulayıb.

Rusiya XİN rəsmisi onun keçirdiyi görüşlər barədə məlumata malik olmadığını qeyd edib.

“Onun burda olmasının hansısa rəsmi statusundan söhbət getmir və gedə də bilməz, hətta biz hansısa təmaslar haqqında bilsəydik belə... Haradasa bu səfər işgüzar səfər kimi təqdim olunub. Hesab edirik ki, belə səfərə bu cür baxıla bilməz. Bu, bizim mövqeyimizdir”, - Zaxarova əlavə edib.

Ukraynanın xarici işlər naziri, müdafiə naziri və Avropa İttifaqının Xarici siyasət və Təhlükəsizlik məsələləri üzrə Ali Nümayəndəsinin iştirakı ilə məsləhətləşmələr keçiriləcək.

Bu barədə Aİ-nin Ali Nümayəndəsi Cozep Borrell bildirib.

Onun sözlərinə görə, bu barədə bu gün Ukrayna xarici işlər naziri Dmitri Kuleba ilə görüşdə razılaşma əldə olunub:

"Biz xarici işlər naziri Dmitri Kuleba, müdafiə naziri Oleksiy Reznikov və mənim iştirakımla xarici, təhlükəsizlik və müdafiə siyasəti ilə bağlı müntəzəm olaraq illik məsləhətləşmələr keçirmək barədə razılaşdıq".

"Rusiya, Azərbaycan və Ermənistan liderləri arasında əldə olunan razılaşmalar Cənubi Qafqazda təhlükəsizliyin və sabitliyin təmin edilməsində əsas amil olaraq qalır".

Bunu Rusiya Xarici İşlər Nazirliyinin sözçüsü Mariya Zaxarova deyib.

"Biz əminik ki, Rusiya, Azərbaycan və Ermənistan liderləri arasında imzalanmış sazişlər yaxın gələcəkdə regionda sabitlik və təhlükəsizliyin əsas amili olaraq qalır. Onların hərtərəfli həyata keçirilməsi, o cümlədən nəqliyyat blokadasının açılması, Ermənistan-Azərbaycan sərhədinin delimitasiyası, eləcə də sülh müqaviləsinin hazırlanması üzrə danışıqlar regionda vəziyyətin yaxşılaşdırılması üçün birbaşa yoldur. Rusiya buna hər cür töhfə verməyə hazırdır”.

"Növbəti günlər həm Ukraynadakı müharibə, həm də ümumilikdə bütün dünya üçün həlledici olacaq".

“Report” “RBC-Ukraina”ya istinadən xəbər verir ki, bunu Almaniyanın xarici işlər naziri Annalena Berbok filippinli həmkarı Enrike Manalo ilə Berlində danışıqlardan sonra keçirdiyi mətbuat konfransında deyib.

"Bu müharibənin bütün dünya üçün dəhşətli nəticələri var. Ona görə də məhz bu günlərdə Nyu-Yorkda bütün dünya Vladimir Putinə müraciət edərək müharibəni dayandırmağa çağıracaq”, - Almaniya XİN rəhbəri vurğulayıb.

Münhen Təhlükəsizlik Konfransına bu dəfə İran rəsmiləri dəvət olunmadı. Bu onu göstərir ki, İranı iqnor edirlər. Konfransda İrana dair bəzi məsələlər müzakirə olundu. Əsas müzakirə predmeti İranın nüvə silahı, Ukraynadakı müharibədə PUA-ları göndərməklə Rusiyaya yardım etməsi və ölkədəki etirazlar idi. Bu konfransa İranla barəbər Rusiya da dəvət olunmayıb. Bununla da həm Rusiyaya, həm də İrana münasibət ortaya qoyuldu.

Bu sözləri Axar.az-a (Güney) Azərbaycan Mərkəz Partiyasının üzvü Elyar Kəmrani Münhen Konfransı ilə bağlı danışarkən deyib.

O bildirib ki, İranın Rusiyaya yardımı Qərb ölkələrini çətin vəziyyətdə qoyub:

“Avropa Birliyi, açıq desək, İranla alverdədir. Rejimin dəyişməsini istəmir. Onlar İranı masa arxasına gətirib, danışmaq istəyirlər. Əsl məsələ budur ki, orada gedən danışıqlarda etirazlardan daha çox, nüvə proqramı və Ukrayna məsələsinin müzakirəsi diqqət çəkdi. Bu isə onu göstərir ki, Qərb İranın nüvə məsələsinə görə daha çox narahatdır, nəinki İrandakı qeyri-demokratik sistemdən”.

Konfransa Mərkəz Partiyasının dəvət almadığını deyən Elyar Kamrani müxalifət nümayəndəsi kimi Rza Pəhləvinin olmasının daha çox diqqət çəkdiyini bildirib:

“Rza Pəhləvi bütün İran müxaliflərinin nümayəndəsi sayılmaz. Onu konfransa dəvət etmələri bəzi güclərin tövsiyəsi ilə baş tutub. Bu isə Qərbin İranın daxilindəki reallıqdan nə qədər xəbərsiz olduğunu göstərir. Pəhləvini dəstəkləməklə yalnız İranın bir qisminə təzyiq göstərə bilər, amma hamısına təzyiq edə bilməz. İranda əksəriyyət Pəhləvinin ordakı iştirakından narazıdır. Buna da etiraz edirlər. O, İrandakı narazıların hamısının adından danışa bilməz”.

O, həmçinin, İranda yaşayan xalqların haqlarının konfransda müzakirə mövzusu olmadığına toxunub:

“Oradakı danışıqlarda İranda yaşayan millətlərin haqqı ilə bağlı müzakirələr yox idi. Onların da təbii haqları, aktiv fəaliyyətləri və mübarizləri vardır. Bunları nə Qərb görür, nə də Pəhləvini dəstəkləyən güclər. Pəhləvi səltənətçiləri və bir sıra insanları təmsil etdiyi üçün onu alternativ olaraq görmürük. Qərbin İrandakı qeyri-fars millətlərin haqqına hörmət etmir. Hətta konfransda da bütün söhbətlər oldu, lakin qeyri-farsların haqqından danışılmadı. Pəhləvi əvvəlki çıxışlarında danışdığı kimi, ancaq ümumi olaraq, birlikdən söz açırdı. Birlik isə yalnız öz yaxınları və müşavirləri ilə deyil, bütün spektirlərlə, hər kəslə ola bilər. Mediadan və konfransdan izlədiyim qədəri ilə onun bir kəlməsində Cənubi Azərbaycan sözü yox idi. Əslində onların etiqadlarında Cənubi Azərbaycanın mənası yoxdur. Nə onlar bizi, nə biz onları rəsmi olaraq tanıyırıq. Keçən illərdə ondan ana dilində təhsil ilə bağlı fikrini soruşanda, məsxərə və zarafat adlandırdı. Bəziləri deyir ki, onun anası azərbaycanlıdır, o bizə yardım edər. Yox, onun anası nə qədər azərbaycanlıdırsa, bir o qədər də Xamenei türk sayıla bilər. İkisinin də Azərbaycana necə xəyanət etdikləri hər kəsə bəllidir”.

ATƏT-in fəaliyyətdə olan sədri, Şimali Makedoniyanın xarici işlər naziri Buyar Osmani fevralın 20-də Türkiyəyə səfər edəcək.

Teref.az Apa-ya istinadən xəbər verir ki, bu barədə Türkiyə XİN məlumat yayıb.

Diplomatı səfərdə ATƏT-in Baş katibi Helqa Smit müşayiət edəcək. Səfər zamanı diplomatlar Türkiyənin xarici işlər naziri Mövlud Çavuşoğlu ilə görüşəcək, zəlzələnin nəticələri barədə məlumat alacaqlar.

ABŞ müdafiə nazirinin müavini Maykl Çeysin Çinlə suverenlik münaqişəsində olan Tayvana səfər etdiyi iddia edilib.

Musavat.com xəbər verir ki, Financial Times-ın nazirlikdəki adı açıqlanmayan mənbələrə istinadən verdiyi məlumata görə, Çinlə bağlı məsələlər üzrə nazir müavini Çeyz Monqolustandakı təmaslarından sonra fevral 17-də axşam saatlarında adaya gəlib.

ABŞ və Tayvan rəsmiləri səfəri təsdiqləməkdən imtina etsələr də, çoxsaylı beynəlxalq və yerli media Çeysin Tayvanda olduğunu bildirib.

ABŞ Müdafiə Nazirliyinin sözçüsü, polkovnik-leytenant Martin Mayners səfərlə bağlı açıq şərh verməkdən yayınıb: "Birləşmiş Ştatların Çin təhdidinə qarşı Tayvana dəstəyi və müdafiə əlaqələri davam edəcək. Bizim Tayvana olan bağlılığımız möhkəmdir və sülhün qorunmasına töhfə verir. Bu, Tayvan boğazında və regionda sabitliyi təmin edir.”

Tayvanın müdafiə naziri Çiu Kuo-Çenq "Taiwan News" saytına deyib: "Biz hər bir (xarici) nümayəndə heyətinin Tayvanın xeyrinə olan səfərini görürük, bunlar bizim üçün yaxşı imkanlardır".

Nazir Çiu da mümkün səfərlə bağlı təfərrüatlar verməkdən imtina edib.

İddialar doğrudursa, Çeyz 2019-cu ildən bəri adaya ilk dəfə səfər edən nazirliyin yüksək səviyyəli rəsmisi hesab olunur. Yüksək səviyyəli səfərin adanı öz ərazisinin bir hissəsi kimi görən Çinin sərt reaksiyasını səbəb olacağı təxmin edilir.

Çin Xarici İşlər Nazirliyinin sözçüsü Vanq Vinbin dünən Pekində keçirilən növbəti mətbuat konfransında bildirib ki, Çin ABŞ ilə Tayvan arasında rəsmi təmasların və hərbi əlaqələrin qurulmasına qəti şəkildə qarşıdır. O, Vaşinqton administrasiyasını “vahid Çin” prinsipini dəstəkləməyə, həmçinin ABŞ-ı Çin və Birləşmiş Ştatlar arasında diplomatik münasibətlərin əsasını təşkil edən Üç Birgə Bəyannamədəki öhdəliklərinə əməl etməyə çağırıb.

Digər tərəfdən, Çin ordusunun səfər iddiasından sonra ada ətrafında hərbi fəallığının artdığı bildirilib. Tayvan Müdafiə Nazirliyi dünən axşamdan bu gün səhərə qədər adanın ətrafında Çinə məxsus 24 hərbi təyyarə və 4 döyüş gəmisinin aşkarlandığını açıqlayıb.

İddia olunan səfərin ABŞ-ın Çinə məxsus hava şarını vurması nəticəsində iki ölkə arasında münasibətlərin gərginlik və etibarsızlıq dövrünə təsadüf etməsi diqqət çəkir.

Qeyd edək ki, ABŞ prezidenti Co Bayden bir neçə gün əvvəl verdiyi açıqlamada problemi həll etmək üçün çinli həmkarı Xi Jinping ilə görüşmək istədiyini bildirib.

Bundan başqa, iddia edilir ki, ABŞ dövlət katibi Entoni Blinken Münhen Təhlükəsizlik Konfransında böhranını həll etmək üçün Çinin yüksək səviyyəli diplomatı, Çin Kommunist Partiyası Mərkəzi Xarici Əlaqələr Komissiyası Ofisinin direktoru Vanq Yi ilə üz-üzə görüşmək istəyib.