“AZ FP CO LTD” MMC-nin Azərbaycan Respublikasının Qida Təhlükəsizliyi Agentliyinə (AQTA) müraciəti əsasında, istehlaka yararsız və istifadə müddəti bitmiş 74 adda, 12,5 ton müxtəlif növ süd məhsulları məhv edilib.

Yeniavaz.com xəbər veri ki, bu barədə AQTA-dan məlumat verilib.

Məlumat üçün qeyd edək ki, son aylar AQTA “AZ FP CO LTD” MMC-nin müraciəti əsasında mütəmadi olaraq istehlaka yararsız və istifadə müddəti bitmiş tonlarla yararsız məhsulu məhv edib. Son 2 ay ərzində edilən 7 müraciətdən sonra ümumilikdə 75 000 kq yaxın yararsız məhsul məhv edilib.

Təkcə bu ay ərzində istehlaka yararsız və istifadə müddəti bitmiş məhsulların məhv edilməsilə bağlı AQTA-ya 4 müraciət daxil olub və onlardan 3-ü “AZ FP CO LTD” MMC-yə məxsus olub.

Onu da bildirək ki, Azərbaycanın aparıcı süd məhsulları istehsalçılarından biri olan “AZ FP CO LTD” MMC (VÖEN-1300995031) öz məhsullarını bazara “Milla” markası ilə çıxarır.

“AZ FP CO LTD” MMC dövlət qeydiyyatına 2006-cı ildə alınıb. Nizamnamə kapitalı 41 milyon 131 min 38 manat olan MMC-nin hüquqi ünvanı Abşeron rayonu, Hökməli ŞTQ (Bakı-Şamaxı Şossesi), ev 15-ci km-də yerləşir. Hazırda şirkətə Azər Vahabzadə rəhbərlik edir.
Qeyd edək ki, “AZ FP CO LTD” MMC yeni açılan zaman şirkətə İran əsilli iş adamı Mənuçehr Əhədpur Xangah rəhbərlik edib. Mənuçehr Əhədpur Xangah hazırda Yasamal rayon, Haqverdiyev ev 21 ünvanında yerləşən onlarla şirkətə rəhbərlik edir. Mənuçehr Əhədpur Xangahın adı uzun müddət mətbuatda fövqəladə hallar naziri Kəmaləddin Heydərovun ailə üzvlərinə aid olan “Gilan” holdinqlə birgə çəkilib.

Rusiyanın Çinlə iqtisadi əməkdaşlıqda yuana keçməsi çinli sahibkarlar üçün xeyli qazanclı olub.

Axar.az “Röyters”ə istinadən xəbər verir ki, bu barədə danışan çinli iş adamı Vanq Minq Rusiyanın yuana keçməsindən məmnun olduqlarını bildirib.

Minq söyləyib ki, LED işıqlandırma şirkəti rus müştəriləri ilə dollar və ya avro əvəzinə yuanla müqavilə bağlaya bilər və bundan qazanacaqlar. Belə ki, tətbiq edilən sanksiyalar səbəbindən Rusiya bankları və şirkətləri dollar və avro ilə ödəniş sistemlərindən məhrum olub. Milli valyutalarla alış-veriş isə Çinin Rusiyaya artan ixracında yuanın mövqelərini möhkəmləndirir.

Qeyd edək ki, Moskva birjasında ümumi yuan-rubl ticarət həcmi keçən ay orta hesabla sutkada təxminən 9 milyard yuana (1,25 milyard dollar) yüksəlib. Halbuki əvvəllər həftədə 1 milyard dollar nadir hallarda qalxırdı.

Oktyabr ayında yuan və rubl ticarəti 185 milyard yuan təşkil edib ki, bu da fevraldakı həcmdən 80 dəfə çoxdur.

DTX-nın Naxçıvanda keçirdiyi əməliyyatlar nəticəsində bir sıra maliyyə yeyintilərinin, mənimsimələrin üstünün açılması cəmiyyətdə geniş müzakirələrə səbəb olub.

Bu gün isə Naxçıvanın maliyyə naziri Rafael Əliyevin DTX tərəfindən həbs olunduğu məlum olub. O, vəzifə səlahiyyətlərindən sui-istifadə edərək müxtəlif yollarla “xüsusilə külli miqdar” təşkil edən 144 milyon manat dövlət vəsaitini mənimsəməkdə təqsirləndirilir.

"Qafqazinfo" xəbər verir ki, Rafael Əliyev iki ildən çoxdur nazir təyin olunsa da, onunla bağlı internetdə yeganə məlumat daha əvvəl Naxçıvan MR Gömrük Komitəsinin Gömrük tariflərinin tənzimlənməsi və ödənişlər şöbəsinin rəisi olmasıdır.

Bir müddət əvvəl isə Naxçıvan Ali Məclisinin sədri Vasif Talıbovun da iştirak etdiyi tədbirdə nazir Rafael Əliyev maliyyə vəsaitlərinin səmərəli və qənaətlə istifadəsindən, məsuliyyətdən, həmçinin şəffaflığın artırılmasından danışıb.


“Maliyyə Nazirliyinin və tabeliyindəki təşkilatların yeni inzibati binalarda yerləşməsi, daha operativ idarəetməni təmin etməyə imkan verir, əməkdaşların iş əmsalını və məsuliyyətini artırır. Hazırda Maliyyə Nazirliyinin sistemində təkmilləşdirilmiş və çevik idarəetmənin təmin edilməsi, şəffaflığın artırılması üçün elektron xidmətlər geniş tətbiq olunur. İnfrastruktur təminatı ilə yanaşı, Naxçıvan Muxtar Respublikasının bütün maliyyə institutlarının qarşılıqlı əlaqəsinə nail olunmuş, dövlət maliyyə nəzarət tədbirlərinin əhatə dairəsi genişləndilmiş, maliyyə vəsaitlərinin səmərəli və qənaətlə istifadəsinə diqqət artırılıb. Yaradılan şəraitə uyğun olaraq nazirliyin kollektivi də işini müasir tələblərə uyğun qurur, qarşılıqlı olaraq vəzifələrinin icrası üçün səylə çalışır”, - deyə maliyyə naziri bildirib.

Nəticədə Naxçıvan gömrüyündə yığılan pulların hər 5 manatından 1 manatı büdcəyə, 4 manatı isə gömrüyün şöbə müdirinin hesabına gedib. Yəni, 80% özünə, 20% büdcəyə. Sonra da deyirlər ki, uşaqpulu verməyə vəsait yoxdur.
Belə korrupsiya olmur, bu külli miqdarda oğurluq da deyil, bu talançılıqdır, dövlətin məhvidir!
Dövlət Təhlükəsizliyi Xidmətində (DTX) aparılan cinayət işi üzrə müstəntiqin Naxçıvan Muxtar Respublikası Dövlət Gömrük Komitəsinin Gömrük tariflərinin tənzimlənməsi və ödənişlər şöbəsinin rəisi Əsgərov Mənsur Turan oğlu barəsində vəsatətinə baxılıb.Səbail Rayon Məhkəməsində keçirilən prosesdə vəsatət təmin edilib. Məhkəmədə Mənsur Əsgərov barəsində 4 ay müddətinə həbs qətimkan tədbiri seçilib.
Cinayət işi üzrə araşdırmalar Komitədə “xüsusilə külli miqdarda” mənimsəmənin üstünü açıb. Belə ki, Mənsur Əsgərov qabaqcadan əlbir olan bir qrup şəxs halında 132 milyon manat dövlət vəsaitini mənimsəməkdə ittiham olunur. İttihamın mahiyyətindən görünür ki, NMR DGK vəzifəli şəxsləri dövlət gömrük rüsumlarının rəsmiləşdirildiyi ümumi elektron sistemdən əlavə, rəsmiləşdirilmədən idxal olunan mallara görə qeyri-rəsmi ikinci yığım sistemi yaradıblar.
Naxçıvanın 2021-ci il üçün büddcənin icrasına dair açıqlanan rəqəmlərdən məlum olur ki, həmin il ərzində muxtar respublikanın dotasuyadan kənar büdcə gəlirlərinin 21,6 faizini və ya 31 milyon 405 milyon manatını gömrük ödənişləri təşkil edib. DTX isə Naxçıvanda Gömrük Komitəsinin şöbə rəisinin 132 milyon manat, yəni rəsmi olaraq Naxçıvan büdcəsində gömrükdən 1 il ərzində daxilolmalardan 4,2 dəfə çox vəsaitin mənimsədiyini iddia edir. Belə çıxır ki, gömrükdən Naxçıvan büdcəsinə gündə 86 041 manat daxil olduğu halda, yalnız Naxçıvan Gömrük Komitəsinin şöbə rəisinin gündəlik qazancı 361 643 manat olub. Naxçıvanda 1 gömrük məmurunun oğurluğu il ərzində muxtar respublikanın büdcəsinə daxil olan məbləğdən 100 milyon manat çox olub. Buna nə ad vermək olar? Belə korrupsiya olmur, bu külli miqdarda oğurluq da deyil, bu talançılıqdır, hələ də davam edir.
P.S. Nəzərə alın ki, hesablamalarım 1 ilin bazasındadır. Amma bu oğurluq on illərdir ki, davam edir.
Gubad Ibadoglu
Teref.az

Azərbaycanda avtomobil parkı yenilənəcək, istismar müddətini başa vuran maşınlar utilizasiyaya göndəriləcək. Bunun əvəzində vətəndaşlara yeni avtomobil almaları üçün şərait yaradılacaq.

Ölkədə köhnə nəqliyyat vasitələrinin utilizasiyası ilə bağlı bir neçə dövlət qurumu tərəfindən birgə layihə hazırlanıb.

Belə ki, “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”nın 7.3.7.1-ci bəndində Azərbaycan Respublikasında yol hərəkətinin təhlükəsizlik səviyyəsini yüksəltmək, ekoloji vəziyyəti yaxşılaşdırmaq, eləcə də yerli avtomobil istehsalını stimullaşdırmaq məqsədilə köhnə, texniki-təhlükəsizlik və ekoloji cəhətdən yararsız nəqliyyat vasitələrinin utilizasiya proqramının hazırlanması və tətbiqi nəzərdə tutulub.

Layihə nəticəsində yol hərəkəti və ekologiya üçün təhlükəli hesab edilən köhnə nəqliyyat vasitələri utilizasiya ediləcək, yollarda şütüyən köhnə avtomobillər isə mərhələli şəkildə yeniləri ilə əvəzlənəcək. Bildirilir ki, istismar müddətini başa vuran, ekoloji cəhətdən təhlükəli hesab edilən nəqliyyat vasitəsini utilizasiyaya göndərən avtomobil sahiblərinə pul vəsaiti veriləcək və ya digər güzəştlər tətbiq ediləcək.

Bu layihənin həyata keçirilməsi zamanı vətəndaşları maraqlandıran məsələlərdən biri köhnə avtomobillərin hansı qaydada utilizasiyaya göndəriləcəyi, hansı şərtlərlə yeni avtomobilləri ala biləcəkləridir. Məsələnin aktuallığını nəzərə alaraq Baku.ws Azərbaycan Respublikası İqtisadiyyat Nazirliyinə sorğu göndərib.

Nazirlikdən sorğuya cavab olaraq bildirilib ki, “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”nın Tədbirlər Planının 7.3.7.1-ci bəndinə əsasən, “Nəqliyyat vasitələrinin utilizasiyası proqramının hazırlanması və tətbiqi” istiqamətində işlər davam etdirilir:

“Proqram çərçivəsində nəqliyyat vasitələrinin utilizasiyasının tam könüllülük əsasında həyata keçirilməsi, o cümlədən bu istiqamətdə müəyyən stimullaşdırıcı tədbirlər nəzərdə tutulur.

Belə ki, vətəndaş könüllü şəkildə nəqliyyat vasitəsini utilizasiyaya verdikdən sonra ona təqdim ediləcək təsdiqedici sənəd əsasında yeni istehsal olunmuş avtomobil almaq istədikdə müəyyən qədər güzəşt əldə edəcək. Bundan başqa, təsdiqedici sənəd əsasında müəyyən məbləğin birdəfəlik ödəniş kimi alınması imkanı da nəzərdə tutulub.

Layihə hazırda dövlət qurumları ilə razılaşdırma mərhələsində olduğundan layihənin detalları barədə ətraflı məlumat aidiyyəti normativ sənədlər təsdiq edildikdən sonra veriləcək”

“Türkiyə birjası 2022-ci ildə dünyanın ən gəlirli bazarı olub”.

Bu barədə “Bloomberg” məlumat yayıb.

Vurğulanıb ki, “Borsa İstanbul 100” indeksi bu il lirə ilə 150%, dollar ifadəsində isə 80% artıb. Bu, 1999-cu ildən bəri ən yaxşı nəticədir: “Türkiyə səhmləri bu il qlobal miqyasda ən yaxşı performans göstərir”.

“Bloomberg” qeyd edib ki, bu vəziyyət Türkiyə hakimiyyətinin bir çox digər ölkələrdən fərqli olaraq qiymətli kağızların yenidən maliyyələşdirmə dərəcəsini aşağı salan pul siyasəti, eləcə də yüksək inflyasiya dərəcələri ilə bağlıdır.

“Strateji Portfoy” şirkətinin əməkdaşı Burak Çetinçeker bildirib ki, real faiz məsələsində ciddi dəyişiklik olmadığı müddətcə investorların Türkiyə səhmlərinə marağı qalacaq.

Türkiyə səhmlərinin yüksək gəlirliyi 2023-cü ilin ortalarına qədər davam edə bilər.

“Sardis Research Consultancy” şirkətinin qurucusu Evren Kırıkoğlu deyib ki, səhmlər inflyasiya azalsa belə, ən azı gələn ilin birinci yarısına qədər cəlbedici qalacaq.