Gürcü müəllifinin qələmə aldığı əsərdə erməni saxtakarlığı ifşa olunur
Erməni millətçiləri davamlı olaraq təxribat xarakterli çıxışlar edərək öz məkrli niyyətlərini həyata keçirməyə çalışırlar. Bu baxımdan onların bu yaxında daha bir təxribat xarakterli müsahibəsi qeydə alınıb. Belə ki, 2022-ci ilin oktyabrın 5-də erməni əsilli milyarder Ruben Vardanyan “Armenia Today” informasiya agentliyinə verdiyi müsahibə zamanı erməni xalqına çağırış edərək “Artsax”ın “təhlükəsizliyini təmin etmək üçün” hər kəsi birləşməyə çağırıb. R.Vardanyan sözügedən müsahibəni Qlobal İnformasiya Forumu zamanı jurnalistlərə verib [1].
Qeyd etmək yerinə düşər ki, erməni millətçiləri Qarabağı yenidən “Artsax” kimi qələmə verərək, azərbaycanlılara aid əzəli torpaqların guya “təhlükəsizliyini təmin etməyə çalışdıqlarını” dilə gətirirlər. Halbuki yalanın ayaq açmağı heç də onun həmişə yeriyə biləcəyi anlamına gəlmir. Belə bir sual ortaya çıxır: Necə ola bilər ki, Azərbaycanın əzəli torpaqlarını uzun illər boyu əsarət altında saxlayan, oradakı azərbaycanlılara qarşı misli görünməmiş qətllər törədən və həmin yerlərin alban abidələrini dağıdaraq, saxtalaşdıraraq öz adlarına çıxarmağa cəhd edən işğalçı Ermənistan birdən-birə “regionun təhlükəsizliyinin təminatçısı”na çevrilir? Təbii ki, belə bir məqamdan da yenə Ermənistanın heç dəyişməyən əvvəlki “dəsti-xətti” görünür. Erməni millətçilərinin “Böyük Ermənistan” arzusu bu dəfə də fərqli obrazda bizə təqdim olunur. Məqsəd yenə dəyişməz olaraq qalır. Erməni millətçiləri yenə dünyanı öz yalanlarına inandırmağa cəhd edirlər. Sual olunur ki, nağıl, əfsanə, rəvayət və ya mif necə reallıq ola bilər? Belə bir şey qeyri-mümkündür. Bunun adı sadəcə erməni xəstəliyidir.
Erməni millətçilərinin fikrinə görə, bütün mübahisələrdə yeganə haqlı tərəf olanlar ancaq onlardır. Məlum bir faktın göz qabağında olmasına baxmayaraq, erməni millətçiləri məkrli niyyətlərindən ötrü yeri gələndə orjinal tarixi sənədləri də saxtalaşdıraraq ona-buna sırımağa cəhd edirlər. Gürcü müəllifi Quram Marxuliya həmmüəllifi olduğu “Çox səbirli Ermənistan: miflər və reallıqlar” adlı əsərində erməni millətçilərinin Azərbaycanın, eləcə də Cənubi Qafqazın mədəni irsini öz adlarına çıxarmaq cəhdini təsdiq edir [2].

Bir çoxları ermənilərin Şərqi Anadoludakı türk torpaqlarına olan iddialarının legitimliyinə haqq qazandırmağa çalışırlar. Bu insanlar sadəcə olaraq belə tələblərin xalqların hüquqlarını və beynəlxalq hüquq normalarını pozduğuna məhəl qoymurlar, çünki əslində bu torpaqlarda ermənilər yaşamayıblar. Erməni separatçılarının əksəriyyəti 1915-ci ildə Osmanlı İmperiyası ilə məkrli niyyətlərindən ötrü müharibə aparıblar. Bu faktı Ermənistanın milli liderləri də dəfələrlə təsdiq ediblər. Vətəndaş müharibəsinin başlamasına səbəb olanlar da erməni separatçıları idi. Onlar bu yolla Şərqi Anadoluda, əsasən də Van şəhərində yaşayan bir çox müsəlmanların ölümünə səbəb oldular [2].
Erməni separatçıları məqsədyönlü şəkildə tarixi istədikləri kimi təhrif edərək, ermənilərin Şərqi Anadolu ərazisinə iddialarının qanuniliyini saxta sənədlərlə əsaslandırmağa çalışırlar. “Erməni yazar”ları tərəfindən qələmə alınan hər bir əsərdə hay xalqına məxsus reallığa uyğun olmayan tarixi portretlər təsvir olunur. Erməni təxribatçıları hətta hayların guya Nuhun birbaşa nəsli olmasını isbat edən uydurulmuş “Ararat əfsanəsi”ni dilə gətirirlər [2]. Lakin “erməni yazarları”nın bu cür saxtakarlıq cəhdi də uğursuzluğa məhkumdur. Çünki reallıqda həqiqət tamamilə fərqli görünür. Görünüşə görə, saxtakar “erməni tədqiqatçıları” özlərini haqlı çıxarmaq üçün hər növ bəhanədən istifadə etməyə hazırdırlar.
Saxtakar “erməni yazarları” hər zaman öz məkrli niyyətlərinə “haqq qazandırıblar”. “Erməni tədqiqatçıları”na məxsus hər bir mücərrəd ideya tarixin saxtalaşdırılmasına yol açır. Həqiqətdən xəbəri olmayan başqa bir erməni tədqiqatçısı isə kor-koranə şəkildə həmin mücərrəd “erməni ideyası”na istinad edir. Rus yazıçısı Çexovun belə bir gözəl fikri var: “Yalan meşəyə bənzəyir. Meşənin dərinliyinə girməyə davam etdikcə, oradan çıxmaq bir o qədər daha da çətin olur”.
Məşhur gürcü ziyalısı Bondo Arveladze 2010-cu ilin fevralın 10-da Gürcüstanda 1news.az informasiya agentliyinə verdiyi müsahibəsində belə bir fikir səsləndirir: “Əllərində qələmlə silahlanmış qondarma “erməni alimləri” hücuma keçərək əzəli gürcü torpaqlarının və bütün tarixi abidələrin ermənilərə aid olduğunu elan etməyə çalışırlar. Yeri gəlmişkən, ermənilər təkcə Gürcüstan torpaqlarına deyil, həm də Azərbaycan torpaqlarına da iddia edirlər. Xalqlarımızın yaratdığı bütün mədəni dəyərlər, belə çıxır ki, ermənilərin yaradıcılığının bəhrəsidir! Məsələn, Tao-Klarcetinin və onun memarlığının, həmçinin, qədim alban memarlığının ermənilərə aid olduğunu elan edirlər. Bu tip “erməni alimləri”nin ləyaqətsiz əməlləri yeni hadisə olmasa da, belə “yaradıcılığa” göz yummaq onların əcdadlarının xatirəsini unutdurmağa bərabərdir” [3].

İstifadə olunmuş mənbələr:
1. Рубен Варданян призвал объединиться для обеспечения безопасности Арцаха /05.10.2022/ https://armeniatoday.news/republicofartsakh-ru/535227/
2. Гурам Мархулиа, Шабнам Нуриева. «Многострадальная Армения»: мифы и реальность. Баку 2011. Стр. 344.
3. Бондо Арвеладзе: «Все культурные ценности, созданные нашими народами, оказывается, плоды творения армян!» /10.02.2010/ https://1news.az/interview/20100210101522964.html
Kamal Salayev
AMEA-nın Qafqazşünaslıq İnstitutunun
Gürcüstanşünaslıq şöbəsinin kiçik elmi işçisi
Teref.az

Belarus Prezidenti Aleksandr Lukaşenko rusiyalı həmkarı Vladimir Putinə 70 illik yubileyi münasibətilə “BELARUS” traktoru hədiyyə edəcək.

Bbu barədə məlumatı Rusiya mediası yayıb.

Bununla yanaşı, “Pul Pervoqo” teleqram kanalında sözügedən traktorun sertifikatının fotosu da paylaşılıb.

Sertifikatda isə yazılıb: “Vladimir Vladimiroviç Putinə. Yubileyi münasibətilə. Belarus Respublikasının Prezidenti A.Q.Lukaşenko”.

Xatırladaq ki, bu gün Vladimir Putinin 70 yaşı tamam olur.

Ukrayna Rusiyanın Kuril adalarını rəsmən Yaponiya ərazisi kimi tanıyıb.

TİA.AZ UNIAN-a istinadən xəbər verir ki, qərarı Ali Radanın 287 deputatı dəstəkləyib.

Ukrayna parlamenti həmçinin beynəlxalq ictimaiyyəti Yaponiyanın şimal ərazilərinin hüquqi statusu ilə bağlı tədbirləri davam etdirməyə çağırıb.

Qeyd edək ki, Yaponiya Kuril zəncirinin dörd cənub adasına – İturup, Şikotan, Kunaşir və Habomaiyə İkinci Dünya müharibəsinin sonundan, yəni Sovet İttifaqı tərəfindən ilhaq edildikdən bəri iddia edir. 1956-cı ildə rəsmi Moskva və Tokio hərbi əməliyyatların dayandırılması haqqında bəyannamə imzalayıblar, lakin sülh müqaviləsi heç vaxt bağlanmayıb.

Yaponiya diplomatları 2003-cü ilə qədər adaları rəsmi olaraq “qanunsuz işğal edilmiş”, 2012-ci ilə qədər isə “dədə-baba torpaqları” adlandırırdı. 2012-ci ildən hökumət Rusiya ilə kompromis əldə etmək ümidi ilə bu cür dildən yayınıb.

Yaponiya 1956-cı il Adalar Bəyannaməsinə qayıtmağa hazır idi. Həmin sənəddə SSRİ iki ölkə arasında sülh müqaviləsi imzalandıqdan sonra Habomai və Şikotan adalarının Yaponiyaya qaytarılmasına razılıq verib. 2019-cu ildə Yaponiyanın Baş naziri Sindzo Abe Kuril adaları ilə bağlı məsələyə son qoyacağına and içdiyini deyib. Lakin onun dövründəki danışıqlar heç bir nəticə verməyib.

Fevralın sonunda Yaponiya Xarici İşlər Nazirliyinin departament direktoru Cənubi Kuril adalarının işğal olunduğunu bildirib. Daha sonra Yaponiyanın xarici işlər naziri Yosimasa Hayasi parlamentdəki çıxışında həmin bölgəni “əzəli yapon ərazisi” adlandırıb. O, ayrıca mətbuat konfransında adaların “qanunsuz işğal olunduğunu” vurğulayıb. Bundan sonra rəsmi Moskva martın 21-də sülh danışıqlarını dayandırdığını açıqlayıb.

Bu gün Praqada keçirilən “Avropa siyasi birliyi”nin sammitində qeyri-rəsmi görüş zamanı Türkiyə Prezidenti Rəcəb Tayyib Ərdoğan fransalı həmkarı Emmanuel Makronu Türk Birliyinin iclasına dəvət edib.

Publika.az Türkiyə mediasına istinadən xəbər verir ki, Praqada mətbuat konfransında çıxış edən Ərdoğan Makronun bununla bağlı verdiyi cavabı açıqlayıb.

“Gələcək. Elə dedi. Hansı mövsümdə gəlim deyə soruşdu. Ən sonra “G20-dən sonra gəlsəm necə olar” deyə soruşdu. Gəl dedik, amma gələndə xanımınla gəl dedik. Zarafatımızı da etdik. Xanımlar yaxşı yola gedir, amma biz səninlə yola gedə bilmirik söylədim”, - deyə Ərdoğan qeyd edib.

Türkiyə Cumhurbaşqanı Rəcəb Tayyib Ərdoğan Praqada kameralar qarşısında Azərbaycan prezidenti İlham Əliyevə və Ermənistanın baş naziri Nikol Paşinyana yaxınlaşıb onlarla qısa söhbət etməsi taktiki gediş idi. Çünki, bir neçə saat sonra Azərbaycan, Ermənistan, Fransa və Avropa İttifaqı liderlərinin dördlü formatda görüşü başlayacaqdı. Rəcəb Tayyib Ərdoğan fransalı həmkarı Emmanuel Makronu qabaqladı.
Elxan Şahinoğlu
Teref.az

ABŞ, Kanada, Tayvan, Polşa, Bolqarıstan, Rumıniya, Latviya, Litva, Estoniya və Moldova da daxil olmaqla dünyanın ondan çox ölkəsi öz vətəndaşlarını Rusiyanı dərhal tərk etməyə çağırıb. Bu gün isə Çexiya da onlara qoşulub.

Nə baş verir? Onlar Rusiyanın bilmədiyi nələri bilirlər? Ruslar artıq narahat olmalıdır, yoxsa bu, hələ də sırf siyasi oyunlardır?

Rusiyada bundan əvvəl də hamı Qərb ölkələrinin öz vətəndaşlarına Ukraynanı dərhal tərk etmək və səfirlikləri Kiyevdən çıxartmaq çağırışlarını sırf siyasi oyun kimi qəbul edirdi. Təbliğatçılar, o cümlədən Rusiya XİN-in rəsmi nümayəndəsi Zaxarova, bu çağırışlara qəzəblə reaksiya verirdilər. Heç kim bunun ciddi olduğuna inanmırdı. Amma fevralın 24-də hamı gülməyi dayandırdı.

Hazırkı böhranın əsasında nə dayanır? İlk növbədə, xarici ölkədə ölmək istəməyən çağırış yaşlı yüz minlərlə rusiyalının səfərbərliyə çağırılması və bundan yayınması (Finlandiya hətta onların qarşısını almaq üçün Rusiya ilə sərhəddə hasar çəkməyə qərar verib). Ancaq bu cür narahatlığın səbəbi təkcə səfərbərlik deyil. Ritorika dəyişir, baş verən hərbi uğursuzluq və geri çəkilmələr fonunda demək olar ki hər gün Ukraynaya qarşı taktiki nüvə silahından istifadə çağırışları səslənir. Özü də ki, rusiyalı siyasətçilər dünyanın bu zərbəyə göz yumacağı, NATO-nun tam miqyaslı nüvə müharibəsindən qorxaraq heç bir şəkildə cavab verməyə cəsarət etməyəcəyinə əminliklərini ifadə edirlər.

Kadırov buna çağırır, Medvedev onun səsinə səs verir, Peskov birmənalı şəkildə nüvə doktrinasına işarə edir və nəhayət Putinin özü də kifayət qədər açıq şəkildə Rusiya ərazilərini (Ukraynanın ilhaq olunaraq Rusiyaya birləşdirildiyi elan edilən dörd regionu) qorumaq üçün “bütün vasitələrdən” istifadə etməyə hazır olduğunu bildirir.

Bu gün “The Times” sensasiyalı iddia ilə çıxış edərək yazıb ki, NATO Rusiyanın tezliklə Ukrayna ilə sərhəddə, böyük ehtimalla Qara dənizdə (İlan adasında?) “nüvə sınaqları” keçirə biləcəyinə inanır və bununla da dünyaya “kütləvi qırğın silahlarından istifadə etmək istəyini nümayiş etdirdiyini” hesab edir. Alyans bütün müttəfiqlərinə bununla bağlı xəbərdarlıq edib.

Amma Qərb açıq şəkildə bildirir ki, daha dözmək fikrində deyil, bu təhlükəli hədəni son hədd olaraq qəbul edir və bundan sonra NATO bütün mümkün sədləri aşan münaqişəyə müdaxilə etməli olacaq. Putinə edilən xəbərdarlıqlar çox sərt səslənir. Onlar ictimaiyyətə təfərrüatsız təqdim edilsə də, bəzən detallar sızır. Bu günlərdə Mərkəzi Kəşfiyyat İdarəsinin keçmiş direktoru David Petreus (o, ağlını tamamilə itirmiş qoca hərbçi deyil, Petreus Putinlə həmyaşıddır) bəyan etdi ki, Ukraynada nüvə silahından istifadə edilərsə, NATO əvvəlcə Rusiyanın Ukrayna və Krımdakı bütün qoşunlarını, hərbi texnikasını və infrastrukturunu, həmçinin Qara dəniz donanmasını məhv edəcək. Bu zaman üçüncü dünya müharibəsinə səbəb olmamaq üçün kütləvi qırğın silahlarından istifadə olunmayacaq.

Necədir?!

Optimizmə səbəb olan yeganə şey odur ki, dünyanın ən güclü kəşfiyyat xidmətlərinə malik olan iki dövlət – Böyük Britaniya və İsrail vətəndaşlarına dərhal Rusiyanı tərk etmək və səfirlikləri boşaltmaqla bağlı xəbərdarlıq etməyiblər. Elə Almaniya və Fransa da hələlik həyəcan təbili çalmayıb. Bu o deməkdir ki, hələ də radioaktiv kül olmaq qorxusu yaranmayıb. Hələlik döyüşdən əvvəl “baxış dueli” gedir. Döyüş özü isə baş tutmaya da bilər…
pressklub

İranın sonuncu şahı Məhəmmədrza Pəhləvinin oğlu Rza Pəhləvi “Yerusəlim Post”a müsahibəsində ölkəsində davam edən rejim əleyhinə kütləvi etiraz aksiyalarından danışıb.

Teref.az Teleqraf.com-a istinadən xəbər verir ki, Pəhləvi baş verənləri “inqilab” adlandırıb və Qərbi İran xalqına dəstək verməyə çağırıb.

“Ölkəm yenidən keşməkeşli dövrdən keçir. İnqilab dövründəyik. İranın yüzlərlə şəhər və kəndində müşahidə etdiyimiz xalq etirazlarının çox aydın bir məqsədi var: islam rejiminin devrilməsi və insan haqlarına əsaslanan dünyəvi demokratiyanın qurulması. Bu mübarizəni mənim cəsur soydaşlarım aparır. Təbii ki, onları bütün varlığımla dəstəkləyirəm və onlara dəstək olmaq və qalib gəlmələri üçün əlimdən gələni edəcəyəm”, - şahın oğlu deyib.

Pəhləvi bildirib ki, Qərb bu inqilabı sözdə dəstəkləməkdən əmələ keçməlidir:

“Həmvətənlərimin internetə çıxışa və artan tətilləri görə dəstəyə ehtiyacı var. Bu ölkələr internet azadlığına hər il milyonlarla dollar xərcləyirlər. İranlıları “Starlink” kimi texnologiya ilə təmin etməkdən daha yaxşı hansı investisiyanı yatıra bilərlər? Tətil etmək üçün risk götürməyə hazır olan işçiləri dəstəkləmək üçün daha yaxşı hansı investisiya qoyula bilər? ABŞ-a gəlincə, nəhayət Prezident Baydenin cəsarətlə küçələrə çıxan iranlı etirazçıları dəstəklədiyini birmənalı şəkildə bəyan etməsinin vaxtı çatıb. O, bu azadlıq hərəkatını cəsarətlə dəstəkləməlidir”.

Pəhləvi İran xalqının itaətsiz şəkildə məqsədinə doğru irəlilədiyini söyləyib.

Şahın oğlu rejim dəyişikliyindən sonra demokratik İranın İsraillə əlaqələrini bərpa edəcəyini iddia edib:

“İran onunla xoş niyyət və qarşılıqlı maraq əsasında əlaqələr qurmaq istəyən bütün xalqlarla olduğu kimi, İsraillə də iqtisadi, mədəni və digər əlaqələr qurmağa çalışacaq".

Rza Pəhləvi dini-siyasi rejimin devrilməsindən sonra onun İranda hakimiyyətə gəlib-gəlməyəcəyi ilə bağlı suala cavabı belə olub:

“Heç vaxt İranı özüm üçün azad etməyə çalışmamışam, İranı həmvətənlərim üçün azad etməyə çalışmışam. Bunu titul və ya vəzifə üçün etmirəm, ölkəm üçün edirəm.

Azad İran heç vaxt nüvə silahı əldə etməyə çalışmaz, çünki bizim buna ehtiyacımız olmayacaq. Əlbəttə ki, Fars körfəzi regionunda və Yaxın Şərqdə İsrail və ərəb xalqları ilə normallaşmanın tərəfdarıyıq. Gələcək, azad İran hamı ilə qarşılıqlı maraq və qarşılıqlı hörmətə əsaslanan münasibətləri normallaşdırmağa çalışacaq. Əgər biz birlikdə çalışsaq, regionumuz qlobal güc mərkəzi ola bilər”.

Rusiya səfirliyi İrandakı iğtişaşlar fonunda rusiyalılara izdihamlı yerlərə getməməyi tövsiyə edib.

Rusiya vətəndaşlarından mümkün insidentlərin qarşısını almaq üçün foto və video çəkilişlərə qoyulan qadağalara ciddi yanaşmalarını xahiş edib.

“İrana yeni gələn və ya artıq orada olan hər kəsə insanların sıx olduğu yerlərə getməməyi tövsiyə edirik. Xatırladırıq ki, İranın böyük şəhərlərində bir çox yerlərdə foto və video çəkilişləri qadağandır. Xahiş edirik ki, insidentlərdən qaçmaq üçün bu qaydalara ciddi əməl edin”, - deyə səfirliyin məlumatında qeyd olunub.