Gürcüstanın Maliyyə Nazirliyi ABŞ istehsalı olan avtomobillərin Rusiya və Belarusa ixrac və təkrar ixracının qadağanını rəsmən təsdiq edib.

“AzPolitika.info” gürcü mediasına istinadla xəbər verir ki, bu qadağan avqustun 1-dən qüvvəyə minib. Xəbər verilir ki, analoji qadağan Avropa İttifaqında istehsal olunmuş avtomobillərə sentyabrın 26-dan tətbiq ediləcək.

Nazirlik bildirir ki, bu qadağan barədə qərar Aİ-nin Rusiyaya qarşı sanksiyalarının 11-ci paketinə uyğun olaraq qəbul edilib. Məlumatda deyilir ki, 2023-ci ilin 1 yanvarından 1 iyulunadək Gürcüstandan ümumi dəyəri 930 milyon dollar olan 51 min avtomobil təkrar ixrac edilib. Bunlardan dəyəri 32 milyon olan 3786 avtomobil Rusiyaya satılıb.

Gürcüstan Maliyyə Nazirliyinin qərarı ilə habelə Ermənistandan ABŞ və Avropa istehsalı avtomobillərin Hərbi-Gürcüstan yolu və Kazbegi Yuxarı Lars sərhəd gömrük məntəqəsindən Rusiyaya ixracına qadağan qoyulub.

Bu da deyilir ki, istisna yalnız Ermənistan vətəndaşının mülkiyyətində olan avtomobillərə tətbiq edilir, beləki onlar avtodiler hesab olunmurlar.

Rusiyalılar (xüsusən də Rusiyanın cənub regionlarından olanlar) son vaxtlaradək Gürcüstana gəlir, Rustavi maşın bazarında Qərb markalı avtomobilləri alaraq Yuxarı Lars məntəqəsindən Rusiyaya aparırdılar.

Xəbərdə deyilir ki, Gürcüstan hakimiyyətinin bu qərarı Qərb partnyorları ilə uzun və mürəkkəb danışıqların nəticəsində qəbul edilib.

Aİ-nin sanksiyalar üzrə xüsusi nümayəndəsi Deyvid O’Sallivan, ABŞ Dövlət Departamenti sanksiyaların koordinasiyası ofisinin rəhbəri Cim O’Brayen və Britaniya Xarici İşlər Nazirliyinin iqtisadiyyat, elm və texnologiyalar şöbəsinin başçısı Kumar Ayer iyunun 26-da bu məqsədlə Tbilisiyə səfər etmişdilər.

Bu səfərin ərəfəsində sözügedən rəsmi şəxslər bildirmişdilər ki, Gürcüstan paytaxtında Rusiyaya qarşı sanksiyaların effektli tətbiqi və bu məsələ üzrə dialoq üçün daimi xəttin açılmasını müzakirə edəcəklər.

Ekspertlər bildirirlər ki, görünür elə bu “daimi dialoq” Moskva ilə yaxşı münasibətlər saxlamağa çalışan Gürcüstan hökumətini qadağanın qəbuluna vadar edib.

Rusiyanın Ukraynaya qarşı tammiqyaslı təcavüzü başlanandan dərhal sonra, 2022-ci ilin 25 fevralında Gürcüstanın Baş naziri İrakli Qaribaşvili demişdi ki, Tbilisi Moskvaya qarşı heç bir ikitərəfli sanksiya tətbiq etməyəcək, belə ki, bu, Gürcüstanın maraqlarına ziyan vura bilər. Gürcüstan Rusiyaya qarşı Qərb sanksiyalarının yalnız bank-maliyyə sahəsinə qoşulub.

ABŞ polisinə Senatın inzibati binalarından birində silahlı şəxsin basqın etməsi barədə məlumat daxil olub.

Bu barədə Kapitoli polisi məlumat yayıb.

Bildirilir ki, polis binalarda əməliyyat tədbirləri həyata keçirib.

Məlumata görə, yerli saatla 14:30-da 911 xidmətinə Senat binasında atışma ilə bağlı zəng edilib. Polis inzibati binalarda axtarışlar təşkil edərək insanları sığınacaq tapmağa çağırıb.

“Yaralı və silahlı şəxs tapılmayıb”, - deyə məlumatda bildirilir.

Mənzil İnşaatı Dövlət Agentliyinin (MİDA) mənzilləri daşınmaz əmlak bazarına daxil olduğu müddət ərzində bazarda qiymətlərin xeyli artdığına baxmayaraq, “sosial mənzillər”in dəyəri demək olar sabit qalıb.

Bunu “Report”a açıqlamasında daşınmaz əmlak üzrə ekspert Nüsrət İbrahimov deyib.

“2016-cı ildən bəri mənzil bazarında qiymətlər xeyli artıb. O vaxt Yasamalda mənzilin bir kvadratmetri 850 manat idisə, indi iki min manat ətrafındadır. “Sosial mənzil”in ümumi dəyəri isə təqribən 4 000-5 000 manat artıb”, - N.İbrahimov qeyd edib.

Ekspert vurğulayıb ki, Bakıda köhnə tikili binalarda mənzillərin kvadratmetri hazırda 1 500 manat təşkil edir. Eyni ünvanda kiçik sahəli evlərdə isə qiymət 2 min manatdır. Yeddi ilə qiymətlər iki dəfədən də çox artıb:

“Qiymətlərin artımı ölkədə və dünyada baş verən proseslərlə bağlıdır”.

O qeyd edib ki, MİDA-nın satışa çıxardığı evlər sosial təminatlıdır və bu səbəbdən güzəştli qiymətlərlə satılır:

“Bu mənzillər aztəminatlı ailələr üçün nəzərdə tutulub. Nəzərə alaq ki, bu gün əmlak bazarında satılan evlərin təxminən 90%-dən çoxu ipoteka krediti hesabına satılır. Lakin aztəminatlı ailələrin orta aylıq gəliri bu kreditlər üzrə şərtlərə cavab vermədiyi üçün onlar MİDA-nın satışa çıxardığı mənzillərə üz tuturlar. Son nəticədə həmin kateqoriyaya aid olan ailələrin mənzil problemi həll olunur.

İkinci tərəfdən isə müəyyən müddətdən sonra “sosial evlər” təkrar bazara daxil olaraq daha baha qiymətə satılaraq təklifi qaldırırlar. Azərbaycanda xüsusən də Bakı şəhərində əhalinin artım tempi bir ilə 1% təşkil edir. Bu səbəbdən “sosial mənzillər” bazarın tələbini tamamlayır. Beləliklə bazarda zaman-zaman tələb-təklif balansının normallaşdığını müşahidə edirik”.


Əmlak eksperti Ramil Osmanlı bildirib ki, hazırda ipoteka kreditləri hesabına satılan mənzillər ümumi daşınmaz əmlak bazarının 7%-ni təşkil edir:

“MİDA-nın təklif etdiyi mənzillərin bazar payı heç 1% belə deyil. Düşünmürəm ki, daşınmaz əmlak bazarında böyük bir kütlə oturub gözləyir ki, “sosial evlər” satışa çıxarılsın. Qiymət fərqi belə olsa da mənzil alıcılarının sırf MİDA-dan mənzil almaq üçün gözləmələrini demək olmaz. Çünki, faktiki olaraq MİDA-nın xətti ilə mənzil almaq imkanları əlçatan görünsə də, qeyd olunan kateqoriyaya uyğun olan insanların sayı azdır”.

“Azərbaycan Rieltorlar Assosiasiyası” İctimai Birliyinin icraçı direktoru Elnur Azadov açıqlamasında bildirib ki, MİDA-nın ildə bir və ya iki dəfə satışa çıxardığı mənzillərin bazarda payı azdır:

“Onların satışa çıxardığı mənzilləri iki yolla əldə etmək olur - nağd və ya ipoteka krediti ilə. “Sosial evlər” nisbətən ucuz olduğu üçün onları əldə etmək hüququna malik olan bəzi insanlar bu mənzilləri nağd şəkildə almağa çalışırlar ki, bir müddət keçəndən sonra onları bazarda 10-15% bahasına satsınlar. Lakin satışa çıxarılan mənzillərin sayı az olduğu üçün bazara elə də təsiri olmur. Bu, yalnız fərdi olaraq həmin yaşayış kompleksində mənzil almaq istəyən vətəndaşlara cüzi təsir edə bilər”.

Müqayisə üçün qeyd edək ki, hazırda MİDA-nın satışa çıxardığı üç otaqlı, ümumi sahəsi 87 kvadratmetr olan mənzilin bir kvadratmetri 750 manatdan başlayır. Həmin ərazidə yeni tikili binalarda mənzilin bir kvadratmetri isə 1900-2100 manat ətrafında dəyişir.

Xatırladaq ki, güzəştlə mənzil əldə etmək hüququna malik olan şəxslər aşağıdakılardır:

Yaşı 35-dən çox olmayan gənc ailə üzvləri: şəhid, Vətən müharibəsi qəhrəmanının, Azərbaycan Milli Qəhrəmanının övladları, məcburi köçkün və ya ona bərabər tutulan şəxs, ən azı üç il dövlət ümumi təhsil müəssisəsində müəllim işləyən şəxs, fəlsəfə doktoru elmi dərəcəsi olan şəxs, idman sahəsində xüsusi xidmətləri olan şəxs, ən azı beş il jurnalist işləyən və Media Reyestrinə daxil edilmiş şəxs,

Yaşından və ailə vəziyyətindən asılı olmayaraq digər şəxslər: şəhid ailəsinin üzvü (əri, arvadı), Vətən müharibəsinin qəhrəmanı (özü, əri, arvadı), Azərbaycanın Milli Qəhrəmanı (özü, əri, arvadı), elmlər doktoru elmi dərəcəsi olan şəxs, ən azı 15 il dövlət qulluğunda qulluq edən, o cümlədən dövlət qulluğunun xüsusi növündə xidmət keçən şəxs, ən azı üç il hərbi xidmətdə olan, həmçinin ehtiyata və istefaya buraxılmış Azərbaycanın hərbi qulluqçuları, ən azı üç il daxili işlər orqanlarında xidmət keçən xüsusi rütbəsi olan şəxs, ən azı üç il elmi vəzifədə işləyən elmi işçilər, ən azı 15 il dövlət ümumi təhsil müəssisəsində müəllim işləyən şəxs, ən azı 15 il jurnalist işləyən və Media Reyestrinə daxil edilmiş şəxs.

“Qarabağa humanitar karvanın göndərilməsi Azərbaycan rəhbərliyi ilə razılaşdırılmayıb”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova mətbuat konfransı zamanı news.ru-nun sualını cavablandırarkən bəyan edib.

O, qeyd edib ki, məsələ ilə bağlı Rusiya sülhməramlılarını günahlandırmaq əsassızdır.
“Rusiya sülməramlı kontingenti fəal şəkildə prosesə qoşularaq vəziyyətdən çıxış yolu tapmaq məqsədilə hər iki tərəflə təmasdadır. Bu səbəbdən, hesab edirik ki, Rusiya sülhməramlılarının ünvanına hər hansı bir ittihamın səsləndirilməsi əsassızdır və onların bölgədəki vəziyyətin sabitləşməsinə yönəlmiş real səylərini əks etdirmir”, - deyə Zaxarova qeyd edib.

İsveçin paytaxtı Stokholmda Polisin icazə ilə parlament binası yaxınlığında aksiya keçirilib.

Məlumata görə, aksiyanın təşkilatçıları, İraqdan olan miqrantlar Salvan Momika və Salvan Naсem “Quran”ın bir neçə səhifəsini yandırıblar.

Əksəriyyəti jurnalistlər olan 50-yə yaxın insanın toplaşdığı aksiyada Momika və Nacem müqəddəs kitabı əvvəlcə təpikləyib, sonra ortasından bir neçə vərəqi qoparıb yandırıblar. Yanmış kitabı zibil qutusuna atıblar. Daha sonra bir başqa “Quran”ı da cırıb zibil qabına atıblar.

Çəkilmiş səddin o yanında dayanan müsəlmanlar bu cür hərəkətə ucadan etiraz ediblər.

Xəbər verdiyimiz kimi, bir neçə gün əvvəl Laçın postunda Xocalı soyqırımının iştirakçısı olan Xaçaturyan Vaqif Çerkezoviç həbs olunub.

Həbsə qədər Xaçaturyan beynəlxalq axtarışa verilmişdi.

Cebhe.info xəbər verir ki, Azərbaycanın beynəlxalq axtarışa verdiyi ermənilərin sayı 500-ə qədərdir. Onlardan ictimaiyyətdə tanınanların siyahısını təqdim edirik.

Beynəlxalq axtarışda olanlardan biri “Dağlıq Qarabağ Müdafiə Ordusu”nun 1994–2000-ci illər arasında “baş komandanı” və Daşnaksutyun partiyasına bağlı olan Daşink partiyasının separatçıların yanındakı nümayəndəsi Samvel Babayandır.

“Dağlıq Qarabağ Respublikasının prezidenti” elan edən Araik Arutyunyan, onun köməkçisi David Babayan, qondarma rejimin “müdafiə naziri” adlandırılan Cəlal Arutunyan və deputat Armen Babacanyan da beynəlxalq axtarışa verilən sırasındadır. Digər beynəlxalq axtarışa verilənlər isə silah qaçaqmalçılığı ilə məşğul olan “iş adamları”dır.

Belə ki, “Taşir” şirkətlər qrupunun prezidenti Samvel Karapetyan Qarabağa qanunsuz silah daşıdığı üçün beynəlxalq axtarışa verilib. Qeyd edək ki, Karapetyan dünyanın ən varlı erməni biznesmeni hesab olunur. O, Robert Koçaryanın həbsdən azadlığa çıxması üçün 4 milyon girov qoyan biznesmenlərin siyahısında idi.

Beynəlxalq axtarışda olan David Qalustyan da Ermənistanda silah baronu kimi tanınır və ləqəbi “Patron Davodur”.

“KOMEX” şirkətinin baş direktoru, eyni zamanda Rusiya erməniləri İttifaqının rəhbəri Ara Abramyan da qanunsuz silah qaçaqmalçılığına görə beynəlxalq axtarışda verilib.

Qondarma rejimin “XİN rəhbəri” David Babayan da Azərbaycanın beynəlxalq axtarışa verdiyi cinayətkarlardandır.

Beynəlxalq axtarışda olan ermənilərin siyahısında Aram Nikolyan da var. Xatırladaq ki, Nikolyan aprelin 14-də Ermənistanın paytaxtı İrəvanda keçirilən Ağır atletika üzrə Avropa çempionatının açılış mərasimində Azərbaycan bayrağını yandırmışdı.
Cebhe.info

Danimarka hakimiyyəti son dövrlər ölkədə Quranın yandırılması ilə müşayiət olunan aksiyaların qarşısını almaq üçün hüquqi vasitələr axtarır.

Modern.az xəbər verir ki, bunu Danimarka xarici işlər naziri Lars Lokke Rasmussen bildirib.

"Quranın yandırılması bir neçə şəxs tərəfindən törədilən dərin təhqiredici və ehtiyatsız hərəkətlərdir. Bu bir neçə şəxs Danimarka cəmiyyətinin dəyərlərini təmsil etmir", - Rasmussen deyib.

O vurğulayıb ki, Danimarka hakimiyyəti mənfi nəticələr ola biləcək xüsusi vəziyyətlərə müdaxilə imkanlarını araşdıracaq.

Qeyd edək ki, son günlər bir neçə ölkənin Kopenhagendəki səfirliyi önündə müqəddəs Quran kitabı yandırılıb.