 |
|
|
BMT-nin İnsan Hüquqları üzrə Ali Komissarlığına və Baş Katibə təqdim edilən hesabatda İranda artan edamları dayandırmaq və məcburi hicab qaydalarını geri götürməyə dair çağırış yer alıb.
Hesabatda İran bütün şəxslərin, o cümlədən etirazlar kontekstində və narkotiklə əlaqəli cinayətlərə görə edam cəzasına məhkum edilmiş şəxslərin edamını dərhal dayandırmağa və ölüm hökmünün tətbiqindən çəkinməyə də çağırış edilib.
Norveçdə yerləşən İran İnsan Haqları Təşkilatının məlumatına görə, təkcə bu il 350-dən çox iranlı edam edilib. Qeyd edilib ki, bu, ötən ilin eyni dövrü ilə müqayisədə 36% çoxdur.
Məhsa Əmininin Əxlaq Polisi tərəfindən öldürülməsindən sonra İranda baş verən ümummilli etirazlardan sonra edamların sayı daha da artıb.
Pakistan Prezidenti Arif Alvi Baş nazir Şahbaz Şərifin Milli Assambleyanın (parlamentin aşağı palatası) vaxtından əvvəl buraxılması barədə təqdimatını təsdiqləyib.
APA-nın xəbərinə görə, bu barədə dövlət başçısının mətbuat xidməti X sosial şəbəkəsində (köhnə Tvitter – red.) məlumat yayıb.
Azərbaycan Xarici İşlər Nazirliyi (XİN) 74-cü Beynəlxalq Astronavtika Konqresi ilə əlaqədar Azərbaycana gəlmək istəyən əcnəbilər və vətəndaşlığı olmayan şəxslər üçün viza prosedurlarının sadələşdirilməsi barədə məlumat yayıb.
XİN-dən Bakupost.az -a verilən məlumata görə, 74-cü Beynəlxalq Astronavtika Konqresi ilə əlaqədar Azərbaycan Respublikasına gələn əcnəbilər və vətəndaşlığı olmayan şəxslər 2023-cü il sentyabrın 20-dən oktyabrın 7-dək Azərbaycanın beynəlxalq hava limanlarında viza ala bilərlər.
Viza verilməsi üçün aşağıdakı sənədlərdən biri əsas hesab edilir:
74-cü Beynəlxalq Astronavtika Konqresinin beynəlxalq təşkilatçısı olan Beynəlxalq Astronavtika Federasiyasının müvafiq qaydalarına uyğun olaraq elektron qeydiyyat sistemi vasitəsilə qeydiyyatdan keçməni təsdiq edən sənəd;
74-cü Beynəlxalq Astronavtika Konqresi ilə əlaqədar Azərbaycan Respublikası Rəqəmsal İnkişaf və Nəqliyyat Nazirliyinin tabeliyində “Azərbaycan Respublikasının Kosmik Agentliyi (Azərkosmos)” publik hüquqi şəxsin rəsmi dəvət məktubu.
“ASAN Viza” sistemi vasitəsilə verilən birdəfəlik və ya çoxdəfəlik elektron vizanın rəsmiləşdirilməsi proseduru Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən həyata keçirilir. “ASAN Viza” sistemi vasitəsilə 3 iş günü müddətində verilən birdəfəlik elektron vizanın ölkədə qalma müddəti 30 günədək, çoxdəfəlik elektron vizanın ölkədə qalma müddəti 90 günədək müəyyən edilir.
Həmçinin “ASAN Viza” sistemi üzərindən qeyri-iş və bayram günlərindən asılı olmayaraq, əcnəbilər və vətəndaşlığı olmayan şəxslər birdəfəlik elektron vizanın sürətləndirilmiş qaydada 3 saat ərzində verilməsi məqsədilə www.evisa.gov.az internet səhifəsinə daxil olaraq müraciət edə bilərlər.
2018-ci ilin 15 may tarixindən etibarən Azərbaycan Respublikasının qanunlarında, Azərbaycan Respublikası Prezidentinin aktlarında və Azərbaycan Respublikasının dövlətlərarası və ya hökumətlərarası müqavilələrdə nəzərdə tutulmuş hallarda əcnəbilərə və vətəndaşlığı olmayan şəxslərə Azərbaycan Respublikasının beynəlxalq hava limanlarında “ASAN Viza” sistemi vasitəsilə birdəfəlik elektron vizanın verilməsi həyata keçirilir.
Azərbaycan Respublikasının beynəlxalq hava limanlarında vizaların “ASAN Viza” sistemi vasitəsilə verilməsi, habelə viza ilə əlaqədar ödənişlərin “ASAN ödəniş” sistemi vasitəsilə həyata keçirilməsi Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən təmin edilir.
Qeyd: Birdəfəlik elektron viza yalnız siyahıda qeyd olunan ölkələrin vətəndaşlarına rəsmiləşdirilir.
Birdəfəlik elektron viza veriləcək ölkələrin siyahısı.
Azərbaycanın beynəlxalq hava limanlarında vətəndaşlarına birdəfəlik elektron viza rəsmiləşdirilən ölkələrin siyahısı belədir: Oman, Səudiyyə Ərəbistanı Krallığı, Bəhreyn, Küveyt, Yaponiya, İndoneziya, Çin Xalq Respublikası, Koreya Respublikası, Malayziya, Sinqapur, İsrail.
Aşağıda göstərilən hallarda və şəxslərə Azərbaycan Respublikasının beynəlxalq hava limanlarında ölkədə qalma müddəti 30 günədək müəyyən edilmiş viza rəsmiləşdirilir:
1. Qətər Dövləti, Oman Sultanlığı, Səudiyyə Ərəbistanı Krallığı, Bəhreyn Krallığı və Küveyt Dövləti vətəndaşlarını müşayiət edən və eyni zamanda həmin ölkələrin rezident kartına sahib olan şəxslərə.
2. Birləşmiş Ərəb Əmirliklərində 6 aydan çox etibarlılıq müddəti olan rezident vizasına malik olan şəxslərə.
3. Yalnız Nyu York-Bakı reysi ilə səfər edən Amerika Birləşmiş Ştatlarının vətəndaşlarına.
4. Azərbaycan Respublikasında yaşayan ailə üzvünün vəfatı ilə əlaqədar Azərbaycan Respublikasına gəldikdə (ailə üzvünün vəfatını təsdiq edən sənəd əsasında).
5. Ərazisində Azərbaycan Respublikasının diplomatik nümayəndəlikləri, konsulluqları akkreditə olunmayan və Azərbaycan Respublikası ilə birbaşa hava əlaqəsi olan xarici ölkələrin vətəndaşları Azərbaycan Respublikasına gəldikdə.
Milli Tibbi Xilasetmə Qrupu (UMKE) könüllüləri zəlzələ və fəlakətlərdə erkən xilasetmə fəaliyyətləri həyata keçirəcəklər.
Trend-in TurkicWorld-ə istinadən məlumatına görə, bu barədə Türkiyənin Səhiyyə naziri Fəhrəttin Koca deyib.
F.Koca nazirliyin Bilkent şəhərciyində 7-13 avqust Milli Tibbi Xilasetmə Qrupu (UMKE) Həftəsi münasibətilə keçirilən və 81 vilayətdən UMKE könüllülərinin qatıldığı proqramda iştirak edib.
Səhiyyə naziri qeyd edib ki, formalaşacaq "ATAK" strukturu ilə UMKE könüllülərinə milli və beynəlxalq sertifikatlı təlimlər, zəlzələ və digər fəlakətlərdə erkən xilasetmə fəaliyyətləri həyata keçiriləcək.
"Bu gün 30 bölgə və 81 vilayətdə təşkil edilmiş 15 min 200 UMKE könüllü səhiyyə işçimiz var. Bütün UMKE könüllülərimiz Ümumdünya Səhiyyə Təşkilatının Beynəlxalq EMT Tip 2 yoxlamasına malikdirlər”, - deyə nazir bildirib.
O əalvə edib ki, dünyada nadir görülən bu könüllü hərəkatı həm axtarış xilasetmə, həm də tibbi dəstək verən bir sistemə çevriləcək.
Qeyd edək ki, fevralın 6-da Kahramanmaraşda baş verən zəlzələlərdə 5 332 UMKE əməkdaşları zəlzələ bölgələrində axtarış-xilasetmə işləri aparıb.
Qarabağda müvəqqəti yerləşdirilən Rusiya sülhməramlılarının şərti sərhəddə ermənilərin keçirməyə hazırlaşdıqları etiraz aksiyasında separatçıları müşayiət etməkdən və təhlükəsizliklərini təmin etməkdən rəsmən boyun qaçırması onları qıcıqlandırıb.
Bu rədd cavabını həzm etməyən separatçıların nümayəndəsi Artur Osipyan bildirib ki, əgər ruslar bizi rədd etdilərsə, biz özümüz Həkəri körpüsünə getməyə hazırıq.
Baş verənlərin məntiqinə aydınlıq gətirən erməni fəal İşxan Verdyan Artur Osipyanı axmaq adlandırıb:
“Ya axmaqdır, ya da kiməsə arxalanır”.
Daha ətraflı Baku TV-nin süjetində:
Qlobal Cənubun bir çox ölkələri Ukrayna münaqişəsinin həllində Rusiyaya təhlükəsizlik zəmanətlərinin verilməsini zəruri hesab edirlər.
Ukrayna lideri Vladimir Zelenskinin Braziliya Prezidenti Luiz İnasiu Lula da Silvanın Ukrayna münaqişəsinin nizamlanmasında Rusiya Federasiyasına təhlükəsizlik zəmanətləri ilə bağlı sözlərinə mənfi reaksiyası Kiyevin Səudiyyə Ərəbistanında keçirilən görüşdə uğursuzluğunu təsdiqləyir.
Rusiyalı senator Aleksey Puşkov belə hesab edir.
"Zelenskinin Braziliyanın mövqeyinə qıcıqlanması Ciddədəki görüşün bəzi Qərb mediasının göstərməyə çalışdığı kimi, Ukrayna ilə həmrəylik nümayişinə çevrilmədiyinin daha bir sübutudur", – deyə siyasətçi özünün "Telegram" kanalında Zelenskinin Səudiyyə Ərəbistanındakı görüşdən sonra Lula da Silva haqqında tənqidi bəyanatlarını şərh edərkən yazıb.
Senatorun sözlərinə görə, Qlobal Cənubun bir çox ölkələri Ukrayna münaqişəsinin həllində Rusiya Federasiyasına təhlükəsizlik zəmanətlərinin verilməsini zəruri hesab edirlər.
Zelenskinin Lula da Silvanın Rusiya Prezidenti Vladimir Putinlə "razılaşmamalı" olduğuna dair bəyanatını şərh edən Puşkov vurğulayıb ki, Braziliya prezidentinin Ukrayna rəhbərinin bu cür məsləhətinə ehtiyacı yoxdur.
Xatırladaq ki, avqustun 5-6-da Ciddədə, Ukraynadakı vəziyyətin həlli üzrə, təxminən otuz ölkə nümayəndəsinin iştirak etdiyi məsləhətləşmələr keçirilib. Daha əvvəl xəbər verildiyi kimi, danışıqlar zamanı heç də bütün ölkələr Zelenskinin təklif etdiyi "sülh formulu" ilə razılaşmayıb.
Sputnik
Ukraynada qanlı müharibənin davam etməsinə baxmayaraq, ölkə parlamentinin bəzi üzvləri xarici ölkələrdə istirahət etməkdən vaz keçmək istəmirlər. Ən acınacaqlısı isə odur ki, əksər hallarda bunlar hakim “Xalqın xidmətçisi” partiyasının üzvləridir.
“AzPolitika.info” Ukrayna mətbuatına istinadla xəbər verir ki, parlamentdəki hakim fraksiyanın başçısı David Araxamiya deputat Boqdan Toroxtiyin fraksiyadan və partiyadan qovulacağını bəyan edib. O, həmçinin bu deputatın öz mandatından da imtina etməsini tələb edib.
Ukraynada müharibə dövründə məmurların bəzi istisna halları çıxmaq şərtilə ölkəni tərk etməsi qanunla qadağandır. Buna baxmayaraq, Toroxtiy bu qadağanı pozaraq, Bolqarıstana istirahətə gedib.
Araxamiya həmçinin bildirib ki, Toroxtiy ailəsi ölkənin varlı ailələrindən biri olmasına baxmayaraq, Ukrayna Silahlı Qüvvələrinə heç bir yardım göstərməyib və bu da azmış kimi, öz mülklərini dövlətə icarəyə verərək, bundan pul qazanmaqda davam edib. Araxamiya həmin vəsaitlərin də dövlətə qaytarılmalı olduğunu bildirib.
Qeyd edək ki, bundan öncə hakim partiyadan olan deputat Yuri Aristov da daxil olmaqla bir neçə tanınmış şəxs istirahət üçün ölkəni tərk etdiklərinə görə cəzalandırılıblar.
Rusiya Federasiyası Təhlükəsizlik Şurasının sədr müavini Dmitri Medvedev Telegram kanalında Rusiya-Gürcüstan “beş günlük müharibəsi”nin ildönümü ilə bağlı açıqlama verib.
Tribunainfo.az xəbər verir ki, O, Rusiyanın Gürcüstan-Cənubi Osetiya münaqişəsində iştirakı ilə Rusiyanın Ukraynadakı xüsusi hərbi əməliyyatı arasında analogiya aparıb.
Məhz 2008-ci ildə Rusiya prezidenti postunu tutan Dmitri Medvedev avqustun 8-də Cənubi Osetiyanın münaqişə zonasında sülh əməliyyatının başlandığını elan edib.
“Saakaşvili (Gürcüstanın eks-prezidenti Mixail Saakaşvili) artıq Rusiya sərhədlərinin bilavasitə yaxınlığında vəziyyəti gərginləşdirməyə çalışan kollektiv Qərb tərəfindən dəstəklənirdi. Silahlı qüvvələrimiz Abxaziya və Cənubi Osetiyada yaşayan xalqımızı düşməndən qorudu”, – deyə o yazıb.
Dmitri Medvedevin sözlərinə görə, 2008-ci ildə ABŞ və onun vassallarının təcrübəsi açıq şəkildə yox idi. Lakin indi, Rusiya Federasiyası Təhlükəsizlik Şurasının vitse-prezidentinin hesab etdiyi kimi, onlar növbəti dəfə başqalarının əli ilə cinayətkar müharibə aparır, Rusiyanı yer üzündən silməyə çalışırlar.
“Bütün NATO sistemi praktiki olaraq bizə qarşı açıq mübarizə aparır. Xüsusi hərbi əməliyyatın bütün problemlərini həll etmək üçün kifayət qədər gücümüz var. 2008-ci ilin avqustunda olduğu kimi, düşmənlərimiz məğlub olacaq və Rusiya öz şərtləri ilə sülhə nail olacaq”.
Məqsədimiz 9 noyabr 2020-ci il bəyanatının bəndlərindən birindən istifadə edərək Rusiya hərbi kontigentini iki ildən sonra evinə yol salmaq və bununla Azərbaycan torpaqlarında separatçılığa birdəfəlik son qoymaqdır. Bu həm də strateji müttəfiqimiz Türkiyənin də məqsədidir ki, bunu Cumhurbaşqanı Rəcəb Tayyib Ərdoğan NATO son Vilnyus zirvə toplantısında açıq şəkildə səsləndirib. Top Rusiya prezidenti Vladimir Putinin meydanındadır, ancaq o bu məsələylə bağlı fikrini hələ söyləməyib. Kreml sahibinin mövqeyini öyrənməyin bir yolu var.
Rusiya prezidenti bu ayın sonunda Türkiyəyə rəsmi səfər edəcək, Putin Ərdoğanla müxtəlif məsələləri, o cümlədən Azərbaycan-Ermənistan danışıqlarını və Zəngəzur dəhlizini müzakirə edəcək. Prezidentlər böyük ehtimalla müzakirələrin sonunda mətbuatın qarşısına çıxacaqlar. Türkiyədə bu növ toplantılarda 4 suala imkan verilir, ikisini yerli jurnalist, ikisini qonaq jurnalist verir.
Yerli jurnalistlərdən birinin “Cənab Putin, Rusiya Azərbaycanın istəyi ilə iki ildən sonra Qarabağdan hərbi kontingentini çıxarmağa hazırdırmı” sualını səsləndirməsinə ehtiyacımız var.
Elxan Şahinoğlu
Teref.az
“Zəngəzur dəhlizi reallaşacağı təqdirdə Azərbaycanın Ermənistanın Sivnik vilayətindən keçməklə və erməni keçid məntəqələri olmadan Naxçıvan Muxtar Respublikasına maneəsiz çıxışını təmin edəcək. Bu, İranla Ermənistanın sərhədlərinin həmişəlik kəsiləcəyi anlamına gəlir”.
Ovqat.com-un məlumatına görə, İranın Camaran xəbər agentliyinin “Azərbaycanın İrana qarşı davranışının geosiyasi kökləri və onun İranın siyasi coğrafiyasına təsiri” sərlövhəli məqaləsində bu barədə bildirilir.
Məqalədə qeyd olunur ki, 1991-ci ildə 3 Cənubi Qafqaz respublikası Azərbaycan, Ermənistan və Gürcüstanın müstəqillik əldə etməsi və regionda yeni geosiyasət formalaşması ilə bu coğrafiya dünyanın ən mühüm strateji nöqtələrindən birinə çevrildi. Cənubi Qafqaz əhəmiyyətinə, geosiyasi və geoiqtisadi statusuna baxmayaraq, etnik və ərazi münaqişələri, siyasi qeyri-sabitlik, ziddiyyətli siyasi tendensiyalar, regionda əməkdaşlıq edən güclərin təhlükəsizlik strukturunun, iqtisadi və sosial inkişafın olmaması baxımından həmişə təhlükəsizlik təhdidləri və çağırışları ilə üzləşib. Görünür, sülh bu regionda əsrlər boyu mənasını itirmiş çatışmayan açardır.
Bu arada Qafqazın strateji mövqeyi və enerji resursları regional və qlobal aktorların və güclərin diqqətini cəlb edib. Sözügedən aktorların hər biri yumşaq güc, ənənəvi diplomatiyadan ictimai diplomatiyaya qədər geniş siyasətlər daxil olmaqla müxtəlif alət və siyasətlərdən istifadə etməklə regiona təsir göstərməyə və öz xarici siyasi məqsədlərini irəli sürməyə çalışırlar ki, bu da öz növbəsində bölgə ölkələrinin bir-birinə zidd məqsəd və məramlarının, eləcə də proseslərdə iştirak edən aktorların maraqlarının toqquşması kimi məsələlər bölgədəki vəziyyəti mürəkkəbləşdirir.
Rusiya, Türkiyə, İran kimi regional güclərin və ABŞ, NATO, sionist rejim kimi regiondankənar güclərin təsir və təzyiqi regionda güc nizamlanmasının tərkib hissəsi hesab olunur. Nəticədə Azərbaycan Respublikası ilə Ermənistan arasında Qarabağ bölgəsinin kimə aidiyyəti ilə bağlı mübahisələr, 2003-cü ildə Gürcüstanda baş verən rəngli inqilab, Cənubi Osetiya, Abxaziya və Acariya problemləri və bəzi region ölkələrinin bu prosesə qoşulmaq cəhdləri ortaya çıxıb. Həmçinin Qərbin siyasi və təhlükəsizlik tədbirləri də Cənubi Qafqazdakı bugünkü mənzərəni meydana gətirib.
Azərbaycan Respublikasının siyasi coğrafiyası
Qafqazın cənub-şərqində və Xəzər dənizinin qərb sahilində yerləşən Azərbaycan Respublikası cənubdan İran, qərbdən Gürcüstan, Ermənistan və Türkiyə, şimaldan Rusiya (Dağıstan Muxtar Respublikası) ilə həmsərhəddir, paytaxtı isə Bakı limanıdır. Sahəsi 86,6 min kvadrat kilometr olan bu respublika Cənubi Qafqazın təxminən 46%-ni tutur və regionun ən böyük ölkəsi hesab olunur.
Bu ölkə Sovet İttifaqı dağıldıqdan sonra 1991-ci il noyabrın 18-də müstəqillik əldə edib və 1992-ci ilin martında BMT-yə üzv olub. Müstəqilliyini yenicə əldə etmiş Azərbaycan Respublikasının əsas qayğıları əsasən siyasi və təhlükəsizlik strukturlarının sabitləşməsinə əsaslanır...
Şübhəsiz ki, Azərbaycan Respublikası üçün ən mühüm təhlükəsizlik təhdidi həll edilməmiş Qarabağ münaqişəsidir. Bu böhran 1988-ci ildə Azərbaycan və Ermənistanın müstəqillik əldə etməsindən bir müddət əvvəl başlamış və hər iki tərəf Azərbaycan Respublikasının sərhədləri daxilində olan Qarabağ bölgəsi uğrunda mübarizə aparmış və nəhayət, 1992-ci il müharibəsi zamanı Azərbaycan Respublikası ərazisinin təqribən 20%-ni əhatə edən Qarabağ bölgəsi və ona bitişik yeddi rayon Ermənistanın nəzarətinə keçmişdi. Bu gün Bakı hökuməti Ermənistanın mərkəzi hakimiyyətinin zəifliyindən faydalanaraq və Türkiyənin qeyd-şərtsiz dəstəyi ilə mübahisəli əraziləri geri ala bilib.
Naxçıvan rəsmi Bakının Axilles dabanıdır
Naxçıvan Muxtar Respublikası 3 ölkənin: İran, Ermənistan və Türkiyənin əhatəsində yerləşir. Bu region Azərbaycan Respublikasının təcrid olunmuş ərazisinin bir hissəsidir və ərazi kəsilməzliyi məsələsi Azərbaycan Respublikasının dövlət xadimlərinin ən böyük geosiyasi-ərazi problemidir.
1932-ci ildə İran və Türkiyə arasında sərhədlərin delimitasiyası ilə bağlı aparılan danışıqlar zamanı Qarasu ərazisi I Pəhləvi tərəfindən inanılmaz şəkildə Türkiyəyə verildi və Türkiyə Naxçıvan bölgəsinə birbaşa ərazi çıxışı əldə edə bildi. Görünür, Türkiyənin I Pəhləvi ilə səmimi münasibətləri mehriban qonşuluqdan irəli gəlmirdi. Dar “Qarasu” dəhlizinin təhvil verilməsi bir tərəfdən ilk Pəhləvi hökumətinin yanlış hesablama və strateji səhvini, digər tərəfdən də türk dövlət xadimlərinin strateji hesablamalardakı uzaqgörənliyini göstərir ki, bu da uzunmüddətli perspektivdə Naxçıvan bölgəsinin İrandan asılılığı azaldır və qarşılıqlı olaraq Türkiyənin Qafqazdakı fəaliyyətinə, xüsusilə Naxçıvanda təsirini artırmaq üçün əlverişli imkan yaradır.
Hökumət siyasətləri zamanla dəyişir, lakin sabit qalan coğrafiya və ərazilərdir. Siyasi davranışlar da məhz bu coğrafi-ərazi komponenti əsasında formalaşır. Bu gün Azərbaycan hakimiyyətinin əli İranın Naxçıvanla qonşuluğundan asılı olmayaraq Türkiyəyə uzanır, lakin Qarasu ərazisi Türkiyəyə verilməsəydi, şübhəsiz ki, Azərbaycan hakimiyyətinin İrana qarşı daha barışdırıcı davranışı müşahidə olunardı.
Ermənistanın cənubunda və İranın qonşuluğunda eni təxminən 42 km olan “Zəngəzur” və “Mehri” dəhlizləri Naxçıvan Muxtar Respublikasının Azərbaycan ərazisindən ayrılmasına səbəb olub. Çox mühüm məqam ondan ibarətdir ki, bu ərazi kəsiminin Azərbaycana təsiri Ermənistanın Azərbaycan ərazilərinin bir hissəsini işğal etməsindən də böyük olmuşdur.
Amma bu gün rəsmi Bakının dövlət xadimlərinin Qarabağ və Laçın rayonundakı mübahisəli ərazilərdən kənarda da tələbləri var və onlar İrəvandan Ermənistan ərazisindən Naxçıvan bölgəsinə birbaşa keçidin yaradılmasını tələb edirlər və maraqlıdır ki, ona təzyiq də göstərirlər. Bu vaxta qədər erməni hakimiyyətləri İranın qonşuluğunda idilər və bizə cənub yolu üzərindən keçid vermişdilər.
Zəngəzur dəhlizi açılacağı təqdirdə isə Azərbaycan Ermənistanın Sünik vilayətindən keçməklə və erməni keçid məntəqələri olmadan Naxçıvan Muxtar Respublikasına maneəsiz çıxışı əldə edəcək. Bu, İranla Ermənistanın sərhədlərini həmişəlik kəsiləcəyi anlamına gəlir.
Bu gün İran 15 ölkə və 24 hökumətlə qonşudur. Azərbaycanın Naxçıvana qoyduğu keçid bərqərar olarsa, İranın Qafqaz regionunda geosiyasəti, eləcə də milli maraqları əsaslı şəkildə dəyişəcək və İranın Ermənistan vasitəsilə Avropaya ərazi çıxışı həmişəlik itirəcək.
Tərcümə etdi: Ovqat.com